Nɔɔn˗ ˗së ˈsëëdhɛ ˈö Lukö ˗ya ˗bɛnzë 24:1-53
24 ˈDhɛ ˈö ꞊Glooyi ˗yö ˗ʒiö, ˗a ˗dhɛkpaɔyi ˈö dɔ ˗a ˈˈpiʋ̈* bhë ˗a ˈka, ˈyö dhebɔ ˗nu bhë ˈwo ˗soo ˈwo dho pë ˈˈtöö ˗së ˗sü ˗nu ˈwo kun ˗an ˗gɔ bhë ˗an ˈka blɔɔndhɛ ˈö ˈwo Yesu ˗wɔ ˗a ˗bha bhë ˗a ˈgü.
2 ˈˈKɛɛ ˈyö ˈwo˗ yö ꞊dhɛ ˗gwö ˈö ˈwo˗ yö blɔɔndhɛ ˈö bhë ˗a ˈˈdhiʋ̈ bhë, ꞊waa˗ glünŋˈˈ ꞊waa˗ bho mü.
3 ˈDhɛ ˈwo dho ˈwo ˗da ˗a ˈgü, wo ˈti ˗kpan Dëmɛn Yesu ꞊glöö ˗bha.
4 ˈYö ˗an zuʋ̈ˈˈ ˗yö ꞊kaankwöö ˈö ˈpë ˈwo ˗dho ˗a kë ˈwaa kun ˗a dɔ ˗ni ˈgü. ˈWo ˗dho ˗dhɛ ˗ga kö gɔndë ꞊plɛ ˈö ˗an ˗bha sɔ ˈˈɲan ˈdhö ˈbhü ˗ni ˈgü ˗blanblandhö, ˗wo dɔ ˗sü ˈka ˗an ˈˈsuee.
5 ˈYö ˈˈsuʋ̈ ˗yö ˗da dhebɔ ˗nu ˈwo bhë ˗an ˈgü, ˈö ˈwo wo ˗gɔ ˈˈgblëënnu ˈˈshia˗. ˈYö gɔndënën ˗nu ˈwo bhë ˈwo˗ pö ˗an ˗dhɛ: «ˈMën ˈö ˗kë ˈö mɛn ˈö ˈˈbhɩɩ˗ ˈka˗ ꞊mɛɛn mɛn ˗nu ˈö ˗wa ga ˗an ꞊zinŋgü?
6 ˈYaa ˗dhɛ ˈö yö ˗a ˈgü ˈzüdho, ˗ya ˈgo ga ˈgü. Pë ˈö˗ pö ka ˗dhɛ kö ˗yö ꞊kun Galile ˗sɛ ˈgü bhë ka ˗zo ˗yö ˗buö ˗a ˈka.
7 Yö ˈti˗ pö ꞊dhɛ ˗wo ˗dho mɛn Gbö ˗da ˈwɔnyaakëmɛn ˗nu ꞊kwɛɛ˗ ˈö ˈwo˗ zë ˈˈdhü ˗bha, ˈˈkɛɛ ˈö˗ ˗dhɛkpaɔyi ˗yaaga ˗bha ˗naan ˈka ˈö go ga ˈgü ˗ee?»
8 ˈDhɛ ˈwo˗ pö ˈˈdhʋ̈ ˈyö ˗an ˗zo ˗yö ˗buö ˗wo ˗nu ˈö Yesu ˗yö ˗an pö bhë ˗an ˈka.
9 ˈYö ˈwo go blɔɔndhɛ ˈö bhë ˗a ˈgü ˈwo dho, ˈö ˈwo ˗ʒiö ˈwɔn ˗nu bhë ˗an ꞊gban ˈgü Yesu ˗bha bɔmɛn ˗nu ˗kɔŋ do ö ga do ˈwo bhë waa mɛn ˈˈpɛpɛ ˈwo to ˗an ˗dhɛ.
