Nɔɔn˗ ˗së ˈsëëdhɛ ˈö Lukö ˗ya ˗bɛnzë 18:1-43
-
ˈWɔnzuan ˈö ˗gban ꞊gɛandhe ˗fɛɛsü ˗bha (1-8)
-
Fadhiziɛn mi do waa ˈniinsɔnŋkunmɛn (9-14)
-
Yesu waa ˈnën ˈsɛɛn˗ ˗nu (15-17)
-
Zuifö ˗nu ˗gɔmɛn do ˈö ꞊nɔɔnmɛn ˈka, dhɛɛˈˈ ˈö˗ kpɔ Yesu ˗gɔ (18-30)
-
Yesu ˗yö ö ˗bha ga ˗sü ˗to ˈˈdhiʋ̈ ˈö˗ ˗wɔn ꞊blɛɛ ˈzü (31-34)
-
ˈˈƝɛɛntiimɛn do ˈö gbadhɛmɛn ˈka ˗a ˈˈɲan ˗yö ˗pʋ (35-43)
18 ˈDhɛ ˈö go mü, ˈyö Yesu ˗yö ˈwɔnzuan do sü kö ˈö˗ ˗zɔn ˗an ˗dhɛ ꞊dhɛ bhɛɛˈˈ ˗sü ˈö yi ꞊gban ˈka bhë ˗a ˗wɔn ˗yö ˈˈgbɩɩ˗, ˗an dua ˈyaa ˗mü kö ˗an ˈgü ˗yö ga.
2 ˈYö˗ pö ˗an ˗dhɛ: «ˈˈKwipö do ˈbhaa ˈgü, zakanmɛn do ˈbhaa ˈö ˈyaa kun ˈˈsuʋ̈ ˗ni ˈgü ˗Zlan ˗gɔ ɛɛnˈˈ ˈö ˈyaa kun mɛn ˈˈwɛɛ ˈbhaa ꞊bhlëë ˗ya ˗ni ˈgü, ˗yö ˗kë mü.
3 ꞊Gɛandhe do ˈbhaa ˗yö ˗kun ˈˈkwipö ˈö bhë ˗a ˈgü ˈpö ˈö za ˗yö kun waa mɛn ˈbhaa ˗an ꞊zinŋgü. ˗Yö ˗kun ˈdho ˗ni ˈgü zakanmɛn ˈö bhë ˗a ˈˈpiʋ̈ ˗kplawo ˈö˗ pö ˗a ˗dhɛ: ‹˗Bhö dɔ ˈˈgbɩɩ˗ ˈü yi ˗bha za ˈö ü ꞊kwɛɛ˗ bhë ˗a ˈˈɲanbhɔ n ˗dhɛ ˗së ˈka.›
4 ˗A züdɔdhɛ ˈgü, ˈyaa kun ˈˈwɩ ˗ni ˈgü ˗a ˗bha. ˈˈKɛɛ ꞊taabha, ˗yö ˈɲaannu ˈö ö ˗zota ˈö˗ pö: ‹˗Yö ˈˈdhʋ̈ gagade ˈka ꞊dhɛ ˈmaan ˈˈsuʋ̈ ˗Zlan ˗gɔ, ɛɛnˈˈ ˈmaan mɛn ˈˈoo ˗mɛn ꞊bhlëë ˗ya,
5 ˈˈkɛɛ ˈdhɛ ˈö ˗kë ꞊dhɛ dhebɔ ˈö yö, ˗yö ö ˈˈgblʋʋ ˗lo -ni n ˈˈpiʋ̈ ˗kplawo ˈö ˈmaan ˈˈtë ˗dhɛ yö ˗a ˗gɔ bhë, a ˗dho pë ꞊gban ˈˈpɛpɛ kë kö ˈa˗ ˗bha ˈwɔn ˈö bhë ˗a ˈˈɲanbhɔ ˗së ˈka, kö ˈya ˗dho nu ˈzü ˈö ˗fɛɛ ˗ya n ˗bha.›»*
6 ˈDhɛ ˈö Dëmɛn ˗yö ö bo ˗a pö ˗sü ˈka ˈˈdhʋ̈, ˈyö˗ pö ˗an ˗dhɛ: «Zakanmɛn ˈö bhë ˈkö ˗kë ꞊dhɛ ˈyaa kpɛnŋdhö, pë ˈö˗ pö bhë ka˗ ˗man ˗ee?
