Nɔɔn˗ ˗së ˈsëëdhɛ ˈö Lukö ˗ya ˗bɛnzë 22:1-71
-
ˈˈSaabhomɛn ˗nu ˗wo Yesu zë ˗wɔn ˗yökodhiʋ̈ ˗kë (1-6)
-
Pakö ˗totaabhasü ˗bhöpë ˗wɔn ˈˈɲan bhɔ ˗sü (7-13)
-
Dëmɛn ˗bha ˗bhöpë ˈwlaan˗ ˗blɛɛsü (14-20)
-
«Mɛn ˈö ˗dho n ˈˈdhoodɔ bhë, ˗yö n ˈˈpiʋ̈ ˈtaablö ˈˈdhiʋ̈ yö» (21-23)
-
Yesu ˗bha gwëëˈˈ ˗nu ˗wo zɔɔdhe ˈˈgbɩɩ˗ ˗man wo ˈˈkwöö kö mɛn ˈö ˗dho kë mɛn ˈkpii˗ ˈka ˈwo˗ dɔ (24-27)
-
‹ˈMan ˗Gblüdëdhɛ ˗mlɛɛn ˗da kwaa˗ ˗nu kwa ꞊zinŋgü› (28-30)
-
Yesu ˗ya ˗to ˈˈdhiʋ̈ ˈö˗ pö Piɛɛ ˗dho ˗a pö ˈyaa ö dɔ (31-34)
-
Ö ˗de baaˈˈ ˗sü ˗wɔn ˗bha ˗kë ˈˈgbɩɩ˗ ˗sü waa ˗blaan ˗dhaa ꞊plɛ (35-38)
-
Yesu ˗yö ˗bhɛɛ Olivie ˗tɔn ˗ta (39-46)
-
Yesu ˈkun ˗sü (47-53)
-
Piɛɛ ˗ya ˗pö ˈyaa Yesu dɔ (54-62)
-
꞊Wɛɛ˗ ˗dɔ Yesu ˗bha ˗sü (63-65)
-
Zakanmɛn ˗nu ˗bha za ˗dɔ Yesu ˗bha ˗sü (66-71)
22 ˗A ˈˈtʋ̈ŋ ˈö bhë ˗a ˈgü, kö ˈbluu˗ ˈö ˈˈsɛkɛ ˈyaa˗ ˈˈpiʋ̈ ˗a ˈwlaan˗ ˈwo˗ ˗dhɛ Pakö bhë ˗ya yö ꞊klöö˗.
2 ˈˈSaabhomɛn ˗nu ˗gɔmɛn ˗nu waa ˈtɔŋ˗ ˗gɔmɛn ˗nu ˗wo ˗kun Yesu zë ˈˈtʋ̈ŋ ˗së mɛɛnˈˈ ˗ni ˈgü, ˈyö ˗tɔ ꞊dhɛ ˗wo ˗kun ˈˈsuʋ̈ ˗ni ˈgü ˈˈsɛgümɛn ˗nu ˗gɔ.
3 ˈDhɛ ˈö ˗kë ˈˈdhʋ̈, ˈyö Sɔtraan ˗yö ˗da Zuda ˈö ˈwo˗ ˗dhɛ Isikadhiɔtö ˈö ˗kë Yesu ˗bha bɔmɛn ˗nu ˗kɔŋ do ö ga ꞊plɛ ˈwo bhë ˗a mɛn do ˈka bhë ˗a ˈgü.
4 ˈYö dho ˈö yö ˈˈsaabhomɛn ˗nu ˗gɔmɛn ˗nu waa ˗Zlan ˗dhɔkë ˗a ˈgü ˗kɔ ˈwɔnyëë˗ ˗nu ˗bha, ˈyö ˗kɔ ˈö ˗dho Yesu ˈˈdhoodɔ ˗a ˈka ˗an ˗gɔ ˈö ˈwo˗ ˗wɔn ꞊blɛɛ.
5 ˗A ˗wɔn ˈˈyi ˗yö ˗kan ˗an ˈˈdhi ꞊dedewo, ˈyö ˗an ˗wo ˗yö ˗mɔn kö ˈwo ˈwëëga nu ˗a ˗dhɛ.
6 ˈYö Zuda ˗yö ˗we ˗a ˗bha, ˈyö ˗ya ˈˈtʋ̈ŋ ˗së ˈö ˗dho Yesu ˈˈdhiʋ̈ dɔ ˗a ˈka ˗an ˗gɔ kö mɛn ˗nu ˈwaa˗ ˗züzü ꞊va ˗a mɛɛnˈˈ ˗sü ˗bha.
