Nɔɔn˗ ˗së ˈsëëdhɛ ˈö Lukö ˗ya ˗bɛnzë 4:1-44
-
˗Kɔ ˈö Dügɔmɛn ˗yö Yesu ˈgüdan ˗a ˈka (1-13)
-
Yesu ˗bha ˗zlanwopö ˗sü züdɔsü ˈö Galile (14, 15)
-
Mɛn ˗nu wo ˈti ˈˈwɩ Yesu ˗wɔn ˗bha Nazadhɛtö (16-30)
-
ˈWɔn ˈö ˗kë ˗yakwëë ˗kë ˗a ˈgü ˗kɔ ˈgü Kapɛɛnaɔmö (31-37)
-
Simɔn ˗bha dhebɔ dhö waa mɛn ˈˈwɛɛ ˈbhaa ˗nu ˗dhɛ bo ˗sü (38-41)
-
Mɛn ˗nu ˗dho ˈwo ˗kpan Yesu ˗bha ˗dhɛ ˈö mɛn ˈbhaa ˈyaa˗ ˗bha ˗a ˈgü (42-44)
4 ˈDhɛ ˈö Yesu ˗yö go Zuudɛn ꞊bhaa, ˈyö ˗Zlan ˗yö ˗zuu ˈˈslʋ̈ʋ̈slʋ̈ nu ˗a ˗dhɛ. ˈYö ˗zuu ˗yö ˈˈdhiʋ̈sü ˗a ˈka ˈö dho ˗a ˈka ˈˈyɛta
2 ˈö ˗dhɛkpaɔyi ˗kɔŋ ˗yiishiö (40) ˗kë mü. ˈDhɛ ˈö bhë ˈyö Dügɔmɛn ˗ya ˈgüdan ˗a ˗bha. ˈˈTʋ̈ŋ ˈö˗ ˗kë mü bhë yö ˈti pë ˈˈwɛɛ ˈbhaa ˗bhö ˈö to ˗a ˈka ˈˈdhʋ̈ ˈö yö ˗a ˈka ˗a ˈˈdhiʋ̈todhɛ ˗bha. ˈYö din˗ ˗ya kun.
3 ˈDhɛ ˈö ˗kë ˈˈdhʋ̈, ˈyö Dügɔmɛn ˗ya pö ˗a ˗dhɛ: «˗Ya kë ꞊dhɛ ˗Zlan gbö ˗mü ü ˈka, ˗a pö ˗gwö ˈö yö ˗a ˗dhɛ ˗yö ˈˈgla ˈbluu˗ ˈgü.»
4 ˈˈKɛɛ ˈyö Yesu ˗ya ˗yɔ bɔ ˗a ˗gɔ ˈö˗ pö: «˗Yö ˗bɛnzë ˗sü ˈka ˗Zlan ˗Wo ˈsëëdhɛ ˈgü ꞊dhɛ: ‹Mɛnbhɩɩdhe dua ˈyaa ˗mü kö ˗yö ˗tosɛta kë ˗bhöpë* dosɛnŋ ˗ta.›»
5 ˈYö Dügɔmɛn ˗ya sü ˈzü ˈö dho ˗a ˈka ˗tɔn do ˗ta, ˈyö to ˈˈshia˗ mü ˈö ˗gblüdëdhɛ ˗nu ˈˈpɛpɛ ˈwo ˈˈsɛ ˗ta ˗an ꞊gban ˗zɔn ˗a ˗dhɛ wo ˈˈkwöö.
6 ˈYö˗ pö ˗a ˗dhɛ: «A ˗dho ˗gblüdëdhɛ ˗nu ˈwo yö waa ˗an ˗bha ˈtɔbhɔdhe ꞊gban nu ü ˗dhɛ, ˗a ˗gɛn ˗mü ꞊dhɛ ꞊waa˗ ꞊gban ˈˈpɛpɛ ˗lo n ꞊kwɛɛ˗. Mɛn ˈö ˗dhi n ˗dhɛ ˈyö ˈa˗ nu ˗a ˗dhɛ.
7 ˈDhɛ ˈö ˈˈdhʋ̈, kö ˈü ˈˈgblü n ˗dhɛ ˈˈshia˗ ˈü n ˗dhɔkë, ˈkö ˗kë ꞊dhɛ ü˗ ˗kë ˗gɛnɲaan ˈka dosɛnŋ ˈˈkpaan, a ˗dho ˗an ꞊gban nu ü ˗dhɛ.»
