N dë waa n dhe ˗wo ˗kun Katolikö ˗zlanwopömɛn ꞊dede ˗nu ˈka. ˈˈKɛɛ ˈdhɛ ˈwo˗ yö Biblö ˈgü ꞊dhɛ ˗Zlan ˈtɔ ˈnën ˗tɔ Zoova, ˗kɔ ˈwo˗ ˗bha ꞊plɛ wo ˗ya Zoova ˗dhɔkësü ˗bha ꞊dedewo. N dë ˗yö ˗kun ˈˈdhüɲënmɛn ˈka, ˈö Yesu ˈˈbin ˗nu ɲën. ˈˈKɛɛ ˗yö ö ꞊kwaa˗ yö ˈö ˈbhë ˗a ˗zü ˈö yi ˗bha ˈkɔ gɛnŋdhɛ ꞊baa kö ˗yö kë ˗bhɔkwëëkëgükɔ ˗blɛɛsü ˈka San Ʒuan Dɛlö Mɔnte ˗dhɛ ˈö Manii Filipidhö ˈˈkwipö ˈkpii˗ ˈˈsuee bhë ˗a ˈgü.

ˈDhɛ ˈa bhɔ ˗kwɛ 1952 ˈgü, n ˗mɛn ˗nu ˗wo ˗ya n ꞊klaŋkësü ˗bha ˈwɔn ˈö ˗gban Zoova ˗bha ˗a ˈka ˈpö ꞊dhɛ n dhoo ˗nu ˗yiishiö waa n ꞊dhegbaan ˗nu ˗yaaga ˈdhö. ˈDhɛ ˈa ˗ya ˈˈgla ˗sü ˗bha, n dë ˗yö n ꞊faanmën kö ˈa Biblö ˗wo pö ˗dhɛkpaɔyi ˈˈpɛpɛ ˈka, ˈö n ꞊klaŋkë ˈzü kwa ˗bha ˈsëëdhɛ ꞊va ˈgü. ˈˈTʋ̈ŋ ˈbha ˗nu ˈka, n ˗mɛn ˗nu ˗wo ˗maankëmɛn ˗nu waa kwa ꞊dhegblü ˗nu ˈwo go Betɛdhö ˗an ˗dhɛ yi ˗gɔ ˈkɔɔ kö yi kë yi ˈko ꞊bhaa. Kwa ꞊dhegblü ˗nu ˈwo bhë ˗an ˗bha ˗bɔagüwɔn ˗nu ˗blɛɛ yi ˗dhɛ ˗sü ˗yö yi ˗bha ˈkɔdhigümɛn ˗nu ꞊faanmën, ˈö yi zuʋ̈ˈˈ ꞊nii ˗da ꞊dedewo. ˗A ˗wɔn ˈgü, ˗yö yi ˗takun kö yi ˗Zlan ˗bha yö ˗wɔn bɔ ˈˈdhiʋ̈ yi ˗bha ˗tosɛta ˈgü.

N ˗mɛn ˗nu ˗bha ˗kë Zoova ˗dhɔkëmɛn ˈka ˗sü ˗wɔn ˈgü, ˗wo ˈwɔnzuan ˗së ꞊dede ˗to n ˗gɔ. ˈDhɛ n dhe ˗wɔn ˗yö ˗kë, yaa n dë yi ˗kë ˗yödhiʋ̈ ˈka yi ˈkwëë˗ ˗kwɛ 1971 ˈgü. ˈˈKɛɛ ˈdhɛ ˈkwa dɔ ˗kwɛ 1973 ˈgü kö n ˗kwɛ ˗ya kë 20, n dë ˗wɔn ˗yö ˗kë ˈpö. N ˗mɛn ˗nu ꞊plɛ ˈwo bhë ˗an ˗bha ga ˗sü ˗ya ˗kë ˈö ˗kë ꞊dhɛ ˈpë ˈa n do ˈka ˗a ˈdhö. ˈˈKɛɛ ˗zoyödhe ˈö Biblö ˈgü «ˈö˗ ˗gɛn ˗gban ˗a ˗ta pë ˈdhö ˈgbee˗» bhë ˗ya ˗kë ˈö n ˗gɔ ˈgü ˈti dɔ ˗gbɔudhö, ˈö ˈa to Zoova ˈˈsuee. (Ebl. 6:19) ˈDhɛ n dë ˗wɔn ˗yö ˗kë ˈö ˈˈtʋ̈ŋ ˈbha ˗yö ˗ʒiö, a ˗we ˗a ˗bha kö ˈa kë ˗yödhiʋ̈ ˗detasü ˈka ˈˈsɛ ˈö ˈˈyi ꞊zinŋgü ˈwo˗ ˗dhɛ Korɔn, Palawanö ˈˈpian ˗ta bhë ˗a ˈgü.

