Nɔɔn˗ ˗së ˈsëëdhɛ ˈö Lukö ˗ya ˗bɛnzë 8:1-56
-
Dhebɔ ˗nu ˈö ˈwo kun ʒiö ˗ni ˈgü Yesu ˈˈpiʋ̈ (1-3)
-
ˈWɔnzuan ˈö ˗gban pëtamɛn ˗bha (4-8)
-
ˈMën ˗kë ˈö Yesu ˗yö bɔ ˈwɔnzuan ˗nu ˗ta? (9, 10)
-
ˈWɔnzuan ˈö ˗gban pëtamɛn ˗bha ˗a ˗gɛn (11-15)
-
ˈWaa ꞊laŋba dɔ kö ˗wo pë ˈˈgblü ˗a ˗ta (16-18)
-
Yesu dhe waa˗ ꞊dhegblü ˗nu (19-21)
-
Yesu ˗yö ˈˈtee ˈˈgbɩɩ˗ ˈduaannu (22-25)
-
Yesu ˗yö ˗zuu yaa ˗nu ˗kë ˈö ˈwo ˗da ˗bhɔ ˗nu ˈgü (26-39)
-
Zailusö ˈdhu waa dhebɔnën ˈö pa Yesu ˗bha sɔ ˈka (40-56)
8 ˈDhɛ ˈˈtʋ̈ŋ ˈnën ˈbhaa ˗yö ˗ʒiö, ˈyö ˗ya bɔ ˗sü ˗bha ˈˈkwipö ˗nu waa ˈpödhɛ ˗nu ˗bhuöö ˈˈpiʋ̈ ˗zlanwopösü ˈka, ˈyö nɔɔn˗ ˗së ˈö ˗gban ˗Zlan ˗bha ˗Gblüdëdhɛ ˗bha ˗a pö mɛn ˗nu ˗dhɛ. ˗A ˗bha bɔmɛn ˗nu ˗kɔŋ do ö ga ꞊plɛ bhë ˗wo ˗kun ˗a ꞊kee˗.
2 ˗Ya ˈgo mü ˈzü, dhebɔ ˈbhaa ˗nu ˈö ˗zuu yaa ˗nu bho ˗an ˈgü ɛɛnˈˈ ˈö ˗an ˗dhɛ bo bhë, ˗wo ˗kun ˗a ꞊kee˗. Wo ˈnën ˈwo ˗tɔ: Madhi ˈwo˗ ˗dhɛ Madelɛnö* ˈö ˗zuu yaa ˈˈsɔɔplɛ -wo go ˗a ˈgü,
3 Edhɔdö ˗bha yökëmɛn Suza bɔɔ Ʒanö, Sizanö waa dhebɔ ꞊va ˈˈwɛɛ ˈbhaa ˗nu. Wo ˈnën ˈwo kun Yesu waa ö ˗bha gwëëˈˈ ˗nu ˗an ˗takun ˗ni ˈgü wo ˗bha ꞊nɔɔnpë ˗nu ˈka.
4 Mɛn ꞊va ꞊dede ˗wo ˗nu ˈö ˈwo kpa mɛn ˗nu ˈwo go ˈˈkwipö ˗nu ˈgü do do ˈka ˈwo nu Yesu ˈˈpiʋ̈ ˗an ˗bha. ˈYö ˈwɔnzuan do ˈbhaa ˗zɔn ˗an ˗dhɛ ˈö˗ pö:
5 «Gɔndënën do ˗yö ˗yö ˈˈkpɛnŋ ˈö dho ö ˗bha pë ga ˗nu ta˗. ˈDhɛ ˈö kun ˗an ˗pɛn ˗ni ˈgü, ˗a ga ˈbhaa ˗nu ˗wo ˗puö ʒiaan ˗gbloo ˈˈpiʋ̈, ˈö mɛn ˗nu ˗wo ꞊taa ˗an ˗ta, ˈyö ˗mannën ˗nu ˗wo nu ˈwo ˗an ˗bhö.
6 ˗A ga ˈbhaa ˗nu ˗wo ˗puö ˗gwö ˗ta, ˈyö ˈdhɛ ˈwo bhɔ ˈö ˈwo ga ˈˈvaandhö ˈˈyi ˈö ˈyaa kun mü bhë ˗a ˗wɔn ˈgü.
