Nɔɔn˗ ˗së ˈsëëdhɛ ˈö Lukö ˗ya ˗bɛnzë 19:1-48
19 ˈDhɛ ˈö ˗kë ˈˈdhʋ̈, ˈyö Yesu ˗yö ˗da Zedhiko ˈö ˗ya ʒiö ˗sü ˗bha ˈplöö.
2 Gɔndënën do ˈbhaa ˗yö ˗kë ˈpödhɛ ˈö bhë ˗a ˈgü ˈö ˈwo˗ ˗dhɛ Zashe. ˗Yö ˗kun ˈniinsɔnŋkunmɛn ˗nu ˗gɔmɛn do ˈka, ˈö ꞊nɔɔn ˗yö kun ˗a ˗gɔ.
3 ˗Yö ˗kun ˗a ˈˈslö mɛɛnˈˈ ˗ni ˈgü kö ˈmɛn ˈwo˗ Yesu ˗kë bhë ˈö ˗kpan ˗a ˗bha. ˈˈKɛɛ ˈdhɛ ˈö ˗kë ꞊dhɛ ˗a ˗gɔ ˗ta ˗yö ˗kun ꞊klöö˗ bhë, ˈyaa kun ˗mɔn ˗ni ˈgü ˗a ˗bha mɛn ꞊va ˈwo kun ˈmü bhë ˗an ˗wɔn ˈgü.
4 ˈDhɛ ˈö ˗kë ˈˈdhʋ̈, ˈyö ˗bia ˗lö ˈö dɔ ˈˈdhiʋ̈ ˈö ˗da ˈˈdhü do ˈbhaa ˗bha kö ˈö ˗kpan Yesu ˗bha, ˗a ˗gɛn ˗mü ꞊dhɛ Yesu ˗dho bɔ ˈˈdhü ˈö bhë ˗a ˈˈsuee.
5 ˈDhɛ ˈö Yesu ˗yö yö ˗dhɛ ˈö bhë ˗a ˈgü, ˈyö ˗dhɛ ˗ga ˈˈdhuŋ ˈö˗ pö ˗a ˗dhɛ: «Zashe, ˗bhö yɔɔˈˈ ˈˈvaandhö, ˗a ˗gɛn ˗mü ꞊dhɛ ꞊dɛɛ a ˗dho ˗lo ü ˗gɔ ˈkɔɔ.»
6 ˈDhɛ ˈö ˗kë ˈˈdhʋ̈, ˈyö Zashe ˗yö ꞊yɔɔ ˈˈvaandhö ˈö ö ˗kɔ ˗ya ˗a ˗dhɛŋ ˗gɔ zuʋ̈gblüdhi ˈka ö ˗gɔ ˈkɔɔ.
7 ˈDhɛ ˈö mɛn ˗nu ˗wa yö ˈˈdhʋ̈, ˈyö ˈwo ˗ya ˈwɔn blɛɛˈˈ ˗sü ˗bha wo ˗wo ꞊löö ˈö ˈwo˗ pö: «˗Ya ˗dhɛŋ bhɔ mɛn ˈö ˈwɔnyaakëmɛn ˈka bhë ˗a ˗gɔ ˈkɔɔ.»
8 ˈˈKɛɛ ˈyö Zashe ˗yö ꞊luu ˈö˗ pö Dëmɛn ˗dhɛ: «N Dëmɛn, pë ˈˈpɛpɛ ˈwo n ˗gɔ, a ˗dho ˗a ˈˈpɛ ˈgü ꞊plɛ ˈa˗ ˈˈpian do nu ˈˈfleemɛn ˗nu ˗dhɛ. Mɛn ˈˈoo ˗mɛn ˈa˗ ˗bha pë sü ˗a ˗gɔ ꞊flüü ˈka, a ˗dho ˗a ˗gwaa ˗yiishiö ꞊yɛɛ kë ˈa˗ nu ˗a ˗dhɛ.»
