1. ˈMën Yesu dho ˗a kë ˈö˗ yi ˈyaa mü ꞊gblɛɛn ˈzü?

 KWA ˈˈtʋ̈ŋ ˈö ˈwɔn ˈˈgblʋ̈gblʋ̈ ˗nu ˗wo go ˗a ˈka ˈˈgblʋʋ ˗a ˈgü. Yesu ˗bha za ˗dɔ mɛnbhɩɩdhe ˗nu ˗bha ˗sü yi ˗ya ˈto ꞊klöö˗. ˗Yö pë ˗nu ˈwo dho kë kö ˗yö ˈdho ˗yö yö ˗a ˈka yi ˈö ˈˈdhʋ̈ ˗a ˗bha ˗an ˗zɔn. ˗Yö ‹ˈwɔn ˈsuaan˗ ˗bho ˗a ˗bha ˗pë ˗nu› ˈwo dho ˗a ˗zɔn ꞊dhɛ ˈya nu waa «ˈˈkpɔnŋtaadhɛ ɲën ˈˈtʋ̈ŋ» ˗an ˗wɔn ˗blɛɛ ö ˗bha gwëëˈˈ ˗nu ˗dhɛ ˈpö. (Mat. 24:3) Pë ˗nu ˈwo ˈˈdhʋ̈ ˗wo ˗bɛnzësü ˈka Matiö ˈˈɲan ˈˈgblʋ̈gblʋ̈ 24, 25; Makö ˈˈɲan ˈˈgblʋ̈gblʋ̈ 13 waa Dhukö ˈˈɲan ˈˈgblʋ̈gblʋ̈ 21 ˈgü.

2. ˈMën ˈkwa dho ˗a yö ˈwɔn ˗gɔ ˈö yö ˗a ˈgü? ˈYö ˗yö ˗dho kwa ˗takun ˗kɔ ˗kë ꞊dhɛ?

² Yesu ˗yö ˗bɔ ˈwɔnzuan ˗yaaga ˗ta ˈö kwa ˗zokpɔɔ. ˈWɔnzuan ˗nu ˈwo ˈˈdhʋ̈ ˗wo ˗gban ˈˈbhlaa waa ˗bho ˗nu, ˈnëndhiëŋnën ˗nu ˈö ˈwaa gɔɔn˗ ˗wɔn dɔ ˈwo ꞊kpɔɔsü waa˗ mɛn ˗nu ˈö ˈwaa ꞊kpɔɔsü waa ˈwëë˗ talan ˗nu ˗an ˗bha. ˈWɔnzuan ˗dhɛ ˈö ˗dhö ˗yö kwa ˗takun kö ˗kɔ ˈö Yesu dho bɔ ˗a ˈka kwa ˗bha ˗zoyödhe ˗ta kö ˗yö zadɔ kwa ˗bha, ˈkwa˗ ˈgüman. ˈWɔn ˗gɔ ˈö yö ˗a ˈgü, ˈwɔnzuan ˗nu ˈwo bhë ˗gleŋ ˗nu ˈwo ꞊mɔɔn˗ ˗bha kö ˗wa ˗da kwa ˗bha, kwa ˗dho ˗an yö ˈpö. ˗Kwaa züdɔ ˈˈbhlaa waa ˗bho ˗nu ˗ta.

ˈˈBHLAA WAA ˗BHO ˗NU

3. ˈˈTʋ̈ŋ ˗mɛɛn ˈö Yesu dho zadɔ ˗a ˈka mɛnbhɩɩdhe ˗nu ˗bha?

³ ˈWɔnzuan ˈö ˗gban ˈˈbhlaa waa ˗bho ˗nu ˗bha bhë ˗a ˈgü, Yesu ˗ya ˗pö ö ˗dho ˗gban ˗kɔ ˈö mɛn ˗nu ˗wo wo ˗kɔ ˗ya ˗a ˈka nɔɔn˗ ˗së waa ö ꞊dhegblü ˈˈɲɔn ˗a ꞊troo ˗nu ˗an ˗gɔ ˗a ˗ta, ˈö zadɔ ˗an ˗bha. (Mat. 25:​31-46) ˈˈSanni Aamagedɔn ˗gblü zü ˗yö dɔ «ˈˈklʋʋbhɔdhe ˈkpii˗» ˈˈtʋ̈ŋ ˈgü, ˗yö ˗dho ˈˈbhlaa waa ˗bho ˗nu ˗an bhokopiʋ̈. (Mat. 24:21) ꞊Dhɛ ˗kɔ do ˈö ˗tuëë ˗maankëmɛn ˗yö ˈˈbhlaa waa ˗bho ˗nu ˗an bho ˗a ˈka ˈko ˈˈpiʋ̈ ˗a ˈdhö, Yesu ˗dho mɛn ˗nu ˈwo wo ˗kɔ ˗da ˈˈɲɔn ˗a ꞊troo ˗nu ˗dhɛ waa mɛn ˗nu ˈö wo ˈti˗ kë ˈˈdhʋ̈, ˗an bhokopiʋ̈.

4. ˈKwa ˗dhɛ ˗ga Isaïe 11:​3, 4 ˈgü, ˈmën ˗kë ˈö ꞊mɔɔn˗ ˗bha kö ˗yö ga kwa ˈgü ꞊dhɛ Yesu ˗dho zadɔ mɛn ˗nu ˗bha kpɛnŋdhödhɛ ˈgü? (Kpɔɔˈˈ ˈzü pë ˈˈbin ˈö˗ bhë ˗a ˗bha.)

