Nɔɔn˗ ˗së ˈsëëdhɛ ˈö Lukö ˗ya ˗bɛnzë 10:1-42
-
Yesu ˗yö ö ˗bha gwëëˈˈ ˗nu ˗kɔŋ ˈˈsɔɔplɛ (70) ˗bɔ ˗zlanwopö (1-12)
-
ˈˈKwipö ˗nu ˈö ˗an ˈgümɛn ˗nu ˈwaa ˈgo wo ˗bha ꞊sɔŋ yaa ˈgü ˗an ˗bha ˗yö ˗wëësü (13-16)
-
Yesu ˗bha gwëëˈˈ ˗kɔŋ ˈˈsɔɔplɛ (70) ˈö ˈwo dho ˗zlanwopö, ˗an ˗bha wo ꞊yɛɛ kë ˗sü (17-20)
-
Yesu ˗yö ö Dë ˈtɔ ˗bhɔ ꞊bhlëë ˈö˗ ˗ya ˗desütɩtɩmɛn ˗nu ˗bha bhë ˗a ˗wɔn ˈgü (21-24)
-
ˈWɔnzuan ˈö ˗gban Samadhi mi zuʋ̈ˈˈ ˗së ˗sü ˗bha (25-37)
-
Yesu ˗bha ˗wo Matö waa Madhi ˗an ˗dhɛ ˗sü (38-42)
10 ˈDhɛ ˈö ˈwɔn ˗nu bhë ˗wa wo bo kë ˗sü ˈka, ˈyö Yesu* ˗yö ö ˗kɔ ˗yɛ ö ˗bha gwëëˈˈ ˗nu bhë ˗a mɛn ˗kɔŋ ˈˈsɔɔplɛ (70) ˈˈwɛɛ ˈbhaa ˗bha ˈö ˗an dan ꞊plɛ ꞊plɛ, ˈö ˗an bɔ ˈˈkwipö ˗nu waa ˗dhɛ ˗nu ˈö yö ꞊dede ˈö ˗dho bɔ ˗an ˗bha ꞊taabha bhë ˗an ˈgü.
2 ˈYö˗ pö ˗an ˗dhɛ: «Pë ꞊va ˈˈkan ˗wɔn ˗yö ˗dhö ˈbhlaa, ˈˈkɛɛ yökëmɛn ˗nu ˈwaa ꞊va. ˗Dhɛ ˈö ˈˈdhʋ̈, ˗ka bhɛɛˈˈ ˈbhladhɛ Dëmɛn ˗dhɛ kö ˗yö yökëmɛn ˈbhaa ˗nu bɔ ˈbhlaa.
3 ˗Ka ˈdho, ˈˈkɛɛ ˗a ˈwɔn kë ka ˈˈɲaan ꞊dhɛ a ka ˗bɔ ꞊dhɛ mɛn ˈˈbhlaanën ˗nu bɔ ˈˈblü ˗gbɛn ˗nu ꞊zinŋgü.
4 ˈKaa ˗dho ˈwëë˗ ˗da ˗a ˈgü ˈˈkpɔɔnën ɛɛnˈˈ ˗bhöpë ˗da ˗a ˈgü ˈˈkpɔɔ ɛɛnˈˈ ˗sabha ˈˈwɛɛ ˈbhaa ˈkun ka ˗kɔ ˈˈpiʋ̈. ˗Ya ˈgo mü ˈzü, ˈkaa ˗dho mɛn ˈˈwɛɛ ˈbhaa ꞊tuaabho* ʒiaan ˈka.
5 ˈKa ˗da ˈkɔ ˈbhaa ˈgü, pë ˗blɛɛsü ˈö ˈka ˗dho ˗a pö ˈyö ˗tɔ: ‹Zuʋ̈waannusü ˗yö kë ˈkɔ ˈö yö ˗a ˈgü.›
6 ˗Ya kë ˈˈdhʋ̈, mɛn ˈö ˗dhikodhɛ ˗dhɔ ˗ya ˗kë, ꞊ya kë ˗dhɛ ˈö bhë ˗a ˈgü, ka ˗bha zuʋ̈waannusü ˈdhuëë˗ ˈö bhë ˗yö ˗dho ˗a ˗mɛn ˈkun. ˈˈKɛɛ mɛn ˈö ˗dhikodhɛ ˗dhɔ ˈdhö˗ ˗bha yö ˈti kë mü, ka ˗bha zuʋ̈waannusü ˈdhuëë˗ ˗dho ö ꞊yɛɛ kë ka ˈˈpiʋ̈.
