Nɔɔn˗ ˗së ˈsëëdhɛ ˈö Lukö ˗ya ˗bɛnzë 7:1-50
-
ˈˈSɔdha ˗gɔmɛn do ˗bha ˗zoyödhe (1-10)
-
Yesu ˗yö ꞊gɛandhe do gbö ˗bho ga ˈgü Nainö (11-17)
-
Yesu ˗bha Zan mɛnbɔyibhaamɛn ˗wɔn ˗së blɛɛˈˈ ˗sü (18-30)
-
Pë ˈö Yesu ˗ya ꞊blɛɛ mɛn ˗nu ˈö wo ˈti ˈˈwɩ ˗a ˗wɔn ˗bha bhë ˗an ˗bha (31-35)
-
Yesu ˗yö ˈwɔnyaakëdhe do ˗bhawɔn ˗to (36-50)
-
ˈWɔnzuan ˈö ˗gban mɛn ꞊plɛ ˈö ˈˈpɔ ˗yö kun ˗an ˗bha ˗an ˗bha (41-43)
-
7 ˈDhɛ ˈö ö bo pë ˈö kun ˗a ˈˈpiʋ̈ ꞊dhɛ ˈö˗ pö ˈˈsɛgümɛn ˗nu ˗dhɛ ˗a blɛɛˈˈ ˗sü ˈka, ˈyö dho ˈö ˗da Kapɛɛnaɔmö ˗pö ˈgü.
2 ˗Dhɛ ˈö bhë ˗a ˈgü, ˈˈsɔdha ˗gɔmɛn do ˗yö ˗kun mü ˈö˗ ˗bha yökëmɛn ˈö˗ ˗dhɔ ˗ya ˗kë ꞊dedewo ˈyaa kun ö ˈflëëgü. ˈˈYua ˗yö ˗kun ˗a ˗bha yökëmɛn ˈö bhë ˗a kë ˗ni ˈgü ꞊gbɔɔnsü, kö ˗ya wɔ ˈya˗.
3 ˈDhɛ ˈö ˈˈsɔdha ˗gɔmɛn bhë ˗yö Yesu ˗tɔɔ man, ˈyö Zuifö ˗nu ˗bha mɛn zii ˈbhaa ˗nu bɔ ˗a ˈˈpiʋ̈ kö ˗wa pö ˗a ˗dhɛ ˗yö nu ˗yö ö ˗bha yökëmɛn ˈö bhë ˗a ˗dhɛ bo.
4 ˈDhɛ ˈö ˗kë ˈˈdhʋ̈, ˈyö ˈwo nu Yesu ˈˈpiʋ̈ ˈö ˈwo ˗ya ˗bhɛɛ ˗a ˗dhɛ ˗sü ˗bha ꞊dedewo ˈö ˈwo˗ pö: «˗A ˗dhɛ ˗ya ˗bha kö ˈü˗ kë ˈˈdhʋ̈ ˗a ˗dhɛ.
5 ˗A ˗gɛn ˗mü ꞊dhɛ kwa ˗bha ˈˈsɛ ˗dhɔ ˗ya ˗kë, yö ˈnën ˈö yi ˗bha ˗yakwëë ˗kë ˗a ˈgü ˗kɔ dɔ.»
6 ˈDhɛ ˈö ˗kë ˈˈdhʋ̈, ˈyö Yesu ˗yö ˗ʒiö ˗an ꞊kee˗. ˈDhɛ ˈö ꞊ɲɔɔn ˗ni ˈgü ˗a ˈˈsɔdha ˗gɔmɛn bhë ˗a ˗bha ˈkɔ ˈˈsuee, ˈyö ˈˈsɔdha ˗gɔmɛn ˗yö ö ˈˈtɔŋdë ˗nu bɔ kö ˗wa pö ˗a ˗dhɛ: «N Dëmɛn, ˈbha ˗dho ü ˗de ꞊sëëbho, ˗mën ˗mü n ˈka ˈyö ˈü ˗dho nu n ˗gɔ ˈkɔɔ.