 ⁴ Biblö ˗ya ˗pö ꞊dhɛ Zoova ˗ya Yesu ˗ya zadɔmɛn ˈka, ˈö dho zadɔ mɛn ˗nu ˗bha kpɛnŋdhödhɛ ˈgü. (Isaïe 11:​3, 4 ˗wo pö.) ˗Yö ˗dho mɛn ˗nu ˈˈtakɔ, ˗an ˗zotakɔ, ˗an ˈwɔn blɛɛˈˈ ˗kɔ waa ˗kɔ ˈwo ˗a ꞊dhegblü ˈˈɲɔn ˗a ꞊troo ˗nu sü ˈka ˗an ˈsuan˗ bho ˗së ˈka. (Mat. 12:​36, 37; 25:40) Mɛn ˗nu ˈwo ˈˈɲɔn ˗a ꞊troo ˗nu ˗takun, Yesu ˗dho ˗an dɔ ˈö ˗an ˗bha yö ˈwo˗ ˗kë ˗a dɔ ˈpö. a Pë ˗wɔngbɩɩsü do ˈö˗ ˗mɛn ˗ya ˗kë ˈyö ˗tɔ ˗an ˗takun ˗sü ˈö ˗zlanwopösü ˈgü. Mɛn ˈˈpɛpɛ ˈwo˗ ˗kë ˈˈdhʋ̈, Yesu ˗dho ˗an ˈsü ꞊dhɛ ‹mɛn kpɛnŋdhö ˗nu› ˈdhö. ˗Wo ˗dho ˗da «˗tosɛta ˈö˗ ˈˈdhiʋ̈todhɛ ˈyaa ˈdhö» ˗a ˗ʒian ˗ta. (Mat. 25:46; ˗Dhɛ. 7:​16, 17) ˈWɔn ˗së ꞊dede ˗mü mɛn ˗nu ˈwo dho ˈto wo ˗wo ˗ta ˗an ˗bha ˈka! ˈKwa ˈto ˗klu ˗sü ˈka ˗Zlan ˗bha ˈˈklʋʋbhɔdhe ˈkpii˗ waa ˈˈtʋ̈ŋ ˗nu ˈwo dɔ ˗a ˈˈpiʋ̈ ˗an ˈgü, kwa ˈtɔ ˗dho to «ˈsëëdhɛ ˈö ˗tosɛa ˗kë ˗bha ˈsëëdhɛ ˈka bha˗ ˈgü.»—˗Dhɛ. 20:15.

5. ˗Gleŋ ˗mɛɛn ˈö go ˈwɔnzuan ˈö ˗gban ˈˈbhlaa waa ˗bho ˗nu ˗bha bhë ˗a ˈgü? ˈYö de ˗nu ˈwo ˈwɔn ˗së ꞊slɔɔ ˗a ˈgü?

⁵ ˗Kwa ˈto ˗klu ˗sü ˈka ˗Zlan ˗bha. ˈWɔnzuan ˈö ˗gban ˈˈbhlaa waa ˗bho ˗nu ˗bha ˈö Yesu ˗ya ˗wɔn ꞊blɛɛ bhë, ˗yö ˗we mɛn ˗nu ˈwo dho ˈto ˈˈsɛ ˗ta yö ˗an ˈka. ˗Wa ˗zɔn ꞊dhɛ wo ˗klu ˗Zlan ˗bha ˈwo Yesu ꞊dhegblü ˗nu takun ˗zlanwopösü ˈgü, ˈwo ˈwɔn man gwëëmi ˗towotasü ˈö ꞊kpɔɔsü ˈö Yesu ˗ya ˗ya bhë ˗a ˗ta. (Matiö 24:45) ˈˈKɛɛ mɛn ˗nu ˈwo dho ˈdho dhaŋ˗ ˈgü ˗an dua ˗mü ˈpö kö ˗wo wo ˈˈtʋ̈ŋ kë ˈwɔnzuan ˈö bhë ˗a ˈgü. ˈMën ˗kë? ˈYö sü ꞊dhɛ Yesu ˗yö ˗an ˈˈtakɔ waa ˗an ˈwɔn blɛɛˈˈ ˗kɔ ˈsuaan˗ ˗bho. Wo ˗de ˈpö, ˗an dua ˗mü kö ˗wo ˗klu ˗Zlan ˗bha. ˗A ˗de ˗ʒiaan Yesu ˗yö ˈwɔnzuan ꞊plɛ ˈˈwɛɛ ˈbha ˗wɔn ˗blɛɛ ˈö ˈˈɲɔn ˗a ꞊troo ˗nu ˗zokpɔɔ ˗an ˈgü. ˈWɔnzuan ˗nu ˈwo ˈˈdhʋ̈ ˗wo Matiö ˈˈɲan ˈˈgblʋ̈gblʋ̈ 25 ˈgü ˈpö. ˗Kwa gwëëmi towotasü ˈö ꞊kpɔɔsü, ˈnëndhiëŋnën ˗nu ˈö ˈwaa gɔɔn˗ ˗wɔn dɔ ˈwo ꞊kpɔɔsü waa˗ mɛn ˗nü ˈö ˈwaa ꞊kpɔɔsü, ˗an ˗wɔn blɛɛˈˈ.

