Nɔɔn˗ ˗së ˈsëëdhɛ ˈö Lukö ˗ya ˗bɛnzë 3:1-38
3 Tibɛɛ Sezaa ˗bha ˗gblüdëdhɛ ˗kwɛ ˗kɔŋ do ö ga ˈˈsoodhu (15) ˗naan ˈka, Pɔnsö Pidhatö ˈnën ˈö kun Zude ˈˈsɛ ꞊kɔɔnmɛn ˈka. ˗A ˈˈtʋ̈ŋ ˈö bhë ˗a ˈgü kö Edhɔdö ˗yö Galile ˈˈsɛ ꞊kɔɔn ˗ni ˈgü, kö ˗a ꞊dhegblü Filipö ˗de ˈpö ˗yö ˈˈsɛ ˈˈpian ˗nu ˈö ˈwo ˗kë Itudhe waa Trakonitidö ˗an ˈka bhë ˗an ꞊kɔɔn ˗ni ˈgü, kö Lizaniasö ˗yö Abilɛnö ˈˈsɛ ꞊kɔɔn ˗ni ˈgü ˈpö.
2 ˗Yö ˗kë ˈˈdhʋ̈ ˈˈsaabhomɛn ˗nu ˗gɔmɛn Anö waa Kaifö ˗an ˗bha ˈˈtʋ̈ŋ ˈgü. ˈˈTʋ̈ŋ ˈö bhë ˈyö ˗Zlan ˗yö nɔɔn˗ bɔ Zan ˈö ˗kë Zakadhi gbö ˈka bhë ˗a ˗dhɛ ˈˈyɛta.
3 ˈDhɛ ˈö ˗kë ˈˈdhʋ̈, ˈyö Zan ˗yö dho ˈˈsɛ ˈˈpɛpɛ ˈö ˈwo Zuudɛn ga ˗züzü bhë ˗an ˈgü, ˈyö ˗zlanwopö mü ˈö˗ pö mɛn ˗nu ˗dhɛ ꞊dhɛ ˗wo bɔ ˈˈyi ꞊bhaa, kö ˗wa ˗zɔn ꞊dhɛ ˈwa wo zuʋ̈ˈˈ slëëˈˈ ˗Zlan ˈˈpiʋ̈, kö ˗yö ˗an ˗bha ˈwɔn yaa ˗nu ˗bhawɔn ˈto.
4 ˈWɔn ˈö bhë ˗yö ˗kë ꞊dhɛ ˗kɔ ꞊dede ˈö ˗bɛnzë ˗sü ˈka ˗a ˈka ˗Zlan ˗wodhiʋ̈lomɛn Izai ˗gɔ ˈsëëdhɛ ˈgü ˗a ˈdhö. ˗Yö pö ˗sü ˈka mü ꞊dhɛ: «Mɛn do ˈbhaa ˗yö ˈˈgbla ˗ni ˈgü ˈˈyɛta ˈö˗ pö ˗ni ˈgü: ‹˗Ka Zoova ˗bha ʒiaan baaˈˈ, ˈka˗ ˗bha ˗kpinŋga ˗nu dɔ ꞊zinŋgü!
5 ˗Ka googüdhɛ ˗nu ꞊gban ta, ˈka ˗tɔn ˗nu waa googa ˗nu wüüˈˈ kö ˗an ˗tadhɛ ˗yö ˗mɔn ˈˈkwöö. ˗Ka ʒiaan klʋŋˈˈ ˗sü ˗nu dɔ ꞊zinŋgü, kö ˈka ʒiaan ˈˈyaŋglö ˗yaŋglö ˗nu baaˈˈ kö ˗an ˗tadhɛ ˗yö kë ˈkpɛikpɛ.
6 ˗Ya kë ˈˈdhʋ̈, ˗kɔ ˈö ˗Zlan dho mɛnbhɩɩdhe ˗nu dha* ˗a ˈka, mɛn ꞊gban ˈˈpɛpɛ ˈˈɲan ˗dho ˗da ˗a ˈgü.›»
7 ˈDhɛ ˈö ˗kë ˈˈdhʋ̈ ˈyö ˗ya ˗a pö ˗sü ˗bha mɛn ꞊va ˈwo kun nu ˗ni ˈgü ˗a ˈˈpiʋ̈ kö ˗yö wo bɔ ˈˈyi ꞊bhaa bhë ˗an ˗dhɛ: «꞊Bhöö ꞊suugünën ˗nu, ˈde ka ꞊kpɔɔ kö ˈka ꞊duëë ˗Zlan ˗bha ˗naanzuëdhe ˈö nu ˗ni ˈgü bhë, ˗a ˗gɔ?