ˈDhɛ ˈa ˗wo Korɔn kö n ˗kwɛ ˗yö 21. ˗A ˗dhɛ ˈö ˈˈdhʋ̈ ˈˈshiʋ̈ bhüʋˈˈ waa ˈˈyi ˈwaa ˈkɔ ˗nu ˈgü ˗së ˈka, ˗ya ˈgo mü gɔ waa moto ˈwaa mü ꞊va ˈˈkɛɛ kö man ˗zë a ˗gla ˈˈkwipö ˈkpii˗ ˈgü. ˈDhɛ ˗kë ꞊dhɛ kwa ꞊dhegblü  ˗nu ˈwaa kun mü ꞊va bhë n yökëyoo ˈyaa kun ˗dhö, ˈö ˈˈtʋ̈ŋ ˈbha ˗nu ˈka ˈa ˗zlanwopö n do ˈka. ˈˈSu ˗blɛɛsü ˈa˗ ˗kë mü bhë, n ˗man ˈkɔdhigümɛn ˗nu waa n ˈˈtɔŋdë ˗nu ˗dhɔ ˗kun n kë ˗ni ˈgü. ˈKwa dɔ gbeŋ ˈman ˗gbɔdënën ˗nu ˗ga dhaŋ˗ ˈgü, a ˗ya ˈˈgbʋ bɔ ˗sü ˗bha. ˗Yö ˗kun n ˈˈpiʋ̈ ˗be kö ˈa n ˗man ˗yödhiʋ̈ ˗dhɛ ˈduannu kö ˈa n ꞊yɛɛ˗ kë.

ˈˈTʋ̈ŋ ˗nu ˈwo ˈˈdhʋ̈ ˗an ˈgü ˈwɔn ˗nu ˈwo kun n ˗ta waa ˗kɔ ˈa ˗kë ˗a ˈka n ˗de ˈgü, a˗ ꞊gban ˗blɛɛ Zoova ˗dhɛ. N ˗zo ˗yö ˗bo mɛn ꞊faanmën ˗wo ˗nu ˈa ˗an ˗wo pö Biblö waa kwa ˗bha ˈsëëdhɛ ˈgü ˗an ˈka. N ˗zo ˗yö ˗da Psaume 19:14 ˈˈpiʋ̈ ˗kplawo. ˈMan n ˗zota pë ˗nu ˈwo Zoova ˗dhɛ ˗së ˈö˗ ˈbha ˗nu ˗kë ꞊dhɛ ˗a ˗bha yö waa ˗a ˗bha ˈˈklʋʋsë ˗nu ˈdhö bhë ˗an ˈgü, a˗ ˗yö ꞊dhɛ Zoova ꞊mɔɔn˗ ˗bha ˈö ˗kë «n ˗man ˗Gwë gbɔŋ˗ waa n ˗Gɔtadhɔmɛn» ˈka. ˈWɔn ˗gɔ ˈö ˗kë « Vous n’êtes jamais seul » a ˈka ˈˈGlaadhiʋ̈ ˗tɔn ˈgü bhë, ˗yö n ˗takun ꞊dedewo. A˗ ˗wo ˗pö ˗gɛnɲan ˈka ꞊va. N ˈti ˈto n do ˈka. Yaa Zoova yi ˗kë yi ˈko ꞊bhaa, ˈa ꞊bhɛɛ ˗a ˗dhɛ, ˈa kwa ˗bha ˈsëëdhɛ ˗nu ꞊draan, ˈa n ˗zota ˗an ˈgü.

ˈDhɛ ˈa ˗wo Korɔn, ˗a ˗dhɛ ˈti ꞊gwëë ˈö ˈa ˗kë mɛn zii ˈka. Man do ˈnën ˈa kun mɛn zii ˈka mü. ˗A ˗wɔn ˈgü, a ˗ya ˈˈdhiʋ̈sü ˗sü ˗bha ˗bhɔkwëë ˗nu ˈwo ˈˈdhoogɔ ˈgü ꞊zinŋgü ˈwo ˗kë ꞊dhɛ École du ministère, Réunion de service, Étude biblique de la congrégation waa ˈˈGlaadhiʋ̈ ˗tɔn ˗nu ˈdhö bhë ˗an ˈka. ˈˈDhoogɔ ˈˈpɛpɛ ˈka, a ˈˈdhɛɛtadhiaŋ˗ ˗zë. Pë ˗nu ˈwo bhë ˗wo ˈti ˈˈtʋ̈ŋ ˈto n ˗gɔ kö ˈa ˗ya n ˗de ˗wɔn zɔnŋ ˗ta!

