1. ˈMën Zoova ˈdhö˗ ˈˈpiʋ̈ mɛn ˈˈpɛpɛ kwa ˗bha ˈka?

 ZOOVA ˗yö mɛnbhɩɩdhe ˗nu ˗da kö ˗potaadhe ˗yö kë ˗an ˗gɔ. Yi ˈˈpɛpɛ ˈka, kwa ˗da ˈwɔn ˗nu ˗ʒian ˗ta. Pë do ˈö˗ ˗wɔn ˈdhö ˈˈgbɩɩ˗ ˈö kwa dua ˈdhö ˗mü kö ˈkwa kwa ˗kɔ ˈˈyɛ ˗a ˗bha ˈyö ˗tɔ kwa ˗de ˗nu Zoova ˗dhɛ ˗sü kö ˈkwa kë ˗a ˗dhɔkëmɛn ˗nu ˈka. Zoova ˗ya ˈˈpiʋ̈ kö mɛn ˈˈpɛpɛ ˈkwa˗ kë ˈˈdhʋ̈. ˈMën ˗kë? ˗A ˈklɔɔ˗ ˗mü ꞊dhɛ kwa ˗dhɔ ˗ya ˗kë ˈö˗ ˈˈpiʋ̈ kö ˈkwa ˈwɔn ˗së ꞊slɔɔ. ˗Ya ˈˈpiʋ̈ kö ˈkwa kë ö ˈˈtɔŋdë ˗nu ˈka kö ˈkwa ˗tosɛta kë ˗toëpö ˈka.—Deut. 30:​19, 20; Ga. 6:​7, 8.

2. ˈMën Zoova ˈdhö˗ ˈˈpiʋ̈ kö mɛn ˗nu ˈö ˗wo ˈti ˈgo wo ˗bha ꞊sɔnŋ yaa ˈgü ꞊köŋ bhë, ˗wa kë? (1 Zan 2:1)

² ˈˈKɛɛ Zoova ˈyaa ˈˈgbɩɩdhɛ wɔ mɛn ˈbha ˗ta kö ˗yö ö ˗dhɔkë. ˗Yö ö ˗kwaa mɛn ˈö ˗dhö ˗a ˗zü kö ˗yö ö ˗kɔ ˈˈyɛ ˈwɔn ˗nu ˗bha. Kletiɛn ˈö ˗ya bɔ ˈˈyi ꞊bhaa ˗ya ˈwɔn yaa ꞊gbɔɔnsü kë, ˈmën dho kë? ꞊Ya kë ꞊dhɛ ˗yö ˈti ˈgo ö ˗bha ꞊sɔnŋ yaa ˈgü, ˗wo ˗dho ˗a bho kwa ˈˈpiʋ̈. (1 Ko. 5:13) ˈˈKɛɛ ˈkö ˗kë ˈˈdhʋ̈, Zoova ˗ya ˈˈpiʋ̈ ꞊dedewo kö ˗a ˗mɛn ˗yö ö ꞊yɛɛ˗ kë ö ˈˈpiʋ̈. ˗A ˗de ꞊ʒiaan ˈpë ˗wɔn ˈgü ˈö Zoova ˗yö ˗gɔtadhɔpë nu ˈyö ˗tɔ kö mɛn ˗nu ˗wa ˈgo wo ˗bha ꞊sɔnŋ yaa ˈgü ˈö ˗an ˗bhawɔn ˈto. (1 Zan 2:1 ˗wo pö.) Kwa ˗bha ˗dhɔkaa ˗Zlan Zoova ˗ya ˈˈpiʋ̈ kö mɛn ˗nu ˈö ˈwo ˈwɔn yaa ꞊gbɔɔnsü ˗kë bhë, ˗wo ˈgo ˗a ˈgü.—Zach. 1:3; Wlɔ. 2:4; Zak. 4:8.

3. ˈMën ˈkwa dho ˗a yö ˈwɔn ˗gɔ ˈö yö ˗a ˈgü?