8 ˈYö Yesu ˗ya pö ˗a ˗dhɛ: «˗Yö ˗bɛnzë ˗sü ˈka ˗Zlan ˗Wo ˈsëëdhɛ ˈgü ꞊dhɛ: ‹Zoova ü ˗bha ˗Zlan ˈnën ü dua ˈdhö ˗mü kö ˈü˗ ˗dhɔkë. Yö dosɛnŋ ˈˈkpaan ˈnën ü dua ˈdhö ˗mü kö ˈü˗ gba.›»
9 ˈYö Dügɔmɛn ˗ya sü ˈzü ˈö dho ˗a ˈka Zedhizadhɛmö, ˈyö˗ dɔ ˗Zlan ˗dhɔkë ˗a ˈgü ˗kɔ ˗ta ˈˈdhuŋ, ˈö˗ pö ˗a ˗dhɛ: «˗Ya kë ꞊dhɛ ˗Zlan gbö ˗mü ü ˈka, ˗bhö dɔ ˈyö ˈü ü ꞊kwaa ü ˗de ˗zü kö ˈü ˗puö,
10 ˈyö ˗tɔ ˗yö ˗bɛnzë ˗sü ˈka ˗Zlan ˗Wo ˈsëëdhɛ ˈgü ꞊dhɛ: ‹˗Yö ˗dho ö ˗bha ˈˈkiö ˗nu bɔ kö ˗wo ü ˗takpa,›
11 kö ‹˗wo wo ˗kɔ ˈkpɔ ü ˗gɔ, kë ˈˈdhʋ̈ kö ü ˗gɛn ˈya ˗dho ˗man ˗gwö ˗bha.›»
12 ˈYö Yesu ˗ya pö ˗a ˗dhɛ: «˗Yö pö ˗sü ˈka ꞊dhɛ: ‹Ü dua ˈyaa ˗mü kö ˈü Zoova ü ˗bha ˗Zlan ˈgüdan.›»
13 ˈDhɛ Dügɔmɛn ˗yö ö bo ˗a ˈgüdan ˗sü ˈka, ˈyö˗ to mü ˈö ˗ʒiö, kö ˈö˗ ˈgüdan ˈˈtʋ̈ŋ ˗së ˈˈwɛɛ ˈˈdhiʋ̈ ˈˈgan.
14 ˈDhɛ ˈö ˗kë ˈˈdhʋ̈, ˈyö Yesu ˗yö ö ꞊yɛɛ ˗kë ˈö dho Galile kö ˗zuu ˈˈslʋ̈ʋ̈slʋ̈ ˗ya ˗ta. ˈYö ˈwo ˗ya ˗a ˗wɔn ˗së blɛɛˈˈ ˗sü ˗bha ˈpödhɛ ˗nu ˈwo mü ˗an ꞊gban ˈgü.
15 ˗Yö ˗ya mɛn ˗nu ꞊klaŋ kë ˗sü ˗bha ˈpö ˗an ˗bha ˗yakwëë ˗kë ˗a ˈgü ˗kɔ ˗nu ˈgü, ˈö mɛn ꞊gban ˈˈpɛpɛ kun ˗a ˈtɔ ˗së pö ˗ni ˈgü.
16 ˈDhɛ ˈö go mü ˈyö dho Nazadhɛtö, ˈpödhɛ ˈö ˗gla ˗a ˈgü bhë ˗a ˈgü. ˈDhɛ ˈö ˗lo mü, ˈyö dho ˗yakwëë ˗kë ˗a ˈgü ˗kɔ ˈgü ꞊Glooyi ˈka ꞊dhɛ ˗kɔ ˈö˗ ˗kë ˗a ˈka ˗be ˗kplawo bhë ˗a ˈdhö, ˈyö ꞊luu kö ˈö ˈsëëdhɛ ˗wo pö.
