Nɔɔn˗ ˗së ˈsëëdhɛ ˈö Lukö ˗ya ˗bɛnzë 12:1-59
-
Fadhiziɛn ˗nu ˗bha ˈˈsɛkɛ (1-3)
-
˗Ka ˈˈsuʋ̈ ˗Zlan ˗gɔ, ˈka ˗dho ˈˈsuʋ̈ mɛnbhɩɩdhe ˗nu ˗gɔ (4-7)
-
˗A pö ˗sü ˈö ꞊dhɛ kwa Klito ˗bha ˈka (8-12)
-
ˈWɔnzuan ˈö ˗gban ꞊nɔɔnmɛn do ˈö ˈyaa ˈwɔn dɔ ˗a ˗bha (13-21)
-
ˈKa ˗dho ˗ya ka ˗bha ˗tosɛta ˗wɔn ꞊zɔnŋ ˗ta (22-34)
-
˗Tuëë kpönën ˈˈtɩtɩ (32)
-
-
«˗Ka ˗ya ka ˈˈɲaan» (35-40)
-
Gwëëmi ˗towotasü waa gwëëmi ˈö ˈyaa ˈto ö ˗wo ˗ta (41-48)
-
‹˗Dhikodhɛ ˈyaa ˈnën ˈa nu ˗a ˈka, ˗shiödhe ˈnën ˈa nu ˗a ˈka› (49-53)
-
ˈWɔn ˗nu ˈwo kë ˗ni ˈgü ˗an ˗bhokoo dɔ ˗sü (54-56)
-
ˈWɔn ˗nu baaˈˈ ˗kɔ (57-59)
12 ˗A ˈˈtʋ̈ŋ ˈö bhë ˗a ˈgü, mɛn ˈˈgblü ꞊va ꞊dede ˗wo ˗dho wo ˈkwëëdhö ˗a ˈˈpiʋ̈ mü. ˈDhɛ ˈö ꞊ɲɔɔn mü kö ˗wo taaˈˈ ˗ni ˈgü wo ˈko ˗nu ˗gɛn ˗ta. ˈYö Yesu ˗yö ˗ya ˈwɔn blɛɛˈˈ ˗sü ˗bha ö ˗bha gwëëˈˈ ˗nu ˗dhɛ ˈö˗ pö: «˗Ka ka ˗de ˈkun Fadhiziɛn ˗nu ˗bha ˈˈsɛkɛ ˈö ˗kë ˈˈkpënŋ˗ ˗kë mɛn ˗gɔ ˗sü ˈka bhë ˗a ˗gɔ.
2 ˗A ˗gɛn ˗mü ꞊dhɛ pë ˈbhaa ˈkö ˗dho kë ˗bin ˗sü ˈka ꞊klɔɔklɔɔdhö ˈö yö ˈti ˗dho yö zaŋ ˗ta ˈyaa ˈdhö. Ɛɛnˈˈ pë ˈbhaa ˈkö ˈˈdhɛ dho kë ˗a ˗ta ˈö ˈˈdhɛ yö ˈti ˗dho ˈgo ˗a ˗ta ˈyaa ˈdhö.
3 Yö ˈnën ˈö˗ ˗wɔn ˈgü ˈö pë ˈˈpɛpɛ ˈö ˈka˗ pö ˗dhɛtiidhɛ ˈgü, ˈö ˗dho yö zaŋ ˗ta ˗dhɛpuudhɛ ˈgü ˈö mɛn ˗nu ˗wa man. Pë ˗nu ˈö ˈka ˗an pö ˗ni ˈgü ka ˗wo ꞊löö ka ˗gɔ ˈkɔɔ bhë, ˗wo ˗dho dɔ ˈkɔ ˗ta ˈˈdhuŋ ˈö ˈwo˗ ꞊blɛɛ.
4 ˗Ya ˈgo ˗a ˈgü ˈzü n ˈˈtɔŋdë ˗nu, a˗ ˗pö ka ˗dhɛ ˈˈsuʋ̈ ˈya ˗dho ka kë mɛn ˗nu ˈwo ˗mɔn ˗a ˗bha ˗wo ka zë, ˈˈkɛɛ ˈö˗ ˈˈsɩ ˈyaa ˗an ˗dhɛ kö ˗wo pë ˈbhaa kë ˗a ˈˈpiʋ̈ ꞊taabha bhë ˗an ˗gɔ.