³ ˗Kɔ ˈö Zoova ˗yö ˈwɔn yaa waa ˈwɔnyaakëmɛn ˗an yö ˗a ˈka bhë, ˗ya ˗zɔn kwa ˗dhɛ. ˗Ya ˈˈpiʋ̈ ˈpö kö ˈwɔn yö ˗kɔ do ˈö bhë ˗yö  kë kwa ˗gɔ. ˈWɔn ˗gɔ ˈö yö ˗a ˈgü, (1) kwa ˗dho pë ˈö Pɔdhö ˗ya ꞊blɛɛ Kodhɛŋtömɛn ˗nu ˗dhɛ kö gɔndë do ˗ya ˈwɔn yaa ꞊gbɔɔnsü kë ˗a yö. (2) ˈDhɛ gɔndë ˈö ˈˈdhʋ̈ ˈö go ö ˗bha ꞊sɔnŋ yaa ˈgü, pë ˈö Pɔdhö kun ˗a ˈˈpiʋ̈ kö ˗zlanwokɔdhigümɛn ˗nu ˗wa kë kwa ˗dho ˗a yö ˈpö. (3) ˗Ya ˈgo mü, kwa ˗dho ˗gleŋ ˈsü ˗kɔ ˈö Zoova ˗yö mɛn ˗nu ˈwo ˈwɔn yaa ꞊gbɔɔnsü ˗kë ˗an yö ˗a ˈka, ˗a ˈgü.

ˈDHƐ KLETIƐN DO ˗YÖ ˈWƆN YAA ꞊GBƆƆNSÜ ˗KË ˗KWƐ KËŊ DO ˗BLƐƐSÜ ˈGÜ, ˈMËN ˗ZLANWOKƆDHIGÜMƐN ˗NU ˗WA ˗KË?

4. ˈWɔn suu ˗mɛɛn ˈö kun kë ˗ni ˈgü Kodhɛŋtö ˗zlanwokɔdhi ˈgü? (1 Kodhɛngtö 5:​1, 2)

⁴ ˗Bhö 1 Kodhɛngtö 5:​1, 2 ˗wo pö. Pɔdhö ˗bha ˈˈtakpɔsü ˗yaaga ˗bha ˗naan ˈgü, ˗ya ˗man ꞊dhɛ ˈwɔn yaa ˗kun kë ˗ni ˈgü Kodhɛŋtö ˗zlanwokɔdhi ˈgü. Kletiɛn do ˗kun ˗da ˗ni ˈgü ö dë ˗bha dhe ˈˈpiʋ̈. ˗Yö ˗kun ˈˈtakɔ yaa ˈö «mɛ ˗zian ˈwaa [˗Zlan] dɔ ˈwaa ꞊mɔɔ˗ ˗bha kö ˗wa kë,» ˗a ˈka! ˗Zlanwokɔdhigümɛn ˗nu ˗wo ˗kun wo ˈˈɲan ta ˗ni ˈgü ˗a ˗blü, ˈwo kun ˗a ˈsü ˗ni ˈgü ꞊ʒianwo ꞊dhɛ ˈwɔn ˗së ˈdhö. ˗A mɛn ˈbha ˗nu ˗wa ˗ga ꞊dhɛ wo ˈto ˗ni ˈgü Zoova ˗bha mɛn ˗bhawɔntosü waa˗ ˗bha ˈwɔngümansü ˈwɔnzuan ˈˈpiʋ̈. ˈˈKɛɛ Zoova ˈyaa dɔ ˈwɔn yaa ˈˈpiʋ̈ ö ˗dhɔkëmɛn ˗nu ꞊zinŋgü. ˈˈTakɔ yaa suu ˈö bhë ˗yö ˗kun ˗zlanwokɔdhi ˈtɔ zë ˗ni ˈgü mɛn ˗nu ˈö ˈwaa Zoova ˗dhɔkë ˗an ˈˈpiʋ̈. ˗Ya ˈgo mü, kletiɛn ˈbha ˗nu ꞊mɔɔn˗ ˗bha ˈwo to ˗a ˗bha ˈwɔnzuan ˈˈpiʋ̈. ˗A ˗wɔn ˈgü, ˗dhioo ˗mɛɛn ˈö Pɔdhö ˗ya dɔ ˗an ˗ta?