7 ˗Ya kë ˈˈdhʋ̈ ˗ka ˈto ˈkɔ ˈö bhë ˗a ˈgü. ˗Bhöpë ˈˈpɛpɛ ˈwo ˗dho ˗a nu ka ˗dhɛ, ˗kaa ˗bhö, müpë ˈˈpɛpɛ ˈwo ˗dho ˗a nu ka ˗dhɛ, ˗kaa mü. ˗A ˗gɛn ˗mü ꞊dhɛ mɛn ˈö yö kë ˗ni ˈgü, ˗a ˗dhɛ ˗ya ˗bha kö ˗wa ꞊saa bho. ˈKaa ˗dho ˈgo ˈkɔ ˈö bhë ˗a ˈgü ˈka dho ˗ya ˗a ˈˈwɛɛ ˈbhaa ˈgü.
8 «˗Ya ˈgo mü ˈzü, ˈka ˗da ˈpö˗ ˈbhaa ˈgü, ˗wa wo ˗kɔ ˗ya ka ˗gɔ mü, ˗bhöpë ˈˈpɛpɛ ˈwo ˗dho ˗a dɔ ka ˈˈdhiʋ̈, ˗kaa ˗bhö.
9 ˗Ka mɛn ˗nu ˈö ˈˈyua ˈdhö ˗an ˗bha mü ˗an ˗dhɛ bo, kö ˈka˗ pö ˗an ˗dhɛ: ‹˗Zlan ˗bha ˗Gblüdëdhɛ ˗ya yö ka ˈka ꞊klöö˗.›
10 ˈˈKɛɛ ˈka ˗da ˈˈkwipö ˈbhaa ˈgü, wo ˈti wo ˗kɔ ˗ya ka ˗gɔ mü, ˗ka ˈdho ˈka dɔ ʒiaan ˈˈgbɛɛ ˗nu ˈwo ˈplöö mü ˗an ˗ta, ˈka˗ pö:
11 ‹꞊Boo ˗bi ˗nu ˗de ˈwo to yi ˗gɛn ˗bha ka ˗bha ˈpö˗ ˈö yö ˗a ˈgü, yi ˗an bho ˗ni ˈgü mü kö ˗wo nu ka ˗ta. ˈˈKɛɛ ˗a ˈwɔn ˗yö kë ka ˈˈɲaan ꞊dhɛ ˗Zlan ˗bha ˗Gblüdëdhɛ ˗ya yö ꞊klöö˗.›
12 A˗ ˗pö ka ˗dhɛ ꞊dhɛ yi ˈö bhë ˗a ˈka, ˈwɔn ˈö ˗dho wɔ ˈpö˗ ˈö bhë ˗a ˗ta, ˗yö ˗dho kë ˈˈgbɩɩ˗ ˈö ˗ʒiö ˗a ˈka Sodɔmö ˗pö ˗bha ˗ta.
13 «Kodhazinö ˗mɛn ˗nu, ka ˗bha ˗yö ˗wëësü! ˈMɛn ˈka Bɛtüsaidö ˈpö, ka ˗bha ˗yö ˗wëësü! ˗A ˗gɛn ˗mü ꞊dhɛ ˗dhidha ˗nu ˈa ˗an ˗kë ka ˗gɔ ˈplöö bhë, a ˗an ˗kë ˈTii˗ waa Sidɔn ˗pö ˗nu ˈgü ˗be, kö ˗a ˈgümɛn ˗nu ˗wa wo zuʋ̈ˈˈ slëëˈˈ ˗a yi ˗ya ꞊gwëë, kö ˗wa ꞊bhlɔɔ sɔ ˗nu ˗da wo ˗bha, ˗wo ˗ya ˗sü ˈka ˗a ˈka ˈˈyʋʋ ˈgü.
14 ˗A ˗wɔn ˈgü, ˈwɔn ˈö ˗dho wɔ ka ˗ta za ˈˈkan ˗yi ˈka ˗yö ˗dho kë ˈˈgbɩɩ˗ ˈö ˗ʒiö ˗a ˈka ˈTii˗ waa Sidɔn ˗mɛn ˗nu ˗bha ˗ta.
