Nɔɔn˗ ˗së ˈsëëdhɛ ˈö Lukö ˗ya ˗bɛnzë 1:1-80
-
Lukö ˗bha ˈwɔn ˗blɛɛ Teofidhö ˗dhɛ ˗sü (1-4)
-
Gabliɛ ˗yö Zan mɛnbɔyibhaamɛn ˗bha bhɔ ˗sü ˗to ˈˈdhiʋ̈ ˈö˗ ꞊blɛɛ (5-25)
-
Gabliɛ ˗yö Yesu ˗bha bhɔ ˗sü ˗to ˈˈdhiʋ̈ ˈö˗ ꞊blɛɛ (26-38)
-
Madhi ˗bha ˗wo Edhizabɛtö ˗dhɛ ˗sü (39-45)
-
Madhi ˗yö Zoova ˗bha ˗kë ˈkpiisü ˈtɔ ˗bhɔ (46-56)
-
Zan ˗bha bhɔ ˗sü waa˗ ˈtɔ ˗ya ˗a ˗bha ˗sü (57-66)
-
ˈWɔn ˈö Zakadhi ˗ya to ˈˈdhiʋ̈ ˈö˗ ꞊blɛɛ (67-80)
1 Mɛn ꞊vadhɛ ˗wa ˈˈslö ˗mɛɛn kö ˈwɔn ˗nu ˈwo ˗kë ˗a ˗kwɛzlan ˈö ˈkwa kwa ˗zo yö ˗a ˗dhɛ ꞊dedewo bhë ˈwo˗ ˗bɛnzë ˈsëëdhɛ ˈgü,
2 ꞊dhɛ ˗kɔ ˈö mɛn ˗nu ˈö ˈwɔn ˗nu ˈwo ˈˈdhʋ̈ ˈwo ˗kë ˗an ˈˈɲaan, ˈö ˈwo ˗kë ˗a ˗nɔɔnpömɛn ˗nu ˈka ˈwo˗ ꞊blɛɛ ˗a ˈka kwa ˗dhɛ bhë ˗a ˈdhö.
3 ˗A ˗wɔn ˈgü, mɛn ꞊bhlëësü Teofidhö, ˈdhɛ ˈö ˗kë ꞊dhɛ ˈwɔn ˗nu ˈwo bhë a ˗an ˈˈpiʋ̈ ˗pɔn ˗së ˈka ˈö go ˗a ˈka ˗an züdɔdhɛ ˗bha bhë, ˗yö ˗kë n ˗dhɛ ˗së kö man ˗de ˈpö ˈa ˗an ˗bɛnzë ü ˗dhɛ ö ˈko ˈˈdhiʋ̈ ˗së ˈka.
4 A˗ ˗kë ˈˈdhʋ̈ kö ˈwɔn ˗nu ˈwo ü ꞊klaŋ ˗kë ˗an ˈka wo ˈˈdhii bhë, ˈü ˗an ˗bha ˗kë gagade ˈka ˗sü yö.
5 ˈˈTʋ̈ŋ ˈö Edhɔdö kun ˗gblüdë ˈka Zude ˗sɛ ˈgü bhë ˗a ˈka, ˈˈsaabhomɛn do ˈbhaa ˗yö ˗kun mü ˈö ˈwo˗ ˗dhɛ Zakadhi. ˗Yö ˗kun ˈˈsaabhomɛn ˗nu kpö ˈö ˈwo ˗an ˗dhɛ Abia ˗bha mɛn ˗nu bhë ˗a mɛn do ˈka. ˗A ˗bha dhebɔ ˗yö ˗kun Aadhɔn ꞊suugünën ˈka, ˈö ˈwo˗ ˗dhɛ Edhizabɛtö.
6 ˗Kɔ ˈwo˗ ˗bha ꞊plɛ ˗wo ˗kun kpɛnŋdhö ˗Zlan ˈˈɲan ˈˈdhiʋ̈. Pö ˈyaa kun ˗an ˗bha, ˈyö ˗tɔ ꞊dhɛ ˗wo ˗kun Zoova ˗bha ˈtɔŋ˗ ˗nu waa pë ˈˈpɛpɛ ˈö ˗an pö ˗an ˗ya ˗ni ˈgü ꞊bhlëë ˈgü.