5. ˈMën Pɔdhö ˗ya pö ˗zlanwokɔdhigümɛn ˗nu ˗dhɛ ˗wa kë? (1 Kodhɛngtö 5:13) (Kpɔɔˈˈ ˈzü pë ˈˈbin ˗bha.)

⁵ ˗Bhö 1 Kodhɛngtö 5:13 ˗wo pö. Zoova ˗yö ˗bɔ Pɔdhö ˗ta ˈö ˈsëëdhɛ bɔ Kodhɛŋtömɛn ˗nu ˗dhɛ ˈö˗ pö ˗wo mɛn ˈö bhë ˗a bho ˗zlanwokɔdhigümɛn ˗nu ˈˈpiʋ̈. Kletiɛn ˗dhɛ ˗nu ˈwo to, ˗wo ˗dho ˗a ˗mɛn ˈsü ˗kɔ ˗kë ꞊dhɛ? Pɔdhö ˗ya ˗pö ˗an ˗dhɛ ꞊dhɛ ˗wo ‹ˈˈkan ˗a ˗bha.› ˗A ˗gɛn ˈnën ˗tɔ ˗mën? Pɔdhö ˗ya ˈgü ˗pʋ ˈö˗ pö: «Kɛng˗ ˗nu ˈka ˈdho ka ˗kɔ ˗zian ˗da ˈtɛa˗ do ˈgü.» (1 Ko. 5:11) Kwaa mɛn ˈbha ˈkwa ˗bhöpë ˗bhö kwa ˈkwëë˗, kwa ꞊mɔɔn˗ ˗bha ˈkwa˗ ˗ta ˈˈdoodɔ pinŋdhö. Pɔdhö ˗ya ˗zɔn ˈˈpuu ˈka ꞊dhɛ ˗zlanwokɔdhigümɛn ˗nu dua ˈyaa ˗mü kö ˗wo ꞊niidadhe kë gɔndë ˈö bhë ˗a ˈˈpiʋ̈, kë ˈˈdhʋ̈ kö ˈya ˗dho ˗an ˗blü ˈwɔnyaakësü ˗bha. (1 Ko. 5:​5-7) ˗A ˗kë ˈˈdhʋ̈ ˗sü ˗ya ˗mɛn ˗takun ˈö˗ yö ꞊dhɛ ˈya ˈwɔn yaa kë Zoova ˈka, ˈö ˈlëë˗ ˗yö dɔ ˗a ˗bha ˈö go ö ˗bha ꞊sɔnŋ yaa ˈgü.

6. ˈDhɛ Kodhɛŋtömɛn ˗nu ˗wo Pɔdhö ˗bha ˈsëëdhɛ ꞊slɔɔ, ˈmën ˈwo˗ ˗kë? ˈYö ˈwɔnyaakëmɛn ˗de ˈpö ꞊wɛ?

⁶ ˈDhɛ Pɔdhö ˗yö ö bo ˈsëëdhɛ bɔ ˗sü ˈka Kodhɛŋtömɛn ˗nu ˗dhɛ, ˗yö ˗kun ö ˗zota ˗ni ˈgü ˗kɔ ˈwo dho ˗a ˈsü ˗a ˈka ˗a ˈgü. ˈˈKɛɛ Titö ˗yö  nɔɔn˗ ˗së do ˗bɔ ˗a ˗dhɛ. Kletiɛn ˗nu ˗wa ˗bha ˈsëëdhɛ ˈö ˈˈdhʋ̈ ˗a ˗sü ˗së, ˈö ˈwö ˈwɔnyaakëmɛn ˈö bhë ˗a bho wo ˈˈpiʋ̈. (2 Ko. 7:​6, 7) ˗Ya ˈgo mü, ˈdhɛ ˈwo ˈsëëdhɛ ˈö bhë ˗a ꞊slɔɔ ˈö ˈˈsu ˗nu ˗wo ˗ʒiö, ˈwɔnyaakëmɛn ˈö bhë ˗yö ˗dho ˈö go ö ˗bha ꞊sɔnŋ yaa ˈgü. ˗Yö ö ˈˈtakɔ waa ö ˗zotakɔ ˗bho ˈˈgblʋʋ ˈö Zoova ˗bha ˈtɔŋ˗ ˈˈslʋ̈ʋ̈slʋ̈ ˗nu ˗ya ꞊bhlëë ˈgü. (2 Ko. 7:​8-11) ˈDhɛ ˗kë ˈˈdhʋ̈, ˈmën Pɔdhö ˗ya pö ˗zlanwokɔdhigümɛn ˗nu ˗dhɛ ˗wa kë?