ˈNËNDHIËŊNËN ˗NU ˈÖ ˈWAA GƆƆN˗ ˗WƆN DƆ ˈWO ꞊KPƆƆSÜ WAA˗ MƐN ˗NU ˈÖ ˈWAA ꞊KPƆƆSÜ

6. ˗Kɔ ˗mɛɛn ˈö ˈnëndhiëŋnën ˗nu ˈö ˈwaa gɔɔn˗ ˗wɔn dɔ bhë ˈwo˗ ˗zɔn ˗a ˈka ꞊dhɛ wo ꞊kpɔɔsü? (Mat. 25:​6-10)

⁶ ˈWɔnzuan ˈö ˗gban ˈnëndhiëŋnën ˗nu ˈö ˈwaa gɔɔn˗ ˗wɔn dɔ bhë ˗an ˗bha ˗a ˈgü, Yesu ˗yö ˈnëndhiëŋnën ˗nu ˈwo ˈˈdhʋ̈ ˗a mɛn ˗kɔŋ do wo yö ˈˈkpɛɛn kö ˈwo ˗kpan dhesügɔn ˗bha, ˗an ˗wɔn ꞊blɛɛ. (Mat. 25:​1-4) ˗An ꞊gban ˈˈpɛpɛ ˗wa ˈˈpiʋ̈ kö waa dhesügɔn ˈwo ˈdho dhe ˈsü ˈwlaan˗ ˗ta. Yesu ˗ya ˗pö ˗a mɛn ˈˈsoodhu ˗kun «˗gleŋsü», ˈö˗ mɛn ˈˈsoodhu ˈwo to ˈwaa kun «꞊kpɔɔsü.» ˗A mɛn ꞊kpɔɔsü ˗nu ˈwo ˈˈdhʋ̈, ˗wo wo ˗de ˗baa ˈwo ˗ya wo ˈˈɲaan ˈwo kun dhesügɔn ˈˈdhiʋ̈ ˈˈgan ˗ni ˈgü zuʋ̈saadhɛ ˈka, ˈkö ˗kë ˗ʒiaanwo ꞊dhɛ ˗yö ˗dho nu gbeŋ ꞊zinŋgü. ꞊Laŋba ˗nu ˗kun ˗an ˗gɔ kö ˗wo ˗dhɛ yö ˗dhɛtiidhɛ ˈgü. ˗Wo ˈˈwo ˈˈyi ˈbha ˗kun wo ˗kɔ ˈˈpiʋ̈ kö ˗ya kë ꞊dhɛ dhesügɔn ˈti nu ꞊vaandhö kö ˈwo˗ ˗da ꞊laŋba ˈgü. ˗Wo wo ˗de ˗baa kö wo ˗bha ꞊laŋba ˗nu ˗wo ˈto ˈˈpʋ ˗sü ˈka. (Matiö 25:​6-10 ˗wo pö.) ˈDhɛ dhesügɔn ˗yö nu, ˈnëndhiëŋnën ˗nu ˈwo ˗kë baasü ˈka bhë waa˗ ˗nu wo ˗dho dhe ˈsü ˈwlaan˗ ˗ta. ˗Kɔ do ˈö bhë ˗a ˈka ˈˈɲɔn ˗a ꞊troo ˗nu ˗wa ˗ya wo ˈˈɲaan, ˗wa ˈto ˗klu ˗sü ˈka ˗Zlan ˗bha ˗wa yö ˗a ˈka Klito nu yi ˗bha, ˗wo ˗dho wo ꞊saan ꞊slɔɔ ˈö waa Dhesügɔn Klito ˈwo ˗kë ˗a ˗bha ˗Gblüdëdhɛ ˈgü dhaŋ˗ ˈgü. b (˗Dhɛ. 7:​1-3) ˈYö˗ ˈnëndhiëŋnën ˗nu ˈö ˈwaa ꞊kpɔɔɔsü bhë ꞊wɛ?

7. ˈMën ˗kë ˈö ˈnëndhiëŋnën ˈˈsoodhu ˗nu ˈö ˈwaa kun ꞊kpɔɔsü bhë ˗an ˈka? ˈYö ˈmën ˗kë?

 ⁷ ˈNëndhiëŋnën ˈˈsoodhu ˈö ˈwaa kun ꞊kpɔɔsü bhë ˗wo ˈti˗ kë ꞊dhɛ ˗a mɛn ˈˈsoodhu ˈwo kun ˗gleŋsü ˗an ˈdhö, ˈyö sü ꞊dhɛ ˗wo ˈti wo ˗de baaˈˈ dhesügɔn ˈˈdhiʋ̈ ˈˈgan ˗sü ˗bha. ˗An ˗bha ꞊laŋba ˗yö ˗ya dhuuˈˈ ˗sü ˗bha ˈö ˗wo ˈti ˈˈwo ˈˈyi ˈkun wo ˗kɔ ˈˈpiʋ̈. ˈDhɛ ˈwo˗ man ꞊dhɛ dhesügɔn nu ˈˈtʋ̈ŋ ˗ya ˈto ꞊klöö˗ ˈyö ˈwo dho ˈˈwo ˈˈyi dhɔ. ˗Wo ˗to mü ˈö dhesügɔn ˗yö nu ˗an ꞊zlöö. ˈDhɛ ˈˈtʋ̈ŋ ˗yö ˗ʒiö, ˈyö «˗a mɛn ˗nu ˈwo kun baaˈˈ ˗sü ˈka bhë waa dhesügɔn ˗nu ˈwo ˗da ˈwlaan˗ ˗kë ˗a ˈgü kɔ ˈgü, ˈö ˈwo ˈˈkwee ta.» (Mat. 25:10) ꞊Taabha ˗a mɛn ˗nu ˈö ˈwaa ꞊kpɔɔsü bhë, ˗wo wo ꞊yɛɛ˗ ˗kë ˈö ˈwo kun ˗a ˈˈpiʋ̈ kö ˈwo ˗da ˈkɔɔ. ˈˈKɛɛ ˈyö dhesügɔn ˗ya pö ˗an ˗dhɛ: «ˈMaan ka dɔ.» (Mat. 25:​11, 12) ˈNëndhiëŋnën ˗nu ˈwo bhë, ˈwaa kun baasü ˈka kö ˗wo dhesügɔn ˈˈdhiʋ̈ ˈˈgan ˈpinŋdhö. ˗Gleŋ ˗mɛɛn ˈö ˈˈɲɔn ˗a ꞊troo ˗nu ˗wa sü ˗a ˈgü?

