Mɛn ˈö yö ˈti Biblö ˈˈɲan ˗nu ˈwo bhë ˗an ˗wo pö ˗së ˈka, ˗a ˈwɔn ꞊mɔɔn˗ ˗bha ˗ya ˈkun. ˈˈKɛɛ Biblö ˈˈɲan ˗nu ˈwo bhë ˗an ˈgü, Mefibosɛtö ꞊plɛ ˈnën ˈwo ˗an ˗wɔn ꞊blɛɛ. ˈKwa kwa ˈˈtʋ̈ŋ kë ˗së ˈka ˗kwɛzlan bhë ˗a ˈgü, ˗yö ꞊mɔɔn- ˗bha ˈö ˗gleŋ ˗da kwa ˗bha.

Saidhö ˈö kun ˗gblüdë ˈka Izraɛdhö bhë, ˗a gbö ˗nu ˗kun ˈˈsɔɔplɛ ˈö˗ ˈdhu ˗nu kun ꞊plɛ. Ʒonatan ˈnën kun ˗a gbö ˗blɛɛsü ˈka. ꞊Taabha Saidhö waa Rizpa ˈö kun ˗a ˗bha ˈˈnɔnbɔ ˈka ˗wo ˈnëngɔɔn do ˗kpɔ, ˈwo˗ ˗dhɛ Mefibosɛtö. ˈˈKɛɛ Ʒonatan ˗de ˈpö, ˗a gbö do ˗kë ˗dhö ˈwo˗ ˗dhɛ Mefibosɛtö. ꞊Ya kë ˈˈdhʋ̈ kö Saidhö ˗bha ˈkɔdhi ˈgü, mɛn ꞊plɛ ˈnën ˈwo˗ ˗an ˗dhɛ Mefibosɛtö, ˗a gbö waa˗ ˗bha ˈˈnaannën.

ˈˈTʋ̈ŋ do ˈbha ˗yö ˗wo, ˈö ˗gblüdë Saidhö ˗ya Gabaonitö ˗nu ˗san kë ˗sü ˗bha, ˈö kun ˗a ˈˈpiʋ̈ ˗ʒiaanwo kö ˈö suu bho ˈˈshia˗. ˗A ˗wɔn ˈgü, ˗ya mɛn ꞊vadhɛ ˗zë. ˗Yö ˗kun ˈwɔn yaa ˈka. ˈMën ˗kë? ˈÖ sü ꞊dhɛ Ʒozue ˗bha ˈˈtʋ̈ŋ ˈgü, Izraɛdhömɛn ˗nu waa Gabaonitö ˗nu ˗wo ˗sö ˗bhö wo ˈko ˗dhɛ kö ˈwo kë mɛn do ˈka.—Jos. 9:3-27.

˗Mlɛɛn ˈö ˈˈdhʋ̈ ˗yö ˗to ˗an ꞊zinŋgü ˈö dho ˈö yö˗ ˈka Saidhö ˗bha ˈˈtʋ̈ŋ ˗bha. ˈˈKɛɛ Saidhö ˈti˗ ꞊bhlëë ˗ya, ˈö kun ˗a ˈˈpiʋ̈ kö ˈö Gabaonitö ˗nu zë. ˗A ˗wɔn ˈgü, «Saidhö waa ö ˗bha ˈkɔɔmɛn ˗nu ˗wo ˗kë mɛnzëmɛn ˈka.» (2 Sam. 21:1) ꞊Taabha ˈdhɛ Davi ˗kë ˗Gblüdë ˈka, Gabaonitö ˗nu ˗wo ˗nu ˗a ˈˈpiʋ̈ ˈö ˈwɔn yaa ˈö Saidhö ˗ya ˗kë ˗an ˈka bhë, ˈwo˗ ꞊blɛɛ ˗a ˗dhɛ. ˈDhɛ ˗kë ˈˈdhʋ̈, Davi ˗yö ˗an dhɛɛˈˈ ˗kpɔ, kö ˗kɔ ˈwo dho Saidhö pin˗ ˈˈpiʋ̈ baaˈˈ ˗a ˈka, kö Zoova ˗yö ˈdhuëë˗ ˈkpɔ wo ˗bha ˗wa pö. Gabaonitö ˗nu ˈti ˈwëëga ˗dhɛ. Pë ˈwo˗ ˗dhɛ ꞊ʒiaan ˈyö ˗tɔ mɛn ˈö kun ˗a ˈˈpiʋ̈ kö ˗yö wo suu bho ˈˈshia˗ bhë, ˗wa gbö ˗nu ˈˈsɔɔplɛ nu wo ˗dhɛ kö ˈwo ˗an zë. (Nomb. 35:30, 31) Davi ˗yö ˗wɩ pë ˈwo˗ ˗dhɛ bhë ˗a ˗bha.—2 Sam. 21:2-6.

