Nɔɔn˗ ˗së ˈsëëdhɛ ˈö Lukö ˗ya ˗bɛnzë 11:1-54
-
˗Dhioo ˈö ˗gban bhɛɛsü ˗bha (1-13)
-
Bhɛɛˈˈ ˗kɔ ˈwɔnzuan (2-4)
-
-
˗Zuu yaa ˗bho mɛn ˗nu ˈgü ˗sü ˈö ˗Zlan ˗bha ˈˈpiigbɩɩdhɛ ˈka (14-23)
-
˗Zuu yaa ˗bha ö ꞊yɛɛ kë ˗sü ˈö nu (24-26)
-
Mɛn ˗nu ˈö ˗an ˗bha ˈdhö ˗së ꞊dedewo (27, 28)
-
˗Dhidha ˈö ˗kë Ʒonasö ˈka (29-32)
-
Mɛn kwi ˗bha ꞊laŋba (33-36)
-
˗Zlanwo ˗gɔdhiʋ̈mɛn ꞊suasü ˗nu ˗bha ˗yö ˗wëësü (37-54)
11 ˗Dhɛkpaɔyi do ˈka, Yesu ˗yö ˗kun bhɛɛˈˈ ˗ni ˈgü ˗dhɛ do ˈbhaa ˈgü. ˈDhɛ ˈö ö bo, ˈyö˗ ˗bha gwëëˈˈ do ˗ya pö ˗a ˗dhɛ: «N Dëmɛn, ˗bhö bhɛɛˈˈ ˗kɔ ˗zɔn yi ˗dhɛ ꞊dhɛ ˗kɔ ˈö Zan ˗ya ˗zɔn ˗a ˈka ö ˗bha gwëëˈˈ ˗nu ˗dhɛ bhë ˗a ˈdhö.»
2 ˈDhɛ ˈö˗ pö ˈˈdhʋ̈, ˈyö Yesu ˗ya pö ˗an ˗dhɛ: «Ka bhɛɛˈˈ ˗ni ˈgü ˗kaa pö: ‹Yi Dë, ü ˈtɔ ˗yö kë ˈˈslʋ̈ʋ̈slʋ̈. Ü ˗bha ˗Gblüdëdhɛ ˗yö nu.
3 Dɔ ˈˈgbɩɩ˗ ˈü ˗bhöpë ˈö yi ˗bhawɔn ˈdhö˗ ˗bha ˗dhɛkpaɔyi ˈdhɛ ˈö ˈdhö ˗a ˈka ˗a nu yi ˗dhɛ.
4 ˗Bhö yi ˗bha ˈwɔn yaa ˗nu ˗bhawɔn ˈto, ˗a ˗gɛn ˗mü ꞊dhɛ yi ˗de ˈpö mɛn ˈˈpɛpɛ ˈwo ˈwɔn yaa ˗kë yi ˈka, yi ˗an ˗bhawɔn ˗to. ˗Bhö yi ˗takun kö ˈya ˗dho ˗puö ˈgüdandhe ˈgü.›»
5 ˈYö go mü ˈzü ˈö˗ pö ˗an ˗dhɛ: «˗Ka ka ˗zota kö mɛn ˈö ˈka ˗lo bhë, mɛn do ˗yö ˈdho ö ˈˈtɔŋdë ˈˈgbɩɩ˗ do ˈbhaa ˈˈpiʋ̈ gbeŋ ꞊zinŋgü, kö ˗ya pö ˗a ˗dhɛ: ‹N ˈˈtɔŋdë ˗bhö ˈbluu˗ bhɛ ˗yaaga ˈˈpɔ dɔ n ˗bha,
6 ˗a ˗gɛn ˗mü ꞊dhɛ n ˈˈtɔŋdë do ˈbhaa ˈö ˈdho ˗ni ˈgü ˈˈta ˈgü, ˗ya ˗lo n ˗gɔ ˈkɔɔ, ˈˈkɛɛ pë ˈbhaa ˈyaa n ˗gɔ kö ˈa˗ nu ˗a ˗dhɛ kö ˗ya ˗bhö.›