8 ˈWɔn ˗nu ˈwo ˗dho ˗a ˗zɔn ꞊dhɛ ˈka ka zuʋ̈ˈˈ slëëˈˈ, ˗ka ˗an kë ˈsa. ˈKa ˗dho ˗a pö ka ˗de ˗dhɛ: ‹Ablaamö ꞊suugünën ˗nu ˗mü yi ˈka.› A˗ ˗pö ka ˗dhɛ ꞊dhɛ ˗Zlan ꞊mɔɔn˗ ˗bha ˈö˗ ˗kë ˈö Ablaamö ꞊suugünën ˗nu ˗wo go ˗gwö ˗nu ˈwo yö ˗an ˈgü.
9 ˗Yö kë ka ˈˈɲaan ꞊dhɛ ꞊dua ˗yö wɔ ˗sü ˈka ˈˈdhü ˗nu ꞊gɛnŋdhö ˈsaadhö. ˈˈDhü ˈˈpɛpɛ ˈö ˈwaa wo bhɛ ˗së ˗ya, ˗wo ˗dho ˗an ˈˈkan ˈö ˈwo ˗an ˗zuö ˈˈshiʋ̈ ˈgü.»
10 ˈYö mɛn ꞊va ˈwo kun mü bhë ˈwo˗ dhɛɛˈˈ kpɔ ˈö ˈwo˗ pö: «ˈDhɛ ˈö ˈˈdhʋ̈, ˈmën ˈö yi dua ˈdhö ˗mü kö ˈyi˗ kë?»
11 ˈYö˗ ˗yɔ bɔ ˗an ˗gɔ ˈö˗ pö: «Mɛn ˈö sɔ ꞊plɛ ˈdhö˗ ˗gɔ, ˗ya do nu mɛn ˈö sɔ ˈyaa˗ ˗gɔ ˗a ˗dhɛ. Mɛn ˈö ˗bhöpë ˈdhö˗ ˗gɔ ˈpö ˗yö ˗a kë ꞊dhɛ ˗kɔ do ˈö bhë ˗a ˈdhö.»
12 ˈNiinsɔnŋkunmɛn ˗nu ˗de ˗ʒiaan ˈwo nu ˈpö kö ˗yö wo bɔ ˈˈyi ꞊bhaa bhë, ˗wa dhɛɛˈˈ ˗kpɔ ˈwo˗ pö: «˗Gɔmɛn, ˈmën ˈö yi dua ˈdhö ˗mü kö ˈyi˗ kë?»
13 ˈYö˗ ˗yɔ bɔ ˗an ˗gɔ ˈö˗ pö: «ˈNiin˗ ꞊sɔnŋ ˈö mɛn ˗nu dua ˈdhö ˗mü kö ˗wa bho, ˈka ˗dho ˈˈgbɩɩdhɛ wɔ ˗an ˗ta kö ˗wa ˈbhaa ˗da ˗a ˗ta.»
14 Mɛn ˗nu ˈwo ˈˈsɔdha ˈka ˈpö ˗wa dhɛɛˈˈ ˗kpɔ ˈö ˈwo˗ pö: «ˈMën ˈö yi dua ˈdhö ˗mü kö ˈyi˗ kë?» ˈYö˗ ˗yɔ bɔ ˗an ˗gɔ ˈö˗ pö: «ˈKa ˗dho mɛn ˗nu ˗bha pë ˈsü ˗an ˗gɔ ˈˈgbɩɩdhɛ ˈka ɛɛnˈˈ ˈka ˗dho ꞊suawɔn ˗ya mɛn ˈbhaa ˗bha. Pë ˈwo˗ nu ka ˗dhɛ ka ꞊saa ˈka ˗yö ka ˗zokun.»
15 ˈDhɛ ˈö ˗kë ꞊dhɛ mɛn ˗nu ˗wo ˗kun wo ˈˈɲan ˈto ˗ni ˈgü mɛn ˈö ˗dho kë ˗Zlan ˗bha ˗Yamɛn ˈka ˗a ˗gɔ bhë, ˗wo wo ˗zota ˈwɔn ˈö ˗gban Zan ˗bha ˗a ˈgü ˈö ˈwo˗ pö: «ˈYaa ˈnën ˈö ˗tɔ Klito ˈˈdhʋ̈ ˗ee?»