9 ˈDhɛ ˈö˗ pö ˈˈdhʋ̈, ˈyö Yesu ˗ya pö ˗a ˗dhɛ: «Dha ˗sü ˗ya ˗da ˈkɔ ˈö yö ˗a ˈgü ꞊dɛɛ, ˗a ˗gɛn ˗mü ꞊dhɛ bhi ˗de ˈpö Ablaamö ꞊suugünën ˗mü ü ˈka.
10 Mɛn Gbö ˗yö ˗nu kö mɛn ˗nu ˈö ˗wa ꞊dhiɔŋ ˗yö ˗an mɛɛnˈˈ kö ˗yö ˗an dha.»
11 ˈDhɛ ˈö ˗kë ꞊dhɛ ˗wo ˗kun wo ˈˈtʋ ˈto ˗ni ˈgü Yesu ˗wo ˗bha bhë, ˗yö ˈwɔnzuan do ˈˈwɛɛ ˈbhaa ˗zɔn. ˗A ˗gɛn ˗mü ꞊dhɛ ˗a ˈˈtʋ̈ŋ ˈö bhë ˗a ˈgü kö ˗wa yö Zedhizadhɛmö ˗dhɛ ˈka ꞊klöö˗, ˈö˗ ˗bha gwëëˈˈ ˗nu kun wo ˗zogɔn ˗ni ˈgü ꞊dhɛ ˈwa ˗lo mü, ˗Zlan ˗bha ˗Gblüdëdhɛ ˗dho ˈto mü ˈö nu.*
12 ˈYö˗ pö ˗an ˗dhɛ: «Gɔndënën do ˈbhaa ˈö ˗kë ˗gblüdë ˗bha ˈkɔdhigümɛn ˈka, ˗yö ˗luu ˈö dho ˈˈsɛ do ˈbhaa ˈö mü ꞊gblɛɛn ˗a ˈgü kö ˗wo ö kë ˗gblüdë ˈka, kö ˈö ö ꞊yɛɛ kë ˈö nu.
13 ˈˈSanni ˗yö ˈdho, ˗yö ö ˗bha ꞊dhuëŋ ˗nu ˗kɔŋ do ˗dhɛ ˈö ˈwëë˗ minö* ˗kɔŋ do nu ˗an ˗dhɛ, ˈö˗ pö ˗an ˗dhɛ: ‹ˈWëë˗ ˈö bhë ˗kaa ˗ʒiö ˗a ˈgü kë ˗yö ˈdho ˗yö yö ˗a ˈka n ꞊yɛɛ kë ˈˈtʋ̈ŋ ˗bha.›
14 ˈˈKɛɛ ˈdhɛ ˈö ˗kë ꞊dhɛ ˗a ˗san ˗yö ˗a ˗bha ˈˈsɛgümɛn ˗nu ˗kë bhë, ˈyö ˈwo mɛn ˗nu bɔ ˗dhɛ ˈö dho ˗a ˗bha bhë ˗a ˈgü kö ˗wa pö: ‹Yi ˈti ˈˈwɩ ˗a ˗bha kö mɛn ˈö bhë ˗yö kë ˗gblüdë ˈka yi ˗gɔdhiʋ̈.›
15 «ˈDhɛ ˈwo˗ ˗kë ˗gblüdë ˈka ˈö ö ꞊yɛɛ ˗kë ˈö nu, ˈyö ö ˗bha yökëmɛn ˗nu ˈö ˈwëëga nu ˗an ˗dhɛ kö ˗wa ˗ʒiö ˗a ˈgü kë bhë ˗an ˗dhɛ, kö ˗a ꞊trɔɔn ˈwo˗ ꞊slɔɔ ˗a ˗ta ˈö˗ dɔ.