7 ˈDhɛ ˈö ˈbluu˗ ˈö ˈˈsɛkɛ ˈyaa˗ ˈˈpiʋ̈ bhë ˗a ˗bhö ˈwlaan˗ ˗dhɛkpaɔyi ˈö ˈwo Pakö ˈˈsaa˗ bho ˗a ˈka bhë ˗yö ˗wo,
8 ˈyö Yesu ˗yö Piɛɛ waa Zan ˗an bɔ ˈö˗ pö ˗an ˗dhɛ: «˗Ka ˈdho kö ˈka kwa ˗bha Pakö ˗bhöpë ˗wɔn ˈˈɲan bhɔ.»
9 ˈYö ˈwo˗ dhɛɛˈˈ kpɔ ˈwo˗ pö: «Ü˗ ˈˈpiʋ̈ kö ˈyi˗ ˗yökë ˈˈmɛn?»
10 ˈYö˗ ˗yɔ bɔ ˗an ˗gɔ ˈö˗ pö: «ˈKa ˈdho ˈka ˗da ˈplöö, ka ˗dho ˗kpan gɔndënën do ˗bha kö ˈˈsɛgbɔ ˈö ˈˈyi ˈdhö˗ ˈgü ˗ya ˗gɔ kö ˗yö nu ˗ni ˈgü ka ˈˈpiʋ̈ ˗ʒian ˈka. ˗Ka ʒiö ˗a ꞊kee˗, ˈka ˈdho ˈka ˗da ˈkɔ ˈö ˗dho ˗da ˗a ˈgü bhë ˗a ˈgü.
11 ˗Ka ˈkɔ ˈö bhë ˗a dëmɛn dhɛɛˈˈ ˈkpɔ ˈka˗ pö: ‹Dëmɛn ˗ya ˗pö: «˗Dhɛ ˗mɛɛn ˈö yaa n ˗man gwëëˈˈ ˗nu ˈyi ˗dho Pakö ˗bhöpë ˗bhö ˗a ˗bha?»›
12 Gɔndënën ˈö bhë ˗yö ˗dho ˈkɔdhi ˈˈgbɛɛ do ˈö pë ꞊gban ˈdhö baaˈˈ ˗sü ˈka mü, ˈö ˈkɔ ˗ta ˈˈdhuŋ ˗a ˗zɔn ka ˗dhɛ. ˗Ka Pakö ˗bhöpë ˗yökë mü.»
13 ˈDhɛ ˈö ˗kë ˈˈdhʋ̈ ˈyö ˈwo dho, ˈö ˈwɔn ꞊gban ˈˈpɛpɛ ˗wo ˗kë ꞊dhɛ ˗kɔ ˈö˗ pö ˗a ˈka ˗an ˗dhɛ bhë ˗a ˈdhö, ˈyö ˈwo Pakö ˗bhöpë ˗yö ˗kë.
14 ˈDhɛ ˈö˗ ˈˈlɛlɛ ˗yö ˗wo, ˈyö Yesu waa ö ˗bha bɔmɛn ˗nu ˈwo dho ˈtaablö ˈˈdhiʋ̈.
15 ˈYö˗ pö ˗an ˗dhɛ: «˗Yö ˗kun n ˈˈpiʋ̈ ꞊dedewo ꞊dhɛ Pakö ˈö yö kwaa˗ ˗nu ˈkwa˗ ˗bhöpë ˗bhö kwa ˈkwëë˗ kö ˈa ꞊kun saanˈˈ ˈsü.
16 A˗ ˗pö ka ˗dhɛ gagade ˈka ꞊dhɛ ˈö sü ꞊dɛɛ ˗bha, n ˈti ˗dho ˗a ˗bhö ˈzüdho ˈö to ˗a ˈka ˈˈdhʋ̈ ˈö yö ˗a ˈka ˈwɔn ˈˈpɛpɛ ˈwo ˗gban ˗a ˗bha ˗an ˗bha ˗yökodhiʋ̈sü ˈö ˗Zlan ˗bha ˗Gblüdëdhɛ ˈgü ˗a ˗bha.»
