ˈWƆN ˗GƆ 35
ˈˈTAN 123 ˗Kwa ˈˈwɩ ˗Zlan ˗bha mɛn ꞊kɔɔn ˗sü ˗bha, ˈkwa ˈwɔn man ˗a ˗ta
Mɛn zii ˗nu ˗dho mɛn ˈö ꞊waa˗ bho kwa ˈˈpiʋ̈ ˗a ˗takun ˗kɔ ˗kë ꞊dhɛ?
‹꞊Niidadhe ˗yö ˗kë dhang˗ ˈgü kö ˈwɔnyaakëmɛ doseng ˗zian ꞊ya bɔ ˗Zlan ˈka ˈö ˗ziö ˈka mɛ ˗kaɔng ˈˈsueisiö ga ˈˈsueisiö ˈö pö ˈaa˗ ˗nu ˗bha ˗a ˗nu ˗wɔn ˗ta.›—DHU. 15:7.
˗A ˗GƆ
ˈMën ˗kë ˈwo ˈwɔnyaakëmɛn ˗nu bho kwa ˈˈpiʋ̈? Mɛn zii ˗nu ꞊mɔɔn˗ ˗bha ˈwo ˗an ˗takun ˗kɔ ˗kë ꞊dhɛ kö ˗wo ˈgo wo ˗bha ꞊sɔnŋ yaa ˈgü, ˗wo ꞊ɲɔɔn Zoova ˈˈsuee?
1-2. (1) Zoova ˗yö ˈwɔnyaakëmɛn ˈö ˈyaa ˈgo ö ˗bha ꞊sɔnŋ yaa ˈgü bhë, ˗a ˗yö ˗kɔ ˗kë ꞊dhɛ? (2) ˈMën Zoova ˈdhö˗ ˈˈpiʋ̈ kö ˈwɔnyaakëmɛn ˗ya kë?
ZOOVA ˈyaa ˈˈwɩ ˈˈtakɔ suu ˈˈpɛpɛ ˗bha. ˈWɔnyaakësü ˗san ˗ya ˗kë. (Ps. 5:4-6) ˗Ya ˈˈpiʋ̈ kö ˈkwa ö ˗bha ˈtɔŋ˗ ˗nu ˈwo Biblö ˈgü bhë ˗an ˗ya ꞊bhlëë ˈgü. ˈKö ˗kë ˈˈdhʋ̈, Zoova ˗ya ˈwɔn ˗dɔ ꞊dhɛ ˈwɔn yaa kë ˗dhii ˗yö kwa ˗bha ˈö kwa ˗kɔ ˈyaa ꞊mɔɔn˗ ˗bha kö ˈkwa ˗an ˗ya ꞊bhlëë ˈgü ˈkpakpadhö. (Ps. 130:3, 4) ˗A ˈˈtʋ̈ŋ do ˈö bhë ˗a ˈgü, ‹ˈmɛ ˈwo ˗gasitɛ ˈö˗ ˗kë kwa ˗dhɛ ˗a sü ˈwɔn ˈˈbhluubhlu ˈka› bhë, ˈyaa ö ˈˈɲan ˗ta ˗an ˗blü. (Zud. 4) Biblö ˗yö «ˈwɔnyaakëmɛ ˗nu [ . . . ] ˈgü see˗» ˗sü ˈö dho kë Aamagedɔn ˗gblü yi ˈka bhë, ˗a ˗wɔn ˗blɛɛ.—2 Piɛ. 3:7; ˗Dhɛ. 16:16.
2 ˈˈKɛɛ Zoova ˈyaa˗ ˈˈpiʋ̈ kö mɛn ˈbha ˈgü ˗yö shiʋ̈ˈˈ. ꞊Dhɛ ˗kɔ ˈö ˈkwa˗ yö˗ ˈka ˈˈsu ˗bha ˈsëëdhɛ ˈö yö ˗a ˈgü bhë ˗a ˈdhö, Biblö ˗ya ˗zɔn ˈˈpuu ˈka ꞊dhɛ Zoova ˗ya ˈˈpiʋ̈ kö «mɛ ˈˈpɛpɛ ꞊gban ˗wo ˈˈtʋng ꞊slɔɔ kö ˗wo ˈˈkan ˈwɔn yaa ˗bha.» (2 Piɛ. 3:9) Mɛn zii ˗nu dua ˗mü kö ˗wo ˈwɔnyaakëmɛn ˗takun zuʋ̈saadhɛ ˈka kö ˗yö ö ˈˈtakɔ bho ˈˈgblʋʋ, ˗yö ꞊ɲɔɔn Zoova ˈˈsuee ˈzü. ˈˈKɛɛ mɛn ˈbha ˗nu ˈwaa ˈgo wo ˗bha ꞊sɔnŋ yaa ˈgü. (Is. 6:9) -Wo ˗to ˈwɔnyaakësü ˗bha ˗kplawo ˈkö ˗kë ˗ʒianwo ꞊dhɛ mɛn zii ˗nu ˗wo ˗dho ˗an ˈˈpiʋ̈ ˗gɛnɲan ˈka ꞊va. ˗Ya kë ˈˈdhʋ̈, ˈmën mɛn zii ˗nu dua ˈdhö ˗mü kö ˗wa kë?
