Nɔɔn˗ ˗së ˈsëëdhɛ ˈö Lukö ˗ya ˗bɛnzë 15:1-32
15 ˗A ˈˈtʋ̈ŋ ˈö bhë ˗a ˈgü, ˈniinsɔnŋkunmɛn ˗nu waa ˈwɔnyaakëmɛn ˗nu ꞊gban ˈˈpɛpɛ ˗wo ˗kun ˈdho ˗ni ˈgü wo ˈkwëëdhö ˈö ˈwo wo ˈˈtʋ to Yesu ˗bha.
2 ˗A ˗wɔn ˈgü Fadhiziɛn ˗nu waa ˈtɔŋ˗ ˗gɔmɛn ˗nu ˗wo ˗kun ˈwɔn blɛɛˈˈ ˗ni ˈgü Yesu ˈka wo ˗wo ꞊löö ˈö ˈwo˗ pö: «Gɔndënën ˈö yö waa ˈwɔnyaakëmɛn ˗nu ˈnën ˈwo wo ˈko ꞊bhaa, ˈö ˈwo ˗bhöpë ˗nu ˗bhö wo ˈko ˈˈpiʋ̈.»
3 ˗Dhɛ ˈö ˗kë ˈˈdhʋ̈ ˈyö Yesu ˗yö ˈwɔnzuan do sü ˈö˗ pö ˗an ˗dhɛ:
4 «Mɛn ˈö ˈka ˗lo bhë, de ˈö ˈˈbhlaa këŋ do (100) ˗ya kë ˗a ˗gɔ ˈö˗ do ˗ya ꞊dhiɔŋ, ˈö yo ˈti ˗dho ˗a ˗kɔŋ ˈˈseishiö ˈö ga ˈˈseishiö (99) ˈwo to ˗an ˈto pë ˗bhö ˗dhɛ ˈgü ˈkpaa˗ ˗ta mü kö ˗a do ˈö ꞊dhiɔŋ bhë ˗ya mɛɛnˈˈ ˗yö ˈdho ˗ya ꞊slɔɔ ˗a ˈka?
5 ꞊Yaa˗ ꞊slɔɔ, ˗a zuʋ̈ˈˈ ꞊nii ˗yö ˗da ˈö˗ sü ˈö˗ ˗wɔ ö gban ˗ta.
6 ˈYö ˗ya ˈdho ˗ya ˗lo ˈˈkwɛnŋdhö, ˈö ö ˈˈtɔŋdë ˗nu waa ö ˗yayoo ˗nu ˗an ˗dhɛ ˈö˗ pö ˗an ˗dhɛ: ‹˗Ka nu ˈkwa zuʋ̈gblüdhi kë, ˗a ˗gɛn ˗mü ꞊dhɛ n ˗man ˈˈbhlaa ˈö ꞊dhiɔŋ bhë, ˈman- ꞊slɔɔ.›
7 A˗ ˗pö ka ˗dhɛ ꞊dhɛ ˗kɔ do ˈö bhë ˗a ˈka, ˈwɔnyaakëmɛn dosɛnŋ ˗ya ˈgo ö ˗bha ꞊sɔŋ yaa ˈgü, ˗ya ö zuʋ̈ˈˈ slëëˈˈ, ˗a zuʋ̈gblüdhi ˗dho kë dhaŋ˗ ˈgü ˈgbɛ ˈö ˗ʒiö ˗a ˈka mɛn kpɛnŋdhö ˗kɔŋ ˈˈseishiö ˈö ga ˈˈseishiö (99) ˈö ˗an ˗bhawɔn ˈyaa wo zuʋ̈ˈˈ slëëˈˈ ˗sü ˗bha ˗an ˗wɔn zuʋ̈gblüdhi ˗ta.
8 «Ɛɛnˈˈ ˈzü dhebɔ ˗mɛɛn ˈö drakümö ˈˈtamanga ˗kɔŋ do ˗ya kë ˗a ˗gɔ ˈö˗ dosɛnŋ ˗ya ꞊dhiɔŋ, ˈö yö ˈti ˗dho ꞊laŋba dɔ, ˈö ö ˗bha ˈkɔɔdhɛ ˗gwö, kö ˗a ˗dhɛ ˈö ꞊dhiɔŋ bhë ˗ya mɛɛnˈˈ ˗së ˈka kö ˗yö ˈdho ˗ya ꞊slɔɔ ˗a ˈka?