16 ˈYö˗ mɛn ˗blɛɛsü ˗yö nu ˈö˗ pö: ‹N Dëmɛn, ü ˗bha ˈwëë˗ minö ˈü˗ to n ˗gɔ bhë, ˗a ˗kɔŋ do ˈnën ˈa˗ ꞊slɔɔ ˗a ˗ta.›
17 ˈYö ˗gblüdë ˗ya pö ˗a ˗dhɛ: ‹Ü˗ ˗kë ˗së yökëmɛn ˗tiaandhö, ü˗ ˗zɔn ꞊dhɛ ˗zo ˗tën ˗a ˗dhɛ ˗mɛn ˗mü ü ˈka pë ˈdɛdɛ ˈa˗ ˈˈklɔɔnbho ü ˗bha bhë ˗a ˈgü. ˗A ˗wɔn ˈgü a ˗dho ü ˗ya ˈˈkwipö ˗kɔŋ do ˗gɔdhiʋ̈.›
18 ˈYö˗ mɛn ꞊plɛ ˗naan ˗yö nu ˈpö ˈö˗ pö: ‹N Dëmɛn, ü ˗bha ˈwëë˗ minö ˈü˗ to n ˗gɔ bhë, ˗a ˈˈsoodhu ˈnën ˈa˗ ꞊slɔɔ ˗a ˗ta.›
19 ˈYö ˗gblüdë ˗ya pö ˗a mɛn ˈdhɛ ˈö bhë ˗a ˗dhɛ: ‹Bhi ˗de ˈpö a ˗dho ü ˗ya ˈˈkwipö ˈˈsoodhu ˗gɔdhiʋ̈.›
20 ˈˈKɛɛ ˈyö˗ mɛn do ˈˈwɛɛ ˈbhaa ˗yö nu ˈö˗ pö ˗gblüdë ˗dhɛ: ‹N Dëmɛn, ü ˗bha ˈwëë˗ minö ˈü˗ to n ˗gɔ bhë ˈyö ꞊nɛn. A˗ ˗da sɔ ˈgü ˈa˗ ˗bin ˗së ˈka.
21 Bhi ꞊dede ü˗ ˈwɔn ˗dɔ ꞊dhɛ a ˗suʋ̈ ü ˗gɔ, ˈyö sü ꞊dhɛ ü ˗bha ˈwɔn ˗yö ˈya˗. ˈDhɛ ü ˈti pë ˈwaannu ˗a ˗bha, ü pë ˗sü mü, ˈö ˈpë ü ˈti˗ ta, ˈü˗ ˗kan.›
22 ˈYö ˗gblüdë ˗ya ˗yɔ bɔ ˗a ˗gɔ ˈö˗ pö: ‹Ü ˗de ˈˈdhiwo ˈnën ˈa ˗dho ˗gban ˗a ˗ta ˈa ü zë za ˈka, yökëmɛn ꞊suu yaa˗ ˗sü. Bhi ꞊dede ˈü˗ ˈwɔn ˗dɔ ꞊dhɛ n ˗man ˈwɔn ˗yö ˈya˗, ˈdhɛ n ˈti pë ˈwaannu ˗a ˗bha, a pë ˗sü mü, ˈö pë ˈö n ˈti˗ ta ˈa˗ ˗kan. ˈYaa ˈˈdhʋ̈ ˗ee?