5 Mɛn ˈö ka dua ˈdhö ˗mü kö ˈka ˈˈsuʋ̈ ˗a ˗gɔ ꞊ʒiaan yö ˈnën ˈa ˗dho ˗a ˗zɔn ka ˗dhɛ yö: ˗Ka ˈˈsuʋ̈ mɛn ˈö ˗ya ka zë, ˈö˗ ˈˈsɩ ˈdhö˗ ˗dhɛ kö ˗yö ka ˗zuö Ʒeɛnö ˈgü bhë ˗a ˗gɔ. A˗ ˗pö ka ˗dhɛ ꞊dhɛ mɛn ˈö ˈka ˗dho ˈˈsuʋ̈ ˗a ˗gɔ, ˈyö bhë.
6 ˗Wo ꞊zöŋ ˈˈsoodhu ˈˈdhoodɔ ˈwëë˗ ˗piö ˈˈkpaan ga ꞊plɛ ˈö ˗an ꞊bhlëë ˈyaa ꞊va* ˗a ˗bha, ˈyaa ˈˈdhʋ̈ ˗ee? ˈˈKɛɛ ˗Zlan ˗zo ˈyaa bhɔ ˗a dosɛnŋ ˈka.
7 Ka ˗zë, ka ˗bha wundhɛ ˗nu ˈö ˈwo ka ꞊troo ˗an ꞊gban ˗wo dhʋŋsü ˈka. ˈDhɛ ˈö ˈˈdhʋ̈, ˈˈsuʋ̈ ˈya ˗dho ka kë. Ka ꞊bhlëë ˗yö ˈkpii˗ ˈö ˗ʒiö ˗a ˈka ꞊zöŋ ˗nu ˗ta.
8 «A˗ ˗pö ka ˗dhɛ mɛn ˈö˗ pö mɛnbhɩɩdhe ˗nu ˈˈɲan ˈˈdhiʋ̈ ꞊dhɛ ö n ˗man gwëëˈˈ ˈka, maan mɛn Gbö ˗mɛn a ˗dho ˗a pö ˗Zlan ˗bha ˈˈkiö ˗nu ˈˈɲan ˈˈdhiʋ̈ ˈpö ꞊dhɛ ˗a ˗mɛn ˗yö n ˗man gwëëˈˈ ˈka.
9 ˈˈKɛɛ mɛn ˈö˗ pö mɛnbhɩɩdhe ˗nu ˈˈɲan ˈˈdhiʋ̈ ꞊dhɛ ˈyaa n ˗man gwëëˈˈ ˈka, a ˗dho ˗a pö ˗Zlan ˗bha ˈˈkiö ˗nu ˈˈɲan ˈˈdhiʋ̈ ˈpö ꞊dhɛ ˗a ˗mɛn ˈyaa n ˗man gwëëˈˈ ˈka.
10 ˗Ya ˈgo mü ˈzü, mɛn ˈö ˈwɔn yaa ꞊blɛɛ maan mɛn Gbö ˗mɛn n ˗bha, ˗Zlan ˗dho ˗a ˗bhawɔn ˈto˗. ˈˈKɛɛ mɛn ˈˈoo ˗mɛn ˈö ˗Zlan ˗bha ˗zuu ꞊bhlëë ˗shiö, ˗Zlan ˈti ˗dho ˗a ˗bhawɔn ˈto˗.
11 ˗Wa ˈdho ka ˈka mɛn ˗nu ꞊zinŋgü* ɛɛnˈˈ ˈˈsɛ ˗gɔdhiʋ̈mɛn ˗nu ˗kuu ˈˈdhiʋ̈, ɛɛnˈˈ ˈzü mɛn ˗nu ˈö ˗duɛɛ ˈkpii˗ ˈdhö ˗an ˗gɔ ˗an ˗kuu ˈˈdhiʋ̈ kö ˗wo za dɔ ka ˗bha, ka zuʋ̈ˈˈ ˈˈdhiʋ̈ ˈya ˗dho ˈˈtɛ ˗kɔ ˈö ˈka ˗dho ka ˗de ˗ta ˗za dɔ ˗a ˈka waa pë ˈö ˈka ˗dho ˗a pö ˗a ˗wɔn ˈgü.
12 ˗A ˗gɛn ˗mü ꞊dhɛ ˈˈtʋ̈ŋ ꞊dede ˈö bhë ˗a ˈka, ˗zuu ˈˈslʋ̈ʋ̈slʋ̈ ˗dho pë ˈö ka dua ˈdhö ˗mü kö ˈka˗ pö ˗a ˗zɔn ka ˗dhɛ.»