7 Yö ˈnën ˈö˗ ˗wɔn ˈgü ˈö man ꞊dede ˈmaan ꞊mɔɔn˗ ˗bha ˗ʒiaanwo kö ˈa nu ü ˗gɔ ʒiaan˗. ˈBha ˈto yö ˈbha ˗wo dosɛnŋ pö, n ˗man yökëmɛn ˗dho dha.
8 ˈYö ˗tɔ ꞊dhɛ man ˗de ˈpö n ˗gɔmɛn ˗nu ˗wo ˗dhö ˈö ˈa ˈwɔn man ˗an ˗ta. ˈˈSɔdha ˗nu ˗wo n ˗kɔ ꞊löö ˈpö, ˈö ˈman˗ pö ˗a mɛn do ˗dhɛ: ‹˗Bhö ˈdho ˗de!› ˈö dho. ˈMan˗ pö ˗a mɛn ˈbhaa ˗dhɛ: ‹˗Bhö nu!› ˗yö ˗nu. ꞊Dhuëŋ ˗yö n ˗gɔ ˈpö, ˈö ˈman˗ pö ˗a ˗dhɛ: ‹Pë ˈö ꞊nɛn ˗a kë!› ˈö˗ ˗kë.»
9 ˈDhɛ ˈö Yesu ˗yö ˗wo ˗nu ˈwo bhë ˗an man, ˗a ˈwɔn ˗ya ˗kun. ˈYö ö wë ꞊slëë mɛn ˗nu ˈwo kun ʒiö ˗ni ˈgü ˗a ꞊kee˗ bhë ˗an ˈˈpiʋ̈ ˈö˗ pö ˗an ˗dhɛ: «A˗ ˗pö ka ˗dhɛ, Izraɛdhö ˈˈsɛ ˈö yö ˗a ˈgü ˗ʒiaanwo, mɛn ˈbhaa ˈö˗ ˗bha ˗zoyödhe dho kë ꞊dhɛ gɔndënën ˈö bhë ˗a ˗bha ˈdhö, n ˈti ˗kpan ˗a ˗bha ꞊köŋ.»
10 Mɛn ˗nu ˈö ˈˈsɔdha ˗gɔmɛn ˗yö ˗an bɔ bhë, ˈdhɛ ˈwo wo ꞊yɛɛ ˗kë ˗a ˗gɔ ˈˈkwɛnŋdhö, ˗wo ˗kpan ˗a ˗bha yökëmɛn ˈö ˈyaa kun ö ˈflëëgü bhë ˗a ˗bha kö ˗a ˗dhɛ ˗ya bo.
11 ˈDhɛ ˈö ˈˈtʋ̈ŋ ˈnën ˈbhaa ˗yö ˗ʒiö, ˈyö dho ˈˈkwipö ˈwo˗ ˗dhɛ Nainö bhë ˗a ˈgü. ˗A ˗bha gwëëˈˈ ˗nu waa mɛn ꞊va ꞊dede ˗wo ˗kun ˗a ꞊kee˗.
12 ˈDhɛ ˈwo ꞊ɲɔɔn ˗ni ˈpö˗ ˈˈsaan ˈˈdhiʋ̈, ˈyö ˈwo ˗kpan mɛn ˗nu ˗bha kö ˗wo ˈgo ˗ni ˈgü ˈplöö ˗wo ˈdho ˗ni ˈgü mɛn do ˈö ga ˗a ˗wɛɛ bho. Mɛn ˈö ga ˈˈdhʋ̈ bhë, ˗yö ˗kun ꞊gɛandhe do gbö dosɛnŋ* ˈö˗ ˗gɔ ˗a ˈka. Mɛn ꞊va ꞊dede ˗wo ˗kun ˈgo ˗ni ˈgü ˈplöö ˈwo ˗ʒiö dhebɔnën ˈö bhë ˗a ꞊kee˗.
13 ˈDhɛ ˈö Dëmɛn ˗yö ˗kpan ˗a ˗bha, ˈyö˗ ˗wëë ˗ya ˗kë ꞊dedewo ˈö˗ pö ˗a ˗dhɛ: «ˈBha ˗dho ˈˈgbʋ bɔ.»
