Nɔɔn˗ ˗së ˈsëëdhɛ ˈö Lukö ˗ya ˗bɛnzë 6:1-49
-
Yesu ˈnën ˈö ˗tɔ «꞊Glooyi Dëmɛn» (1-5)
-
˗Kɔ ˈö gɔndënën do ˈö˗ ˗kɔ ˗yö ga ˗a ˗bha ˗a ˗dhɛ ˗yö bo ˗a ˈka (6-11)
-
Yesu ˗bha bɔmɛn ˗nu ˗kɔ do ˈö ga ꞊plɛ (12) (12-16)
-
Yesu ˗yö mɛn ˗nu ꞊klaŋ ˗kë, ˈö mɛn ˗nu ˗dhɛ bo (17-19)
-
Mɛn ˗nu ˈö ˗an ˗bha ˈdhö ˗së waa mɛn ˗nu ˈö ˗an ˗bha ˈdhö ˗wëësü (20-26)
-
«Ka ˈyɔɔ˗ ˗nu ˗dhɔ ˗yö ka kë» (27-36)
-
«˗Ka ˈˈkan za ˗dɔ mɛn ˈˈwɛɛ ˗nu ˗bha ˗sü ˗bha» (37-42)
-
˗Wo ˈˈdhü ˗dɔ ˗a bhɛ ˗bha (43-45)
-
ˈKɔ ˈwo˗ dɔ ˗së ˈka waa ˈkɔ ˈö˗ ˈˈkpan ˈyaa ˈˈsɛɛdhö (46-49)
6 ˈDhɛ ˈö Yesu kun bɔ ˗ni ˈgü ˈble˗ ˗bhla do ˈbhaa ˈgü ꞊Glooyi do ˈka, ˈyö˗ ˗bha gwëëˈˈ ˗nu ˗wo ˈble˗ ˗kpaa ga ˗nu ˗kan, ˈö ˈwo ˗an ga bho ˗a ˈgü wo ꞊kwɛɛ˗ ˈwo ˗ya -a ˗bhö ˗sü ˗bha.
2 ˈYö Fadhiziɛn ˈbhaa ˗nu ˗wa pö ˗an ˗dhɛ: «ˈMën ˗kë ˈö ˈpë ˈö ˈtɔŋ˗ ˗ya pö ˈwaa˗ kë ꞊Glooyi ˈka bhë, ˈö ˈka˗ ˗kë?»
3 ˈYö Yesu ˗ya ˗yɔ bɔ ˗an ˗gɔ ˈö˗ pö: «Pë ˈö Davi ˗ya ˗kë kö din˗ ˗ya waa ö ˗bha mɛn ˗nu ˗an ˈkun bhë, ka ˈti˗ ˗wo pö do ˗ee?
4 ˗Yö ˗da ˗Zlan ˗gɔ ˈkɔɔ, ˈö ˈbluu˗ ˗nu ˈwo ˗an ˗wɔ ˗Zlan ˗kuu ˈˈdhiʋ̈ bhë ˈwo ˗an nu ˗a ˗dhɛ ˈö ˗an ˗bhö, ˈö˗ nu ˈpö mɛn ˗nu ˈwo kun ˗a ꞊kee˗ bhë ˗an ˗dhɛ. ˈˈKɛɛ kö ˗a ˗dhɛ ˈyaa˗ ˗bha ˗be kö mɛn ˈˈwɛɛ ˈbhaa ˗ya ˗bhö kö yö ˈti kë ˈˈsaabhomɛn ˗nu dosɛnŋ ˈka.»
5 ˈYö go mü ˈö˗ pö ˗an ˗dhɛ: «Maan mɛn Gbö ˗mɛn man ˈnën ˈa ˗tɔ ꞊Glooyi Dëmɛn.»