7 ˈYö mɛn ˈö bhë ˈö bɔ ˈkɔɔ ˈö˗ pö: ‹˗Bhö ü ꞊kwaa n ˗zü. ˈMan ˈˈkwee ta ˈsaadhö, yaa n ˗man ˈnën ˗nu ˈya ˈwaannu. ˈMaan ꞊mɔɔn˗ ˗bha ˈa luuˈˈ kö ˈa pë ˈbhaa nu ü ˗dhɛ.›
8 A˗ ˗pö ka ˗dhɛ, ˈkö ˗kë ꞊dhɛ yö ˈti ˗dho zë ˗a ˗bha ˗kë ˗a ˈˈtɔŋdë ˈka ˗sü ˗wɔn ˗dhɛ kö ˗yö luuˈˈ kö pë ˈö˗ ˗dhɛ ˗ni ˈgü bhë ˗ya nu, ˗yö ˗dho luuˈˈ ˈö pë ˈˈoo ˗pë ˈö˗ ˗bhawɔn ˈdhö˗ ˗bha ˈö˗ nu ˗a ˗dhɛ ˗fɛɛ ˈö˗ ˗ya ˗ni ˈgü ˗a ˗bha bhë ˗a ˗wɔn ˈgü.
9 ˈDhɛ ˈö ˈˈdhʋ̈, a˗ ˗pö ka ˗dhɛ: ˗Ka pë ˗gba ˗dhɛ ˗kplawo, ˗wo ˗dho ˗a nu ka ˗dhɛ. ˗Ka pë mɛɛnˈˈ ˗kplawo, ka ˗dho ˗a ꞊slɔɔ. ˗Ka ˈˈkwee ˗ta ˗man ˗kplawo, ˗wo ˗dho ˗a ˈˈpʋ ka ˗gɔ.
10 ˗A ˗gɛn ˗mü ꞊dhɛ mɛn ˈö pë ˗gba ˗dhɛ ˈyö ˈwo˗ nu ˗a ˗dhɛ. Mɛn ˈö pë ꞊mɛɛn ˈyö˗ ꞊slɔɔ. Mɛn ˈö ˈˈkwee ˗ta ˗man, ˗wo ˗dho ˗a ˈˈpʋ ˗a ˗gɔ.
11 Mɛn ˈö ˈka ˗lo bhë, de* ˈö˗ gbö ˗ya ˈyuö˗ ˗dhɛ ˗a ˗gɔ ˈö dho ꞊mlɛɛn ˈsü kö ˗ya nu ˗a ˗dhɛ?
12 Ɛɛnˈˈ ˈö˗ gbö ˗ya ˗tɔ ˗ɲaan ˗dhɛ ˗a ˗gɔ, ˈö dho gaanˈˈ ˈsü kö ˗ya nu ˗a ˗dhɛ?
13 ˗Ya kë ꞊dhɛ ka ˈö ka ˈˈgblü ˈdhö ˈya˗, ˈka dɔ pë ˈö ˗së ˗a nu ˗dhɛ ˈka ka ˗bha ˈnën ˗nu ˗dhɛ, ˈyö ka Dë ˈö ˗ya ˗sü ˈka dhaŋ˗ ˈgü bhë ꞊wɛ? Yö ˈti ˗dho ˗zuu ˈˈslʋ̈ʋ̈slʋ̈ nu mɛn ˗nu ˈwo˗ ˗dhɛ ˗a ˗gɔ ˗an ˗dhɛ ˗ee?»
14 ꞊Taabha, Yesu ˗yö ˗zuu yaa ˈö gɔndënën do ˈbhaa ˗kë ˈˈbhʋbhʋ ˈka ˗a ˗bho ˗a ˈgü. ˈDhɛ ˈö˗ ˗zuu yaa ˗yö go ˗a ˈgü, ˈyö˗ gɔndënën ˈö bhë ˈö ˗ya ˈwɔn blɛɛˈˈ ˗sü ˗bha. ˈYö˗ ˈwɔn ˗yö mɛn ˗nu ˈwo kun mü bhë ˗an kun ꞊dedewo.