7 ˈYö ˗Zlan ˗zë ꞊wɛ, ˗a ˗bha mɛn ˗nu ˈö ö ˗kɔ ˗yɛ ˗an ˗bha, ˈö ˈwo bhɛɛˈˈ ˗ni ˈgü ˗a ˗dhɛ ˈˈgbʋ ˈka ˈɲënŋ˗ ˈgü waa gbeŋ ꞊gban ˈˈpɛpɛ ˈka bhë, yö ˈti ˗dho ˗an ˗takun kö ˈwɔn ˈö kpɛnŋdhö ˗yö kë ˗an ˗dhɛ, kö ˗yö ö zuʋ̈ˈˈ kë ˗saa ˈpö ˈwɔn ˈö ˗gban ˗an ˗bha ˗a ˈgü ˗ee?
8 A˗ ˗pö ka ˗dhɛ ꞊dhɛ, ˗yö ˗dho ˗a kë kö ˈwɔn ˈö kpɛnŋdhö ˗yö kë ˗an ˗dhɛ ˈˈvaandhö. ˈˈKɛɛ ˈˈtʋ̈ŋ ˈö mɛn Gbö dho nu ˗a ˈka bhë, ˗zoyödhe ꞊suu ˈö ˈˈdhʋ̈ ˗yö ˗dho ˗a yö mɛn ˗nu ˗gɔ ˈˈkpɔnŋ ꞊taa yö ˈˈwɛɛ ˗ee?»
9 ˈYö go mü ˈzü ˈö ˈwɔnzuan do ˈö ˗gban mɛn ˗nu ˈö ˈwo wo ˗de sü kpɛnŋdhö, ˈö ˈwaa mɛn ˈˈwɛɛ ˗nu yö pë ˈbhaa ˈka bhë ˗an ˗bha, ˗a ˗zɔn ˈö˗ pö:
10 «Mɛn ꞊plɛ ˗wo ˗dho ˗Zlan ˗dhɔkë ˗a ˈgü ˗kɔ ˈgü kö ˈwo bhɛɛˈˈ mü. ˗A mɛn do ˗yö ˗kun Fadhiziɛn mi ˈka, ˈö˗ mɛn do kun ˈniinsɔnŋkunmɛn ˈka.
11 ˈYö˗ Fadhiziɛn mi ˗yö dɔ ö ˗gɛn ˗ta ˈö ˗ya bhɛɛˈˈ ˗sü ˗bha ö zuʋ̈ˈˈ ˈˈpiʋ̈ ˈö˗ pö: ‹ˈAa ˗Zlan, a ü ˈˈnuɛ ˗bho ꞊dedewo. ˗A ˗gɛn ˗mü ꞊dhɛ ˈmaan ꞊dhɛ mɛn ˈˈwɛɛ ˗nu ˈö ˈwo to, ˈö ˗ya kë ˈö ˈwo mɛn ˗nu ꞊flüü ˗bhö, ˈö ˈwaa kpɛnŋdhö, ˈö ˈwo wo ˗bha dhebɔ ˗nu to ˈö ˈwo ꞊niënŋ bhë ˗an ˈdhö. Ɛɛnˈˈ ˈzü ˈmaan ꞊dhɛ ˈniinsɔnŋkunmɛn ˈö dɔ yö ˗a ˈdhö.