7 ˈˈKɛɛ ˈnën ˈyaa kun ˗an ˗gɔ, ˗a ˗gɛn ˗mü ꞊dhɛ Edhizabɛtö ˗yö ˗kun ˈˈbhöödhe* ˈka. ˗A ˈˈtʋ̈ŋ ˈö bhë ˗a ˈgü kö ˗kɔ ˈwo˗ ˗bha ꞊plɛ ˗wa kë zii.
8 Yi do ˈka, Zakadhi ˗yö ˗kun yö ˈö ˗gban ˈˈsaabhosü ˗bha ˗a kë ˗ni ˈgü ˗Zlan wë ˈˈdhiʋ̈, ˈyö sü ꞊dhɛ ˈˈsaabhomɛn ˗nu kpö ˈö kun yö kë ˗ni ˗a ˈgü bhë, ˗yö ˗kun ˗an ˗bha yö kë ˗dhɛkpaɔyi ˈka.
9 ˈYö ˗da Zoova ˗dhɔkëdhɛ ˈgü ˗sü kö ˗wo ansansö ˈˈgʋ̈ bhë, ˗yö yö Zakadhi ˗bha ꞊dhɛ ˗kɔ ˈwo˗ ˗kë ˗a ˈka ˈˈsaabhomɛn ˗nu ˗bha wɔ ˈgü ˗a ˈdhö.
10 ˈˈTʋ̈ŋ ˈö ˗da ˗a ˈka ˈkɔɔ kö ˗yö ansansö ˈˈgʋ̈ bhë, kö mɛn ꞊va ꞊dede ˗wo dɔ ˗sü ˈka ˈˈkpɛnŋdhö ˗wo bhɛɛˈˈ ˗ni ˈgü.
11 ˈYö Zoova ˗bha ˈˈkiö do ˗yö ö ˗de ˗zɔn Zakadhi ˗dhɛ mü, kö ˗yö dɔ ˗sü ˈka ansansö ˗gʋ̈ ˗a ˗ta ˗pë ˈˈpian ˈö ˗kɔ ˗së ˈgü ꞊ʒiaan ˗a ˈka.
12 ˈDhɛ ˈö Zakadhi ˗ya yö, ˈyö˗ zuʋ̈ˈˈ ˗yö ꞊kaan ˈˈkwöö ˈö ˈˈsuʋ̈ ˗ziisü ˗yö ˗da ˗a ˈgü.
13 ˈˈKɛɛ ˈyö˗ ˈˈkiö ˗ya pö ˗a ˗dhɛ: «ˈˈSuʋ̈ ˈya ˗dho ü kë Zakadhi, ˗Zlan ˗ya ü ˗bha bhɛɛwo man. Ü ˗bha dhebɔ Edhizabɛtö ˗dho ˈnëngɔɔn˗ do ˈkpɔ. ˗A ˈtɔ ˈü ˗dho ˗a ˗ya ˗a ˗bha ˈyö ˗tɔ Zan.
14 Ü zuʋ̈ˈˈ ꞊nii ˗dho ˗da, ü zuʋ̈ˈˈ ˈˈgblü ˗dho dhi ꞊dedewo. ˈNën ˈö bhë ˗a ˗bha bhɔ ˗sü ˗dho mɛn ꞊va ꞊dede zuʋ̈ˈˈ ˈˈgblü dhi ˈpö.
15 ˗A ˗gɛn ˗mü ꞊dhɛ ˗yö ˗dho kë mɛn ˈkpii˗ do ˈka Zoova ˈˈɲan ˈˈdhiʋ̈. ˈˈKɛɛ ˗a dua ˈyaa ˗mü toŋtoŋdhö kö ˗yö ˗drɔɔn ˈˈyi ɛɛnˈˈ we ˈˈgbɩɩ˗ ꞊suu ˈˈoo ˗su mü. ˗Yö ˗dho ˈto ö dhe ˈgwü ˈgü ˈö ˗Zlan ˗bha ˗zuu ˈˈslʋ̈ʋ̈slʋ̈ ˗yö ˗kë ˗a ˗ta, ˈö dho ˈö bhɔ ˗a ˈka.
16 ˗Yö ˗dho Izraɛdhömɛn ˗nu ꞊vadhɛ ˗takun ˈö ˈwo wo ꞊yɛɛ ˗kë ˈwo nu Zoova wo ˗bha ˗Zlan ˈˈpiʋ̈.