ˈWɔn ˗së ꞊va ˗yö ˗go n ˗man ˗zlanwopösü ˈgü Korɔn. N ˗man Biblö ꞊klaŋnën ꞊vadhɛ ˗wo ˗bɔ ˈˈyi ꞊bhaa. ˈˈKɛɛ ˈkö ˗kë ˈˈdhʋ̈, ˈwɔn ˈˈgbɩɩ˗ ˈbha ˗nu ˗kun mü. ˈˈTʋ̈ŋ ˈbha ˗nu ˈka, a ˗dhɛkpaɔyi ˈˈgbu ˗kë ˈˈtasüsü ˈgü ˈö ˗dhɛ ˗de ˗ʒiaan ˈa dho wɔ ˗a ˗bha ˈmaan kun ˗a dɔ ˗ni ˈgü. Yi ˗bha ˗zlanwopödhɛ ˈbha ˗nu ˗kun ˈˈsɛ ˈdɛdɛ ˗nu ˈwo kun ˗ya ˗sü ˈka ˈˈyi ꞊zinŋgü ˗an ˈka. ˈKö ˗kë ˈzü ꞊dhɛ ˈmaan ˈˈyi kë ꞊dhɛ ˗dɔ, a ˗ya ˈˈyitagɔ ˈnën ˈsɛɛn˗ ˗nu ˈö˗ motëë˗ ˈdhö˗ mü ˗an ˈgü ꞊weeyi ˗ta, ˈˈtee ˈˈgbɩɩ˗ ˗nu ˈgü ˈa dho ˗zlanwopö. ˈˈTʋ̈ŋ ˈˈgbɩɩ˗ ˗nu ˈwo ˈˈdhʋ̈ ˗an ˈgü, Zoova ˗yö n ˗takpa, ˈö n ˗takun. ꞊Taabha, a˗ ˗yö ꞊dhɛ Zoova ˗kun n baaˈˈ ˗ni ˈgü ˈwɔn ˈˈgbɩɩ˗ ˗dhɛ ˗nu ˈwo kun n ˈˈdhiʋ̈ ˈˈgan ˗ni ˈgü yö ˈö dho ˗a dɔ n ˗kɔ ˈka dhiʋ̈ˈˈ bhë ˗an ˗bha.

˗Kwɛ 1978 ˈgü, ˗wo n ˗bɔ Papuazi Nuvɛlö Gine Ɔsitradhi ˈˈdhuŋ ꞊ʒian. ˈˈSɛ ˈö bhë ˗tɔn ꞊va ˗wa ˈgü ˈö go mü pë ˈdɛdɛ ˈnën ˈö to kö waa Ɛsüpaɲö ˈˈsɛ ˗wo ˗mɔn ˈˈkwöö. ˈDhɛ ˈa˗ ˈwɔn dɔ ꞊dhɛ mɛn ˈˈmliɲɔn ˗yaaga ˈwo ˈˈsɛ ˈö bhë ˗a ˈgü, ˗wo ˈö ˗ʒiö 800 ˗ta ˗wa ˗pö, ˗a ˈwɔn ˗yö n ˗kun ꞊dedewo. ˈWɔn ˗së ˈö kun mü ˈyö ˗tɔ ˗a mɛn ꞊vadhɛ ˗wo Melanesian ˗wo ˈö ˗kë Piʒinö ˈka ˈwo˗ dhɛ Tɔkö Piʒinö bhë, ˗a ˗pö.

˗Wo n ˗bɔ ˈˈtʋ̈ŋ ˈbha ˈˈpiʋ̈ ˗zlanwokɔdhi ˈwo ꞊Glee˗ ˗wo pö mü, ˈˈkwipö ˈkpii˗ ˈgü Pɔɔ Morɛsbi bhë ˗a ˈgü. ˈˈKɛɛ a ˗dho ˗zlanwokɔdhi ˈwo Tɔkö Piʒinö ˗wo pö mü ˗a ˈgü kö ˈa˗ draanˈˈ. ˗Wo ˈa kun ˗a draanˈˈ ˗ni ˈgü ˈˈdhʋ̈ a ˗bɔ ˗a ˗ta ˈa ˗zlanwopö mɛn ˗nu ˗dhɛ. ˗A ˗kë ˈˈdhʋ̈ ˗sü ˗yö n ˗takun ˈa˗ dɔ ˈˈvaandhö. ˗A yi ˈti ꞊gwëë ˈa ˗ya ˈˈdhɛɛtadhiaŋ˗ zë ˗sü ˗bha Tɔkö Piʒinö ˗wo ˈgü. Kö n ˈti ˗kwɛ do kë Papuazi Nuvɛlö Gine ꞊köŋ, ˗wo n ˗kë ˈˈpian do ˈˈpiʋ̈ ˗maankëmɛn ˈka Tɔkö Piʒinö ˗wo ˈgü kö ˈa ˗wo ˗zlanwokɔdhi ꞊va ꞊dede ˗dhɛ ˈˈsɛ ˈkpii˗ ˈö bhë ˗a ˈgü. ˗A ˈwɔn ˗yö n ˗kun ꞊dedewo.