12 A ˈsunŋ˗ ˗mën ˗gɛnɲaan ˈka ꞊plɛ ˈˈdhoogɔ do ˈgü, ˈö pë ˈˈpɛpɛ ˈa˗ ꞊slɔɔ ˈa˗ ˈˈpian ˗kɔŋ do ˗naan nu gbɔɔdhe ˈka.›
13 ˈˈKɛɛ ˈniinsɔnŋkunmɛn ˗zë ˗yö ˗kë dɔ ˗sü ˈka Fadhiziɛn mi ˈö bhë ˗a ˗dhɛ ꞊taa ˈdɛdɛ, ˈyaa kun ˗a ˈˈpiʋ̈ ˗ʒianwo kö ˈö ö ˈˈɲan ˈˈdhiʋ̈ luuˈˈ ˈö ˗dhɛ ˗ga dhaŋ˗ ˈgü. ˗Yö ˗kun ö ˗kënŋ ˗ta ˗man ˗ni ˈgü ˈö˗ pö: ‹ˈAa ˗Zlan, ˈwɔnyaakëmɛn ˗mü n ˈka, ˗bhö dɔ ˈˈgbɩɩ˗ ˈü n ˗wëëdhɛ yö.›
14 A˗ ˗pö ka ˗dhɛ ꞊dhɛ ˈˈtʋ̈ŋ ˈö gɔndënën ˈö bhë ˈö kun ˈdho ˗ni ˈgü ˗a ˈka ˈkɔɔ bhë kö ˗ya kë kpɛnŋdhö ˗Zlan ˈˈɲan ˈˈdhiʋ̈ ˗ya ʒiö ˗a ˈka Fadhiziɛn mi ˈö bhë ˗a ˗ta. ˗A ˗gɛn ˗mü ꞊dhɛ mɛn ˈö ö ˗de sü ˈkpii˗, ˗Zlan ˗dho ˈlëë˗ dɔ ˗a ˗bha, ˈˈkɛɛ mɛn ˈö ö ˗de ˗kë ˈˈtɩtɩ ˗Zlan ˗dho ˗a ˗gɔ ˈˈdhiʋ̈ luuˈˈ.»
15 Mɛn ˗nu ˗kun nu ˗ni ˈgü wo ˗bha ˈnën ˈsɛɛn˗* ˗nu ˈka ˈpö Yesu ˈˈpiʋ̈ kö ˗yö ö ˗kɔ ˈpa ˗an ˈka. ˈˈKɛɛ ˈdhɛ ˈö˗ ˗bha gwëëˈˈ ˗nu ˗wa yö ˈˈdhʋ̈, ˈyö ˈwo ˗ya ˗an ˈˈdhiʋ̈ ˗blü ˗sü ˗bha.
16 ˈDhɛ ˈö ˗kë ˈˈdhʋ̈, ˈyö Yesu ˗ya pö ˗wo nu ˈnën ˈsɛɛn˗ ˗nu bhë ˗an ˈka ö ꞊dhiaa. ˈYö˗ pö ö ˗bha gwëëˈˈ ˗nu ˗dhɛ: «˗Ka ka ꞊kwaa ˈnën ˈsɛɛn˗ ˗nu ˗zü kö ˗wo nu n ˈˈpiʋ̈, ˈka ˗dho ˗an kë. ˗A ˗gɛn ˗mü ꞊dhɛ ˗Zlan ˗bha ˗Gblüdëdhɛ ˗yö mɛn ˗nu ˈwo ꞊dhɛ ˗an ˈdhö ˗an ˗bha ˈka.
17 A˗ ˗pö ka ˗dhɛ gagade ˈka ꞊dhɛ, mɛn ˈö yö ˈti ö ˗kɔ ˗ya ˗Zlan ˗bha ˗Gblüdëdhɛ ˗gɔ ꞊dhɛ ˈnën ˈˈtɩtɩ ˈdhö, yö ˈti ˗dho ˗da ˗a ˈgü toŋtoŋdhö.»