6 ꞊Glooyi do ˈˈwɛɛ ˈbhaa ˈka ˈzü, ˗yö ˗da ˗yakwëë ˗kë ˗a ˈgü ˗kɔ ˈgü ˈö ˗ya mɛn ˗nu ꞊klaŋ kë ˗sü ˗bha. ˈÖ kun ˈˈdhʋ̈ kö gɔndënën do ˈö˗ ˗kɔ ˗së ˈgü ˗gbe ˗ya ga ˗a ˗bha, ˗yö mü.
7 ˈTɔŋ˗ ˗gɔmɛn -nu waa Fadhiziɛn -nu -wo -kun Yesu ˈsuaan˗ bho ˗ni ˈgü ˗së ˈka, kö ꞊ya kë ꞊dhɛ ˗yö ˗dho mɛn ˗nu ˗dhɛ bo ꞊Glooyi ˈka ˈwo˗ yö, kö ˗yö kë za ˗ya ˗a ˗bha ˗gɛn ˈka.
8 ˈˈKɛɛ ˈdhɛ ˈö ˗kë ꞊dhɛ Yesu ˗yö ˗an zuʋ̈ˈˈ ˈˈpiʋ̈ ˗wɔn ˗dɔ bhë, ˈyö˗ pö mɛn ˈö˗ ˗gbe ˗yö ga ˗a ˗bha bhë ˗a ˗dhɛ: «˗Bhö luuˈˈ ˈü dɔ mɛn ˗nu ꞊zinŋgü yö.» ˈYö˗ gɔndënën ˗yö ꞊luu ˈö dɔ ö ˗gɛn ˗ta mɛn ˗nu ꞊zinŋgü.
9 ˈYö Yesu ˗ya pö ˗an ˗dhɛ: «A ˗dho dhɛɛˈˈ do ˈbhaa ˈkpɔ ka ˗gɔ. ˈMën kwa dua ˈdhö ˗mü kö ˈkwa˗ kë ꞊Glooyi ˈka? ˈWɔn ˗së ˗ee, ɛɛnˈˈ ˈwɔn yaa? Kwa dua ˗mü kö ˈkwa mɛn dha ˗ee, ɛɛnˈˈ kö ˈkwa mɛn zë?»
10 ˈDhɛ ˈö ˗an ˗ta ˗ga ˗pinŋdhö, ˈyö˗ pö gɔndënën ˈö bhë ˗a ˗dhɛ: «˗Bhö ü ˗gbe ˈgü ˈˈpʋ.» ˈYö˗ gɔndënën ˗yö ö ˗gbe ˗pʋ, ˈyö˗ ˗dhɛ ˗yö bo.
11 ˈDhɛ ˈö ˗kë ˈˈdhʋ̈, ˈyö ˈwɔn ˗yö ˗shiö ˗an ˗dhɛ ꞊dedewo, ˈyö pë ˈwo ˗dho ˗a kë Yesu ˈka ˈwo ˗ya ˗a ˗yökodhiʋ̈ kë ˗sü ˗bha wo ˈko ꞊zinŋgü.
12 ˗Dhɛkpaɔyi do ˈka, Yesu ˗yö ˗dho ˗tɔn ˗ta kö ö bhɛɛˈˈ ˗Zlan ˗dhɛ. ˗Yö gbeŋ ˗todhʋ̈sü ˗kë mü bhɛɛˈˈ ˗sü ˈka.
13 ˈDhɛ ˈö ˗dhɛ ˗yö ꞊kpɔɔ, ˈyö ö ˗bha gwëëˈˈ ˗nu ˗dhɛ, ˈyö ö ˗kɔ ˗yɛ ˗a mɛn ˗kɔŋ do ö ga ꞊plɛ (12) ˗bha, ˈyö ˗an ˗dhɛ bɔmɛn ˗nu.
