Nɔɔn˗ ˗së ˈsëëdhɛ ˈö Lukö ˗ya ˗bɛnzë 2:1-52
-
Yesu ˗bha bhɔ ˗sü (1-7)
-
˗Zlan ˗bha ˈˈkiö ˗nu ˗bha ˗wo ˗tuëë ˗maankëmɛn ˗nu ˗dhɛ ˗sü (8-20)
-
Yesu ˗bha ˗dho ˈgbannën ˈgü ˗sü waa˗ ˗kë ˈˈslʋ̈ʋ̈slʋ̈ ˗sü ˈö ˗an ˗bha wɔkɔ ˈgü (21-24)
-
Simeɔn ˗bha ˗kpan Klito ˗bha ˗sü (25-35)
-
Anö ˗yö ˈnën ˈö bhë ˗a ˗wɔn ˗blɛɛ (36-38)
-
˗An ˗bha wo ꞊yɛɛ ˗kë Nazadhɛtö ˗sü (39, 40)
-
Yesu ˗kwɛ ˗ya kë ˗kɔŋ do ö ga ꞊plɛ, ˗yö ˗Zlan ˗dhɔkë ˗a ˈgü ˗kɔ ˈgü (41-52)
2 ˗A ˈˈtʋ̈ŋ ˈö bhë ˗a ˈgü, ˈyö Sezaa Ogisö ˗yö ˈtɔŋ˗ dɔ ˈö˗ pö mɛn ˈˈpɛpɛ ˈwo ˈˈsɛ ˗ta ˗wo wo ˈtɔ ˗ya.
2 (ˈˈTʋ̈ŋ ˈö ˈtɔyadhe ˗blɛɛsü ˈö bhë ˈwo˗ ˗kë ˗a ˈka, kö Kidhinisö ˈnën ˈö Sidhi ˈˈsɛ ꞊kɔɔnmɛn ˈka.)
3 Mɛn ꞊gban ˈˈpɛpɛ ˗kun ˈdho ˗ni ˈgü wo ˗de ꞊plöö kö ˗wo wo ˈtɔ ˗ya.
4 ˈDhɛ ˈö ˗kë ˈˈdhʋ̈, ˈyö Zozɛfö ˗yö go ˈpö Nazadhɛtö ˈö Galile ˗sɛ ˈgü bhë ˗a ˈgü, ˈyö dho Betedhɛmö ˈö Zude ˈˈsɛ ˈgü ˈö ˗kë Davi ˗bha ˈpödhɛ ˈka bhë ˗a ˈgü. ˗A ˗gɛn ˗mü ꞊dhɛ ˗yö ˗kun Davi ˗bha ˈkɔdhigümɛn ˈka.
5 Waa Madhi ˈö˗ ˗za dɔ ˈö ˈwo˗ nu ˗a ˗dhɛ dhe ˈka bhë ˈyö ˈwo dho kö ˈwo wo ˈtɔ ˗ya. ˗A ˈˈtʋ̈ŋ ˈö bhë ˗a ˈgü kö Madhi ˈˈbɔ bho ˈˈtʋ̈ŋ ˗ya yö ꞊klöö˗.
6 ˗Wo ˗to mü ˈö˗ ˈˈbɔ bho ˗yi ˗yö ˗wo.
7 ˈYö ˈnëngɔɔn˗ do ˈö ˗kë ˗a ˗bha ˈnën ˗blɛɛsü ˈka bhë, ˗a kpɔ. ˈYö sɔ ꞊plʋʋ ˗a ˈka ˈö˗ ˗wɔ ˗tuëë ˗nu pë ˗bhö ˗a ˈgü ˗pë ˈgü, ˗a ˗gɛn ˗mü ꞊dhɛ ˗wɛɛ ˈyaa kun ˗dhö ˗dhɛŋ ˗nu wɔdhɛ ˈgü.
8 ˗Tuëëmaankëmɛn ˈbhaa ˗nu ˗wo ˗kun wo ˗bha ˗tuëë ˗maan kë ˗ni ˈgü ˈˈsɛ ˈö bhë ˗a ꞊gbɛɛtadhɛ ˈbhaa ˈgü mü gbeŋ.
