Nɔɔn˗ ˗së ˈsëëdhɛ ˈö Lukö ˗ya ˗bɛnzë 16:1-31
16 ˈYö go mü ˈzü ˈö˗ pö ö ˗bha gwëëˈˈ ˗nu ˗dhɛ: «꞊Nɔɔnmɛn do ˈbhaa ˗yö ˗kun ˗dhö, ˈö yökëmɛn do ˈö ö ˗zoto ˗a ˗bha ꞊nɔɔn ˗kwɛɛ ˗nu ˈˈpiʋ̈ ˈö kun ˗a ˗gɔ. ˈYö˗ man ꞊dhɛ ö ˗bha yökëmɛn ˈö bhë, ˗yö ö ˗bha ꞊nɔɔn ˗nu ˈgü shiʋ̈ˈˈ ˗ni ˈgü.
2 ˈYö˗ ˗dhɛ ˈö˗ pö ˗a ˗dhɛ: ‹ˈWɔn ˗nu ˈa˗ man ˗ni ˈgü ü ˗bha yö, ˈwaa ˗së. ˈDhɛ ˈö ˈˈdhʋ̈, ˗bhö nu kö n ˗man ꞊nɔɔn ˈˈpɛpɛ ˈwo ü ˗gɔ bhë ˈü˗ ˈˈklɔɔnbho n ˗dhɛ. ˗A ˗gɛn ˗mü ꞊dhɛ ˈbhaa ˈnën ˈü dho kë n ˗man ˈkɔɔ ˗yö ˈwɔnyëë˗ ˈka ˈzüdho.›
3 ˈDhɛ ˈö ˗kë ˈˈdhʋ̈, ˈyö ˗a ˗bha yökëmɛn ˈö bhë ˈö ˗ya ö ˗zota ˗sü ˗bha ˈö˗ pö: ‹Kë ˈö˗ wo ꞊dhɛ n ˗gɔmɛn ˗dho n bho ö ˗bha ꞊nɔɔn ˗nu ˗gɔdhiʋ̈ yö, ˈmën ˈa ˗dho ˗a kë? ꞊Faan ˈyaa n ˗bha kö ˈa yökë ˈbhlaa˗,* ˗gbadhɛsü ˈlëë˗ ˗yö n ˗kë ˈpö.
4 ˗Ën hëën˗! ˈPë ˈa ˗dho ˗a kë kö ˗ya kë ꞊dhɛ n ˗gɔmɛn ˗ya n bho ö ˗bha ꞊nɔɔn ˗nu ˗gɔdhiʋ̈, mɛn ˗nu ˗wo wo ˗kɔ ˗ya n ˗gɔ wo ˗gɔ ˈkɔɔ, ˈman˗ dɔ!›
5 ˈYö mɛn ˗nu ˈö˗ ˗gɔmɛn ˗bha ˈˈpɔ ˈdhö ˗an ˗bha bhë, ˈyö ˗an sü do do ˈö ˗an ˗dhɛ. ˈYö˗ pö ˗a mɛn ˗blɛɛsü ˗dhɛ: ‹N ˗gɔmɛn ˗bha ˗mën ˈö˗ ˈˈpɔ ˈdhö ü ˗bha?›
6 ˈYö˗ mɛn ˈö bhë ˈö˗ ˗yɔ bɔ ˈö˗ pö: ‹˗A ˗bha olivö ˈˈɲɔn ˈˈgboŋgbo* këŋ do ˈnën ˈö˗ ˈˈpɔ ˈdhö n ˗bha.› ˈDhɛ ˈö˗ pö ˈˈdhʋ̈, ˈyö˗ pö ˗a ˗dhɛ: ‹Ü ˗bha ˈˈpɔ ˈsëëdhɛ ˈö yö ˗a ˈkun ˈü ˈɲaannu ˈü ˗kɔŋ ˈˈsoodhu (50) ˗ya mü ˈˈvaandhö.›
