Nɔɔn˗ ˗së ˈsëëdhɛ ˈö Lukö ˗ya ˗bɛnzë 23:1-56
23 ˈDhɛ ˈö ˗kë ˈˈdhʋ̈ ˈyö ˗an ꞊gban ˈˈpɛpɛ ˗wo ꞊luu ˈö ˈwo dho Yesu ˈka Pidhatö ˗kuu ˈˈdhiʋ̈.
2 ˈDhɛ ˈwo ˗lo mü, ˈyö ˈwo ˗ya ˗a ˗wɔn ˗da ˗sü ˗bha Pidhatö ˗dhɛ, ˈö ˈwo˗ pö: «Gɔndënën ˈö yö, yi ˗kpan ˗a ˗bha kö ˗yö ˗da ˗ni ˈgü ˈˈsɛgümɛn ˗nu ˈˈtʋʋ, ˈö˗ pö ˗an ˗dhɛ ˈwa ˗dho ˈniin˗ ꞊sɔnŋ bho Sezaa ˗dhɛ. ˗Ya ˗pö ˈzü yöö ꞊dede ˈnën ˈö ˗tɔ Klito ˈö ˗gblüdë ˈka.»
3 ˈYö Pidhatö ˗yö Yesu dhɛɛˈˈ kpɔ ˈö˗ pö: «Bhi ˈnën ˈü ˗tɔ Zuifö ˗nu ˗bha ˗gblüdë ˗ee?» ˈYö Yesu ˗ya ˗yɔ bɔ ˗a ˗gɔ ˈö˗ pö: «Yö ˈnën ˈö bhi ꞊dede ˈü˗ pö ˗ni ˈgü bhë.»
4 ˈDhɛ ˈö ˗kë ˈˈdhʋ̈, ˈyö Pidhatö ˗ya pö ˈˈsaabhomɛn ˗nu ˗gɔmɛn ˗nu waa mɛn ꞊va ˈwo kun ˈmü bhë ˗an ˗dhɛ: «ˈWɔn yaa ˈa ˗dho ˗a yö mɛn ˈö yö ˗a ˗bha ˈyaa ˈdhö.»
5 ˈˈKɛɛ wo ˈti ˈˈwɩ ˗a ˗bha kö ˈwo wo ꞊kwaa ˈwɔn ˈö bhë ˗a ˗zü, ˈyö ˈwo˗ pö: «˗A ˗bha ꞊klaŋwo ˗nu ˈö bɔ ˗a ˈka Zude ˗sɛ ꞊gban ˈˈpɛpɛ ˈgü bhë, ˗yö mɛn ˗nu ꞊faanmën ˗bhluubhluudhe ˗da ˗sü ˗bha. ˗Ya züdɔ Galile, ˈyö nu ˈö ˗lo ˗a ˈka yö.»
6 ˈDhɛ ˈö Pidhatö ˗ya man ˈˈdhʋ̈, ˈyö dhɛɛˈˈ kpɔ kö ˗ya kë ꞊dhɛ Galile mi ˗mü ˗a ˈka, ˈö˗ ˈwɔn dɔ.
7 ˈDhɛ ˈö˗ ˈgüman ˗së ˈka ꞊dhɛ Yesu ˗yö ˗go ˈˈsɛ ˈˈpian ˈö Edhɔdö ˈdhö˗ ˗gɔdhiʋ̈ bhë ˗a ˈgü, ˈyö˗ bɔ Edhɔdö ˗dhɛ. ˗A ˈˈtʋ̈ŋ ˈö bhë ˗a ˈgü kö Edhɔdö yöö ꞊dede ˗yö Zedhizadhɛmö.
8 ˈDhɛ ˈö Edhɔdö ˗yö ˗kpan Yesu ˗bha, ˗a zuʋ̈ˈˈ ꞊nii ˗yö ˗da ꞊dedewo, ˗a ˗gɛn ˗mü ꞊dhɛ ˗yö ˗kun ˗a ˈˈpiʋ̈ ꞊dhɛ ˈö ö ˈˈɲan ˗kpan ˗a ˗bha ˗a yi ˗ya ꞊gwëë. ꞊Yaa˗ ˗tɔɔ man ˗be ꞊va, ˗a ˗wɔn ˈgü pë ˈö kun ˗a ˈˈpiʋ̈ ˈyö ˗tɔ ˗yö ˗dhidha do kë kö ˈö˗ yö.
