Nɔɔn˗ ˗së ˈsëëdhɛ ˈö Lukö ˗ya ˗bɛnzë 5:1-39
5 -Dhɛkpaɔyi do ˈka, Yesu ˗yö ˗kun mɛn ꞊va ꞊dede ˈö ˈwo kun wo ˈˈtʋ ˈto ˗ni ˈgü ˗a ˗bha, ˗an ꞊klaŋ kë ˗ni ˈgü ˗Zlan ˗Wo ˈka ˈˈyi ˗glu ˈwo˗ Zenezadhɛtö* ˗kë bhë ˗a ˈˈkpɔnŋ ˈˈdhiʋ̈. Mɛn ˗nu ˗kun ˗a ˈˈslö mɛɛnˈˈ ˗ni ˈgü kö ˈwo ꞊ɲɔɔn ˗a ˈka ꞊klöö˗.
2 Yesu ˗yö ˗kpan ˈˈyitagɔ ꞊plɛ ˗bha ˈˈyi ˈˈkpɔnŋ ˈˈdhiʋ̈ mü kö ˈˈyiblükëmɛn ˗nu ˈwo kun ˗an ˈgü ˗wa ˈgo ˗an ˈgü ˗wa yɔɔˈˈ, ˗wo wo ˗bha ˈˈkplʋ̈ ˗nu ʒiö ˗ni ˈgü ˈˈyië.
3 ˈYö ˗da ˈˈyitagɔ ˗nu ˈwo bhë ˗a do ˈö Simɔn ˗bha ˈka ˗a ˈgü. ˈYö˗ pö Simɔn ˗dhɛ ˗ya bhɔ ˈˈyi ˈˈkpɔnŋ ˗dhɛ ꞊taa ˈdɛdɛ. ˈDhɛ ˈö ˈɲaannu ˗a ˈˈyitagɔ ˈgü mü, ˈyö ˗ya mɛn ˗nu ˈwo bhë ˗an ꞊klaŋ kë ˗sü ˗bha.
4 ˈDhɛ ˈö ɲën dhiaŋ zë ˗sü ˗bha ˈyö˗ pö Simɔn ˗dhɛ: «˗Bhö ꞊ɲɔɔn ˈˈyitagɔ ˈka ˈˈyi ꞊zinŋgü kö ˈka ˈˈkplʋ̈ -nu ˗zuö mü.»
5 ˈYö Simɔn ˗ya pö ˗a ˗dhɛ: «˗Gɔmɛn, yi ˗gloo ˈˈkplʋ̈ ˗zuö ˗sü ˗bha gbeŋ ˈö ˗dhɛ ˗yö ꞊kpɔɔ ˗a ˈka ˈö yi ˈti ˈyuö˗ ˈkun. ˈˈKɛɛ ˗dhɛ ˈö ˗kë ꞊dhɛ ü˗ ˗pö ˈˈdhʋ̈, a ˗dho ˗a ˗zuö ˈzü.»
6 ˈDhɛ ˈwo ˈˈkplʋ̈ ˗zuö, ˈyö ˈwo ˈyuö˗ ꞊va ꞊dede sü. ˈÖ ꞊ɲɔɔn mü kö ˗an ˗bha ˈˈkplʋ̈ ˗nu ˗wo blëëˈˈ ˗ni ˈgü.
7 ˈDhɛ ˈö ˗kë ˈˈdhʋ̈, ˈyö ˈwo wo ˈˈtɛɛbɔ ˗nu ˈö ˈwo kun ˈˈyitagɔ ˈˈwɛɛ ˈgü bhë ˗an ˗dhɛ kö ˗wo nu ˗wo wo ˗takun. ˈYö ˈwo nu ˗an ˗dhɛ, ˈyö ˈˈyitagɔ ꞊plɛ ˈwo bhë ˈwo pa ˈyuö˗ ˈka. ˈÖ ꞊ɲɔɔn mü kö ˗a ˈˈyitagɔ ˗nu ˗wo ˈdho ˗ni ˈˈyi ꞊löö.
8 ˈDhɛ Simɔn Piɛɛ ˗ya yö ˈˈdhʋ̈, ˈyö yö ö kpɔn ˈgü Yesu ˈˈdhiʋ̈ ˈö˗ pö ˗a ˗dhɛ: «˗Bhö bhɔ n ˗dhɛ ꞊taa n Dëmɛn, ˗a ˗gɛn ˗mü ꞊dhɛ ˈwɔnyaakëmɛn ˗mü n ˈka.»