9 ꞊Yaa˗ ꞊slɔɔ, ˗yö ö ˈˈtɔŋdhe ˗nu waa ö ˗yayoo ˗nu ˗an ˗dhɛ ˈö˗ pö ˗an ˗dhɛ: ‹˗Ka nu ˈkwa zuʋ̈gblüdhi kë, ˗a ˗gɛn ˗mü ꞊dhɛ n ˗man drakümö ˈˈtamanga ˈö ꞊dhiɔŋ bhë, ˈman ˗kpan ˗a ˗bha.›
10 ˗Kɔ do ˈö bhë ˗a ˈka, a˗ ˗pö ka ˗dhɛ ꞊dhɛ ˈwɔnyaakëmɛn dosɛnŋ ˗ya ˈgo ö ˗bha ꞊sɔŋ yaa ˈgü, ˗ya ö zuʋ̈ˈˈ slëëˈˈ, ˗Zlan ˗bha ˈˈkiö ˗nu zuʋ̈ˈˈ ˈˈgblü ˗yö ˗dhi.»
11 ˈYö go mü ˈzü ˈö˗ pö: «Gɔndënën do ˈbhaa gbö ˗nu ˗wo ˗kun ꞊plɛ.
12 ˈYö˗ mɛn ˈˈtɩɩsü ˗ya pö ö Dë ˗dhɛ: ‹N dë, ˈkɛnŋpë ˈü ˗dho ˗a ˈto yi ˗gɔ bhë, ˗a ˗gblü ˈü n ˗man nu.› ˈYö˗ dë ˗yö pë ˗nu ˈwo˗ ˗gɔ ˗a ˗gblü ˗an ˈka.
13 ˈDhɛ ˈö ˗kë ˈˈdhʋ̈ ˈö ˗dhɛkpaɔyi ˈnën ˈbhaa ˗yö ˗ʒiö, ˈyö pë ˗nu ˈwo˗ ˗gblü ˗an ˈka bhë, ˗a mɛn ˈˈtɩɩsü ˗yö ö ˗bha ꞊gban sü ˈö dho ˗a ˈka ˈˈsɛ do ˈbhaa ˈö mü ꞊gblɛɛn ˗a ˈgü. ˈDhɛ ˈö ˗lo mü, ˈyö ˗ya ˈnëngɔnnëndhɛ kë ˗sü ˗bha, ˈö ö ˗bha ꞊nɔɔn ꞊gban ˈgü ꞊shiʋ̈.
14 ˈDhɛ ˈö ö bo ö ˗bha pë ꞊gban ˈgü shiʋ̈ˈˈ ˗sü ˈka, ˈyö din˗ ˈkpii˗ do ˗yö ˗da ˈˈsɛ ˈö bhë ˗a ˈgü, ˈyö saanˈˈ ˗yö yö ˗a ˗bha.
15 ˗Yö ˗dho ˗ʒiaanwo ˈö yö ˈˈsɛ ˈö bhë ˗a ˈgümɛn do ˗bha kö ˗yö ö gba yö ˈka. ˈYö mɛn ˈö bhë ˈö˗ bɔ ö ˗bha ˈbhladhɛ ˗nu ˈgü kö ˗yö ö ˗bha ˗bhɔ ˗nu ˗maankë.
16 ˗Yö ˗kun ˗a ˈˈpiʋ̈ ꞊dhɛ ˈˈdhü bhɛ* ˈö ˗bhɔ ˗nu kun ˗a ˗bhö ˗ni ˈgü bhë ˈö ˗an ˗bhö. ˈˈKɛɛ mɛn ˈˈwɛɛ ˈbha ˈyaa kun pë ˈbhaa nu ˗ni ˈgü ˗a ˗dhɛ.
17 «ˈDhɛ ˈö ˗ya ö ˗zota ˗sü ˗bha ˗së ˈka, ˈyö˗ pö ö ˗de ˗dhɛ: ‹Mɛn ˈˈpɛpɛ ˈö n dë ˗yö ˗an sü kö ˗wo yökë ˗a ˗bha ˈka, ˗bhöpë ꞊va ˗yö ˗an ˗gɔ, ˈˈkɛɛ ˈyö man ˗zë ˈa ˗dho ga din˗ ꞊kwaa ˗dhɛ ˈö yö ˗a ˈgü yö!