10 Dhebɔ ˗nu ˈwo ˈˈdhʋ̈ wo ˈnën ˈwo ˗tɔ Madhi ˈö go Madala,* Ʒanö waa Madhi ˈö ˗kë Zakö dhe ˈka. ꞊Ya ˈgo mü ˈzü dhebɔ ˈˈwɛɛ ˈbhaa ˗nu ˈwo kun ˗an ˈˈpiʋ̈ mü, ˗wo ˗ʒiö ˈwɔn ˗nu bhë ˗an ˈgü bɔmɛn ˗nu ˗dhɛ.
11 ˈˈKɛɛ pë ˈö dhebɔ ˗nu ˗wa pö bhë, ˗wa ˗sü ˈˈwlaawɔn ˈka, ˈö wo ˈti wo ˗zo yö ˗a ˗dhɛ.
12 ˈDhɛ ˈö ˗kë ˈˈdhʋ̈ ˈyö Piɛɛ ˗yö ꞊luu ˈö ˗bia ˗lö ˈö dho blɔɔndhɛ ˈö bhë ˗a ˈgü. ˈDhɛ ˈö ˗lo mü ˈö ö ꞊klʋŋ ˈö ˗dhɛ ˗ga, kö sɔ ˗nu ˈwo˗ ꞊plʋʋ Yesu ˈka bhë wo ˈnën ˈwo ˗lo ˗sü ˈka ˈˈshia˗ mü. ˈYö go ˗dhɛ ˈö bhë ˗a ˈgü ˈö ˗ʒiö, kö ˗yö ö ˗de dhɛɛˈˈ ˈkpɔ ˗ni ˈgü ˈwɔn ˈö ˗kë bhë ˗a ˈklɔɔ˗ ˈka.
13 ˗Dhɛkpaɔyi ꞊dede ˈö bhë ˗a ˈka, Yesu ˗bha gwëëˈˈ ˗nu ꞊plɛ ˗wo ˗kun ˈdho ˗ni ˈgü ˈpödhɛ ˈwo˗ ˗dhɛ Emausö bhë ˗a ˈgü. ˗Go Zedhizadhɛmö ˗sü ˈö ˈwo dho ˈpödhɛ ˈö bhë ˗a ˈgü, ˗yö ˗mɔn ˈˈkɩdhʋŋ ˗kɔŋ do ö ga do ˗bha.
14 ˈWɔn ˈˈpɛpɛ ˈwo ˗kë bhë ˗wo ˗kun ˗a ˈˈdoodɔ ˗ni ˈgü.
15 ˈDhɛ ˈwo kun ˈˈdoodɔ ˗ni ˈgü, kö ˗wo ˈwɔn ˗nu ˈwo ˗kë bhë ˗an ˗wɔn blɛɛˈˈ ˗ni ˈgü, ˈyö Yesu yöö ꞊dede ˗yö nu ˗an ˈˈsuee mü, ˈö waa˗ ˗nu ˈwo ˗ya ˈˈta ˈsü ˗sü ˗bha wo ˈkwëë˗.
16 ˗Wo ˗kpan ˗a ˗bha, ˈˈkɛɛ ˈwaa kun ˗a dɔ ˗ni ˈgü.
17 ˈYö˗ pö ˗an ˗dhɛ: «ˈMën ˈö ˈka˗ ˗wɔn blɛɛˈˈ ˗ni ˈgü ka ˈko ꞊zinŋgü ʒiaan ˗ta yö?» ˈDhɛ ˈö˗ pö ˈˈdhʋ̈ ˈyö ˈwo ˈduaannu ˈö ˗an ˗ta ˗yö ˗kë ˗saa.
18 ˈYö mɛn ꞊plɛ ˈwo bhë ˗a mɛn do ˈwo˗ ˗dhɛ Kleopasö ˗ya pö: «˗Dhɛŋ ˈö ˗ya ˗sü ˈka ö dʋʋˈˈ ˈka yö ˗mü ü ˈka Zedhizadhɛmö ˗ee? ˈWɔn ˗nu ˈwo kë ˗ni ˈgü ˗dhɛkpaɔyi ꞊plɛ ˈˈpiʋ̈ yö, ˈbhaa˗ ˈwɔn dɔ ˗ee?»