8-9. ˗Gleŋ ˗mɛɛn ˈö ˈˈɲɔn ˗a ꞊troo ˗nu ꞊mɔɔn˗ ˗bha kö ˗wa ˈsü ˈwɔnzuan ˈö ˗gban ˈnëndhiëŋnën ˗nu ˈö ˈwaa gɔɔn˗ ˗wɔn dɔ bhë ˗an ˗bha? (Kpɔɔˈˈ ˈzü pë ˈˈbin ˗bha.)

⁸ ˗Kwa kwa ˗de baaˈˈ, ˈkwa ˗ya ˈkwa ˈˈɲaan. Yesu ˈyaa kun ˗a pö ˗ni ˈgü ꞊dhɛ ˈˈɲɔn ˗a ꞊troo ˗nu kpö ˗dho kë ꞊plɛ. ˗A mɛn kpö do ˗dho kë baasü ˈka ˈö dho ˈö yö ˗a ˈka ˈˈkpɔnŋtaadhɛ ɲën ˗yi ˗bha, ˈö˗ mɛn kpö do ˈti ˗dho kë baasü ˈka. ˗Yö ˗we ꞊ʒiaan pë ˈö dho kë ˈˈɲɔn ˗a ꞊troo ˗nu ˈö ˗wo ˈti dho wo ˗de baaˈˈ ˗bɔ ˈwɔn ˈˈgbɩɩ˗ ˗nu ˈgü ˗sü ˗bha, kë ˈˈdhʋ̈ kö ˗wo ˈto ˗klu ˗sü ˈka ˗Zlan ˗bha ˗kplawo bhë ˗an ˈka. ˗Ya kë ˈˈdhʋ̈, ˗wo ˈti ˗dho wo ꞊saan ꞊slɔɔ. (Zan 14:​3, 4) ˗A ˗wɔn ˗yö ˈˈgbɩɩ˗ ꞊dedewo. ˈKö ˗kë ꞊dhɛ kwa ˗dho ˗tosɛta kë dhaŋ˗ ˈgü ɛɛnˈˈ ˈˈsɛ ˗ta yö, mɛn ˈˈpɛpɛ kwa dua ˗mü kö ˈkwa kwa ˈˈtʋ̈ŋ kë ˈwɔnzuan ˈö ˗gban ˈnëndhiëŋnën ˗nu ˈö ˈwaa gɔɔn˗ ˗wɔn dɔ ˗an ˗bha bhë, ˗a ˈgü. Mɛn ˈö ˗dhö ˗a dua ˗mü kö ˗yö ˗ya ö ˈˈɲaan, kë ˈˈdhʋ̈ kö ˗yö bɔ ˈwɔn ˈˈgbɩɩ˗ ˗nu ˈgü ˗yö ˈdho ˗yö yö˗ ˈka ˗a ˈˈdhiʋ̈todhɛ ˗bha.—Mat. 24:13.

⁹ Yesu ˗yö ˗bɔ ˈwɔnzuan ˈö ˗gban ˈnëndhiëŋnën ˗nu ˈö ˈwaa gɔɔn˗ ˗wɔn dɔ ˗an ˗bha bhë ˗a ˗ta kö ˈö˗ ˗zɔn ꞊dhɛ kwa dua ˗mü ˈkwa kwa ˗de baaˈˈ, ˈkwa ˗ya kwa ˈˈɲaan. ˗Yö ˗go mü ˈzü ˈö ˈwɔnzuan ˈö ˗gban ˈwëë˗ talan ˗nu ˗bha ˗a ˗wɔn ꞊blɛɛ kö ˈö˗ ˗zɔn ˈpö ꞊dhɛ kwa dua ˗mü kö ˈkwa yökë kwa ꞊sɔbhɛɛ ꞊dede ˈka.