9 ˗Yö ˗ya dhɛɛˈˈ ꞊va ꞊dede ˈkpɔ ˗sü ˗bha Yesu ˗gɔ, ˈˈkɛɛ yö ˈti˗ dosɛnŋ ˗yɔ bɔ ˗a ˗gɔ.
10 ˈDhɛ ˈö ˗kë ˈˈdhʋ̈ kö ˈˈsaabhomɛn ˗nu ˗gɔmɛn ˗nu waa ˈtɔŋ˗ ˗gɔmɛn ˗nu ˗wo luuˈˈ ˗ni ˈgü ˗kplawo, ˗wo ˈwɔn ˗ya ˗ni ˈgü ˗a ˗bha zuʋ̈dhiʋ̈dhɛ ˈka.
11 ˈYö˗ ˗san ˗yö ˗da Edhɔdö waa ö ˗bha ˈˈsɔdha ˗nu ˗an ˈgü. ˈYö ˈwo sɔ ˗së ˗da ˗a ˗bha, ˈö ˈwo ꞊wɛɛ˗ dɔ ˗a ˗bha. ˈDhɛ ˈwo wo bo, ˈyö ˈwo˗ bɔ ˈzü Pidhatö ˗dhɛ.
12 ˗A ˗dhɛkpaɔyi ˈö bhë ˗a ˈka, ˈyö Edhɔdö waa Pidhatö ˗wo ˗kë ˈˈtɔŋdëzë ˗nu ˈka, ˈˈkɛɛ kö ˈˈdhiʋ̈ ˗be ˗shiödhe ˗yö ˗kë ˗an ꞊zinŋgü.
13 Pidhatö ˗yö ˈˈsaabhomɛn ˗nu ˗gɔmɛn ˗nu, Zuifö ˗nu ˗gɔmɛn ˗nu waa ˈˈsɛgümɛn ˗nu ˗an ˗dhɛ wo ˈkwëëdhö,
14 ˈö˗ pö ˗an ˗dhɛ: «Ka˗ ˗pö gɔndënën ˈö yö, ˗yö ˈˈsɛgümɛn ˗nu ˗blü kö ˗wo ˗gban ˈˈsɛkɔɔnmɛn ˗nu ˗gɔ, ˈyö˗ ˗wɔn ˈgü ˈö ˈka nu ˗a ˈka n ˈˈpiʋ̈ yö. ˈˈKɛɛ ˗a dhɛɛˈˈ ˈa˗ kpɔ ka ˈˈɲan ˈˈdhiʋ̈ yö, ˈwɔn ˗nu ˈö ˈka˗ ꞊blɛɛ ˗a ˗bha bhë, ˗a ˈdhɛ ˈö ˗dho kë za ˗ya ˗a ˗bha ˗gɛn ˈka n ˈti˗ ꞊slɔɔ.
15 Edhɔdö ˗de ˈpö ˈwɔn yaa ˈö ˗dho ˗a yö ˗a ˗bha ˈyaa ˈdhö, yö ˈnën ˈö˗ ˗wɔn ˈgü ˈö˗ bɔ kwa ˗dhɛ ˈzü bhë. ˗A zë ˗gɛn ˈyaa ˗dhö.
16 ˈDhɛ ˈö ˈˈdhʋ̈ a ˗dho ˈwɔn bho ˗a ˈgü, kö ˈa n ꞊kwaa ˗a ˗zü.»
17 ——
18 ˈDhɛ ˈö˗ pö ˈˈdhʋ̈ ˈyö ˈmɛn ˈwo kun ˈmü bhë ˗an ꞊gban ˈˈpɛpɛ ˗wo ˗gbla ˈwo˗ pö: «˗Bhö ˗a zë, kö Badhabasö ˗zë ˈü˗ bho ˗kaso ˈgü!»
19 (˗A gɔndë ˈwo ˗we ˗a ˈka ˈˈdhʋ̈ bhë ˗wa ˗da ˗kaso ˈgü ˗gban ˈˈsɛkɔɔnmɛn ˗nu ˗gɔ ˗sü do ˈbhaa ˈö ˗kë ˈˈkwipö ˈö bhë ˗a ˈgü waa mɛn zë ˗sü ˗wɔn ˈgü.)
20 ˈYö Pidhatö ˗yö ˈwɔn ꞊blɛɛ ˗an ˗dhɛ ˈzü, ˗a ˗gɛn ˗mü ꞊dhɛ ˗yö ˗kun ˗a ˈˈpiʋ̈ ꞊dhɛ ˈö ö ꞊kwaa Yesu ˗zü.