13 ˈDhɛ ˈö ˗kë ˈˈdhʋ̈, ˈyö mɛn do ˈbhaa ˗yö bɔ mɛn ˗nu ꞊zinŋgü mü ˈö˗ pö Yesu ˗dhɛ: «˗Gɔmɛn, ˗a pö n ꞊dhegblü ˗dhɛ ˗yö ˈkɛnŋpë ˈö yi dë ˗ya to yi ˗gɔ bhë ˗a ˗gblü kö ˗yö n ˗man nu.»
14 ˈYö Yesu ˗ya pö ˗a ˗dhɛ: «N ˈˈtɔŋdë, de ˈö n ˗ya kö ˈa kë zakanmɛn ɛɛnˈˈ ka ˗bha ˈkɛnŋpë ˗gblü ˗mɛn ˈka?»
15 ˈYö go mü ˈö˗ pö mɛn ˗nu ˈwo kun ˈmü bhë ˗an ˗dhɛ: «˗Ka ka ˗zo ˈto ka ˗de ˈˈpiʋ̈* kö ˈwɔn ꞊suu ˈˈoo ˗su ˈgü, ˈka ˗dho kë mɛn ˗nu ˈö pë ˈyaa ˗an ˗zo ˈkun ˗an ˈka. ˗A ˗gɛn ˗mü ꞊dhɛ ˈkö˗ ˗de ˈö pë ˗yö ˗kë mɛn ˗gɔ ꞊va, ˗a ˗bha ˗këdhösü ˈyaa ˈsü pë ˗nu ˈwo˗ ˗gɔ ˗a ˗bha.»
16 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö ˈwɔnzuan do ˈbhaa ˗zɔn ˗an ˗dhɛ ˈö˗ pö: «꞊Nɔɔnmɛn do ˈbhaa ˗yö ˗kë ˗dhö ˈö˗ ˗bha ˈbhladhɛ ˗yö ˗dhi.
17 ˈYö ˗ya ö ˗zota ˗sü ˗bha ˈö˗ pö: ‹N ˗man ˗bhöpë ˗lo ˗a ˈgü ˗kɔ ˈö ˗ya pa yö a ˗dho ˗a kë ꞊dhɛ? Pë ˗nu ˈwo go n ˗gɔ ˈbhlaa yö a ˗dho ˗an ˗lo ˈˈmɛn?›
18 ˈDhɛ ˈö ö ˗zota ˈˈdhʋ̈, ˈyö˗ pö: ‹ˈPë ˈa ˗dho ˗a kë ˈyö ꞊nɛn: A ˗dho n ˗man ˗bhöpë ˗lo ˗a ˈgü ˗kɔ ˗nu ˈwo yö ˗an ˈwü kö ˈa˗ ˗dɛɛ ˗nu ˈwo ˈˈgblʋ̈gblʋ̈ ˗an dɔ, kö pë ˗nu ˈwo go n ˗gɔ ˈbhlaa waa n ˗man pë ˗së ˈˈpɛpɛ ˈwo ˈdhö ˈa ˗an ˗lo ˗an ˈgü.
19 ˈMan n bo kö ˈa˗ pö: «Pë ˗së ꞊va ˈa ˗dho ˗kwɛ ꞊va kë ˗a ˗ta ˗wo n ˗gɔ, dɔ kö ˈa n ˈˈtɛɛpa, ˈa pë ˗bhö, ˈa pë mü, kö ˈa n ˈˈdhiaa ꞊dede bho.»›
20 ˈˈKɛɛ ˈdhɛ ˈö ö ˗zota ˈˈdhʋ̈, ˈyö ˗Zlan ˗ya pö ˗a ˗dhɛ: ‹Bhi ˈö ˈbhaa ˈwɔn dɔ ˈü yö, ü ˗dho ga gbeŋ do ˈö ꞊dɛɛ yö ˗a ˈgü. ˈBha ga pë ˗nu ˈü ˗an ˗lo ˈko ˗ta yö, ˈde ˈwo ˗dho ˈto ˗a ˗gɔ?›
21 ˈWɔn do ˈö bhë ˈyö ˗dho kë mɛn ˈö ꞊nɔɔn ꞊mɛɛn ˈö˗ ˗lo ˈko ˗ta ö ˗de ˗bha ˈka, ˈˈkɛɛ ˈö ˈˈfleesü ˗Zlan ˈˈɲan ˈˈdhiʋ̈ bhë ˗a ˈka.»