ˈWƆNYAAKËMƐN ˗YA ˈGO Ö ˗BHA ꞊SƆNŊ YAA ˈGÜ, ˗ZLANWOKƆDHIGÜMƐN ˗NU ˗DHO ˗A ˈSÜ ˗KƆ ˗KË ꞊DHƐ?

7. ˈWɔn ˗së ˗mɛɛn ˈö go ˈwɔnyaakëmɛn ˗bho ˗zlanwokɔdhigümɛn ˗nu ˈˈpiʋ̈ ˗sü ˈgü? (2 Kodhɛngtö 2:​5-8)

⁷ ˗Bhö 2 Kodhɛngtö 2:​5-8 ˗wo pö. Pɔdhö ˗ya ˗pö: «꞊Dhɛ ˈkö mɛ ˈkpii˗ ˗dhɛ ꞊gban ˈka ˈwɔn ˗zë bho˗ ˗mɛ ˈˈyan ˈgü bha˗, ˈdhɛ bha ˗yö ˈto ˈˈdhʋ̈.» ˗A ˗pö ˗kɔ ˈˈwɛɛ ˈgü ˗sü ˈka  ˈwɔnyaakëmɛn bho ˈö ˈwo˗ wo wo ˈˈpiʋ̈ bhë, ˗ya ˗takun. ˗Kɔ ˗kë ꞊dhɛ? ˗Ya ˗kë ˈö go ö ˗bha ꞊sɔnŋ yaa ˈgü ˈö ö wë ꞊slë ˗Zlan ˈˈpiʋ̈.—Ebl. 12:11.

8. ˈMën Pɔdhö ˗ya pö ꞊taabha ˗zlanwokɔdhigümɛn ˗nu ˗dhɛ?

⁸ Pɔdhö ˗ya ˗pö ˗zlanwokɔdhigümɛn ˗nu ˗dhɛ: «˗Kaa ˗mawɔn ˈto kö ˈka˗ ˗zʋ ˗gban, [ . . . ] ˈka˗ ˈkun ˈˈyɔn ˗kɔ ˈka kö ˗ya ˈwɔn dɔ ꞊dhɛ ö ˗dhɔ ˗yö ka ˗kë.» Pɔdhö ˗kun ˗a ˈˈpiʋ̈ kö ˗zlanwokɔdhigümɛn ˗nu ˗wo pë ˈö ˗ʒiö ˗kɔ ˗ya ˗a ˗mɛn ˗gɔ ˗sü ˗ta ˗a kë. ˗Wa ˗zogban ꞊dhɛ ˗a ˗dhɔ ˗yö wo ˗kë wo ˈˈdhiwo waa wo këwɔn ˗nu ˈgü. ˗Wa ˗zɔn ˗a ˗dhɛ ˈzü ꞊dhɛ ˈwa˗ ˗bhawɔn ˈto. ꞊Waa˗ kë ˈˈdhʋ̈ ˗an ꞊dhegblü ˗dho kë ö ˗de ˈgü ˗së, ˈö˗ ˗bha ö ꞊yɛɛ˗ kë ˗sü ˗ya zuʋ̈ˈˈ ˈˈgblü ˗dhi ꞊dedewo.

9. ˈMën ˗kë ˈö ˈwɔnyaakëmɛn ˗bhawɔn ˈto ˗sü ꞊mɔɔn˗ ˗bha ˈö ˗kë mɛn ˈbha ˗nu ˗kɔa ˈˈgbɩɩ˗?