7 ˈDhɛ ˈö ö bo, ˈyö˗ mɛn do ˈˈwɛɛ dhɛɛˈˈ kpɔ ˈö˗ pö: ‹Bhi ˗de ˈpö, ˗a ˗bha ˗mën ˈö˗ ˈˈpɔ ˈdhö ü ˗bha?› ˈYö gɔndë ˈö bhë ˈö˗ ˗yɔ bɔ ˗a ˗gɔ ˈö˗ pö: ‹˗A ˗bha ˈble˗ ˈˈgboŋgbo* ˈˈgblʋ̈gblʋ̈ ˗ɲaan këŋ do ˈnën ˈö˗ ˈˈpɔ ˈdhö n ˗bha.› ˈYö˗ pö ˗a ˗dhɛ: ‹Ü ˗bha ˈˈpɔ ˈsëëdhɛ ˈö yö ˗a ˈkun ˈü ˗kɔŋ ˈˈsaaga (80) ˗ya mü.›
8 ˈKö ˗kë ꞊dhɛ ˈwɔn ˈö˗ ˗kë bhë ˈyaa kpɛnŋdhö, ˗a ˗bha ˈwɔn ˗nu ˗kë ˗gleŋ ˈka ˗sü ˈwɔn ˗ya ˗gɔmɛn ˗kun ˈö˗ ˗wɔn ꞊blɛɛ. ˗A pö ˈa˗ wo ˈˈdhʋ̈ bhë ˗a ˗gɛn ˗mü ꞊dhɛ, mɛn ˗nu ˈwo ˈˈkpɔnŋtaamɛn ˗nu* ˈka, ˗wo ˈwɔn ˗nu kë ˗dhɛ ˗dɔ ˗gleŋ ˈka wo ˈko ˗nu ꞊zinŋgü ˈö ˗ʒiö ˗a ˈka mɛn ˗nu ˈwo ˗dhɛpuudhɛ ˈgü ˗an ˗ta.
9 «˗Ya ˈgo mü ˈzü, a˗ ˗pö ka ˗dhɛ ꞊dhɛ: ˗Ka ˈˈtɔŋdhɛ ˈkun ꞊flüü ˗nɔɔn ˗nu ˈka, kö ˈˈtʋ̈ŋ ˗nu ˈwo ˗dho ɲën ˗a ˈka ka ˗gɔ, ka ˈˈtɔŋdë ˗nu ˈwo bhë ˗wo wo ˗kɔ ˗ya ka ˗gɔ ˈkɔ ˗nu ˈö ˈwaa shiʋ̈ˈˈ toŋtoŋdhö bhë ˗an ˈgü.
10 Mɛn ˈö ˗klu ˗Zlan ˗bha ˈwɔn ˈsɛɛn˗ ˗nu ˈgü, ˗yö ˗klu ˗a ˗bha ˈpö ˈwɔn ˈkpii˗ ˗nu ˈgü. ˈYö mɛn ˈö kpɛnŋdhö ˈwɔn ˈsɛɛn˗ ˗nu ˈgü, ˈö kpɛnŋdhö ˈpö ˈwɔn ˈkpii˗ ˗nu ˈgü.
11 ˈDhɛ ˈö ˈˈdhʋ̈, ka ˈti ˗klu ˗Zlan ˗bha ˗wɔn ˗nu kë ꞊flüü ˗nɔɔn ˗nu ˈka, de ˈö ˗dho ö ˗bha ꞊nɔɔn ꞊dede ˗nu ˈˈklɔɔnbho ka ˗bha?
12 ˗Ya ˈgo mü ˈzü, mɛn ˈˈwɛɛ ˗bha pë ˈö ka ˗gɔ, ka ˈti ˗klu ˗Zlan ˗bha ˗wɔn ˗nu kë ˗a ˈgü, de ˈö ˗dho pë ˈö˗ ˗ya ka* ˗bha ˈka ˗a nu ka ˗dhɛ?
13 Mɛn dosɛnŋ ˈyaa ꞊mɔɔn˗ ˗bha kö ˗yö ꞊dhuëŋdhɛ kë ˗gɔmɛn ꞊plɛ ˈˈpiʋ̈. ˗A mɛn do ˗san ˗dho ˗a kë, ˈö˗ mɛn do ˗dhɔ ˗ya ˗kë. Ɛɛnˈˈ ˈzü ˗yö ˗dho ˗klu ˗a mɛn do ˗bha, ˈö yö ˈti ˗dho ˗a mɛn do ˈö to ˗a ꞊bhlëë ˗ya. ˗Kɔ do ˈö bhë ˗a ˈka, ˈkaa ꞊mɔɔn˗ ˗bha ˈka yökë ˗Zlan ˗dhɛ kö ˈka ˗klu ˈwëëga ˗bha ˈpö.»