14 ˗A mɛn ˗nu ˈwo ˈˈdhʋ̈ ˈyö ˈwo ˗tɔ: Simɔn ˈö˗ ˗dhɛ ˈpö Piɛɛ waa ö ꞊dhegblü Andre, Zakö, Zan, Filipö, Batedhemi,
15 Matiö, Toma, Zakö Alüfe gbö, Simɔn ˈö ˈwo˗ ˗dhɛ ˈpö «ˈwɔn ˗nu ˗kë ö ꞊faan ˈka dë,»
16 Zuda Zakö gbö waa Zuda Isikadhiɔtö ˈö Yesu ˈˈdhoodɔ ꞊taabha bhë.
17 ˈDhɛ ˈö ˗kë ˈˈdhʋ̈, ˈyö waa˗ ˗nu ˈwo ꞊yɔɔ ˈö ˈwo dho ˈwo ˈduaannu ˗dhɛ ˈkpɛikpɛdhɛ do ˈgü. ˗Dhɛ ˈö bhë ˗a ˈgü, ˗a ˗bha gwëëˈˈ ˗nu ꞊va ꞊dede ˗wo ˗kun mü. Mɛn ꞊va ꞊dede ˈwo go ˈpö Zude ˗sɛ ˗nu, Zedhizadhɛmö ˗dhɛ ˗nu waa ˈpödhɛ ˗nu ˈwo ꞊weeyi ˈˈkpɔnŋ ˈˈdhiʋ̈ ˈTii˗ waa Sidɔn ˗dhɛ ˗nu ˈgü, ˗wo ˗kë mü ˈpö kö ˈwo wo ˈˈtʋ ˈto ˗a ˗wo ˗bha kö ˗yö wo ˗bha ˈˈyua ˗nu bo.
18 Mɛn ˗nu ˈö ˗zuu yaa ˗nu ˗wo kun ˗an ꞊sëëbhö ˗ni ˈgü ˗ʒiaanwo, ˗yö ˗an ˗dhɛ ˗bo.
19 Mɛn ꞊gban ˈˈpɛpɛ ˗wo ˗kun ˗a ˈˈslö mɛɛnˈˈ ˗ni ˈgü kö ˈwo ˈpa ˗a ˈka. ˈYö ˗tɔ ꞊dhɛ ꞊faan ˈbhaa ˗yö ˗kun ˈgo ˗ni ˈgü ˗a ˈgü ˈö ˗an ꞊gban ˈˈpɛpɛ ˗dhɛ bo.
20 ˈYö Yesu ˗yö ö ˈˈɲan ˈˈdhiʋ̈ ꞊luu ˈö ö ˗bha gwëëˈˈ ˗nu ˗ga, ˈö ˗ya ˗a pö ˗sü ˗bha ˗an ˗dhɛ:
«Mɛn ˗nu ˈö ˈka ˈˈfleemɛn ˈka, ka ˗bha ˗yö ˗së, ˗a ˗gɛn ˗mü ꞊dhɛ ˗Zlan ˗bha ˗Gblüdëdhɛ ˗yö ka ˗bha ˈka.
21 «Mɛn ˗nu ˈö din˗ ˈdhö ka ˗bha ˈˈtʋ̈ŋ ˈö yö ˗a ˈgü, ka ˗bha ˗yö ˗së, ˗a ˗gɛn ˗mü ꞊dhɛ ka ˈgwü ˗dho dɔ.
«Mɛn ˗nu ˈö ˈka ˈˈgbʋ bɔ ˗ni ˈgü ˈˈtʋ̈ŋ ˈö yö ˗a ˈgü, ka ˗bha ˗yö ˗së, ˗a ˗gɛn ˗mü ꞊dhɛ ka ˗dho ˈˈyɩɩ ˈto.
22 «Ka ˗san ˗ya mɛn ˗nu kë, ˗wa ka bho wo ˈˈpiʋ̈, ˗wa ˈsi bho ka ˗gɔ, ˗wa ˗dhii ˗ya ka ˈtɔ ˗bha maan mɛn Gbö ˗mɛn n ˗wɔn ˈgü, kö ka ˗bha ˗yö ˗së.