9 ˈDhɛ ˈwo dho ˈˈkan wo ˗ta kö Zoova ˗bha ˈˈkiö do ˗ya ˗wo ˗an ˈˈɲandhiʋ̈ mü. ˈYö ˈˈshiʋ̈ ˈbhü ˈö go Zoova ˈˈpiʋ̈ ˈö ˗dhɛ ˗pʋ ˗an ˗züzüdhɛ ꞊gban ˈgü, ˈyö ˈˈsuʋ̈ ˗yö ˗da ˗an ˈgü ꞊dedewo.
10 ˈˈKɛɛ ˈyö˗ ˈˈkiö ˗ya pö ˗an ˗dhɛ: «ˈˈSuʋ̈ ˈya ˗dho ka kë, ˗a ˗gɛn ˗mü ꞊dhɛ nɔɔn˗ ˗së ˈö ˗dho mɛn ꞊gban ˈˈpɛpɛ zuʋ̈ˈˈ ꞊nii ˗da ꞊dedewo, yö ˈnën ˈa nu ˗a pö ka ˗dhɛ.
11 ꞊Dɛɛ, ˈnën ˈö ˗dho kë ka dhamɛn ˈka bhë, ˗ya bhɔ Davi ˗gɔ ˈplöö. Yö ˈnën ˈö ˗tɔ Klito ka Dëmɛn.
12 ˗Kɔ ˈö ˈka dho ˗a dɔ ˗a ˈka ˈyö ꞊nɛn: ˈKa ˈdho, ka ˗dho ˗kpan ˈnën ˈˈblë ˈˈpuu do ˈö ˗wa sɔ plʋʋˈˈ ˗a ˈka ˗a ˗bha kö ˗yö wɔ ˗sü ˈka ˗tuëë ˗nu pë ˗bhö ˗a ˈgü ˗pë ˈgü.»
13 ˈDhɛ ˈwo dho ˈˈkan wo ˗ta ˈzü, ˈyö ˗Zlan ˗bha ˈˈkiö ꞊va ꞊dede ˗wo nu ˈwo kpa ˗a mɛn ˗blɛɛsü ˈö bhë ˗a ˗bha ˈö ˈwo ˗ya ˗Zlan ˈtɔ bhɔ ˗sü ˗bha ˈö ˈwo˗ pö:
14 «˗Zlan ˈö pë ꞊gban ˈˈpɛpɛ ˗gɔ ˗ta dhaŋ˗ ˈgü ˗a ˈtɔ ˗yö bhɔ. ˗Dhikodhɛ ˗yö kë ˗Zlan waa mɛn ˗nu ˈö ˗an ˗dhɔ ˗ya ˗kë ˈˈsɛ ˗ta ˗an ꞊zinŋgü.»
15 ˈDhɛ ˈö ˗Zlan ˗bha ˈˈkiö ˗nu ˗wo ˗an to ˈö ˈwo wo ꞊yɛɛ ˗kë dhaŋ˗ ˈgü, ˈyö ˗tuëëmaankëmɛn ˗nu bhë ˈwo ˗ya ˗a pö ˗sü ˗bha wo ˈko ˗nu ˗dhɛ: «˗Kwa ˈdho Betedhɛmö kö ˈwɔn ˈö ˗kë mü ˈö Zoova ˗yö ˈˈdhɛ bho ˗a ˗ta kwa ˗dhɛ bhë ˈkwa˗ yö.»
16 ˈDhɛ ˈö ˗kë ˈˈdhʋ̈ ˈyö ˈwo dho mü ˈzozodhö, ˈyö ˈwo ˗kpan Madhi waa Zozɛfö ˗an ˗bha kö ˈnën ˈˈblë ˈˈpuu ˈö bhë ˗yö wɔ ˗sü ˈka ˗tuëë ˗nu pë ˗bhö ˗a ˈgü ˗pë ˈgü mü.
17 ˈDhɛ ˈwo˗ yö ˈˈdhʋ̈, ˈyö pë ˈö ˗Zlan ˗bha ˈˈkiö ˗ya ꞊blɛɛ ˗an ˗dhɛ ˈö ˗gban ˈnën ˈö bhë ˗a ˗bha bhë ˈwo ˗ya ˗a blɛɛˈˈ ˗sü ˗bha.