19 ˈYö ˗an dhɛɛˈˈ kpɔ ˈö˗ pö: «˗Mën ˗wɔn ˗mü?» ˈYö ˈwo˗ pö ˗a ˗dhɛ: «ˈWɔn ˗nu ˈwo ˗kë Yesu ˈö go Nazadhɛtö ˗a ˈka bhë ü ˈti˗ man ˗ee? ˗Ya ˗zɔn ꞊dhɛ ˗Zlan ˗wodhiʋ̈lomɛn ˗mü ö ˈka, ˈö ˈwɔn ˈˈmlünmlünsü ˗nu ˗kë ˗Zlan waa mɛnbhɩɩdhe ˗nu ˗an ˈˈɲan ˈˈdhiʋ̈, ˈö ꞊faan ˗yö kun ˗a ˗wo ˗bha ˈpö.
20 ˈˈKɛɛ kwa ˗bha ˈˈsaabhomɛn ˗nu ˗gɔmɛn ˗nu waa kwa ˗gɔdhiʋ̈mɛn ˗nu ˗wa ˗da mɛn ˗nu ꞊kwɛɛ˗ kö ˗wa zë, ˈyö ˈwo˗ kun ˈwo˗ dɔ ˈˈdhü ˗bha.
21 Yi˗ ˗ga ˗be ꞊dhɛ gɔndënën ˈö bhë yö ˈnën ˈö ˗tɔ mɛn ˈö ˗dho Izraɛdhömɛn ˗nu bho ˈˈgan ˈgü. ˈˈKɛɛ ˈdhɛ ˈö ˈwɔn ˗nu bhë ˈwo ˗kë, ˗a ˗dhɛkpaɔyi ˗yaaga ˗bha ˗naan ˈnën ˈö ꞊dɛɛ.
22 ˗Ya ˈgo mü ˈzü, pë ˈö dhebɔ ˈbhaa ˗nu ˈwo yi ꞊kee˗ ˈwo˗ pö ˗a ˈwɔn ˗yö yi ˗kun. ˗A ˗gɛn ˗mü ꞊dhɛ ˗wo ˗soo ˈö ˈwo dho ˗wo ˗a blɔɔndhö,
23 ˈˈkɛɛ ˈdhɛ ˈwo ˗lo mü, wo ˈti ˗kpan ˗a ꞊glöö ˗bha. ˈDhɛ ˈwo nu, ˗wa ˗pö wo ˗kpan ˗Zlan ˗bha ˈˈkiö ˗nu ˗bha ˈö ˈwo˗ pö wo ˗dhɛ Yesu ˗yö ˈˈbhɩɩ˗.
24 ˈDhɛ ˈö ˗kë ˈˈdhʋ̈, mɛn ˈbhaa ˗nu ˗wo ˗go yi kpö ˈgü ˈö ˈwo dho blɔɔndhö mü, ˈö ˈwɔn ꞊dede ˈö dhebɔ ˗nu ˗wa ꞊blɛɛ bhë ˈwo˗ yö, ˈˈkɛɛ wo ˈti ˗kpan Yesu ˗bha.»
25 ˈYö˗ pö ˗an ˗dhɛ: «ˈAa ˈmɛn ˈö ˈka yö, ˈwɔn ˈgüman ˗sü ˈyaa ka ˗gɔ. ˗Ya ˈgo mü ˈzü pë ˈˈpɛpɛ ˈö ˗Zlan ˗wodhiʋ̈lomɛn ˗nu ˗wa to ˈˈdhiʋ̈ ˈwo˗ pö, ˈdhaŋ˗ ˗bho ˗a ˈˈdhiʋ̈ ˗sü ˈö ˈˈvaandhö ˗yö ka ˗gɔ ˈˈgbɩɩ˗.