‹˗KA ˈWƆN YAA KËMƐ BHO KA ˈˈPIƲ̈›
3. (1) ˈMën Biblö ˗ya pö mɛn zii ˗nu ˗wa kë kletiɛn ˈö yö ˈti ˈgo ö ˗bha ꞊sɔnŋ ˈgü, ˗a ˈka? (2) Mɛn ˈbha ˗ya ˗kɔ ˗go ꞊sɔnŋ yaa ˈgü ˗sü ˈka, ˈmën ˗kë ˈkwa˗ pö ˗dhɛ ˗ya ˈˈwɩ ö ˗de ˗bho kwa ˈˈpiʋ̈ ˗sü ˗bha?
3 ˈWɔnyaakëmɛn ˗ya ˈto ö ˗bha ꞊sɔnŋ yaa ˈgü ˗kplawo, pë ˈˈwɛɛ ˈbha ˈö mɛn zii ˗nu dho ˗a kë ˈyaa ˈdhö, kö ˈyii kë 1 Kodhɛngtö 5:13 ˗ya ꞊bhlëë ˈgü ˗sü ˈka. ˗Ya ˗pö: ‹˗Ka ˈwɔn yaa këmɛ bho ka ˈˈpiʋ̈.› ˈWɔnyaakëmɛn ˗ya ˈwɔn ˗dɔ ꞊dhɛ ˈö ˈti ˈgo ö ˗bha ꞊sɔnŋ yaa ˈgü, ˗wo ˗dho ö ˗bho kwa ˈˈpiʋ̈. ˗Yö ˗dho kë ꞊dhɛ pë ˈö mɛn a ˗ya ta bhë, ˗a ga bho ˗sü ˈdhö. (Ga. 6:7) ˈMën ˗kë ˈkwa˗ pö ˈˈdhʋ̈? ˗A ˗gɛn ˗mü ꞊dhɛ ˈwɔnyaakëmɛn ˗yö ˗kɔ mɛn zii ˗nu ˗bha ˗takundhe ˈka ˈko ˗ta ꞊va. (2 Rois 17:12-15) ˗A këwɔn ˗nu ˗wa ˗zɔn ꞊dhɛ ˈyaa ˈˈpiʋ̈ kö ˈö Zoova ˗bha ˈtɔŋ˗ ˗nu ˗ya ꞊bhlëe ˈgü.—Deut. 30:19, 20.
4. ˈMën ˗kë ˈö ˗wa ˈwɔnyaakëmɛn bho kwa ˈˈpiʋ̈, ˈwo˗ ꞊blɛɛ ˗zlanwokɔdhigümɛn ˗nu ˗dhɛ?
4 Mɛn ˈbha ˈti ˈgo ö ˗bha ꞊sɔnŋ yaa ˈgü ꞊waa˗ bho kwa ˈˈpiʋ̈, mɛn zii ˗nu ˗wa ˗pö ˗zlanwokɔdhigümɛn ˗nu ˗dhɛ ꞊dhɛ ˗a ˗mɛn ˈyaa Zoova ˗bha ꞊Gbɛkiö ˈka ˈzü. b ˗Wo ˈti˗ kë ˈˈdhʋ̈ kö ˈwo ˈlëë˗ dɔ ˗a ˗bha. ˈˈKɛɛ ˗wa ˗kë ˈˈdhʋ̈ ꞊ʒiaan kö ˗zlanwokɔdhigümɛn ˗nu ˗wo Biblö ˗bha ˈtɔŋ˗ ˗ya ꞊bhlëë ˈgü. Biblö ˗ya ˗pö: «[˗]Ka ˈˈkan ˈmɛ wo ˈˈdhʋ̈ bha ꞊në˗ ˗nu ˗bha. Kɛng˗ ˗nu ˈka ˈdho ka ˗kɔ ˗zian ˗da ˈtɛa˗ do ˈgü.» (1 Ko. 5:9-11) ˗A ˗dhɛ ˗ya ˗bha kö ˗dhioo ˈö bhë, Biblö ˗ya dɔ kwa ˗ta. Bɔmɛn Pɔdhö ˗ya ˗pö: «ˈBha ˈˈsɛkɛ ˈnë ˈdɛdɛ ˗da ˈbluu˗ ˗bʋ̈ʋ̈ ˗bha ˗ya ˗puën ˈö ˗kë ˈkpii˗.» (1 Ko. 5:6) ˈWɔnyaakëmɛn ˈö ˈyaa ˈgo ö ˗bha ꞊sɔnŋ yaa ˈgü ˗ya ˈto kwa ˈˈpiʋ̈, mɛn ˈbha ˗nu ꞊mɔɔn˗ ˗bha ˈpö ˈwo Zoova ˗bha ˈtɔŋ˗ ˗nu ˗lö ˈgü.—Prov. 13:20; 1 Ko. 15:33.
5. ˗Wa mɛn ˈbha bho kwa ˈˈpiʋ̈, kwa ˗dho ˗a yö ˗kɔ ˗kë ꞊dhɛ? ˈYö ˈmën ˗kë?