17 ˈDhɛ ˈwo we ˗kɔɔ do nu ˗a ˗dhɛ ˈö˗ sü, ˈyö ꞊bhɛɛ ˈö ˗Zlan ˈˈnuɛ bho, ˈyö˗ pö ˗an ˗dhɛ: «˗Kaa ˈkun ˈka˗ nu ka ˈko ˗nu ˗dhɛ, kö ˈka˗ mü.
18 A˗ ˗pö ka ˗dhɛ ꞊dhɛ ˈö sü ꞊dɛɛ ˗bha, n ˈti ˗dho ˗drɔɔn ˈˈyi mü ˈzüdho, ˈö to ˗a ˈka ˈˈdhʋ̈ ˈö yö ˗a ˈka ˗Zlan ˗bha ˗Gblüdëdhɛ nu ˗yi ˗bha.»
19 ˈDhɛ ˈö go mü ˈzü ˈyö ˈbluu˗ sü, ˈyö ꞊bhɛɛ ˗a ˗ta ˈö ˗Zlan ˈˈnuɛ bho, ˈyö˗ ˈˈkluklu bho ˈö˗ nu ˗an ˗dhɛ ˈö˗ pö: «N kwi ˈa ˗dho ˗a nu ka ˗wɔn ˈgü bhë, ˗a ꞊zuaan ˈnën ˈö bhë. ˗Kaa kë ꞊dhɛ ˗kɔ ˈö yö ˗a ˈdhö ˗kplawo, kö ka ˗zo yö ˗buö n ˈka.»
20 Pë do ˈö bhë ˈyö˗ ˗kë ˈpö we ˗kɔɔ ˈka kö ˗wa wo bo pë ˗bhö ˗sü ˈka, ˈyö˗ pö ˗an ˗dhɛ: «We ˗kɔɔ ˈö yö, yö ˈnën ˈö ˗tɔ ˗mlɛɛn ˗dɛɛ ꞊zuaan. ˗Mlɛɛn ˗dɛɛ ˈö ˈˈdhʋ̈ ˗a zübhotapë ˈnën ˗tɔ n ꞊ɲɔɔn ˈö ˗dho ꞊wɛnŋ ka ˗wɔn ˈgü.
21 «ˈˈKɛɛ ˗ka ˗dhɛ ˗ga, mɛn ˈö ˗dho n ˈˈdhoodɔ bhë, ˗yö n ˈˈpiʋ̈ ˈtaablö ˈˈdhiʋ̈ yö.
22 ˗Yö ˈˈdhʋ̈ ꞊dhɛ pë ˈˈpɛpɛ ˈwo ˗bɛnzë ˗sü ˈka ˈö ˈwo ˗gban mɛn Gbö ˗bha, ˗wo ˗dho kë ˗a ˈka. ˈˈKɛɛ mɛn ˈö ˗dho mɛn Gbö ˈˈdhiʋ̈ dɔ bhë, yö ˈnën ˈö˗ ˗bha ˈdhö ˗wëësü.»
23 ˈDhɛ ˈö˗ pö ˈˈdhʋ̈, ˈyö˗ ˗bha gwëëˈˈ ˗nu ˗wo ˗ya wo ˈko ˗nu dhɛɛˈˈ ˈkpɔ ˗sü ˗bha, kö ˗a mɛn ˈö ˗dho ˈwɔn ꞊suu ˈö ˈˈdhʋ̈ ˗a kë bhë ˈwo˗ dɔ.
24 ˈDhɛ ˈö go mü ˈzü, ˈyö ˈwo ˗ya zɔɔdhe ˈˈgbɩɩ˗ ˗man ˗sü ˗bha wo ˈˈkwöö kö mɛn ˈö mɛn ˈkpii˗ ˈka wo ꞊zinŋgü ˈwo˗ dɔ.
25 ˈˈKɛɛ ˈyö Yesu ˗ya pö ˗an ˗dhɛ: «˗Gblüdë ˗nu ˗wo ˗ya wo ˗bha ˈˈsɛgümɛn ˗nu ˗gɔ ˗ta, ˈö mɛn ˗nu ˈö ˗duɛɛ ˈkpii˗ ˈdhö ˗an ˗gɔ ˈwo ˗an ˗dhɛ ˈwɔn ˗së ˗kë mɛn ˗dhɛ ˗mɛn ˗nu.