⁹ ˗Kɔ ˗ya ˈwɔnyaakëmɛn ˈö ˗ya ˈgo ö ˗bha ꞊sɔnŋ yaa ˈgü ˗a ˗gɔ ˗sü ˗kun ˗zlanwokɔdhigümɛn ˈbha ˗nu ˗kɔa ˈˈgbɩɩ˗ ˗ee? Biblö ˈti˗ blɛɛˈˈ. ˈˈKɛɛ ˗yö ꞊mɔɔn˗ ˗bha ˈö ˗kë ˈˈdhʋ̈. ˈWɔn ꞊mɔɔn˗ ˗bha ˈö ꞊shiö mɛn ˈbha ˗nu ˗dhɛ gɔndë ˈö bhë ˗a ˗bha, ˈyö sü ꞊dhɛ ˗ya ˈlëë˗ dɔ ˗zlanwokɔdhi ˗bha. ˗Kɔ ˗ya ˗a ˗gɔ ˗sü ˈö ˈˈwowosü ˈka bhë ˗yö ꞊mɔɔn˗ ˗bha ˈö ˗kë mɛn ˈbha ˗nu ˗dhɛ ˈya˗. ˈYö sü ꞊dhɛ ˗an ˗bha ˈgü wo ˗zë ˗wo pë ꞊gban ˈˈpɛpɛ kë kö ˈwo ˈto ˈˈslʋ̈ʋ̈slʋ̈. ˈWɔnyaakëmɛn ˈö bhë ˗a ˗bha ö ꞊yɛɛ˗ kë ˗su ˈyaa kun ˗an ˗dhɛ ˗së. (Dhu. 15:​28-30) ˈMën ˗kë ˈö˗ ˗së kö ˗zlanwokɔdhigümɛn ˗nu ˗wo ˗dhɔ ꞊dede ˗zɔn wo ꞊dhegblü ˈö ö ꞊yɛɛ˗ ˗kë ˈˈdhʋ̈ ˗a ˗dhɛ?

10-11. Mɛn zii ˗nu ˈti ˈˈwɩ ˈwɔnyaakëmɛn ˗bhawɔn ˈto ˗sü ˗bha, ˈmën dho kë?

¹⁰ ꞊Ya kë ꞊dhɛ mɛn zii ˗nu ˈti ˈˈwɩ ˗a ˗bha kö ˈwɔnyaakëmɛn ˈö go ö ˗bha ꞊sɔnŋ yaa ˈgü ˗yö ö ꞊yɛɛ˗ kë ɛɛnˈˈ ˗zlanwokɔdhigümɛn ˗nu ˈti ˗dhɔ ˗zɔn ˗a ˗dhɛ, ˗kwa kwa ˗zota ˈpë dho kë ˗a ˈka ˗a ˈgü? ˗Yö ꞊mɔɔn ˗bha ˈö ‹˗yua ˗a ˗bha ˈˈdhiʋ̈ ziö˗ ˈka› ˈö˗ ˗ga ꞊dhɛ ö ˗kɔ ˈyaa ˗mɔn Zoova ˗dhɔkë ˗su ˗bha ˈzü. ˗Yö ꞊mɔɔn˗ ˗bha ˗ʒianwo ˈö ˗kan ˗ɲɔɔn Zoova ˈˈsuee ˗sü ˗bha.

¹¹ ˗Zlanwokɔdhigümɛn ˗nu ˈti ˈˈwɩ ˈwɔnyaakëmɛn ˗bhawɔn ˈto ˗sü ˗bha, ˗wo ˗dho ˈˈtɔŋdhɛ ˈö waa Zoova ˗nu ˗an ꞊zinŋgü ˗a shiʋ̈ˈˈ. ˈMën ˗kë? ˈYö sü ꞊dhɛ ꞊waa˗ kë ˈˈdhʋ̈ kö ˈwaa ˈto ˗ni ˈgü Zoova ˗bha mɛn ˗bhawɔn ˈto ˗sü ˈwɔnzuan ˈˈpiʋ̈, ˈˈkɛɛ kö ˗wo ˈto ˗ni ˈgü ꞊ʒiaan Sɔtraan zuʋ̈yaamɛn ˈö ˈyaa mɛn ˗nu ˗bhawɔn ˈto toŋtoŋdhö bhë ˗a ˗bha ˈwɔnzuan ˈˈpiʋ̈. Sɔtraan ꞊mɔɔn˗ ˗bha ˈö bɔ ˗an ˗ta ˈö mɛn ˈö bhë ˗a ˈgü ga Zoova ˗dhɔkësü ˗bha.—2 Ko. 2:​10, 11; Efɛ. 4:27.