14 ˈDhɛ ˈö˗ pö ˈˈdhʋ̈, ˈyö ꞊ɲɔɔn ˗an ˗bha ˈö ö ˗kɔ pa pë ˈö mɛn ꞊glöö ˈdhö˗ ˗ta bhë ˗a ˈka, ˈyö mɛn ꞊glöö bun ˗mɛn ˗nu bhë ˈwo ˈduaannu. ˈYö˗ pö: «ˈNëngɔɔnnën, ˗bhö luuˈˈ, man ˈnën ˈa˗ pö!»
15 ˈYö mɛn ˈö ga bhë ˈö ꞊luu ˈö ˗ya ö ˗gɛan, ˈö ˗ya ˈwɔn blɛɛˈˈ ˗sü ˗bha. ˈYö Yesu ˗ya nu ˗a dhe ˗dhɛ.
16 ˈDhɛ ˈö ˗kë ˈˈdhʋ̈, ˈyö˗ ˈwɔn ˗yö mɛn ˈwo ˗kë ˗mü ˗an ꞊gban ˈˈpɛpɛ kun, ˈyö ˈwo ˗ya ˗Zlan ˈtɔ bhɔ ˗sü ˗bha ˈö ˈwo˗ pö: «˗Zlan ˗wodhiʋ̈lomɛn ˈkpii˗ ˗ya nu kwa ˈˈpiʋ̈.» ˈYö ˈwo˗ pö ˈzü: «˗Zlan ˗ya ö wë slëëˈˈ ö ˗bha ˈˈsɛgümɛn ˗nu ˈˈpiʋ̈.»
17 ˈYö ˈwo ˗ya ˗a ˗wɔn blɛɛˈˈ ˗sü ˗bha ˈˈsɛ ˈö bhë waa Zude ˗pö ˗nu ꞊gban ˈˈpɛpɛ ˗an ˈgü.
18 ˈYö Zan ˗bha gwëëˈˈ ˗nu ˗wo ˈwɔn ˗nu ˈwo bhë ˗an ꞊gban ˈˈpɛpɛ ˗gɛn dɔ Zan ˗dhɛ.
19 ˈDhɛ ˈö ˗kë ˈˈdhʋ̈, ˈyö Zan ˗yö ö ˗bha gwëëˈˈ ˗nu ꞊plɛ ˗dhɛ, ˈyö ˗an bɔ Dëmɛn ˈˈpiʋ̈ kö ˗wa dhɛɛˈˈ ˈkpɔ ˗wa pö: «Mɛn ˈö˗ dua ˈdhö ˗mü kö ˗yö nu bhë yö ˗mü ü ˈka ˗ee, ɛɛnˈˈ yi dua ˗mü kö ˈyi yi ˈˈɲan ˈto mɛn ˈˈwɛɛ ˈbhaa ˗gɔ?»
20 ˈDhɛ ˈö mɛn ˗nu bhë ˈwo ˗lo Yesu ˈˈpiʋ̈, ˈyö ˈwo˗ pö ˗a ˗dhɛ: «Zan mɛnbɔyibhaamɛn ˗yö yi ˗bɔ ü ˈˈpiʋ̈ kö ˈyi ü dhɛɛˈˈ ˈkpɔ ꞊dhɛ ‹Mɛn ˈö˗ dua ˈdhö ˗mü kö ˗yö nu bhë yö ˗mü ü ˈka ˗ee, ɛɛnˈˈ yi dua ˗mü kö ˈyi yi ˈˈɲan ˈto mɛn ˈˈwɛɛ ˈbhaa ˗gɔ?›»
21 ˗A ˈˈtʋ̈ŋ ˈö bhë ˗a ˈgü, Yesu ˗yö ˈˈyua ˈsɛɛn˗ ˗nu waa ˈˈyua ˈˈgbɩɩ˗ ˗nu ˗bho mɛn ꞊va ꞊dede ˗bha, ˈö ˗zuu yaa ˗nu bho mɛn ˗nu ˈgü, ˈö ˈˈɲɛɛntiimɛn ˗nu ꞊va ˈˈɲan ˗pʋ ˈö ˈwo ˗dhɛ yö.