15 ˈˈKɛɛ ˈyö mɛn ˈbhaa ˗nu ˗wa pö: «˗Zuu yaa ˗nu ˗gɔmɛn ˈwo˗ ˗dhɛ Bɛɛzebubö,* yö ˈnën ˈö ꞊faan nu ˗a ˗dhɛ ˈyö ˗mɔn ˗zuu yaa ˗nu ˗bho mɛn ˗nu ˈgü ˗sü ˗bha.»
16 ˗Yö ˗kun ˗a mɛn ˈˈwɛɛ ˈbhaa ˗nu ˈˈpiʋ̈ ꞊dhɛ ˈwo˗ ˈgüdan. ˗A ˗wɔn ˈgü, ˗wa ˗pö ˗a ˗dhɛ ˗yö ˗dhidha do ˈö go dhaŋ˗ ˈgü ˗a kë.
17 ˈDhɛ ˈö ˗kë ꞊dhɛ Yesu ˗yö ˗an zuʋ̈piʋ̈wɔn ˗dɔ bhë, ˈyö˗ pö ˗an ˗dhɛ: «˗Gblüdëdhɛ ˈö˗ ˈgümɛn ˗nu ˗wo ˗gban wo ˈko ˗nu ˗gɔ, ˗a ˈˈdhiʋ̈ ˗yö ˗to ˈwü ˗sü ꞊nën˗ ˗ta. Ɛɛnˈˈ ˈzü ˈkɔdhi ˈö˗ ˈgümɛn ˗nu ˗wo ˗gban wo ˈko ˗nu ˗gɔ, ˗a ˗gɛn ˈyaa ꞊mɔɔn˗ ˗bha kö ˗yö ˗gban, ˈwü ꞊nën ˈö˗ wo.
18 ˗Kɔ do ˈö bhë ˗a ˈka, Sɔtraan ˗ya ˈko zë ö ˗de ˈka, ˗a ˗bha ˗gblüdëdhɛ ˗gɛn ˗dho ˗gban ˗kɔ ˗kë ꞊dhɛ? ˈPë ˗kë ˈa˗ pö ˈˈdhʋ̈ ˈyö ˗tɔ ka˗ ˗pö Bɛɛzebubö ˈnën ˈö ꞊faan nu n ˗dhɛ ˈyö ˈa ˗mɔn ˗zuu yaa ˗nu ˗bho mɛn ˗nu ˈgü ˗sü ˗bha.
19 ˗Ya kë ꞊dhɛ Bɛɛzebubö ˈnën ˈö ꞊faan nu n ˗dhɛ ˈö ˈa ˗zuu yaa ˗nu bho mɛn ˗nu ˈgü, ˗a ˈdhɛ ˈö ka ˗bha gwëëˈˈ ˗nu ˈdhö˗ kë ˗ni ˈgü bhë ˈpö, de ˈö˗ ꞊faan nu ˗an ˗dhɛ? ˈPë ˗kë ˈö ka ˗bha gwëëˈˈ ˗nu ꞊dede ˈnën ˈwo ˗dho ka zë za ˈka, ˈyö bhë.
20 ˈˈKɛɛ ˗ya kë ꞊dhɛ ˗Zlan ˗bha ˈˈpiigbɩɩdhɛ* ˈnën ˈa bɔ ˗a ˗ta ˈa ˗zuu yaa ˗nu ˗kë mɛn ˗nu ˈgü, kö ˗ya ˗zɔn ꞊dhɛ ˗Zlan ˗bha ˗Gblüdëdhɛ ˗ya nu ˗ya yö ka ˗bha.
21 Kö gɔɔn˗ ˈgügbɩɩsü ˈbhaa ˈö ˗gblü ˗gɔn ˗a ˈka ˗kwɛɛ ˈdhö˗ ˗gɔ ˗yö ö ˗bha ˈkɔ ˗maankë, ˈwaa ꞊mɔɔn˗ ˗bha kö ˗wo ˗a ˗bha ˈkɔɔ ˗kwɛɛ ˗nu ꞊kwaan.