26 ˈˈKɛɛ ka ˗zë ka dua ˈyaa ˗mü ˈka kë ꞊dhɛ ˗an ˈdhö. Mɛn ˈö mɛn ˈkpii˗ ˈka ka ꞊zinŋgü, ˗a dua ˗mü kö ˗yö kë ꞊dhɛ ka ˗bha ˈnën ˈˈtɩtɩ ˈdhö, kö mɛn ˈö ˈˈdhiʋ̈sü ˗ni ˈgü, ˗yö kë ꞊dhɛ yökë ka ˈˈdhiʋ̈ ˗mɛn ˈdhö.
27 Mɛn ˈö pë ˗bhö ˗ni ˈgü ˈtaablö ˈˈdhiʋ̈ waa mɛn ˈö yökë ˗ni ˈgü ˗a ˈˈdhiʋ̈, ˗a de ˈö ˗tɔ mɛn ˈkpii˗? Mɛn ˈö ˈtaablö ˈˈdhiʋ̈ ˈyaa ˗mü ˗ee? ˈˈKɛɛ man ˗zë, a ka ꞊zinŋgü ꞊dhɛ yökë ka ˈˈdhiʋ̈ ˗mɛn ˈdhö.
28 «Ka ˈnën ˈö ˈka to n ˈˈpiʋ̈ n ˗man ˈwɔn ˈˈgbɩɩ˗ ˗nu ˈgü,
29 ˈyö man ˗de ˈpö ˈa ˗Gblüdëdhɛ ˗mlɛɛn ˗da kwaa˗ ˗nu kwa ꞊zinŋgü ꞊dhɛ ˗kɔ do ˈö n Dë ˗yö ˗mlɛɛn ˗da ˗a ˈka yi ꞊zinŋgü bhë ˗a ˈdhö.
30 ˗Yö kë ˈˈdhʋ̈ kö ˈka ˗ya n ˗man ˈtaablö ˈˈdhiʋ̈ ˈka pë ˗bhö, ˈka müpë ˗nu mü n ˗man ˗Gblüdëdhɛ ˈgü. Kö ˈka ˗ya ˈpö ˗Gblüdëdhɛ ˗gbloo ˗nu ˈgü ˈka za dɔ Izraɛdhö ˈˈkwɛngɔ ˗kɔŋ do ö ga ꞊plɛ (12) ˈwo bhë ˗an ˗bha.
31 «Simɔn, Simɔn, Sɔtraan ˗ya ka ˗gbadhɛ kö ˈö mɛn ˈˈpɛpɛ ka ˗piö ꞊dhɛ ˗kɔ ˈwo ˈble˗ ˗piö ˗a ˈka bhë ˗a ˈdhö.
32 ˈˈKɛɛ a ˗bhɛɛ ˗Zlan ˗dhɛ ü ˗bha ˈka, kö ü ˗bha ˗zoyödhe ˈya ˗dho ˈdho ˈˈshiaa. Bhi ˗de ˈpö ˈbha ü ꞊yɛɛ kë ˈbha nu n ˈˈpiʋ̈, ˗bhö ü ꞊dhegblü ˗nu ꞊faanmën.»
33 ˈDhɛ ˈö˗ pö ˈˈdhʋ̈, ˈyö Piɛɛ ˗ya pö ˗a ˗dhɛ: «N Dëmɛn, ˈkö ˗kë ꞊dhɛ ˗wo n ˗kpa ü ˗bha ˈö ˈwo ko ˗da ˗kaso ˈgü, ˈö ˈwo ko zë kö yö ˗mü. N zuʋ̈ˈˈ ˗yö ˈˈwɩ ˗sü ˈka ˗a ˗bha kö ˈa ˈto ü ˈˈpiʋ̈.»
34 ˈYö Yesu ˗ya pö ˗a ˗dhɛ: «Piɛɛ, a˗ ˗pö ü ˗dhɛ ꞊dhɛ ˗dhɛkpaɔyi do ˈö ꞊dɛɛ ˗a ˈgü, ˈˈsanni ˗tɔ gɔn ˗yö ˈˈwɩ, kö ˈbha˗ pö ˗gɛnɲaan ˈka ˗yaaga ꞊dhɛ ˈbhaa n dɔ.»
