Nɔɔn˗ ˗së ˈsëëdhɛ ˈö Lukö ˗ya ˗bɛnzë 17:1-37
17 ˈYö Yesu ˗ya pö ö ˗bha gwëëˈˈ ˗nu ˗dhɛ: «ˈKö ˗kë ˗kɔ ˈˈoo ˗kɔ ˈgü, mɛn ˗puö ˈwɔn yaa ˈgü ˗pë* ˗nu ˗dho kë ˗dhö ˗kplawo. ˈˈKɛɛ mɛn ˈö ˗dho bɔ ˗a ˗ta kö ˗yö kë bhë, yö ˈnën˗ ˗bha ˈdhö ˗wëësü.
2 ˗Wo ˗gwö kpö ˈkpikpi ˗dɔ ˗a ˗mɛn bhɔ ˗bha ˗be ˈö ˈwo˗ ˗zuö ꞊weeyi ꞊bhaa, ˗a ꞊fiëë ˗dho kë ˗dhö ˗a ˗bha ˈka ˈö ˗ʒiö ˗a ˈka ˈnën ˈsɛɛn˗ ˗nu ˈwo bhë ˗a mɛn dosɛnŋ ˗bho ʒiaan ˗ta ˗sü ˗ta.
3 ˗Ka ka ˗zokë ka ˗de ˈˈpiʋ̈. Ü ꞊dhegblü ˗ya ˈwɔn yaa kë, ˗bhö ˗a blɛɛˈˈ ˗a ˗dhɛ ˈˈpuu ˈka. ˗Ya ˈˈwɩ ˗a ˗bha kö ˈö ö ꞊kwaa ö ˗bha ꞊sɔŋ yaa ˈö bhë ˗a ˗zü, ˗bhö ˗a ˗bhawɔn ˈto.
4 ˈKö ˗kë ꞊dhɛ ˗dhɛkpaɔyi do ˈgü ˗yö ˈwɔn yaa ˗kë ü ˈka ˗gɛnɲaan ˈka ˈˈsɔɔplɛ, ˗ya nu ˈko ˗ta ˈˈsɔɔplɛ ꞊yaa˗ pö: ‹˗Bhö n ˗bhawɔn ˈto,› ü dua ˗mü kö ˈü˗ ˗bhawɔn ˈto.»
5 ˈYö Dëmɛn ˗bha bɔmɛn ˗nu ˗wa pö ˗a ˗dhɛ: «˗Bhö yi ˗takun kö yi ˗bha ˗zoyödhe ˗yö ˗dadhiʋ̈.»
6 ˈDhɛ ˈwo˗ pö ˈˈdhʋ̈, ˈyö Dëmɛn ˗ya pö ˗an ˗dhɛ: «˗Zoyödhe ˈö ˗kë ˗ʒiaanwo ꞊dhɛ mutaadö ga ˈdhö ˗yö ˗kë ka ˗gɔ ˗be, ka ˗dho ˗a pö ˈˈdhü* ˈö yö ˗a ˗dhɛ: ‹˗Bhö ˈgo -dhɛ ˈö yö ˗a ˈgü ˈü ˈdho ˈü dɔ ꞊weeyi ꞊bhaa,› ˈö˗ ˗kë ˈˈdhʋ̈ ka ˗wo ˈˈdhiʋ̈ ˗bha.
7 «Mɛn ˈö ˈka ˗lo bhë, de ˈö ꞊dhuëŋ ˗ya kë ˗a ˗gɔ ˈö ˗ya ˈgo ˈbhlaa ɛɛnˈˈ ˗tuëë ˗nu ˗maankë ˗ya nu, ˈö ˗dho ˗a pö ꞊dhuëŋ ˈö bhë ˗a ˗dhɛ: ‹˗Bhö nu ˈzozodhö ˈü ˈɲaannu ˈtaablö ˈˈdhiʋ̈ kö ˈü pë ˗bhö›?
8 ˈPë ˈö ˗dho ˗a pö ˗a ˗dhɛ ꞊ʒiaan ˈyaa ˈnën ˈö ˗tɔ: ‹˗Bhöpë ˗kpa ˗a ˈgü ˗sɔ ˗da ü ˗bha kö ˈü n ˗man ˗bhöpë ˗kpa. Pë ˈˈpɛpɛ ˈa˗ ˈˈpiʋ̈ ˈbha ü bo ˗a kë ˗sü ˈka, ˈman pë ˗nu ˗bhö, ˈman pë ˗nu mü, kö bhi ˗zë ˈü ꞊kun pë ˗bhö ˈü pë ˗nu mü› ˗ee?