16 Zan ˗ya ˗yɔ ˗bɔ ˈö˗ pö ˗an ꞊gban ˈˈpɛpɛ ˗dhɛ: «Man ˗zë ˈˈyi ˈnën ˈa ˗dho ka bɔ ˗a ꞊bhaa, ˈˈkɛɛ mɛn ˈö˗ ꞊bhlëë ˈdhö ˈkpii˗ ˈö ˗ʒiö ˗a ˈka n ˗ta ˗yö nu ˗ni ˈgü. Yö ˗zë ˗yö ˗dho ö ˗bha kë ˗zuu ˈˈslʋ̈ʋ̈slʋ̈ waa ˈˈshiʋ̈* ˗an ˈka. ˗Sabha ˗de ˈö˗ ˗gɛn ˗bha, ˗a ˈˈse ˈyaa n ˗dhɛ kö ˈa˗ gën ˈˈpʋ.
17 ˗A ˗bha pë ˗piö ˗a ˈka ˗pë ˗ya ꞊kwɛɛ˗. ˗Yö ˗dho ö ˗bha ˈble˗ ˗mandhɛ ˗gwö ˈpapadhö, ˈö ˈble˗ ga ˗nu dho ˈkwëë˗ ˈö ˗an ˗lo ö ˗bha ˗bhöpë ˗lo ˗a ˈgü ˗kɔ ˈgü. ˈˈKɛɛ ˗an ˗gbo ˗nu ˗zë, ˗yö ˗dho ˗an ˈˈgʋ̈ ˈˈshiʋ̈ ˈö ˈwaa ꞊mɔɔn˗ ˗bha kö ˗wa dhuuˈˈ toŋtoŋdhö ˗a ˈgü.»
18 ˗Yö ˗dhioo ꞊va ˈˈwɛɛ ˈbhaa ˗dɔ ˈˈsɛgümɛn ˗nu ˗ta, ˈö nɔɔn˗ ˗së pö ˗an ˗dhɛ ˈpö ˗kplawo.
19 ˈˈKɛɛ ˈdhɛ ˈö ˗kë ꞊dhɛ Edhɔdö ˈö kun Galile ˈˈsɛ ꞊kɔɔn ˗ni ˈgü ˈˈtʋ̈ŋ ˈö bhë ˗a ˈka ˗yö ö ˗de ꞊dhegblü ˗bha dhebɔ Edhodiadö ˗sü dhe ˈka, ˈö go mü ˈzü ˈö ˈwɔn yaa ꞊va ˗kë bhë, Zan ˗yö ˗kun ˈwɔn blɛɛˈˈ ˗ni ˈgü ˗a ˈka.
20 ˗A ˗wɔn ˈgü, Edhɔdö ˗yö ˈwɔn yaa do ꞊gbɔɔnsü ˗kë ˈzü: ˗Yö Zan ˗kun ˈö˗ ˗da ˗kaso ˈgü.
21 ˈDhɛ ˈö Zan ˗yö mɛn ˈˈpɛpɛ bɔ ˈˈyi ꞊bhaa, ˈyö Yesu bɔ ˈˈyi ꞊bhaa ˈpö. ˈDhɛ ˈö Yesu kun bhɛɛˈˈ ˗ni ˈgü, ˈyö dhaŋ˗ ˈˈdhi ˗yö ˗pʋ,
22 ˈyö ˗zuu ˈˈslʋ̈ʋ̈slʋ̈ ˗yö ˗kë ꞊dhɛ ˗toŋ ˈdhö ˈö go dhaŋ˗ ˈgü ˈö ꞊yɔɔ ˗a ˗ta. ˈYö ˗wo do ˈbhaa ˗yö ˗we dhaŋ˗ ˈgü ˈö˗ pö: «Bhi ˈnën ˈü ˗tɔ n Gbö dhɔɔbhaasü, ü n zuʋ̈ˈˈ ꞊nii ˗da ꞊dedewo.»