17 ˈDhɛ ˈö ˗kë ˈˈdhʋ̈, ˈyö ˈsëëdhɛ ˈö ˗Zlan ˗wodhiʋ̈lomɛn Izai ˗ya ˗bɛnzë bhë ˈwo˗ ˗be nu ˗a ˗dhɛ, ˈyö˗ ˈˈdhi ˗pʋ. ˗A ˈˈpian ˈö dho ˗a ˗ta bhë, ˗wo ˈö kun ˗bɛnzë ˗sü ˈka mü ˈyö ˗tɔ:
18 «Zoova ˗bha ˗zuu ˗yö n ˗ta, ˗a ˗gɛn ˗mü ꞊dhɛ ˗yö n ˗ya kö ˈa nɔɔn˗ ˗së pö ˈˈfleemɛn ˗nu ˗dhɛ. ˗Yö n ˗bɔ kö mɛn ˗nu ˈwo ˗kaso ˈgü ˈa˗ pö ˗an ˗dhɛ ꞊dhɛ ˗wo ˗dho ˈgo ˈˈgan ˈgü, kö ˈa˗ pö ˈˈɲɛɛntiimɛn ˗nu ˗dhɛ ꞊dhɛ ˗an ˈˈɲan ˗dho ˈˈpʋ, kö mɛn ˗nu ˈwo saanˈˈ ˈsü ˗ni ˈgü ˈa ꞊potaadhe nu ˗an ˗dhɛ,
19 kö ˗kwɛ ˈö ˗kë Zoova ˗bha ˈˈgblüsë ˈkpii˗ ˗kwɛ ˈka bhë ˈa˗ ˗wɔn blɛɛˈˈ.»
20 ˈDhɛ ˈö ö bo ˈsëëdhɛ ˈö bhë ˗a ˗wo pö ˗sü ˈka, ˈyö˗ ˗be ˗kë ˈö˗ nu yökë ˗yakwëë ˗kë ˗a ˈgü ˗kɔ ˈgümɛn ˈö kun mü bhë ˗a ˗dhɛ, ˈyö ˈɲaannu, kö mɛn ˈˈpɛpɛ ˈwo kun ˈkɔɔ mü ˗wa ˗ga ˗ni ˈgü ˗pinŋdhö.
21 ˈDhɛ ˈö ˗kë ˈˈdhʋ̈, ˈyö ˗ya ˈwɔn blɛɛˈˈ ˗sü ˗bha ˗an ˗dhɛ ˈö˗ pö: «꞊Dɛɛ, ˗wo ˈö ˗Zlan ˗Wo ˗ya pö ˈö ˈka ˈgo ˗ni ˈgü ˗a man bhë, ˗ya yökodhiʋ̈.»
22 ˈYö mɛn ꞊gban ˈˈpɛpɛ ˗ya ˗a ˗wɔn ˗së blɛɛˈˈ ˗sü ˗bha, ˈyö ˗wo ˗së ˗nu ˈwo pa mɛn zuʋ̈ˈˈ ˈka ˈö ˈwo ˗an man bhë ˗a ˈwɔn ˗yö ˗an kun ꞊dedewo, ˈyö ˈwo ˗ya ˗a pö ˗sü ˗bha wo ˈko ˗nu ˗dhɛ: «Zozɛfö gbö do ˈyaa ˈnën ˈö yö ˗ee?»
23 ˈYö Yesu ˗ya pö ˗an ˗dhɛ: «A˗ ˈwɔn ˗dɔ ꞊dhɛ ˈˈgɔɔn ˈö yö ka ˗dho ˗a bɔ n ˗dhɛ ˈö ˈka˗ pö: ‹꞊Dhɔtrɔɔ˗ mi, ˗bhö ü ˗de ˗dhɛ bo. ˈWɔn ˗nu ˈü ˗an ˗kë Kapɛɛnaɔmö ˈö ˈyi ˗an ˗tɔɔ man bhë, ˗bhö ˗an kë ˈpö ü ˗de ˗gɔ ˈpödhɛ ˈö yö ˗a ˈgü.›»
24 ˈYö˗ pö ˗an ˗dhɛ ˈzü: «A˗ ˗pö ka ˗dhɛ gagade ˈka ꞊dhɛ ˈwaa wo ˗kɔ ˗ya ˗Zlan ˗wodhiʋ̈lomɛn ˈˈwɛɛ ˈbhaa ˗gɔ ˗së ˈka ˗a ˗de ˗gɔ ˈˈsɛ ˈgü.
25 ˗A ˈwɔnzuan ꞊nɛn: Edhi ˗bha ˈˈtʋ̈ŋ ˈgü ˈdhɛ dhaŋ˗ ˈˈdhi ˗yö ta ˗kwɛ ˗yaaga waa ˈˈsu ˈˈsɔɔdo ˈka, ˈö ˈˈvʋ̈ʋ̈ ˗yö ˗da ˈˈsɛ ˈö yö ˗a ˗dhɛ ꞊gban ˈˈpɛpɛ ˈgü bhë, ꞊gɛandhe ˗nu ꞊va ˗wo ˗kun Izraɛdhö.
26 ˈˈKɛɛ ˗Zlan yö ˈti Edhi bɔ dhebɔ ˗nu ˈwo bhë ˗a mɛn ˈˈwɛɛ ˈbhaa ˈˈpiʋ̈, ˗ya ˗bɔ ꞊ʒiaan ꞊gɛandhe ˈö go Sadhɛta Sidɔn ˗sɛ ˈgü yö dosɛnŋ ˗a ˈˈpiʋ̈.