17 ˗Ya ˈgo mü ˈzü, ˗Zlan ˗dho ˗a bɔ ˈö dɔ ˗a ˈˈdhiʋ̈ ˗zuu ˈˈslʋ̈ʋ̈slʋ̈ ˈö kun Edhi ˗ta waa ꞊faan ˈö kun ˗a ˈgü bhë ˗a ˈka, kö ˗yö ˈnëndë ˗nu zuʋ̈ˈˈ bɔ ˈzü ˈnën ˗nu ˈˈpiʋ̈, kö ˗yö ˈˈtʋgbɩɩmɛn ˗nu ˗takun kö ˗wo ˈwɔn ˗nu kë ꞊kpɔɔdhɛ ˈka ꞊dhɛ ˗kɔ ˈö mɛn kpɛnŋdhö ˗nu ˗wa ˗kë ˗a ˈka ˗a ˈdhö, kö ˗yö ˈˈsɛgümɛn ˗nu baaˈˈ Zoova ˗dhɔkë ˗sü ˗bha.»
18 ˈYö Zakadhi ˗ya pö ˈˈkiö ˈö bhë ˗a ˗dhɛ: «ˈMën ˈö˗ ˗zɔn ꞊dhɛ ˈwɔn ˈü˗ pö bhë ˗yö ˗dho kë ꞊dedewo? Pë ˈö ˗kë ˈa˗ pö ˈˈdhʋ̈ ˈyö ˗tɔ ˈman kë zii, ˈö n ˗man dhebɔ ˗de ˈpö ˗ya kë zii ˈsaadhö.»
19 ˈYö ˈˈkiö ˈö bhë ˈö˗ pö ˗a ˗dhɛ: «Man ˈnën ˈa ˗tɔ Gabliɛ, ˈa dɔ ˗sü ˈka ˗Zlan ˈˈsuee yi ꞊gban ˈka, ˗a ˗kuu ˈˈdhiʋ̈. ˗Yö n ˗bɔ ü ˈˈpiʋ̈ kö ˈa nɔɔn˗ ˗së ˈö bhë ˗a pö ü ˗dhɛ.
20 ˗Wo ˗nu ˈa˗ pö ü ˗dhɛ bhë ˗wo ˗dho yökodhiʋ̈ ö ˈˈtʋ̈ŋ ꞊dede ˗bha. ˈˈKɛɛ ˈdhɛ ˈö ˗kë ꞊dhɛ ü ˈti ˈdhaŋ˗ bho n ˈˈdhiʋ̈ bhë, ü ˗dho kë ˈˈbhʋbhʋ ˈka ˈö to ˗a ˈka ˈˈdhʋ̈ ˈö yö ˗a ˈka ˈˈtʋ̈ŋ ˈö ˈwɔn ˗nu bhë ˈwo ˗dho kë ˗a ˈka ˗a ˗bha.»
21 ˈÖ kun ˈˈdhʋ̈ kö mɛn ˗nu ˗wo wo ˈˈɲan ˈto ˗ni ˈgü Zakadhi ˗gɔ, kö ꞊gwëë ˈö˗ wo ˈˈsaabhodhɛ ˈgü bhë ˗a ˈwɔn ꞊yaa ˗an ˈkun ꞊dedewo.
22 ˈDhɛ ˈö yö ˈˈkpɛnŋ, yö ˈti ꞊mɔɔn˗ ˗bha kö ˗yö ˈwɔn blɛɛˈˈ ˗an ˗dhɛ. ˈDhɛ ˈö ˗kë ˈˈdhʋ̈, ˈyö ˈwo˗ ˈgüman ꞊dhɛ ˗a ˈˈɲan ˗ya ˗da ˈwɔn ˈˈmlünmlünsü ˈbhaa ˈgü ˗Zlan ˗dhɔkëdhɛ ˈgü mü. ˗Yö ˗kun ˈwɔn blɛɛˈˈ ˗ni ˈgü ˗an ˗dhɛ ö ˗kɔ ˈgü, ˈyaa kun ˗mɔn ˗ni ˈgü ˗a ˗bha kö ˗yö ˈˈwɩ.
23 ˈDhɛ ˈö˗ ˗bha yö ˗kë ˗Zlan ˗dhɔkë ˗a ˈgü ˗kɔ ˈgü ˗sü ˗dhɛkpaɔyi ˗yö ɲën, ˈyö dho ö ˗gɔ ˈkɔɔ.