12. ˗Zlanwokɔdhigümɛn ˗nu ˗dho ˈto Zoova ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?

¹² ˗Kɔ ˗mɛɛn ˈö Kodhɛŋtömɛn ˗nu dho ˈto ˗a ˈka Zoova ˗bha ˈwɔnzuan ˈˈpiʋ̈ kö ˗wa ˈdho ˈwɔn ˗nu kë ꞊dhɛ Sɔtraan ˈdhö? ˗Wo ˗dho ˗a kë ˈˈdhʋ̈ ˈwɔnyaakëmɛn ˈö ˗ya ˈgo ö ˗bha ꞊sɔnŋ yaa ˈgü bhë, ˗a ˗bhawɔn ˈto ˗sü ˈka. ˈPë Biblö ˗bɛnzëmɛn ˈbha ˗nu ˗wa ꞊blɛɛ Zoova ˗bha, ˗kwaa ˗ga. Davi ˗ya ˗pö: «Bhi ˗zë ü ˈˈgblü ˗yö ˗së, ˈü mɛn ˗nu ˗bhawɔn to.» (Ps. 86:5) Mishe ˗ya ˗pö ˈpö: «˗Zlan ˗mɛɛn ˈö ꞊dhɛ ü ˈdhö, ˈö mɛn ˗nu ˗bhawɔn to, ˈö ˗ʒiö ˗an ˗bha ˈwɔn yaa ˗nu ˗ta?» (Mich. 7:18) Izai ˗de ˈpö ˗ya ˗pö: «Kö ˈwɔnyaakëmɛn ˗yö ˈgo ˈwɔnyaa kë ˗sü ˗ʒian ˗ta, kö këwɔnyaamɛn ˗yö ö ꞊kwaa ö ˗bha ˗zotadhe yaa ˗nu ˗zü, kö ˗yö ö ꞊yɛɛ˗ kë Zoova, kwa ˗bha ˗Zlan ˈˈpiʋ̈, ˗yö ˗dho ˗a ˗wëë zë, ˈyö ˗tɔ ꞊dhɛ ˗yö mɛn ˗bhawɔn ˗to ˈgbɛ ꞊dedewo.»—Is. 55:7.

13. ˈMën ˗kë ˈö˗ ˗së kö ˈwɔnyaakëmɛn ˈö ˗ya ˈgo ö ˗bha ꞊sɔnŋ yaa ˈgü bhë, ˗wo wo ꞊kwaa˗ ˗zü kö ˗yö ö ꞊yɛɛ˗ kë? (Kpɔɔˈˈ ˈkɔnën « Gɔndë ˈö kun Kodhɛŋtö bhë, ˗yö ö ꞊yɛɛ˗ ˗kë ˈˈtʋ̈ŋ ˗mɛɛn ˈgü?» ˗bha.)