15 ˈYö bhi ˗de ˈpö ꞊wɛ Kapɛɛnaɔmö, ü ˗bha ˈgü ü ˗gɔ ˗ta ˗dho ˈˈgla ˈö yö dhaŋ˗ ˗bha ˗ee? ˗Abin. Ü ˗dho yɔɔˈˈ ˈü dho Ga ˗gblü* ˈgü.
16 «Mɛn ˈö ö ˈˈtʋ ˈto ka ˗bha, kö ˗ya ö ˈˈtʋ ˈto n ˗bha. Mɛn ˈö yö ˈti ö ˈˈtʋ ˈto ka ˗bha, kö yö ˈti ö ˈˈtʋ ˈto ˈpö n ˗bha. ˈYö mɛn ˈö yö ˈti ö ˈˈtʋ ˈto n ˗bha kö yö ˈti ö ˈˈtʋ ˈto ˈpö Mɛn ˈö n bɔ bhë ˗a ˗bha.»
17 Mɛn ˗kɔŋ ˈˈsɔɔplɛ (70) ˈwo bhë, ˗wo wo ꞊yɛɛ ˗kë ˈwo nu zuʋ̈gblüdhi ˈka, ˈyö ˈwo ˗ya ˗a pö ˗sü ˗bha: «Dëmɛn, ˈya ˈˈgbla ˗zuu yaa ˗nu ˗ta ü ˈtɔ ˈgü, ˗wo wo ˗gɔ ˗dho ˈˈshia˗ yi ˗dhɛ.»
18 ˈYö Yesu ˗ya pö ˗an ˗dhɛ: «A Sɔtraan ˗yö kö ˗ya ˈgo dhaŋ˗ ˈgü ˗ya ˗puö ˈsaadhö ꞊dhɛ dha ˗bha ö ˈˈɲan ˈkun ˗sü ˈdhö.
19 ˗Yö kë ka ˈˈɲaan ꞊dhɛ ˈman ˗kɔmɔnwɔnbhasü nu ka ˗dhɛ kö ˈka taaˈˈ ꞊mlɛɛn ˗nu waa gaanˈˈ ˗nu ˗an ˗ta, ˈgo mü ˈzü kö ka ˗kɔ ˗yö ʒiö ka ˈyɔɔ˗ ˗nu ˗bha ˈˈpiigbɩɩdhɛ ˗gɔ. Pë ˈbhaa ˈti ˗dho ꞊mɔɔn˗ ˗bha toŋtoŋdhö kö ˗yö pë ˈˈdhiʋ̈˗ kë ka ˈka.
20 ˈˈKɛɛ ˈpë ka zuʋ̈ˈˈ ˈˈgblü dho dhi ˗a ˗wɔn ˈgü ˈyaa ˈnën ˈö ˗tɔ ˗zuu yaa ˗nu ˗bha wo ˗gɔ ˗dho ka ˗dhɛ ˈˈshia˗ ˗sü. Ka zuʋ̈ˈˈ ˈˈgblü ˗yö dhi ꞊ʒiaan ka ˈtɔ ˈö ˗bɛnzë ˗sü ˈka dhaŋ˗ ˈgü bhë ˗a ˗wɔn ˈgü.»
21 ˈˈLɛlɛ ꞊dede ˈö bhë ˗a ˈgü, ˈyö ˗zuu ˈˈslʋ̈ʋ̈slʋ̈ ˗ya ˗kë ˈö˗ zuʋ̈ˈˈ ˈˈgblü ˗yö dhi ꞊dedewo, ˈö˗ pö: «N Dë, bhi ˈü ˗kë ˈˈsɛ waa dhaŋ˗ ˗an Dëmɛn ˈka bhë, ü ˈtɔ ˗yö bhɔ.* ˗A ˗gɛn ˗mü ꞊dhɛ ˈwɔn ˗nu ˈwo bhë ü ˗an ˗bin ˗së ˈka mɛn ꞊kpɔɔsü ˗nu waa mɛn ˗nu ˈwo ˈwɔn dɔ ˗an ˗gɔ, ˈyö ˈü ˈˈdhɛ bho ˗an ˗ta mɛn ˗nu ˈwo ˈnën ˈsɛɛn˗ ˗nu ˈka ˗an ˗dhɛ. ꞊Ii, n Dë ü ˈtɔ ˗yö bhɔ, ˈyö ˗tɔ ꞊dhɛ ˗a ˗kë ˈˈdhʋ̈ ˗sü ˗yö ü ˗dhɛ ˗së.