ˈDhɛ ˗kë ꞊dhɛ ˗zlanwokɔdhi ˗nu ˗wo ˗kun wo ˈko ˈka ꞊glɛɛn bhë, a ˈpian do ˈˈpiʋ̈ ˗bhɔkwëë ꞊va ˗ya, ˈö ˈa ˗wo ˗zlanwokɔdhi ˗nu ˗dhɛ ꞊dedewo. ˗A züdɔdhɛ ˈgü, a ˗kë n ˗de ˈgü ꞊dhɛ mɛn ˈö ö do ˈka ˗a ˈdhö ˈyö sü ꞊dhɛ ˗dhɛŋ ˗mü n ˈka, ˈö yi ˗wo waa  yi wɔkɔ ˗nu ˈwaa do. ˈMaan kun ˗mɔn ˗ni ˈgü ˗a ˗bha kö ˈa bɔ ˗kpinŋ ˗nu ˈˈpiʋ̈ ˈa ˗wo ˗an ˗dhɛ, ˗a ˗gɛn ˗mü ꞊dhɛ ˗tɔn ˗nu waa googüdhɛ ˗nu ˗kun mü ꞊va. ˗A ˗wɔn ˈgü, n dua ˗mü kö ˈa ˗ya ˈviɔŋ˗ ˈgü ˈˈdhoogɔ ˈˈpɛpɛ ˈka. ˗Ya kë ꞊shiöŋ man do ˈnën ˈwo n sü ˈviɔŋ˗ ˈnën ˈˈtɩtɩ ˈö˗ shiʋ̈ˈˈ ˗dhɛ ˈdhö˗ ˗bha ˗a ˈgü . ˈˈTa ꞊suu ˗nu ˈwo bhë ˗wo ˗kun zuʋ̈dhiʋ̈tɛ ˗wɔn ˈka n ˗gɔ ˈpö ꞊dhɛ ˈˈtʋ̈ŋ ˈa ˗ya ˗a ˈka ˈˈyitagɔ ˈgü ˗a ˈdhö.

Telefɔnö ˈyaa kun mɛn ꞊vadhɛ ˗gɔ. ˗A ˗wɔn ˈgü, ˈsëëdhɛ ˈnën ˈa kun ˗an bɔ ˗ni ˈgü ˗zlanwokɔdhi ˗nu ˗dhɛ. ˗Ya kë ꞊shiöŋ a ˗lo ˈsëëdhɛ ˗nu ˈwo ˈˈdhʋ̈ ˗an ˈˈdhiʋ̈ ˈö ˈa mɛn ˗nu dhɛɛˈˈ kpɔ ˈni ˗wo Zoova ˗bha ꞊Gbɛkiö ˗nu ˗bha ˈkɔ ˗dɔ. ˈMan ˗kpan kwa ꞊dhegblü ˗nu ˗bha ˗ʒianwo ˗wa n ˈˈnuɛ bho, ˗wa ˗dhɔ ˗zɔn n ˗dhɛ n ˗zo ˗yö ˗bo ˈpë ˗kë ˈa n ˈgü dɔ ˈˈgbɩɩ˗ ˈa ˗wo ˗an ˗dhɛ bhë, ˗a ˈka. A ˗kpan Zoova ˗bha ˗takundhe ˗bha ˈwɔn ꞊vadhɛ ˈgü, ˈa ꞊ɲɔɔn ˗a ˈˈsuee ˈö yaa˗ ˗nu yi ˗bha ˈˈtɔŋdëdhɛ ˗gɛn ˗yö ˗gban ꞊dedewo.

N ˗man ˗bhɔkwëë ˗blɛɛsü ˈa˗ ˗kë ˈˈsɛ ˈö ˗ya ˗sü ˈka ˈˈyi ꞊zinŋgü ˈwo Bugɛnvidhö ˗kë bhë ˗a ˈgü, dhebɔ do waa ö ꞊gɔɔn ˗wo ˗ɲɔɔn n ˗bha ˈˈyɩɩ ˈka ˈwo n dhɛɛˈˈ kpɔ ˈwo˗ pö: «Ü yi ˗dɔ ˗ee?» N ˗zo ˗yö ˗bo ꞊dhɛ a ˗zlanwopö dhe waa ö ꞊gɔɔn ˈwo bhë ˗an ˗dhɛ kö ˈman ˗lo ˗blɛɛsü ˈka Pɔɔ Morɛsöbi. A ˗an ꞊klaŋ ˗kë Biblö ˈka ˗sü zübho ˈö ˈa ꞊kun ˗an nu kwa ꞊dhegblü do ˗dhɛ mü kö ˗yö ˈdho ˗a ˈka ˈˈdhiʋ̈. ˗Wa bɔ ˈˈyi ꞊bhaa ˈsaadhö. ˈDhuëë˗ ꞊va ˈa ˗an ꞊slɔɔ Papuazi Nuvɛlö Gine ˗kwɛ ˗yaaga ˈa˗ ˗kë ˗zlanwopösü ˈgü ˗a do ˈnën bhë.