22 ˈˈKɛɛ mɛn ˈˈwɛɛ ˈbhaa ˈö ˈˈgbɩɩ˗ ˈö ˗ʒiö ˗a ˈka ˗a ˗ta ˗ya nu ˗a ˗gɔ, ˗a ˗kɔ ˗ya ʒiö ˗a ˗gɔ, ˗yö ˗dho ˗a ˗bha ˗gblü ˗gɔn ˗a ˈka ˗kwɛɛ ˗nu ˈö ö ˗zo yö ˗an ˗dhɛ bhë ˗an ꞊gban ˈˈpɛpɛ ˈkun ˗a ˗gɔ, ˈö˗ ˗bha ꞊kwɛɛ˗ ˗nu ˈö ˗an sü ˗a ˗gɔ ˗an ˗gblü mɛn ˈˈwɛɛ ˗nu ˗ta.
23 ˈMɛn ˈö yö ˈti bɔ n ˈka, kö ˗yö ˗nu n ˗gɔ. ˈMɛn ˈö yö ˈti kpa n ˗bha ˈpö kö ˈyi mɛn ˗nu ˗lo wo ˈkwëëdhö n ˈˈpiʋ̈, kö mɛn ˗nu ˗kan n ˗bha ˗mɛn ˗mü.
24 «˗Zuu yaa ˗ya ˈgo mɛn ˈbhaa ˈgü, ˗yö ˗dho ˈö ˗glü ˗dhɛkpɛɛdhɛ ˈgü kö ˈö ö ˈˈtɛɛpadhɛ mɛɛnˈˈ. ˈˈKɛɛ yö ˈti ˗dhɛ ˈˈwɛɛ ˈbhaa ꞊slɔɔ, ˈyö˗ pö: ‹A ˗dho ˈdho n ˗man ˈkɔ ˗a go ˗a ˈgü bhë ˗a ˈgü ˈzü.›
25 ˗Ya ö ꞊yɛɛ kë mü, ˈyö˗ yö ꞊dhɛ ˗a ˈkɔɔdhɛ ˗yö ˗gwö ˗sü ˈka, ˈö ˗wa ˈkɔɔdhɛ dhi ˗pë ˗nu dɔ mü.
26 ꞊Yaa˗ yö ˈˈdhʋ̈, ˈyö dho ˈö ˗zuu yaa ˈˈwɛɛ ˈˈsɔɔplɛ ˈwo ˈˈdhiʋ̈˗ ˈwo ˗ʒiö ˗a ˈka ˗a ˗ta ˗an ꞊mɛɛn ˈö nu ˗an ˈka ˈkɔ ˈö bhë ˗a ˈgü, ˈö waa˗ ˗nu ˈwo ˗ya mü. ˗Ya kë ˈˈdhʋ̈, ˗a ˗mɛn ˗bha ˗yö ˗kë ˈzü ˗wëësü ꞊dedewo ˈö ˗ʒiö ˗a ˈka ˈˈdhiʋ̈ ˗be ˗ta.»
27 Yesu ˗yö ˗to ˈwɔn ˈö bhë ˗a blɛɛˈˈ ˗sü ˗bha, ˈö dhebɔnën do ˗yö bɔ mɛn ˗nu ꞊zinŋgü mü ˈö ö ˗wo ˈˈdhiʋ̈ ꞊luu ˈö˗ pö: «Dhebɔ ˈö ü ˗gwü bun, ˈö ˈɲɔn nu ü ˗dhɛ bhë ˗a ˗bha ˗yö ˗së.»
28 ˈˈKɛɛ ˈdhɛ ˈö˗ pö ˈˈdhʋ̈, ˈyö Yesu ˗ya pö ˗a ˗dhɛ: «˗Abin, mɛn ˗nu ˈö ˗an ˗bha ˈdhö ˗së ꞊ʒiaan wo ˈnën ˈwo ˗tɔ mɛn ˗nu ˈö ˈwo wo ˈˈtʋ to ˗Zlan ˗wo ˗bha, ˈö ˈwo˗ ˗ya ꞊bhlëë ˈgü.»