 ˈWËË˗ TALAN ˗NU

10. Yökëmɛn ꞊plɛ ˈwo kun ˗klu ˗sü ˈka wo dëmɛn ˗bha bhë, ˈmën ˈwo˗ ˗kë? (Matiö 25:​19-23)

¹⁰ ˈWɔnzuan ˈö ˗gban ˈwëë˗ talan ˗nu ˗bha ˗a ˈgü, Yesu ˗yö yökëmɛn ˗nu ꞊plɛ ˈwo ˗klu wo dëmɛn ˗bha waa˗ mɛn do ˈö˗ ˈti˗ kë ˈˈdhʋ̈ ˗an ˗wɔn ˗blɛɛ. (Mat. 25:​14-18) ˗A mɛn ˗nu ˈwo ˗klu wo dëmɛn ˗bha bhë ˗wo yökë wo ꞊sɔbhɛɛ ꞊dede ˈka kö wo dëmɛn ˗yö ˈwëë˗ ꞊va ꞊slɔɔ. ˈˈSanni ˗yö ˈˈtakpɔ, ˗an dëmɛn ˗yö ˈwëë˗ talan ꞊va ˗nu ˗an ˗dhɛ. ˗Wo yökë wo ꞊sɔbhɛɛ ꞊dede ˈka kö ˈwëë˗ ˈö ˈˈdhʋ̈ ˈwo˗ ˈkun ˗së. ˗Mën ˗wɔn ˗së ˈö go ˗a ˈgü? ˗Dhɛ ˈö ˗an dëmɛn ˗yö nu, kö ˗wa ˈwëë˗ ˈö bhë ˗a ˗gɔa ꞊plɛ ꞊slɔɔ. ˗An dëmɛn ˗ya ˈˈnuɛ ˗bho ˈö˗ pö ˗an ˗dhɛ ˗wo «zuʋ̈gblüdhi kë [ö] ˈˈpiʋ̈.» (Matiö 25:​19-23 ˗wo pö.) ˈYö yökëmɛn do ˈö to ꞊wɛ? ˗Mën ˈö ˗kë ˈwëë˗ ˈö˗ dëmɛn ˗ya nu ˗a ˗dhɛ ˈpö ˗a ˈka?

11. ˈMën ˗kë yökëmɛn ˈˈfiasü ˈka? ˈYö ˈmën ˗kë?

¹¹ ˗A yökëmɛn ˗yaaga ˗bha ˗naan ˈö bhë ˈwëë˗ talan do ˈnën˗ ꞊slɔɔ, ˈˈkɛɛ ˗yö ˗kün «ˈˈfiasü.» ˗A dëmɛn ˗kun ˗a ˈˈpiʋ̈ ˗be kö ˗yö ˈwëë˗ talan ˈö bhë ˗a ˗ʒiö ˗a ˈgü kë ꞊kpɔɔdhɛ ˗bha, ˈˈkɛɛ ˗yö ˈti˗ kë ˈˈdhʋ̈. Pë ˈö˗ ˗kë ꞊ʒiaan ˈyö ˗tɔ ˗a ˗bin ˈö˗ wo ˈˈsɛɛdhö. ˗Dhɛ ˈö˗ dëmɛn ˗yö nu, ˗ya ˗bha ˈwëë˗ talan do ˈö ˈˈdhʋ̈ ˗a ˗yɛ ˈzü ˈö˗ nu ˗a ˗dhɛ. ˗Ya ˗zɔn ꞊dhɛ ˈwɔn yö ˗kɔ ˗së ˈti kë ˗a ˗gɔ. ˗Yö ˈti bhɛɛˈˈ ö dëmɛn ˗dhɛ ˈwɔn ˈö bhë ˗a ˗wɔn ˈgü, ˗ya ˗pö ˗a ˗dhɛ ꞊ʒiaan ꞊dhɛ «[˗a] ˗bha ˈwɔn ˗yö ˈya˗.» ˗A ˗wɔn ˈgü ˗a yökëmɛn ˈˈdhiaa ˗yö ˗go ˗a dëmɛn ˈgü ˈö ˈwëë˗ talan do ˈö bhë ˗a kun ˗a ˗gɔ, ˈö˗ ˗kë ö ˗gɔ ˈkɔɔ.—Mat. 25:​24, 26-30.

12. ꞊Dɛɛ, de ˗nu ˈwo ˗tɔ yökëmɛn ꞊plɛ ˈwo ˗klu wo dëmɛn ˗bha bhë?

¹² ˈˈƝɔn ˗a ꞊troo ˗nu ˗wo ˗kë ꞊dhɛ yökëmɛn ꞊plɛ ˈwo ˗klu wo dëmɛn ˗bha bhë ˗an ˈdhö. ˗An Dëmɛn Yesu ˗yö ˗an ˗dhɛ kö ˗wo «zuʋ̈gblüdhi kë [ö] ˈˈpiʋ̈.» ˗An ꞊saan ˈnën ˗tɔ ˗go ga ˈgü ˗sü ˗blɛɛsü. (Mat. 25:​21, 23; ˗Dhɛ. 20:5) ˈˈKɛɛ ˗a ˈwɔnzuan yaa ˈö ˗gban yökëmɛn ˈˈfiasü ˗bha bhë, ˗yö ˈˈɲɔn ˗a ꞊troo ˗nu ˗zokpɔɔ ˗kɔ ˗kë ꞊dhɛ?

13-14. ˗Gleŋ ˗mɛɛn ˗nu ˈö ˈˈɲɔn ˗a ꞊troo ˗nu ˗wa sü ˈwɔnzuan ˈö ˗gban ˈwëë˗ talan ˗nu ˗bha bhë, ˗a ˈgü? (Kpɔɔˈˈ ˈzü pë ˈˈbin ˗bha.)