9 ˈPë ˗kë ˈö Piɛɛ ˗ya pö ˈˈdhʋ̈ ˈyö ˗tɔ ˈyuö˗ ꞊va ꞊suu ˈö ˈˈdhʋ̈ ˗a ˈkun ˈwo˗ wo bhë, ˗yö ˗kë waa mɛn ˈˈpɛpɛ ˈwo kun ˗a ꞊kee˗ ˗an ˗dhɛ ˈwɔn ˈˈmlünmlünsü ˈka.
10 Zakö waa Zan ˈö ˈwo ˗kë Zebede gbö ˗nu ˈka ˈö waa Simɔn ˗nu ˈwo yö ˗kë wo ˈkwëë˗ bhë, ˗yö ˗kë ˗an ˗dhɛ ˈˈmlünmlünsü ˈpö. ˈˈKɛɛ ˈyö Yesu ˗ya pö Simɔn ˗dhɛ: «ˈˈSuʋ̈ ˈya ˗dho ü kë. ˈÖ sü ꞊dɛɛ ˗bha, mɛnbhɩɩdhe ˗nu ˈnën ˈü dho ˈˈkplʋ̈ ˗zuö ˗an ˗gɔ kö ˈü ˗an ˈkun.»
11 ˈDhɛ ˈö ˗kë ˈˈdhʋ̈, ˈyö ˈwo ˈˈyitagɔ ˗nu bho ˈˈyi ꞊bhaa ˈö ˈwo pë ꞊gban ˈˈpɛpɛ to ˈˈshia˗ mü ˈö ˈwo ˗ʒiö Yesu ꞊kee˗.
12 ˗Dhɛkpaɔyi do ˈbhaa ˈka ˈzü kö Yesu ˗yö ˈpödhɛ do ˈgü, ˈyö gɔndënën do ˈbhaa ˈö ꞊wee ˗yua ꞊yaa˗ kwibhadhɛ ꞊gban ˈsü, ˗yö ˗kpan Yesu ˗bha. ˈYö nu ˈö yö ö kpɔn ˈgü, ˈö ˈˈgblëënnu ˈˈshia˗ ˈö ꞊bhɛɛ ˗a ˗dhɛ ˈö˗ pö: «N Dëmɛn, ˗ya kë ꞊dhɛ ü ˗we ˗a ˗bha, dɔ ˈˈgbɩɩ˗ ˈü n kë ˈˈklʋ̈ʋ̈klʋ̈.»
13 ˈDhɛ ˈö ˗kë ˈˈdhʋ̈ ˈyö Yesu ˗yö ö ˗kɔ pa ˗a ˈka, ˈyö˗ pö ˗a ˗dhɛ: «ˈMan ˈˈwɩ ˗a ˗bha! ˗Bhö kë ˈˈklʋ̈ʋ̈klʋ̈.» ˗Yö ˗to ˈˈshia˗ mü ˈö˗ ˗bha ꞊wee ˗yua ˗yö bo ˈpapadhö.
14 ˈYö Yesu ˗ya pö ˗a ˗dhɛ ˈya ˗dho ˗a blɛɛˈˈ mɛn ˈbhaa ˗dhɛ. ˈYö go mü ˈö˗ pö: «˗Bhö ˈdho ꞊ʒiaan ˈü ü ˗de ˗zɔn ˈˈsaabhomɛn ˗dhɛ kö ˈü ü ˗bha ˗kë ˈˈslʋ̈ʋ̈slʋ̈ ˗sü gbɔɔdhe kë ꞊dhɛ ˗kɔ ˈö Moizö ˗ya pö ˗a ˈka bhë ˗a ˈdhö. ˗Ya kë ˈˈdhʋ̈, ˗yö ˗dho ˗a ˗zɔn ˗an* ˗dhɛ ꞊dedewo ꞊dhɛ ˈbha kë ˈˈklʋ̈ʋ̈klʋ̈.»
15 ˈYö Yesu ˗tɔɔ ˗yö ˗pɛn ˈzü ˈgbɛ, ˈyö mɛn ꞊va ꞊dede ˗wo nu ˗a ˈˈpiʋ̈ kö ˈwo wo ˈˈtʋ ˈto ˗a ˗wo ˗bha, kö ˗yö wo ˗bha ˈˈyua ˗nu bo.