22 ˈYö˗ pö ö ˗bha gwëëˈˈ ˗nu ˗dhɛ: «Yö ˈnën ˈö˗ ˗wɔn ˈgü ˈa˗ pö ka ˗dhɛ ꞊dhɛ ˈka ˗dho ˗ya ka ˗bha ˗tosɛta* ˗wɔn ꞊zɔnŋ ˗ta, ˈö ˈka˗ pö: ‹ˈMën ˈyi ˗dho ˗a ˗bhö?› Ɛɛnˈˈ ˈka ˗dho ˗ya ka bunbhadhɛ ˗wɔn ꞊zɔnŋ ˗ta ˈö ˈka˗ pö: ‹Sɔ ˗mɛɛn ˈyi ˗dho ˗a ˗da?›
23 ˗A ˗gɛn ˗mü ꞊dhɛ ˗tosɛta ˗wɔn ˗yö ˈˈgbɩɩ˗ ˈö ˗ʒiö ˗a ˈka ˗bhöpë ˗ta, ˈö mɛn bun ˗wɔn ˈdhö ˈˈgbɩɩ˗ ˈö ˗ʒiö ˗a ˈka sɔ ˗ta.
24 ˗Ka ˈbhomaan ˗nu ˗ga. ˈWaa pë ta kö ˗wa pö ꞊dhɛ ˗wo ˗dho ˗a ˈˈkan. ˗An ˗bha ˗bhöpë ˗lo ˗a ˈgü ˗kɔ ɛɛnˈˈ ˗an ˗bha ˈˈslöödhɛ ˈyaa ˈdhö. ˈˈKɛɛ ˗Zlan ˗yö ˗bhöpë ˗nu ˗an ˗dhɛ. Ka ꞊bhlëë ˈyaa ˈkpii˗ ˈyaa ʒiö ˗a ˈka ˗man ˗nu ˗ta ˗ee?
25 ˈMɛn ˈka ˗lo yö, de ˈö ˗ya ˗ya ö ˗de ˗wɔn ꞊zɔnŋ ˗ta, ˈö ˗dho ꞊mɔɔn˗ ˗bha kö ˗yö ˈˈtʋ̈ŋ ˈnën ˈdɔɔni ˈbhaa ˗da ö ˗bha ˗tosɛta kë ˗yi ˗ta?
26 ˗Ya kë ꞊dhɛ ˈwɔn ˗bhaasü ꞊suu ˈö ˈˈdhʋ̈, ˈkaa ˗mɔn ˗a kë ˗sü ˗bha, ˈmën ˗kë ˈsa ˈö ˈka ˗dho ˗ya pë ˈˈwɛɛ ˗nu ˈwo to ˗an ˗wɔn ꞊zɔnŋ ˗ta?
27 ˗Kɔ ˈö ꞊blëë ˈˈbin ˗nu ˗wo bhɔ ˗a ˈka, ˗kaa ˗ga. ˈWaa yö ˈˈgbɩɩ˗ ˈˈwɛɛ ˈbhaa kë ɛɛnˈˈ ˈwaa sɔ bɔ. ˈˈKɛɛ a˗ ˗pö ka ˗dhɛ, ˈkö ˗kë ꞊dhɛ pë ꞊va ˗kun Sadhomɔn ˗gɔ ˈö˗ ˈtɔ ˗yö bhɔ, yö ˈti sɔ ˈö ˗dho kë ˗së ꞊dhɛ ꞊blëë ˈˈbin ˗nu ˗bha ˈdhö ˗a ˗da do.
28 ˗Ya kë ꞊dhɛ ꞊blëë ˗nu ˈö ˗wa kë ˈyö ꞊dɛɛ, ˈö dhiʋ̈ˈˈ ˈwo ˗dho ˗an ˗zuö ˈˈshiʋ̈ ˈgü bhë, ˗Zlan ˗ya sɔ ˗da ˗an ˗bha ꞊dhɛ ˗kɔ ˈö bhë ˗a ˈdhö, ˈyö ka ˗zë ꞊wɛ? Yö ˈti ˗dho sɔ ˗da ka ˗bha ˈpö ˗ee? Ka ˗bha ˗zoyödhe ˈö ˗kë ˈˈtɩtɩ ˈyaa ˗mü ˗ee?