7 ˗A ga ˈbhaa ˗nu ˗wo ˗puö ˈpö ˈˈglɛɛn ˈgü. ˈDhɛ ˈwo bhɔ, ˈyö ˈˈglɛɛn ˗yö bhɔ ˈpö ˈö˗ ˗kpɔɔ ˗yö sɔ ˗an ˗ta ˈö ˗an zë.
8 ˈYö˗ ga ˈˈwɛɛ ˈbhaa ˗nu ˗wo ˗puö ˈˈsɛ ˗së ˈgü ˈyö ˈwo bhɔ ˈö ˈwo bha, ˈyö˗ ˈdhɛ ˈö ˈdhö ˗a ga ˗yö ˗kë këŋ do (100).» ˈDhɛ ˈö ö bo ˗wo ˗nu ˈwo bhë ˗an pö ˗sü ˈka, ˈyö ö ˗wo ˈˈdhiʋ̈ ꞊luu ˈö˗ pö: «Mɛn ˈö ˈwɔn ˈgüman ˗tʋ ˈdhö˗ ˗gɔ, ˗yö ö ˈˈtʋ ˈto ˗së ˈka.»
9 ˈYö˗ ˗bha gwëëˈˈ ˗nu ˗wa dhɛɛˈˈ kpɔ ˈwɔnzuan ˈö˗ ˗zɔn bhë ˗a ˈklɔɔ˗ ˈka.
10 ˈYö˗ pö ˗an ˗dhɛ: «ˈWɔn ˈö ˗gban ˗Zlan ˗bha ˗Gblüdëdhɛ ˗bha bhë, ˗Zlan ˗ya ˈˈdhɛ bho ˗a ˗ta ka ˗dhɛ, ˈˈkɛɛ mɛn ˈˈwɛɛ ˗nu ˈwo to ˗an ˗bha ˗dho ˈto ˈwɔnzuan ˈgü. ˗A ˗wɔn ˈgü, ˈkö ˗kë ꞊dhɛ ˗wo ˗dhɛ ˗ga ˈwaa pë ˈbhaa yö, ˈkö ˗kë ꞊dhɛ ˗wo wo ˈˈtʋ ˗to, ˈpë ˈwo˗ man ˈwaa˗ ˈgüman ö ˈklɔɔ˗ ˈka.
11 ˈDhɛ ˈö ˈˈdhʋ̈, ˈwɔnzuan ˈa˗ ˗zɔn bhë ˗a ˈklɔɔ˗ ꞊nɛn: Pë ga ˗nu ˈwo ˗an ta bhë ˈyö ˈwo ˗tɔ ˗Zlan ˗Wo.
12 Ʒiaan ˗gbloo ˈˈpiʋ̈ ˗dhɛ ˈö pë ga ˗yö ˗puö mü bhë, yö ˈnën ˈö ˗tɔ mɛn ˗nu ˈö ˈwo ˗Zlan ˗Wo man ˈö Dügɔmɛn ˗yö nu ˈö ˗Zlan ˗Wo ˈwo˗ man bhë ˈö˗ bho ˗an zuʋ̈ˈˈ ˈgü, ˗yö kë ˈˈdhʋ̈ kö ˈwa ˗dho ˈdhaŋ˗ bho ˗a ˈˈdhiʋ̈ ˈö ˈwo dha.
13 ˗Gwö ˗ta ˗dhɛ ˈö pë ga ˗nu ˗wo ˗puö mü bhë, yö ˈnën ˈö ˗tɔ mɛn ˗nu ˈö ˈwo ˗Zlan ˗Wo man ˈö ˈwo ˗wɩ ˗a ˗bha zuʋ̈gblüdhi ˈka, ˈˈkɛɛ ˈö˗ ɲun yö ˈti ʒiö ˗an ˈgü. ˗Wo ˈdhaŋ˗ ˗bho ˗a ˈˈdhiʋ̈ ˈˈtʋ̈ŋ ˈnën ˈbhaa ˈˈpiʋ̈, ˈˈkɛɛ ˈdhɛ ˈö ˈwɔn ˈˈgbɩɩ˗ ˗nu ˗wo nu ˗an ˗ta, ˈyö ˈwo ˗kan ˗a ˗bha.