24 ˈDhɛ ˈö ˈˈtʋ̈ŋ ˈnën ˈbhaa ˗yö ˗ʒiö, ˈyö˗ ˗bha dhebɔ Edhizabɛtö ˗yö ˈgwü sü. ˈYö Edhizabɛtö ˗yö to ˈkɔɔ ˈgwü ˈö bhë ˗a ˈka ˈˈsu ˈˈsoodhu ˈˈpiʋ̈. ˗Yö ˗kun ˗a pö ˗ni ˈgü:
25 «ˈWɔn ˈö Zoova ꞊yaa˗ kë n ˗dhɛ yö, ˗kaa ˗ga! ˗Ya ö wë slëëˈˈ n ˈˈpiʋ̈ kö ˗yö ˈlëë˗ bho n ˗ta mɛn ˗nu ꞊zinŋgü.»
26 ˈDhɛ ˈö ˗da ö ˗bha ˈgwü ˈˈsu ˈˈsɔɔdo ˗naan ˈgü, ˈyö ˗Zlan ˗yö ö ˗bha ˈˈkiö Gabliɛ bɔ Galile ˗pö ˈö ˈwo˗ ˗dhɛ Nazadhɛtö bhë ˗a ˈgü.
27 ˗Ya ˗bɔ ˈnëndhiëŋnën do ˈö ˈyaa gɔɔn˗ ˗wɔn dɔ ˈö ˈwo˗ ˗dhɛ Madhi ˗a ˈˈpiʋ̈. ˗A ˈˈtʋ̈ŋ ˈö bhë ˗a ˈgü kö Zozɛfö ˈö ˗kë Davi ꞊suugünën ˈka waa Madhi ˗an ˗wo ˗ya ˗mɔn kö ˈwo wo ˈko ˈsü, kö ꞊yaa˗ ˗za dɔ.
28 ˈDhɛ ˈö ˗Zlan ˗bha ˈˈkiö ˗yö ˗lo mü, ˈyö Madhi ꞊tuaabho ˈö˗ pö ˗a ˗dhɛ: «Ü ꞊bhlëë ˗yö ꞊va ꞊dedewo Madhi, Zoova ˗yö ü ˈˈpiʋ̈.»
29 ˈDhɛ ˈö ˗wo ˗nu ˈwo bhë ˗an man, ˗a ˈˈshiʋ̈ ˗yö ˗kan ˗a ˈˈgblü ꞊dedewo, ˈyö ˗ya ö ˗de dhɛɛˈˈ ˈkpɔ ˗sü ˗bha ꞊tuaabhodhe ꞊suu ˈö bhë ˗a ˗gɛn ˈka.
30 ˈYö ˗Zlan ˗bha ˈˈkiö ˗ya pö ˗a ˗dhɛ: «ˈˈSuʋ̈ ˈya ˗dho ü kë Madhi, ü ˈˈdhiaa ˗ya ˈmën ˗Zlan ˈgü.
31 ˗Dhɛ ˗ga, ü ˗dho ˈgwü ˈsü ˈö ˈü ˈnëngɔɔn˗ do kpɔ. ˈTɔ ˈü ˗dho ˗a ˗ya ˗a ˗bha ˈyö ˗tɔ Yesu.
32 ˗Yö ˗dho kë mɛn ˈkpii˗ do ˈka ˈö ˈwo˗ ˗dhɛ ˗Zlan ˈö pë ꞊gban ˈˈpɛpɛ ˗gɔ ˗ta ˗a Gbö. Zoova ˗Zlan ˗dho ˗a ˈˈbhɛman* Davi ˗bha ˗gblüdëdhɛ ˗gbloo nu ˗a ˗dhɛ.
33 ˗Yö ˗dho kë ˗Gblüdë ˈka Zakɔbö ꞊suugünën ˗nu ˗ta ˈˈtʋ̈ŋ ꞊gban ˗tʋ̈ŋ ꞊gban ˈka, ˈö˗ ˗bha ˗Gblüdëdhɛ ˈˈdhiʋ̈todhɛ ˈyii ˗dho kë toŋtoŋdhö.»
34 ˈYö Madhi ˗ya pö ˈˈkiö ˈö bhë ˗a ˗dhɛ: «˗Yö ˗dho kë ˈˈdhʋ̈ ˗kɔ ˗kë ꞊dhɛ, ˈˈkɛɛ kö ˈmaan gɔɔn˗ ˗wɔn dɔ?»