14 Fadhiziɛn ˗nu ˈö ˈwëëga ˗dhɔ ˗yö ˗an ˗kë bhë, ˗wo ˗kun wo ˈˈtʋ ˈto ˗ni ˈgü pë ˈˈpɛpɛ ˈö Yesu kun ˗a pö ˗ni ˈgü bhë ˗a ˗bha, ˈyö ˈwo ˗ya ꞊wɛɛ˗ ˗dɔ ˗a ˗bha ˗sü ˗bha.
15 ˈDhɛ ˈö ˗kë ˈˈdhʋ̈, ˈyö Yesu ˗ya pö ˗an ˗dhɛ: «Mɛnbhɩɩdhe ˗nu ˈˈɲan ˈˈdhiʋ̈, ka˗ ˗kë ꞊dhɛ pë ˈö ˈka kpɛnŋdhö ˗a ˈdhö. ˈˈKɛɛ pë ˈö ka zuʋ̈ˈˈ ˈˈpiʋ̈ ˗Zlan ˗ya ˗dɔ. Pë ˈö mɛnbhɩɩdhe ˗nu ˗wa sü ꞊dhɛ pë ꞊bhlëësü ꞊dede ˈdhö, ˗yö ˗Zlan ˈˈɲan ˈˈdhiʋ̈ pë ˗ɲënŋsü ˈka.
16 «ˈTɔŋ˗ waa ˗Zlan ˗wodhiʋ̈lomɛn ˗nu ˗wo ˗kë ˗dhö ˈö to ˗a ˈka ˈˈdhʋ̈ ˈö yö ˗a ˈka Zan ˗bha ˈˈtʋ̈ŋ ˗bha. ˈÖ sü ˈˈtʋ̈ŋ ˈö bhë ˗a ˗bha, nɔɔn˗ ˗së ˈö ˗gban ˗Zlan ˗bha ˗Gblüdëdhɛ ˗bha ˗yö pö ˗ni ˈgü, ˈö mɛn ꞊suu ꞊gban ˈˈpɛpɛ ˈdhö ˗a ˗Gblüdëdhɛ mɛɛnˈˈ ˗ni ˈgü ˗bia ˈka.
17 A˗ ˗pö ka ˗dhɛ ꞊dhɛ ˈTɔŋ˗ ˈsëëdhɛ ˈˈɲanga ˈˈpian ˈnën pë ˈˈtɩtɩ ˗bha ʒiö ˗sü kö yö ˈti yökodhiʋ̈ bhë, ˗a ˗dhɛ ˗yö ˈˈgbɩɩ˗ ˈö ˗ʒiö ˗a ˈka dhaŋ˗ waa ˈˈsɛ ˗an ˗bha ʒiö ˗sü ˗ta.
18 «Mɛn* ˈˈoo ˗mɛn ˈö ö ˗bha dhebɔ bho ˈˈblü, ˈö dho ˈö dhe ˈˈwɛɛ sü, kö ˗ya ö ˗bha dhebɔ ˈto ˗ya niënŋˈˈ ˈnën bhë. ˈYö mɛn ˈˈoo ˗mɛn ˈö dhebɔ ˈö ꞊waa˗ bho ˈˈblü* ˗a sü dhe ˈka, kö ˗ya ˗da mɛn ˗nu ˗bha dhe ˈˈpiʋ̈ ˈnën bhë.
19 «꞊Bhɔɔmɛn do ˈbhaa ˗yö ˗kun ˗dhö ˈö kun sɔ gaga* ˗nu ˗da ˗ni ˈgü, ˈö kun ꞊bhɔɔ kë ˗ni ˈgü, ˈö ö ˗de ˈˈdhiaa bho ˗dhɛkpaɔyi ˈˈpɛpɛ ˈka.
20 ˗Wëëmɛn* do ˈbhaa ˈwo˗ ˗dhɛ Lazaa ˈö bhüöö ˗yö kun ˗lo ˗sü ˈka ˗a kwibhadhɛ ꞊gban ˗bha, ˗wo ˗dho ˗a ˈka ˗kplawo ˈwo˗ ˗ya ꞊bhɔɔmɛn ˈö bhë ˗a ˗gɔ ˈˈkpan ˈˈdhiʋ̈.