14 ˈˈGlɛɛn ˈgü ˗dhɛ ˈö˗ ga ˈbhaa ˗nu ˗wo ˗puö mü bhë ˈyö ˗tɔ mɛn ˗nu ˈö ˈwo ˗Zlan wo man, ˈˈkɛɛ ˈö zuʋ̈dhiʋ̈tɛ ˗nu, ꞊nɔɔn ˗nu waa zuʋ̈niidadhe kë ˗sü ˈö ˈˈkpɔnŋ ꞊taa yö ˗a ˗dhɔ ˗yö sɔ ˗Zlan ˗Wo ˈwo˗ man bhë ˗a ˗ta, ˈö ˗an ˗gɛn ˈyaa ˈdho ˈˈdhiʋ̈ kö ˗wo ˗kian.
15 ˈˈSɛ ˗së ˈö˗ ga ˈbhaa ˗nu ˗wo ˗puö ˗a ˈgü bhë, yö ˈnën ˈö ˗tɔ mɛn ˗nu ˈö ˈwo ˗Zlan ˗Wo man ˈö ˈwo wo ˗kɔ ˗ya ˗a ˗gɔ zuʋ̈ˈˈ ˗së ꞊dede ˈka, ˈö ˈwo˗ ˗wɔn kun ˈˈgbɩɩ˗, ˈö ˈwo ˗ya ˈwɔn ˈˈgbɩɩ˗ ˗nu ˈgü ˈwo˗ ˈgüwɔn ˗së ˗nu ˗kë.
16 «Mɛn ˈbhaa ˈyaa ꞊laŋba dɔ kö ˗yö pëfuöö ˈˈgblü ˗a ˗ta ɛɛnˈˈ kö ˗ya dɔ ˈlii˗ ꞊löö. ˗Ya ˗dɔ ꞊ʒiaan ꞊laŋba ˗dɔ ˗a ˗ta ˗pë ˗ta kö mɛn ˗nu ˈwo ˗da ˈkɔɔ ˗yö ˗dhɛ ˈˈpʋ ˗an ˗ta.
17 ˗A ˗gɛn ˗mü ꞊dhɛ pë ˈbhaa ˈkö ˈˈdhɛ dho kë ˗a ˗ta, ˈö ˈˈdhɛ yö ˈti ˗dho ˈgo ˗a ˗ta ˈyaa ˈdhö. Ɛɛnˈˈ pë ˈˈoo ˗pë ˈkö ˗dho kë ˗bin ˗sü ˈka ꞊klɔɔklɔɔdhö ˈö yö ˈti ˗dho ˈgo ˗bindhe ˈgü, ɛɛnˈˈ ˈö yö ˈti ˗dho yö zaŋ ˗ta ˈyaa ˈdhö.
18 ˈDhɛ ˈö ˈˈdhʋ̈, ˗ka ka ˈˈtʋ̈ŋ kë ˗së ˈka ka ˈˈtʋ ˗to ˈwɔn ˗nu ˗bha ˗kɔ ˈgü. ˗A ˗gɛn ˗mü ꞊dhɛ mɛn ˈö pë ˈdhö˗ ˗gɔ, ˗wo ˗dho ˗a ˈbhaa nu ˗a ˗dhɛ. ˈˈKɛɛ mɛn ˈö pë ˈbhaa ˈyaa˗ ˗gɔ, ˗a ˈdhɛ ˈö˗ ˗bha ˈgü ˗be ˗yö ö ˗gɔ ˗ʒiaanwo bhë, ˗wo ˗dho ˗a ˈsü ˗a ˗gɔ.»
19 ˗A ˈˈtʋ̈ŋ ˈö bhë ˗a ˈgü kö Yesu dhe waa˗ ꞊dhegblü ˗nu ˗wa nu ˗a ˈˈpiʋ̈, ˈˈkɛɛ ˈdhɛ ˈö ˗kë ꞊dhɛ mɛn ˗nu ˗wo ˗kun ˗a ˗züzü ꞊va bhë, wo ˈti ꞊mɔɔn˗ ˗bha kö ˗wo yö ˗a ˈka ꞊klöö˗.