35 ˈYö go mü ˈzü ˈö˗ pö ˗an ꞊gban ˈˈpɛpɛ ˗dhɛ: «ˈˈTʋ̈ŋ ˈa ka bɔ kö ˈka ˗zlanwopö ˗a ˈka bhë, a˗ ˗pö ka ˗dhɛ ˗a ˈgü ꞊dhɛ ˈka ˗dho ˈwëë˗ ˗da ˗a ˈgü ˈkpɔɔ, ˗bhöpë ˗da ˗a ˈgü ˈˈkpɔɔ ɛɛnˈˈ ˗sabha ˗nu ˈsü ka ˗kɔ ˈˈpiʋ̈. ˈˈKɛɛ ˗a ˈˈtʋ̈ŋ ˈö bhë ˗a ˈgü, pë ˈbhaa ˗wɔn ˗yö ˗kë ka ˗bha ˗ee?» ˈYö ˈwo˗ ˗yɔ bɔ ˗a ˗gɔ ˈö ˈwo˗ pö: «˗Abin!»
36 ˈDhɛ ˈwo˗ pö ˈˈdhʋ̈, ˈyö˗ pö ˗an ˗dhɛ: «ˈˈKɛɛ ˈdho ˈdhɛ ˈö ˈka ˗dho ˗a wo ˈzlee bhë, mɛn ˈö ˈwëë˗ ˗da ˗a ˈgü ˈˈkpɔɔ waa ˗bhöpë ˗da ˗a ˈgü ˈˈkpɔɔ ˈdhö ˗a ˗gɔ, ˗yö ˗an ˈsü. Mɛn ˈö ˗blaan ˗dhaa ˈyaa˗ ˗gɔ, ˗yö ö ˗bha sɔ ˈˈdhoodɔ kö ˗yö ˗blaan ˗dhaa do ˈdhɔ.
37 ˗A ˗gɛn mü ꞊dhɛ ˗a pö ˈö ˗Zlan ˗Wo ˗ya wo ꞊dhɛ ‹˗Wa ˗sü ꞊dhɛ pëyaakëmɛn* do ˈdhö› bhë, ˗a dua ˗mü kö ˗yö yökodhiʋ̈ n ˗man. Pë ˈö ˗bɛnzë ˗sü ˈka ˈö ˗gban n ˗man bhë, ˗yö yö ˗ni ˈgü ˈko ˈˈdhiʋ̈.»
38 ˈDhɛ ˈö˗ pö ˈˈdhʋ̈ ˈyö ˈwo˗ pö ˗a ˗dhɛ: «Yi Dëmɛn, ˗dhɛ ˗ga! ˗Blaan ˗dhaa ꞊plɛ ˗wo yi ˗gɔ.» ˈYö˗ pö ˗an ˗dhɛ: «˗A ˈdhɛ ˈö bhë ˗yö ˗mɔn.»
39 ˈDhɛ ˈö go mü, ˈyö ˗ʒiö ˈö dho Olivie ˗tɔn ˗ta ꞊dhɛ ˗kɔ ˈö˗ ˗kë ˗a ˈka ˗kplawo ˗a ˈdhö, kö ˗a ˗bha gwëëˈˈ ˗nu ˗wa ꞊kee˗.
40 ˈDhɛ ˈwo ˗lo mü ˈyö˗ pö ˗an ˗dhɛ: «˗Ka bhɛɛˈˈ ˗kplawo kö ˈka ˗dho ˗puö ˈgüdandhe ˈgü.»
41 ˈDhɛ ˈö˗ pö ˈˈdhʋ̈, ˈyö bhɔ ˗an ˗dhɛ ꞊taa ˈdɛdɛ* ˈka, ˈö yö ö kpɔn ˈgü ˈö ˗ya bhɛɛˈˈ ˗sü ˗bha,
42 ˈö˗ pö: «N Dë, ˗ya kë ꞊dhɛ ü ˗we ˗a ˗bha, ˗bhö ˗a kë kö ˗kɔɔ ˈö bhë ˗yö ˈdho n ˈka ꞊gblɛɛn. ˈˈKɛɛ ˈya ˗dho kë ꞊dhɛ ˗kɔ ˈö man ˗zë ˈa˗ ˈˈpiʋ̈ ˗yö kë ˗a ˈka ˗a ˈdhö. Bhi ˈnën ü dhɔɔbhaawɔn ˗yö kë.»
43 ˈDhɛ ˈö ˗kë ˈˈdhʋ̈ ˈyö ˗Zlan ˗bha ˈˈkiö do ˗yö go dhaŋ˗ ˈgü ˈö ˗wo, ˈö˗ ꞊faanmën.