22 ˈYö Yesu ˗ya pö mɛn ˗nu ˈö Zan ˗yö ˗an bɔ bhë ˗an ˗dhɛ: «˗Ka ˈdho kö pë ˗nu ˈö ka ˈˈɲan ˗yö ˗kpan ˗an ˗bha, ˈö ˈka ˗an man, ˈka ˗an blɛɛˈˈ Zan ˗dhɛ. ˗Kaa pö ˗a ˗dhɛ ˈˈɲɛɛntiimɛn ˗nu ˈˈɲan ˗ya ˗dhɛ yö, ˗gɛnlomɛn ˗nu ˗wo ˈˈta ˈsü ˗ni ˈgü, ꞊weeyuamɛn ˗nu ˗wa kë ˈˈklʋ̈ʋ̈klʋ̈, ˈö ˈˈtʋgbumɛn ˗nu ˈˈtʋ ˗ya ˈwɔn man, mɛn ˗nu ˈö ˗wa ga ˗wo ˈgo ˗ni ˈgü ga ˈgü, ˈö nɔɔn˗ ˗së ˈdhö pö ˗ni ˈgü ˗wëëmɛn ˗nu ˗dhɛ.
23 Mɛn ˈö yö ˈti ˗dho pë ˈö ˗dho kë ˗a ˗puö ˗pë ˈka ˗a yö n ˗bha, kö ˗a ˗bha ˗yö ˗së.»
24 ˈDhɛ ˈö mɛn ˗nu ˈö Zan ˗yö ˗an bɔ bhë ˈwo ˗ʒiö, ˈyö Yesu ˗yö ˗ya ˈwɔn ˈö ˗gban Zan ˗bha ˗a blɛɛˈˈ ˗sü ˗bha mɛn ꞊va ˈwo kun mü bhë ˗an ˗dhɛ, ˈö˗ pö: «ˈMën ˈö ˈka dho ˗a ˗ga ˈˈyɛta? ˗Kadhüga ˈö ˈˈtee ˈdhö ˗a ˈpa ˗ni ˈgü ö ꞊diëë yö ˗mü ˗ee? ˗Abin, a˗ ˈwɔn ˗dɔ ꞊dhɛ ˈyaa ˗mü.
25 ˈDhɛ ˈö ˈˈdhʋ̈, ˗mën ˈö ˈka dho ˗a ˗ga? Gɔɔn˗ ˈö sɔ ˗së ˈdhö ˗a ˗bha yö ˗mü ˗ee? ˗Abin, ˈyö sü ꞊dhɛ mɛn ˗nu ˈwo sɔ ˗së ˗da, ˈö ˈwo ꞊bhɔɔ kë ˗ni ˈgü, ˈdhɛ ˈwo˗ ˗bha ˈyö ˗tɔ ˗gblüdë ˗nu ˗gɔ ˈkɔɔ.
26 ˈMën˗ ˗wɔn ˈgü ꞊dedewo ˈö ˈka yö ˈˈkpɛnŋ ˈsa? Ka ˗dho kö ˈka ˗kpan ˗Zlan ˗wodhiʋ̈lomɛn ˗bha ˗ee? ꞊Ii, a˗ ˗pö ka ˗dhɛ ˗ʒiaanwo ꞊dhɛ ˈmɛn ˈka dho ˗a ga bhë, ˗yö ˗ʒiö ˗Zlan ˗wodhiʋ̈lomɛn ˗ta.
27 Mɛn ˈö bhë, ˈwɔn ˈö ˗gban ˗a ˗bha ˗Zlan ˗Wo ˗ya ˗blɛɛ ˈö˗ pö: ‹˗Dhɛ ˗ga, ˈman n ˗man bɔmɛn bɔ ü ˗dhɛ ˈˈdhiʋ̈ kö ˗yö ü ˗bha ʒiaan ˗ta ˗dhɛ baaˈˈ.›
28 A˗ ˗pö ka ˗dhɛ ꞊dhɛ, mɛn ˗nu ˈö dhebɔ ˗nu ˗wo ˗an kpɔ, ˗a mɛn ˈbhaa ˈö˗ ˗bha ˈkpiidhɛ ˗yö ˗ʒiö Zan ˗bha ˗ta ˈyaa ˈdhö. ˈˈKɛɛ mɛn ˈö ˈˈtɩtɩ -Zlan ˗bha ˗Gblüdëdhɛ ˈgü, ˗a ˗mɛn ˗yö ˈkpii˗ ˈö ˗ʒiö ˗a ˈka Zan ˗ta.»