20 ˈYö mɛn ˗nu ˗wo dho ˈwo˗ pö ˗a ˗dhɛ: «Ü dhe waa ü ꞊dhegblü ˗nu ˗wo dɔ ˗sü ˈka ˈˈkpɛnŋ, ˗wa ˈˈpiʋ̈ ˈwo ˗kpan ü ˗bha.»
21 ˈYö˗ ˗yɔ bɔ ˗an ˗gɔ ˈö˗ pö: «N dhe waa n ꞊dhegblü ˗nu ˈnën ˈwo ˗tɔ mɛn ˗nu ˈö ˈwo wo ˈˈtʋ to ˗Zlan ˗Wo ˗bha ˈö ˈwo˗ ˗ya ꞊bhlëë ˈgü.»
22 ˗Dhɛkpaɔyi do ˈka, Yesu waa ö ˗bha gwëëˈˈ ˗nu ˗wo ˗da ˈˈyitagɔ ˈgü, ˈyö˗ pö ˗an ˗dhɛ: «˗Kwa ˈˈyi ˈˈkan ˈkwa ˈdho ˈˈyi ꞊taabha.» ˈDhɛ ˈö ˗kë ˈˈdhʋ̈, ˈyö ˈwo ˗ya ˈdho ˗sü ˗bha.
23 ˈDhɛ ˈwo kun ˈdho ˗ni ˈgü, ˈyö yi zë. ˈYö ˈˈtee ˈˈgbɩɩ˗ ˗yö ˗ya ʒiö ˗sü ˗bha ˈˈyi ˗ta mü, ˈyö ˈˈyi ˗yö ˗ya ˗an ˗bha ˈˈyitagɔ pa ˗sü ˗bha, ˈö ꞊ɲɔɔn mü kö ˗wa dɔ ga ˗yɛ ˈˈdhiʋ̈.
24 ˈYö ˈwo nu ˈwo pa ˗a ˗bha ˈö ˈwo˗ pö: «˗Gɔmɛn, ˗Gɔmɛn, ga ˗ya yö kwa ˗bha!» ˈDhɛ ˈö ˗kë ˈˈdhʋ̈ ˈyö ꞊luu ˈö ˗gbla ˈˈtee ˈö bhë waa ˈˈyi kpö kpö ˗nu ˈwo kun luuˈˈ ˗ni ˈgü bhë ˗an ˗ta, ˈyö ˈwo ˈduannu, ˈyö ˗dhɛ ˗ta ˗yö dɔ dinŋdhö.
25 ˈYö˗ pö ˗an ˗dhɛ: «Ka ˗bha ˗zoyödhe ˗yö ˈˈmɛn?» ˈYö˗ ˈwɔn ˗yö ˗an kun, ˈö ˈˈsuʋ̈ ˗zizisü ˗yö ˗da ˗an ˈgü, kö ˗wa pö ˗ni ˈgü wo ˈko ˗nu ˗dhɛ: «Mɛn ꞊suu ˗mɛɛn ˈö ˗kë ꞊ni? ˗Yö ˗gbla ˈˈtee waa ˈˈyi ˗nu ˗an ˗ta ˗ʒiaanwo ˈö ˈwo ˈwɔn man ˗a ˗ta.»
26 ˈDhɛ ˈö ˗kë ˈˈdhʋ̈, ˈyö ˈwo dho ˈwo ˗lo Zedhasa ˈˈsɛ ˈö Galile ˗sɛ ˈwëëdhö ˈˈyi ꞊taabha bhë ˗a ˈgü.
27 ˈDhɛ ˈö Yesu kun ˈgo ˗ni ˈgü ˈˈyitagɔ ˈgü kö ˈö yö ˈˈshia˗, ˈyö gɔndënën do ˈö go ˈpödhɛ ˈö ˗dhɛ ˈö bhë ˗a ˈˈsuee ˗a ˈgü ˈö ˗zuu yaa ˈdhö˗ ˈgü, ˈö nu ˗a ˗gɔ ʒiaan˗. ˈDhɛ ˈö ˗kë ˈˈdhʋ̈ kö gɔndënën ˈö bhë yö ˈti sɔ ˗da ö ˗bha ˗a yi ˗ya ꞊gwëë ꞊dedewo, ɛɛnˈˈ ˈyaa kun wɔ ˗ni ˈgü ˈkɔɔ, ˈdhɛ ˈö kun ˗a ˗bha ˈyö ˗tɔ blɔɔndhɛ ˗nu.