18 Zuifö ˗nu ˗gɔmɛn do ˗yö Yesu dhɛɛˈˈ ˗kpɔ ˈö˗ pö: «˗Gɔmɛn këwɔn ˗së ˗sü, ˈmën ˈö n dua ˈdhö ˗mü kö ˈa˗ kë kö ˗tosɛta ˈö ˈyaa ɲën ˈa˗ ꞊slɔɔ?»
19 ˈYö Yesu ˗ya pö ˗a ˗dhɛ: «ˈMën ˈö ˗kë ˈö ˈü n ˗dhɛ këwɔnsëmɛn? Këwɔnsëmɛn ˈˈwɛɛ ˈbhaa ˈyaa ˈdhö kö yö ˈti kë ˗Zlan dosɛnŋ ˈka.
20 ˈTɔŋ˗ ˗nu ˈö ˈwo˗ pö: ‹Ü dua ˈyaa ˗mü kö ˈü ü ˗bha dhebɔ ɛɛnˈˈ ü ꞊gɔn ˈto ˈü niënŋˈˈ, ü dua ˈyaa ˗mü kö ˈü mɛn zë, ü dua ˈyaa ˗mü kö ˈü ꞊kwaan, ü dua ˈyaa ˗mü kö ˈü ꞊sua ˗wɔn ˗ya mɛn ˗bha, ˗bhö ü dë waa ü dhe ˗an ꞊bhlëë ˗ya› bhë, ü ˗an ˗dɔ.»
21 ˈYö˗ gɔndënën ˗ya pö ˗a ˗dhɛ: «ˈÖ go n ˈnëndhɛ ˗bha ˈö yö ˗a ˈka ꞊dɛɛ ˗bha, a ˈtɔŋ˗ ˗nu ˈwo bhë ˗an ꞊gban ˗ya ꞊bhlëë ˈgü.»
22 ˈDhɛ ˈö Yesu ˗ya man ˈˈdhʋ̈, ˈyö˗ pö ˗a ˗dhɛ: «Pë dosɛnŋ ˈö˗ kë ˗wɔn ˗ya ˈto ü ˗bha ˈzü ˈyö ꞊nɛn: Pë ꞊gban ˈˈpɛpɛ ˈwo ü ˗gɔ ˗an ˈˈdhoodɔ kö ˈü˗ ˈwëë˗ ˗gblü ˈˈfleemɛn ˗nu ˗ta. ˗Ya kë ˈˈdhʋ̈, ˈyö ˈü ˗dho ꞊nɔɔn ˈö˗ ꞊bhlëë ˈdhö ꞊va ˗a ꞊slɔɔ dhaŋ˗ ˈgü. ˈBha ü bo kö ˈü nu ˈü ʒiö n ꞊kee˗.»
23 ˈDhɛ ˈö gɔndënën ˈö bhë ˈö˗ man ˈˈdhʋ̈, ˈyö˗ gaaˈˈ ˗yö ꞊yɛɛ ꞊dedewo ˈö˗ ˗ta ˗yö ˗kë ˗saa. ˗A ˗gɛn ˗mü ꞊dhɛ ˗yö ˗kun ꞊nɔɔnmɛn ꞊dede ˈka.
24 ˈYö Yesu ˗ya ˗ga ˈö˗ pö: «Mɛn ˗nu ˈö ˈwëëga ˈdhö ˗an ˗gɔ, ˗da ˗Zlan ˗bha ˗Gblüdëdhɛ ˈgü ˗sü ˗dho kë ˗an ˗gɔ ˈˈgbɩɩ˗.
25 ꞊Nɔɔnmɛn ˗bha ˗da ˗Zlan ˗bha ˗Gblüdëdhɛ ˈgü ˗sü ˗yö ˈˈgbɩɩ˗ ˈö ˗ʒiö ˗a ˈka ꞊ɲɔɔnmian ˗bha ˗bɔ mɛnŋga ˈˈdhi ˈgü ˗sü ˗ta.»