5 ˗Wa mɛn ˈbha bho kwa ˈˈpiʋ̈, kwa ˗dho ˗a yö ˗kɔ ˗kë ꞊dhɛ? ˈKö ˗kë ꞊dhɛ ˈkwaa ꞊nënŋ ˗a ˗bha ˈzü, ˈkwa ˗dho ˗a ˈsü ꞊dhɛ mɛn ˈö ˗yö ˈti ˗dho ö ꞊yɛɛ˗ kë toŋtoŋdhö Zoova ˈˈpiʋ̈ ˗a ˈdhö. ˗Kwaa ˈsü ꞊ʒiaan ꞊dhɛ ˈˈbhlaanën ˈö ˗ya ꞊dhiɔŋ ˗a ˈdhö. ˈˈBhlaanën ˈö ˗ya ˈgo ˗tuëë kpö ˈgü bhë, ˗yö ꞊mɔɔn˗ ˗bha ˈö ö ꞊yɛɛ˗ ˗kë ˈzü. Kwa ˗zo ˈya ˗dho bhɔ ꞊dhɛ kwa ꞊dhegblü ˈö ˈˈdhʋ̈, ˗ya ö ˗de nu Zoova ˗dhɛ ˈsaadhö. ˈˈKɛɛ ˗wëëwɔn ˈö˗ ˗ta ˈyö ˗tɔ ˈyaa Zoova ˗bha ˈtɔŋ˗ ˗nu ˗ya ꞊bhlëë ˈgü ˈzü, ˗ya ö ˗de dɔ ga ˗yɛ ˈˈdhiʋ̈. (Ézéch. 18:31) ˈKö ˗kë ˈˈdhʋ̈ Zoova ˈö ꞊kun ꞊köŋ mɛn ˗nu ˗bhawɔn ˈto ˗ni ˈgü, ˗yö kë kwa ˈˈɲaan ꞊dhɛ ˗a ˗mɛn ꞊mɔɔn˗ ˗bha ˈö ö ꞊yɛɛ˗ kë. ˈDhɛ ˈˈdhʋ̈ mɛn zii ˗nu ˗dho mɛn ˈö ꞊waa˗ bho kwa ˈˈpiʋ̈, ˗a ˗takun ˗kɔ ˗kë ꞊dhɛ?
MƐN ZII ˗NU ˗DHO MƐN ˗NU ˈÖ ˗WA ˗AN BHO KWA ˈˈPIƲ̈, ˗AN ˗TAKUN ˗KƆ ˗KË ꞊DHƐ?
6. ˈMën mɛn zii ˗nu dho ˗a kë kö mɛn ˈö ꞊waa˗ bho kwa ˈˈpiʋ̈ ˗wa ˗takun?
6 ˗Wa mɛn ˈbha bho kwa ˈˈpiʋ̈, mɛn zii ˗nu ˗wo ˗kan ˗a ˗takunsü ˗bha ˗ee? ˗Abin toŋtoŋdhö! Mɛn zii ˗nu ꞊waa˗ pö mɛn ˈbha ˗dhɛ wo ˗dho ˗a bho kwa ˈˈpiʋ̈, ˗wo ˈpë dho ˗a kë kö ˗yö ö ꞊yɛɛ˗ kë ˗a ˗zɔn ˗a ˗dhɛ. ˗Ya ˈgo mü, mɛn zii ˗nu ˗wo ˈwɔn ˈbha ˗kë ˈzü. ˗Wa ˗pö ˈwɔnyaakëmɛn ˈbha ˗nu ˗dhɛ ꞊dhɛ ˈˈsu ˗nu ˗wa ʒiö, wo ˗dho ˗kpan ˗an ˗bha ˈzü kö ꞊ya kë ꞊dhɛ ˗wa wo ˗zotakɔ bho ˈˈgblʋʋ ˈwo˗ ˈwɔn dɔ. ˈˈSu ˗nu ˈwo ˈˈdhʋ̈ ˗wa ʒiö ˗a ˗mɛn ˗ya ˈˈwɩ ˗a ˗bha, mɛn zii ˗nu ˗dho ˗kpan ˗a ˗bha kö ˗wa ꞊faanmën ˗yö ˈgo ö ˗bha ꞊sɔnŋ yaa ˈgü. ˈKö ˗kë ˈzü ꞊dhɛ ˗yö ˈti ˈgo ö ˗bha ꞊sɔnŋ yaa ˈgü, mɛn zii ˗nu dua ˗mü kö ˗wo nu ˗a ˈˈpiʋ̈ zoodhö zoodhö, ˗wa ˗takun.