28 ˈDhɛ ˈö ˗kpan Yesu ˗bha, ˈyö ˗gbla ˈyö nu ˈö ˗puö ˈˈshia˗ ˗a ˈwëëdhö. ˈYö ˗gbla ˈzü ˈˈgbɩɩ˗ ˈö˗ pö: «Yesu, ˗Zlan ˈö pë ꞊gban ˈˈpɛpɛ ˗gɔ ˗ta ˗a Gbö, ˗mën ˈö ko ꞊zinŋgü? Ü ˗bha ˈgën ˗së, ˈbha ˗dho n ˈˈklʋʋbhɔ.»
29 (˗A ˗gɛn ˗mü ꞊dhɛ ˈö kun ˈˈdhʋ̈ kö Yesu ꞊yaa˗ pö ˗zuu yaa ˈö bhë ˗a ˗dhɛ ꞊dhɛ ˗yö ˈgo gɔndënën ˈö bhë ˗a ˈgü. ˗A ˗zuu yaa ˗ya ˗da gɔndënën ˈö bhë ˗a ˈgü ˗be ˗gɛnɲaan ˈka ꞊va,* ˈö ꞊waa˗ ˗klu ꞊yɔɔga ˗nu ˈka, ꞊waa˗ ˗maankë ˈko ˗ta ꞊va. ˈˈKɛɛ ˗ya kë ˈˈdhʋ̈, ˗yö ꞊yɔɔ˗ ˗nu ˗kan ˗kplawo, ˈö˗ ˗zuu yaa ˗yö dho ˗a ˈka ˗dhɛ ˈö mɛn ˗nu ˈwaa˗ ˗bha ˗a ˈgü.)
30 ˈYö Yesu ˗ya dhɛɛˈˈ kpɔ ˈö˗ pö: «˗Wo ü ˗dhɛ de?» ˈYö˗ pö: «˗Wo n ˗dhɛ ˈˈGblü ꞊va.» ˗A ˗gɛn ˗mü ꞊dhɛ ˗zuu yaa ˗nu ˈö ˈwo kun gɔndënën ˈö bhë ˗a ˈgü, ˗wo ˗kun ꞊va ꞊dedewo.
31 ˗Wo ˗kun bhɛɛˈˈ ˗ni ˈgü Yesu ˗dhɛ ˗kplawo kö ˈya ˗dho ˗a pö ˈwo ˈdho ˗glu ˈˈkpa ˈö˗ ˈˈdhiʋ̈todhɛ ˈyaa ˈdhö bhë ˗a ˈgü.
32 ˈDhɛ ˈö ˗kë ꞊dhɛ ˗bhɔ ꞊kpluu do ˈbhaa ˗kun pë ˗bhö ˗ni ˈgü ˗tɔn ˗ta ˗dhɛ ˈbhaa ˈgü mü, ˗wo ˗bhɛɛ Yesu ˗dhɛ kö ˗yö ˈˈwɩ ˗a ˗bha kö ˈwo ˗da ˗bhɔ ˗nu ˈwo bhë ˗an ˈgü. ˈYö Yesu ˗yö ˗we ˗a ˗bha.
33 ˈDhɛ ˈö ˗kë ˈˈdhʋ̈, ˈyö ˗zuu yaa ˗nu ˗wo go gɔndënën ˈö bhë ˗a ˈgü ˈyö ˈwo ˗da ˗bhɔ ˗nu ˈgü. ˈYö ˗bhɔ ꞊kpluu ˈwo bhë, ˈwo ꞊yɔɔ goo ˗bha ˈwo ꞊wɛnŋ ꞊weeyi ꞊bhaa, ˈö ˈwo ga mü.