23 ˈWɔn ˗nu ˈwo bhë ˗wa kë ka ˈka, ka zuʋ̈ˈˈ ꞊nii ˗yö ˗da, ka zuʋ̈ˈˈ ˈˈgblü ˗yö dhi ꞊dedewo, ˗a ˗gɛn ˗mü ꞊dhɛ ka ꞊saa ˈö dhaŋ˗ ˈgü ˗yö ꞊va. ˗An ˈˈbhɛman ˗nu ˗wa ˗kë ˈˈdhʋ̈ ˈpö ˗Zlan ˗wodhiʋ̈lomɛn ˗nu ˈka ꞊kwɛŋzü.
24 «ˈˈKɛɛ mɛn ˗nu ˈö ˈka ꞊nɔɔnmɛn ˗nu ˈka, ka ˗bha ˗yö ˗wëësü, ˗a ˗gɛn ˗mü ꞊dhɛ ka zuʋ̈ˈˈ dhuaapë ˗yö ka ˗gɔ ˈsaadhö.
25 «Mɛn ˗nu ˈö ka ˈgwü ˈdhö dɔ ˗sü ˈka ˈˈtʋ̈ŋ ˈö yö ˗a ˈgü, ka ˗bha ˗yö ˗wëësü, ˗a ˗gɛn ˗mü ꞊dhɛ din˗ ˗dho ka kë.
«Mɛn ˗nu ˈö ˈka ˈˈyɩɩ ˈto ˗ni ˈgü ˈˈtʋ̈ŋ ˈö yö ˗a ˈgü, ka ˗bha ˗yö ˗wëësü, ˗a ˗gɛn ˗mü ꞊dhɛ ka ˗dho kë ˗wëë ˈgü ˈö ˈka ˈˈgbʋ bɔ.
26 «Kö mɛn ꞊gban ˈˈpɛpɛ ˗wo ka ˗wɔn ˗së blɛɛˈˈ, kö ka ˗bha ˗yö ˗wëësü, ˗a ˗gɛn ˗mü ꞊dhɛ pë ˈö ˗an ˈˈbhɛman ˗nu ˗wa ˗kë ˗Zlan ˗wodhiʋ̈lomɛn ꞊suasü ˗nu ˈka ˈyö bhë.
27 «ˈˈKɛɛ mɛn ˈˈpɛpɛ ˈö ˈka ka ˈˈtʋ ˈto ˗ni ˈgü n ˗bha bhë, a˗ ˗pö ka ˗dhɛ: Ka ˈyɔɔ˗ ˗nu ˗dhɔ ˗yö ka kë ˗kplawo, ˈka ˈwɔn ˗së kë mɛn ˗nu ˈö ka ˗san ˗yö ˗an ˗kë ˗an ˗dhɛ.
28 ˗Ka ˈdhuëë˗ ˈkpɔ mɛn ˗nu ˈwo ˈˈdhaŋ ˗ya ka ˗bha ˗an ˗bha. ˗Ka bhɛɛˈˈ mɛn ˗nu ˈwo ˈsi bho ˗ni ˈgü ka ˗gɔ ˗an ˗bha ˈka.
29 Kö mɛn ˈbhaa ˗yö ü ˈˈkpɛnŋ ˈˈpian do ˗man, ˗a ˈˈpian do ˈö to ˗a ˗zɔn ˗a ˗dhɛ. Kö mɛn ˈbhaa ˗yö ü ˗bha ˈˈbhee ˈö sɔ ˗ta ˗a ˈsü ü ˗gɔ, ü ˗bha ˈˈbhee ˈö sɔ ꞊löö ˗a ˈto ˗a ˗gɔ ˈpö.
30 Mɛn ˈˈoo ˗mɛn ˈö pë ˗gbadhɛ ü ˗gɔ, ˗bhö ˗a nu ˗a ˗dhɛ. Mɛn ˈö ü ˗bha pë ˗nu sü ü ˗gɔ, ˈbha ˗dho ˗a ˗dhɛ ˗a ˗gɔ.
31 «˗Ya ˈgo mü ˈzü, pë ˗nu ˈö ˈka˗ ˈˈpiʋ̈ ꞊dhɛ mɛn ˗nu ˗wa kë ka ˗dhɛ, ˗kaa kë ˗an ˗dhɛ ˈpö.