26 Mɛn ˗nu ˈö ˈwo˗ ˗wo ˈö bhë ˗a man, ˗wa dhɛɛˈˈ ˗kpɔ ˈö ˈwo˗ pö: «De ˈö ꞊mɔɔn˗ ˗bha ˗yö dha ˈsa?»
27 ˈYö˗ ˗yɔ bɔ ˈö˗ pö: «Pë ˗nu ˈö mɛnbhɩɩdhe ˗nu ˗bha ˈgü ˈwaa ꞊mɔɔn˗ ˗bha kö ˗wo kë, ˗Zlan ˗zë ˗a ˗kɔ ˗yö ˗mɔn ˗a ˗bha.»
28 ˈYö Piɛɛ ˗ya pö ˗a ˗dhɛ: «ˈYö mɛn ˈkö yi ˗zë ˈya pë ˈˈpɛpɛ ˈwo kun yi ˗gɔ ˗an ˈto ˈya ʒiö ü ꞊kee˗ yö ꞊wɛ?»
29 ˈYö Yesu ˗ya pö ˗an ˗dhɛ: «A˗ ˗pö ka ˗dhɛ gagade ˈka ꞊dhɛ, mɛn ˈˈoo ˗mɛn ˈö zë ˗Zlan ˗bha ˗Gblüdëdhɛ ˗wɔn ˗dhɛ ˈö ö ˗bha ˈkɔ, ö ˗bha dhebɔ, ö ꞊dhegblü ˗nu, ö ˗mɛn ˗nu waa ö ˗bha ˈnën ˗nu ˗an to,
30 ˗yö ˗dho ˗an ˗gwaa ꞊va ꞊dede ꞊slɔɔ ˈˈtʋ̈ŋ ˈö yö ˗a ˈgü, ˈö go mü ˈzü ˈö ˗tosɛta ˈö ˈyaa ɲën ˗a ꞊slɔɔ ˗dhɛkpaɔ dhiʋ̈ˈˈ* ˈgü.»
31 ˈDhɛ ˈö go mü, ˈyö ö ˗bha bɔmɛn ˗nu ˗kɔŋ do ö ga ꞊plɛ ˈwo bhë ˗an sü ꞊plɛdhe ˈgü ˈö˗ pö ˗an ˗dhɛ: «˗Ka ka ˈˈtʋ ˈto! ˈDho ˈö ˈkwa˗ wo ˗ni ˈgü Zedhizadhɛmö bhë, pë ˈˈpɛpɛ ˈö ˗Zlan ˗wodhiʋ̈lomɛn ˗nu ˗wa ˗bɛnzë ˈö ˗gban maan mɛn Gbö ˗mɛn n ˗bha, ˗wo ˗dho yökodhiʋ̈.
32 ˗A ˈwɔnzuan ˈnën ˗tɔ, ˗wo ˗dho mɛn Gbö ˗da ˈˈsɛ ˈˈwɛɛ ˈgümɛn ˗nu ꞊kwɛɛ˗ ˈö ˈwo ꞊wɛɛ˗ dɔ ˗a ˗bha, ˈö ˈwo ˈsi bho ˗a ˗gɔ, ˈö ˈwo wo ˈˈdhidhi ˗nu bho ˗a ˗bha.
33 ˗Wa wo bo ˗a ˗man ˗sü ˈka, ˗wo ˗dho ˗a zë. ˈˈKɛɛ ˗a ˗dhɛkpaɔyi ˗yaaga ˗naan ˈka, ˗yö ˗dho ˈgo ga ˈgü.»
34 ˈˈKɛɛ pë ˈˈpɛpɛ ˈö kun ˗a pö ˗ni ˈgü bhë ˈwaa kun ˗a ˈgüman ˗ni ˈgü, ˗a ˗gɛn ˗mü ꞊dhɛ ˗a ˈklɔɔ˗ ˗yö ˗kun ˗bin ˗sü ˈka ˗an ˗gɔ, ˈwaa kun ˗a ˗gɛn man ˗ni ˈgü.
