Nɔɔn˗ ˗së ˈsëëdhɛ ˈö Lukö ˗ya ˗bɛnzë 13:1-35
-
‹Ka ˈti ˈgo ka ˗bha ꞊sɔŋ yaa ˗nu ˈgü kö ˈka ka zuʋ̈ˈˈ slëëˈˈ, ka ˈgü ˗dho shiʋ̈ˈˈ› (1-5)
-
ˈWɔnzuan ˈö ˗gban figö ˗dhü ˈö ˈyaa bha ˗a ˗bha (6-9)
-
Dhebɔnën do ˈö kun klʋŋˈˈ ˗sü ˈka, Yesu ˗ya ˗dhɛ ˗bo ꞊Glooyi ˈka (10-17)
-
ˈWɔnzuan ˈö ˗gban mutaadö ga waa ˈˈsɛkɛ ˗an ˗bha (18-21)
-
«˗Ka ka ˈgü dɔ ˈˈgbɩɩ˗ kö ˈka bɔ ˈˈkwee ˈˈdhi ˈö ˈˈsɔɔsɔ bhë ˗a ˈka» (22-30)
-
Edhɔdö ˗yö «꞊dhɛ diɔŋ ˈdhö» (31-33)
-
Yesu ˗yö ˈˈgbʋ ˗bɔ Zedhizadhɛmö ˗dhɛ ˗wɔn ˈgü (34, 35)
13 ˗A ˈˈtʋ̈ŋ ˈö bhë ˗a ˈgü, mɛn ˗nu ˈwo kun ˈmü bhë ˗a mɛn ˈbhaa ˗nu ˗wo Galile ˗mɛn ˗nu ˈö Pidhatö ˗yö ˗an ꞊ɲɔɔn ꞊kaan ˗an ˗de ˗bha ˈˈsaapë ꞊ɲɔɔn ˈka bhë, ˗an ˗wɔn ˗blɛɛ Yesu ˗dhɛ.
2 ˈYö Yesu ˗ya pö ˗an ˗dhɛ: «Ka ˗bha ˈgü Galile ˗mɛn ˗nu ˈö ˈwo ˗an zë ˈˈdhʋ̈ bhë, kë ˈnën ˈwo˗ wo ˈwɔnyaakëmɛn ꞊gbɔɔnsü ˗nu ˈka ˈwo ˗ʒiö ˗a ˈka Galile ˗mɛn ˈˈwɛɛ ˗nu ˈwo to ˗an ˗ta ˗ee?
3 ˗Abin toŋtoŋdhö! ˈˈKɛɛ ka ˈti ˈgo ka ˗bha ꞊sɔŋ yaa ˗nu ˈgü kö ˈka ka zuʋ̈ˈˈ slëëˈˈ, ka ˈˈpɛpɛ ka ˈgü ˗dho shiʋ̈ˈˈ ˈpö ꞊dhɛ ˗kɔ ˈö bhë ˗a ˈdhö.
4 Ɛɛnˈˈ ˈzü ka ˗bha ˈgü mɛn ˗kɔŋ do ö ga ˈˈsaaga (18) ˈö Siloe ˈkɔ ˈˈbhaŋ ˗yö ˗lo ˗an ˗ta ˈö ˗an zë bhë, wo ˈnën ˈwo ˗tɔ ˈwɔnyaakëmɛn ꞊gbɔɔnsü ˗nu ˈwo ˗ʒiö ˗a ˈka Zedhizadhɛmö ˗mɛn ˈˈwɛɛ ˗nu ˈwo to ˗an ˗ta ˗ee?
5 ˗Abin toŋtoŋdhö! ˈˈKɛɛ ka ˈti ˈgo ka ˗bha ꞊sɔŋ yaa ˗nu ˈgü kö ˈka ka zuʋ̈ˈˈ slëëˈˈ, ka ˈˈpɛpɛ ka ˈgü ˗dho shiʋ̈ˈˈ ˈpö ꞊dhɛ ˗kɔ do ˈö bhë ˗a ˈdhö.»