35 ˈYö ˈˈkiö ˗ya pö ˗a ˗dhɛ: «˗Zuu ˈˈslʋ̈ʋ̈slʋ̈ ˗dho nu ü ˗ta, ˈö Mɛn ˈö pë ꞊gban ˈˈpɛpɛ ˗gɔ ˗ta bhë, ˗a ˗bha ˈpiigbɩɩdhɛ ꞊dhɔŋ ˗yö ˗kë ü ˗ta. Yö ˈnën˗ ˗wɔn ˈgü ˈö ˈnën ˈö ˗dho bhɔ bhë ˈö ˗dho kë ˈˈslʋ̈ʋ̈slʋ̈, ˈö ˈwo dho ˗a ˗dhɛ ˗Zlan Gbö.
36 ˗Dhɛ ˗ga, Edhizabɛtö ˈö ˗kë ü ˗bha mɛn ˈka, ˈö ˈwo kun ˗a ˗dhɛ ˗ni ˈgü ˈˈbhöödhe bhë, yö ˗de ˈpö ˗ya ˈgwü ˈsü ö ˗bha ziidhɛ ˈgü ˗a ˈˈsu ˗ya kë ˈˈsɔɔdo. ˗Yö ˗dho ˈnëngɔɔn˗ do ˈkpɔ.
37 ˗A ˗gɛn ˗mü ꞊dhɛ pë ˈbhaa ˈö ˗Zlan dho ˗a pö ˈö ˗dho ˈkun ˗a kë ˗sü ˈka ˈyaa ˗dhö.»
38 ˈDhɛ ˈö ˗kë ˈˈdhʋ̈, ˈyö Madhi ˗ya pö ˗a ˗dhɛ: «˗Ɛɛ, Zoova ˗bha yökëdhe ˗mü n ˈka! ˈWɔn ˗nu ˗wo kë n ˗dhɛ ꞊dhɛ ˗kɔ ˈü˗ pö ˗a ˈka bhë ˗a ˈdhö.» ˈYö ˈˈkiö ˗ya to mü ˈö ˗ʒiö.
39 ˈDhɛ ˈˈtʋ̈ŋ ˈnën ˈbhaa ˗yö ˗ʒiö, ˈyö Madhi ˗yö ˗ʒiö ˈö dho ˈˈvaandhö ˈpödhɛ do ˈbhaa ˈö ˗tɔn ˈgü Zuda ˗sɛ ˈgü bhë ˗a ˈgü.
40 ˈDhɛ ˈö ˗lo mü, ˈö dho Zakadhi ˗gɔ ˈkɔɔ, ˈyö Edhizabɛtö ꞊tuaabho.
41 ˈDhɛ ˈö Edhizabɛtö ˗yö ꞊tuaabho ˗wo ˈö bhë ˗a man, ˈyö ˈnën ˈö˗ ˈgwü ˈgü bhë ˈö pa ö ꞊diëë, ˈyö ˗Zlan ˗bha ˗zuu ˈˈslʋ̈ʋ̈slʋ̈ ˗yö nu Edhizabɛtö ˗ta.
42 ˈYö ˗gbla ˈö˗ pö: «ˈDhuëë˗ ˗yö ˈkpɔ ˗sü ˈka ü ˗bha dhebɔ ˗nu ˈˈpɛpɛ ꞊zinŋgü. ˈNën ˈö ü ˈgwü ˈgü bhë ˈdhuëë˗ ˗yö ˈkpɔ ˗sü ˈka ˗a ˗bha ˈpö.
43 ˗A kë ˗sü kö n Dëmɛn dhe ˗yö nu ˗wo n ˗dhɛ bhë, ꞊bhlëëwɔn ˈkpii˗ ꞊dede ˗mü n ˗man ˈka.
44 ˗A ˗gɛn ˗mü ꞊dhɛ n ꞊tuaa ˈö ˈü˗ bho bhë ˈdhɛ ˈa˗ man, ˈnën ˈö n ˈgwü ˈgü yö, ˗yö ˗pa ö ꞊diëë zuʋ̈niidadhe ˈka.
45 Dhebɔ ˈö ˈdhaŋ˗ bho ˈwɔn ˗nu ˈö Zoova ˗ya pö ˗a ˗dhɛ bhë ˗an ˈˈdhiʋ̈, ˗a ˗bha ˗yö ˗së ˈpö. ˈYö sü ꞊dhɛ ˗an ꞊gban ˗dho yökodhiʋ̈ ˈpapadhö.»
46 ˈYö Madhi ˗ya pö: «A* Zoova ˗bha ˗kë ˈkpii˗ ˗sü ˈtɔ ˗bhɔ.