16 ˈˈKɛɛ ˗ya kë ꞊shiöŋ ꞊shiöŋ, Yesu ˗yö ˗dho ˗dhɛ ˈö mɛn ˗nu ˈwaa˗ ˗bha ˗a ˈgü kö ˈö bhɛɛˈˈ.
17 ˗Dhɛkpaɔyi do ˈka, Yesu ˗yö ˗kun mɛn ˗nu ꞊klaŋ kë ˗ni ˈgü ˈkɔ do ˈbhaa ˈgü. ˈÖ ˗kë ˈˈdhʋ̈ kö Fadhiziɛn ˗nu waa ˗Zlan ˗bha ˈtɔŋ˗ ˗zɔnmɛndhɛmɛn ˗nu ˈö ˈwo go ˈpödhɛ ˈˈpɛpɛ ˈwo Galile, Zude waa Zedhizadhɛmö ˗dhɛ ˗nu ˈgü ˗an ˈgü, ˗wo ˈɲaannu ˗sü ˈka mü, kö Zoova ˗ya ö ˗bha ˈˈpiigbɩɩdhɛ nu Yesu ˗dhɛ kö ˗yö mɛn ˗nu ˗dhɛ bo ˗a ˈka.
18 ˈYö mɛn ˗nu ˗wo gɔndënën do ˈö˗ ˗dhɛ ꞊gban ˗ya ga ˗a ˗bha ˈö wɔ ˗sü ˈka ö ˗wɔ ˗a ˗ta ˗pë ˗ta ˗a sü ˈwo nu ˗a ˈka, ˈyö ˈwo˗ ˈˈslö ꞊mɛɛn kö ˈwo ˗da ˗a ˈka ˈkɔɔ kö ˈwo˗ ˈwaannu Yesu ˈwëëdhö.
19 ˈˈKɛɛ ˈdhɛ ˗kë ꞊dhɛ mɛn ˗nu ˗kun ˈmü ꞊va, ˈwaa kun ˗mɔn ˗ni ˈgü ˗a ˗bha. ˈDhɛ ˈö ˗kë ˈˈdhʋ̈, ˈyö ˈwo ˗da ˈkɔ ˗ta ˈˈdhuŋ, ˈyö ˈwo ˈkɔ ꞊gba ˈˈdhi bho, ˈyö ˈwo gɔndënën to ˗a ˗wɔ ˗a ˗ta ˗pë ˗ta ˈö ˈwo˗ ꞊yɔɔ Yesu ˈwëëdhö mɛn ˗nu ꞊zinŋgü mü.
20 ˈDhɛ ˈö Yesu ˗ya yö ꞊dhɛ ˗zoyödhe ˗yö ˗an ˗gɔ, ˈyö˗ pö: «Gɔndënën, ˈman ü ˗bha ˈwɔn yaa ˗nu ˗bhawɔn ˈto.»
21 ˈDhɛ ˈö ˗kë ˈˈdhʋ̈, ˈyö ˈtɔŋ˗ ˗gɔmɛn ˗nu waa Fadhiziɛn ˗nu ˈwo ˗ya ˗a pö ˗sü ˗bha wo ˈko ˗nu ˗dhɛ: «Mɛn ˈö yö de ˗mü ˗a ˈka ˈyö ˗Zlan ꞊bhlëë ˗shiö ˈˈdhʋ̈? ˈDe ˈö ꞊mɔɔn˗ ˗bha ˈö mɛn ˗nu ˗bha ˈwɔn yaa ˗bhawɔn to kö yö ˈti kë ˗Zlan dosɛnŋ ˈka?»
22 ˈˈKɛɛ ˈdhɛ ˈö ˗kë ꞊dhɛ pë ˈwo kun ˗a pö ˗ni ˈgü wo ˈko ꞊zinŋgü Yesu ˗ya ˗dɔ bhë, ˈyö˗ ˗yɔ bɔ ˗an ˗gɔ ˈö˗ pö: «ˈMën ˗kë ˈö ˗zotadhe ꞊suu ˈö ˈˈdhʋ̈ ˈö ˗kë ka ˗gɔ?