32 «Mɛn ˗nu ˈö ka ˗dhɔ ˗yö ˗an ˗kë woo dosɛnŋ ˗an ˗dhɔ ˗ya ka kë, ˗a ꞊trɔɔn ˗dho kë ka ˗gɔ ˗mën ˈka? ˗A ˗gɛn ˗mü ꞊dhɛ mɛn ˗nu ˈö ˈwɔnyaakëmɛn ˗nu ˗dhɔ ˗yö ˗an ˗kë, ˗an ˗dhɔ ˗yö ˈwɔnyaakëmɛn ˗nu ˗kë ˈpö.
33 Mɛn ˗nu ˈwo ˈwɔn ˗së ˗kë ka ˗dhɛ, ˈka ˈwɔn ˗së kë woo dosɛnŋ ˗an ˗dhɛ ˈpö, ˗a ꞊trɔɔn ˗dho kë ka ˗gɔ ˗mën ˈka? Mɛn ˗nu ˈwo ˈwɔnyaakëmɛn ˗nu ˈka ˗ʒiaanwo ˗wa ˗kë ˈˈdhʋ̈ ˈpö.
34 ˗Ya ˈgo mü ˈzü, ˈka ˈˈpɔ dɔ mɛn ˗nu ˈö ka ˗zo ˈˈpiʋ̈ ꞊dhɛ ˗wo ˗dho ˗a bho ka ˗gɔ ˗an ˗bha, ˗a ꞊trɔɔn ˗dho kë ka ˗gɔ ˗mën ˈka? ˈWɔnyaakëmɛn ˗nu ˗de ˈpö ˗wo ˈˈpɔ ˗dɔ ˈwɔnyaakëmɛn ˗nu ˈö ˗an ˗zo ˈˈpiʋ̈ ꞊dhɛ ˗wo ˗dho ˗a bho wo ˗gɔ ˈpapadhö ˗an ˗bha.
35 ˈˈKɛɛ ka ˗zë, ka ˈyɔɔ˗ ˗nu ˗dhɔ ˗yö ka kë, ˈka ˈwɔn ˗së kë mɛn ˗nu ˗dhɛ ˗kplawo. ˈKa ˈˈpɔ dɔ mɛn ˗nu ˗bha, ˈka ˗dho ka ˈˈɲan ˈto kö ˗wa bho ka ˗gɔ. ˈKa˗ kë ˈˈdhʋ̈, ˗a ꞊trɔɔn ˈö ˈka ˗dho ˗a ꞊slɔɔ ˗yö ˗dho kë ˈkpii˗, ˈö ˈka ˗kë ˗Zlan ˈö pë ꞊gban ˈˈpɛpɛ ˗gɔ ˗ta bhë ˗a ˗bha ˈnën* ˗nu ˈka. ˗A ˗gɛn ˗mü ꞊dhɛ, ˗yö ˈwɔn ˗së ˗kë mɛn ˗nu ˈö ˗wa ˈwɔn ˗së kë ˗an ˗dhɛ ˈö ˈwaa˗ dɔ waa ˈˈgblüyaamɛn ˗nu ˗an ˗dhɛ.
36 Mɛn ˗nu ˗wëë ˗yö ka kë ˗kplawo ꞊dhɛ ˗kɔ ˈö mɛn ˗nu ˗wëë ˗yö ka Dë ˗kë ˗a ˈka bhë ˗a ˈdhö.
37 «˗Ya ˈgo mü ˈzü, ˗ka ˈˈkan za ˗dɔ mɛn ˈˈwɛɛ ˗nu ˗bha ˗sü ˗bha, kö za ˈya ˗dho dɔ ka ˗bha ˈpö. ˗Ka ˈˈkan mɛn ˈˈwɛɛ ˗nu ˗zë za ˈka ˗sü ˗bha kö ˈwa ˗dho ka zë za ˈka ˈpö. ˗Ka mɛn ˗nu ˗bhawɔn ˈto* ˗kplawo kö ˗wo ka ˗bhawɔn ˈto* ˈpö.