¹³ Kodhɛŋtömɛn ˗nu ꞊waa˗ pö ˈwo ˈto Zoova ˗bha ˈwɔnzuan ˈˈpiʋ̈, ˗an dua ˗mü kö ˗wo wo ˗kɔ ˗ya mɛn ˈö ˗ya ˈgo ö ˗bha ꞊sɔnŋ yaa ˈgü bhë  ˗a ˗gɔ, ˗wa ˗zogban ꞊dhɛ ˗a ˗dhɔ ˗yö wo ˗kë. Pɔdhö ˗ya ˗pö ꞊dhɛ ꞊waa˗ ˗mɛn ˗bhawɔn ˈto kö ꞊waa˗ ˗zɔn ꞊dhɛ wo «˗dhio ˗ma [ . . . ] ˈˈtʋ̈ng ꞊gban ˈˈpɛpɛ ˈgü.» (2 Ko. 2:9) ˈKö ˗kë ꞊dhɛ gɔndë ˈö bhë ˗wa ˗bho wo ˈˈpiʋ̈ ˈˈsu ˈdɛdɛ ˈˈpiʋ̈, ˗yö ˗go ö ˗bha ꞊sɔnŋ yaa ˈgü. ˗A ˗wɔn ˈgü, mɛn zii ˗nu ˗bhawɔn ˈti yö ˈˈtʋ̈ŋ ꞊gblɛɛn ˈˈdhiʋ̈ ˈˈgan ˗sü ˗bha kö ˗wo ꞊kun wo ꞊kwaa ˗a ˗mɛn ˗zü kö ˗yö ö ꞊yɛɛ˗ kë.

˗KWA ˈTO ZOOVA ˗BHA KPƐNŊDHÖDHƐ WAA˗ ˗BHA MƐN ˗BHAWƆNTOSÜ ˈWƆNZUAN ˈˈPIƲ̈

14-15. ˗Gleŋ ˗mɛɛn ˗nu ˈkwa ˗an sü ˈwɔn ˈö kun Kodhɛŋtö bhë ˗a ˈgü? (2 Piɛdhö 3:9) (Kpɔɔˈˈ ˈzü pë ˈˈbin ˗bha.)

¹⁴ ˗Kwɛzlan ˈö ˗gban Kodhɛŋtömɛn ˗nu ˗bha bhë ˗wa ˗ya Biblö ˈgü ˈˈdhʋ̈ kö «˗yö kë kwa ꞊klangkëpë ꞊në˗ ˈka.» (Wlɔ. 15:4) ˗Kwɛzlan ˈö bhë ˗a ˈgü, kwa˗ ˗yö ꞊dhɛ Zoova ˈyaa ö ˈˈɲan ta ˈwɔn yaa ˗blü ö ˗dhɔkëmɛn ˗nu ꞊zinŋgü. ˈYaa˗ ˈˈpiʋ̈ kö ˈwɔnyaakëmɛn ˗nu ˈö ˗wo ˈti ˈgo wo ˗bha ꞊sɔnŋ yaa ˈgü bhë, ˈö ˗an «˗bhawɔn ˈto» kö ˗wo kë ˗zlanwokɔdhigümɛn ˗nu ˈˈpiʋ̈ ˗kplawo. ˈKö ˗kë ꞊dhɛ Zoova ˗yö mɛn ˗bhawɔn ˗to, ˈyaa ˈˈwɩ ˈˈtakɔ suu ˈˈpɛpɛ ˗bha. ˗A ˗bha ˈtɔŋ˗ ˗nu ˈwo ˗gban ˈwɔn ˗së waa ˈwɔn yaa ˗an ˗bha bhë, ˈyaa ˗an bho ˈˈgblʋʋ. (Zud. 4) ˗A ˗de ꞊ʒiaan ˗yö ˈwɔnyaakëmɛn ˗nu ˗to ˗zlanwokɔdhi ˈgü ˗be, ˗wo ˗dho pë ˈˈdhiʋ̈˗ kë kwa ˈka.—Prov. 13:20; 1 Ko. 15:33.