21 ˈˈKɛɛ ˈyö ˈwo ˗ya ˈˈgbla ˗sü ˗bha ˈö ˈwo˗ pö: «˗Bhö ˗a dɔ ˈˈdhü ˗bha! ˗Bhö ˗a dɔ ˈˈdhü ˗bha!»*
22 ˈYö Pidhatö ˗ya pö ˗an ˗dhɛ ˗yaaga ˗naan wo ˈzü: «ˈMën ˗kë? ˗Mën ˗wɔn yaa ˈö mɛn ˈö yö ˈö˗ ˗kë? Pë ˈö ˗dho kë ˗a zë ˗gɛn ˈka n ˈti˗ yö ˗a ˗bha. ˈDhɛ ˈö ˈˈdhʋ̈, a ˗dho ˈwɔn bho ˗a ˈgü kö ˈa n ꞊kwaa ˗a ˗zü.»
23 ˈˈKɛɛ wo ˈti ˈˈwɩ ˗a ˗bha, ˈyö ˈwo ˗ya ˈˈgbla ˗sü ˗bha ˈzü ˈwo˗ pö ˗ya zë. ˗An ˗wo ˗yö ˗kun ˈˈgbɩɩ˗ ꞊dedewo.
24 ˈDhɛ ˈö ˗kë ˈˈdhʋ̈, ˈyö Pidhatö ˗we ˗a ˗bha kö ˗an ˗bha ˈwo˗ pö bhë ˗yö kë.
25 ˈYö ö ꞊kwaa gɔndënën ˈö kun ˗kaso ˈgü ˗gban ˈˈsɛgɔdhiʋ̈mɛn ˗nu ˗gɔ ˗sü waa mɛn zë ˗sü ˗wɔn ˈgü bhë ˗a ˗zü, ꞊dhɛ ˗kɔ ˈwo˗ pö ˗a ˈka bhë ˗a ˈdhö. ˈYö ö ˗kɔ bho Yesu ˗ta ˗an ˗gɔ, kö pë ˈö ˗dhi ˗an ˗dhɛ ˗wa kë ˗a ˈka.
26 ˈDhɛ ˈwo kun ˈdho ˗ni ˈgü ˗a ˈka, ˈyö ˈˈsɔdha ˗nu ˗wo gɔndënën do ˈö ˈwo˗ ˗dhɛ Simɔn ˈö go Silɛnö ˗a kun kö ˗yö ˈgo ˗ni ˈgü ˈbhlaa. ˈYö ˈwo Yesu ˗bha ˗ga ˗a ˗ta ˗dhü nu ˗a ˗dhɛ kö ˗ya bun, kö ˗yö ʒiö ˗a ˈka ˗a ꞊kee˗.
27 Mɛn ꞊va ꞊dede ˗kun ʒiö ˗ni ˈgü Yesu ꞊kee˗. Dhebɔ ˈbhaa ˗nu ˗wo ˗kun ˗an kpö ˈgü ˈö ˈwo kun wo ˗kënŋ ˗ta ˗man ˗ni ˈgü ˈˈgbʋ ˈka, ˗an zuʋ̈ˈˈ ˈˈklʋʋ ˈö kun bhɔ ˗ni ˈgü bhë ˗a ˗wɔn ˈgü.
28 ˈYö Yesu ˗yö ö wë ꞊slëë dhebɔ ˗nu ˈwo bhë ˗an ˈˈpiʋ̈ ˈö˗ pö ˗an ˗dhɛ: «Zedhizadhɛmö dhoo ˗nu, ˈka ˗dho ˈˈgbʋ bɔ n ˗wɔn ˈgü. ˗Ka ˈˈgbʋ bɔ ꞊ʒiaan ka ꞊dede waa ka ˗bha ˈnën ˗nu ka ˗wɔn ˈgü.