29 ˗Ka ka ꞊kwaa pë ˈö ˈka ˗dho ˗a ˗bhö ɛɛnˈˈ ˈö ˈka ˗dho ˗a mü ˗a ˗zotadhe ˗zü. ˈKa ˗dho ˗ya ˗a ˗wɔn ꞊zɔnŋ ˗ta ꞊gbɔɔnsü.
30 ˈˈKpɔnŋtaamɛn ˗nu ˈö ˈwaa ˗Zlan dɔ bhë, pë ˗nu ˈwo ˗ya ˗an ˗wɔn ꞊zɔnŋ ˗ta ꞊gbɔɔnsü ˈyö ˈwo bhë. ˈˈKɛɛ ka Dë ˗ya ˈwɔn ˗dɔ ꞊dhɛ ka ˗bhawɔn ˗yö pë ˗nu ˈwo bhë ˗an ˗bha.
31 ˈPë ˈka ˗dho ˗a mɛɛnˈˈ ꞊ʒiaan ˗kplawo ˈyö ˗tɔ ˗a ˗bha ˗Gblüdëdhɛ, kö pë ˗nu ˈwo to bhë ˗yö ˗an nu ka ˗dhɛ ˗a ꞊tɔɔ ˈka.
32 «˗Tuëë kpönën ˈˈtɩtɩ, ˈˈsuʋ̈ ˈya ˗dho ü kë, ˗a ˗gɛn ˗mü ꞊dhɛ ka Dë ˗ya ˈˈwɩ ˗a ˗bha kö ˈö ˗Gblüdëdhɛ nu ka ˗dhɛ.
33 ˗Ka ka ˗bha ꞊nɔɔnpë ˗nu ˈˈdhoodɔ kö ˈka gbɔɔdhe kë ˗wëëmɛn ˗nu* ˗gɔ. ˈWëë˗ ˗da ˗a ˈgü ˈˈkpɔɔnën ˗nu ˈö ˈwaa shiʋ̈ˈˈ, ˗ka ˗an ˗yö kë. ˗Kaa kë kö ꞊nɔɔn ˈö ˈyaa ɲën, ˗yö kë ka ˗gɔ dhaŋgüdhɛ ˈö ꞊kwaanmɛn ˈyaa˗ ˗bha ɛɛnˈˈ ˈö ꞊zɛ ˗nu ˈwaa pë shiʋ̈ˈˈ mü bhë ˗a ˈgü.
34 ˗A ˗gɛn ˗mü ꞊dhɛ ˈdhɛ ˈö ka ˗bha ꞊nɔɔnpë ˈdhö˗ ˗bha, ˈyö ka zuʋ̈ga ˗yö ˗kë mü ˈpö.
35 «˗Ka ka ˗de baaˈˈ,* ka ˗bha ꞊laŋba ˗nu ˗wo kë dɔ ˗sü ˈka ˗kplawo.
36 Ka dua ˗mü ˈka kë ꞊dhɛ mɛn ˗nu ˈö ˗an ˗gɔmɛn ˗yö dho dhe ˈsü ˈwlaan˗ ˗ta, ˈö ˈwo wo ˈˈɲan ˈto ˗ni ˈgü ˗a ˗gɔ kö ˗ya nu ˗ya ˈˈkwee ˗ta ˗man, ˈwo ˈˈkwee ˈˈpʋ ˗a ˗gɔ ˗an ˈdhö.
37 Kö mɛn ˗nu ˈwo bhë ˗an ˗gɔmɛn ˗yö nu ˗yö ˗kpan ˗an ˗bha kö ˗wo wo ˈˈɲaan, kö ˗an ˗bha ˗yö ˗së. A˗ ˗pö ka ˗dhɛ gagade ˈka ꞊dhɛ ˗an ˗gɔmɛn ˗dho ö ˗de baaˈˈ,* ˈö ˗yadhɛ nu yökëmɛn ˗nu ˈwo bhë ˗an ˗dhɛ ˈtaablö ˈˈdhiʋ̈, ˈö yö ꞊dede ˈö yö ˗kë ˗an ˈˈdhiʋ̈.
38 Kö ˗yö nu gbeŋ ꞊zinŋgü* ɛɛnˈˈ kö ˗yö nu ˗tɔ gɔn ˈˈwɩ ˈˈtʋ̈ŋ* ˈka, ˗ya ˗kpan ˗an ˗bha kö ˗wo ˗ya ˗sü ˈka wo ˈˈɲaan, kö ˗an ˗bha ˗yö ˗së.