18 A ˗dho n ꞊yɛɛ kë ˈa dho n dë ˈˈpiʋ̈ ˈa˗ pö ˗a ˗dhɛ: «N dë, ˈman ˈwɔn yaa kë ˗Zlan ˈö dhaŋ˗ ˈgü ˗a ˈka, ˈman˗ kë ˈpö ü ˈka.
19 ˗A ˗dhɛ ˈyaa˗ ˗bha ˈzüdho kö ˗wo n ˗dhɛ ü gbö, ˈˈkɛɛ ˗bhö n ˈsü kö ˈa yökë ü ˗dhɛ ꞊dhɛ ü ˗bha yökëmɛn ˈˈwɛɛ ˗nu ˈwo to ˗an ˈdhö.»›
20 ˈDhɛ ˈö ˗kë ˈˈdhʋ̈, ˈyö ꞊luu ˈö ˗da ʒiaan˗ ˈö dho ö dë ˈˈpiʋ̈. ˈDhɛ ˈö˗ dë ˗ya to mü ꞊gblɛɛn ˈö ˗kpan ˗a ˗bha, ˈyö˗ ˗wëë ˗ya ˗kë ꞊dedewo, ˈyö ˗bialö ö dho ˗a ˗gɔ ʒiaan˗, ˈö wü ˗a ˗bha, ˈö˗ ˈˈkpɛnŋ mü.
21 ˈYö˗ gbö ˗ya pö ˗a ˗dhɛ: ‹N dë, ˈman ˈwɔn yaa kë ˗Zlan ˈö dhaŋ˗ ˈgü ˗a ˈka, ˈman˗ kë ˈpö ü ˈka. ˗A ˗dhɛ ˈyaa˗ ˗bha ˈzüdho kö ˗wo n ˗dhɛ ü gbö.›
22 ˈˈKɛɛ ˈdhɛ ˈö˗ pö ˈˈdhʋ̈, ˈyö˗ dë ˗ya pö ö ˗bha ꞊dhuëŋ ˗nu ˗dhɛ: ‹˗Ka ˈdho ˈˈvaandhö ˈka nu sɔ* do ˈö ˗së ꞊dedewo ˈö ˗ʒiö ˗a ˈka mü ˗a ˈka, kö ˈka˗ ˗da ˗a ˗bha. ˗Ka ˗vaaga* do yö ˗a ˗kɔnënga ˗bha ˈpö, kö ˈka ˗sabha ˗nu yö ˗a ˗gɛn ˗bha.
23 ˗Ka ˈdho ˈka nu ˗dunën ˗gbɔŋ ˈö˗ ˈˈɲɔn ˗ya kë bhë ˗a ˈka kö ˈka˗ zë, kö ˈkwa pë ˗bhö, kö ˈkwa ˈwlaan˗ kë.
24 ˗A ˗gɛn ˗mü ꞊dhɛ n gbö ˈö yö, ˗yö ˗kun ꞊dhɛ mɛn ˈö ˗ya ga ˗a ˈdhö, ˈˈkɛɛ ˈyö ˗ya ˈgo ga ˈgü bhë. ˗Ya ꞊dhiɔŋ ˗be ˈsaadhö, ˈyö ˈman˗ yö ˈzü bhë.› ˈDhɛ ˈö ˗kë ˈˈdhʋ̈, ˈyö ˈwo ˗ya ˈwlaan˗ kë ˗sü ˗bha.
25 «˗A ˈˈtʋ̈ŋ ˈö bhë ˗a ˈgü, kö gɔndënën ˈö bhë ˗a gbö ˈkpiisü ˗ya ˈdho ˈbhlaa. ˈDhɛ ˈö ˈgo ˗ni ˈgü ˈbhlaa, ˈö ꞊ɲɔɔn ˗ni ˈgü ˈˈkwɛnŋdhɛ ˈˈsuee, ˈyö mɛn ˗nu ˈˈtan bho ˗wo ˗nu waa ˈˈtan kë ˗vin ˗nu man ˈˈkwɛnŋdhö.