27 ˗Zlan ˗wodhiʋ̈lomɛn Edhize ˗bha ˈˈtʋ̈ŋ ˈgü ˈpö, ꞊weemɛn ˗nu ꞊va ˗kun Izraɛdhö ˗sɛ ˈgü, ˈˈkɛɛ yö ˈti˗ mɛn ˈˈwɛɛ ˈbhaa ˗dhɛ bo, mɛn dosɛnŋ ˈö˗ ˗dhɛ bo ˈyö ˗tɔ Naamanö ˈö go Sidhi ˗sɛ ˈgü.»
28 Mɛn ˈˈpɛpɛ ˈö ˈwo kun ˗yakwëë ˗kë ˗a ˈgü ˗kɔ ˈö bhë ˗a ˈgü ˈö ˈwo ˗wo ˈö bhë ˗a man, ˗yö ˗shiö ˗an ˗dhɛ ꞊dedewo.
29 ˈDhɛ ˈö ˗kë ˈˈdhʋ̈, ˈyö ˈwo ꞊luu ˈö ˈwo˗ ˗gaangaan ˈwo go ˗a ˈka ˈplöö ˈwo dho ˗a ˈka ˗tɔn ˈö ˗an ˗bha ˈpödhɛ kun ˗a ˗ta bhë ˗a ˗tëŋ ꞊taa, kö ˈwo dɔ mü ˈwo˗ ˗blü kö ˗yö bhɔ ˗dhëŋ ˈka.
30 ˈˈKɛɛ ˈyö Yesu ˗yö go ˗an ꞊zinŋgü mü ˈö dho.
31 ˈDhɛ ˈö ˗kë ˈˈdhʋ̈ ˈyö ꞊yɔɔ ˈö dho Kapɛɛnaɔmö ˈö ˗kë Galile ˗pö do ˈka bhë ˗a ˈgü. ˈYö mɛn ˗nu ꞊klaŋ ˗kë mü ꞊Glooyi ˈka.
32 ˈYö˗ ˗bha mɛn ꞊klaŋ kë ˗kɔ ˈwɔn ˗yö mɛn ˗nu kun ꞊dedewo, ˈyö sü ꞊dhɛ ˗yö ˗kun ˈwɔn ˗nu blɛɛˈˈ ˗ni ˈgü ˗wogbinŋdhɛ ˈka.
33 Gɔndë do ˈbhaa ˗yö ˗kun ˗yakwëë ˗kë ˗a ˈgü ˗kɔ ˈgü mü ˈö ˗zuu yaa ˗yö kun ˗a ˈgü. ˈYö ˗gbla ˈˈgbɩɩ˗ ˈö˗ pö:
34 «ˈAa Yesu Nazadhɛtö mi, ˗mën ˈö kwaa˗ ˗nu kwa ꞊zinŋgü? Ü ˗nu ˗dhɛ ˈö yö ˗a ˈgü kö ˈü yi ˈgü shiʋ̈ˈˈ ˗ee? A˗ ˈwɔn ˗dɔ ꞊dedewo ꞊dhɛ mɛn ˈö ˈˈslʋ̈ʋ̈slʋ̈ ˈö ˗Zlan ˗ya bɔ yö ˗mü ü ˈka.»
35 ˈˈKɛɛ ˈyö Yesu ˗yö ˗gbla ˗a ˗ta ˈö˗ pö: «Ü ˈˈdhi ta ˈü ʒiö ˈü ˈgo gɔndënën ˈö bhë ˗a ˈgü.» ˈDhɛ ˈö ˗kë ˈˈdhʋ̈, ˈyö ˗zuu yaa ˗yö gɔndënën ˈö bhë ˗a ˗zuö ˈˈshia˗ mɛn ˗nu ꞊zinŋgü mü ˈö go ˗a ˈgü, ˈˈkɛɛ yö ˈti pë ˈˈdhiʋ̈˗ kë ˗a ˈka.
36 ˈYö mɛn ˈˈpɛpɛ ˈwo kun mü bhë ˗a ˈwɔn ˗yö ˗an kun, ˈö ˈwo ˗ya ˗a pö ˗sü ˗bha wo ˈko ˗nu ˗dhɛ: «Dhiaŋ ꞊suu ˈö˗ zë bhë ˗kaa ˗ga. ˗Yö ˈwɔn ˗blɛɛ ˗wogbinŋdhɛ ˈka, ˈö ꞊faan ˈdhö˗ ˗wo ˗bha. ˗Ya ˈˈgbla ˗zuu yaa ˗nu ˗ta, ˗wo ˗go mɛn ˗nu ˈgü.»