39 Ka˗ ˈwɔn ˗dɔ ꞊dhɛ ˈˈtʋ̈ŋ ˈö ꞊kwaanmɛn dho nu ˗a ˈka ˗a ˗gɔ ˈkɔɔ, ˈkɔdëmɛn ˗ya ˗dɔ ˗be, yö ˈti ˗dho ö ꞊kwaa˗ ˗zü kö ˗yö ˗a ˗bha ˈkɔ ˈwü.
40 ˈDhɛ ˈö ˈˈdhʋ̈, ka ˗de ˈpö ˗ka ˗ya ka ˈˈɲaan, ˗a ˗gɛn ˗mü ꞊dhɛ ˈˈlɛlɛ ˈö ka ˗zo ˈyaa˗ ˈˈpiʋ̈ ˈyö mɛn Gbö dho nu ˗a ˈka.»
41 ˈDhɛ ˈö ˗kë ˈˈdhʋ̈, ˈyö Piɛɛ ˗ya dhɛɛˈˈ kpɔ ˈö˗ pö: «N Dëmɛn, ˈwɔnzuan ˈü˗ sü bhë, ˗yö ˗gban yi dosɛnŋ yi ˗bha ˗ee, ɛɛnˈˈ ˗yö ˗gban mɛn ꞊gban ˈˈpɛpɛ ˗bha?»
42 ˈYö Dëmɛn ˗ya pö: «ˈDe ˈö ˗tɔ yökëmɛn* ˗towotasü ˈö ꞊kpɔɔsü, ˈö˗ ˗gɔmɛn dho ˗a ˗ya ö ˗bha yökëmɛn ˗nu ꞊gban ˈˈpɛpɛ ˗gɔ ˈˈdhiʋ̈, kö ˗yö ˗bhöpë ˈö ˗an ˗bhawɔn ˈdhö˗ ˗bha ˗a nu ˗an ˗dhɛ ˗a nu ˈˈtʋ̈ŋ ˗së ˗bha ˗kplawo?
43 ˗A gwëëmi ˈö ˈˈdhʋ̈, ˗a ˗gɔmɛn ˗ya nu ˗ya ˗kpan ˗a ˗bha kö ˗ya kë ˗ni ˈgü ˈˈdhʋ̈, kö ˗a ˗bha ˗yö ˗së.
44 A˗ ˗pö ka ˗dhɛ gagade ˈka ꞊dhɛ ˗yö ˗dho ˗a ˗ya ö ˗bha ꞊nɔɔnpë ꞊gban ˈˈpɛpɛ ˗gɔ ˈˈdhiʋ̈.
45 ˈˈKɛɛ kö ˗a gwëëmi ˈö ˈˈdhʋ̈, ˗ya pö ö ˗de ˗dhɛ: ‹N ˗gɔmɛn ˈyaa nu ˗ni ˈgü ˈˈvaandhö,› kö ˗yö ˗ya ö yökëyoo gɔɔn˗ ˗nu waa˗ dhebɔ ˗nu ˈwo to ˗an ˗man ˗sü ˗bha, kö ˗yö pë ˗nu ˗bhö, ˗yö we ˗nu mü kö we ˗ya ˈkun,
46 ˗a ˗gɔmɛn ˗dho nu ˗dhɛkpaɔyi do ˈka ˈö ˗kan ˗a ˈgü ˈˈlɛlɛ ˈö˗ ˗zo ˈyaa˗ ˈˈpiʋ̈ ˗a ˈka, ˈö ˈwɔn bho ˗a ˈgü ꞊dedewo, ˈö˗ ˗zuö mɛn ˗nu ˈö ˈwaa ˗klu ˗Zlan ˗bha ˗an ˈˈpiʋ̈.
47 Gwëëmi ˈö ö ˗gɔmɛn ˗dhi ˗a ˗dhɛ ˗wɔn ˗nu dɔ ˗së ˈka, ˈˈkɛɛ ˈö yo ˈti ö ˗de baaˈˈ ɛɛnˈˈ yo ˈti pë ˈö˗ pö ˗a ˗dhɛ ˗a kë bhë, ˗a dëmɛn ˗dho ˗a ˗man ꞊va.