26 ˈDhɛ ˈö ˗kë ˈˈdhʋ̈, ˈyö yökëmɛn do ˗dhɛ ˈö˗ dhɛɛˈˈ kpɔ kö pë ˈö kë ˗ni ˈgü ˈˈkwɛnŋdhö bhë ˗ya pö ö ˗dhɛ.
27 ˈYö yökëmɛn ˈö bhë ˈö˗ pö ˗a ˗dhɛ: ‹Ü ˈzlaa˗ ˗ya ö ꞊yɛɛ kë ˗ya nu. Nu ˈö˗ wo kö ˗yö ö ˈflëëgü* ˈö ü dë ˗ya yö bhë, ˈyö ˗dunën ˗gbɔŋ ˈö˗ ˈˈɲɔn ˗ya kë bhë, ˗a zë ˗a ˗dhɛ.›
28 ˈDhɛ ˈö˗ pö ˈˈdhʋ̈, ˈyö ˈwɔn ˗yö ˗shiö ˗a mɛn ˈkpiisü ˈö bhë ˗a ˗dhɛ, ˈö yö ˈti ˈˈwɩ ˗a ˗bha kö ˈö ˗da ˈˈkwɛnŋdhö. ˈˈKɛɛ ˈyö˗ dë ˗yö nu ˈö ˗ya bhɛɛˈˈ ˗sü ˗bha ˗a ˗dhɛ kö ˗yö nu ˈˈkwɛnŋdhö.
29 ˈYö˗ gbö ˗ya pö ˗a ˗dhɛ: ‹Ü˗ ˈwɔn ˗dɔ ꞊dhɛ ˗a yökë ü ˗dhɛ ꞊dhɛ ü ˗bha ꞊dhuëŋ ˈdhö ˗kwɛ ꞊va ˈˈpiʋ̈, ˈö pë ˈˈoo ˗pë ˈü˗ pö n ˗dhɛ, ˗a dosɛnŋ ˈa ˗dho ˗kɔ ˗a kë ˗sü ˈka ˈyaa ˈdhö. ˈˈKɛɛ ˗bhonën dosɛnŋ ˈü ˗dho ˗a nu n ˗dhɛ ˗ʒiaanwo kö yaa n ˈˈtɛɛbɔ ˗nu ˈyi˗ ˗bhö yi ˈkwëë˗ ˈyaa ˈdhö.
30 ˈDhɛ ü gbö ˈö yö ˗zë ˈö dho ˈö ü ˗bha ˈwëë˗ ꞊shiʋ̈ niënŋdhe ˗nu ˗bha bhë ˈö ˗da ˈplöö, ˈyö ˈü to mü ˈü ˗dunën ˈö˗ ˈˈɲɔn ˗ya kë bhë ˗a zë ˗a ˗dhɛ.›
31 ˈYö˗ dë ˗ya pö ˗a ˗dhɛ: ‹N gbö, ü ˗to n ˈˈpiʋ̈ ˈˈtʋ̈ŋ ꞊gban ˈka, ˈyö pë ˈˈpɛpɛ ˈwo n ˗gɔ, ˈwo ü ˗bha ˈka ˈpö.
32 ˈˈKɛɛ ü ꞊dhegblü ˗yö ˗kun ꞊dhɛ mɛn ˈö ˗ya ga ˗a ˈdhö, ˈˈkɛɛ ˈyö ˗ya ˈgo ga ˈgü bhë. ˗Ya ꞊dhiɔŋ ˗be ˈsaadhö, ˈyö ˈkwa˗ yö ˈzü bhë. ˈDhɛ ˈö ˈˈdhʋ̈, ˗a ˗dhɛ ˈyaa˗ ˗bha kö ˈkwa ˈwlaan˗ kë, kö kwa zuʋ̈ˈˈ ˈˈgblü ˗yö dhi ˗ee?›»
-Zoto -a ˈˈpiʋ̈ -wɔn -nu
^ Ɛɛnˈˈ «ˈˈdhü ˈwo˗ ˗dhɛ Karubie bhë ˗a bhɛ.»
^ Ɛɛnˈˈ «gblɔŋ.»
^ Ɛɛnˈˈ «˗kɔŋgaapë.»
^ Ɛɛnˈˈ «kö pë ˈbhaa ˈyaa˗ ˗bha.»