6 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö ˈwɔnzuan ˈö yö ˗a ˗zɔn ˈö˗ pö: «Figö ˗dhü do ˗yö ˗kun gɔndënën do ˈbhaa ˗bha ˗drɔɔn ˗bhla ˈgü, ˈyö nu ˗a bhɛ mɛɛnˈˈ kö ˈö˗ bho, ˈˈkɛɛ yö ˈti ˗kpan ˗a bhɛ ˗bha ˗a ꞊troo.
7 ˈDhɛ ˈö ˗kë ˈˈdhʋ̈, ˈyö˗ pö ö ˗bha ˗drɔɔn ˗bhla ˗yökëmɛn ˗dhɛ: ‹˗A ˗kwɛ ˗ya kë ˗yaaga ꞊dɛɛ ˈö ˈa figö ˗dhü ˈö yö ˗a bhɛ mɛɛnˈˈ ˗ni ˈgü, ˈˈkɛɛ n ˈti˗ bhɛ yö do toŋtoŋdhö. ˗A bɔ! ˗Yö ˗dho dɔ ˗dhɛ ˈö bhë ˗a ˈgü ˈˈdhʋ̈ ˈˈwɛɛwɛ ˗kplawo ˗mën ˗wɔn ˈgü?›
8 ˈYö˗ ˗bha yökëmɛn ˗ya pö ˗a ˗dhɛ: ‹˗Gɔmɛn, ˗bhö ˗kwɛ do nu ˗a ˗dhɛ ˈzü kö ˈa ˈˈsɛ ˈpɔn ˗a ˗gɛn ˈˈpiʋ̈, ˈa tapë ˗nu dhipë ˗lo mü.
9 ˈKwa˗ kë ˈˈdhʋ̈ ˗ya ö bhɛ ˗ya kö ˗ya kë ˗së. Yö ˈti ö bhɛ ˗ya kö ˈü˗ bɔ.›»
10 ꞊Glooyi do ˈbhaa ˈka, Yesu ˗kun mɛn ˗nu ꞊klaŋ kë ˗ni ˈgü ˗yakwëë ˗kë ˗a ˈgü ˗kɔ ˈgü.
11 ˈDhɛ ˈö bhë ˗a ˈgü, dhebɔnën do ˈbhaa ˈö ˗zuu yaa ˗yö ˈˈyua ˗ya ˗a ˗bha, ˈö ˗ya ˗kwɛ ˗kɔŋ do ö ga ˈˈsaaga (18) kë ˗a ˈgü, ˗yö ˗kë mü. ˗A dhebɔnën ˗kun klʋŋˈˈ ˗sü ˈka, ˈö ˈyaa kun ˗mɔn ˗ni ˈgü ˗a ˗bha toŋtoŋdhö kö ˗yö ö bhɛ ˈgü ˈˈpʋ.*
12 ˈDhɛ ˈö Yesu ˗yö ˗kpan ˗a ˗bha, ˈyö˗ pö ˗a ˗dhɛ: «Dhebɔnën, ü ˗bha ˈˈyua ˗ya bo.»
13 ˈDhɛ ˈö˗ pö ˈˈdhʋ̈ ˈyö ö ˗kɔ ˗ya ˗a ˗ta, ˈyö˗ dhebɔnën ˗yö to ˈˈshia˗ mü ˈö ö bhɛ ˈgü ˗pʋ ˈö dɔ ö ˗gɛn ˗ta ˗së ˈka, ˈö ˗ya ˗Zlan ˈtɔ bhɔ ˗sü ˗bha.
14 ˈDhɛ ˈö ˗kë ˈˈdhʋ̈, ˈyö mɛn ˗dhɛ bo ˈö Yesu ˗ya wo ꞊Glooyi ˈka bhë, ˗a ˈwɔn ˗yö ˗shiö ˗yakwëë ˗kë ˗a ˈgü ˗kɔ ˈö bhë ˗a ˈwɔnyëë˗ ˗dhɛ. ˈYö˗ pö mɛn ꞊va ˈwo kun ˈmü bhë ˗an ˗dhɛ: «Yö kë ˗dhɛkpaɔyi ˗yö ˈˈsɔɔdo, ˗ka nu ˗dhɛkpaɔyi ˗nu ˈwo bhë ˗an ˈka kö ˗wo ka ˗dhɛ bo, ˈkaa ˗dho nu ꞊Glooyi ˈka.»