21 ˗Yö ˗kun ˗a ˈˈpiʋ̈ ꞊dhɛ ˗bhöpë ˗nu ˈwo dha ꞊bhɔɔmɛn ˈö bhë ˗a ˗bɛn ˗gɔ ˈö ˈwo ꞊wɛnŋ ˈˈshia˗ bhë ˈö ˗an ˗bhö. ˈGbɛn˗ ˗nu ˗wo ˗kun nu ˗ni ˈgü ˗ʒiaanwo ˈö ˈwo bhüöö ˗nu ˈwo kun ˗a kwi ˗bha bhë ˗an pa.
22 ˈDhɛ ˈö ˈˈtʋ̈ŋ ˈnën ˈbhaa ˗yö ˗ʒiö, ˈyö ˗wëëmɛn ˈö bhë ˈö ga, ˈyö ˗Zlan ˗bha ˈˈkiö ˗nu ˗wa sü ˈwo dho ˗a ˈka Ablaamö ˈˈsuee.*
«ˈYö ꞊bhɔɔmɛn ˈö bhë yö ˗de ˈpö ˈö ga, ˈyö ˈwo˗ ˗wɛɛ bho.
23 ˈDhɛ ˈö kun saanˈˈ ˈsü ˗ni ˈgü Ga ˗gblü* ˈgü mü, ˈyö ö ˈˈɲan ˈˈdhiʋ̈ ꞊luu ˈö ˗kpan Ablaamö ˗bha mü ꞊gblɛɛn kö Lazaa ˗ya ˈˈsuee.*
24 ˈDhɛ ˈö ˗kë ˈˈdhʋ̈, ˈyö Ablaamö ˗dhɛ ˈö˗ pö: ‹N dë Ablaamö, n ˗wëë ˗yö ü kë! ˗Bhö dɔ ˈˈgbɩɩ˗ kö ˈü Lazaa bɔ kö ˗yö ˈdho ˗yö ö ˗kɔnënga bɛnŋˈˈ ˈˈyɛ ˈˈyi ˗bha kö ˗yö nu ˗ya yö n ˈnɛɛn˗ ꞊taa. ˗A ˗gɛn ˗mü ꞊dhɛ a saanˈˈ ˈsü ˗ni ˈgü ꞊dedewo ˈˈshiʋ̈ ˈˈgaa ˈö yö ˗a ˈgü.›
25 ˈYö Ablaamö ˗ya pö ˗a ˗dhɛ: ‹N gbö, ü ˗zo ˗yö ˗buö ꞊dhɛ ü ˗bha ˗tosɛta ˈgü, pë ˗së ꞊va ꞊dede ˗yö ˗kë ü ˗gɔ. ˗A ˈˈtʋ̈ŋ ˈö bhë ˗a ˈgü, Lazaa ˗zë ˗yö ˗kë saanˈˈ ˈgü, ˈˈkɛɛ ꞊dɛɛ ˗a zuʋ̈ˈˈ ˗ya ˈwaannu ˗dhɛ ˈö yö ˗a ˈgü, ˈyö bhi ˗zë ˈü saanˈˈ ˈsü ˗ni ˈgü bhë.
26 ˗Ya ˈgo mü ˈzü, kë ˈö˗ wo ꞊dhɛ ˗gblü ˈˈdhi ˈkpii˗ ˗yö kwa˗ ˗nu kwa ꞊zinŋgü bhë, mɛn ˈö ˈˈpiʋ̈ ꞊dhɛ ˈö ˈgo yi ˈˈpiʋ̈ yö ˈö nu ka ˈˈpiʋ̈ ˈmü, ˗a ˗kɔ yö ˈti ˗dho ˗mɔn ˗a ˗bha. Ɛɛnˈˈ mɛn ˈbhaa ˈyaa ꞊mɔɔn˗ ˗bha ˗yö ˈgo ka ˈˈpiʋ̈ ˈmü ˈpö kö ˗yö nu ˗dhɛ ˈyi˗ ˗bha yö ˗a ˈgü.›
27 ˈDhɛ ˈö˗ pö ˈˈdhʋ̈, ˈyö˗ gɔndënën ˗ya pö ˗a ˗dhɛ: ‹ˈDhɛ ˈö ˈˈdhʋ̈ ˈsa n dë, bhɛɛˈˈ ˈnën ˈa˗ wo ü ˗dhɛ, ˗bhö dɔ ˈˈgbɩɩ˗ ˈü˗ bɔ n dë ˗bha ˈkɔdhigümɛn ˗nu ˈˈpiʋ̈,