29 ˗A ˗gɛn ˗mü ꞊dhɛ ˗a ˈˈtʋ̈ŋ ˗yö nu ˗ni ˈgü ˈö mɛn ˗nu dho ˗a pö: ‹Dhebɔ ˗nu ˈö ˈwo ˈˈbhöödhe ˗nu ˈka, ˈö wo ˈti ˈnën ˈkpɔ, ˈö ˈnën yö ˈti ˈɲɔn mü ˗an ˗gɔ ˗an ˗bha ˗yö ˗së!›
30 ˗A ˈˈtʋ̈ŋ ˈö bhë ˗a ˈgü ˗wo ˗dho ˗a pö ˗tɔn ˗nu ˗dhɛ: ‹˗Ka ˈˈgblü yi ˗ta!› ˈÖ ˈwo˗ pö googa ˗nu ˗dhɛ: ‹˗Ka nu ˈka yi ˗takpa!›
31 ˈWɔn ˗nu ˈwo ˈˈdhʋ̈ ˗wa kë ˈˈtʋ̈ŋ ˈö ˈˈdhü ˈdhö ꞊kun ˗a ˈka ˗saa ˗a ˈgü, ˈˈtʋ̈ŋ ˈö ˈˈdhü dho ˈˈkpɛɛ ˈkun ˗a ˈka ˗yö ˗dho kë ꞊dhɛ ˈsa?»
32 ˗Wo ˗kun ˈdho ˗ni ˈgü ˈpö pëyaakëmɛn ˗nu ꞊plɛ ˈka, kö waa Yesu ˗nu ˗wo ˗an zë.
33 ˈDhɛ ˈwo dho ˈwo ˗lo ˗dhɛ ˈwo˗ ˗dhɛ ˗Gɔ ˈˈklaŋ bhë ˗a ˈgü, ˈyö ˈˈsɔdha ˗nu ˗wa dɔ ˈˈdhü ˗bha, ˈyö ˈwo pëyaakëmɛn ˗nu ꞊plɛ bhë ˗an dɔ ˈˈdhü ˗bha mü ˈpö. ˗A mɛn do ˗kun ˗a ˗kɔ ˗së ˈgü, ˈö˗ mɛn do kun ˗a ꞊kwaa˗ ˈgü.
34 ˈˈKɛɛ Yesu ˗yö ˗kun ˗a pö ˗ni ˈgü: «N Dë, ˗bhö ˗an ˗bhawɔn ˈto. ˗A ˗gɛn ˗mü ꞊dhɛ ˈpë ˈwo˗ kë ˗ni ˈgü bhë ˈwaa˗ dɔ wo ˗de ˗gɔ.» ˗Ya ˈgo mü ˈzü, ˗wo ˗a ˗bha sɔ ˗nu ˗gblü wo ˈko ˗nu ˗ta ˗zë ˈˈkpʋ̈ü kë ˗sü ˈka.
35 Mɛn ˗nu ˗kun ˈduaannu ˗sü ˈka mü ˈö ˈwo˗ ˗ga, ˈö Zuifö ˗nu ˗gɔmɛn ˗nu ˗wo kun ˈˈyɩɩ ˈto ˗ni ˈgü ˗a ˗bha ˈö ˈwo˗ pö: «˗Ya mɛn ˈˈwɛɛ ˗nu dha, ˈˈkɛɛ ˗ya kë ꞊dhɛ Klito ˈö ˗Zlan ˗yö ö ˗kɔ ˗yɛ ˗a ˗bha yö ˗mü ˗a ˈka, ˗yö ö ˗de dha kö ˈkwa˗ yö.»
36 ˈˈSɔdha ˗nu ˗de ˈpö ˗wo ˗kun ꞊wɛɛ˗ dɔ ˗ni ˈgü ˗a ˗bha, ˈö ˈwo ꞊ɲɔɔn ˗a ˗bha ˈwo we giisü nu ˗a ˗dhɛ,
37 ˈö ˈwo˗ pö: «˗Ya kë ꞊dhɛ Zuifö ˗nu ˗bha ˗gblüdë ˗mü ü ˈka, ˗bhö ü ˗de dha.»
38 Pë ˈbhaa ˈö kun ˗bɛnzë ˗sü ˈka ˗a ˗gɔ ˗ta ˈˈdhuŋ ˈpö ˈyö ˗tɔ: «Zuifö ˗nu ˗bha ˗gblüdë ˈnën ˈö ꞊nɛn.»
39 Pëyaakëmɛn ˗nu ˈö ˈwo kun ˈˈdhü ˗bha ˗a ˈˈsuee bhë, ˗a mɛn do ˗yö ˗ya ˈˈwɩ ˗sü ˗bha Yesu ˗dhɛ ˈö˗ pö: «Ü ˈti˗ pö Klito ˗mü ü ˈka ˗ee? ˈDhɛ ˈö ˈˈdhʋ̈ ˗bhö ü ˗de dha, kö ˈü yi dha ˈpö ˗kɛɛ!»