44 ˈˈKɛɛ ˈdhɛ ˈö ˗kë ꞊dhɛ ˗a zuʋ̈ˈˈ ˗yö ˗kun kaanˈˈ ˗sü ˈka ˈˈkwöö ˈgbɛ bhë, ˗yö ˗ya bhɛɛˈˈ ˗sü -bha ˈzü ö ꞊faan ꞊dede ˈka, ˈkö fɔyi ˈö ˈgo ˗ni ˈgü ˗a ˗bha ˈö ban ˈˈshia˗ ˗ya kë ꞊dhɛ ꞊ɲɔɔn ˈdhö.
45 ˈDhɛ ˈö ö bo bhɛɛsü ˈka ˈö ꞊luu ˈö nu ö ˗bha gwëëˈˈ ˗nu ˈˈpiʋ̈, kö ˗wo yi zë ˗ni ˈgü, kö ˗zotadhe ˈö kun ˗an ˗bha bhë ꞊yaa ˗an blɔ.
46 ˈYö˗ pö ˗an ˗dhɛ: «ˈMën ˗kë ˈö ˈka yi zë? ˗Ka luuˈˈ kö ˈka bhɛɛˈˈ ˗kplawo, kö ˈka ˗dho ˗puö ˈgüdandhe ˈgü.»
47 Dhiaŋ ˗yö ˗to ˗a ˈˈdhi ˈyö mɛn kpö do ˈbhaa ˗yö to mü ˈö ˗wo. Zuda ˈö ˗kë Yesu ˗bha bɔmɛn ˗nu ˗kɔŋ do ö ga ꞊plɛ ˈwo bhë ˗a mɛn do ˈka bhë, yö ˈnën ˈö kun ˗an ˗dhɛ ˈˈdhiʋ̈. ˈYö ꞊ɲɔɔn Yesu ˗bha kö ˈö˗ ˈˈkpɛnŋ mü.
48 ˈˈKɛɛ ˈyö Yesu ˗ya pö ˗a ˗dhɛ: «Zuda, pë ˈü ˗dho bɔ ˗a ˗ta kö ˈü mɛn Gbö ˈˈdhoodɔ yö ˈnën ˈö ˗tɔ ˗a ˈˈkpɛnŋ mü ˗sü ˗ee?»
49 ˈDhɛ ˈö mɛn ˗nu ˈwo kun Yesu ꞊kee˗ bhë ˈwo˗ yö ˈˈdhʋ̈, ˈyö ˈwo˗ pö ˗a ˗dhɛ: «Yi Dëmɛn, ˈyi ˗blaan ˗dhaa ˈsü kö yaa˗ ˗nu ˈyi ˈko zë ˗ee?»
50 ˈYö˗ mɛn do ˗yö ˈˈsaabhomɛn ˈkpii˗ ˗bha yökëmɛn zë ˗dhaa ˈka, ˈö˗ ˗kɔ ˗së ˈgü ˈˈtʋdhɛ ˈˈdhiʋ̈ bho.
51 ˈˈKɛɛ ˈyö Yesu ˗ya pö ˗an ˗dhɛ: «˗Abin! ˗Kaa ˈto ˈˈdhʋ̈.» ˈDhɛ ö bo ˗a ˗pö ˈˈdhʋ̈ ˗sü ˈka, ˈyö ö ˗kɔ pa gɔndënën ˈö bhë ˗a ˈˈtʋdhɛ ˈka, ˈyö˗ ˗dhɛ bo.
52 ˈYö go mü ˈö˗ pö ˈˈsaabhomɛn ˗nu ˗gɔmɛn ˗nu, ˗Zlan ˗dhɔkë ˗a ˈgü ˗kɔ ˗maankëmɛn ˗nu ˗gɔmɛn ˗nu waa mɛn zii ˗nu ˈwo nu ˗a ˈkun bhë ˗an ˗dhɛ: «Ka ˗nu ˗blaan ˗dhaa ˗nu waa ˈˈdhü ˈˈkpla ˗nu ˈka ꞊dhɛ pë ˈö pëyaakëmɛn ˈdhö ˗mü n ˈka ˗a ˈdhö ˗ee?
53 A ˗kun ka ˈˈpiʋ̈ ˗Zlan ˗dhɔkë ˗a ˈgü ˗kɔ ˈgü ˗dhɛkpaɔyi ꞊gban ˈˈpɛpɛ ˈka, ˈyö ka ˈti n ˈkun mü. ˈˈKɛɛ ka ˗bha ˈˈtʋ̈ŋ waa mɛn ˗nu ˈwo ˗dhɛtiidhɛ ˈgü ˗an ˗bha ˈˈpiigbɩɩdhɛ ˗zɔn ˈˈtʋ̈ŋ ˈnën ˗wo bhë.»