9 Yö ˈti ˗dho ö ˗bha ꞊dhuëŋ ˈö bhë ˗a ˈˈnuɛ bho, ˈyö sü ꞊dhɛ pë ˈö˗ dua ˈdhö ˗mü kö ˗ya kë, yö ˈnën ˈö˗ ˗kë bhë, ˈyaa ˈˈdhʋ̈ ˗ee?
10 ˗Kɔ do ˈö bhë ˗a ˈka, yö ˈˈpɛpɛ ˈwo˗ dɔ ka ˗kɔ ˈka, ˈka ka bo ˗a kë ˗sü ˈka, ˗kaa pö: ‹ˈˈNuɛ bho ˗mɛn ˈyaa ˗mü yi ˈka, ꞊dhuëŋ ˈˈwɛɛwɛ ˗mü yi ˈka. Pë ˈö yi dua ˈdhö ˗mü ˗be kö ˈyi˗ kë, yö ˈnën ˈyi˗ ˗kë bhë.›»
11 ˈDhɛ ˈö kun ˈdho ˗ni ˈgü Zedhizadhɛmö, ˗yö ˗bɔ ʒiaan ˈö Samadhi ˗sɛ waa Galile ˗sɛ ˗an ꞊zinŋgü bhë ˗a ˈka.
12 ˈDhɛ ˈö kun ˗da ˗ni ˈgü ˈpödhɛ do ˈbhaa ˈgü, gɔɔn˗ ˗nu ˗kɔŋ do ˈö ꞊weeyua ˗yö kun ˗an ˗bha, ˗wo ˗nu ˗a ˈˈpiʋ̈, ˈˈkɛɛ ˗wo ˗to ˗a ˈka ꞊gblɛɛn.
13 ˈYö ˈwo wo ˗wo ˈˈdhiʋ̈ ꞊luu ˈö ˈwo˗ pö: «Yesu, yi ˗Gɔmɛn, ˗bhö yi ˗wëëdhɛ yö!»
14 ˈDhɛ ˈö Yesu ˗yö ˗kpan ˗an ˗bha, ˈyö˗ pö ˗an ˗dhɛ: «˗Ka ˈdho kö ˈka ka ˗de ˗zɔn ˈˈsaabhomɛn ˗nu ˗dhɛ.» ˈDhɛ ˈwo kun ˈdho ˗ni ˈgü, ˈyö ˗an ˗dhɛ ˗yö bo.
15 ˈDhɛ ˈö ˗a mɛn do ˗ya yö ꞊dhɛ ö ˗dhɛ ˗ya bo, ˈyö ö ꞊yɛɛ ˗kë ˈö nu, kö ˗yö ˗Zlan ˈtɔ bhɔ ˗ni ˈgü ö ˗wo ˗ta.
16 ˈYö nu ˈö ˈˈgblëënnu Yesu ꞊gɛnŋdhö ˈö ˗ya ˗a ˈˈnuɛ bho ˗sü ˗bha, ˈˈkɛɛ kö mɛn ˈö ˈˈdhʋ̈ ˗yö ˗kun Samadhi mi ˈka.
17 ˈYö Yesu ˗ya pö: «Mɛn ˗kɔŋ do ˈwo nu bhë ˗an ˈˈpɛpɛ ˗bha ˈˈyua yö ˈti bo ˗ee? ˗A mɛn ˈˈseishiö ˈwo to ˗wo ˈˈmɛn ˈsa?
18 Gɔndënën ˈö yö ˗zë ˈö ˗kë ˈˈsɛ ˈˈwɛɛ ˈgümɛn ˈka ˈö yö, yö dosɛnŋ ˈyaa ˈnën ˈö ö ꞊yɛɛ ˗kë ˈö nu ˈö ˗Zlan ˈtɔ bhɔ ˗ee?»
19 ˈDhɛ ˈö ö bo ˈyö˗ pö ˗a gɔndënën ˗dhɛ: «˗Bhö luuˈˈ ˈü ü ˗bha ˈdho wo, ü ˗bha ˗zoyödhe ˗ya ü dha.»