22 N Dë ˗ya pë ꞊gban ˈˈklɔɔnbho n ˗bha. Mɛn ˈbhaa ˈyaa ˗Zlan Gbö dɔ kö yö ˈti kë ˗a Dë ˈka. Mɛn ˈbhaa ˈyaa ˗Zlan dɔ ˈpö kö yö ˈti kë ˗Zlan ˗de Gbö waa mɛn ˈö ˗Zlan Gbö ˈdhö˗ ˈˈpiʋ̈ ˈö ö Dë ˗zɔn ˗a ˗dhɛ ˗an ˈka.»
23 ˈDhɛ ˈö ˗kë ˈˈdhʋ̈, ˈyö ö wë ꞊slëë ö ˗bha gwëëˈˈ ˗nu ˈˈpiʋ̈ ˈyö˗ pö ˗an ˗dhɛ ꞊plɛdhe ˈgü: «Mɛn ˈö˗ ˈˈɲan ˗yö ˗kpan pë ˗nu ˈö ˈka ˗an yö ˗ni ˈgü yö ˗an ˗bha, kö ˗a ˗bha ˗yö ˗së.
24 ˈYö ˗tɔ a˗ ˗pö ka ˗dhɛ ꞊dhɛ, ˗Zlan ˗wodhiʋ̈lomɛn ˗nu waa ˗gblüdë ˗nu ꞊va ˗wo ˗kun ˗a ˈˈpiʋ̈ ꞊dhɛ pë ˗nu ˈö ˈka ˗an yö ˗ni ˈgü yö ˈwo ˗an yö, ˈˈkɛɛ wo ˈti ˗an yö. Ɛɛnˈˈ ˗wo ˗kun ˗a ˈˈpiʋ̈ ꞊dhɛ pë ˗nu ˈö ˈka ˗an man ˗ni ˈgü yö ˈwo ˗an man, ˈˈkɛɛ wo ˈti ˗an man.»
25 ˈDhɛ ˈö ˗kë ˈˈdhʋ̈, ˈyö gɔndënën do ˈö ˈTɔŋ˗ ˗nu dɔ ˗së ˈka ˈö ꞊luu ˈö nu ˗a ˈˈpiʋ̈ kö ˈö˗ ˈgüdan, ˈyö˗ pö: «˗Gɔmɛn, ˈmën ˈö n dua ˈdhö ˗mü kö ˈa˗ kë kö ˗tosɛta ˈö ˈyaa ɲën ˈa˗ ꞊slɔɔ?»
26 ˈYö˗ ˗yɔ bɔ ˗a ˗gɔ ˈö˗ pö: «˗Mën ˈö ˗bɛnzë ˗sü ˈka ˗Zlan ˗bha ˈTɔŋ˗ ˈsëëdhɛ ˈgü? ˈDhɛ ˈü˗ ˗wo pö ü˗ ˈgüman ˗kɔ ˗kë ꞊dhɛ?»
27 ˈYö˗ gɔndënën ˗ya ˗yɔ bɔ ˈö˗ pö: «˗Yö pö ˗sü ˈka mü ꞊dhɛ ‹Ü dua ˗mü kö Zoova ü ˗bha ˗Zlan ˗dhɔ ˗yö ü kë ü zuʋ̈ˈˈ ꞊gban ˈka, ü ˈniin˗ ꞊gban ˈka, ü ˗zota ˗kɔ ꞊gban ˈgü waa ü ꞊faan ꞊gban ˈka.› ˗Ya ˈgo mü ˈzü, ‹ü ˗yayoo ˗dhɔ ˗yö ü kë ꞊dhɛ ü ˗de ˈdhö.›»
28 ˈYö Yesu ˗ya pö ˗a ˗dhɛ: «Ü˗ ˗yɔ ˗bɔ ˗së ˈka, pë ˈü˗ pö bhë ˈbha˗ kë ˗kplawo, ü ˗dho ˗tosɛta ˈö ˈyaa ɲën ˗a ꞊slɔɔ.»