¹³ ˗Kwa yökë kwa ꞊sɔbhɛɛ ꞊dede ˈka. ˈWɔnzuan ˈö ˗gban ˈwëë˗ talan ˗nu ˗bha waa˗ ˗dhɛ ˈö ˗gban ˈnëndhiëŋnën ˗nu ˈö ˈwaa gɔɔn˗ ˗wɔn dɔ ˗an  ˗bha bhë ˗an ˈgü, Yesu ˈti˗ pö ꞊dhɛ ˈˈɲɔn ˗a ꞊troo ˗nu ˗dho kë ˈˈfiasü. ˈˈKɛɛ ˗wo ˈti ˈwɔn ˗nu kë wo ꞊sɔbhɛɛ ꞊dede ˈka, ˈpë dho kë ˗an ˈka ˈnën kun ˗a blɛɛˈˈ ˗ni ˈgü. ˗Ya ˗pö ꞊dhɛ ˗ya kë ˈˈdhʋ̈, ˗an ˗kɔ ˈti ˗dho ꞊mɔɔn˗ ˗bha ‹kö ˗an ˗dhɛ ˈö ˗Zlan ˗ya wo bha, ˗wo ˈto ˗kplü ˗sü ˈka ˗a ˗bha.›—2 Piɛ. 1:10.

¹⁴ Yesu ˗bha ˈwɔnzuan ˗nu ˈwo ˗gban ˈnëndhiëŋnën ˗nu ˈö ˈwaa gɔɔn˗ ˗wɔn dɔ waa ˈwëë˗ talan ˗nu ˗an ˗bhë ˗wa ˗zɔn ˈˈpuu ˈka ꞊dhɛ ˈˈɲɔn ˗a ꞊troo ˗nu ˈˈpɛpɛ dua ˗mü kö ˗wo kë baasü ˈka, ˗wo ˗ya wo ˈˈɲaan, ˗ya ˈgo mü kö ˗wo yökë wo ꞊sɔbhɛɛ ꞊dede ˈka. Yesu ˗yö ˗an ˗kpɔɔ ˗kɔ ˈˈwɛɛ ˈgü ˈzü ˗ee? ꞊Ii! ˗A ˗wo ˈö Matiö 24:​40, 41 ˈgü bhë, ˗yö ˗gban ˈpö za ˗totaabhasü ˈö dho dɔ ˈˈɲɔn ˗a ꞊troo ˗nu ˗bha bhë ˗a ˗bha.

DE ˗NU ˈWO DHO ˗AN «ˈSÜ?»

15-16. Matiö 24:​40, 41 ˗yö ˈˈɲɔn ˗a ꞊troo ˗nu ˗takun ˗kɔ ˗kë ꞊dhɛ kö ˗wo ˗ya wo ˈˈɲaan?

¹⁵ ˈˈSanni Yesu ˗yö ˈwɔnzuan ˗nu ˈwo bhë ˗an ˗wɔn blɛɛˈˈ, ˗yö za ˗totaabhasü ˈö dho ˗a dɔ ˈˈɲɔn ˗a ꞊troo ˗nu ˗bha kö ˗a ˈmɛn ˈö˗ ˈˈdhiaa ˈdhö ö ˈgü ˈö˗ dɔ, ˗a ˗wɔn ˗blɛɛ. ˗Yö gɔɔn˗ ˗nu ꞊plɛ ˈwo dho kë yökë ˗ni ˈgü wo ˈko ꞊bhaa waa dhebɔ ˗nu ꞊plɛ ˈwo dho kë ˈˈklënŋ ꞊bioo ˗ni ˈgü wo ˈko ꞊bhaa ˗an ˗wɔn ˗blɛɛ. ˈWɔnzuan ˈö bhë ˗a ˈgü, gɔɔn˗ ˗nu ꞊plɛ waa dhebɔ ˗nu ꞊plɛ ˗wo ˗kun yö do kë ˗ni ˈgü. ˈˈKɛɛ Yesu ˗ya ˗pö ꞊dhɛ ‹˗wo ˗dho ˗a mɛn do ˈsü, ˈwo˗ mɛn do to.› (Matiö 24:​40, 41 ˗wo pö.) ˗Yö ˗go mü ˈzü ˈö˗ pö ö ˗bha gwëëˈˈ ˗nu ˗dhɛ: «ˈDhɛ ˈö ˈˈdhʋ̈ ka ˗de ˈpö, ˗ka ˗ya ka ˈˈɲaan, ˗a ˗gɛn ˗mü ꞊dhɛ ˈˈlɛlɛ ˈö ka ˗zo ˈyaa˗ ˈˈpiʋ̈, ˈyö mɛn Gbö dho nu ˗a ˈka.» (Mat. 24:42) ˈDhɛ Yesu ˗yö ö bo ˈwɔnzuan ˈö ˗gban ˈnëndhiëŋnën ˗nu ˈö ˈwaa gɔɔn˗ ˗wɔn dɔ ˗a ˗zɔn ˗sü ˈka, ˈpë do ˈö bhë ˈyö˗ pö. (Mat. 25:13) ˈWɔnzuan ˗nu ꞊plɛ ˈwo ˈˈdhʋ̈ ˗wo ˗gban wo ˈkwëë˗ ˗ee? ꞊Ii. ˈˈƝɔn ˗a ꞊troo ˗nu ꞊dede ˈwo ˗klu ˗Zlan ˗bha ˈnën Yesu dho ˗an «ˈsü» kö waa˗ ˗nu ˗wo kë ˗Gblüdëdhɛ ˈgü dhaŋ˗ ˈgü.—Zan 14:3.