20 ˈDhɛ ˈö Fadhiziɛn ˗nu ˗wa dhɛɛˈˈ kpɔ ˈˈtʋ̈ŋ ˈö ˗Zlan ˗bha ˗Gblüdëdhɛ dho nu ˗a ˈka ˗a ˗wɔn ˈka, ˈyö˗ pö ˗an ˗dhɛ: «˗Zlan ˗bha ˗Gblüdëdhɛ ˗bha nu ˗sü bhë, ˈpë mɛn ˈˈɲan dho dɔ ˗a ˗bha ˈkpakpadhö ˈyaa ˗mü.
21 Mɛn ˈbhaa yö ˈti ˗dho ˗a pö: ‹˗Ka ˗dhɛ ˗ga, ˗yö ˈyö!› Ɛɛnˈˈ ‹˗yö ˗de!› ˗A ˗gɛn ˗mü ꞊dhɛ ˗Zlan ˗bha ˗Gblüdëdhɛ ˗yö ka ꞊zinŋgü yö.»
22 ˈDhɛ ˈö go mü, ˈyö˗ pö ö ˗bha gwëëˈˈ ˗nu ˗dhɛ: «ˈˈTʋ̈ŋ ˈbhaa ˗dho ˗wo ˈö mɛn Gbö ˗bha ˗dhɛkpaɔyi ˗nu bhë, ka ˈˈɲan ˗kpan ˗a dosɛnŋ ˈˈkpaan ˗bha ˗sü ˗dhɔ ˗yö ka kun ꞊dedewo, ˈˈkɛɛ ka ˈti ˗dho ˗kpan ˗a ˗bha.
23 Mɛn ˗nu ˗dho ˗a pö ka ˗dhɛ: ‹˗Ka ˗dhɛ ˗ga ˗de!› Ɛɛnˈˈ ‹˗ka ˗dhɛ ˗ga ˈyö!› ˈˈKɛɛ ˈkaa ˗dho ˗a pö ˈka ˈdho, ˈkaa ˗dho ʒiö ˗an ꞊kee˗.
24 ˗A ˗gɛn ˗mü ꞊dhɛ ˗dhɛkpaɔyi ˈö bhë* ˗a ˈka, mɛn Gbö ˗dho kë ꞊dhɛ dha ˗bha ö ˈˈɲan ˈkun ˗sü, ˈö˗ ˈbhü ˗yö go dhaŋ˗ ˈˈpian do ˗bha ˈö yö ˗a ˈka ˗a ˈˈpian ˈˈwɛɛ ˈbhaa ˗bha ˗a ˈdhö.
25 ˈˈKɛɛ ˈˈsanni ˗yö ˗kë ˈˈdhʋ̈, ˗a dua ˗mü ꞊köŋ ˗blɛɛsü kö ˗yö saanˈˈ ˈsü ꞊dedewo kö ˈˈtʋ̈ŋ ˈö yö ˗a ˈgümɛn ˗nu ˗wo ˗kɔ ˗a ˗wɔn ˈka.
26 ˗Ya ˈgo mü ˈzü, mɛn Gbö ˗bha ˈˈtʋ̈ŋ ˈka, ˈwɔn ˗nu ˗dho kë ꞊dhɛ ˗kɔ ˈö ˗kë ˗a ˈka Noe ˗bha ˈˈtʋ̈ŋ ˈgü ˗a ˈdhö.
27 ˗A ˈˈtʋ̈ŋ ˈö bhë ˗a ˈgü, mɛn ˗nu ˗kun pë ˗bhö ˗ni ˈgü, ˈö ˈwo pë ˗nu mü, ˈö gɔɔn˗ ˗nu ˗wo dhe sü, ˈö ˈwo dhebɔ ˗nu dɔ gwaan˗ ˗bha ˈö to ˗a ˈka ˈˈdhʋ̈ ˈö yö ˗a ˈka yi ˈö Noe ˗yö ˗da ˗a ˈka ˈˈyitagɔ ˈgü, ˈö ˈˈyi ˗yö pa ˈö ˗an ꞊gban ˈˈpɛpɛ ˈgü ꞊shiʋ̈ bhë ˗a ˗bha.