7. ˗Wa mɛn ˈbha bho kwa ˈˈpiʋ̈, mɛn zii ˗nu ˗wo ˗to Zoova ˗bha ˈwɔnzuan ˈˈpiʋ̈ ˈwo˗ ˗mɛn ˗wëëzë ˗kɔ ˗kë ꞊dhɛ? (Jérémie 3:12)
7 Mɛn ˗nu ˈö ˗wa ˗an bho kwa ˈˈpiʋ̈ bhë, ˗an ˗wëë ˗yö Zoova ˗kë. Mɛn zii ˗nu ˗wo ˗to ˗a ˗bha ˈwɔnzuan ˈˈpiʋ̈ ˈpö. ˗A ˈwɔnzuan ˈnën ˗tɔ ꞊kwɛŋzü, Zoova ˈti Izraɛdhömɛn ˗nu ˈˈdhiʋ̈ ˈˈgan kö ˗wo ˈgo wo ˗bha ꞊sɔnŋ yaa ˈgü ꞊köŋ kö ˈö ꞊kun ˗an ˗takun. Pë ˈö˗ ˗kë ˈyö ˗tɔ ˗yö ö ˗wodhiʋ̈lomɛn ˗nu ˗bɔ ˗an ˈˈpiʋ̈, ˈkö ˗kë ꞊ʒiaanwo ꞊dhɛ ˗wo ˈti˗ ˗zɔn ꞊dhɛ ˈwa ˈgo wo ˗bha ꞊sɔnŋ yaa ˈgü. Kwa ˗bha ˈwɔn ˗gɔ ꞊plɛ ˗bha ˗naan ˈgü, kwa ˈwɔnzuan ˈö ˗gban Oze ˈö Zoova ˗ya pö ˗a ˗dhɛ ˗yö ö ˗bha dhebɔ ˗bhawɔn ˈto kö ˗ya ˈsü ö ˗gɔ ˈkɔɔ ˈˈkɛɛ kö ˗a ˗bha dhebɔ ˗yö ˗kun ˈˈɲangüyaa kë ˗ni ˈgü ˗kplawo, ˗a ˗yö. (Osée 3:1; Mal. 3:7) ꞊Dhɛ Zoova ˈdhö, mɛn zii ˗nu ˗wa ˈˈpiʋ̈ ꞊dedewo kö ˈwɔnyaakëmɛn ˗yö ö ꞊yɛɛ˗ kë, ˈwo pë ˈˈpɛpɛ ˗kë kö ˗yö kë ˗a ˗kɔa ˈˈplëëplë.—Jérémie 3:12 ˗wo pö.
8. Yesu ˗bha ˈwɔnzuan ˈö ˗gban ˈnën ˈö go ö dë ˗gɔ ˈkɔɔ ˗a ˗bha bhë, ˗yö kwa ˗takun kö ˈkwa˗ yö ꞊dhɛ Zoova ˗yö mɛn ˗wëëzë ˗kɔ ˗kë ꞊dhɛ? (Dhukö 15:7)
8 Yesu ˗bha ˈwɔnzuan ˈö ˗gban ˈnën ˈö go ö dë ˗gɔ ˈkɔɔ ˈö kwa ˗bha ˈwɔn ˗gɔ ꞊plɛ ˗bha ˗naan ˈgü bhë, ˗kwa kwa ˗zota ˗a ˈgü. ˈDhɛ dë ˗yö ˗kpan ˗a ˗bha «ˈyö ˗bɛang ˗sü ˈö dho ö gbö bha˗ ˈˈdhiʋ̈ ˗gɔ ˈyö dho ˈyö ꞊loo˗ ˗bha.» (Dhu. 15:20) Kwa˗ ˗yö ꞊dhɛ ˈnëndë ˈti ö gbö ˈˈdhiʋ̈ ˈˈgan kö ˗yö bhɛɛˈˈ ö ˗dhɛ kö ˈö ꞊kun ˗a ˗bhawɔn ˈto. ˗Yö ˗dho ˗bia ˈka ˗a ˈˈpiʋ̈, ˈyö sü ꞊dhɛ ˗a gbö ˗dhɔ ˗ya ˗kë. ˈWɔn yö ˗kɔ do ˈö bhë ˈnën mɛn zii ˗nu ˗gɔ mɛn ˈö ꞊waa˗ bho kwa ˈˈpiʋ̈ ˗a ˗bha ˈka. ˗Wa ˈˈpiʋ̈ kö Zoova ˗bha ˈˈbhlaanën ˗nu ˈö ˗wa ꞊dhiɔŋ bhë, «˗wo wo ꞊yɛɛ˗ kë ˗a ˈˈpiʋ̈.» (Dhu. 15:22-24, 32) Kö ˈwɔnyaakëmɛn ˗yö ö ꞊yɛɛ˗ kë, Zoova, Yesu, ˈˈkiö ˗nu waa ˗zlanwokɔdhigümɛn ˗nu ˗todhʋ̈sü zuʋ̈ˈˈ ˈˈgblü ˗yö ˗dhi ꞊dedewo!—Dhukö 15:7 ˗wo pö.
9. ˈMën Zoova ˈdhö˗ ˈˈpiʋ̈ kö ˈwɔnyaakëmɛn ˗nu ˗wa kë?