34 ˈˈKɛɛ ˈdhɛ ˈö mɛn ˗nu ˈwo kun ˗bhɔ ˗nu ˗maankë ˗ni ˈgü ˈwo ˈwɔn ˗nu ˈwo ˗kë bhë ˗an yö, ˈyö ˈwo ꞊duëë ˈö ˈwo dho ˈwo˗ ꞊blɛɛ ˈpömɛn ˗nu waa ꞊gbɛɛgümɛn ˗nu ꞊gban ˈˈpɛpɛ ˗dhɛ.
35 ˈDhɛ ˈö ˗kë ˈˈdhʋ̈, ˈyö mɛn ˗nu ˗wo nu kö ˈwɔn ˈö ˗kë mü ˈwo˗ yö. ˈDhɛ ˈwo ˗lo Yesu ˈˈpiʋ̈ ˈyö ˈwo ˗kpan gɔndënën ˈö ˗zuu yaa ˗nu ˗wo go ˗a ˈgü bhë ˗a ˗bha kö ˗yö ˈɲaannu ˗sü ˈka Yesu ˗gɛn ˈˈpiʋ̈, kö sɔ ˗ya ˗bha, kö ˗ya ö ˗de ꞊slɔɔ. ˈYö ˈˈsuʋ̈ ˗yö ˗da ˗an ˈgü ꞊dedewo.
36 Mɛn ˗nu ˈö ˈwɔn ˈö bhë ˈö ˗kë ˗an ˈˈɲaan ˈka, ˗wo ˗kɔ ˈö gɔndënën ˈö ˗zuu yaa kun ˗a ˈgü bhë ˈö ö ˗de ꞊slɔɔ ˗a ˈka ˗a ꞊gban ˈˈpɛpɛ ˗gɛn ˗dɔ ˗an ˗dhɛ.
37 ˈDhɛ ˈö ˗kë ˈˈdhʋ̈, ˈyö mɛn ˗nu ˈwo Zedhasa ˈˈsɛ ˈö bhë ˗a ˈgü ˗an ꞊va ꞊dede ˗wo ꞊bhɛɛ Yesu ˗dhɛ kö ˗yö ˈgo wo ˗bha ˈˈsɛ ˈgü, ˗a ˗gɛn ˗mü ꞊dhɛ ˈˈsuʋ̈ ꞊dede ˗kun ˗an kë ˗ni ˈgü. ˈYö dho ˈö ˗da ˈˈyitagɔ ˈgü kö ˈö ʒiö.
38 ˈDhɛ ˈö ˗kë ˈˈdhʋ̈, ˈyö gɔndënën ˈö ˗zuu yaa ˗nu ˗wo go ˗a ˈgü bhë ˈö ꞊bhɛɛ ˗a ˗dhɛ kö ˈö ʒiö ˗a ꞊kee˗, ˈˈkɛɛ Yesu yö ˈti ˈˈwɩ ˗a ˗bha, ˈyö˗ pö ˗a ˗dhɛ:
39 «˗Bhö ˈdho ü ˗gɔ ˈˈkwɛnŋdhö kö ˈwɔn ˈö ˗Zlan ˗ya ˗kë ü ˗dhɛ bhë ˈü˗ blɛɛˈˈ mɛn ˗nu ˗dhɛ.» ˈDhɛ ˈö ˗kë ˈˈdhʋ̈ ˈyö ˗ʒiö, ˈyö ˈwɔn ˈö Yesu ˗ya ˗kë ˗a ˗dhɛ bhë ˈö˗ ꞊blɛɛ ˗dhɛ ꞊gban ˈˈpɛpɛ ˈgü ˈplöö.
40 ˈDhɛ ˈö Yesu ˗yö ö ꞊yɛɛ ˗kë ˈzü, mɛn ꞊va ꞊dede ˗wo wo ˗kɔ ˗ya ˗a ˗gɔ ˗së ˈka, ˗a ˗gɛn ˗mü ꞊dhɛ ˗wo ˗kun wo ˈˈɲan ˈto ˗ni ˈgü ˗a ˗gɔ.
41 ˈˈKɛɛ ˈyö gɔndënën do ˈwo˗ ˗dhɛ Zailusö ˗yö nu. ˗Yö ˗kun ˗yakwëë ˗kë ˗a ˈgü ˗kɔ ˈwɔnyëë˗ do ˈka. ˈYö ˗puö Yesu ꞊gɛnŋdhö ˈö ˗ya ˗bhɛɛ ˗a ˗dhɛ ˗sü ˗bha kö ˗yö ˈdho ö ˗gɔ ˈkɔɔ.