18 ˈYö mɛn ˈˈpɛpɛ ˈwo pë ˈö ˗tuëëmaankëmɛn ˗nu ˗wo kun ˗a pö ˗ni ˈgü bhë ˗a man, ˈyö˗ ˈwɔn ˗yö ˗an kun.
19 Madhi ˗zë ˗yö ˗kun ˗wo ˗nu ˈwo bhë ˗an ꞊gban ˈˈpɛpɛ ˈkun ˗ni ˈgü ö zuʋ̈ˈˈ ˈˈpiʋ̈, ˈö ö ˗zota ˗an ˈgü.
20 ˈDhɛ ˈö ˗kë ˈˈdhʋ̈, ˈyö ˗tuëëmaankëmɛn ˗nu bhë ˈwo wo ꞊yɛɛ ˗kë ˈwo dho, kö ˗wo ˗Zlan ˈtɔ bhɔ ˗ni ˈgü pë ˈwo˗ man waa pë ˈwo ˗kpan ˗a ˗bha bhë ˗an ˗wɔn ˈgü. ˗A ˗gɛn ˗mü ꞊dhɛ ˈwɔn ꞊gban ˈˈpɛpɛ ˗wo ˗kë ꞊dhɛ ˗kɔ ˈö˗ pö ˗a ˈka ˗an ˗dhɛ bhë ˗a ˈdhö.
21 ˈDhɛ ˈö ˗dhɛkpaɔyi ˈˈsaaga ˗bha ˗naan ˈö ˗kë ˈnën ˈö bhë ˗a ˗dho ˈgbannën ˈgü ˈˈtʋ̈ŋ ˈka bhë ˗yö ˗wo, ˈyö ˈwo˗ ˈtɔ ˗ya ˈö ˈwo˗ ˗dhɛ Yesu, ꞊dhɛ ˗kɔ ˈö ˗Zlan ˗bha ˈˈkiö ˗ya pö ˗a ˈka kö ˗a dhe yö ˈti˗ ˗gwü ˈsü ˗ʒiaanwo ꞊köŋ bhë ˗a ˈdhö.
22 ˈDhɛ ˈö ˗an ˗bha ˈdho ˗sü kö ˗wo kë ˈˈslʋ̈ʋ̈slʋ̈ ꞊dhɛ ˗kɔ ˈö Moizö ˗bha ˈTɔŋ˗ ˗ya pö ˗a ˈka bhë ˗a ˈdhö ˗a ˈˈtʋ̈ŋ ˗yö ˗wo, ˈyö ˈwo dho ˗a ˈka Zedhizadhɛmö kö ˗wa ˗zɔn Zoova ˗dhɛ.
23 ˗A ˗gɛn ˗mü ꞊dhɛ ˗yö ˗bɛnzë ˗sü ˈka Zoova ˗bha ˈTɔŋ˗ ˈsëëdhɛ ˈgü ꞊dhɛ: «ˈNëngɔɔn˗ ˗blɛɛsü ˈˈpɛpɛ ˈö ˗dho bhɔ, ˗an ꞊dua ˗mü kö ˗wa ˗ya ˗de ˗ta* Zoova ˗bha ˈka.»
24 ˈYö pë ˈö Zoova ˗bha ˈTɔŋ˗ ˈsëëdhɛ ˗ya pö ˗wa nu ˈˈsaapë ˈka bhë, ˈyö ˈwo˗ nu: «˗Toŋ ˈˈgblʋ̈gblʋ̈ ꞊plɛ ɛɛnˈˈ ˗toŋ ˈsɛɛn˗ ꞊plɛ.»
25 Gɔndënën do ˈbhaa ˗yö ˗kun Zedhizadhɛmö ˈö ˈwo˗ ˗dhɛ Simeɔn. ˗Yö ˗kun mɛn kpɛnŋdhö ˈö ˗suʋ̈ ˗Zlan ˗gɔ ˗a ˈka. ˗Yö ˗kun ö ˈˈɲan ˈto ˗ni ˈgü ˈˈtʋ̈ŋ ˈö ˗Zlan dho Izraɛdhö zuʋ̈ˈˈ dhuaaˈˈ ˗a ˈka bhë ˗a ˗gɔ. ˗Zuu ˈˈslʋ̈ʋ̈slʋ̈ ˗yö ˗kun ˗a ˗ta.