15 ˈˈKɛɛ ˈyö Dëmɛn Yesu ˗ya pö ˗a ˗dhɛ: «ˈˈKpënŋ˗ ˗kë mɛn ˗gɔ ˗mɛn ˗nu! Mɛn ˈö ˈka ˗lo bhë ˗a de ˈö ˈkwa dɔ ꞊Glooyi ˈka ˈö ˈyaa bhuʋ̈ˈˈ bho ö ˗bha ˗du ˗nu ɛɛnˈˈ ö ˗bha ꞊soo ˗nu ˗bha, ˈö ˈyaa ˈdho ˗an ˈka kö ˗wo ˈˈyi ˈnën ˈbhaa mü?
16 Dhebɔnën ˈö ˗kë Ablaamö ˈdhu* ˈka, ˈö Sɔtraan ˗ya ˗klu ˈö ˗ya ˗kwɛ ˗kɔŋ do ö ga ˈˈsaaga (18) kë ˗a ˈgü bhë, ˗a ˗dhɛ ˈyaa˗ ˗bha kö ˗wa ˈˈpʋ ꞊Glooyi ˈka ˗ee?»
17 ˈDhɛ ˈö Yesu ˗ya pö ˈˈdhʋ̈, ˈyö mɛn ˈˈpɛpɛ ˈwo kun ˗gban ˗ni ˈgü ˗a ˗gɔ bhë ˈö ˈlëë˗ ˗yö ˗an kun. ˈˈKɛɛ mɛn ˈdhɛ ˈwo to, wo ˗zë ˗an zuʋ̈ˈˈ ꞊nii ˗kun ˗da ˗sü ˈka ˈwɔn ˈˈmlünmlünsü ˈˈpɛpɛ ˈö ˗an ˗kë bhë ˗an ˗wɔn ˈgü.
18 ˈDhɛ ˈö ˗kë ˈˈdhʋ̈ ˈyö˗ pö: «˗Zlan ˗bha ˗Gblüdëdhɛ ˗yö ˗bhɔ ˗mën ˗bha? ˈMën ˈa ꞊mɔɔn˗ ˗bha ˈa˗ ˗zɔn ˗a ˈka?
19 ˗Yö ꞊dhɛ mutaadö ga ˈö gɔndënën do ˗ya sü ˈö˗ ta ö ˗gɔ ˈˈtʋʋdhɛɛdhö ˗a ˈdhö. ˗Yö ˗gla ˈö ˗kë ˈˈdhü ˈka, ˈö ˗mannën ˗nu ˗wo nu ˈwo wo ˈkɔ dɔ ˗a kwɛɛˈˈ ˗nu ˗ta.»
20 ˈYö Yesu ˗ya pö ˈzü: «ˈMën ˈa ꞊mɔɔn˗ ˗bha ˈa ˗Zlan ˗bha ˗Gblüdëdhɛ ˗zɔn ˗a ˈka?
21 ˗Yö ꞊dhɛ ˈˈsɛkɛ ˈö dhebɔnën do ˗ya ˗da ˈbluu˗ ˗bi ˈˈkɩdhʋŋ ˗kɔŋ do ˈˈpiʋ̈ ˈö˗ ꞊kaankwöö, ˈö˗ ˗böö ˗yö ˗da ˗a ˈdhö.»
22 ˈDhɛ ˈö Yesu ˗yö kun ˈdho ˗ni ˈgü Zedhizadhɛmö, ˗yö ˗bɔ ˈˈkwipö waa ˈpödhɛ ˗nu ˗bhüöö ˈˈpiʋ̈ mɛn ˗nu ꞊klaŋ kë ˗sü ˈka.