42 ˗A ˗gɛn ˗mü ꞊dhɛ ˈö kun ˈˈdhʋ̈ kö ˗a ˈdhunën ˈö˗ ˗kwɛ ˈdhö ˗kɔŋ do ö ga ꞊plɛ (12) ˈö ˗kë ˈnën ga dosɛnŋ ˈö˗ ˗gɔ ˗a ˈka, ˈyaa ö ˈflëëgü, kö ˗ya wɔ ˈya˗.
ˈDhɛ ˈö Yesu kun ˈdho ˗ni ˈgü ˗a ˗gɔ ˈkɔɔ, kö mɛn ˗gbaa ꞊va ˈwo kun ˗a ꞊kee˗ bhë ˗wo ˗maanmaan ˗ni ˈgü ˗a ˗bha ʒiaan ꞊gban ˈka.
43 Dhebɔnën do ˈö ꞊ɲɔɔn ˗bhɔ dhebɔ ˗nu ˗bha ˈˈyua ˗ya ˗kwɛ ˗kɔŋ do ö ga ꞊plɛ (12) kë ˗a ˗bha, ˗yö ˗kun ˗an ˈˈpiʋ̈ mü. Mɛn ˈbhaa ˗kɔ yö ˈti ˗mɔn ˗a ˗dhɛ bo ˗sü ˗bha.
44 ˈYö bɔ Yesu ꞊taabha ˈö ꞊ɲɔɔn ˗a ˗bha, ˈö pa ˗a ˗bha sɔ ˈˈtʋ ˈka. ˗Yö ˗to ˈˈshia˗ mü ˈö ꞊ɲɔɔn ˗yua ˈö kun ˗a ˗bha bhë ˈö bo ˈpapadhö.
45 ˈYö Yesu ˗yö dhɛɛˈˈ kpɔ ˈö˗ pö: «ˈDe ˈö pa n ˈka bhë?» ˈDhɛ ˈö˗ mɛn ˈö ˈdhö ˈö kun ˗a pö ˗ni ˈgü ˈyaa ˗mü, ˈyö Piɛɛ ˗ya pö Yesu ˗dhɛ: «˗Gɔmɛn, ü˗ ˈwɔn ˗dɔ ꞊dhɛ mɛn ˗nu ˗wo ü ˗züzü ꞊va ˈö ˈwo ˗maanmaan ˗ni ˈgü ü ˗bha.»
46 ˈˈKɛɛ ˈyö Yesu ˗ya pö: «Mɛn ˈbhaa ˗ya ˈpa n ˈka, ˈyö ˗tɔ a˗ ˈsuaan˗ ˗bho ꞊dhɛ ꞊faan ˈbhaa ˗ya ˈgo n ˈgü.»
47 ˈDhɛ ˈö dhebɔnën ˗ya yö ꞊dhɛ ö ˗bindhɛ ˈyaa ˈdhö ˈzüdho, ˈyö ˗ya ꞊zii ˗sü ˗bha, ˈyö nu ˈö yö ö kpɔn ˈgü Yesu ꞊gɛnŋdhö, ˈyö ˈpë ˗kë ˈö pa Yesu ˈka waa ˗kɔ ˈö to ˗dhɛ ˈö bhë ˗a ˈgü ˈö˗ ˗dhɛ ˗yö bo ˗a ˈka, ˈö ˗ya ˗a blɛɛˈˈ ˗sü ˗bha mɛn ꞊gban ˈˈpɛpɛ ˈˈɲan ˈˈdhiʋ̈ mü.
48 ˈYö Yesu ˗ya pö ˗a ˗dhɛ: «N ˈdhu, ü ˗bha ˗zoyödhe ˗ya ü dha. Ü ˗bha ˈdho wo ü ˈflëëgü.»
49 ˈWɔn blɛɛˈˈ ˗sü ˗yö ˗to ˗a ˈˈdhi, ˈyö mɛn do ˈö go ˗yakwëë ˗kë ˗a ˈgü ˗kɔ ˈwɔnyëë˗ ˈö bhë ˗a ˗gɔ ˈˈkwɛnŋdhö ˈö nu ˈö˗ pö: «ˈBha ˗dho kwa Dëmɛn ꞊sëëbho ˈˈwɛɛwɛ, ü ˈdhunën ˗wɔn ˗ya kë.»