26 ˗Zlan ˗yö ˗bɔ ˗zuu ˈˈslʋ̈ʋ̈slʋ̈ ˗ta ˈö˗ ˗zɔn ˗a ˗dhɛ ꞊dhɛ ˗yö ˗dho ˗kpan Klito, Zoova ˗bha ˗Yamɛn ˗bha, ˈyö ꞊kun ga.
27 ˗Zuu ˈˈslʋ̈ʋ̈slʋ̈ ˗yö ˗yö ˗a ˗dhɛ ˈˈdhiʋ̈ ˈö dho ˗a ˈka ˗Zlan ˗dhɔkë ˗a ˈgü ˗kɔ ˈgü. ˈYö ˈdhɛ ˈö Yesu ˗mɛn ˗nu ˗wo nu ˗a ˈka ˗Zlan ˗dhɔkë ˗a ˈgü ˗kɔ ˈgü mü kö pë ˈö ˈTɔŋ˗ ˗ya pö ˈwo˗ kë bhë,
28 ˈyö Simeɔn ˗ya sü ö ꞊kwɛɛ˗ ˈö ˗ya ˗Zlan ˈtɔ bhɔ ˗sü ˗bha ˈö˗ pö:
29 «˗A ˈˈtʋ̈ŋ ˗ya ˗wo ꞊dha n Dëmɛn ˗Gblüdë kö ˈü ü ꞊kwaa ü ˗bha yökëmɛn ˈö ˗kë n ˈka ˗a ˗zü kö ˗yö ö ˗bha ga wo ö ˈflëëgü ꞊dhɛ ˗kɔ ˈü˗ pö ˗a ˈka bhë ˗a ˈdhö.
30 ˗A ˗gɛn ˗mü ꞊dhɛ mɛn ˈü ˗dho bɔ ˗a ˗ta kö ˈü mɛnbhɩɩdhe ˗nu dha bhë, n ˈˈɲan ꞊yaa˗ yö.
31 Yö ˈnën ˈü˗ bɔ kö mɛn ꞊gban ˈˈpɛpɛ ˈˈɲan ˗yö ˗kpan ˗a ˗bha.
32 Yö ˈnën ˈö ˗tɔ ˈˈshiʋ̈ ˈbhü ˈö pë bho ˈˈsɛ ꞊gban ˈˈpɛpɛ ˈgümɛn ˗nu ˈˈɲan ˗ta kö ˗wo ˗dhɛ yö. Yö ˈnën ˈö ˗tɔ ü ˗bha ˈˈsɛgümɛn ˗nu, Izraɛdhömɛn ˗nu ˗bha ˈtɔbhɔdhe ˈbhü.»
33 Pë ˗nu ˈwo kun ˗an pö ˗ni ˈgü ˈnën ˈö bhë ˗a ˗bha bhë, ˗a ˈwɔn ˗yö ˗a dë waa˗ dhe ˗an ˗kun ꞊dedewo.
34 Simeɔn ˗yö ˈdhuëë˗ ˗kpɔ ˗an ˗bha ˈpö, ˈö˗ pö Madhi ˈö ˗kë ˗a ˈnën dhe ˈka bhë ˗a ˗dhɛ: «ˈNën ˈö yö, ˗yö ˗dho kë mɛn ꞊vadhɛ ˗puö ˗gɛn ɛɛnˈˈ ˗an luuˈˈ ˗gɛn ˈka Izraɛdhö ˈˈsɛ ˈgü. ˗Yö ˗dho kë ˈpö ˈwɔn ˈsuaan˗ ˗bho ˗a ˗bha ˗pë do ˈö go ˗Zlan ˈˈpiʋ̈ ˈö˗ ˗san dho mɛn ˗nu kë ˗a ˈka,
35 (꞊ii, ˗blaan ˗dhaa ꞊gblɛɛn do ˗dho bɔ ü ˈgü,*) ˗yö kë ˈˈdhʋ̈ kö ˗zotadhe ˈö mɛn ꞊vadhɛ zuʋ̈ˈˈ ˈgü bhë ˈˈdhɛ ˗yö ˈgo ˗a ˗ta.»