23 ˈDhɛ ˈö ˈˈdhʋ̈, ˈmën ˗kë ˈö n ˗man ˈwëëga ˈö bhë ü ˈti ˈdho ˗a ˈka ˈwëë˗ ˗kɔ ˈgü kö ˈü˗ wɔ mü? ˗Ya kë ꞊dhɛ ü˗ ˗kë ˈˈdhʋ̈ ˗be, kö nu ˈa˗ wo yö ˗a ꞊trɔɔn ˗dho kë ˗a ˗ta ˈa˗ sü ˗a ˈka mü.›
24 «ˈYö go mü ˈö˗ pö mɛn ˗nu ˈwo kun mü bhë ˗an ˗dhɛ: ‹Minö ˈö˗ ˗gɔ bhë ˗kaa ˈsü ˗a ˗gɔ ˈka˗ nu ˗a mɛn ˈö˗ ˗kɔŋ do ˈdhö˗ ˗gɔ bhë ˗a ˗dhɛ.›
25 ˈˈKɛɛ ˈyö ˈwo˗ pö ˗a ˗dhɛ: ‹ˈYö yi Dëmɛn, mɛn ˈö minö ˗kɔŋ do ˈdhö˗ ˗gɔ bhë ˈzü ˗ee?›
26 ˈYö˗ ˗yɔ bɔ ˗an ˗gɔ ˈö˗ pö: ‹A˗ pö ka ˗dhɛ ꞊dhɛ, mɛn ˈö pë ˈdhö˗ ˗gɔ, ˗wo ˗dho ˗a ˈbhaa nu ˗a ˗dhɛ, ˈˈkɛɛ mɛn ˈö pë ˈbhaa ˈyaa˗ ˗gɔ, ˗a pë ˈˈtɩtɩ ˗ʒiaan ˈö˗ ˗gɔ bhë ˗wo ˗dho ˗a ˈsü ˗a ˗gɔ.
27 ˗Ya ˈgo mü ˈzü, n ˈyɔɔ˗ ˗nu ˈö ˈwaa kun ˗a ˈˈpiʋ̈ ꞊dhɛ ˈa kë ˗gblüdë ˈka wo ˗ta bhë, ˗ka nu ˗an ˈka n ˈˈɲan ˈˈdhiʋ̈ yö ˈka ˗an zë.›»
28 ˈDhɛ ˈö Yesu ˗yö ö bo ˗a ˗pö ˈˈdhʋ̈ ˗sü ˈka, ˈyö yö mɛn ꞊gban ˈˈpɛpɛ ˗dhɛ ˈˈdhiʋ̈ ˈö ʒiaan ˈö dho Zedhizadhɛmö ˗a sü.
29 ˈDhɛ ˈö ˗lo Bɛtüfaʒe waa Betani ˗dhɛ ˗an ˈˈsuee Olivie ˗tɔn ˗ta, ˈyö ö ˗bha gwëëˈˈ ˗nu bhë ˗a mɛn ꞊plɛ bɔ,
30 ˈö˗ pö ˗an ˗dhɛ: «˗Ka ˈdho ˈpödhɛ ˈö ˈka˗ ˗ga ˗ni ˗de ˗a ˈgü. ˈKa ˗da ˈplöö, ka ˗dho ˗kpan ꞊soofëŋ ˈnën do ˈö mɛn ˈbhaa yö ˈti ˗ya ˗a ꞊taa do ˗a ˗bha kö ˗yö ˗klu ˗sü ˈka. ˗Kaa ˈˈpʋ ˈka nu ˗a ˈka yö.
31 Mɛn ˈbhaa ˗ya ka dhɛɛˈˈ ˈkpɔ ꞊yaa˗ pö: ‹ˈMën ˗kë ˈö ˈka˗ ˗pʋ?› ˗Kaa pö ˗a ˗dhɛ: ‹Yi Dëmɛn ˗bhawɔn ˗ya yö ˗a ˗bha.›»
32 ˈDhɛ ˈö ˗kë ˈˈdhʋ̈, ˈyö mɛn ˗nu ˈö ˗an bɔ bhë ˈwo dho ˈwo ˗kpan ꞊soofëŋ ˈnën ˈö bhë ˗a ˗bha ꞊dhɛ ˗kɔ ˈö˗ pö ˗a ˈka ˗an ˗dhɛ bhë ˗a ˈdhö.
33 ˈˈKɛɛ ˈdhɛ ˈwo kun ˗a ˈˈpʋ ˗ni ˈgü, ˈyö ˗a dëmɛn ˗nu ˗wa pö ˗an ˗dhɛ: «ˈMën ˗kë ˈö ˈka˗ ˗pʋ?»