54 ˈDhɛ ˈö ˗kë ˈˈdhʋ̈ ˈyö ˈwo˗ kun, ˈö ˈwo dho ˗a ˈka ˈˈsaabhomɛn ˈkpii˗ ˗gɔ ˈkɔɔ. Piɛɛ ˗yö ˗kun ʒiö ˗ni ˈgü ˗an ꞊kee˗, ˈˈkɛɛ ˗yö ˗to ˗an ˈka ꞊gblɛɛn.
55 Mɛn ˈbhaa ˗nu ˗wo ˈˈshiʋ̈ ˗yö ˈkwëë˗ ˈˈkwɛnŋdhö ˈˈdhɛɛ ꞊zinŋgü mü ˈö ˈwo ˗ya ˗a ˈˈdhiʋ̈, ˈyö Piɛɛ ˗yö dho ˗an ˈˈpiʋ̈ mü ˈö ˈɲaannu.
56 ˈDhɛ ˈö ˈnëndhiëŋnën do ˈö yö ˗kë mü ˈö ˗kpan ˗a ˗bha kö ˗yö ˗ya ˗sü ˈka ˈˈshiʋ̈ ˈˈsuee kö ˈˈshiʋ̈ ˈbhü ˗ya dɔ ˗a ˗bha, ˈyö˗ ˗ga ˗pinŋdhö ˈö˗ pö: «Gɔndënën ˈö yö, yö ˗de ˈpö ˗yö ˗kun ˗a ꞊kee˗.»
57 ˈˈKɛɛ ˈyö Piɛɛ ˗yö zɔɔ ˈö˗ pö: «ˈMaan mɛn ˈö bhë ˗a dɔ, dhebɔnën.»
58 ˈDhɛ ˈö ˈˈtʋ̈ŋ ˈnën ˈbha ˗yö ˗ʒiö, ˈyö mɛn do ˈˈwɛɛ ˈbhaa ˗yö ˗kpan ˗a ˗bha ˈpö ˈö˗ pö: «Bhi ˗de ˈpö ˈmɛn ˈwo bhë ˗a mɛn do ˗mü ü ˈka.» ˈˈKɛɛ ˈyö Piɛɛ ˗ya pö: «˗Abin ˗wa! ˈMaan ˗mü.»
59 ˈDhɛ ˈö ˈˈtʋ̈ŋ ˈö ˗mɔn ˈˈlɛlɛ do ˗bha ˈö ˗ʒiö, ˈyö gɔndënën do ˈˈwɛɛ ˈbhaa ˗yö ˗ya ˗a pö ˗sü ˗bha ˈzü ˗fɛfɛsü ˈka: «Gɔndënën ˈö yö, ˗yö ˗kun mɛn ˈö bhë ˗a ˈˈpiʋ̈ ˈpö, ˗a zɔɔ ˗dhɛ ˈyaa ˈdhö. Galile mi ˗mü ˗a ˈka ˗ʒiaanwo.»
60 ˈˈKɛɛ ˈyö Piɛɛ ˗ya pö: «Gɔndënën, ˈpë ˈü ˈˈwɩ ˗ni ˈgü ˗a ˈka bhë, ˈmaan ˈgüman ü ˗gɔ.» Dhiaŋ ˗yö ˗to ˗a ˈˈdhi ˈö ˗tɔ gɔn ˗yö ˗wɩ.
61 ˈDhɛ ˈö ˗kë ˈˈdhʋ̈, ˈyö Dëmɛn ˗yö ꞊slëë ö ˗zü ˈö Piɛɛ ˗ga ˗pinŋdhö. ˈYö Piɛɛ ˗zo ˗yö ˗buö pë ˈö Dëmɛn ˗ya pö ˗a ˗dhɛ bhë ˗a ˈka. ˗Ya ˗pö ˗a ˗dhɛ: «˗Dhɛkpaɔyi do ˈö ꞊dɛɛ ˗a ˈgü, ˈˈsanni ˗tɔ gɔn ˗yö ˈˈwɩ, kö ˈbha˗ pö ˗gɛnɲaan ˈka ˗yaaga ꞊dhɛ ˈbhaa n dɔ.»