36 ˗Zlan ˗wodhiʋ̈lodhe do ˈwo˗ ˗dhɛ Anö ˈö ˗kë Fanuɛlö ˈdhu ˈka ˈö go Asɛɛ ˗bha ˈkɔdhi ˈgü ˗yö ˗kë mü ˈpö. Dhebɔnën ˈö bhë ˗yö ˗kun zii ꞊dedewo. ˈDhɛ ˈö gwan˗ kpɔ,* waa ö ꞊gɔn ˗kwɛ ˈˈsɔɔplɛ ˈnën ˈwo˗ ˗kë wo ˈkwëë˗ ˈyö˗ ꞊gɔn ˗yö ga.
37 ˗A ˗wɔn ˈgü ˗yö ˗kun ꞊gɛandhe ˈka, ˈö˗ ˗kwɛ ˗yö kun ˗kɔŋ ˈˈsaaga ö ga ˗yiishiö (84). ˗Yö ˗kun ˗Zlan ˗dhɔkë ˗a ˈgü ˗kɔ ˈgü ˈˈtʋ̈ŋ ˈˈpɛpɛ ˈka, ˈö yö ˗kë ˗Zlan ˗dhɛ mü gbeŋ waa ˈɲënŋ˗ ˈgü, ˈsunŋ˗ ˈmën ˗sü ˈka kö ˗yö ꞊gbɛ ˈˈoo kë ˗ni ˈgü ˗Zlan ˗dhɛ.
38 ˗Dhɛkpaɔyi ˈö bhë ˗a ˈka ˈyö ꞊ɲɔɔn ˗an ˗bha ˈö ˗ya ˗Zlan nuɛˈˈ bho ˗sü ˗bha. ˈYö ˈnën ˈö bhë ˗a ˗wɔn ꞊blɛɛ mɛn ˈˈpɛpɛ ˈö ˗an ˈˈɲan kun Zedhizadhɛmö ˗dhɛ ˗bha ˗go ˈˈgan ˈgü ˗yi ˗gɔ bhë ˗an ˗dhɛ.
39 ˈDhɛ ˈwo wo bo pë ˈˈpɛpɛ ˈö Zoova ˗bha ˈTɔŋ˗ ˗ya pö ˗a kë ˗sü ˈka, ˈyö ˈwo wo ꞊yɛɛ ˗kë ˈwo dho wo ˗gɔ ˈplöö Nazadhɛtö, Galile ˗sɛ ˈgü.
40 ˈNën ˈö bhë ˗yö ˗kun ˈˈgla ˗ni ˈgü, ˈö kun kë ˗ni ˈgü ˈkpii˗. ˗A ˗bha ꞊kpɔɔdhɛ ˗yö ˗kun ˗da ˗ni ˈgü ˈˈdhiʋ̈, ˈö ˗Zlan ˗yö kun ˗a ˈˈpiʋ̈ ˗kplawo.
41 ˗Kwɛ ˈpɛpɛ ˈka, ˗a ˗mɛn ˗nu ˗wo ˗kun ˈdho ˗ni ˈgü Pakö ˈwlaan˗ ˗ta Zedhizadhɛmö.
42 ˈDhɛ ˈö˗ ˗kwɛ ˗yö ˗kë ˗kɔŋ do ö ga ꞊plɛ (12), ˈyö ˈwo dho ˈwlaan˗ ˈö bhë ˗a ˗ta ꞊dhɛ ˗kɔ ˈwo˗ ˗kë ˗a ˈka ˗kplawo ˗a ˈdhö.
43 ˈDhɛ ˈö ˈwlaan˗ ˗yö ɲën ˈö ˈwo wo ꞊yɛɛ kë ˗ni ˈgü, ˈyö Yesu ˗zë ˈö to ꞊taabha Zedhizadhɛmö mü, ˈˈkɛɛ ˗a ˈwɔn ˈyaa kun ˗a ˗mɛn ˗nu ˈˈɲaan ˈka.
44 ˗An ˗bha ˈgü ˗be ˗yö ˗kun mɛn ˗nu ˈö waa˗ ˗nu ˈwo wo ꞊yɛɛ kë ˗ni ˈgü bhë ˗an ˈˈpiʋ̈. ˈˈKɛɛ ˈdhɛ ˈwo ˗dhɛkpaɔyi do ˈˈta sü, ˈyö ˈwo ˗ya ˗a mɛɛnˈˈ ˗sü ˗bha wo ˗bha ˈkɔdhigümɛn ˗nu waa wo dɔmɛn ˗nu ˗an ˈˈpiʋ̈.
