Nɔɔn˗ ˗së ˈsëëdhɛ ˈö Lukö ˗ya ˗bɛnzë 20:1-47
20 ˗Dhɛkpaɔyi do ˈka, Yesu ˗yö ˗kun mɛn ˗nu ꞊klaŋ kë ˗ni ˈgü ˗Zlan ˗dhɔkë ˗a ˈgü ˗kɔ ˈgü, ˈö kun nɔɔn˗ ˗së pö ˗ni ˈgü. ˈYö ˈˈsaabhomɛn ˗nu ˗gɔmɛn ˗nu, ˈtɔŋ˗ ˗gɔmɛn ˗nu waa mɛn zii ˗nu ˗wo ꞊ɲɔɔn ˗a ˗bha
2 ˈö ˈwo˗ pö ˗a ˗dhɛ: «Pë ˗nu ˈü ˗an kë ˗ni ˈgü yö, ˈde ˈö ö ˗wo bho ü ˗ta kö ˈü ˗an kë? ˈDe ˈö˗ pö ˈü ˗an kë?»
3 ˈYö˗ ˗yɔ bɔ ˗an ˗gɔ ˈö˗ pö: «Man ˗de ˈpö a ˗dho dhɛɛˈˈ do ˈbhaa ˈkpɔ ka ˗gɔ, kö ˈka˗ ˗yɔ bɔ n ˗gɔ:
4 ˈDe ˈö Zan bɔ kö ˗yö mɛn ˗nu bɔ ˈˈyi ꞊bhaa? ˗Zlan ˈö dhaŋ˗ ˈgü yö ˗mü ˗ee, ɛɛnˈˈ mɛnbhɩɩdhe ˗nu ˗mü?»
5 ˈDhɛ ˈö˗ pö ˈˈdhʋ̈, ˈyö ˈwo ˗ya ˗a pö ˗sü ˗bha wo ˈko ˗nu ˗dhɛ: «Kö ˈkwa˗ pö ‹˗Zlan ˈö dhaŋ˗ ˈgü yö ˗mü,› ˗yö ˗dho ˗a pö: ‹ˈMën ˗kë ˈsa ˈö ka ˈti ˈdhaŋ˗ bho ˗a ˈˈdhiʋ̈?›
6 ˈˈKɛɛ kö ˈkwa˗ pö ˈpö: ‹Mɛnbhɩɩdhe ˗nu ˗mü,› ˈˈsɛgümɛn ˗nu ꞊gban ˈˈpɛpɛ ˗dho kwa ˗zuö ˗gwö ˈka, ˈyö sü ꞊dhɛ ˗yö ga ˗sü ˈka ˗an ˈgü ꞊dedewo ꞊dhɛ Zan ˗yö ˗kun ˗Zlan ˗wodhiʋ̈lomɛn ˈka.»
7 ˈDhɛ ˈö ˗kë ˈˈdhʋ̈ ˈyö ˈwo˗ ˗yɔ bɔ ˗a ˗gɔ ˈwo˗ pö mɛn ˈö˗ bɔ ˈwaa˗ dɔ.
8 ˈYö Yesu ˗ya pö ˗an ˗dhɛ: «Man ˗de ˈpö mɛn ˈö˗ pö n ˗dhɛ ˈa ˈwɔn ˗nu bhë ˗an kë, n ˈti ˗dho ˗a pö ka ˗dhɛ.»
9 ˈDhɛ ˈö go mü, ˈyö ˈwɔnzuan ˈö yö ˗a sü ˈö˗ ˗zɔn mɛn ˗nu ˈwo kun mü bhë ˗an ˗dhɛ ˈö˗ pö: «Gɔndënën do ˈbhaa ˗yö ö ˗bha ˗drɔɔn ˗bhla ˗kpɔ, ˈyö˗ ˗da buzan ˈgü ˈö dho ˈˈta ˈgü kö ˈö ˈˈtʋ̈ŋ ꞊va ꞊dede kë mü.