34 ˈYö ˈwo˗ pö ˗an ˗dhɛ: «Yi Dëmɛn ˗bhawɔn ˗ya yö ˗a ˗bha.»
35 ˈDhɛ ˈö ˗kë ˈˈdhʋ̈, ˈyö ˈwo dho ꞊soofëŋ ˈnën ˈö bhë ˗a ˈka Yesu ꞊dhiaa, ˈyö ˈwo wo ˗bha sɔ ˗nu ˗lo ˗a ꞊taa, ˈö Yesu ˗yö ˗ya ˗a ꞊taa.
36 ˈDhɛ ˈö kun ˈdho ˗ni ˈgü kö mɛn ˗nu ˗wo wo ˗bha sɔ ˗nu ˈkpɔ ˗ni ˈgü ˈˈshia˗ ʒiaan ˗ta.
37 ˈDhɛ ˈö yö ʒiaan ˈö go Olivie ˗tɔn ˗ta ˈö ꞊yɔɔ bhë ˗a ˈˈsuee, ˈyö˗ ˗bha gwëëˈˈ ˗nu ꞊va ꞊dede ˈwo kun ˗a ꞊kee˗ bhë ˈwo ˗ya zuʋ̈gblüdhi kë ˗sü ˗bha, ˈö ˈwo ˗Zlan ˈtɔ bhɔ wo ˗wo ˗ta ˗dhidha ˈˈpɛpɛ ˈö ˗an ˈˈɲan ˗yö ˗da ˗a ˈgü bhë ˗an ˗wɔn ˈgü,
38 kö ˗wa pö ˗ni ˈgü: «ˈDhuëë˗ ˗yö ˈkpɔ ˗Gblüdë ˈö nu Zoova ˈtɔ ˈgü bhë ˗a ˗bha! ˗Dhikodhɛ ˗yö kë dhaŋ˗ ˈgü, ˗Zlan ˈö ˗ya ˗sü ˈka dhaŋ˗ ˈgü ˗a ˈtɔ ˗yö bhɔ!»
39 ˈˈKɛɛ ˈyö Fadhiziɛn ˈbhaa ˗nu ˈwo kun ˗an kpö ˈgü mü ˈwo˗ pö ˗a ˗dhɛ: «˗Gɔmɛn, ˗a pö ü ˗bha gwëëˈˈ ˗nu ˗dhɛ ˗wo wo ˈˈdhi ta.»
40 ˈYö Yesu ˗ya pö ˗an ˗dhɛ: «A˗ ˗pö ka ˗dhɛ ꞊dhɛ, ˈkö ˗kë ꞊dhɛ ˗wo wo ˈˈdhi ˗ta, ˗gwö kpö ˗nu ˗dho ˈˈgbla.»
41 ˈDhɛ ˈö yö Zedhizadhɛmö ˗dhɛ ˈka ꞊klöö˗, ˈö˗ ˗ta ˗ga, ˈyö ˗ya ˈˈgbʋ bɔ ˗sü ˗bha ˗a ˗wɔn ˈgü,
42 ˈö˗ pö: «˗Ya kë ꞊dhɛ bhi ˗de ˈpö, pë ˗nu ˈwo ˗dho nu ˗yadeflëëgüsü ˈka ü ˗an ˗dɔ ˗be ˈˈtʋ̈ŋ ˈö yö ˗a ˈgü, kö ˗yö ˗së. ˈˈKɛɛ ꞊dɛɛ, ˗a ˗ga ˈwo ˗bin ˗sü ˈka ü ˗gɔ bhë.
43 ˗A ˗gɛn ˗mü ꞊dhɛ ˗a yi ˗dho ˗wo, ˈö ü ˈyɔɔ˗ ˗nu ˗wo ˈˈsaan ˗kan* ü ˗zü ˈˈdhü ˈwo˗ ɲën ˗a ˈka. ˗Wo ˗dho ꞊klëën˗ ü ˗zü ˈö ˈwo yö ü ˈˈdhiʋ̈ ʒiaan ꞊gban ˈka.