9 Kwa˗ ˗yö ˈˈpuu ˈka ꞊dhɛ Zoova ˈö bhë ˈyaa˗ ˈˈpiʋ̈ kö mɛn ˈö ˈyaa ˈgo ö ˗bha ꞊sɔnŋ yaa ˈgü ˗yö ˈto kwa ˈˈpiʋ̈. ˈˈKɛɛ ˈyaa ˈˈkan ˈpö ˈwɔnyaakëmɛn ˗nu ˗bha. ˗Ya ˈˈpiʋ̈ kö ˗wo wo ꞊yɛɛ˗ kë. Mɛn ˗nu ˗wa ˈgo wo ˗bha ꞊sɔnŋ yaa ˈgü, ˗kɔ ˈö Zoova ˗yö ˗kë ˗a ˈka ö ˗de ˈgü ˗ya ˗blɛɛ Osée 14:4 ˈgü, ˈö˗ pö: «A ˗dho n ˗zo bho ˗an ˗bha ˗kan n ˗man ˗sü ˈˈpiʋ̈. ˗An ˗dhɔ ˗dho n ˗kë n zuʋ̈ˈˈ ꞊gban ˈka, ˈyö sü ꞊dhɛ n ˗man ˗naanzuëëdhe ˗ya ɲën.» Mɛn zii ˗nu ˗zo ˗ya ˗da Zoova ˗bha ˈwɔnyaakëmɛn ˗nu yö ˗kɔ ˈgü, mɛn ˈbha ˗yo ˈgo ˗ni ˈgü ö ˗bha ꞊sɔnŋ yaa ˈgü ˗wo wo ˈˈtʋ̈ŋ ˗kë ˗a ˈgü. ˗Wo ˗nu ˈwo bhë ˗wo ꞊mɔɔn˗ ˗bha kö ˗wo mɛn ˗nu ˈö ˗wa ˈˈkan Zoova ˗bha ˗an ˗zogban kö ˗wa yö ꞊dhɛ wo ˗dhɔ ˗ya ˗kë, ˈö˗ ˈˈpiʋ̈ kö ˗wo wo ꞊yɛɛ˗ kë.
10-11. Mɛn ˗nu ˈwo ˗an bho kwa ˈˈpiʋ̈ ˈö˗ ˗kwɛ ˗ya kë ꞊va bhë, mɛn zii ˗nu ˗dho ˗an ˗takun ˗kɔ ˗kë ꞊dhɛ?
10 ˈYö mɛn ˗nu ˈö ˗wa ˗an bho kwa ˈˈpiʋ̈ ˈö˗ ˗kwɛ ˗ya kë ꞊va ꞊wɛ? ˗A ˈbha ˗ya kë kö ˈwɔn yaa ˗nu ˈwo ˗an bho kwa ˈˈpiʋ̈ ˗an ˗wɔn ˈgü ˈˈdhʋ̈, ˈwaa ˗an kë ˗ni ˈgü ˈzü. ˗A ˈbha ˗ya kë ꞊ʒiaanwo kö ˈpë ˈwo ˗an bho kwa ˈˈpiʋ̈ ˗a ˗wɔn ˈgü, ˈwaa ˗an dɔ ˈzü. ˗Yö ˗kë ˗kɔ ˈˈoo ˗kɔ ˈgü, mɛn zii ˗nu dua ˗mü kö ˗wo ˗an ˈˈpiʋ̈ mɛɛnˈˈ, ˗wo ˗wo ˗an ˗dhɛ. ˗Wo ˗an ˗dhɛ ˗sü ˈˈtʋ̈ŋ ˈka, mɛn zii ˗nu dua ˗mü ˈzü kö ˗wo bhɛɛˈˈ ˗an ˈˈpiʋ̈, ˗wo ˗an ꞊faanmën kö ˗wo wo ꞊yɛɛ˗ kë. ˈYaa za ˈgü ꞊dhɛ ˗wa mɛn ˈbha bho kwa ˈˈpiʋ̈ ˗a ˗kwɛ ˗ya kë ꞊va, kö ˗a ˗mɛn ˗ya kë ˈˈtëëtë ꞊dedewo. ˗A ˗wɔn ˈgü ꞊yaa˗ pö ˈö ö ꞊yɛɛ˗ kë, mɛn zii ˗nu dua ˗mü ˗wa ˈˈslö mɛɛnˈˈ kö mɛn ˈbha ˗ya takun Biblö ˈka, ˈkö ˗kë ꞊dhɛ ˗ya nu ˈsaadhö ˗zlanwokɔdhi ˈgü. Mɛn zii ˗nu dosɛnŋ ˈnën ˗an dua ˈdhö ˗mü kö ˗wa ˗bha Biblö draansü ˗wɔn ˈˈɲan bhɔ.
11 Mɛn zii ˗nu ˗wo ˗to Zoova ˗bha mɛn ˗wëëzësü ˈwɔnzuan ˈˈpiʋ̈ ˈwo wo ˗kɔ kpɔ mɛn ꞊vadhɛ ˗gɔ, ˈwo ˗an ˗takun kö ˗wa yö ꞊dhɛ Zoova ˗bha ˈkɔ ˈˈdhi ˗yö ˈˈpʋ ˗sü ˈka wo ˗gɔ. ˈWɔnyaakëmɛn ˈbha ˗ya ˈgo ö ˗bha ꞊sɔnŋ yaa ˈgü, ˗ya ˈˈkan ö ˈˈtakɔ ˈyaa ˗nu ˗bha ˗yö ꞊mɔɔn˗ ˗bha ˈö ö ꞊yɛɛ˗ ˗kë.—2 Ko. 2:6-8.