47 N zuʋ̈ˈˈ ꞊nii ˗yö ˗da ˗sü ˈka ꞊dedewo ˗Zlan ˈö ˗kë n Dhamɛn ˈka bhë ˗a ˗wɔn ˈgü.
48 ˗A ˗gɛn ˗mü ꞊dhɛ, man ˈa˗ ˗bha yökëdhe ˗bhaasü ˈka bhë ˗yö n ˈsuaan˗ ˗bho. ˈÖ sü ꞊dɛɛ ˗bha, ˈˈtʋ̈ŋ ꞊gban ˈˈpɛpɛ ˈgümɛn ˗nu ˗dho ˗a pö n ˗man ˗yö ˗së.
49 ˗A ˗gɛn ˗mü ꞊dhɛ ˗Zlan ˈˈpiigbɩɩsü ˗ya ˈwɔn ˈˈdhiaasü ꞊va kë n ˗dhɛ. ˗A ˈtɔ ˗yö ˈˈslʋ̈ʋ̈slʋ̈.
50 ˈˈTʋ̈ŋ ˈsaadhö ˈka mɛn ˗nu ˈö ˈwo ˗suʋ̈ ˗a ˗gɔ ˈö ˈwo˗ ꞊bhlëë ˗ya, ˗an ˗wëë ˗ya ˗kë.
51 ˗Ya ˈwɔn ˈˈmlünmlünsü ˗nu kë ö ˗kɔ ˈka. Mɛn ˗nu ˈö ˗desüva ˈdhö ˗an zuʋ̈ˈˈ ˈgü, ꞊yaa ˗an ˗pɛn.
52 Mɛn ˗nu ˈö ˗duɛɛ ˈkpii˗ ˈdhö ˗an ˗gɔ, ꞊yaa ˗an bho ˗an ˗bha ˗gblüdëdhɛ ˗gbloo ˈgü, ˗ya mɛn ˗nu ˈö ˈwo ˗bhaasü ˗an ˗gɔ ˈˈdhiʋ̈ luuˈˈ.
53 Mɛn ˗nu ˈö din˗ ˈdhö ˗an ˗bha, ˗ya pë ˗së ꞊va nu ˗an ˗dhɛ. ˗Ya ꞊bhɔɔmɛn ˗nu kë ˗wa ʒiö ˗wo ˗kɔ ˈˈfuöö ˈka.
54 ˗Ya nu kö ˈö ö ˗kɔ ˗da ö ˗bha yökëmɛn Izraɛdhö ˗dhɛ. ˗A ˗gɛn ˗mü ꞊dhɛ ˗a ˗zo ˈyaa bhɔ toŋtoŋdhö ˗a ˗bha mɛn ˗wëëzësü ˈka,
55 ꞊dhɛ ˗kɔ ˈö˗ pö ˗a ˈka kwa ˈˈbhɛman Ablaamö waa ö ꞊suugünën ˗nu ˗an ˗dhɛ bhë ˗a ˈdhö.»
56 Madhi ˗yö ˗to Edhizabɛtö ˈˈpiʋ̈ mü ˈö ˈˈsu ˈö ˗mɔn ˗yaaga ˗bha ˈö˗ ˗kë, ˈyö ꞊kun ö ꞊yɛɛ kë ö ˗de ꞊plöö.
57 ˈDhɛ Edhizabɛtö ˈˈbɔ bho ˈˈtʋ̈ŋ ˗yö ˗lo, ˈyö ˈnëngɔɔn˗ do kpɔ.
58 ˈDhɛ ˈö˗ ˗züzümɛn ˗nu waa˗ ˗bha mɛn ˗nu ꞊waa˗ man ꞊dhɛ ˗a ˗wëë ˗ya Zoova kë ꞊dhɛ ˗kɔ ˈö bhë ˗a ˈdhö, ˈyö ˗an zuʋ̈ˈˈ ꞊nii ˗yö ˗da ꞊dedewo ˈpö.
59 ˈDhɛ ˈö˗ ˈnën ˗yö bhɔ ˈö ˗dhɛkpaɔyi ˗yö ˗kë ˈˈsaaga, ˈyö ˈwo nu kö ˈwo˗ kë ˈgbannën* ˈka. ˗Yö ˗kun ˗an ˈˈpiʋ̈ ˗be ꞊dhɛ ˈwo˗ dë Zakadhi ˈtɔ ˗ya ˗a ˗bha.