44 ˗Wo ˗dho ü wüüˈˈ ꞊trëëtrëëdhö, ˈö ˈwo ü ˗bha ˈnën* ˗nu ˈgü ꞊shiʋ̈. ˈKɔ ˗nu ˈwo ü ˈgü, wo ˈti ˗dho ˗a dosɛnŋ ˗gwö ˈto ˈko ˗ta, ˗a ˗gɛn ˗mü ꞊dhɛ ˈˈtʋ̈ŋ ˈö ˗Zlan ˗kë ü ˗ga ˗ni ˈgü ˗a ˈka kö ˈö za dɔ ü ˗bha bhë, ü ˈti˗ ˈsuaan˗ bho.»
45 ˈDhɛ ˈö dho ˈö ˗da ˗Zlan ˗dhɔkë ˗a ˈgü ˗kɔ ˈgü, ˈyö ˗ya mɛn ˈˈpɛpɛ ˈwo kun ˈˈdhoodɔ ˗ni ˈgü ˗an kë ˗sü ˗bha kö ˗wo yö ˈˈkpɛnŋ.
46 ˈYö˗ pö ˗an ˗dhɛ: «˗Yö ˗bɛnzë ˗sü ˈka ˗Zlan ˗Wo ˈsëëdhɛ ˈgü ꞊dhɛ: ‹˗Wo ˗dho n ˗man ˈkɔ ˗dhɛ ˗bhɛɛ ˗a ˈgü ˗kɔ.› ˈˈKɛɛ ka ˗zë ˈka˗ kë ꞊kwaanmɛn ˗nu ˗ya ˗a ˈgü ˗kɔ ˈka.»
47 ˗Yö ˗kun mɛn ˗nu ꞊klaŋ kë ˗ni ˈgü ˗kplawo ˗dhɛkpaɔyi ˈˈpɛpɛ ˈka ˗Zlan ˗dhɔkë ˗a ˈgü ˗kɔ ˈgü. ˗A ˈˈtʋ̈ŋ ˈö bhë ˗a ˈgü, ˈˈsaabhomɛn ˗nu ˗gɔmɛn ˗nu, ˈtɔŋ˗ ˗gɔmɛn ˗nu waa Zuifö ˗nu ˗gɔmɛn ˗nu ˗wo ˗kun ˗a ˈˈslö mɛɛnˈˈ ˗ni ˈgü kö ˈwo˗ zë.
48 ˈˈKɛɛ ˗kɔ ˈwo dho ˗a kë ˗a ˈka, ˈwaa kun ˗a dɔ ˗ni ˈgü, ˗a ˗gɛn ˗mü ꞊dhɛ mɛn ꞊gban ˈˈpɛpɛ ˗kun wo ˈˈtʋ ˈto ˗ni ˈgü ˗a ˗wo ˗bha.
-Zoto -a ˈˈpiʋ̈ -wɔn -nu
^ Ɛɛnˈˈ «ˈö ˗wo.»
^ Glɛkö ˗nu ˗bha ˈwëë˗ minö do ˈnën ˈö ˗tɔ ˈwëë˗ ˈˈglamu këŋ ˗yaaga ˈö ˗kɔ ˗yiishiö (340). Yö ˈö mɛn ˗ya ˗kë ˈˈtʋ̈ŋ ˈö ˗mɔn ˈˈsu ˗yaaga ˗bha ˗a ˈka, ˗a ꞊saa mü. ˗Yö ˗mɔn drakümö këŋ do (100) ˗bha.
^ Ɛɛnˈˈ «˗glɛŋ ꞊klëën.»
^ Ɛɛnˈˈ «ü ˈgümɛn.»