12. (1) ˈWɔn ˗mɛɛn ˗nu ˈgü ˈö mɛn zii ˗nu dho kë wo ˈsuan˗ ˈka? (2) ˈMën ˗kë ˈö kwa dua ˈyaa ˗mü kö ˈkwa˗ pö ꞊dhɛ mɛn ˗nu ˈwo ˈwɔn yaa suu ˈbha ˗kë bhë, Zoova ˈti ˗dho ˗an ˗bhawɔn ˈto? (Kpɔɔˈˈ ˗zoto ˗a ˈˈpiʋ̈ ˗wɔn ˗bha.)
12 Mɛn zii ˗nu ꞊waa˗ pö ˈwo wo ꞊kwaa mɛn ˈbha ˗zü kö ˗yö ö ꞊yɛɛ˗ kë ˗zlanwokɔdhi ˈgü, ˗an dua ˗mü kö ˗wo kë wo ˈsuan˗ ˈka. ˗A ˈwɔnzuan ˈnën ˗tɔ ˗ya kë ꞊dhɛ ˗a ˗mɛn ˗yö trʋʋˈˈ yaa ˗kë ˈnën ˈsɛɛn˗ ˗nu ˈka, ɛɛnˈˈ ˗yö ö ˗kɔ ˗da ˗gban ˗Zlan ˗gɔ ˗sü ˈgü ɛɛnˈˈ ˈzü ˗yö ˈˈkpënŋ˗ ˗kë kö ˈö ö ˗bha ˈkosüsü shiʋ̈ˈˈ, mɛn zii ˗nu dua ˗mü kö ˗wa ˗ga ꞊dedewo ꞊dhɛ ˗ya ˈgo ö ˗bha ꞊sɔnŋ yaa ˈgü kö ˈwo˗ ˈwɔn dɔ. (Mal. 2:14; 2 Tim. 3:6) Mɛn zii ˗nu dua ˗mü kö ˗wo ˗zlanwokɔdhi ˗takpa. ˈˈKɛɛ ˗yö kë kwa ˈˈɲaan ˈpö ꞊dhɛ ˈwɔnyaakëmɛn ˗ya ˈgo ö ˗bha ꞊sɔnŋ yaa ˈgü ꞊dedewo ˗ya ˈˈkan ö ˈˈtakɔ yaa ˗nu ˗bha, Zoova ˗dho ö ˗kɔ ˈkpɔ ˗a ˗gɔ. ˈDhɛ ˈˈdhʋ̈, ˈkö ˗kë ꞊dhɛ mɛn zii ˗nu ˗wa ˈˈpiʋ̈ kö ˈwo˗ yö ꞊dhɛ mɛn ˈbha ˈö ˈwɔn yaa kë mɛn ˈˈwɛɛ ˗nu ˈka ˗ya ˈgo ö ˗bha ꞊sɔnŋ yaa ˈgü ꞊dedewo, ˗an dua ˈyaa ˗mü kö ˗wa pö ꞊dhɛ Zoova ˈti ˗dho ˗a ˗mɛn ˗bhawɔn ˈto toŋtoŋdhö. c—1 Piɛ. 2:10.
ˈMËN ˗ZLANWOKƆDHIGÜMƐN ˗NU ꞊MƆƆN˗ ˗BHA KÖ ˗WA KË?
13. Mɛn ˈbha ˈö mɛn zii ˗nu ˗wa ˗dhioo ˈˈgbɩɩ˗ dɔ ˗a ˗ta waa mɛn ˈö ꞊waa˗ bho kwa ˈˈpiʋ̈ bhë ˗an ˗bhokopiʋ̈dhɛ ˈnën ˗tɔ ˗mën?
13 ꞊Dhɛ ˗kɔ ˈö ˈkwa˗ yö˗ ˈka ˈwɔn ˗gɔ ö˗ ˈdhɛ yö ˈö dɔ ˗a ˈˈpiʋ̈ ˗a ˈgü bhë˗ ˈdhö, ꞊waa˗ pö ˗zlanwokɔdhigümɛn ˗nu ˗dhɛ ꞊dhɛ ˗wa ˗dhioo ˈˈgbɩɩ˗ dɔ mɛn ˈbha ˗ta, kwa ꞊mɔɔn˗ ˗bha ˈkwa ꞊nënŋ ˗a ˗bha ˗kplawo, ˈö ˗kë kwa ˈˈɲaan ꞊dhɛ ˗ya ˈgo ö ˗bha ꞊sɔnŋ yaa ˈgü, ˗ya ˈˈkan ö ˈˈtakɔ yaa ˗nu ˗bha. (1 Tim. 5:20) ˗A ˗mɛn ˗yö ꞊kun kwa ˈˈpiʋ̈ ˈö˗ ˗bhawɔn ˈdhö kwa ˗bha ˗takundhe ˗bha kö ˗yö ˈwɔn ˗së kë. (Ebl. 10:24, 25) ˈˈKɛɛ ˈyaa ˈˈdhʋ̈ mɛn ˈö ꞊waa˗ bho kwa ˈˈpiʋ̈ bhë ˗a ˗bha ˈka. ˗Kwa ‹ˈˈkan ˗a ˗bha, kwaa˗ ˗nu ˈkwa ˗dho kwa ˗kɔ ˗zian ˗da ˈtɛa˗ do ˈgü ˈzü.›—1 Ko. 5:11.