60 ˈˈKɛɛ ˈyö ˈnën ˈö bhë ˗a dhe ˗ya pö ˗an ˗dhɛ: «˗Abin! Kwa ˗dho ˗a ˗dhɛ Zan.»
61 ˈYö ˈwo˗ pö ˗a ˗dhɛ: «Ka ˗bha ˈkɔdhigümɛn ˈˈwɛɛ ˈbhaa ˈwo˗ ˗dhɛ Zan ˈyaa ˈdhö.»
62 ˈDhɛ ˈö ˗kë ˈˈdhʋ̈, ˈyö ˈwo ˈwɔn ꞊blɛɛ wo ˗kɔ ˈgü ˗a ˈnën dë ˗dhɛ kö ˈtɔ ˈö˗ ˈˈpiʋ̈ ˗wa ˗ya ˗a ˗bha ˗ya pö.
63 ˈYö˗ pö ˗wo pë ˈˈpɛn do ˈbhaa nu ö ˗dhɛ, ˈyö pë ˗bɛnzë ˗a ˗ta ˈö˗ pö: «˗Wa ˗dhɛ Zan.» ˈDhɛ ˈö ˗kë ˈˈdhʋ̈, ˈyö˗ ˈwɔn ˗yö ˗an ꞊gban ˈˈpɛpɛ kun.
64 Zakadhi ˗yö ˗to ˈˈshia˗ mü ˈö˗ ˈˈdhi ˗yö ˗pʋ ˈö ˗ya ˈwɔn blɛɛˈˈ ˗sü ˗bha, ˈö ˗Zlan ˈtɔ bhɔ.
65 ˈDhɛ ˈö ˗kë ˈˈdhʋ̈, ˈyö ˈˈsuʋ̈ ˗yö ˗da mɛn ˈˈpɛpɛ ˈwo kun ˗an ˗züzü ˈplöö mü bhë ˗an ˈgü, ˈyö ˈwo ˗ya ˈwɔn ˗nu bhë ˗an blɛɛˈˈ ˗sü ˗bha Zude ˗pö ˗nu ˈwo ˗tɔn ˈgü bhë ˗an ˈgü.
66 Mɛn ˈˈpɛpɛ ˈö ˈwo ˈwɔn ˈö bhë ˗a man, ˗wo ˗kun wo ˗zo ˈˈta ˗ni ˈgü ˗a ˈgü, ˈö ˈwo wo ˗de dhɛɛˈˈ kpɔ ˈwo˗ pö: «ˈNën ˈö yö ˗yö ˗dho kë de ˈka ˗oo?» ˗Wo ˗kun ˗a pö ˗ni ˈgü ˈˈdhʋ̈, ˈyö sü ꞊dhɛ Zoova ˗yö ˗kun ˈnën ˈö bhë ˗a ˈˈpiʋ̈* ꞊dedewo.
67 ˈDhɛ ˈö ˗kë ˈˈdhʋ̈, ˈyö ˗zuu ˈˈslʋ̈ʋ̈slʋ̈ ˗yö nu Zakadhi ˈö ˗kë ˗a dë ˈka bhë ˗a ˗ta, ˈyö ˗ya ˗wo ˈö go ˗Zlan ˈˈpiʋ̈ ˗a blɛɛˈˈ ˗sü ˗bha ˈö˗ pö:
68 «Zoova, Izraɛdhö ˗bha ˗Zlan ˈtɔ ˗yö bhɔ, ˗a ˗gɛn ˗mü ꞊dhɛ ˗ya ö wë slëëˈˈ ö ˗bha ˈˈsɛgümɛn ˗nu ˈˈpiʋ̈, ꞊yaa ˗an bho ˈˈgan ˈgü.
69 ˗Ya kwa dhamɛn ˈgügbɩɩsü do ˈö go ˗a ˗bha yökëmɛn Davi ˗gɔ ˈkɔdhi ˈgü ˗a nu kwa ˗dhɛ,
70 ꞊dhɛ ˗kɔ ˈö bɔ ö ˗wodhiʋ̈lomɛn ˈˈslʋ̈ʋ̈slʋ̈ ˗nu ˗ta ꞊kwɛŋzü ˈö˗ ꞊blɛɛ ˗a ˈka bhë ˗a ˈdhö.
71 ˗Ya ˗pö ˗a mɛn ˈö ˈˈdhʋ̈ ˗yö ˗dho kwa dha kwa ˈyɔɔ˗ ˗nu waa mɛn ˗nu ˈö kwa ˗san ˗yö ˗an ˗kë ˗an ˗gɔ.