¹⁶ ˗Kwa ˗ya kwa ˈˈɲaan. ˈˈƝɔn ˗a ꞊troo ˗nu ˈˈpɛpɛ ˈö ˗wo ˈti ˗ya wo ˈˈɲaan bhë, ˗wo ˈti ˗dho waa˗ «mɛn ˗nu ˈö ˗Zlan ö ˗kɔ ˗yɛ ˗an ˗bha» ˗an ˗lo ˈkwëëdhö. (Mat. 24:31) ˗Ya ˈgo mü ˈzü ˗Zlan ˗dhɔkëmɛn ˗nu ˈˈpɛpɛ ˈwo dho ˗tosɛta ˈö ˈyaa ɲën ˗a kë ˈˈsɛ ˗ta yö bhë ˗an dua ˗mü ˈpö kö ˗wo ˗ya wo ˈˈɲaan, ˗wo ˈto ˗klu ˗sü ˈka ˗a ˗bha.

17. ˈMën ˗kë ˈö Zoova ˗ya ö ˗kɔ ˈˈyɛ mɛn ˈbha ˗nu ˗bha kwa ˗bha ˈˈtʋ̈ŋ ˈö yö ˗a ˈgü ˈö kwa zuʋ̈ˈˈ ˈˈdhiʋ̈ dua ˈyaa ˗mü kö ˗yö ˈˈtɛ ˗a ˗wɔn ˈgü?

¹⁷ ˈDhɛ ˗kë ꞊dhɛ kwa Zoova ˗dɔ ˗së ˈka bhë kwa ˈdhaŋ˗ ˗bho ˗a ˗bha zadɔsü ˈˈdhiʋ̈. ˗A ˗wɔn ˈgü ˗ya ö ˗kɔ ˈˈyɛ mɛn ˈbha ˗nu ˗bha kwa ˗bha ˈˈtʋ̈ŋ ˈö yö ˗a ˈgü kö ˗wo kë ˈˈɲɔn ˗a ꞊troo ˗nu ˈka, ˈya ˗dho kwa zuʋ̈ˈˈ ˈˈdhiʋ̈ ˈˈtɛ. c ˈPë Yesu ˗ya pö ˈö ˗gban mɛn ˗nu ˈwo dho yökë ˈˈlɛlɛ 11 ˈgü ˗drɔɔn ˗bhlaa ˈgü ˗a ˗bha bhë, kwa ˗zo ˗ya ˈˈpiʋ̈. (Mat. 20:​1-16) Mɛn ˗nu ˈwo nu yökë ˗drɔɔn ˗bhlaa ˈgü ꞊taabha waa˗ mɛn ˗nu ˈwo nu ˈˈdhiʋ̈ bhë, ˗an ꞊saan ˗yö ˗kë do. ˗Kɔ do ˈö bhë ˗a ˈka, mɛn ˗nu ˈwo ˈˈɲɔn ˗lo ˗an ꞊troo ꞊taabha ˗wa ˈto ˗klu ˗sü ˈka ˗Zlan ˗bha, ˗wo ˗dho wo ꞊saan ꞊slɔɔ dhaŋ˗ ˈgü ˈpö.

˗KWA KWA ˈˈTƲ ˈTO KWA ꞊KPƆƆWO ˗NU ˗BHA

18-19. ˗Gleŋ ˗mɛɛn ˗nu ˈkwa ˗an sü ˈwɔnzuan ˗nu ˈwo bhë ˗an ˈgü?

¹⁸ ˈMën ˈkwa˗ yö ˈwɔn ˗gɔ ˈö yö ˗a ˈgü? ˈWɔnzuan ˈö ˗gban ˈˈbhlaa waa ˗bho ˗nu ˗bha bhë ˗ya ˗zɔn mɛn ˗nu ˈwo dho ˈto ˈˈsɛ ˗ta yö ˗an ˗dhɛ ꞊dhɛ ˗an dua ˗mü kö ˗wo ˈto ˗klu ˗sü ˈka Zoova ˗bha ꞊dɛɛ kö ˗yö ˈdho ˗yö yö ˗a ˈka ˈˈklʋʋbhɔdhe ˈkpii˗ ˈˈtʋ̈ŋ ˗bha. ˗Dhɛkpaɔ dhiʋ̈ˈˈ ˈgü, mɛn ˗nu ˈwo to ˗klu ˗sü ˈka ˗Zlan ˗bha bhë, Yesu ˗dho ˗an ˈsü ꞊dhɛ mɛn ˗nu ˈwo dho «˗tosɛta ˈö˗ ˈˈdhiʋ̈todhɛ ˈyaa ˈdhö ˗a ꞊slɔɔ» ˗an ˈdhö.—Mat. 25:46.