40 ˈˈKɛɛ ˗a mɛn do ˈö to ˗yö ˗dɔn ˗bho ˗a ˈka ˈö˗ pö: «ˈBhaa ˈˈsuʋ̈ ˗Zlan ˗gɔ ˗ee? ˗Kɔ do ˈö ü ˈˈklʋʋ ˈdhö bhɔ ˗ni ˈgü ˗a ˈka bhë, gɔndënën ˈö yö ˗a ˈˈklʋʋ ˈyaa bhɔ ˗ni ˈgü ˈˈdhʋ̈ ˈpö ˗ee?
41 ˗A ˗dhɛ ˗mü kö ˗wo ko ˈˈklʋʋbhɔ ꞊dhɛ ˗kɔ ˈö yö ˗a ˈdhö ˈwɔn yaa ˗nu ˈko ˗an ˗kë ˗a ˗wɔn ˈgü. ˈˈKɛɛ gɔndënën ˈö yö, pë yaa ˈö ˗dho ˗a kë ˈyaa ˈdhö.»
42 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö˗ pö: «Yesu, ˗bhö dɔ ˈˈgbɩɩ˗ ü ˗zo ˗yö ˗buö n ˈka, ˈˈtʋ̈ŋ ˈü ˗dho nu ˗a ˈka ü ˗bha ˗Gblüdëdhɛ ˈgü bhë ˗a ˈka.»
43 ˈYö Yesu ˗ya pö ˗a ˗dhɛ: «A˗ ˗pö ü ˗dhɛ gagade ˈka ꞊dɛɛ ꞊dhɛ, ü ˗dho kë n ꞊kee˗ ꞊bhɔɔ ˈˈsɛ ˗ta.»
44 ˈˈTʋ̈ŋ ˈö ˗kë ˈˈdhʋ̈ ˗a ˈka bhë kö ˈɲaan˗ ˗ya ˗ya mɛn ˗gɔ ꞊zinŋgü.* ˈˈKɛɛ ˈö sü ˗a ˗bha ˈö dho ˈö yö ˗a ˈka ˈˈlɛlɛ ˗kɔŋ do ö ga ˈˈsoodhu* ꞊tɛɛ˗ ˗bha ˈˈdooka, ˗dhɛ ˗yö ˗tröö ˈsënsëndhö ˈˈsɛ ˗ta,
45 ˗a ˗gɛn ˗mü ꞊dhɛ ˈɲaan˗ ˗yö ö ˗bo ˈbhü ˗sü ˈka. ˈDhɛ ˈö ˗kë ˈˈdhʋ̈, ˈyö ˗ʒiö ˈˈkpan ˈˈdhiʋ̈ ˗sɔ ˈö ˗Zlan ˗dhɔkëdhɛ ˈgü ˈö ˗pɛ ö ꞊zinŋgü.
46 ˈYö Yesu ˗yö ˗gbla ˈˈgbɩɩ˗ ˈka ˈö˗ pö: «N Dë, ˈman n ˗man ˗këdhösü* ˗lo ü ꞊kwɛɛ˗.» ˈDhɛ ˈö˗ pö ˈˈdhʋ̈, ˈyö to mü ˈö ga.*
47 ˈDhɛ ˈwɔn ˗nu ˈwo ˗kë bhë ˈö ˈˈsɔdha ˗gɔmɛn ˈˈɲan ˗yö ˗da ˗an ˈgü, ˈyö ˗ya ˗Zlan ˈtɔ bhɔ ˗sü ˗bha ˈö˗ pö: «Gagade ˈgü, gɔndënën ˈö yö pö ˈyaa˗ ˗bha.»
48 ˈDhɛ ˈö mɛn ˈˈpɛpɛ ˈwo nu ˗dhɛ ˗ga bhë ˗an ˈˈɲan ˗yö ˗da ˈwɔn ˗nu ˈwo ˗kë bhë ˗an ˈgü, ˈyö ˈwo ˗ʒiö ˈwo dho wo ˗gɔ ˈˈkwɛnŋdhö, kö ˗wo wo ˗kënŋ ˗ta ˗man ˗ni ˈgü.