38 ˗Ka gbɔɔ ˗kplawo kö ˗wo gbɔɔ ka ˗gɔ ˈpö. ˗Wo ˗dho pë dan ˗së ˈka, ˈö ˈwo˗ ˗gban, ˈö ˈwo˗ ˗zuuzuu ˈö pa ˈö ꞊wɛnŋ ˗a ˗zü, ˈö ˈwo˗ ˗lo ka ˗bha sɔ ˈˈtʋ ˈgü. ˗A ˗gɛn ˗mü ꞊dhɛ pë ˈö ˈka pë dan ˗a ˈgü ˈka˗ nu mɛn ˈˈwɛɛ ˗nu ˗dhɛ, ˈyö ˈwo ˗dho ka ˗bha dan ˗a ˈgü ˈpö.»
39 ˈYö ˈwɔnzuan do ˈˈwɛɛ ˈbhaa ˗zɔn ˗an ˗dhɛ ˈzü ˈö˗ pö: «ˈˈƝɛɛntiimɛn ꞊mɔɔn˗ ˗bha kö ˗yö ʒiaan bho ˈˈɲɛɛntiimɛn ˈka ˗ee? ˗Ya kë ˈˈdhʋ̈ ˗an ꞊plɛ ꞊gban wo ˈti ˗dho ˗puö ˗gblü ˈˈdhi ˈgü ˗ee?
40 ꞊Klaŋnën* ꞊bhlëë ˈyaa ˈkpii˗ kö ˗yö ʒiö ˗a ˈka ö ˗gɔmɛn ˗ta. ˈˈKɛɛ mɛn ˈwo˗ ꞊klaŋ ˗kë ˗së ˈka, ˗yö ˗dho ˈö ˗kë ꞊dhɛ ö ˗gɔmɛn ˈdhö.
41 ˈMën ˗kë ˈö ˈˈdhü ˗bi ˈnën ˈö ü ꞊dhegblü ˈˈɲan ˈgü bhë ˈyö ˈü ˗kpan ˗a ˗bha, ˈˈkɛɛ ˈö ˈˈdhü ˈˈbeŋ ˈö ˗ʒiö bhi ˗zë ü ˈˈɲan ˈgü bhë ˈbhaa˗ yö?
42 Ü ˗dho ˗a pö ü ꞊dhegblü ˗dhɛ ˗kɔ ˗kë ꞊dhɛ ꞊dhɛ: ‹N ꞊dhegblü, dɔ kö ˈˈdhü ˗bi ˈnën ˈö ü ˈˈɲan ˈgü bhë ˈa˗ bho mü› ˈˈkɛɛ kö bhi ˗zë ˈˈdhü ˈˈbeŋ ˈö ü ˈˈɲan ˈgü bhë ˈbhaa˗ yö? ˈˈKpënŋ˗ ˗kë mɛn ˗gɔ ˗mɛn! ˗Bhö ˈˈdhü ˈˈbeŋ ˈö ü ˈˈɲan ˈgü bhë ˗a bho mü ꞊köŋ kö ˈü ˗dhɛ yö ˗së ˈka, kö ˈü ꞊kun ˗mɔn ˈˈdhü ˗bi ˈnën ˈö ü ꞊dhegblü ˈˈɲan ˈgü bhë ˗a ˗bho mü ˗sü ˗bha.
43 «ˈˈDhü ꞊suu ˈö ˗së ˗a bhɛ ˈyaa kë ˈya˗, ˈyö ˈˈdhü ꞊suu ˈö ˈya˗, ˗a bhɛ ˈyaa kë ˗së.