ˈˈTʋ̈ŋ ˈö bhë ˗a ˈka kö Saidhö waa Ʒonatan ˗wa ga ˗gblü ˈˈpiʋ̈ ˈsaadhö, ˈˈkɛɛ ˈkö Ʒonatan gbö Mefibosɛtö ꞊kun mü. ˈDhɛ ˗kë ꞊dhɛ ˗a ˗gɛn ˗kun ˗lo ˗sü ˈka ˈö go˗ ˈka ö ˈnëndhɛ ˈgü bhë, ˗a ˗kɔ ˈyaa kun ˈwɔn yaa ˈö˗ ˈʒiö˗ Saidhö kun ˗a kë ˗ni ˈgü Gabaonitö ˗nu ˈka ˗a ˈgü. Davi waa ö ˈˈtɔŋdë Ʒonatan ˗wo wo ˗wo bhö ˈwo ˈko dhɛ. ˗A ˗wɔn ˈgü, ˗mlɛɛn ˗yö ˗da waa ˗an suugünën ˗nu ˈö˗ mɛn do ˗kë Ʒonatan gbö Mefibosɛtö ˈka bhë, ˗an ꞊zinŋgü. (1 Sam. 18:1; 20:42) Biblö ˗ya ˗pö: «Ʒonatan ˈö ˗kë Saidhö gbö ˈka ˗a ˗bha ˈnën Mefibosɛtö ˗wëë ˗yö Davi ˗kë, ˈö sü ꞊dhɛ waa˗ ˗nu ˗wo wo ˗wo ˗bhö wo ˈko ˗dhɛ Zoova ˈˈɲan ˈˈdhiʋ̈.»—2 Sam. 21:7.

Davi ˗yö pë ˈö Gabaonitö ˗nu ˗wa ˗dhɛ ˗a ˗gɔ bhë, ˗a ˗kë. ˗Yö Saidhö gbö ꞊plɛ ˈwo˗ mɛn do ˗dhɛ Mefibosɛtö waa˗ ˗bha ˈˈnaannën ˈˈsoodhu ˗nu ˗an ˗dhɛ. (2 Sam. 21:8, 9) ˈWɔn ˈö Davi ˗ya ˗kë bhë ˗a ˗wɔn ˈgü, mɛn zë ˗sü ˈˈdhaŋga ˈö kun ˗an ˗bha ˈˈsɛ ˗bha, ˗yö ˗go ˗a ˗bha.

ˈWɔn ˈö ˗kë bhë ˈyaa ˗kwɛzlan ˈˈwɛɛwɛ ˈka. ˗Zlan ˗bha ˈtɔŋ˗ ˗ya ˗pö ˈˈpuu ˈka ꞊dhɛ ‹˗an dua ˈyaa ˗mü kö ˗wo ˈnën ˗nu zë ˗an dë ˗nu ˗bha ˈwɔn yaa ˗nu ˈwo ˗an ˗kë, ˗an ˗wɔn ˈgü.› (Deut. 24:16) ꞊Ya kë ꞊dhɛ ˗be ˈwɔn ˈö Saidhö ˗ya ˗kë bhë ˗a gbö ˗nu ꞊plɛ waa˗ ˗bha ˈˈnaannën ˗nu ˈˈsoodhu ˈwo ˈˈdhʋ̈ ˗an ˗kɔ ˈyaa kun ˗a ˈgü, Zoova ˈti ˗dho ˈˈwɩ ˗a ˗bha kö ˗wo ˗an zë. ˗A ˗bha ˈtɔŋ˗ bhë ˗a ˈgü, ˗ya ˗pö: «Mɛn ˗de ˗bha ˈwɔn yaa ˈö˗ ˗kë ˈyö ˈwo ꞊mɔɔn˗ ˗bha ˗wa zë ˗a ˗wɔn ˈgü.» ˗Yö ˗kë ꞊dhɛ Saidhö suugünën ˗nu ˈˈsɔɔplɛ ˈwo ga bhë, ˗an ˗kɔ ˗kë Gabaonitö ˗nu zë ˗sü ˈgü. ꞊Ya kë ˈˈdhʋ̈ kö ˗an ˗de ˗bha ˈwɔn yaa ˈwo˗ ˗kë ˈyö˗ ˈgüwɔn ˗yö nu ˗an ˗ta.

˗Kwɛzlan ˈö bhë ˗ya ˗zɔn ꞊dhɛ mɛn gbɛ˗ dua ˈyaa ˗mü kö ˗yö ˈwɔn yaa kë, kö ˗yö ö ˗zota ɛɛnˈˈ kö ˗ya pö ꞊dhɛ mɛn ˈbha ˈnën˗ pö ö ˗dhɛ ˈö˗ kë, ˈyö˗ ˗kë. ˈˈGɔɔn do ˈbha ˗ya ˗pö: «Ʒiaan ˈö ü ˗gɛn dho ˗da ˗a ˗ta ˗bhö ü ˗zota ˗a ˈgü ˗së ˈka. ˈBha˗ kë ˈˈdhʋ̈ ü ˗dho ü ˗bha ˈˈta ˈˈpɛpɛ ˈsü ü ˈflëëgü.»—Prov. 4:24-27; Efɛ. 5:15