29 (ˈDhɛ ˈö ˈˈsɛgümɛn ˗nu ˈˈpɛpɛ waa ˈniinsɔnŋkunmɛn ˗nu ˗wo ˗wo ˈö bhë ˗a man, ˈyö ˈwo˗ pö ˗Zlan ˗yö kpɛnŋdhö, ˗a ˗gɛn ˗mü ꞊dhɛ Zan ˈnën ˈö ˗an bɔ ˈˈyi ꞊bhaa.
30 ˈˈKɛɛ Fadhiziɛn ˗nu waa mɛn ˗nu ˈwo ˈTɔŋ˗ dɔ ˗së ˈka, ˗wo ˗kɔ ˗Zlan ˗zokunwɔn* ˈö ˗gban ˗an ˗bha ˗a kë ˗sü ˈka, ˈö wo ˈti ˈˈwɩ ˗a ˗bha kö Zan ˗yö wo bɔ ˈˈyi ꞊bhaa.)
31 «De ˗nu ˈa ˗dho ˈˈtʋ̈ŋ ˈö yö ˗a ˈgümɛn ˗nu ˗zɔn ˗an ˈka? ˗Wo ˗bhɔ de ˗nu ˗bha?
32 ˗Wo ˗bhɔ ˈnën ˈsɛɛn˗ ˗nu ˈö ˈwo ˗ya ˗sü ˈka ˈˈdhookwëë˗ ˈö ˈwo ˈwɔn blɛɛˈˈ ˗ni ˈgü wo ˈko ˗nu ˗dhɛ, ˗an ˗bha. ˗Wa ˗pö wo ˈko ˗nu ˗dhɛ: ‹Yi ˈˈtruunën ˗piö, ˈˈkɛɛ ka ˈti ˈˈtan kë, ˈö ˈyi ˗wëë ˗gbʋ bɔ, ˈˈkɛɛ ka ˈti ˈˈgbʋ bɔ.›
33 ˗Kɔ do ˈö bhë ˗a ˈka ˈdhɛ Zan mɛnbɔyibhaamɛn ˗yö nu, ˗ya kë ꞊shiöŋ ˈyaa pë* ˗bhö ɛɛnˈˈ ˈyaa we mü. ˗A ˗wɔn ˈgü, ka˗ ˗pö: ‹˗Zuu yaa ˗ya ˈgü.›
34 ˈDhɛ ˈö mɛn Gbö ˗yö nu ˈö pë ˗bhö, ˈö we mü, ˈyö ˈka˗ pö: ‹˗Ka ˗dhɛ ˗ga! Gɔndë ˈö yö pë ˈˈgblʋ̈gblʋ̈ ˗bhömɛn waa we ˈˈdudu mü ˗mɛn ˗mü ˗a ˈka. ˗Yö ˈniinsɔnŋkunmɛn ˗nu waa ˈwɔnyaakëmɛn ˗nu ˈˈtɔŋdë ˈka.›
35 ˈˈKɛɛ mɛn ˈö ꞊kpɔɔsü ˗wa ˗dhɛ ˗yö ˗a këwɔn* ˗nu ˗bha.»
36 Fadhiziɛn mi do ˗yö Yesu ˗dhɛ ö ˗gɔ ˈkɔɔ kö ˈwo pë ˗bhö wo ˈkwëë˗. ˈDhɛ ˈö ˗kë ˈˈdhʋ̈, Yesu ˗yö ˗dho ˗a ˗gɔ ˈkɔɔ ˈö ˈwo ˗ya* ˈtaablö ˈˈdhiʋ̈ ˈö ˈwo pë ˗bhö.