23 ˈDhɛ ˈö Yesu ˗yö ö ˗bha ˗zlanwopö ˗yö züdɔ, kö ˗a ˗kwɛ ˗ya ˗mɔn ˗kɔŋ ˗yaaga (30) ˗bha. Mɛn ˈö mɛn ˗nu ˗wa dɔ ꞊dhɛ ˗a dë ˈdhö,ˈyö ˗tɔ Zozɛfö.Zozɛfö ˈö bhë ˗a dë ˈnën ˈö ˗tɔ Edhi,
24 Edhi dë ˈtɔ˗ Matatö,Matatö dë ˈtɔ˗ Levi,Levi dë ˈtɔ˗ Mɛdhüki,Mɛdhüki dë ˈtɔ˗ Zanai,Zanai dë ˈtɔ˗ Zozɛfö,
25 Zozɛfö dë ˈtɔ˗ Matatiasö,Matatiasö dë ˈtɔ˗ Amɔsö,Amɔsö dë ˈtɔ˗ Naumö,Naumö dë ˈtɔ˗ Ɛsidhi,Ɛsidhi dë ˈtɔ˗ Nagai,
26 Nagai dë ˈtɔ˗ Maatö,Maatö dë ˈtɔ˗ Matatiasö,Matatiasö dë ˈtɔ˗ Semeinö,Semeinö dë ˈtɔ˗ Zosɛkö,Zosɛkö dë ˈtɔ˗ Ʒoda,
27 Ʒoda dë ˈtɔ˗ Zoananö,Zoananö dë ˈtɔ˗ Dhesa,Dhesa dë ˈtɔ˗ Zodhobabɛdhö,Zodhobabɛdhö dë ˈtɔ˗ Sheatiɛlö,Sheatiɛlö dë ˈtɔ˗ Nedhi,
28 Nedhi dë ˈtɔ˗ Mɛdhüki,Mɛdhüki dë ˈtɔ˗ Adi,Adi dë ˈtɔ˗ Kosamö,Kosamö dë ˈtɔ˗ Elimadamö,Elimadamö dë ˈtɔ˗ Ɛdhö,
29 Ɛdhö dë ˈtɔ˗ Yesu,Yesu dë ˈtɔ˗ Edhiezɛɛ,Edhiezɛɛ dë ˈtɔ˗ Zodhimö,Zodhimö dë ˈtɔ˗ Matatö,Matatö dë ˈtɔ˗ Levi,
30 Levi dë ˈtɔ˗ Simeɔn,Simeɔn dë ˈtɔ˗ Zuda,Zuda dë ˈtɔ˗ Zozɛfö,Zozɛfö dë ˈtɔ˗ Ʒonamö,Ʒonamö dë ˈtɔ˗ Eliakimö,
31 Eliakimö dë ˈtɔ˗ Melea,Melea dë ˈtɔ˗ Mena,Mena dë ˈtɔ˗ Matata,Matata dë ˈtɔ˗ Natan,Natan dë ˈtɔ˗ Davi,
32 Davi dë ˈtɔ˗ Ʒese,Ʒese dë ˈtɔ˗ Obɛdö,Obɛdö dë ˈtɔ˗ Boazö,Boazö dë ˈtɔ˗ Samɔnö,Samɔnö dë ˈtɔ˗ Nashɔnö,
33 Nashɔnö dë ˈtɔ˗ Aminadabö,Aminadabö dë ˈtɔ˗ Aani,Aani dë ˈtɔ˗ Ɛzrɔn,Ɛzrɔn dë ˈtɔ˗ Perɛzö,Perɛzö dë ˈtɔ˗ Zuda,
34 Zuda dë ˈtɔ˗ Zakɔbö,Zakɔbö dë ˈtɔ˗ Izaakö,Izaakö dë ˈtɔ˗ Ablaamö,Ablaamö dë ˈtɔ˗ Tedha,Tedha dë ˈtɔ˗ Naɔɔ.
35 Naɔɔ dë ˈtɔ˗ Sedhugö,Sedhugö dë ˈtɔ˗ Dheu,Dheu dë ˈtɔ˗ Pelɛgö,Pelɛgö dë ˈtɔ˗ Ebɛɛ,Ebɛɛ dë ˈtɔ˗ Shedha,
36 Shedha dë ˈtɔ˗ Kainanö,Kainanö dë ˈtɔ˗ Apashadö,Apashadö dë ˈtɔ˗ Sɛmö,Sɛmö dë ˈtɔ˗ Noe,Noe dë ˈtɔ˗ Lamɛkö,
37 Lamɛkö dë ˈtɔ˗ Matuzalɛmö,Matuzalɛmö dë ˈtɔ˗ Enɔkö,Enɔkö dë ˈtɔ˗ Zadhɛdö,Zadhɛdö dë ˈtɔ˗ Maalaleɛdhö,Maalaleɛdhö dë ˈtɔ˗ Kainanö,
38 Kainanö dë ˈtɔ˗ Enɔshö,Enɔshö dë ˈtɔ˗ Sɛtö,Sɛtö dë ˈtɔ˗ Adan,ˈyö Adan dë ˗kë ˗Zlan ˈka.
-Zoto -a ˈˈpiʋ̈ -wɔn -nu
^ Ɛɛnˈˈ «pë ˈö ˗Zlan dho bɔ ˗a ˗ta ˈö mɛnbhɩɩdhe ˗nu dha.»
^ ˗Wo ˗we «˗kɔ ˗yɛ mɛn ˈbhaa ˗nu ˗bha ˗sü ˈö ˗zuu ˈˈslʋ̈ʋ̈slʋ̈ ˈka waa mɛn ˈbhaa ˗nu ˈgüshiʋ̈sü ˈö ˈˈshiʋ̈ ˈka» ˗an ˈka.