72 Kwa ˈˈbhɛman ˗nu ˗wëë zë ˗sü ˈö ˗Zlan ˗ya ˈˈplünŋ bho ˗an ˗dhɛ ˈkpa bhë, ˗kɔ ˈö ˗dho ˗a kë ˗a ˈka ˈyö bhë. ˗A ˗zo ˗dho ˗buö ˗a ˗bha ˗mlɛɛn ˈˈslʋ̈ʋ̈slʋ̈ ˈö bhë ˗a ˈka.
73 ˗A ˗mlɛɛn ˈö ˈˈdhʋ̈ ˈyö ˗tɔ ö ˗wo ˈö˗ ˗bhö kwa ˈˈbhɛman Ablaamö ˗dhɛ.
74 ˗Ya ˗pö ˗a ˗dhɛ ˈya kwa bho ˈˈgan ˈgü kwa ˈyɔɔ˗ ˗nu ˗gɔ, ö ˗dho ˈˈwɩ ˗a ˗bha kö ˈkwa ö ˗dhɔkë ˗zogbandhe ˈka,
75 kö ˈkwa ˗klu ö ˗bha, kö ˈwɔn ˈö kpɛnŋdhö ˈkwa˗ kë ö ˈˈɲan ˈˈdhiʋ̈ ˗dhɛkpaɔyi ˈˈpɛpɛ ˈka kwa ˗bha ˗tosɛta ˈgü.
76 ˈˈKɛɛ bhi ˗zë, n gbö, ˗wo ˗dho ü ˗dhɛ Mɛn ˈö pë ꞊gban ˈˈpɛpɛ ˗gɔ ˗ta bhë ˗a ˗wodhiʋ̈lomɛn. ˗A ˗gɛn ˗mü ꞊dhɛ ü ˗dho bɔ Zoova ˗dhɛ ˈˈdhiʋ̈ kö ˈü˗ ˗bha ʒiaan ˗ta ˗dhɛ baaˈˈ,
77 kö ˈü˗ pö ˗a ˗bha ˈˈsɛgümɛn ˗nu ˗dhɛ ꞊dhɛ ˗yö ˗dho ˗an ˗bha ˈwɔn yaa ˗nu ˗bhawɔn ˈto˗, ˈö ˗an dha.
78 ˗A ˗gɛn ˗mü ꞊dhɛ kwa ˗bha ˗Zlan, ˗yö ˗Zlan ˈö mɛn ˗wëë ˗ya ˗kë ꞊dedewo ˗a ˈka. ˗A ˗bha mɛn ˗wëëzësü ˗dho ˈgo dhaŋ˗ ˈgü ˈö nu kwa ˗ta ꞊dhɛ ˈɲaan˗ ˈö luuˈˈ ˗ni ˈgü ˗a ˈbhü ˈdhö,
79 kö mɛn ˗nu ˈö ˈwo ˗ya ˗sü ˈka ˗dhɛtiidhɛ ˈgü, ˈö ga ꞊dhɔŋ˗ ˈdhö ˗an ˗ta, ˗yö ˗dhɛ ˈˈpʋ ˗an ˗ta, kö ˗yö ˈˈdhiʋ̈sü kwa ˈka ˈpö ˗dhikodhɛ ˗ʒian ˗ta.»
80 ˈNën ˈö bhë ˗yö ˗gla ˈö ˗kë ˈkpii˗, ˈö ˗kë ˈˈgbɩɩ˗ ˗Zlan ˗bha ʒiaan ˗ta. ˗Yö ˗dho ˈö ˗ya ˈˈyɛta, ˈö to mü ˈˈdhʋ̈ ˈö yö ˗a ˈka ˈˈtʋ̈ŋ ˈö ö ˗de ˗zɔn ˗a ˈka Izraɛdhömɛn ˗nu ˗dhɛ bhë ˗a ˗bha.
-Zoto -a ˈˈpiʋ̈ -wɔn -nu
^ Ɛɛnˈˈ «dhebɔ ˈö ˈyaa ˈnën ˈkpɔ ˗a ˈka.»
^ Glɛkö ˗wo ˈgü ˈyö ˗tɔ «Dë.»
^ Ɛɛnˈˈ «N ˈniin˗.»
^ Ɛɛnˈˈ «ˈˈbɔn.»
^ Glɛkö ˗wo ˈgü ˈyö ˗tɔ «Zoova ˗kɔ ˗ya ˗ta.»