48 ˈˈKɛɛ mɛn ˈö yö ˈti ö ˗gɔmɛn ˗dhi ˗a ˗dhɛ ˗wɔn ˈgüman ˗së ˈka, ˈö ˈwɔn ˗nu ˈwo ꞊mɔɔn˗ ˗bha ˗wa ˗man ˗an ˗wɔn ˈgü ˗an ˗kë, ˗a ˗gɔmɛn yö ˈti ˗dho ˗a ˗man ꞊va. Mɛn ˈˈoo ˗mɛn ˈö ˈwo pë ꞊va nu ˗a ˗dhɛ, ˗wo ˗dho pë ꞊va ˗dhɛ ˗a ˗gɔ ˈpö. ˈYö mɛn ˈwo pë ꞊va ˈˈklɔɔnbho ˗a ˗bha, ˈpë ˈwo ˗dho ˗a ˗dhɛ ˗a ˗gɔ ˗yö ˗dho ʒiö ˗a ˗dhɛ ˈö˗ kë ˗ni ˈgü ˗be ˗a ˗ta.
49 «A ˗nu kö ˈa ˈˈshiʋ̈ ˗da ˈˈkpɔnŋ ꞊taa, ˈˈkɛɛ ˗ya kë ꞊dhɛ ˈˈshiʋ̈ ˗ya ˗da mü ˈsaadhö, kö ˗a ˈdhɛ ˈa˗ ˈˈpiʋ̈ ˈyaa ˈnën ˈö bhë ˗ee?
50 ˗Bɔyibhaasü do ˈbhaa ˗wɔn ˗yö ꞊kun n ˗bha. N ˗bɔ ˈˈyi ꞊bhaa ˗kɔ ˈö ˈˈdhʋ̈ yö ˈti ɲën ꞊köŋ, ˗a ˗zotadhe yö ˈti ˗dho ˈgo n ˗bha.
51 Ka ˗bha ˈgü, a ˗nu kö ˈa ˗dhikodhɛ ˗da ˈˈkpɔnŋ ꞊taa ˗ee? ˗Abin! A˗ ˗pö ka ˗dhɛ ꞊dhɛ pë ˈa nu ˗a ˈka ˈyö ˗tɔ ˗shiödhe.
52 ˗A ˗gɛn ˗mü ꞊dhɛ, ˈö sü ˈˈtʋ̈ŋ ˈö yö ˗a ˗bha, mɛn ˈˈsoodhu ˗wa kë ˈkɔdhi do ˈgü, ˗shiödhe ˗dho ˗da ˗an ꞊zinŋgü. ˗A mɛn ˗yaaga ˗dho ˗gban ˗a mɛn ꞊plɛ ˗gɔ, ˈö˗ mɛn ꞊plɛ ˗wo ˗gban ˗a mɛn ˗yaaga ˗gɔ.
53 ˗Shiödhe ˗dho ˗da ˗an ꞊zinŋgü, ˈö ˈnën dë ˗yö ˗gban ö gbö ˗gɔ, ˈö˗ ˈnën ˗de ˈpö ˈö ˗gban ö dë ˗gɔ. ˈNën dhe ˗dho ˗gban ö ˈdhu ˗gɔ, ˈö˗ ˈdhu ˗de ˈpö ˈö ˗gban ö dhe ˗gɔ. ˈNën dhe ˗dho ˗gban ö gbö ˗bha dhebɔ ˗gɔ, ˈö˗ gbö ˗bha dhebɔ ˗de ˈpö ˈö ˗gban ö ꞊gɔn dhe ˗gɔ.»
54 ˈYö go mü ˈzü ˈö˗ pö mɛn ꞊va ˈwo kun ˈmü bhë ˗an ˗dhɛ: «ˈKa ˗kpan ˈˈdhuu kpö ˗bha kö ˗yö ˗wo ˗ni ˈgü ˈɲaan˗ ˗puö ˗ʒian ˈka, ˈyö ˈka to mü ˈö ˈka˗ pö: ‹ˈˈTee ˈˈgbɩɩ˗ ˗dho ʒiö,› ˈö ˗kë ˈˈdhʋ̈ ˈpö ˗a ˗kɔ ˗bha.
55 ˈKa˗ yö ˈpö ꞊dhɛ ˈˈtee ˗yö ˈgo ˗ni ˈgü ˈˈshiaa ꞊ʒiaan, ˈyö ˈka˗ pö: ‹ˈˈShiʋ̈ ˗dho dɔ ˈgbɛ,› ˈö ˗kë ˈˈdhʋ̈ ˈpö ˗a ˗kɔ ˗bha.