ˈˈSanni ˈa ˈgo Korɔn ˗kwɛ 1978 ˈgü, a ˗kpan kwa ꞊dhegblüdhe do ˗së ˈwo˗ ˗dhɛ Adɛdhö ˈö ö ˗de nu Zoova ˗bha yö ˗dhɛ mü ˗a ˗bha. ˗Yö ˗kun ˈˈtʋ̈ŋ ꞊gban ˈgü ˗yödhiʋ̈ ˈka ˈö kun ö ˗bha ˈnën ˗nu ꞊plɛ Samiɛ waa Shëële ˗to ˗ni ˈgü. Yö do ˈö bhë ˈzü ˗yö ˗kun ö ˗zokë ˗ni ˈgü ö dhö ˈö ˗ya kë zii ˗a ˈˈpiʋ̈. ˗Kwɛ 1981 ˈMɛn ˈˈsu ˈgü, a n ꞊yɛɛ˗ ˗kë Fidhipinö ˈa Adɛdhö sü dhe ˈka. ˈDhɛ ˈyi yi ˈkosü, yi ˗kë ˈˈtʋ̈ŋ ꞊gban ˈgü ˗yödhiʋ̈ ˈka ˈö ˈyi yi ˗zokë yi ˗bha ˈkɔdhigümɛn ˗nu ˈˈpiʋ̈ yi ˈkwëë˗.

ˈKö ˗kë ꞊dhɛ a ˗kun n ˗zokë ˗ni ˈgü n ˗man ˈkɔdhigümɛn ˗nu ˈˈpiʋ̈, ˗kwɛ 1983 ˈgü ˗wo n ˗kë ˈzü ˗yödhiʋ̈ ˗detasü ˈka ˈwo n bɔ Linapakan ˈˈyi ꞊zinŋgü ˈˈsɛ ˈwo Palawanö ˗kë bhë ˗a ˈgü. Yaa n ˗man ˈkɔdhigümɛn ˈˈpɛpɛ yi ˗dho ˗dhɛ ˈö kwa ꞊dhegblü ˗nu ˈwaa kun mü, ˗a ˈgü. ˈDhɛ ˈyi ˗kwɛ do ˗kë mü, Adɛdhö dhe ˗wɔn ˗yö ˗kë. ˈKö ˗kë ˈˈdhʋ̈, yi ˈgü ˈti ga ˗zlanwopösü ˈka ˈö yi ˗takun ˈˈtʋ̈ŋ ˈˈgbɩɩ˗ ˈö bhë ˗a ˈgü. Yi ˗ya mɛn ꞊va ꞊dede ꞊klaŋ ˗kë Biblö ˈka ˗sü ˗bha Linapakan ˈwo kun nu ˗ni ˈgü ˗bhɔkwëë ˗nu ˗ta. ˗A ˗dhɛ ˈti ꞊gwëë ˈö yi ˗bhawɔn yö ˗bhɔkwëëkëgükɔ ˗bha. ˈDhɛ ˗kë ˈˈdhʋ̈, yi yi ˗de ˗bha ˗bhɔkwëëkëgükɔ ˗dɔ. ˈDhɛ ˗kwɛ ˗yaaga ˗yö ˗ʒiö, mɛn 110 ˗wo ˗nu ˗zo ˗bo ˈwlaan˗ ˗ta, ˈö yi zuʋ̈ˈˈ ˈˈgblü ˗yö dhi ꞊dedewo ˗a ˗wɔn ˈgü. ˗A mɛn ꞊vadhɛ ˗gɛn ˗yö ˗dho ˈˈdhiʋ̈ ˈwo bɔ ˈˈyi ꞊bhaa ꞊taabha.

˗Kwɛ 1986 ˈgü, ˗wo n ˗bɔ Kuliɔn, ˈˈsɛ ˈö ˗ya ˗sü ˈka ˈˈyi ꞊zinŋgü ˈö ꞊weeyuamɛn ˗nu ˈdhö mü ˗a ˈgü. ꞊Taabha, ˗wo Adɛdhö ˗kë ˗yödhiʋ̈ ˗detasü ˈka ˈpö. ˗A züdɔdhɛ ˈgü, mɛn ˗nu ˈö ꞊weeyua ꞊yaa˗ ˈwëëdhɛ shiʋ̈ˈˈ bhë ˗zlanwopö ˗an ˗dhɛ ˗sü ˗kë yi ˗kɔa ˈˈgbɩɩ˗. ˈˈKɛɛ kwa ꞊dhegblü ˗nu ˈwo kun mü ˗wo yi ˗zogban ꞊dhɛ ꞊weeyuamɛn ˗nu ˈwo ˈˈdhʋ̈ ˗wo ˗an ˈˈdhɛkë ˗ni ˈgü. ˗A ˗wɔn ˈgü, mɛn ˈbha ˈyaa ꞊mɔɔn˗ ˗bha kö ˗ya ˈsü ˗an ˗bha. ˗A mɛn ˈbha ˗nu ˗wo ˗kun nu ˗ni ˈgü  ˗bhɔkwëë ˗nu ˗ta kwa ꞊dhegblüdhe do ˗gɔ ˈkɔɔ. ˗A ˗dhɛ ˈti ꞊gwëë ˈö mɛn ˗nu ˈö ˗kë ˗an ˈgü ˗be ꞊dhɛ ˗Zlan waa mɛnbhɩɩdhe ˗nu ˗wa ˈˈkan wo ˗bha bhë ˈö ˗zlanwopö ˗an ˗dhɛ ˗sü ˗kë yi ˗dhɛ ˗së. ˈˈYuamɛn ꞊suu ˗nu ˈwo ˈˈdhʋ̈ ꞊waa˗ yö ꞊dhɛ ˗dhɛkpaɔyi do ˈka wo ˗dho kë wo ˈflëë˗ ˈgü, ˗an zuʋ̈ˈˈ ˈˈgblü ˗ya dhi ˗yö ˗kë yi ˗dhɛ ˗së.—Luk. 5:​12, 13.