29 ˈDhɛ ˈö mɛn ˗nu ˗wo ˗ya kë ˗sü ˗bha ꞊va mü, ˈyö ˗ya ˗a pö ˗sü ˗bha ˗an ˗dhɛ: «ˈˈTʋ̈ŋ ˈö yö ˗a ˈgümɛn ˗nu ꞊suu ˗yö ˈya˗. ˗Wa ˈˈpiʋ̈ ˗kplawo ꞊dhɛ ˗dhidha do ˗yö kë kö ˈwo ˗kpan ˗a ˗bha. ˈˈKɛɛ ˗dhidha ˈˈwɛɛ ˈbhaa yö ˈti ˗dho kë ˗an ˗dhɛ, kö yö ˈti kë ˗a ˗dhɛ ˈö ˗kë Ʒonasö ˈka bhë ˗a ˈka.
30 ˗A ˗gɛn ˗mü ꞊dhɛ, ˗kɔ do ˈö Ʒonasö ˗yö ˗kë ˗a ˈka ˗dhidha ˗wɔn ˈka Ninivö mɛn ˗nu ˗gɔ bhë, ˗kɔ do ˈö bhë ˗a ˈka ˈpö mɛn Gbö ˗dho kë ˗dhidha ˗wɔn ˈka ˈˈtʋ̈ŋ ˈö yö ˗a ˈgümɛn ˗nu ˗gɔ.
31 Za ˈˈkan ˗yi ˈka, ˗gblüdhe ˈö go ˈˈshiaa ꞊ʒiaan waa ˈˈtʋ̈ŋ ˈö yö ˗a ˈgümɛn ˗nu ˗wo ˗dho ˈgo ga ˈgü, ˈö ˗gblüdhe ˈö go ˈˈshiaa ꞊ʒiaan ˈö ˈˈtʋ̈ŋ ˈö yö ˗a ˈgümɛn ˗nu zë za ˈka. ˗A ˗gɛn ˗mü ꞊dhɛ ˗yö ˗go ˗dhɛ ꞊gblɛɛn ˈgü ˈö nu ö ˈˈtʋ ˈto˗ Sadhomɔn ˗bha ꞊kpɔɔdhɛ ˗dhiaŋ ˗bha. ˈˈKɛɛ ˗ka ˗dhɛ ˗ga! Mɛn ˈbhaa ˗yö yö ˈö ˈkpii˗ ˈö ˗ʒiö ˗a ˈka Sadhomɔn ˗ta.
32 Za ˈˈkan ˗yi ˈka, Ninivö ˗mɛn ˗nu waa ˈˈtʋ̈ŋ ˈö yö ˗a ˈgümɛn ˗nu ˗wo ˗dho ˈgo ga ˈgü, ˈö Ninivö ˗mɛn ˗nu ˗wo ˈˈtʋ̈ŋ ˈö yö ˗a ˈgümɛn ˗nu zë za ˈka. ˗A ˗gɛn ˗mü ꞊dhɛ ˈdhɛ ˈö Ʒonasö ˗yö ˗zlanwopö Ninivö ˗mɛn ˗nu ˗dhɛ, ˗wo wo ˗kwaa wo kë ˗sɔŋ yaa ˗nu ˗zü. ˈˈKɛɛ ˗ka ˗dhɛ ˗ga! Mɛn ˈbhaa ˗yö yö ˈö ˈkpii˗ ˈö ˗ʒiö ˗a ˈka Ʒonasö ˗ta.
33 Mɛn ˈbhaa ˈyaa ꞊laŋba dɔ kö ˗ya ˗bin ɛɛnˈˈ kö ˗yö ꞊töö ˈˈgblü ˗a ˗ta. ˗Ya ˗dɔ ꞊ʒiaan ꞊laŋba ˗dɔ ˗a ˗ta ˗pë ˗ta kö mɛn ˗nu ˈwo ˗da ˈkɔɔ ˗yö ˗dhɛ ˈˈpʋ ˗an ˗ta.