26 ˗A ˗dhɛ ˈyaa˗ ˗bha ˗be kö Klito ˗yö saanˈˈ ˈsü ꞊dhɛ ˗kɔ ˈö bhë ˗a ˈdhö, kö ˈtɔbhɔdhe ˈö˗ ˗bha ˈka ˗yö ꞊kun ˗a ꞊slɔɔ˗ ˗ee?»
27 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö pë ˈˈpɛpɛ ˈö ˗bɛnzë ˗sü ˈka ˗Zlan ˗Wo ˈsëëdhɛ ˈgü ˈö ˗gban ˗a ˗bha ˈö˗ ˗ta ˗pʋ ˗an ˗dhɛ. ˗Ya züdɔ pë ˗nu ˈö Moizö ˗yö ˗an ˗bɛnzë ˗an ˗ta ˈö dho ˈö yö ˗a ˈka ˗a ˈdhɛ ˈö ˗Zlan ˗wodhiʋ̈lomɛn ˗nu ˈˈpɛpɛ ˗wa ˗bɛnzë ˗a ˗bha.
28 ˈDhɛ ˈwo dho ˈwo yö ˈpödhɛ ˈö˗ ˗bha gwëëˈˈ ˗nu ˗wo kun ˈdho ˗ni ˗a ˈgü bhë ˗a ˈka ꞊klöö˗, ˈyö Yesu ˗ya ˗kë ꞊dhɛ ˈpë ˈö yö ˗zë ˈö ꞊kun ˈdho ö ˗bha ˈˈta ˈka ˈˈdhiʋ̈ ˗a ˈdhö.
29 ˈˈKɛɛ ˈyö ˈwo ˗gban ˗a ˗bha ˈwo˗ pö: «˗Bhö ˈto yi ˈˈpiʋ̈ yö, ˗a ˗gɛn ˗mü ꞊dhɛ ˈɲaan˗ ˗ya ˗puö, ˈˈbin ˗ya bhɔ ˈmën ˗sü ˗bha.» ˈYö ˗we ˗a ˗bha kö ˈö ˈto ˗an ˈˈpiʋ̈ mü. ˈYö dho ˗an ˗gɔ ˈkɔɔ.
30 ˈDhɛ ˈö waa˗ ˗nu ˈwo kun pë ˗bhö ˗ni ˈgü, ˈyö ˈbluu˗ sü ˈö ꞊bhɛɛ ˗a ˗ta, ˈö˗ ˈˈkluklu bho ˈö˗ nu ˗an ˗dhɛ.
31 ˈDhɛ ˈö ˗kë ˈˈdhʋ̈, ˈyö ˗an ˈˈɲan ˗yö ˗pʋ, ˈyö ˈwo˗ ˈwɔn dɔ ꞊dhɛ yö ˗mü, ˈˈkɛɛ ˈyö to mü ˈö ꞊dhiɔŋ.
32 ˈYö ˈwo˗ pö wo ˈko ˗nu ˗dhɛ: «ˈDhɛ ˈö kun ˗Zlan ˗Wo ˈklɔɔ˗ pö ˗ni ˈgü ko ˗dhɛ ʒiaan ˗ta bhë, ˈyaa kun ˈpa ˗ni ˈgü kö zuʋ̈ˈˈ ˈka ꞊dedewo ˗ee?»
33 ˈYö ˈwo to mü ˈwo ꞊luu, ˈö ˈwo wo ꞊yɛɛ ˗kë ˈwo dho Zedhizadhɛmö. ˈDhɛ ˈwo ˗kpan Yesu ˗bha bɔmɛn ˗nu ˗kɔŋ do ö ga do waa mɛn ˗nu ˈö waa˗ ˗nu ˈwo kun wo ˈkwëëdhö bhë ˗an ˗bha,
34 ˈyö ˈwo˗ pö mɛn ꞊plɛ ˈwo bhë ˗an ˗dhɛ: «Kwa Dëmɛn ˗ya ˈgo ga ˈgü ꞊dede ˈka, ˗ya ö ˗de ˗zɔn Simɔn ˗dhɛ!»