29 ˈˈKɛɛ ˈdhɛ ˈö ˗kë ꞊dhɛ ˗a gɔndënën ˗kun ˗a ˈˈpiʋ̈ kö ˈö˗ ˗zɔn ꞊dhɛ ö mɛn kpɛnŋdhö ˈka, ˈyö˗ ˗pö Yesu ˗dhɛ: «De ˈö ˗tɔ n ˗yayoo?»
30 ˈYö Yesu ˗ya ˗yɔ bɔ ˗a ˗gɔ ˈö˗ pö: «Gɔndënën do ˗yö ˗go Zedhizadhɛmö ˈö kun ˈdho* ˗ni ˈgü Zedhiko, ˈyö ꞊kwaanmɛn ˗nu ˗wo yö ˗a ˗gɔ ʒiaan˗, ˈyö ˈwo˗ ˗bha sɔ ˗nu sü, ˈö ˈwo˗ ˗man, ˈö ꞊fuëë ˗an ꞊kwɛɛ˗, ˈö ˈwo˗ to ˈˈshia˗ mü ˈwo ˗ʒiö.
31 ˗A ˈˈtʋ̈ŋ do ˈö bhë ˗a ˈgü, ˈˈsaabhomɛn do ˗yö ˗kun bɔ ˗ni ˈgü ʒiaan ˈö bhë ˗a ˈka. ˈˈKɛɛ ˈdhɛ ˈö ˗kpan gɔndënën ˈö bhë ˗a ˗bha, ˈyö ʒiaan ˗zinŋ ˗kan ˈö kpɔ ˗a ˈka ˈö ˗ʒiö.
32 ˈDhɛ ˈö Levi mi do ˗yö nu ˈpö ˈö yö ˗dhɛ ˈö bhë ˗a ˈgü ˈö ˗kpan gɔndënën ˈö bhë ˗a ˗bha, ˈyö ʒiaan ˗zinŋ ˗kan ˈö kpɔ ˗a ˈka ˈö ˗ʒiö.
33 ˈˈKɛɛ Samadhi mi do ˈö kun ˈdho ˗ni ˈgü ˈˈta ˈgü, ˈdhɛ ˈö nu ˈö yö ˈdhɛ ˈö bhë ˗a ˈgü ˈö ˗kpan gɔndënën ˈö bhë ˗a ˗bha, ˈyö˗ ˗wëë ˗ya ˗kë ꞊dedewo.
34 ˈDhɛ ˈö ˗kë ˈˈdhʋ̈, ˈyö ꞊ɲɔɔn ˗a ˗bha, ˈyö ˈˈɲɔn waa we ˗nu yö ˗a ˗bha bhüöö ˗nu ˈgü, ˈö sɔ ˗nu ꞊plʋʋ ˗an ˈka, ˈyö˗ sü ˈö˗ ˗ya ö ˗de ˗bha ꞊soo ꞊taa, ˈö dho ˗a ˈka ˗dhɛŋ ˗nu ˗wɔ ˗a ˈgü ˗kɔ do ˈgü, ˈyö ö ˗zo ˗kë ˗a ˈˈpiʋ̈.
35 ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö denie ꞊plɛ sü ˈö˗ nu ˗dhɛŋ ˗nu ˗wɔ ˗a ˈgü ˗kɔ ˈö bhë ˗a dëmɛn ˗dhɛ ˈyö˗ pö: ‹˗Bhö ü ˗zokë ˗a ˈˈpiʋ̈, ˈwëëga ˈdhɛ ˈö bhë ˗ya ɲën, pë ˈˈpɛpɛ ˈü ˗dho ˗a kë ˗a ˈˈpiʋ̈ ꞊taabha, n ꞊yɛɛ kë ˗sü ˈka, a ˗dho ˗a ˈˈpɔ bho.›
36 ˈÜ ˗bha ˈgü, mɛn ˗yaaga ˈwo bhë ˗a de ˈö˗ ˗zɔn ꞊dhɛ gɔndënën ˈwo pë yaa ˗kë ˗a ˈka bhë ˗a ˗yayoo ˗mü ö ˈka?»