34 Ü ˈˈɲanga ˈnën ˗tɔ ü kwi ˗bha ꞊laŋba. Ü ˈˈɲanga ˗ya ˗klu pë do ˗bha,* ü ˗dhü ˗todhʋ̈sü ˗dho kë ˗dhɛpuudhɛ ˈgü. ˈˈKɛɛ ü ˈˈɲanga ˗ya kë ˈya˗,* ü ˗dhü ˗todhʋ̈sü ˗dho kë ˗dhɛtiidhɛ ˈgü.
35 ˈDhɛ ˈö ˈˈdhʋ̈, ˗bhö ü ˗zokë ü ˗de ˈˈpiʋ̈ kö ˈˈwo ˈbhü ˈö ü ˈgü bhë ˈya ˗dho kë ˗dhɛtiidhɛ ˈka.
36 Kö ü ˗dhü ˗todhʋ̈sü ˗yö ˗kë ˗dhɛpuudhɛ ˈgü, ˗a tiidhɛ yö ˈti kë ˗a ˗bha, ˗a ˈbhü ˗dho bhɔ ꞊dhɛ ˗kɔ ˈö ꞊laŋba ˗yö ˗dhɛ ˗pʋ ˗a ˈka ü ˗ta ˗a ˈdhö.»
37 ˈDhɛ ˈö ö bo ˗a pö ˈˈdhʋ̈ ˗sü ˈka, ˈyö Fadhiziɛn mi do ˗ya ˗dhɛ ö ˗gɔ ˈkɔɔ kö ˈwo pë ˗bhö. ˈDhɛ ˈö ˗kë ˈˈdhʋ̈ ˈyö dho ˗a ˗gɔ ˈkɔɔ ˈyö ˈwo ˗ya* ˈtaablö ˈˈdhiʋ̈.
38 ˈˈKɛɛ ˈdhɛ ˈö˗ Fadhiziɛn mi ˗ya yö ꞊dhɛ Yesu yö ˈti ö ˗kɔ ˈˈzu* kö ˗yö ꞊kun pë ˗bhö, ˗a ˈwɔn ˗ya ˗kun.
39 ˈDhɛ ˈö ˗kë ˈˈdhʋ̈, ˈyö Dëmɛn ˗ya pö ˗a ˗dhɛ: «Fadhiziɛn ˗nu ka ˗kɔɔ ˗nu waa ˈtia˗ ˗nu bunbhadhɛ ˗zu, ˈˈkɛɛ kö ka zuʋ̈ˈˈ ˈgüdhɛ ˗yö pa ˗sü ˈka ˈwɔn yaa kë ˗sü ˈka, ˈö pë ˈyaa ka ˗zokun.
40 ˈˈWlaawɔnkëmɛn ˗nu! ˗Zlan ˈö pë bunbhadhɛ ˈö ˈˈkpɛnŋdhö ˗a ˗da bhë, yö ˈti ˗a ˈkɔɔdhɛ ˗da ˈpö ˗ee?
41 ˈKa˗ pö ˈka gbɔɔdhe kë ˗wëëmɛn ˗nu ˗gɔ, ˗yö ˈgo ka zuʋ̈ˈˈ ˈgü. ˈKa˗ kë ˈˈdhʋ̈, ka ˗bha pë ꞊gban ˗dho kë ˈˈslʋ̈ʋ̈slʋ̈.
42 Fadhiziɛn ˗nu ka ˗bha ˗yö ˗wëësü, ˗a ˗gɛn ˗mü ꞊dhɛ tapë ˗nu ˈö ˈwo ˗kë mantö ˗nu, ru ˗nu waa tapë ˗nu ˈˈpɛpɛ ˈwo ˗an ta ˈˈtʋʋdhɛɛdhö ˗an ˈka bhë, ka ˗an ˈˈpian ˗kɔŋ do ˗naan ˗nu gbɔɔdhe ˈka, ˈˈkɛɛ ka ˈˈtʋ ˈyaa ˈwɔn ˈö ˗Zlan ˈgü kpɛnŋdhö waa ˗Zlan ˗dhɔ ˗an ˗bha. Ka dua ˗mü ˈka pë ˗nu ˈwo ˈˈdhʋ̈ ˗an nu gbɔɔdhe ˈka ꞊dhɛ ˗kɔ ˈö bhë ˗a ˈdhö, ˈˈkɛɛ kö ˈka ˗dho ˈˈkan pë ˈˈwɛɛ ˗nu ˈwo to ˗an ˗bha.
