BIBLÖ ˗draan ö ˗de ˈˈpiʋ̈ ˗sü ˈö ˈˈdhoogɔ ˈˈpɛpɛ ˈka bhë ˗yö ka ˗kɔa ˈˈgbɩɩ˗ ˗ee? ˈˈTʋ̈ŋ ˈbha ˗nu ˈka, ˈka Biblö draanˈˈ, ˈkaa din yö ˗ee? ˗Yö ˗kë ˈˈdhʋ̈ ˈpö mɛn ˈˈpɛpɛ kwa ˈka ꞊shiöŋ. ˈˈKɛɛ pë do ˈbha ˈö ˈkwa˗ ˗kë ˗kplawo ꞊dhɛ kwa ˈˈzu ˗sü ˈdhö bhë, ˗kwa kwa ˗zota ˗a ˈgü. Kwa ˗bhawɔn ˗yö ˈˈtʋ̈ŋ waa ꞊faan ˗an ˗bha kö ˈkwa kwa ˈˈzu. ˈˈKɛɛ ˈkwa˗ kë ˈˈdhʋ̈, kwa kwigüdhɛ ˗kë ˗së. Biblö draansü ˗de ˈpö ˗yö ˗kë ꞊dhɛ ‹mɛn ˈˈzu ˗sü waa˗ ꞊klang ˗kë ˗Zlan ˗wʋ ˈka ˗sü› ˈdhö. (Efɛ. 5:26) ˗A ˗wɔn ˈgü, ˗dhioo ˗nu ˈwo yö ˗wo ꞊mɔɔn˗ ˗bha ˈwo kwa ˗takun:

• ˗Kwa ˈˈtʋ̈ŋ do ˗ya. Biblö ˗draan ö ˗de ˈˈpiʋ̈ ˗sü ˈö bhë, ‹ˈwɔn ˗së ꞊dede ˈö ˗dhi ˗Zlan ˗dhɛ› ˈö kwa dua ˈdhö ˗mü kö ˈkwa˗ kë, yö ˗mü. (Fdh. 1:10) ˈKwa˗ pö kwa ˗zo ˗yö ˈto kwa ˗bha Biblö draanˈˈ ˗dhɛkpaɔyi ˈˈpiʋ̈, ˗kwaa ˗bɛnzë ˈsëëdhɛ ˗ta kö ˈkwa ꞊nënŋ ˗dhɛ ˈö kwa ˈˈɲan dho ˗kpan ˗a ˗bha ˗a ˈgü. Ɛɛnˈˈ ˈzü kwa ꞊mɔɔn˗ ˗bha ˈkwa˗ ˗ya kwa ˗bha telefɔnö ˗ta kö ˗a ˈˈtʋ̈ŋ ˗ya ˈto ꞊klöö˗ ˗yö kwa ꞊kpɔɔ.

• ˗Kwa kwa ˗zota ˈpë dho kwa ˗takun kö ˈkwa kwa ˈˈɲan ˗klu ˗a ˗bha ˗a ˈgü. Pë draanˈˈ ˗kɔ ˗mɛɛn ˈö ˈkwa˗ ˈˈpiʋ̈? ˈKwa pë draanˈˈ ˈˈlɛlɛ do ˈˈpiʋ̈, ˈyö ˈkwa dho kwa ˈˈɲan ˗klu ˗a ˗bha ˗së ˈka ˗ee? Ɛɛnˈˈ kwa˗ ˈˈpiʋ̈ kö ˈkwa˗ draanˈˈ ˈˈtʋ̈ŋ ˈdɛdɛ ˈˈpiʋ̈, ˈˈkɛɛ kö ˈkwa˗ kë ˈˈdhʋ̈ ˗kplawo ˗ee? ˗A ˗dhɛ ˈö dho kë ˗së kwa ˗bha ˈka kwa ꞊dede kwa˗ ˗dɔ. ˈDhɛ ˈˈdhʋ̈, ˗kwa ˗gban ˗a ˗ta kö ˈkwa kwa ˗kɔ ˈˈyɛ kwa ˗bha pë draansü ˈˈtʋ̈ŋ ˗bha. ꞊Ya kë ꞊dhɛ ˈˈtʋ̈ŋ ˈö ˈkwa˗ ˈˈpiʋ̈ kö ˈkwa Biblö draanˈˈ ˗a ˈka ˗ya ʒiö, ˗kwa pë ˈˈpɛpɛ kë kö ˈkwa minitö ˗kɔŋ do ˈsü ˈkwa˗ draanˈˈ, ˈyö sü ꞊dhɛ kwa ꞊mɔɔn˗ ˗bha ˈkwa pë ꞊va ˗draan ˈˈtʋ̈ŋ ˈö bhë ˗a ˈˈpiʋ̈. ˗Ya ˈgo mü ˈkwa˗ züdɔ, ꞊faan ꞊mɔɔn˗ ˗bha ˈö ˗kë kwa ˗gɔ ˈkwa dho ˗a ˈka ˈˈdhiʋ̈.—Fdh. 2:13.