˗Kɔ ˗mɛɛn ˈö yi ˗bha ˈnën ˗nu ˗wo ˗kë ˗a ˈka wo ˗de ˈgü Kuliɔn? Adɛdhö ˗yö kwa ꞊dhegblüdhe wlüünën ˗nu ꞊plɛ ˗dhɛ kö ˗wo ˈgo Korɔn ˗wo nu yi ˈˈpiʋ̈, kë ˈˈdhʋ̈ kö yi ˗bha ˈnën ˗nu ˗wo ꞊nënŋ mɛn ˗tiaandhö ˗nu ˗bha. Samiɛ, Shɛɛle waa kwa ꞊dhegblüdhe wlüünën ˗nu ꞊plɛ ˈwo ˈˈdhʋ̈ ˗wo ˗kun mɛn ˈˈwɛɛ ˗nu ˗takun ˗ni ˈgü kö ˗wo gagade dɔ. ˗Wo ˈnën ˗nu ꞊vadhɛ ꞊klaŋkë ˗ni ˈgü Biblö ˈka kö yaa Adɛdhö yi ˗an ˗mɛn ˗nu ꞊klaŋkë ˗ni ˈgü ˈpö. ˈDhɛ ˈˈtʋ̈ŋ ˈbha ˗yö ˗ʒiö, kö ˈkɔdhigümɛn ˗nu 11 ˈnën ˈyi ˗an ꞊klaŋkë ˗ni ˈgü. ˗A yi ˈti ꞊gwëë ˈyi ˗ya mɛn ꞊va ꞊dede ꞊klaŋkë Biblö ˈka ˗sü ˗bha, ˈyi dho ˈyi ˗kë ˗zlanwokɔdhi do ˈka.

˗A züdɔdhɛ ˈgü, a ˗kun mɛn zii do ˈˈkpaan ˈka ˈdhɛ bhë ˗a ˈgü. ˗A ˗wɔn ˈgü, Betɛdhömɛn ˗nu ˗wa ˗pö n ˗dhɛ ˈa ˈˈdhiʋ̈sü ˈˈdhoogɔ ˈgü ˗bhɔkwëë ˈka ˗zlanwopömɛn ˈˈsaaga ˈˈpiʋ̈ Kuliɔn kö pë do ˈö bhë ˗a kë ˗zlanwopömɛn ˈˈseishiö ˈˈpiʋ̈ ˈpödhɛ ˈwo˗ ˗dhɛ Marili ˈwo ˈlɛlɛ ˗yaaga ˗kë ˈˈyitagɔ ˈgü kö ˗wo ꞊kun ˗lo mü bhë, ˗a ˈgü. ˈYa yi bo ˗bhɔkwëë ˈka, yaa n ˗man ˈkɔdhigümɛn ˗nu yi ˈˈtasü ˈlɛlɛ ꞊va ˈka ˗tɔn ˗nu ˈˈpiʋ̈ ˈyi mɛn ˗nu ꞊klaŋ ˗kë Biblö ˈka ˈpödhɛ ˈwo˗ ˗dhɛ Alüsɛ bhë ˗a ˈgü.

ˈDhɛ ˈyi˗ yö ꞊dhɛ mɛn ꞊vadhɛ ˗wa ˈˈwɩ gagade ˗bha Marili waa Alüsɛ, yi ˗bhɔkwëëkëgükɔ ˗dɔ ˗dhɛ ꞊plɛ ˈwo bhë ˗an ˈgü. ꞊Dhɛ ˗kɔ ˈyi˗ ˗kë ˗a ˈka Linapakan bhë ˗a ˈdhö, kwa ꞊dhegblü ˗nu waa Biblö ꞊klaŋnën ˗nu ˗wo ˈkɔ ˗dɔ ˗a ˈka ꞊kwɛɛ ꞊va ˗nu yi ˗dhɛ ˈwo wo ˗kɔ ˗da yö ˈö bhë ˗a ˈgü. ˗Bhɔkwëëkëgükɔ ˈö kun Marili bhë mɛn 200 ꞊mɔɔn˗ ˗bha ˈwo dho ˗a ˈgü, ˈö ˈyi ˗mɔn ˗a ˗ta ˗kë ˈˈgbɛɛ ˗sü ˗bha ˗bhɔkwëë ˈkpii˗ ˗nu ˗bha ˈka.