43 Fadhiziɛn ˗nu ka ˗bha ˗yö ˗wëësü, ˗a ˗gɛn ˗mü ꞊dhɛ ˗yɛɛ ˗blɛɛsü* ˗nu ˈwo ˈˈdhiʋ̈ ˗yakwëë ˗kë ˗a ˈgü ˗kɔ ˗nu ˈgü waa ka ꞊tuaabhosü ˈö ˈˈdhookwëëdhɛ ˗nu ˈgü bhë, ˈyö ˗an ˗dhɔ ˗yö ka ˗kë.
44 Ka ˗bha ˗yö ˗wëësü, ˗a ˗gɛn ˗mü ꞊dhɛ ka kë ˗sü ˈka ꞊dhɛ blɔɔndhɛ ˗nu ˈö ˗an ꞊duaa* ˈyaa kë ˗sü ˈka ˈö mɛn ˗nu ˗wo ꞊taa ˗an ˗ta, ˈö ˈwaa˗ ˈwɔn dɔ ˗an ˈdhö.»
45 ˈDhɛ ˈö˗ pö ˈˈdhʋ̈, ˈyö gɔndënën do ˈö ˈTɔŋ˗ ˗nu dɔ ˗së ˈka ˈö˗ pö ˗a ˗dhɛ: «˗Gɔmɛn, ˈbha˗ pö ˈˈdhʋ̈ kö ˈsi ˈyaa ˈnën ˈü˗ bho ˗ni ˈgü yi ˗gɔ ˈpö bhë ˗ee?»
46 ˈYö Yesu ˗ya pö ˗a ˗dhɛ: «Mɛn ˗nu ˈö ˈka ˈTɔŋ˗ ˗nu dɔ ˗së ˈka, ka ˗de ˈpö ka ˗bha ˗yö ˗wëësü, ˗a ˗gɛn ˗mü ꞊dhɛ ka ꞊kwɛɛ˗ ˈgbinŋ˗ ˗ya mɛn ˈˈwɛɛ ˗nu ˗ta, ˈˈkɛɛ ˈö ˈkaa ˈˈwɩ ˗a ˗bha kö ˈka ka ˗kɔnënga dosɛnŋ yö ˗a ˗bha ˗ʒiaanwo.
47 «Ka ˗bha ˗yö ˗wëësü, ˗a ˗gɛn ˗mü ꞊dhɛ ka ˗Zlan ˗wodhiʋ̈lomɛn ˗nu buntadhɛ ˗yö ˗kë, ˈˈkɛɛ kö ka ˈˈbhɛman ˗nu ˈnën ˈwo ˗an zë.
48 ˈPë ˈö ka ˈˈbhɛman ˗nu ˗wa ˗kë ˈˈdhʋ̈ bhë ˗a ˈwɔn ˗yö ka ˈˈɲaan, ˈö˗ ˈˈyi ˗yö ˗kan ka ˈˈdhi. Wo ˈnën ˈwo ˗Zlan ˗wodhiʋ̈lomɛn ˗nu zë, ˈyö ka ˗de ˈpö ˈka ˗an blɔɔndhɛ ˗nu ˗yö kë ˗ni ˈgü bhë.
49 Yö ˈnën ˈö˗ ˗wɔn ˈgü ˈö ˗Zlan ˈö ꞊kpɔɔsü bhë ˈö˗ to ˈˈdhiʋ̈ ˈö˗ pö: ‹A ˗dho n ˗wodhiʋ̈lomɛn ˗nu waa bɔmɛn ˗nu bɔ ˗an ˈˈpiʋ̈. ˗Wo ˗dho ˗a mɛn ˈbhaa ˗nu zë, ˈö ˈwo˗ mɛn ˈbhaa ˗nu ˈˈklʋʋbhɔ.