23 ˗A ˗ga ˈö ˈka˗ wo bhë, ˗a pö ˗sü ˈö mɛn ˗dhɛ ꞊dhɛ: ‹ˈMan ü ˗bha ˈwɔn yaa ˗nu ˗bhawɔn ˈto,› waa˗ pö ˗sü ˈö ꞊dhɛ: ‹˗Bhö luuˈˈ ˈü ˈˈta ˈsü› bhë, ˗a ˗mɛɛn ˈö ˈˈgbɩɩ˗?
24 ˗Ka dɔ kö ˈa˗ ˗zɔn ka ˗dhɛ ꞊dhɛ maan mɛn Gbö ˗mɛn ˗a ˈˈse ˗yö n ˗dhɛ kö ˈa mɛn ˗nu ˗bha ˈwɔn yaa ˗nu ˗bhawɔn ˈto ˈˈkpɔnŋ ꞊taa yö.» ˈDhɛ ˈö ˗kë ˈˈdhʋ̈, ˈyö˗ pö mɛn ˈö˗ ˗dhɛ ꞊gban ˗ya ga ˗a ˗bha bhë ˗a ˗dhɛ: «Man ˈnën ˈa˗ pö, ˗bhö luuˈˈ ˈü ü ˗wɔ ˗a ˗ta ˗pë ˈsü kö ˈü ˈdho ü ˗gɔ ˈˈkwɛnŋdhö.»
25 ˈYö˗ gɔndënën ˗yö ꞊luu ˗an ˈˈɲandhiʋ̈ mü ˈyö ö ˗wɔ ˗a ˗ta ˗pë sü ˈö dho ö ˗gɔ ˈˈkwɛnŋdhö kö ˗yö ˗Zlan ˈtɔ bhɔ ˗ni ˈgü.
26 ˗A ˈwɔn ˗yö mɛn ꞊gban ˈˈpɛpɛ ˗kun ˈö ˈwo ˗ya ˗Zlan ˈtɔ bhɔ ˗sü ˗bha. ˗Yö ˈˈsuʋ̈ ˗da ˗an ˈgü ˈö ˈwo ˗ya ˗a pö ˗sü ˗bha: «˗Aaˈˈ, kwa ˈˈɲan ˗ya ˗da ˈwɔn ˈˈmlünmlünsü ˗nu ˈgü ꞊dɛɛ ꞊dhɛɛ!»
27 ˈDhɛ ˈö ö bo kë ˗sü ˈka ˈˈdhʋ̈, ˈyö Yesu ˗yö yö ˈˈkpɛnŋ ˈyö ˗kpan ˈniinsɔnŋkunmɛn do ˈwo˗ ˗dhɛ Levi ˗a ˗bha kö ˗yö ˗ya ˗sü ˈka ˈniin˗ ꞊sɔnŋ ˗bho ˗a ˈgü ˗kɔ ˈgü. ˈYö˗ pö ˗a ˗dhɛ: «˗Bhö ʒiö n ꞊kee˗.»
28 ˈYö Levi ˗yö ꞊luu ˈö pë ꞊gban ˈˈpɛpɛ to ˈö ˗ya ʒiö ˗sü ˗bha Yesu ꞊kee˗.
29 ˈDhɛ ˈö ˗kë ˈˈdhʋ̈ ˈyö Levi ˗yö ˈwlaan˗ do ˈbhaa ˗ya ö ˗gɔ ˈˈkwɛnŋdhö Yesu ˗bha ˈka. ˈNiinsɔnŋkunmɛn ˗nu ꞊va waa mɛn ˈˈwɛɛ ˈbhaa ˗nu ˗wo ˗kun pë ˗bhö ˗ni ˈgü ˗an ˈˈpiʋ̈ mü.
30 ˈYö Fadhiziɛn ˗nu waa wo ˗bha ˈtɔŋ˗ ˗gɔmɛn ˗nu ˈwo ˗ya ˗a pö ˗sü ˗bha ˗a ˗bha gwëëˈˈ ˗nu ˗dhɛ wo ˗wo ꞊löö: «ˈMën ˗kë ˈö ˈka pë ˗bhö, ˈö ˈka we mü ˈniinsɔnŋkunmɛn ˗nu waa ˈwɔnyaakëmɛn ˗nu ˈˈpiʋ̈?»