10 ˈDhɛ ˈö ˗drɔɔn bho ˈˈtʋ̈ŋ ˗yö ˗lo, ˈyö ö ˗bha yökëmɛn do bɔ mɛn ˗nu ˈwo buzan ˈgü bhë ˗an ˈˈpiʋ̈ kö ˗drɔɔn ga ˈö go ˈbhlaa ˗wa ˈbhaa bɔ ö ˗dhɛ. ˈˈKɛɛ ˈyö buzan ˈgümɛn ˗nu ˗wo mɛn ˈö˗ bɔ bhë ˗a ˗man, ˈö ˈwo˗ ˗kë ˈö ˗ʒiö ö ˗kɔ ˈˈfuöö ˈka.
11 ˈDhɛ ˈö ˗kë ˈˈdhʋ̈, ˈyö ö ˗bha yökëmɛn do ˈˈwɛɛ ˈbhaa bɔ ˈzü. ˈˈKɛɛ ˈyö buzan ˈgümɛn ˗nu ˗wo mɛn ˈdhɛ ˈö bhë ˗a ˗man ˈpö, ˈö ˈwo ˈlëë˗ dɔ ˗a ˗bha, ˈö ˈwo˗ ˗kë ˈö ˗ʒiö ö ˗kɔ ˈˈfuöö ˈka.
12 ˈYö˗ ˈbhla˗ dëmɛn ˗yö mɛn ˗yaaga ˗naan bɔ ˈzü. ˈˈKɛɛ ˈyö buzan ˈgümɛn ˗nu ˗wa ˗gi, ˈö ˈwo˗ ˗kë ˈö ˗ʒiö.
13 ˈDhɛ ˈö ˗kë ˈˈdhʋ̈, ˈyö ˗drɔɔn ˗bhla dëmɛn ˗ya pö: ‹A ˗dho ˗a kë ꞊dhɛ ˗oo? A ˗dho n gbö ˈö˗ ˗dhɔ n ˗kë ꞊dedewo bhë ˗a bɔ. ˗Ya kë yö ˗zë ˗a ˈka, ˗wo ˗dho ˗a ꞊bhlëë ˗ya.›
14 ˈDhɛ ˈö buzan ˈgümɛn ˗nu ˗wo ˗kpan ˗a gbö ˗bha, ˈyö ˈwo ˗ya ˗a pö ˗sü ˗bha wo ˈko ˗nu ˗dhɛ: ‹Mɛn ˈö ˈkɛnŋ˗ dho ˈto ˗a ˗gɔ ˈyö nu ˗ni ˈgü bhë. ˗Kwaa zë kö ˈkɛnŋ˗ ˈö bhë ˗yö ˈto kwa ˗gɔ.›
15 ˈDhɛ ˈö ˗kë ˈˈdhʋ̈, ˈyö ˈwo˗ -gan ˈwo go ˗a ˈka ˗drɔɔn ˗bhla ˈgü, ˈö ˈwo˗ zë. Ka ˗bha ˈgü ˈmën ˈö ˗drɔɔn ˗bhla dëmɛn ˈö bhë ˈö ˗dho ˗a kë ˗an ˈka?
16 ˗Yö ˗dho nu ˈö buzankëmɛn ˗nu ˈwo bhë ˗an zë, ˈö ö ˗bha ˗drɔɔn ˗bhla nu mɛn ˈˈwɛɛ ˗nu ˗dhɛ.»
ˈDhɛ ˈö mɛn ˗nu ˈwo kun ˈmü bhë ˈwo˗ man ˈˈdhʋ̈, ˈyö ˈwo˗ pö: «ˈWɔn ꞊suu ˈö bhë ˈyaa ˗dho kë toŋtoŋdhö!»