35 ˈDhɛ ˈö Yesu kun ꞊ɲɔɔn ˗ni ˈgü Zedhiko ˗dhɛ ˗bha, kö ˈˈɲɛɛntiimɛn do ˗yö ˗ya ˗sü ˈka ʒiaan ˈˈdhiʋ̈ mü ˗yö gbadhɛ ˗ni ˈgü.
36 ˈDhɛ ˈö mɛn ꞊va ˈwo kun ʒiö ˗ni ˈgü bhë ˗an vin man, ˈyö mɛn ˗nu dhɛɛˈˈ kpɔ kö ˈwɔn ˈö kë ˗ni ˈgü bhë ˈö˗ dɔ.
37 ˈYö ˈwo˗ pö ˗a ˗dhɛ: «Yesu ˈö go Nazadhɛtö yö ˈnën ˈö ʒiö ˗ni ˈgü bhë.»
38 ˈDhɛ ˈö˗ man ˈˈdhʋ̈ ˈyö ˗gbla ˈö˗ pö: «Yesu, Davi Gbö, ˗bhö n ˗wëëdhɛ yö!»
39 ˈDhɛ ˈö˗ pö ˈˈdhʋ̈, ˈyö mɛn ˗nu ˈwo ˗kë ˈˈdhiʋ̈ bhë ˈwo ˗ya ˈˈgbla ˗sü ˗bha ˗a ˗ta ˈö ˈwo˗ pö ˗yö ö ˈˈdhi ta. ˈˈKɛɛ ˈyö ˗ya ˈˈgbla ˗sü ˗bha ˈˈgbɩɩ˗ ˈzü ˈö˗ pö: «Davi Gbö, ˗bhö n ˗wëëdhɛ yö!»
40 ˈDhɛ ˈö ˗kë ˈˈdhʋ̈ ˈyö Yesu ˗yö ˈduaannu, ˈyö˗ pö ˗wo nu gɔndë ˈö bhë ˗a ˈka. ˈDhɛ ˈö gɔndënën ˗yö yö ˗a ˈˈsuee, ˈyö Yesu ˗ya dhɛɛˈˈ kpɔ ˈö˗ pö:
41 «ˈMën ˈö ˈü˗ ˈˈpiʋ̈ ˈa˗ kë ü ˗dhɛ?» ˈYö˗ ˗yɔ bɔ ˈö˗ pö: «N Dëmɛn, dɔ ˈˈgbɩɩ˗ ˈü n ˈˈɲan ˈˈpʋ.»
42 ˈYö Yesu ˗ya pö ˗a ˗dhɛ: «Ü ˈˈɲan ˗yö ˈˈpʋ, ü ˗bha ˗zoyödhe ˗ya ü dha.»
43 Gɔndënën ˈö bhë ˗yö ˗to ˈˈshia˗ mü ˈö ˗dhɛ yö, ˈö ˗ya ʒiö ˗sü ˗bha Yesu ꞊kee˗ kö ˗yö ˗Zlan ˈtɔ bhɔ ˗ni ˈgü. ˈDhɛ ˈö mɛn ˈˈpɛpɛ ˗wa yö ˈˈdhʋ̈, ˈyö ˈwo ˗ya ˗Zlan ˈtɔ bhɔ ˗sü ˗bha ˈpö.
-Zoto -a ˈˈpiʋ̈ -wɔn -nu
^ Ɛɛnˈˈ «ˈö n ˗man ꞊taabha.»
^ ˗Wo ˗we «ˈnën ˗nu ˈö ˈwaa ˗mɔn ˈˈta ˈsü ˗sü ˗bha ꞊köŋ» ˗an ˈka.
^ Ɛɛnˈˈ «ˈˈtʋ̈ŋ ˈö nu ˗ni ˈgü bhë ˗a ˈka.»