37 Dhebɔnën do ˈö mɛn ꞊gban ˗wa dɔ ꞊dhɛ ˈwɔnyaakëdhe ˈdhö ˈpö˗ ˈö bhë ˗a ˈgü, ˗ya ˗man ꞊dhɛ Yesu ˗yö pë ˗bhö ˗ni ˈgü Fadhiziɛn mi ˈö bhë ˗a ˗gɔ ˈkɔɔ. ˈDhɛ ˈö˗ man ˈˈdhʋ̈, ˈyö nu ˗sanŋdhe do ˈö ˈˈɲɔn ꞊fii ˗së ˗sü ˈdhö˗ ˈgü ˗a ˈka mü.
38 ˈYö dho ˈö ˈɲaannu Yesu ˗gɛn ˈˈpiʋ̈ ˗a ꞊zlöö, ˈö ˗ya ˈˈgbʋ bɔ ˗sü ˗bha, ˈyö ö ˈˈɲan ˈˈyi ꞊wɛnŋ Yesu ˗gɛn ˗nu ˗ta ˈö ˗an ꞊tɔɔ, ˈyö go mü ˈö ö ˗bha wundhɛ ˗ʒiö ˗an ˗bha. ˈDhɛ ˈö ö bo ˈyö ö ˗bɛn ˗ya ˗a ˗gɛn ˗nu ˗bha ˈö ˗an mü, ˈyö ˈˈɲɔn ꞊fii ˗së ˗sü ˈö bhë ˗a ꞊wɛnŋ ˗a ˗gɛn ˗nu ˗ta.
39 ˈDhɛ Fadhiziɛn mi ˈö Yesu ˗dhɛ ö ˗gɔ ˈkɔɔ bhë ˈö˗ yö ˈˈdhʋ̈, ˈyö˗ pö ö ˗de ˗dhɛ: «Gɔndënën ˈö yö ˗ya kë ꞊dhɛ ˗Zlan ˗wodhiʋ̈lomɛn ˗mü ˗a ˈka ˗be ꞊dedewo, dhebɔnën ˈö ˈpa ˗ni ˈgü ˗a ˈka bhë, dhebɔ ꞊suu ˈö˗ ˈka ˗yö ˗dho ˗a dɔ. ˗Yö ˗dho ˗a ˈwɔn dɔ ꞊dhɛ ˈwɔnyaakëdhe ˗mü.»
40 ˈˈKɛɛ ˈyö Yesu ˗ya pö ˗a ˗dhɛ: «Simɔn, ˗yö n ˈˈpiʋ̈ ꞊dhɛ ˈa ˈwɔn ˈbhaa blɛɛˈˈ ü ˗dhɛ.» ˈYö Simɔn ˗ya pö: «˗A blɛɛˈˈ n Dëmɛn!»
41 «Gɔndë do ˈbhaa ˗bha ˈˈpɔ ˗yö ˗kun gɔɔn˗ ˗nu ꞊plɛ ˗bha. ˗A ˗bha denie* këŋ ˈˈsoodhu (500) ˈnën kun ˗a mɛn do ˗bha, ˈyö˗ ˗kɔŋ ˈˈsoodhu (50) ˗yö ˗kë ˗a mɛn do ˈö to ˗a ˗bha.
42 ˈDhɛ ˈö ˗kë ꞊dhɛ ˗a bho ˗pë ˈyaa kun ꞊slɔɔ ˗ni ˈgü ˗an ˗gɔ, ˈyö ˈˈpɔ ˈö kun mɛn ꞊plɛ ˈwo bhë ˗an ˗bha bhë ˈö˗ to ˈˈdhʋ̈. Ü ˗bha ˈgü, mɛn ꞊plɛ ˈwo bhë ˗a de ˈö mɛn ˈö ˈˈpɔ dɔ ˗an ˗bha bhë ˗a ˗dhɔ dho ˗a kë ꞊dedewo?»
43 ˈYö Simɔn ˗ya ˗yɔ bɔ ˈö˗ pö: «N ˗man ˈgü, ˗a mɛn ˈö ˈwëëga ꞊va ˈˈpɔ ˗kë ˗a ˗bha ˈö ˈwo˗ to ˈˈdhʋ̈ bhë yö ˗mü.» ˈYö Yesu ˗ya pö ˗a ˗dhɛ: «Pë ˈü˗ pö bhë ˈyö˗ ˈka.»