17 ˈˈKɛɛ ˈyö Yesu ˗yö ˗an ˗ta ˗ga ˈö˗ pö ˗an ˗dhɛ: «ˈDhɛ ˈö ˈˈdhʋ̈ ˈsa, ˗a pö ˈö ˗Zlan ˗Wo ˈsëëdhɛ ˗ya wo ꞊dhɛ: ‹˗Gwö ˈö ˈkɔdɔmɛn ˗nu ˗wa sü ˗gwö yaa ˈka ˈö ˈwo˗ ˗zuö bhë, yö ˈnën ˈö ˗ya kë ˗gwö ˗wɔn ˈˈgbɩɩ˗ ˗sü ˈka› bhë, ˗a ˗gɛn ˈnën ˗tɔ ˗mën?
18 Mɛn ˈˈoo ˗mɛn ˈö ˗puö ˗gwö ˈö bhë ˗a ˗ta ˗yö ˗dho yɛɛˈˈ. Mɛn ˈö ˗gwö ˈö bhë ˈö dho ˗puö ˗a ˗ta ˈpö, ˗yö ˗dho ˗a ˗böö bho.»
19 ˈDhɛ ˈö ˈtɔŋ˗ ˗gɔmɛn ˗nu waa ˈˈsaabhomɛn ˗nu ˗gɔmɛn ˗nu ˗wa yö ꞊dhɛ wo ˈnën ˈö ˈˈwɩ ˗ni ˈgü wo ˈka ˈwɔnzuan ˈö bhë ˗a ˈgü bhë, ˈyö ˈwo ˗ya ˗a ˈˈslö mɛɛnˈˈ ˗sü ˗bha kö ˈwo ˈto mü ˈwo˗ ˈkun. ˈˈKɛɛ ˗wo ˗kun ˈˈsuʋ̈ ˗ni ˈgü mɛn ˗nu ˈwo kun ˈmü bhë ˗an ˗gɔ.
20 ˈDhɛ ˈwo Yesu ˈsuaan˗ bho ˗së ˈka, ˈyö ˈwo mɛn ˈbhaa ˗nu ꞊saa bho ˗bindhe ˈgü ˈö ˈwo ˗an bɔ Yesu ˈˈpiʋ̈ kö ˗wo wo ˗de kë ꞊dhɛ ˈwɔnsëkëmɛn ˗nu ˈdhö. ˗Yö ˗kun ˗an ˈˈpiʋ̈ ꞊dhɛ ˈwo ˈˈkpënŋ˗ kë ˗a ˗gɔ kö ˈwo dɔ ˗a ˗wo ˗nu ˗ta ˈwo˗ ˈkun ˗dhɛ yö, kö ˈwo˗ nu mɛn ˗nu ˈö ˗wogbinŋdhɛ ˈdhö ˗an ˗gɔ waa ˈˈsɛgɔdhiʋ̈mɛn ˗nu ˗an ˗dhɛ.
21 ˈDhɛ ˈö ˗kë ˈˈdhʋ̈, ˈyö mɛn ˗nu ˈwo ˗an bɔ bhë ˈwo Yesu dhɛɛˈˈ kpɔ ˈwo˗ pö: «˗Gɔmɛn, yi˗ ˈwɔn ˗dɔ ꞊dhɛ pë ˗nu ˈü ˗an pö waa pë ˗nu ˈü mɛn ˗nu ꞊klaŋ ˗kë ˗an ˈka bhë gagade ˗mü. ˗Ya ˈgo mü ˈzü, ˈbhaa mɛn ˗nu ˗zë ˈgü kë. ˈWɔn ˗nu ˈü ˗an blɛɛˈˈ ˗ni ˈgü ˈö ˈwo ˗gban ˗Zlan ˗bha bhë, ˗wo ˗gban gagade ˗ta.
22 ˈDhɛ ˈö ˈˈdhʋ̈, ü ˗bha ˈgü ˗a ˗dhɛ ˗ya ˗bha kö ˈkwa ˈniin˗ ꞊sɔnŋ bho Sezaa ˗dhɛ ˗ee?»