50 ˗Yö ˗kë ˈˈdhʋ̈ kö ˗Zlan ˗wodhiʋ̈lomɛn ˗nu ˈˈpɛpɛ ˈö ˈwo ˗an ꞊ɲɔɔn ꞊wɛnŋ ˈö sü ˈˈkpɔnŋtaadhɛ züdɔyi* ˗bha ˈö yö ˗a ˈka ꞊dɛɛ ˗bha bhë, ˗a ˈwɔn ˗yö ˈto ˈˈtʋ̈ŋ ˈö yö ˗a ˈgümɛn ˗nu ˗bha.
51 ˗Wo ˗an zë ˗sü züdɔ Abɛdhö ˗ta, ˈö dho ˈö yö ˗a ˈka Zakadhi ˈö ˈwo˗ zë ˈˈsaa˗ ˗bho ˗a ˗ta ˗pë waa ˗Zlan ˗dhɔkëdhɛ ˗an ꞊zinŋgü bhë ˗a ˗bha.› A˗ ˗pö ka ˗dhɛ ꞊dhɛ ˗a ˈwɔn ˗dho ˈto ˈˈtʋ̈ŋ ˈö yö ˗a ˈgümɛn ˗nu ˗bha.
52 «Mɛn ˗nu ˈö ˈka ˈTɔŋ˗ ˗nu dɔ ˗së ˈka, ka ˗bha ˗yö ˗wëësü, ˗a ˗gɛn ˗mü ꞊dhɛ ˈwɔndɔdhe ˈö go ˗Zlan ˈˈpiʋ̈ bhë ˈka yö ˗a ꞊laklɩɩ ˗ta mɛn ˈˈwɛɛ ˗nu ˗gɔ. Ka ꞊dede ka ˈti ˗da ˈkɔɔ, ˈˈkɛɛ mɛn ˗nu ˈö ˈwo˗ ˈˈpiʋ̈ ˈwo ˗da mü ˈkaa ˈˈwɩ ˗a ˗bha ˗an ˗gɔ.»
53 ˈDhɛ ˈö Yesu ˗yö yö ˈˈkpɛnŋ, ˈyö ˈtɔŋ˗ ˗gɔmɛn ˗nu waa Fadhiziɛn ˗nu ˗wo ꞊ɲɔɔn ˗a ˗bha kö ˈwɔn ˗ya ˗shiö ˗an ˗dhɛ ꞊dedewo, ˈyö ˈwo ˗ya dhɛɛˈˈ ꞊va ˈkpɔ ˗sü ˗bha ˗a ˗gɔ,
54 kö pë ˈbhaa ˈö dho ˗a pö kö ˗yö kë za ˗dɔ ˗a ˗bha ˗gɛn ˈka ˈwo˗ yö.
-Zoto -a ˈˈpiʋ̈ -wɔn -nu
^ Ɛɛnˈˈ «ˈnën dë ˗mɛɛn.»
^ «Sɔtraan» ˈnën ˈwo˗ ˗dhɛ ˈˈdhʋ̈.
^ Glɛkö ˗wo ˈgü ˈyö ˗tɔ «˗kɔnënga.»
^ Ɛɛnˈˈ «˗dhɛ yö ˗së ˈka.»
^ Ɛɛnˈˈ «ˈyaa ˗klu pë do ˗bha.»
^ Ɛɛnˈˈ «˗wɔ.»
^ ˗Wo ˗we «˗an ˗bha wo ˗kɔ ˈˈzu ˗kɔ ˈö ˗an ˗bha wɔkɔ ˈgü kö ˈwo kë ˈˈslʋ̈ʋ̈slʋ̈» bhë ˗a ˈka.
^ Ɛɛnˈˈ «꞊bhlëësü.»
^ Glɛkö ˗wo ˈgü ˈyö ˗tɔ «ˈö mɛn ˗nu ˈwaa˗ yö ˗së ˈka.»
^ ˗A ˈbhaa ˗ya kë kö ˗wo ˗we «ˈˈtʋ̈ŋ ˈö Adan waa Ɛvö ˗wo ˈnën ˗nu kpɔ ˗a ˈka» bhë ˗a ˈka.