¹⁵ Kwa˗ ˗man ˗kplawo ꞊dhɛ Zoova ˈyaa˗ ˈˈpiʋ̈ kö mɛn gbɛ˗ ˈgü ˗yö shiʋ̈ˈˈ. ˗Ya ˈˈpiʋ̈ ꞊ʒiaan kö ˈö mɛn ˈˈpɛpɛ dha. ˗Yö mɛn ˗nu ˈö ˗wa wo zuʋ̈ˈˈ  slëëˈˈ, ˈwo˗ ˈˈpiʋ̈ kö waa˗ ˗nu wo ˗bha ˗mlɛɛn ˗yö kë ˗së bhë ˗an ˗bha ˈwɔn yaa ˗nu ˗bhawɔn ˗to. (Ézéch. 33:11; 2 Piɛdhö 3:9 ˗wo pö.) ˗A ˗wɔn ˈgü, ˈdhɛ gɔndë ˈö kun Kodhɛŋtö bhë ˈö go ö ˗bha ꞊sɔnŋ yaa ˈgü ˈö ö zuʋ̈ˈˈ ꞊slëë, Zoova ˗yö ˗bɔ Pɔdhö ˗ta ˈö˗ pö ˗zlanwokɔdhigümɛn ˗nu ˗dhɛ ꞊dhɛ ˗an dua ˗mü kö ˗wa ˗bhawɔn ˈto, ˗wo wo ˗kɔ ˗ya ˗a ˗gɔ.

16. ˈWɔn ˈö kun Kodhɛŋtö bhë, ˗a ˈˈɲan bhɔ ˗kɔ ˗ya ˗kë ˈö ˈkwa ˗kë kwa ˗de ˈgü ꞊dhɛ?

¹⁶ ˈWɔn ˈö kun Kodhɛŋtö bhë ˗yö kwa ˗takun ˈkwa Zoova ˗bha ˗dhɔ, ˗a ˗bha kpɛnŋdhödhɛ waa˗ ˗bha ˈwɔn ˗nu ˗kë ö ˗naan ˈka ˗sü ˗dhɛ yö. (Ps. 33:5) ˗A ˗bha ˈˈklʋʋsë ˗nu ˈwo bhë ˗an dɔ ˗sü ˗yö kwa ˗blü ˗a ˈtɔbhɔsü ˗bha. Kwa Zoova ˈˈnuɛ ˗bho ˗a ˗bha mɛn ˗bhawɔntosü ˗bha, ˈyö sü ꞊dhɛ mɛn ˈˈpɛpɛ ˈwɔnyaakëmɛn ˗mü kwa ˈka. ˗Kɔ ˈkwa˗ ˗bha do do ˈka bhë, kwa dua ˗mü kö ˈkwa Zoova ˈˈnuɛ bho ˗gɔtadhɔpë ˗wɔn ˈgü. Yö ˈnën˗ ˗kë ˈö kwa ˗bha ˈwɔn yaa ˗nu ˗bhawɔn ˗yö to. ˗A ˈwɔn dɔ ˗sü ˈö ꞊dhɛ kwa ˗dhɔ ˗yö Zoova ˗kë ˈö˗ ˈˈpiʋ̈ kö ˈwɔn ˗së ˗yö kë kwa ˗dhɛ bhë, ˗yö kwa ˗zogban ꞊dedewo!

17. ˈMën ˈkwa dho ˗a yö ˈwɔn ˗gɔ ˈö dɔ ˗a ˗dhɛ ˈö yö ˗a ˈˈpiʋ̈, ˗a ˈgü?

¹⁷ ꞊Dɛɛ ˈpö ꞊wɛ? Kwa ˈwɔnyaakësü ˈˈɲan ˗bhɔ ˗kɔ ˗kë ꞊dhɛ? ˗Kɔ ˗mɛɛn ˈö mɛn zii ˗nu dho ˈto ˗a ˈka Zoova ˗bha ˈwɔnzuan ˈˈpiʋ̈ kö ˗wo ˈwɔnyaakëmɛn ˗nu ˗takun ˗wo ˈgo wo ˗bha ꞊sɔnŋ yaa ˈgü? Mɛn zii ˗nu ˗wa mɛn ˈbha bho ˗zlanwokɔdhigümɛn ˗nu ˈˈpiʋ̈ ɛɛnˈˈ ꞊waa˗ kë ˗ya ö ꞊yɛɛ˗ kë, ˈmën kwa dho ˗a kë? Dhɛɛˈˈ ˗nu ˈwo bhë kwa ˗dho ˗an ˗yɔ ꞊slɔɔ ˈwɔn ˗gɔ ˈö dɔ ˗a ˗dhɛ ˈö yö ˗a ˈˈpiʋ̈ ˗a ˈgü.