50 ˈDhɛ ˈö Yesu ˗ya man ˈˈdhʋ̈, ˈyö˗ pö ˗a ˗dhɛ: «ˈˈSuʋ̈ ˈya ˗dho ü kë. ˗Zoyödhe ˗yö kë ü ˗gɔ dosɛnŋ. Ü ˈdhunën ˗dho dha.»
51 ˈDhɛ ˈö ˗lo ˈˈkwɛnŋdhö mü, yö ˈti ˈˈwɩ ˗a ˗bha kö mɛn ˈˈwɛɛ ˈbhaa ˗yö ˗da ö ꞊kee˗ ˈkɔɔ kö yö ˈti kë Piɛɛ, Zan, Zakö waa ˈnën ˈö bhë ˗a dë waa˗ dhe ˗an ˈka.
52 Mɛn ꞊gban ˈˈpɛpɛ ˗kun ˈˈgbʋ bɔ ˗ni ˈgü wo ˗kënŋ ˗ta ˗man ˗sü ˈka, ˈyö sü ꞊dhɛ ˈnën ˈö bhë ˗a ˗bha ga ˗sü ˗yö ˗kun ˗an zuʋ̈ˈˈ ˈˈklʋʋ bhɔ ˗ni ˈgü. ˈˈKɛɛ ˈyö Yesu ˗ya pö ˗an ˗dhɛ: «˗Ka ka ꞊kwaa ˈˈgbʋ ˗zü, ˗a ˗gɛn ˗mü ꞊dhɛ ˈnën ˈö bhë yö ˈti ga, yi ˈnën ˈö˗ zë ˗ni ˈgü.»
53 ˈDhɛ ˈö˗ pö ˈˈdhʋ̈, ˈyö mɛn ˗nu ˈwo bhë ˈwo ˗ya ꞊wɛɛ˗ ˗dɔ ˗a ˗bha ˗sü ˗bha, ˈyö ˗tɔ ˗a ˈwɔn ˗yö ˗kun ˗an ˈˈɲaan ꞊dhɛ ˈnën ˈö bhë ˗ya ga.
54 ˈDhɛ ˈö ˗kë ˈˈdhʋ̈, ˈyö Yesu ˗yö ˗ya ˈnën ˈö bhë ˗a ˗kɔ ˗bha, ˈyö ö ˗wo ˈˈdhiʋ̈ ꞊luu ˈö˗ pö ˗a ˗dhɛ: «N ˗man ˈnën, ˗bhö luuˈˈ!»
55 ˈDhɛ ˈö ˗kë ˈˈdhʋ̈, ˈyö ˈnën ˈö bhë ˈö ˗buö,* ˈö to mü ˈö ꞊luu. ˈYö Yesu ˗ya pö ˗an ˗dhɛ ˗wo ˗bhöpë nu ˗a ˗dhɛ kö ˗ya ˗bhö.
56 ˗A ˗mɛn ˗nu zuʋ̈ˈˈ ˈˈgblü ˗yö ˗dhi ꞊dedewo, ˈö pë ˈwo ˗dho ˗a kë ˈwaa kun ˗a dɔ ˗ni ˈgü. ˈˈKɛɛ ˈyö Yesu ˗ya pö ˗an ˗dhɛ ˈwɔn ˈö ˗kë bhë ˈwa ˗dho ˗a blɛɛˈˈ mɛn ˈˈwɛɛ ˈbhaa ˗dhɛ.
-Zoto -a ˈˈpiʋ̈ -wɔn -nu
^ Ɛɛnˈˈ «ˈö go Madala.»
^ ˗Yö ꞊mɔɔn˗ ˗bha ˈö ˗kë «˗a ˗zuu yaa ˗ya ꞊gwëë ˗a ˈgü ꞊dedewo» ˈka.
^ Ɛɛnˈˈ «ˈö ˗këdhösü ꞊faan ˗yö ˗da ˗a ˈgü ˈzü.»