37 ˈDhɛ ˈö ˗kë ˈˈdhʋ̈, ˈyö˗ ˈtɔ ˗yö ˗pɛn ˈzü ˈgbɛ ˗dhɛ ˈˈpɛpɛ ˈwo ˈpödhɛ ˈö bhë ˗a ˗züzü ˗an ˈgü.
38 ˈDhɛ ˈö go ˗yakwëë ˗kë ˗a ˈgü ˗kɔ bhë ˗a ˈgü, ˈyö dho Simɔn ˗gɔ ˈˈkwɛnŋdhö. ˈÖ ˗kë ˈˈdhʋ̈ kö ˈˈnɛnnɛn ˗ya nu Simɔn ˗bha dhebɔ dhö ˗ta ꞊dedewo, ˈyö ˈwo ꞊bhɛɛ Yesu ˗dhɛ kö ˗ya ˗dhɛ bo.
39 ˈYö Yesu ˗yö ꞊ɲɔɔn dhebɔnën ˈö bhë ˗a ˗bha ˈö˗ ˗dhɛ bo. ˈYö˗ dhebɔnën ˗yö to ˈˈshia˗ mü ˈö ꞊luu ˈö ˗ya ˗bhöpë ˗kpa ˗an ˗dhɛ ˗sü ˗bha.
40 ˈDhɛ ˈkwa dɔ ˈɲaan˗ ˗puö ˈˈtʋ̈ŋ ˈka, ˈyö mɛn ˗nu ˗wo nu ˗an ˗bha mɛn ˗nu ˈö ˈˈyua ꞊suu ˈˈpɛpɛ ˈdhö ˗an ˗bha ˗an ˈka Yesu ˈˈpiʋ̈. ˈYö ö ˗kɔ ˗ya mɛn ˗dhɛ ˈö ˈdhö ˗a ˗ta ˈö ˗an ˗dhɛ bo.
41 ˗Zuu yaa ˗nu ˗wo ˗go ˈpö mɛn ꞊vadhɛ ˈgü ˈˈgbla ˗sü ˈka ˈö ˈwo˗ pö: «˗Zlan Gbö ˗mü ü ˈka.» ˈˈKɛɛ Yesu ˗yö ˗gbla ˗an ˗ta ˈö˗ pö ˗an ˗dhɛ ˈwa ˗dho ˈwɔn blɛɛˈˈ, ˈyö ˗tɔ ˗wa ˈwɔn ˗dɔ ꞊dhɛ yö ˈnën ˈö ˗tɔ Klito.
42 ˈDhɛ ˈö ˗dhɛ ˗yö ꞊kpɔɔ, ˈyö go ˗dhɛ ˈö bhë ˗a ˈgü ˈö dho ˗dhɛ ˈö mɛn ˈbhaa ˈyaa˗ ˗bha ˗a ˈgü. ˈˈKɛɛ mɛn ˗nu ˗wo ˗ya ˗a mɛɛnˈˈ ˗sü ˗bha ˈö ˈwo dho ˈwo ˗lo ˗dhɛ ˈö kun ˗a ˗bha bhë ˗a ˈgü. ˈWaa kun ˗a ˈˈpiʋ̈ ꞊dhɛ ˈwo wo ꞊kwaa˗ ˗zü kö ˗yö wo ˈto ˗yö ˈdho wo ˈka ꞊gblɛɛn.
43 ˈˈKɛɛ ˈyö Yesu ˗ya pö ˗an ˗dhɛ: «N dua ˗mü ˈpö kö nɔɔn˗ ˗së ˈö ˗gban ˗Zlan ˗bha ˗Gblüdëdhɛ ˗bha bhë ˈa˗ pö ˈpödhɛ ˈˈwɛɛ ˗nu ˈwo to ˗an ˈgü. ˗A ˗gɛn ˗mü ꞊dhɛ ˈpë ˗Zlan ˗yö n bɔ ˗a ˗wɔn ˈgü ˈyö bhë.»
44 ˈDhɛ ˈö ˗kë ˈˈdhʋ̈, ˈyö dho ˗zlanwopö ˗yakwëë ˗kë ˗a ˈgü ˗kɔ ˗nu ˈwo Zude ˗sɛ ˈgü ˗an ˈgü.
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «ˈbluu˗.»