35 ˈDhɛ ˈö ˗kë ˈˈdhʋ̈ ˈyö wo ˗de ˈpö ˈwo ˈwɔn ˈö ˗kë ˗an ˈka ʒiaan ˗ta waa ˗kɔ ˈö ˈwo Yesu dɔ ˗a ˈka kö ˗yö ˈbluu˗ ˈˈklu bho ˗ni ˈgü bhë, ˈwo˗ ˗gɛn dɔ ˗an ˗dhɛ.
36 ˗Wo ˗to ˈwɔn ˗nu ˈwo bhë ˗an ˗gɛn dɔ ˗sü ˗bha ˈö Yesu yöö ꞊dede ˗yö to mü ˈö ˗wo ˗an ꞊zinŋgü, ˈyö˗ pö ˗an ˗dhɛ: «Zuʋ̈waannusü ˗yö kë ka ˗gɔ.»
37 ˈDhɛ ˈö ˗kë ˈˈdhʋ̈ ˈyö ˈˈshiʋ̈ ˗yö ˗kan ˗an ˈˈgblü, ˈö ˈˈsuʋ̈ ˗yö ˗da ˗an ˈgü, ˗a ˗gɛn ˗mü ꞊dhɛ ˗an ˗bha ˈgü ˗be wo ˈˈɲan ˈgü ˈnën ˈö ˗da ˈö ˈwo ˗kpan ˗zuu ˗bha.
38 ˈYö˗ pö ˗an ˗dhɛ: «ˈMën ˗kë ˈö ˈˈsuʋ̈ ˗yö ka ˗kë, ˈö ka zuʋ̈ˈˈ ˗yö dɔ ˈdudhö?
39 ˗Ka n ˗kɔdhɛ waa n ˗gɛndhɛ ˗nu ˗an ˗ga! Man ˗mü. ˗Ka ˈpa n ˈka, ˗ka n ˗ga! ˗Zuu ꞊nënŋ waa˗ ga ˗nu ˈwaa ˈdhö ꞊dhɛ ˗kɔ ˈö n ꞊nënŋ waa n ga ˗nu ˈdhö ˈdhö ˗a ˈka bhë ˗a ˈdhö.»
40 ˈDhɛ ˈö kun ˗a pö ˗ni ˈgü ˈˈdhʋ̈, kö ˗yö ö ˗kɔdhɛ ˗nu waa ö ˗gɛndhɛ ˗nu ˗zɔn ˗ni ˈgü ˗an ˗dhɛ.
41 ˈˈKɛɛ ˈdhɛ ˈö ˗kë ꞊dhɛ ˗an zuʋ̈ˈˈ ꞊nii ˗yö ˗kun ˗da ˗sü ˈka ꞊dedewo, ˈö˗ ˈwɔn ˗yö ˗an kun bhë, ˈyaa kun bhɔ ˗ni ˈgü ˗an ˗dhɛ gagade ˗bha. ˈDhɛ ˈö ˗kë ˈˈdhʋ̈ ˈyö˗ pö ˗an ˗dhɛ: «˗Bhöpë ˈnën ˈbhaa ˗yö ka ˗gɔ ˈyö ˗ee?»
42 ˈYö ˈwo ˈyuö˗ ˗yɛsü ˈˈklu do nu ˗a ˗dhɛ,
43 ˈyö˗ sü ˈö˗ ˗bhö ˗an ˈˈɲan ˈˈdhiʋ̈ mü.
44 ˈYö go mü ˈzü ˈö˗ pö ˗an ˗dhɛ: «ˈˈTʋ̈ŋ ˈa kun ˗a ˈka ka ˈˈpiʋ̈ bhë, a˗ ˗pö ka ˗dhɛ ˗a ˈgü ꞊dhɛ pë ˈˈpɛpɛ ˈö Moizö ˗bha ˈtɔŋ˗ ˗nu, ˗Zlan ˗wodhiʋ̈lomɛn ˗nu waa ˈˈtan ˗nu ˈsëëdhɛ ˗wa pö ˈö ˈwo ˗gban n ˗bha, ˗an dua ˗mü kö ˗wo yökodhiʋ̈.»