˗Kwɛ 1993 ˈgü, yaa Adɛdhö yi ˗kë ˈˈpian do ˈˈpiʋ̈ ˗maankëmɛn ˈka Fidhipinö. ˈDhɛ ˈkwa dɔ ˗kwɛ 2000 ˈgü, a ˗dho École de formation ministerielle ˈˈdhiʋ̈ kö ˈa kë ˗a ꞊klaŋgɔmɛn do ˈka ꞊taabha. ˗Yö ˗kë n ˈgü ꞊dhɛ pë ˈö ˈmaan ˗mɔn ˗a ˗kë ˈˈdhʋ̈ ˗sü ˗bha ˗a ˈdhö, ˈˈkɛɛ ˈyö Adɛdhö ˗yö n ꞊faanmën. ˗Ya ˗pö n ˗dhɛ ꞊dhɛ Zoova ˗dho ꞊faan ˈö n ˗bhawɔn ˈdhö˗ ˗bha ˗a nu n ˗dhɛ kö ˈa ˗mɔn ˗a ˗bha yö kë ˗sü ˗bha. (Flp. 4:13) Adɛdhö ꞊dede ˗kun bɔ ˗ni ˈgü ˈwɔn ˗nu  ꞊suu ˈwo bhë ˗an ˈgü, ˈyö sü ꞊dhɛ ˈˈyua ˗kun ˗a ˗bha Zoova ˗bha yö ˈgü.

˗Kwɛ 2006 ˈgü, ˈˈyua ˈwo˗ Pakinsɔnö ˗kë bhë ˗yö Adɛdhö ˗kun. ˈYi zuʋ̈ˈˈ ˗yö ˗kaan ˈˈkwöö. ˈDhɛ ˈa˗ pö ˈyi Zoova ˗bha yö ˈduannu, Adɛdhö ˗ya ˗pö n ˗dhɛ: «˗Abin. ˗Bhö dɔ ˈˈgbɩɩ˗ kö ꞊dhɔtrɔɔmi ˈö dho n ˈˈdhɛkë ꞊ʒiaan ˈü˗ mɛɛnˈˈ kö Zoova ˗yö ko ˗takun ˈko˗ ˗bha yökë ˗kplawo.» ˗Kwɛ ˈˈsɔɔdo ˗nu ˈwo dɔ ˗a ˈˈpiʋ̈ ˗an ˈgü, Adɛdhö ˗yö Zoova ˗bha yökë ˈö ˈyaa kun ö ˗wo ˈkpɔ ˗ni ˈgü. ˈDhɛ ˈyaa kun ˗mɔn ˗ni ˈgü ˈˈtasü ˗sü ˗bha ˗ʒiaanwo, ˗yö ˗zlanwopö gɔnën ˈgü. ˈDhɛ dhiaŋzë ˗sü kun ˗a ˗kɔa ˈˈgbɩɩ˗ ꞊yaa˗ pö ˈö ˈwɔn ˗daakë ˗bhɔkwëë ˗nu ˗ta, ˗a ˈˈdhiʋ̈ ˗yö ˗to ˈwɔn ˗ga do ɛɛnˈˈ ꞊plɛ ˗ta. Kwa ꞊dhegblü ꞊vadhɛ ˗wo ˈsëëdhɛ ˗bɔ ˗a ˗dhɛ ˈwo˗ ˈˈnuɛ bho ˗a ˗bha ˈwɔnzuan ˗së ˗bha ˗kplawo ˈö dho ˈö yö˗ ˈka ˗a ga ˗yi ˗bha ˗kwɛ 2013 ˈgü. Yaa n ˗man dhebɔ dhɔɔbhaasü ˈö to ö ˗wo ˗ta bhë yi ˗kwɛ ˈö ˗ʒiö 30 ˗ta ˗a ˗kë yi ˈkwëë˗, ˈˈkɛɛ ˈdhɛ ˈö˗ ˗wɔn ˗yö ˗kë ˗wëë ˗yö ˗bɔ n ˗ta ꞊dedewo ˈö ˗kë n ˈgü ˈzü ꞊dhɛ a n do ˈka.