¹⁹ ˈWɔnzuan ꞊plɛ ˈwo ˈˈɲɔn ˗a ꞊troo ˗nu ꞊kpɔɔ ˗an ˈgü kwa ˗an ˗yö ˈpö. ˈWɔnzuan ˈö ˗gban  ˈnëndhiëŋnën ˗nu ˈö ˈwaa gɔɔn˗ ˗wɔn dɔ ˗an ˗bha ˗a ˈgü, ˗a mɛn ˈˈsoodhu ˗wa ˗zɔn ꞊dhɛ wo ꞊kpɔɔsü. ˗Wo wo ˗de ˗baa ˈwo ˗ya wo ˈˈɲaan, ˈwo wo ˗bha ˈˈtʋ̈ŋ sü ˈö dho ˈö yö˗ ˈka dhesügɔn nu ˗sü ˗bha. ˈˈKɛɛ ˗a mɛn ˗nu ˈö ˈwaa kun ꞊kpɔɔsü bhë ˗wo ˈti wo ˗de baaˈˈ dhesügɔn ˗bha nu ˗sü ˗bha. ˗A ˗wɔn ˈgü dhesügɔn ˈti ˈˈwɩ˗ ˗bha kö waa˗ ˗nu ˈwo ˈwlaan˗ kë. ˗Kɔ do ˈö bhë ˗a ˈka, kwa dua ˗mü kö ˈkwa kë baasü ˈka kö ˗yö ˈdho ˗yö yö˗ ˈka ˈˈtʋ̈ŋ ˈö Yesu dho ˈˈkpɔnŋtaadhɛ yaa ˈö yö ˗a ˈgü shiʋ̈ˈˈ ˗a ˈka bhë ˗a ˗bha. ˗Ya ˈgo mü Yesu ˗bha ˈwɔnzuan ˈö ˗gban ˈwëë˗ talan ˗nu ˗bha ˗a ˈgü, yökëmɛn ˗nu ꞊plɛ ˈwo kun ˗klu ˗sü ˈka wo dëmɛn ˗bha bhë ˗wo yökë wo ꞊sɔbhɛɛ ꞊dede ˈka wo ˗gɔmɛn ˗bha ˈka, ˈö ˗an ˈˈdhiaa ˗yö ˗da ˗a ˈgü. ˈˈKɛɛ yökëmɛn ˈˈfiasü ˗zë ˗a dëmɛn ö ˗kɔ ˗bho ˗a ˈgü. ˗Gleŋ ˗mɛɛn ˈkwa˗ sü ˗a ˈgü? Kwa dua ˗mü ˈpö kö ˈkwa Zoova ˗bha yökë ˈˈtʋ̈ŋ ꞊gban ˗tʋ̈ŋ ꞊gban ˈgü. Pë ˗totaabhasü ˈö ˈkwa˗ yö ˈyö ˗tɔ ˗kɔ ˈö ˈˈɲɔn ˗a ꞊troo ˗nu dho ˗ya ˗a ˈka wo ˈˈɲaan kë ˈˈdhʋ̈ kö Yesu ˗yö ˗an ˈsü ˗yö ˈdho ˗an ˈka dhaŋ˗ ˈgü. ˗An ˈˈɲan ˗yö ˗an «˗loo ˈko ˗ta ˗sü» kö waa Yesu ˗nu ˗wo kë dhaŋ˗ ˈgü bhë ˗a ˗gɔ. Aamagedɔn ˗gblü ˗ya ɲën, ˗wo ˗dho kë ꞊dhɛ Yesu ˗bha dhebɔ ˗nu ˈdhö ˈˈbhlaanën ˗bha dhe ˗sü ˗yi ˈka.—2 Tes. 2:1; ˗Dhɛ. 19:9.

20. ˈMën dho kë mɛn ˗nu ˈwo wo ˈˈtʋ to Zoova ˗bha mɛn ꞊kpɔɔwo ˗bha, ˗an ˗dhɛ?

²⁰ ˈKö ˗kë ˗ʒianwo ꞊dhɛ Yesu ˗bha za ˗dɔ mɛn ˗nu ˗bha ˗sü ˈˈtʋ̈ŋ ˗yö nu ˗ni ˈgü ˈzozodhö, ˗a ˈˈsuʋ̈ dua ˈyaa ˗mü kö ˗yö kwa kë. ˈKwa ˈto ˗klu ˗sü ˈka ˗Zlan ˗bha, kwa Dë dhɔɔbhaasü ˈö dhaŋ˗ ˈgü bhë ˗yö ˗dho kwa gba «ˈgügbɩɩdhɛ ˗ziisü» ˈka, kë ˈˈdhʋ̈ kö ˈwɔn ˗nu ˗wo ˗ɲan kwa ˗gɔ ‹yi ˈö Mɛgbömɛ dho nu˗ ˈka bha ˗yö ˗kpan kwa ˗bha kö kwa dɔ ˗sü ˈka kwa ˗gɛan.› (2 Ko. 4:7; Dhu. 21:36) Kwa ꞊kpɔɔwo ˗nu ˈwo Yesu ˗bha ˈwɔnzuan ˗nu ˈgü bhë ˈkwa kwa ˈˈtʋ ˈto ˗an ˗bha, ˈkö ˗kë ꞊dhɛ kwa ˗dho ˈdho dhaŋ˗ ˈgü ɛɛnˈˈ kwa ˗dho ˈto ˈˈsɛ ˗ta yö, kwa ˗dho kë kwa Dë Zoova ˗dhɛ ˗së. ˗Ya ˈgo mü, ˈdhɛ ˗kë ꞊dhɛ ˗a ˈˈgblü ˗yö ˗së ꞊dedewo bhë kwa ˈtɔ ˗dho kë ˗bɛnzësü ˈka «ˈsëëdhɛ ˈö ˈmɛ ˈwo dho ˗tosɛa kë [˗a] ˈˈpiʋ̈ ˗a ˗nu ˈtɔ ˈdhö˗ ˈgü bha˗» ˗a ˈgü ˈpö.—Dan. 12:1; ˗Dhɛ. 3:5.