23 ˈˈKɛɛ ˈdhɛ ˈö ˗kë ꞊dhɛ Yesu ˗yö ˗an ˗bha ˈˈkpënŋ˗ ˈö bhë ˗a ˗dhɛ ˗yö bhë, ˈyö˗ pö ˗an ˗dhɛ:
24 «˗Ka denie* ˈˈtamanga do ˗zɔn. ˈDe ˈö˗ ˗gɔ ˈˈbin waa˗ ˈtɔ ˈdhö ˗a ˗ta yö?» ˈYö ˈwo˗ pö: «Sezaa ˗mü.»
25 ˈDhɛ ˈwo˗ pö ˈˈdhʋ̈, ˈyö˗ pö ˗an ˗dhɛ: «ˈDhɛ ˈö ˈˈdhʋ̈, pë ˗nu ˈwo Sezaa ˗bha ˈka ˗ka ˗an nu Sezaa ˗dhɛ, kö pë ˗nu ˈwo ˗Zlan ˗bha ˈka, ˈka ˗an nu ˗Zlan ˗dhɛ.»
26 ˗A ˗bha ˈwɔn ˗daa kë ˗kɔ ˈö bhë ˗ya ˗kë ˈö wo ˈti ꞊mɔɔn˗ ˗bha ˗wo dɔ ˗a ˗wo ˗ta kö ˗wa ˈkun ˗dhɛ yö mɛn ˗nu ˈˈɲan ˈˈdhiʋ̈ mü. ˗A ˈwɔn ˗yö ˗an ˗kun ꞊ʒiaan ˈö ˈwo wo ˈˈdhi ta.
27 ˈDhɛ ˈö ˗kë ˈˈdhʋ̈, ˈyö Sadusiɛn ˗nu ˈö ˈwo˗ pö ꞊dhɛ ˗go ga ˈgü ˗sü ˈyaa ˈdhö bhë, ˗a mɛn ˈbhaa ˗nu ˗wo nu ˈö ˈwo˗ dhɛɛˈˈ kpɔ ˈwo˗ pö:
28 «˗Gɔmɛn, pë ˈö Moizö ˗ya ˗bɛnzë ˈö˗ to kwa ˗gɔ ˗ya ˗pö ˗a ˈgü ꞊dhɛ: ‹Gɔɔn˗ ˈö waa ö ˗bha dhebɔ wo ˈti ˈnën ˈkpɔ ˗ya ga, ˗a ꞊dhegblü gɔɔn˗ dua ˗mü kö ˗yö ˗a ˗bha ꞊gɛandhe ˈö to bhë ˗a ˈsü dhe ˈka kö ˗wo ˈnën ˈkpɔ, kö ˗yö kë mɛn ˈö ga bhë ˗a ꞊suugünën ˈka.›
29 ˈˈKɛɛ ˈnën gɔɔn˗ ˗nu ˈˈsɔɔplɛ ˗wo ˗kun ꞊dhegblüzë ˗nu ˈka. ˈDhɛ ˈö˗ mɛn ˗blɛɛsü ˗yö dhe sü, waa ö ˗bha dhebɔ wo ˈti ˈnën ˈkpɔ ˈyö ga.
30 ˈYö˗ mɛn ꞊plɛ ˗naan ˗yö ꞊gɛandhe ˈö bhë ˗a sü.
31 ˈYö go mü ˈyö˗ mɛn ˗yaaga ˗naan ˗ya sü. ˈYö ˗kë ˈˈdhʋ̈ ˈö dho ˗a ˈka, ˈö dhebɔ ˈö bhë ˈö gwaan˗ kpɔ ˗kɔ ˈwo˗ ˗bha ˈˈsɔɔplɛ ˗an ˗gɔ. ˗An ꞊gban ˈˈpɛpɛ wo ˈti ˈnën ˈkpɔ ˈö ˈwo ga.