Adɛdhö ˗kun ˗a ˈˈpiʋ̈ kö ˈa ˈdho n ˗man yö ˈka ˈˈdhiʋ̈. Pë ꞊dede ˈa˗ ˗kë ˈyö bhë. N ˗kɔ ˗yö yö ꞊va ˈgü ˗kplawo. ˗A ˗wɔn ˈgü, n ˗zo ˗yö ˗bhɔ n ˗man ˗kë n do ˈka ˗sü ˈö bhë ˗a ˈka. ˈÖ go ˗kwɛ 2014 ˗bha ˈö dho ˈö yö˗ ˈka ˗kwɛ 2017 ˗bha, ˗wo n ˗bɔ kö ˈa Tagalɔgö ˗wopömɛn ˗nu ˗takun ˈˈsɛ ˗nu ˈö ˈwo kwa ˗bha yö ꞊kɛɛ˗ ˗kan mü bhë, ˗an ˈgü. ꞊Taabha a ˗dho ˗zlanwokɔdhi ˗nu ˈwo Tagalɔgö ˗wo pö mü Taiwanö, ˗Mlɛɛnkin ˗sɛ waa Kanada ˗an ˈgü. ˗Kwɛ 2019 ˈgü, a ˈˈdhiʋ̈sü ˗Gblüdëdhɛ ˗nɔɔnpömɛn ˗nu ˗bha ꞊klaŋ ˈka ꞊Glee˗ ˗wo ˈgü Ɛndö waa Tailandö. A zuʋ̈gblüdhi ꞊dede ˗slɔɔ Zoova ˗bha yö ˗nu ˈwo bhë ˗an ˗kë n zuʋ̈ˈˈ ꞊gban ˈka ˗sü ˈgü.

Yö ˗dɛɛ ˈˈpɛpɛ ˈa˗ ꞊slɔɔ ˗ya ˗kë ˈa ꞊ɲɔɔn kwa ꞊dhegblü ˗nu ˗bha. ˗A ˗wɔn ˈgü, ˗an ˈto ˗sü kö ˈa ˈdho bhë ˈyaa kun n ˗kɔa ˈˈplëëplë. ˈˈTʋ̈ŋ ꞊suu ˗nu ˈwo ˈˈdhʋ̈ ˗an ˈgü, a n ˗zoyö Zoova ˗dhɛ n zuʋ̈ˈˈ ꞊gban ˈka. A˗ ˗yö ˗kplawo ꞊dhɛ Zoova ˗yö n ˗takun, ˈö n zuʋ̈ˈˈ ˗yö ˗we ˗a ˗bha kö ˈa n ˗kɔ ˈkpɔ ˈwɔn ꞊suu ˈˈpɛpɛ ˈwo dho ˈgo ˈˈgblʋʋ n ˗man ˗tosɛta ˈgü ˗an ˗gɔ. ꞊Dɛɛ, a ˗yödhiʋ̈ ˗detasü ˈka Fidhipinö. A n ˗de ˈgü ˗së n ˗man ˗zlanwokɔdhi ˗dɛɛ ˈgü, ˈyö sü ꞊dhɛ kwa ꞊dhegblü ˗nu ˗wo n ˗takun ˈwo wo ˗zokë n ˈˈpiʋ̈ ꞊dhɛ n ˗man ˈkɔdhigümɛn ˗nu ˈdhö. Samiɛ waa Shɛɛle ˗an ˗bha ˗to wo dhe ˗bha ˈwɔnzuan ˈˈpiʋ̈ ˗sü ˈö bhë ˗yö n ˗gɔ ˗luu.—3 Zn. 4.

꞊Ii, a ˗bɔ ˈwɔn ˈˈgbɩɩ˗ ꞊va ˈgü n ˗man ˗tosɛta ˈgü. ˗A ˈbha ˗nu ˈnën ˈwo ˗tɔ ˗a ˗kpan n ˗man dhebɔ ˗bha kö ˈˈyua ˈˈgbɩɩ˗ ˗ya kë ˗ni ˈgü ˈö dho ˈö˗ ˗wɔn ˗yö ˗kë. A ˗dho ˈzü ˈa n ˗man ˗tosɛta ˗bɛ ˈwɔn ˗dɛɛ ˗nu ˈwo nu n ˗ta ˗an ˗bha. ˈKö ˗kë ˈˈdhʋ̈, a dho ˈa˗ yö ꞊dhɛ Zoova «ˈyaa mɛ ˈbha ˈka ꞊gblɛɛn.» (Këw. 17:27) Zoova ꞊yaa˗ pö ˈö ö ˗dhɔkëmɛn ˗nu ˗takun, ˈö ˗an ˗zogban ˈkö ˗kë ꞊dhɛ ˗wo ˈˈsɛ ˗nu ˈwo mü ꞊gblɛɛn ˗an ˈgü, ˗a ˗kɔ ˈyaa ˈkun ˗a ˈka. (Is. 59:1) Zoova n ˗bha ˗Gwö gbɔŋ˗ ˗yö ˗kun n ˈˈpiʋ̈ n ˗man ˗tosɛta ꞊gban ˈgü. ˗A ˗wɔn ˈgü, a˗ ˈˈnuɛ ˗bho ꞊dedewo. N ˈti ˈto n do ˈka toŋtoŋdhö.