44 ˈDhɛ ˈö˗ pö ˈˈdhʋ̈, ˈyö ö wë ꞊slëë dhebɔnën ˈö bhë ˗a ˈˈpiʋ̈, ˈyö˗ pö Simɔn ˗dhɛ: «Ü dhebɔnën ˈö yö ˗a ˗yö ˗ee? ˈDhɛ ˈa ˗da ü ˗gɔ ˈkɔɔ, ü ˈti n ˗gɛn ˗zu ˗a ˈka ˈˈyi ˗zɔn n ˈka. ˈˈKɛɛ dhebɔnën ˈö yö, ˗yö n ˗gɛn ˗nu ˗zu ö ˈˈɲan ˈˈyi ˈka ˈö ö ˗bha wundhɛ ˗ta ˗an ˗bha.
45 Ü ˈti ˈwü n ˗bha kö ˈü n ˈˈkpɛnŋ mü, ˈˈkɛɛ ˈö sü ˈˈlɛlɛ ˈa ˗da ˗a ˈka ü ˗gɔ ˈkɔɔ yö ˗a ˗bha, dhebɔnën ˈö yö ˗yö ˈˈgblü ˗ni ˈgü n ˗gɛn ˗nu ˗bha ˗kplawo ˈö ˗an mü ˗ni ˈgü.
46 Ü ˈti ˈˈɲɔn ꞊wɛnŋ n ꞊troo, ˈˈkɛɛ dhebɔnën ˈö yö ˗ya ˈˈɲɔn ꞊fii ˗së ˗sü ꞊wɛnŋ n ˗gɛn ˗nu ˗bha.
47 ˗A ˗wɔn ˈgü a˗ ˗pö ü ˗dhɛ, ˈkö ˗kë ꞊dhɛ ˗a ˗bha ˈwɔn yaa ˗nu ˗wo ꞊va,* ˈman ˗a ˗bhawɔn ˈto, ˗a ˗gɛn ˗mü ꞊dhɛ n ˗dhɔ ˗ya ˗kë ꞊dedewo. ˈˈKɛɛ mɛn ˈwo˗ ˗bhawɔn to ˈwɔn ˈdɛdɛ ˈgü, mɛn ˗dhɔ ˈyaa˗ kë ˈgbɛ.»
48 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö˗ pö ˗a dhebɔnën ˗dhɛ: «ˈMan ü ˗bha ˈwɔn yaa ˗nu ˗bhawɔn ˈto.»
49 ˈDhɛ ˈö˗ pö ˈˈdhʋ̈, ˈyö mɛn ˗nu ˈö waa˗ ˗nu ˈwo kun pë ˗bhö ˗ni ˈgü ˈtaablö ˈˈdhiʋ̈ bhë, ˈwo˗ pö wo ˈko ˗nu ˗dhɛ: «Mɛn ˈö yö mɛn ꞊suu ˗mɛɛn ˗mü ˗a ˈka ˈyö mɛn ˗nu ˗bha ˈwɔn yaa ˗nu ˗bhawɔn to ˗ʒiaanwo.»
50 ˈˈKɛɛ ˈyö Yesu ˗ya pö ˗a dhebɔnën ˗dhɛ: «Ü ˗bha ˗zoyödhe ˗ya ü dha, ü ˗bha ˈdho wo ü ˈflëëgü.»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «ˈnën ga do.»
^ Ɛɛnˈˈ «˗dhioo, ʒiaan ˈö˗ ˗zɔn.»
^ Ɛɛnˈˈ «ˈbluu˗.»
^ Glɛkö ˗wo ˈgü ˈyö ˗tɔ «˗a ˗bha ˈnën ˗nu ꞊gban.»
^ Glɛkö ˗wo ˈgü ˈyö ˗tɔ «ˈö ˗wɔ ˈtaablö ˈˈdhiʋ̈.»
^ Denie do ˈnën ˗tɔ ˗dhɛkpaɔyi do ˗yö ꞊saa.
^ Ɛɛnˈˈ «ˈkpii˗.»