45 ˈDhɛ ˈö ˗kë ˈˈdhʋ̈ ˈyö ˗an ˗takun* kö ˗wo ˗Zlan ˗Wo ˈgüman ˗së ˈka,
46 ˈyö˗ pö ˗an ˗dhɛ: «Pë ˈö ˗bɛnzë ˗sü ˈka ˗Zlan ˗Wo ˈgü ˈyö ˗tɔ: Klito ˗dho saanˈˈ ˈsü, ˈö ˗dhɛkpaɔyi ˗yaaga ˗bha ˗naan ˈka ˈö go ga ˈgü.
47 ˗Ya ˈgo mü ˈzü, mɛn ˗nu ˗bha ˗go wo ˗bha ꞊sɔŋ yaa ˈgü ˗sü kö ˗wo wo zuʋ̈ˈˈ slëëˈˈ, kö ˗an ˗bha ˈwɔn yaa ˗nu ˗bhawɔn ˗yö ˈto bhë, ˗a ˗nɔɔn pö ˗sü ˈö˗ ˈtɔ ˈgü, ˗a zü ˗dho dɔ Zedhizadhɛmö ˈö dho ˈö ˗lo ˗a ˈka ˈˈsɛ ˗todhʋ̈sü ˈgü.
48 Ka ˈˈɲan ˗dho ˗da ˈwɔn ˗nu ˈwo bhë ˗an ˈgü.
49 ˗Yö kë ka ˈˈɲaan ꞊dhɛ pë ˈö n Dë ˗ya ˈˈplüün bho ka ˗dhɛ bhë, a ˗dho ˗a bɔ ka ˗dhɛ. ˗Ka ˈto Zedhizadhɛmö ˗yö ˈdho ˗yö yö ˗a ˈka ˈˈtʋ̈ŋ ˈö ˈˈpiigbɩɩdhɛ ˈö go dhaŋ˗ ˈgü ˈö ˗dho yɔɔˈˈ ˗a ˈka ka ˗ta bhë ˗a ˗bha.»
50 ꞊Taabha, ˗yö ˗go ˗an ˈka ˈpödhɛ ˈö bhë ˗a ˈgü ˈö ˈwo dho ˈwo ˗lo Betani, ˈyö ö ˗kɔ ꞊luu ˈö ˈdhuëë˗ kpɔ ˗an ˗bha.
51 ˈDhɛ ˈö kun ˈdhuëë˗ ˈkpɔ ˗ni ˈgü ˗an ˗bha, ˈyö go ˗an ˈˈpiʋ̈ mü ˈö dho dhaŋ˗ ˈgü.
52 ˈDhɛ ˈö ˗kë ˈˈdhʋ̈ ˈyö ˈwo ˈˈgblëënnu ˗a ˈˈdhiʋ̈,* ˈö ˈwo wo ꞊yɛɛ ˗kë Zedhizadhɛmö zuʋ̈gblüdhi ꞊dede ˈka.
53 ˗Wo ˗kun ˗Zlan ˗dhɔkë ˗a ˈgü ˗kɔ ˈgü yi ꞊gban ˈka, ˈö ˈwo ˗Zlan ˈtɔ bhɔ.
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «ˈˈdhoogɔ ˈö dɔ ˗a ˈˈpiʋ̈ ˗a ˗dhɛkpaɔyi ˗blɛɛsü.» Yö ˈnën ˈö ˗tɔ Zuifö ˗nu ˗bha ˗tɛɛdhoowayi.
^ Ɛɛnˈˈ « Madhi Madelɛnö.»
^ Glɛkö ˗wo ˈgü ˈyö ˗tɔ «ˈyö ˗an ˈˈtʋ ˗pʋ ˈˈgbɛɛ.»
^ Ɛɛnˈˈ «ˈyö ˈwo ꞊dhɔŋ ˗da ˗a ˗dhɛ.»