32 ˈYö˗ dhebɔ ˗de ˈpö ˈö ga ꞊taabha.
33 ˈDhɛ ˈö ˈˈdhʋ̈, ˗go ga ˈgü ˗yi ˈka, de ˈö dhebɔ ˈö bhë ˈö ˗dho ˈto ˗a ˗gɔ? ˗A ˗gɛn ˗mü ꞊dhɛ ˗kɔ ˈwo˗ ˗bha ˈˈsɔɔplɛ ˗yö ˗kë ˗an ꞊gban ˗bha dhebɔ ˈka.»
34 ˈYö Yesu ˗ya pö ˗an ˗dhɛ: «ˈˈTʋ̈ŋ ˈö yö ˗a ˈgümɛn ˗nu ˗wo dhe ˗sü, ˈö ˈwo dhebɔ ˗nu dɔ gwaan˗ ˗bha.
35 ˈˈKɛɛ mɛn ˗nu ˈö ˗Zlan dho ˈˈwɩ ˗a ˗bha kö ˗wo ˗tosɛta kë ˈˈtʋ̈ŋ ˈö nu ˗ni ˈgü bhë ˗a ˈgü, kö ˗wo ˈgo ga ˈgü bhë, wo ˈti ˗dho dhe ˈsü ɛɛnˈˈ wo ˈti ˗dho ˗a dhebɔ ˗nu dɔ gwaan˗ ˗bha.
36 ˗A ˈˈtʋ̈ŋ ˈö bhë ˗a ˈgü wo ˈti ˗dho ga ˈzü, ˗a ˗gɛn ˗mü ꞊dhɛ ˗wo ˗dho kë ꞊dhɛ ˗Zlan ˗bha ˈˈkiö ˗nu ˈdhö. ˗Wo ˗dho kë ˗Zlan ˗bha ˈnën ˗nu ˈka ˗go ga ˈgü ˗sü ˈsaa˗ ˈgü.*
37 ˈˈKɛɛ ˗a ˈdhɛ ˈö ˗gban ˗go ga ˈgü ˗sü ˗bha bhë, Moizö ˗ya ˗blɛɛ ˈˈpuu ˈka ˗kwɛzlan ˈö ˗gban ˈˈglɛɛn ˗kpɔɔ ˗bha bhë ˗a ˈgü. ˗Kwɛzlan ˈö bhë ˗a ˈgü, ˗yö Zoova ˗dhɛ ‹Ablaamö ˗bha ˗Zlan, Izaakö ˗bha ˗Zlan waa Zakɔbö ˗bha ˗Zlan.›
38 ˈDhɛ ˈö ˈˈdhʋ̈, ˗yö mɛn ˗nu ˈö ˈwo ˈˈbhɩɩ˗ ˗an ˗bha ˗Zlan ˈka, ˈyaa mɛn ˗nu ˈö ˗wa ga ˗an ˗bha ˗Zlan ˈka. ˗A ˗gɛn ˗mü ꞊dhɛ ˗a ˈˈɲan ˈˈdhiʋ̈* ˗wo ꞊kun ˈˈbhɩɩ˗.»
39 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö ˈtɔŋ˗ ˗gɔmɛn ˈbhaa ˗nu ˗wa pö ˗a ˗dhɛ: «˗Gɔmɛn, ˈwɔn ˗yɔ ˈü˗ bɔ bhë ˗yö ˗së.»
40 ˗A ˗gɛn ˗mü ꞊dhɛ ˗a ˈˈse ˈyaa kun mɛn ˈbhaa ˗dhɛ ˈzü kö ˗yö dhɛɛˈˈ ˈbhaa ˈkpɔ ˗a ˗gɔ.