31 ˈYö Yesu ˗ya ˗yɔ bɔ ˗an ˗gɔ ˈö˗ pö: «Mɛn ˗nu ˈö ˈwaa wo ˈflëëgü wo ˈnën ˗an ˗bhawɔn ˈdhö ꞊dhɔtrɔɔ˗ ˗bha, ˈmɛn ˈwo wo ˈflëëgü ˈwaa ˗mü.
32 A ˗nu kö mɛn ˗nu ˈwo ˈwɔnyaakëmɛn ˗nu ˈka ˈa ˗an ˗dhɛ, kö ˗wo ˈgo wo ˗bha ꞊sɔŋ yaa ˈgü, ˈmii nu kö ˈmɛn ˈwo ˈwɔnsëkëmɛn ˗nu ˈka ˈa ˗an ˗dhɛ.»
33 ˈYö ˈwo˗ pö ˗a ˗dhɛ: «Zan ˗bha gwëëˈˈ ˗nu ˗wo ˈsunŋ˗ ˗mën ˗kplawo ˈö ˈwo ꞊bhɛɛ, ˈö Fadhiziɛn ˗nu ˗bha gwëëˈˈ ˗nu ˗wa ˗kë ˈˈdhʋ̈ ˈpö. ˈˈKɛɛ ü ˗bha gwëëˈˈ ˗nu ˗zë ˗wo pë ˗bhö ˈö ˈwo we mü.»
34 ˈYö Yesu ˗ya pö ˗an ˗dhɛ: «ˈˈTʋ̈ŋ ˈö dhesügɔn ˈdhö ꞊kun ˗a ˈka ö ˈˈtɔŋdë ˗nu ˈˈpiʋ̈ bhë, ka ꞊mɔɔn˗ ˗bha ˈka ˈˈgbɩɩdhɛ wɔ ˗a ˈˈtɔŋdë ˗nu ˗ta kö ˗wo ˈsunŋ˗ ˈmën ˗ee?
35 ˈˈKɛɛ ˗a yi ˗dho ˗wo ˈö ˈwo dhegɔndë sü ˗an ˈˈpiʋ̈. ˈˈTʋ̈ŋ ˈö ˈˈdhʋ̈ bhë ˈyö ˈwo ˗dho ˈsunŋ˗ ˈmën ˗a ˈka.»
36 ˈYö ˈwɔnzuan do ˈbhaa ˗zɔn ˗an ˗dhɛ ˈö˗ pö: «Mɛn ˈbhaa ˈyaa sɔ ˗dɛɛ ˈˈklu bho kö ˗ya ꞊nënŋ sɔ zii ˗bha ˗ya ˗wɔ. ꞊Yaa˗ kë ˈˈdhʋ̈, sɔ ˗dɛɛ ˈˈpɛn ˗dhö sɔ zii ˈö bhë ˗a blëëˈˈ ˈö˗ sɔ ˈˈpɛn ˗dɛɛ waa˗ sɔ zii ˈwaa dhi wo ˈˈkwöö.
37 Mɛn ˈbhaa ˈyaa we ˗dɛɛ ˗da ˈpö puuˈˈ zii ˈgü. ꞊Yaa˗ kë ˈˈdhʋ̈, ˗a we ˗dɛɛ ˗dho ˗a kë ˈö˗ puuˈˈ ˗yö ꞊pʋ̈ʋ̈ ˈö we ˗yö ꞊wɛnŋ, ˈö˗ puuˈˈ ˗yö ꞊shiʋ̈ ˈpö.
38 ˈˈKɛɛ ˗wo we ˗dɛɛ ˗da ꞊ʒiaan puuˈˈ ˗dɛɛ ˈgü.
39 Mɛn ˈö ˗ya we ˗kian ˗sü mü, we ˗dɛɛ ˗dhɔ ˈyaa˗ kë. ˗A ˗gɛn ˗mü ꞊dhɛ ˗ya ˗pö ö ˗de ˗dhɛ: ‹We ˗kian ˗sü ˈnën ˈö ˗së.›»
-Zoto -a ˈˈpiʋ̈ -wɔn -nu
^ ˗Wo ˗we «Galile ꞊weeyi» ˈka.
^ ˗A ˈbhaa ˗ya kë kö ˗wo ˗we ˈˈsaabhomɛn ˗nu ˈka.