62 ˈDhɛ ˈö ˗kë ˈˈdhʋ̈, ˈyö yö ˈˈkpɛnŋ ˈö ˈˈgbʋ ˗wëësü bɔ.
63 Mɛn ˗nu ˈwo kun Yesu ˗maankë ˗ni ˈgü bhë, ˗wo ˗ya ꞊wɛɛ˗ ˗dɔ Yesu ˗bha ˗sü ˗bha, ˈö ˈwo˗ ˗man.
64 ˈDhɛ ˈwo pë kpa ˗a ˈwëëdhö, ˈyö ˈwo˗ dhɛɛˈˈ kpɔ ˈwo˗ pö: «˗Ya kë ꞊dhɛ ˗Zlan ˗wodhiʋ̈lomɛn ˗mü ü ˈka ꞊dedewo, mɛn ˈö ü ˗man bhë ˗a ˗zɔn.»
65 ˗Wo ˗kun ˗Zlan ꞊bhlëë ˗shiö ˗ni ˈgü ˈwɔn yaa yaa ˈˈwɛɛ ˈbhaa ˗nu ˗blɛɛ Yesu ˗bha ˗sü ˈka.
66 ˈDhɛ ˈö ˗dhɛ ˗yö ꞊kpɔɔ, ˈyö mɛn zii ˗nu ˈö ˈwo ˗kë ˈˈsaabhomɛn ˗nu ˗gɔmɛn ˗nu waa ˈtɔŋ˗ ˗gɔmɛn ˗nu ˗an ˈka bhë, ˈö ˈwo dho wo ˈkwëëdhö. ˈYö ˈwo dho Yesu ˈka ˗an ˗bha za ˗kan ˗a ˈgü ˗kɔ ˈgü, ˈyö ˈwo˗ pö ˗a ˗dhɛ:
67 «˗Ya kë ꞊dhɛ bhi ˈnën ˈü ˗tɔ Klito, ˗a pö yi ˗dhɛ.» ˈYö˗ ˗yɔ bɔ ˗an ˗gɔ ˈö˗ pö: «ˈKö ˗kë ꞊dhɛ a˗ ˗pö ka ˗dhɛ ˈˈdhʋ̈, ka ˈti ˗dho ˈdhaŋ˗ bho n ˈˈdhiʋ̈ toŋtoŋdhö.
68 Ɛɛnˈˈ ˈman dhɛɛˈˈ ˈkpɔ ka ˗gɔ ˈpö, ka ˈti ˗dho ˗a ˗yɔ bɔ.
69 ˈˈKɛɛ ˗yö kë ka ˈˈɲaan ꞊dhɛ ˈö sü ꞊dɛɛ ˗bha, mɛn Gbö ˗dho ˗ya ˗Zlan ˈˈpiigbɩɩsü ˗kɔ ˗së ˈgü.»
70 ˈDhɛ ˈö˗ pö ˈˈdhʋ̈, ˈyö ˗an ꞊gban ˈˈpɛpɛ ˗wa dhɛɛˈˈ kpɔ ˈö ˈwo˗ pö: «ˈDhɛ ˈö ˈˈdhʋ̈, ˗Zlan Gbö ˗mü ü ˈka ˗ee?» ˈYö˗ ˗yɔ bɔ ˗an ˗gɔ ˈö˗ pö: «Yö ˈnën ˈö ka ꞊dede ˈka˗ pö ˗ni ˈgü ꞊dhɛ ˗Zlan Gbö ˗mü n ˈka bhë.»
71 ˈDhɛ ˈö ˗kë ˈˈdhʋ̈, ˈyö ˈwo˗ pö: «Kwa ꞊kun kwa ˈˈɲan ˈto ˈzü mɛn ˈbhaa ˗gɔ kö ˗yö ˈwɔn blɛɛˈˈ ˗a ˗bha ˗ee? Pë ˈö go ˗a ˈˈdhii bhë mɛn ꞊gban ˈˈpɛpɛ kwa˗ ˗man.»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «mɛn ˈö ˈyaa ˈtɔŋ˗ ˗nu ꞊bhlëë ˗ya.»
^ Glɛkö ˗wo ˈgü ˈyö ˗tɔ «˗dhɛ ˈö ˗wa ˗gwö ˗zuö wo ꞊kwaa ˈö˗ ˈˈdhiʋ̈ dho ˈto ˗a ˗bha ˗a ˗naan ꞊taa.»