• ˈPë ˈkwa dho ˗a draanˈˈ, ˗kwaa ˈto ˈˈdhiʋ̈ kö ˈkwa kwa ˗kɔ ˈˈyɛ ˗a ˗bha. ˈKwa˗ pö dosɛnŋ ˈkwa kwa ˈˈɲan ˈto Biblö draansü ˈˈtʋ̈ŋ ˗gɔ kö ˈkwa ꞊kun kwa ˗kɔ ˈˈyɛ ˗a ˈdhɛ ˈkwa dho ˗a draanˈˈ ˗a ˗bha, «ˈwɔn ˗së kë ˈˈtʋ̈ng» ˗dho ʒiö kwa ˗ta. (Efɛ. 5:16) ˈPë ˈkwa˗ ˈˈpiʋ̈ kö ˈkwa˗ draanˈˈ, kwa ꞊mɔɔn˗ ˗bha ˈkwa ˗bhüöö bho ˈsëëdhɛ do ˗ta. Dhɛɛˈˈ ˈbha ˗ya nu kwa ˗zo ˈˈpiʋ̈, ˗kwaa ˗bɛnzë. ˗Ya ˈgo mü kwa ɲën ˈsëëdhɛ draansü ˗bha, kwa ꞊mɔɔn˗ ˗bha kö ˈwɔn ˈˈwɛɛ ˈbha ˗nu ˈö ˈkwa˗ ˈˈpiʋ̈ ˈkwa ˗an draanˈˈ ˈzü ˈkwa ˗an ˗ya ˈsëëdhɛ ˗ta.

• ˗Kwa ˈˈwɩ ˈwɔn ˗nu ˗bho ˈˈgblʋʋ ˗sü ˗bha. ˈˈTʋ̈ŋ ˈkwa˗ ˗ya waa ˈˈtʋ̈ŋ ˈkwa dho ˈsëëdhɛ ˗wo pö ˗a ˈˈpiʋ̈ ɛɛnˈˈ ˈwɔn ˗gɔ ˗nu ˈö ˈkwa˗ ˈˈpiʋ̈ kö ˈkwa ˗an draanˈˈ bhë, kwa ꞊mɔɔn˗ ˗bha ˈkwa ˗an bho ˈˈgblʋʋ. Pë ˗nu ˈwo bhë ˗an ˗bho ˈˈgblʋʋ ˗sü ˗wɔn ˈyaa ˈˈgbɩɩ˗, ˈˈkɛɛ ˗a ˗dhɛ ˈö˗ ˗wɔn ˈdhö ˈˈgbɩɩ˗ ˈyö ˗tɔ ˈkwa ˈsëëdhɛ draanˈˈ ˈˈdhoogɔ ˈˈpɛpɛ ˈgü.

ˈKwa˗ kë ˈˈdhʋ̈, kwa ˗dho ˈwɔn ˗së ꞊slɔɔ ˗a ˈgü. Kwaa Zoova kwa ˗bha ˈˈtɔŋdhɛ ˗dho kë ˈˈgbɩɩ˗ ˈö ˈkwa kwa ˗kɔ ˗yɛ ˈwɔn ˗së kë ˗sü ˗bha, ˈö kwa ˈgü ˗yö ˗kë ˈˈgbɩɩ˗ ˈpö.—Jos. 1:8.