28 kö n ꞊dhegblü ˈˈsoodhu ˈwo mü bhë, ˗yö ˗an ˗zo ꞊kpɔɔ, ˗yö kë ˈˈdhʋ̈ kö wo ˗de ˈpö ˈwa ˗dho nu saansüdhɛ ˈö yö ˗a ˈgü.›
29 ˈˈKɛɛ ˈyö Ablaamö ˗ya pö ˗a ˗dhɛ: ‹ˈSëëdhɛ ˈö Moizö ˗ya ˗bɛnzë waa˗ ˗dhɛ ˈö ˗Zlan ˗wodhiʋ̈lomɛn ˗nu ˗wa ˗bɛnzë ˈpö ˗wo ˗an ˗gɔ. Pë ˈö pö ˗sü ˈka ˗an ˈgü ˗wo wo ˈˈtʋ ˈto ˗a ˗bha.›
30 ˈDhɛ ˈö ˗kë ˈˈdhʋ̈, ˈyö gɔndënën ˈö bhë ˈö˗ pö: ‹N dë Ablaamö, wo ˈti ˗dho wo ˈˈtʋ ˈto. Mɛn ˈbhaa ˗ya ˈgo ga ˈgü ꞊ʒiaan ˗ya ˈdho ˗an ˈˈpiʋ̈, ˗wo ˗dho ˈgo wo ˗bha ꞊sɔŋ yaa ˗nu ˈgü ˈö ˈwo wo zuʋ̈ˈˈ ꞊slëë.›
31 ˈYö Ablaamö ˗ya pö ˗a ˗dhɛ: ‹Pë ˈö Moizö waa ˗Zlan ˗wodhiʋ̈lomɛn ˗nu ˗wa pö wo ˈti wo ˈˈtʋ ˈto ˗a ˗bha, ˈkö˗ ˗de ˈö mɛn ˈbhaa ˗yö go ga ˈgü ˈö dho ˗an ˈˈpiʋ̈, wo ˈti ˗dho wo ˈˈtʋ ˈto ˗a ˗bha ˈpö.›»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «ˈˈsɛ ˈpɔn.»
^ Ɛɛnˈˈ «Batö ˗ɲaan.» ˗A Batö ˈö ˈˈdhʋ̈ litrö ˗kɔŋ ꞊plɛ ö ga ꞊plɛ (22) ˈnën ˈö dho ˗a do gü.
^ Ɛɛnˈˈ «ˈKɔɔ˗ ˗ɲaan.» ˗A ˈKɔɔ˗ ˈö ˈˈdhʋ̈ pë ˈö go ˗a ˈgü ˗yö ˗mɔn ˈˈkidhʋŋ këŋ do ˗kɔ ˈˈsɔɔplɛ (170) ˗bha.
^ Ɛɛnˈˈ «ˈˈtʋ̈ŋ ˈö yö ˗a ˈgümɛn ˗nu.»
^ Ɛɛnˈˈ «pë ˈö ka ˗bha ˈka.»
^ ˗Wo ˗we «mɛn ˈö˗ ˗bha dhebɔ yö ˈti ˈˈɲangüyaa kë ˈö˗ bho ˈˈblü» ˗a ˈka.
^ ˗Wo ˗we «dhe ˈwo˗ bho ˈˈblü ˈˈkɛɛ kö yö ˈti ˈˈɲangüyaa kë» ˗a ˈka.
^ Glɛkö ˗wo ˈgü ˈyö ˗tɔ «yɩɩga sɔ ˈˈɲan ˗së ˗sü ˈö˗ ˗bha ˗zɔɔndhödhɛ ˈˈdhiʋ̈ yö ˈti pa ˗së ˈka.»
^ ˗A mɛn ˈö bhë ˗yö ˗kun gbadhɛmɛn ˈka.
^ Glɛkö ˗wo ˈgü ˈyö ˗tɔ «Ablaamö ˗kuu ˈgü.» ꞊Waa˗ pö ˈˈdhʋ̈ ˗a ˗gɛn ˈnën ˈö ˗tɔ ˗yɛɛ ꞊bhlëësü.
^ Ɛɛnˈˈ «Adɛsö.» ˗Wo ˗we «mɛn ˈˈpɛpɛ ˈö ˗wa ga ˗an bun ˗dhokwëësü» ˈka.
^ Glɛkö ˗wo ˈgü ˈyö ˗tɔ «˗kuu ˈgü.»