37 ˈYö˗ ˗yɔ bɔ Yesu ˗gɔ ˈö˗ pö: «˗A mɛn ˈdhɛ ˈö˗ ˗zɔn ꞊dhɛ ˗a ˗wëë ˗yö ö ˗kë bhë yö ˗mü.» ˈDhɛ ˈö˗ pö ˈˈdhʋ̈, ˈyö Yesu ˗ya pö ˗a ˗dhɛ: «˗Bhö ˈdho kö bhi ˗de ˈpö ˈü˗ kë ꞊dhɛ ˗kɔ ˈö bhë ˗a ˈdhö.»
38 ˈDhɛ ˈwo kun ˈdho ˗ni ˈgü, ˈyö ˈwo ˗da ˈpödhɛ do ˈbhaa ˈgü. ˈDhɛ ˈö bhë ˗a ˈgü, dhebɔnën do ˈwo˗ ˗dhɛ Matö ˗yö ö ˗kɔ ˗ya Yesu ˗dhɛŋ ˗gɔ ö ˗gɔ ˈkɔɔ.
39 ˗A ˈzlaa˗ ˈnëndhe do ˗yö ˗kun mü ˈpö ˈö ˈwo˗ ˗dhɛ Madhi. Yö ˗zë ˗yö ˗kun ˗ya ˗sü ˈka Dëmɛn ꞊gɛnŋdhö, ˈö kun ö ˈˈtʋ ˈto ˗ni ˈgü ˈpë ˈö kun ˗a pö ˗ni ˈgü ˗a ˗bha.
40 ˈˈKɛɛ Matö ˗zë, ˗a ˗zo ˈyaa kun ˈwɔn ˗nu bhë ˗an ˈˈpiʋ̈, ˗yö ˗kun ˗bhöpë ꞊va ˗kpa ˗ni ˈgü. ˈDhɛ ˈö ˗kë ˈˈdhʋ̈, ˈyö ꞊ɲɔɔn Yesu ˗bha ˈö˗ pö ˗a ˗dhɛ: «N Dëmɛn, ˈɲaannu ˈö n ˈzlaa˗ ˗ya wo ˈö man dosɛnŋ ˈa yö ˈˈsinman ꞊suu ˈö yö ˗a kë ˗ni ˈgü bhë, ˈbhaa˗ yö ˗ee? ˗A pö ˗a ˗dhɛ ˗yö nu kö ˗yö n ˗takun.»
41 ˈYö Dëmɛn ˗ya ˗yɔ bɔ ˗a ˗gɔ ˈö˗ pö: «Matö, Matö, ˈmën ˈü yö ꞊va ˗ya ˗a ˈka ü ˗de ˗bha ˈö ü zuʋ̈ˈˈ ˈˈdhiʋ̈ ˈdhö ˈˈtɛ ˗ni ˈgü yö?
42 Kwa ˗bhawɔn ˈyaa pë ꞊va ˗bha, ˗a ˗de ˗ʒiaan pë ˈö kwa ˗bhawɔn ˈdhö˗ ˗bha ˗yö dosɛnŋ. Madhi ˗zë pë ˈdhɛ ˈö˗ ˗wɔn ˈdhö ˈˈgbɩɩ˗ ꞊dedewo yö ˈnën ˈö˗ kë ˗ni ˈgü bhë. Mɛn ˈˈwɛɛ ˈbhaa ˗kɔ ˈti ˗dho ꞊mɔɔn˗ ˗bha kö ˗ya ˈsü ˗a ˗gɔ.»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «Dëmɛn.»
^ Ɛɛnˈˈ «mɛn ˈˈwɛɛ ˈbhaa ꞊tuaabho ˗a ˈˈkpɛnŋ mü ˗sü ˈka.»
^ Ɛɛnˈˈ «Adɛsö.» ˗Wo ˗we «mɛn ˈˈpɛpɛ ˈö ˗wa ga ˗an bun ˗dhokwëësü» ˈka.
^ Ɛɛnˈˈ «a ü ˈtɔ ˗bhɔ mɛn ꞊gban ˈˈɲan ˈˈdhiʋ̈.»
^ Glɛkö ˗wo ˈgü ˈyö ˗tɔ «yɔɔˈˈ ˗ni ˈgü.»