49 ˗Ya ˈgo mü ˈzü mɛn ˈˈpɛpɛ ˈö ˈwo Yesu dɔ, ˗wo ˗kun dɔ ˗sü ˈka mü ꞊gblɛnŋ ˈö ˈwo ˗dhɛ ˗ga. Dhebɔ ˈbhaa ˗nu ˈö ˈwo kun ʒiö ˗ni ˈgü ˗a ꞊kee˗ ˈö ˈwo go ˗a ˈka Galile ˗wo ˗kun mü ˈpö, ˈö ˗an ˈˈɲan ˗yö ˗da ˈwɔn ˗nu ˈwo ˗kë bhë ˗an ˈgü.
50 Gɔndë do ˈbhaa ˗yö ˗kun mü ˈö ˈwo˗ ˗dhɛ Zozɛfö. ˗Yö ˗kun zakanmɛn këwɔn ˗së ˗sü, ˈö kpɛnŋdhö ˗a ˈka.
51 (˗Kɔ ˈö zakanmɛn ˈˈwɛɛ ˗nu ˈwo to ˈwo mën ˗a ˈka Yesu ˗klü ˈgü waa pë ˈwo˗ ˗kë ˗a ˈka bhë, ˗a ˗kɔ ˈyaa kun ˗a ˈgü.) ˗Yö ˗go Adhimate ˈö ˗kë Zude ˈˈkwipö* do ˈka bhë ˗a ˈgü, ˈö kun ö ˈˈɲan ˈto ˗ni ˈgü ˈpö ˗Zlan ˗bha ˗Gblüdëdhɛ ˗gɔ.
52 Gɔndënën ˈö bhë ˗yö ˗dho Pidhatö ˈˈpiʋ̈, ˈö˗ pö ˗a ˗dhɛ ˗yö Yesu ꞊glöö nu ö ˗dhɛ.
53 ˈYö Yesu ꞊glöö bho ˈˈdhü ˗bha, ˈyö yɩɩga sɔ ꞊bhlëësü do ꞊plʋʋ ˗a ˈka, ˈyö dho ˈö˗ ˗wɔ mɛn ˗wɛɛbhodhɛ do ˈö ˈwo˗ pɔn ˗gwö ˈgü, ˈö wo ˈti mɛn ˈˈwɛɛ ˈbhaa wɔ mü do ˗a ˈgü.
54 ˗Yö ˗kë ˈˈdhʋ̈ ꞊Glooyi ˗wa ˗yi ˈö ˈwo wo ˗de ꞊baa ꞊Glooyi ˗bha bhë ˗a ˈka, kö ꞊Glooyi zü ˈdho˗ dɔ.
55 Dhebɔ ˗nu ˈö ˈwo kun ʒiö ˗ni ˈgü Yesu ꞊kee˗ ˈö ˈwo go ˗a ˈka Galile bhë, ˗wo ˗dho blɔɔndhö mü ˈpö ˈö ˈwo ˗dhɛ ˗ga, ˈö ˗kɔ ˈwo˗ ꞊glöö ˗wɔ ˗a ˈka mü ˈwo˗ yö.
56 ˈDhɛ ˈwo wo bo, ˈyö ˈwo dho ˈwo pë ˈˈyi waa ˈˈɲɔn ˈˈtöö ˗së ˗sü ˗nu ꞊mɛɛn ˈwo ˗an ˗wɔ wo ˗kɔ ˈˈsuee. ˈˈKɛɛ ˗wo wo ˈˈtee ˗pa ꞊Glooyi ˈka, ꞊dhɛ ˗kɔ ˈö ˈtɔŋ˗ ˗ya pö ˗a ˈka ˗a ˈdhö.
-Zoto -a ˈˈpiʋ̈ -wɔn -nu
^ Ɛɛnˈˈ «˗Bhö ˗a zë ˈˈdhü ˗bha! ˗Bhö ˗a zë ˈˈdhü ˗bha!»
^ Glɛkö ˗wo ˈgü ˈyö ˗tɔ «ˈˈlɛlɛ ˈˈsɔɔdo ˗bha ˗naan.»
^ Glɛkö ˗wo ˈgü ˈyö ˗tɔ «ˈˈlɛlɛ ˈˈseishiö ˗bha ˗naan.»
^ Glɛkö ˗wo ˈgü ˈyö ˗tɔ «ˈniin˗.»
^ Ɛɛnˈˈ «ˈyö˗ ˗bha ˈˈtësü ˗yö ˈduaannu.»
^ Glɛkö ˗wo ˈgü ˈyö ˗tɔ «Zudemɛn ˗nu ˗bha ˈˈkwipö.»