28 ˗Yö ˗dho ˗kë ˈpö ꞊dhɛ ˗kɔ ˈö ˈwɔn ˗nu ˗wo ˗kë ˗a ˈka Lɔtö ˗bha ˈˈtʋ̈ŋ ˈgü ˗a ˈdhö. ˈˈTʋ̈ŋ ˈö bhë ˗a ˈgü, mɛn ˗nu ˗kun pë ˗bhö ˗ni ˈgü, ˈö ˈwo müpë ˗nu mü, ˈö ˈwo pë ˗nu dhɔ, ˈö ˈwo ˈˈdhoo ˗nu dɔ, ˈö ˈwo pë ˗nu ta, ˈö ˈwo ˈkɔ ˗nu dɔ.
29 ˈˈKɛɛ ˗dhɛkpaɔyi ˈö Lɔtö ˗yö go Sodɔmö ˗pö ˈgü bhë ˗a ˈka, ˈˈshiʋ̈ waa blɔɔnˈˈ* ˗nu ˗wo ˗go dhaŋ˗ ˈgü ˈö ˈwo ban ꞊dhɛ dha ˈdhö, ˈö ˗an ꞊gban ˈˈpɛpɛ ˈgü ꞊shiʋ̈.
30 ˈWɔn ˗nu ˗dho kë ꞊dhɛ ˗kɔ ˈö bhë ˗a ˈdhö mɛn Gbö ˗bha ö ˗de ˗zɔn mɛnbhɩɩdhe ˗nu ˗dhɛ ˗yi ˈka.
31 «˗Dhɛkpaɔyi ˈö bhë ˗a ˈka, mɛn ˈö ˗dho kë ˈkɔ ˗ta ˈˈdhuŋ, ˈö˗ ˗bha ꞊nɔɔn ꞊kwɛɛ˗ ˗nu dho kë ˈkɔɔ, ˈya ˗dho yɔɔˈˈ kö ˗yö ˗an ˈsü. Mɛn ˈö ˗dho kë ˈbhlaa ˈpö, ˈya ˗dho ö ꞊yɛɛ kë kö pë ˗nu ˈö ˗an to ö ꞊taabha ˗yö ˗an ˈsü.
32 Ka ˗zo ˈya ˗dho bhɔ Lɔtö ˈbɔɔ ˗wɔn ˈka.
33 ˈMɛn ˈö˗ ˈˈslö ꞊mɛɛn kö ˈö ö ˗de* dha, ˗a ˗mɛn ˗gɔ ˗dho ˈto ˗a ˈgü. ˈˈKɛɛ mɛn ˈö ga, ˗yö ˗dho ˗këdhösü ꞊slɔɔ.
34 A˗ ˗pö ka ˗dhɛ ꞊dhɛ gbeŋ ˈö bhë ˗a ˈka, mɛn ꞊plɛ ˗dho kë ˈwaannu ˗sü ˈka ˗wɔ ˗a ˗ta ˗pë do ˗ta, ˈö ˈwo˗ mɛn do sü ˈö˗ mɛn do ˗yö to.
35 Dhebɔ ꞊plɛ ˗dho kë pë ꞊bioo ˗ni ˈgü ˈpö wo ˈkwëë˗ ˈˈwlʋ̈ do ˈgü, ˈö ˈwo˗ mɛn do sü, ˈö˗ mɛn do ˗yö to.»
36 ——
37 ˈDhɛ ˈö˗ pö ˈˈdhʋ̈, ˈyö ˈwo˗ pö ˗a ˗dhɛ: «Dëmɛn, ˗yö ˗dho kë ˈˈdhʋ̈ ˈˈmɛn?» ˈYö Yesu ˗ya pö ˗an ˗dhɛ: «ˈDhɛ ˈö pë ꞊glöö dho kë ˗a ˗bha, ˈyö ˈˈgblëë ˗nu dho ˈdho wo ˈkwëëdhö ˗a ˗bha.»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «mɛn ˗gɛndhiʋ̈ ˗zuö ˗wɔn ˗nu.»
^ ˈˈDhü ˈö ˈˈdhʋ̈ ˗wa ˗dhɛ «Mirie.»
^ Glɛkö ˗wo ˈgü ˈyö ˗tɔ «˗a ˗bha ˗dhɛkpaɔyi.»
^ Blɔɔnˈˈ ꞊suu ˈö ˈwo ˗we ˗a ˈka yö bhë, ˈˈshiʋ̈ kpö kpö ˗nu ˈö ˈwo ˗kë ꞊dhɛ ˗gwö kpö ˈdhö yö ˗mü.
^ Ɛɛnˈˈ «ˈniin˗.»