45 ˈDhɛ ˈö ˗kë ꞊dhɛ ˈwaa kun ˗kpan ˗ni ˈgü ˗a ˗bha, ˈyö ˈwo wo ꞊yɛɛ ˗kë Zedhizadhɛmö ˈö ˈwo ˗ya ˗a mɛɛnˈˈ ˗sü ˗bha ˗dhɛ ˈˈpɛpɛ ˈgü.
46 ˈDhɛ ˈö ˗dhɛkpaɔyi ˗yaaga ˗yö ˗ʒiö, ˈyö ˈwo dho ˈwo ˗kpan ˗a ˗bha ˗Zlan ˗dhɔkë ˗a ˈgü ˗kɔ ˈgü kö ˗yö ˗ya ˗sü ˈka ˗zlanwo ˈtɔŋ˗ ˗zɔn mɛn ˗dhɛ ˗mɛn ˗nu ꞊zinŋgü. ˗Yö ˗kun ö ˈˈtʋ ˈto ˗ni ˈgü ˗an ˗bha, ˈö dhɛɛˈˈ ˗nu kpɔ ˗an ˗gɔ.
47 ˗A ˗bha ˈwɔn ˈgümansü waa˗ ˗bha dhɛɛˈˈ ˗yɔ bɔ ˗kɔ ˗nu ˈwɔn ˗yö mɛn ˈˈpɛpɛ ˈwo kun wo ˈˈtʋ ˈto ˗ni ˈgü ˗a ˗bha mü ˗an ˗kun.
48 ˈDhɛ ˈö˗ ˗mɛn ˗nu ˗wo ˗kpan ˗a ˗bha, ˗a ˈwɔn ˗yö ˗an ˗kun ꞊dedewo. ˈYö˗ dhe ˗ya pö ˗a ˗dhɛ: «N gbö, ˈmën ˗kë ˈü˗ ˗kë ˈˈdhʋ̈? Yaa ü dë yi zuʋ̈ˈˈ ˈˈdhiʋ̈ ˗kun ˈˈtɛ ˗ni ˈgü, ˈö ˈya ü mɛɛnˈˈ ˗dhɛ ꞊gban ˈˈpɛpɛ ˈgü.»
49 ˈYö Yesu ˗ya pö ˗an ˗dhɛ: «ˈMën ˗kë ˈö ˈka n ꞊mɛɛn? ˈKaa˗ ˈwɔn dɔ ꞊dhɛ n ꞊dua ˗mü kö ˈa kë n Dë ˗gɔ ˈkɔɔ ˗ee?»
50 ˈˈKɛɛ pë ˈö kun ˗a pö ˗ni ˈgü ˗an ˗dhɛ bhë ˈwaa kun ˗a ˈgüman ˗ni ˈgü.
51 ˗Yö ˗ʒiö ˗an ꞊kee˗ ˈö ˈwo wo ꞊yɛɛ ˗kë Nazadhɛtö. ˗Yö ˗kun ˈwɔn man ˗ni ˈgü ö ˗mɛn ˗nu ˗ta ˗kplawo. Pë ˈˈpɛpɛ ˈö kun ˗a pö ˗ni ˈgü bhë, ˗a dhe ˗ya ꞊gban ˗kun ö zuʋ̈ˈˈ ˈˈpiʋ̈ ˗së ˈka.
52 Yesu ˗yö ˗kun ˈˈgla ˗ni ˈgü ꞊kpɔɔdhɛ ˈka ˗kplawo. ˗A ˈˈdhiaa ˗yö ˗kun ˈmën ˗ni ˈgü ˗Zlan waa mɛnbhɩɩdhe ˗nu ˗an ˈgü.
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «˗wo ˗dho ˗an ˗dhɛ ˈˈslʋ̈ʋ̈slʋ̈.»
^ Ɛɛnˈˈ «ü ˈniin˗ ˈgü.»
^ Glɛkö ˗wo ˈgü ˈyö ˗tɔ «ˈdhɛ ˈö gɔɔn˗ ˗wɔn dɔ.»