44 ˈˈDhü ˈdhɛ ˈö ˈdhö, ˗wa ˗dɔ ˗a bhɛ ˗bha. ˗A ˈwɔnzuan ˈnën ˗tɔ, ˈwaa figö bhɛ bho ˈˈglɛɛn ˗dhü ꞊troo, ɛɛnˈˈ ˈwaa ˗drɔɔn ˗kpaa bho ˈpö ˈˈglɛɛn ˗kpɔɔ ˈgü.
45 ˈWɔnsëkëmɛn ˗yö ˈwɔn ˗së ˗blɛɛ, ˗a ˗gɛn ˗mü ꞊dhɛ ˈwɔn ˗së ˗nu ˈnën ˈwo pa ˗sü ˈka ˗a zuʋ̈ˈˈ ˈgü. ˈˈKɛɛ ˈwɔnyaakëmɛn ˗zë ˈwɔn yaa ˈnën ˈö˗ ꞊blɛɛ, ˗a ˗gɛn ˗mü ꞊dhɛ ˈwɔn yaa ˗nu ˈnën ˈwo pa ˗sü ˈka ˗a zuʋ̈ˈˈ ˈgü. ˈPë ˈö mɛn zuʋ̈ˈˈ ˈˈpiʋ̈ ˈyö ˗wo mɛn ˈˈdhi ˗ta.
46 «ˈDhɛ ˈö ˈˈdhʋ̈, ˈmën ˗kë ˈö ˈka n ˗dhɛ ‹Dëmɛn! Dëmɛn!› ˈˈkɛɛ ˈö pë ˗nu ˈa ˗an pö ˈkaa ˗an kë?
47 Mɛn ˈö nu n ˈˈpiʋ̈ ˈö ö ˈˈtʋ to n ˗wo ˗bha, ˈö pë ˈa˗ pö ˈö˗ ˗kë, mɛn ˈö bhɔ ˗sü ˈka ˗a ˗bha, a˗ ˈˈpiʋ̈ ˈa˗ pö ka ˗dhɛ.
48 ˗A ˗mɛn ˗yö ꞊dhɛ gɔndë do ˈö ˈdhɛ ˈö ˗dho ˈkɔ dɔ, ˈö ˈˈsɛ pɔn ˈö dho ˈˈsɛɛdhö ꞊gblɛɛn ˈö˗ ˈkɔ ˈˈkpan ˗ya ˗gwö ˗ta ˗a ˈdhö. ˗A ˗wɔn ˈgü ˈdhɛ ˈö ˈˈyi ˗yö pa, ˈˈyi ˗yö ˗nu ˈö ˗man ˗a ˈkɔ ˗bha, ˈˈkɛɛ ˗a ꞊faan yö ˈti ˗mɔn ˈkɔ ˈö bhë ˗a ˈwü ˗sü ˗bha. ˗A ˗gɛn ˗mü ꞊dhɛ ˗wa ˈkɔ ˗dɔ ˗së ˈka.
49 ˈˈKɛɛ mɛn ˈö pë ˗nu ˈa ˗an pö ˗an man ˈö ˈyaa ˗an kë, ˗yö ꞊dhɛ gɔndë do ˈö ö ˗bha ˈkɔ dɔ ˈˈsɛ ˗ta ˈö yö ˈti˗ ˈˈkpan ˗ya ˈˈsɛɛdhö ˗a ˈdhö. ˈˈYi ˗yö ˗nu ˈö ˗man ˈkɔ ˈö bhë ˗a ˗bha ˈö to mü ˈö ˗lo, ˈö wü ˈpapadhö.»
-Zoto -a ˈˈpiʋ̈ -wɔn -nu
^ Ɛɛnˈˈ «˗a gbö.»
^ Ɛɛnˈˈ «˗ka ka ꞊kwaa mɛn ˗nu ˗zü.»
^ Ɛɛnˈˈ «kö ˗wo wo ꞊kwaa ka ˗zü.»
^ Ɛɛnˈˈ «gwëëˈˈ.»