23 ˈYö gɔndënën do ˗ya pö ˗a ˗dhɛ: «Dëmɛn, ˗yö ˈˈdhʋ̈ ꞊dedewo ꞊dhɛ mɛn ˗nu ˈwo ˗dho dha ˈwaa ꞊va ˗ee?» ˈYö Yesu ˗ya ˗yɔ bɔ ˈö˗ pö ˗an ˗dhɛ:
24 «˗Ka ka ˈgü dɔ ˈˈgbɩɩ˗ kö ˈka bɔ ˈˈkwee ˈˈdhi ˈö ˈˈsɔɔsɔ bhë ˗a ˈka. ˈYö ˗tɔ a˗ ˗pö ka ˗dhɛ ꞊dhɛ mɛn ꞊vadhɛ ˗dho ˗a ˈˈslö mɛɛnˈˈ kö ˈwo bɔ ˗a ˈka, ˈˈkɛɛ ˗an ˗kɔ yö ˈti ˗dho ˗mɔn ˗a ˗bha.
25 ˈKɔ dëmɛn ˗ya luuˈˈ ˗ya ö bo ˈˈkwee ta ˗sü ˈka, ka ˗dho ˈto ˈˈkpɛnŋdhö ˈö ˈka ˈˈkwee ˗ta ˗man ˈö ˈka˗ pö: ‹Yi Dëmɛn, ˗bhö ˈˈkwee ˈˈpʋ yi ˗gɔ.› ˈˈKɛɛ ˗yö ˗dho ˗a ˗yɔ bɔ ka ˗gɔ ˈö˗ pö: ‹ˈMaan ka ˈgodhɛ dɔ.›
26 ꞊Yaa˗ pö ˈˈdhʋ̈ ka ˗dho ˗a pö ˗a ˗dhɛ: ‹Kwaa˗ ˗nu kwa pë ˗nu ˗bhö, ˈö ˈkwa müpë ˗nu mü kwa ˈkwëë˗, ˈö ˈü mɛn ˗nu ꞊klaŋ ˗kë ˗kpinŋ ˈˈpiʋ̈ ˗dhɛ ˗nu ˗bha yi ˗gɔ ˈplöö.›
27 ˈˈKɛɛ ˗yö ˗dho ˗a ˗yɔ bɔ ka ˗gɔ ˈö˗ pö: ‹ˈMaan ka ˈgodhɛ dɔ, ˗ka bhɔ n ˗dhɛ ꞊taa, ˈwɔnyaakëmɛn ˗nu!›
28 ˈKa ˗kpan Ablaamö, Izaakö, Zakɔbö waa ˗Zlan ˗wodhiʋ̈lomɛn ˗nu ˈˈpɛpɛ ˗an ˗bha ˗Zlan ˗bha ˗Gblüdëdhɛ ˈgü, ˈˈkɛɛ kö ka ˗zë ˗wa ka ˗zuö ˈˈkpɛnŋ, ka ˗dho ˈˈgbʋ bɔ ˈö ˈka ka ˈˈsɔn ˗bhö ˗a ˈka ˈˈkpɛnŋdhö mü.
29 ˗Ya ˈgo mü ˈzü, mɛn ˗nu ˗dho ˈgo ˈɲaan˗ ˗wo ˗ʒian waa ˈɲaan˗ ˗puö ˗ʒian ˈka, ˈö ˈwo go ˈˈdhuŋ ꞊ʒiaan ˗dhɛ waa ˈˈshiaŋ ꞊ʒiaan ˗dhɛ ˗an ˗bha ˈö ˈwo ˗ya ˈtaablö do ˈˈdhiʋ̈ ˗Zlan ˗bha ˗Gblüdëdhɛ ˈgü.
30 ˗Yö kë ka ˈˈɲaan ꞊dhɛ mɛn ˗nu ˈwo ꞊taabha ˗a mɛn ˈbhaa ˗nu ˗dho kë mɛn ˗blɛɛsü ˗nu ˈka, ˈö mɛn ˗nu ˈwo mɛn ˗blɛɛsü ˗nu ˈka ˗a mɛn ˈbhaa ˗nu ˗wo to ꞊taabha.»