41 ˈDhɛ ˈö ˗kë ˈˈdhʋ̈, ˈyö Yesu ˗de ˈpö ˈö dhɛɛˈˈ kpɔ ˗an ˗gɔ ˈö˗ pö: «ˈMën ˗kë ˈö ˈwo˗ pö ꞊dhɛ Davi gbö ˗mü Klito ˈka?
42 Ka dhɛɛˈˈ ˈa˗ kpɔ ˈˈdhʋ̈ bhë ˗a ˗gɛn ˗mü ꞊dhɛ ˈˈtan ˗nu ˈsëëdhɛ ˈgü, Davi yöö ꞊dede ˗ya ˗pö: ‹Zoova ˗ya ˗pö n Dëmɛn ˗dhɛ: «˗Bhö ˗ya n ˗kɔ ˗së ˈgü,
43 kö ˗yö ˈto ˗a ˈka ˈˈdhʋ̈ ˗yö yö ˗a ˈka ˈˈtʋ̈ŋ ˈa ˗dho ü ˈyɔɔ˗ ˗nu ˗da ˗a ˈka ü ˗gɛn ꞊löö kö ˗wo kë ü ˗gɛn ˗dɔ ˗a ˗ta ˗pë ˈka bhë ˗a ˗bha.»›
44 ˈDhɛ ˈö ˈˈdhʋ̈, Davi ꞊yaa˗ ˗dhɛ ö Dëmɛn, kö ˗ya gbö ˈka ˗kɔ ˗kë ꞊dhɛ ˈsa?»
45 ˈDhɛ ˈö ˗kë ˈˈdhʋ̈, kö mɛn ꞊gban ˈˈpɛpɛ ˗wo wo ˈˈtʋ ˈto ˗ni ˈgü ˗a ˗wo ˗bha. ˈYö˗ pö ö ˗bha gwëëˈˈ ˗nu ˗dhɛ:
46 «˗Ka ka ˗de ˈkun ˈtɔŋ˗ ˗gɔmɛn ˗nu ˈö gblɔŋ ꞊gblɛnŋgblɛnŋ ˗da ˗sü ˈö ˈwo ˗glü ˗a ˈka ˗a ˗dhɔ ˗yö ˗an ˗kë, ˈö ˈwo˗ ˈˈpiʋ̈ kö mɛn ˗nu ˗wo ˗an ꞊tuaabho ˈˈdhookwëëdhɛ ˗nu ˈgü bhë ˗an ˗bha. ˗Yɛɛ ˗blɛɛsü ˗nu ˈwo ˈˈdhiʋ̈ ˗yakwëë ˗kë ˗a ˈgü ˗kɔ ˗nu ˈgü waa ˗yɛɛ ꞊bhlëësü ˗nu ˈwo ˈwlaan˗ ˗nu ˗ta ˈyö˗ ˗dhɔ ˗yö ˗an ˗kë.
47 ˗Wo ꞊gɛandhe ˗nu ˗bha pë ˈˈpɛpɛ* ˈö ˗an ˗gɔ ˗a ˗sü ˗an ˗gɔ, ˈö ˈwo wo ˗bha bhɛɛwo ˗nu ˗kë ꞊gblɛnŋ kö mɛn ˗nu ˈˈɲan ˗yö bɔ wo ˗ta. Za ˈö ˗dho dɔ ˗an ˗bha, ˗yö ˗dho kë ꞊gbɔɔnsü ˈö ˗ʒiö ˗a ˈka mü.»
-Zoto -a ˈˈpiʋ̈ -wɔn -nu
^ Denie do ˈnën ˗tɔ ˗dhɛkpaɔyi do ˗yö ꞊saa.
^ Ɛɛnˈˈ «ˈyö sü ꞊dhɛ ˗wa kë ˗go ga ˈgü ˗sü ˗bha ˈnën ˗nu ˈka.»
^ Ɛɛnˈˈ «˗a ˗bha ˈka.»
^ Ɛɛnˈˈ «ˈkɔ ˗nu.»