56 ˈˈKpënŋ˗ ˗kë mɛn ˗gɔ ˗mɛn ˗nu, ˈka ˈˈsɛ waa dhaŋ˗ ˗an ˗ga, ka ˈwɔn ˗nu ˗bhokoo ˗kë ˗an ˗bha. ˈˈKɛɛ ˈmën ˗kë ˈsa ˈö ˈwɔn ˗nu ˈwo kë ˗ni ˈgü ꞊dɛɛ, wo ˗zë ˈkaa ˗an ˗bhokoo dɔ?
57 ˈMën ˗kë ˈsa ˈö ka ꞊dede ˈkaa ˈwɔn ˈö kpɛnŋdhö ˗a ˗bhokoo kë ka ˗de ˗dhɛ?
58 ˗A ˈwɔnzuan ˈnën ˗tɔ, ˈwɔn ˗ya ˗da kaa mɛn ˈbhaa ka ꞊zinŋgü, ˈö ˈdho ˗ni ˈgü ü ˈka ˗gɔmɛn ˈbhaa ˗kuu ˈˈdhiʋ̈, ˗bhö pë ˈˈpɛpɛ kë kö ˈwɔn bhë ˈka˗ baaˈˈ ka ˈko ꞊zinŋgü ʒiaan ˗ta. Ü ˈti˗ kë ˈˈdhʋ̈, ˗yö ꞊mɔɔn˗ ˗bha ˈö ü ˗wɔn ˗da zakanmɛn ˗dhɛ, ˈö zakanmɛn ˗yö ü nu ˈˈsɔdha ˗dhɛ, ˈö ˈˈsɔdha ˗yö ü ˗da ˗kaso ˈgü.
59 A˗ ˗pö ü ˗dhɛ ꞊dhɛ ü ˗dho ˈto ˗kaso ˈö bhë ˗a ˈgü ˈö to˗ ˈka ˈˈdhʋ̈ ˈü ˗an ˗bha ˈwëëga ꞊gban bho ˈpapadhö.»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «Asariɔn ꞊plɛ.» ˗A ˈˈtʋ̈ŋ ˈö bhë ˗a ˈgü Asariɔn do ˈnën ˈö ˗tɔ yö ˈö mɛn ˗ya ˗kë minitö ˗kɔŋ ˗yiishiö ˈö ga ˈˈsoodhu ˈˈpiʋ̈ ˗a ꞊saa.
^ ˗Yö ꞊mɔɔn˗ ˗bha ˈö ˗kë, «˗yakwëë ˗kë ˗a ˈgü ˗kɔ ˗nu ˈgü» ˈka.
^ Glɛkö ˗wo ˈgü ˈyö ˗tɔ «ka ˈˈɲan ˗yö to ˈˈpʋ ˗sü ˈka ˗kplawo.»
^ Ɛɛnˈˈ «ka ˈniin˗.»
^ Ɛɛnˈˈ «ˈˈfleemɛn ˗nu.»
^ Glɛkö ˗wo ˈgü ˈyö ˗tɔ «wü kwi ˈˈpɛn ˗yö kë sɔ ˗ta ka vɛɛdhö.»
^ Ɛɛnˈˈ «˗yö ˗dho pë ˗klu ö ˗bha sɔ ˗ta ö vɛɛdhö.»
^ Glɛkö ˗wo ˈgü ˈyö ˗tɔ «ˈˈlɛlɛ ꞊plɛ ˗bha ˗naan.» Yesu ˗bha ˈˈtʋ̈ŋ ˈgü, ꞊waa˗ pö ˈˈdhʋ̈ kö ˗wo ˗we ˈˈtʋ̈ŋ ˈö go ˈˈlɛlɛ ˈˈseishiö ꞊tɛɛ˗ ˗bha ˈˈdooka ˈö yö ˗a ˈka gbeŋ ꞊zinŋgü ˗bha ˗a ˈka.
^ Glɛkö ˗wo ˈgü ˈyö ˗tɔ «ˈˈlɛlɛ ˗yaaga ˗naan.» Yesu ˗bha ˈˈtʋ̈ŋ ˈgü, ꞊waa˗ pö ˈˈdhʋ̈ kö ˗wo ˗we ˈˈtʋ̈ŋ ˈö go gbeŋ ꞊zinŋgü ˗bha ˈö yö ˗a ˈka ˈˈlɛlɛ ˗yaaga ˗bha ˗naan ˗bha dhiapiʋ̈ ˗a ˈka.
^ Ɛɛnˈˈ «mɛn ˈö ˈkɔɔ ˗yö ˗nu ˗wɔn yö ˗a ˗bha.»