14. Mɛn ˈbha ˗nu ˈö ˗wa ˗an bho kwa ˈˈpiʋ̈ bhë, ˈmën kletiɛn ˗dhɛ ˈö ˗dhö ˈö ꞊mɔɔn˗ ˗bha kö ˗ya kë ˗an ˈˈpiʋ̈? (Kpɔɔˈˈ ˈzü pë ˈˈbin ˗bha.)
14 ˈPë ˈkwa˗ yö bhë ˗a ˗gɛn ˈnën ˗tɔ ꞊dhɛ ˗wa mɛn ˈbha bho kwa ˈˈpiʋ̈, kwa dua ˈyaa ˗mü kö ˈkwa˗ ˗dhɛ ˗bhɔkwëë ˗ta ɛɛnˈˈ kö ˈkwa˗ ꞊tuaa bho ˗ee? ˗Abin. Gagade ˈka, kwa dua ˈyaa ˗mü kö ˈkwa ꞊nënŋ ˗a ˗bha. ˈˈKɛɛ kletiɛn ˗nu ˗wo ꞊mɔɔn˗ ˗bha ˈwo ˗gban wo zuʋ̈ga ˈö Biblö ˗ya ꞊dɔɔ ˗a ˗ta ˈwo wo ˗bha ˈkɔdhigümɛn ɛɛnˈˈ wo ˈˈtɔŋdë zii ˈö ꞊waa˗ bho kwa ˈˈpiʋ̈ ˗a ˗dhɛ ˗bhɔkwëë ˗ta. ˗Ya kë ꞊dhɛ ˗ya nu, ˈmën ˈkwa ꞊mɔɔn˗ ˗bha ˈkwa˗ kë? ˈˈDhiʋ̈ ˗be, ˈkwaa˗ ˗mɛn ꞊tuaa bho. ˗Dhɛ ˈö bhë ˗a ˈgü ˈzü, kletiɛn ˗dhɛ ˈö ˗dhö ˈnën dho ˗gban pë ˈö˗ ꞊draan Biblö ˈgü ˗a ˗ta ˈö ˈwɔn ˗nu ˗kë. Mɛn ˈbha ˗nu ꞊mɔɔn˗ ˗bha ˈwo˗ ꞊tuaa bho ɛɛnˈˈ ˈwo wo ˗kɔ ˗ya ˗a ˗gɔ ˗bhɔkwëë ˗ta. ˈˈKɛɛ kwa dua ˈyaa ˗mü kö ˈkwa ˈwɔn blɛɛˈˈ ˗a ˈˈpiʋ̈ pinŋdhö ɛɛnˈˈ ˈkwa ꞊nënŋ ˗a ˗bha.
Kletiɛn ꞊mɔɔn˗ ˗bha kö mɛn ˈö ꞊waa˗ bho kwa ˈˈpiʋ̈ bhë, ˈö˗ ˗dhɛ ˗bhɔkwëë ˗ta ɛɛnˈˈ ˈö˗ ꞊tuaa bho ˗bhɔkwëë ˗ta ˈpö. (Kpɔɔˈˈ ˗wo ˗bhüöö kpö 14 ˈgü.)
15. ˈWɔnyaakëmɛn ˗nu ˗mɛɛn ˈö 2 Zan 9-11 ˗yö ˗we ˗an ˈka? (Kpɔɔˈˈ ˈzü ˈkɔnën « Zan waa Pɔdhö ˗wo ˗kun ˈˈwɩ ˗ni ˈgü ˈwɔnyaakësü ˗suu do ˈka ˗ee?» ˗bha.)
15 Mɛn ˈbha ˗nu ꞊mɔɔn˗ ˗bha ˈwo wo ˗de dhɛɛˈˈ kpɔ ˈwo˗ pö: «Biblö ˈti˗ pö ꞊dhɛ mɛn ˈö ꞊yaa˗ ˗mɛn ꞊tuaa bho ‹kö ꞊ya ˗da ˗a këwɔn yaya ˗nu bha˗ ˈgü› ˗ee?» (2 Zan 9-11 ˗wo pö.) Biblö ˗ya ˗pö ˈˈdhʋ̈, ˈˈkɛɛ ˗yö ˗we ˗ta ˗yö ˗Zlan ˗bha ˗mɛn ɛɛnˈˈ mɛn ˈbha ö mɛn ˗nu ˗blü ˈwɔnyaakësü ˗bha ˗a ˈka. (˗Dhɛ. 2:20) ˗A ˗de ꞊ʒiaan mɛn suu ˈö ˈˈdhʋ̈, mɛn zii ˗nu dua ˈyaa ˗mü kö ˗wo ˗wo ˗a ˗dhɛ. ˈˈKɛɛ ˗a ˗mɛn ˗zo ꞊mɔɔn˗ ˗bha ˈö ˗bo ˈö go ö ˗bha ꞊sɔnŋ yaa ˈgü. ˈˈSanni ˗yö kë ˈˈdhʋ̈, kwa dua ˈyaa ˗mü kö ˈkwa˗ ꞊tuaa bho ɛɛnˈˈ kö ˈkwa˗ ˗dhɛ ˗bhɔkwëë ˗ta.