31 ˈˈTʋ̈ŋ ˈö bhë ˗a ˈgü, ˈyö Fadhiziɛn ˈbhaa ˗nu ˗wo nu ˈwo˗ pö ˗a ˗dhɛ: «˗Bhö ʒiö ˈü ˈgo yö, ˗a ˗gɛn ˗mü ꞊dhɛ Edhɔdö ˗ya ˈˈpiʋ̈ ˈö ü zë.»
32 ˈYö Yesu ˗ya pö ˗an ˗dhɛ: «˗Ka ˈdho ˈka˗ pö ˈˈkpënŋ˗ ˗kë mɛn ˗gɔ ˗mɛn ˈö ꞊dhɛ diɔŋ* ˈdhö bhë ˗a ˗dhɛ: ‹A ˗dho ˗zuu yaa bho mɛn ˗nu ˈgü, ˈa mɛn ˗nu ˗dhɛ bo ꞊dɛɛ waa dhiʋ̈ˈˈ ˗an ˈka. ˈÖ go ˈyö ˈö yö dhiʋ̈ˈˈ ꞊taabha* ˗bha kö ˈman n bo.›
33 ˈˈKɛɛ ˈkö ˗kë ˈˈdhʋ̈, n dua ˗mü kö ˈa ˈdho n ˗man ˈˈta ˈka ˈˈdhiʋ̈ ꞊dɛɛ, dhiʋ̈ˈˈ waa dhiʋ̈ˈˈ ꞊taabha. ˗A ˗gɛn ˗mü ꞊dhɛ ˗a ˗dhɛ ˈyaa˗ ˗bha kö ˗wo ˗Zlan ˗wodhiʋ̈lomɛn zë ˗dhɛ ˈˈwɛɛ ˈgü kö yö ˈti kë Zedhizadhɛmö ˗dhɛ ˈka.
34 Zedhizadhɛmö ˗mɛn ˗nu, Zedhizadhɛmö ˗mɛn ˗nu, ˗Zlan ˗wodhiʋ̈lomɛn ˗nu zë ˗mɛn ˗nu waa mɛn ˗nu ˈö ˗Zlan ˗yö ˗an bɔ ˗an ˗zuö ˗gwö ˈka ˗mɛn ˗nu! A˗ ˈˈslö ˗mɛɛn ˈko ˗ta ꞊va kö ˈa ka ˗lo ˈkwëëdhö ꞊dhɛ ˗kɔ ˈö ˗tɔ ꞊dhee ˗yö ö ˗bha ˈnën ˗nu ˗lo ˗a ˈka ö gban ꞊löö bhë ˗a ˈdhö. ˈˈKɛɛ ka ˈti ˈˈwɩ ˗a ˗bha.
35 ˈDhɛ ˈö ˈˈdhʋ̈, ˗Zlan ˗dho ka ˗bha ˈkɔ ˈto ka ˗gɔ. A˗ ˗pö ka ˗dhɛ ꞊dhɛ ˈö sü ꞊dɛɛ ˗bha, ka ˈti ˗dho ˗kpan n ˗bha ˈzü ˈö to ˗a ˈka ˈˈdhʋ̈ ˈö yö ˗a ˈka ˈˈtʋ̈ŋ ˈö ˈka dho ˗a pö ˗a ˈka: ‹ˈDhuëë˗ ˗yö ˈkpɔ mɛn ˈö nu Zoova ˈtɔ ˈgü ˗a ˗bha› bhë ˗a ˗bha.»
-Zoto -a ˈˈpiʋ̈ -wɔn -nu
^ Ɛɛnˈˈ «kö ˗yö dɔ ö ˗gɛn ˗ta ˗së ˈka.»
^ Ɛɛnˈˈ «꞊suugünën.»
^ Izraɛdhö ˈˈsɛ ˈgü ꞊kwɛŋzü, ˗wo diɔŋ ˗yö ꞊dhɛ wü ˈö ˈˈkpënŋsü ˗a ˈdhö.
^ Glɛkö ˗wo ˈgü ˈyö ˗tɔ «˗dhɛkpaɔyi ˗yaaga ˗bha ˗naan ˈka.»