˗KWA ˈTO ZOOVA ˗BHA MƐN ˗WËËZËSÜ ˈWƆNZUAN ˈˈPIƲ̈
16-17. (1) ˈMën Zoova ˈdhö˗ ˈˈpiʋ̈ kö ˈwɔnyaakëmɛn ˗ya kë? (Ézéchiel 18:32) (2) Mɛn zii ˗nu ˗wo ˗kpa Zoova ˗bha ˈwo ˈwɔnyaakëmɛn ˗nu ˗takun ˗kɔ ˗kë ꞊dhɛ?
16 ˈMën ˈkwa˗ ꞊draan ˈˈGlaadhiʋ̈ ˗tɔn ˈö yö ˗a ˈgü? Kwa˗ ˗yö ꞊dhɛ Zoova ˈyaa˗ ˈˈpiʋ̈ kö mɛn ˈbha ˈgü ˗yö shiʋ̈ˈˈ. (Ézéchiel 18:32 ˗wo pö.) ˗Ya ˈˈpiʋ̈ ꞊ʒiaan kö ˈwɔnyaakëmɛn ˗yö ö ꞊yɛɛ˗ kë. (2 Ko. 5:20) ˗A ˗wɔn ˈgü, Zoova ˗yö ö ˗dhɔkëmɛn ˗nu ˈö ˗wa ˈˈkan ö ˗bha bhë, ˗an ꞊faanmën ˗kplawo kö ˗wo ˈgo wo ˗bha ꞊sɔnŋ yaa ˈgü ˗wo wo ꞊yɛɛ˗ kë. Mɛn zii ˗nu ˈwo ˗zlanwokɔdhi ˈgü waa Zoova ˗nu ˗wo mɛn ˗nu ˈö ˗wa ˈwɔn yaa ꞊gbɔɔnsü kë ˗an ˗takun kö ˗wo ˈgo ˗a ˈgü.—Wlɔ. 2:4; 1 Ko. 3:9.
17 ˈWɔnyaakëmɛn ˗ya ˈgo ö ˗bha ꞊sɔnŋ yaa ˈgü, zuʋ̈gblüdhi ˈö dho kë dhaŋ˗ ˈgü ˗kwa kwa ˗zota ˗a ˈgü! ˈˈTʋ̈ŋ ˈˈpɛpɛ ˈö kwa Dë Zoova ˗dhɔkëmɛn do ˗yö ö ꞊yɛɛ˗ kë ˗a ˈka, Zoova zuʋ̈ˈˈ ˈˈgblü ˗yö ˗dhi ꞊dedewo. ˈKwa kwa ˗zota Zoova ˗bha mɛn ˗wëëzësü waa˗ ˗bha ˗gasitɛ ˈgü, ˗a ˗dhɔ ˈö kwa ˈgü ˗yö ˗dadhiʋ̈ ꞊dedewo.—Dhu. 1:78.
ˈˈTAN 111 Kwa zuʋ̈ˈˈ ˈˈgblü dhi ˗sü ˈka ˗Zlan ˈsaa˗ ˈgü
a ˈWɔnyaakëmɛn ˈö ˈkwa ˗we ˗a ˈka ˈwɔn ˗gɔ ˈö yö ˗a ˈgü bhë, gɔɔn˗ ˗mü. ˈˈKɛɛ ˗yö ˗gban ˈpö dhebɔ ˗bha.
b Kwa ˈti ˗dho ˗a pö ˈzü ꞊dhɛ ˗wa mɛn ˈbha bho kwa kpö ˈgü. Kwa ˗dho ˗gban ˗wo ˈö Pɔdhö ˗ya pö 1 Kodhɛngtö 5:13 ˈgü bhë ˗a ˗ta ˈö ˈkwa˗ pö ꞊dhɛ ˗wa mɛn ˈbha bho kwa ˈˈpiʋ̈.
c Biblö ˗yö mɛn ˈbha ˗nu ˈö ˗wo ˈti ˗dho ˗bhawɔntodhe ꞊slɔɔ ˗an ˗wɔn ˗blɛɛ. Mɛn ˗nu ˈwo ˈˈdhʋ̈ ˗wa ˗sü wo ˗de ˈgü ˈö ˈwo ˗gban ˗Zlan ˗gɔ ˗kplawo. ˈKö ˗kë ˈˈdhʋ̈ Zoova waa Yesu, wo dosɛnŋ ˈnën ˈwo ꞊mɔɔn˗ ˗bha kö ˗wa pö ꞊dhɛ wo ˈti ˗dho mɛn ˈbha ˗bhawɔn ˈto.—Mak. 3:29; Ebl. 10:26, 27.
