Nɔɔn˗ ˗së ˈsëëdhɛ ˈö Lukö ˗ya ˗bɛnzë 9:1-62
-
˗Dhioo ˗nu ˈwo ˗gban ˗zlanwopö ˗sü ˗bha ˈö Yesu ˗yö ˗an dɔ ö ˗bha bɔmɛn ˗nu ˗kɔŋ do ö ga ꞊plɛ ˗ta (1-6)
-
Edhɔdö zuʋ̈ˈˈ ˗yö ˗kaan ˈˈkwöö Yesu ˗wɔn ˈgü (7-9)
-
Yesu ˗yö mɛn ˈˈgblü ˈˈsoodhu (5.000) ˈˈdhi ˗gba (10-17)
-
Piɛɛ ˗ya ˗pö ꞊dhɛ Yesu ˈnën ˈö ˗tɔ Klito (18-20)
-
Yesu ˗yö ö ˗bha ga ˗sü ˗to ˈˈdhiʋ̈ ˈö˗ ˗wɔn ꞊blɛɛ (21, 22)
-
˗Kë Yesu ˗bha gwëëˈˈ ꞊dede ˈka ˗sü (23-27)
-
Yesu ˗bha ˈˈgla kë ˗sü (28-36)
-
ˈNën ˈö ˗zuu yaa ˗yö kun ˗a ˈgü Yesu ˗ya ˗dhɛ ˗bo (37-43a)
-
Yesu ˗yö ö ˗bha ga ˗sü ˗to ˈˈdhiʋ̈ ˈö˗ ˗wɔn ꞊blɛɛ ˈzü (43b-45)
-
Yesu ˗bha gwëëˈˈ ˗nu ˗wo zɔɔdhe ˗man wo ˈˈkwöö kö mɛn ˈö ˗dho kë mɛn ˈkpii˗ ˈka ˈwo˗ dɔ (46-48)
-
Mɛn ˈö yö ˈti nu kwa ˗gɔ, kö ˗yö ˗bɔ kwa ˈka (49, 50)
-
Samadhi ˗pö do ˈbhaa ˈgümɛn ˗nu wo ˈti wo ˗kɔ ˗ya Yesu ˗gɔ (51-56)
-
˗Ʒiö Yesu ꞊kee˗ ˗kɔ (57-62)
9 ꞊Taabha, Yesu ˗yö ö ˗bha bɔmɛn ˗nu ˗kɔŋ do ö ga ꞊plɛ ˈwo bhë ˗an ˗dhɛ wo ˈkwëëdhö, ˈö ˈˈpiigbɩɩdhɛ waa ˗kɔmɔnwɔnbhasü nu ˗an ˗dhɛ kö ˗wo ˗zuu yaa ˗nu bho ˗a ˈka mɛn ˗nu ˈgü, kö ˗wo ˈˈyua bho mɛn ˗nu ˗bha.
2 ˈDhɛ ˈö ö bo, ˈyö ˗an bɔ kö ˗wo ˗Zlan ˗bha ˗Gblüdëdhɛ ˗nɔɔn pö, kö ˗wo mɛn ˗nu ˈö ˈwaa wo ˈflëëgü ˗an ˗dhɛ bo.
3 ˈYö˗ pö ˗an ˗dhɛ: «ˈKaa ˗dho pë ˈbhaa ˈsü ka ˗kɔ ˈˈpiʋ̈ kö ˈka ˈdho ˗a ˈka ˈˈta ˈö bhë ˗a ˈgü. ˈKaa ˗dho ˈˈdhünën, ˗bhöpë ˗da ˗a ˈgü ˈˈkpɔɔ, ˈbluu˗ ɛɛnˈˈ ˈwëëga ˈsü ka ˗kɔ ˈˈpiʋ̈. ˈKaa ˗dho ˈˈbheenën ꞊plɛ ˗naan ˈkun ka ˗kɔ ˈˈpiʋ̈ ˈpö.
4 ˗Dhɛ ˈˈpɛpɛ ˈö ˈka ˗dho ˈdho ˗a ˗bha, mɛn -ya ö ˗kɔ ˗ya ka ˗gɔ ˈö ˗gɔ ˈkɔɔ, ˗ka ˈto ˗a ˗gɔ ˈkɔɔ mü ˗yö ˈdho ˗yö yö ˗a ˈka ka ʒiö ˗yi ˗bha.
5 ˈKa ˈdho ˗dhɛ ˈbhaa ˈgü, mɛn ˗nu ˈwo mü wo ˈti wo ˗kɔ ˗ya ka ˗gɔ, ka ˈgo ˗ni ˈgü ˗a ˈpö˗ ˈö bhë ˗a ˈgü, ˗ka ka ˗gɛn ˗man kö ˈˈsɛ ˈö˗ ˗bha ˈka˗ bho mü kö ˗a ˈwɔn ˗yö kë ˗an ˈˈɲaan ꞊dhɛ ˗Zlan ˗ya wo ꞊kpɔɔ.»
6 ˈDhɛ ˈö ˗kë ˈˈdhʋ̈, ˈyö ˈwo dho ˈwo bɔ ˈpö˗ ˗nu ˗bhüöö ˈˈpiʋ̈ ˈö ˈwo nɔɔn˗ ˗së pö, ˈö mɛn ˗nu ˈö ˈˈyua ˈdhö ˗an ˗bha ˈwo ˗an ˗dhɛ bo ˗dhɛ ꞊gban ˈˈpɛpɛ ˈgü.
7 Edhɔdö* ˈö kun Galile ˈˈsɛ ꞊kɔɔnmɛn ˈka ˈˈtʋ̈ŋ ˈö bhë ˗a ˈgü, ˗yö ˈwɔn ˈˈpɛpɛ ˈö kun kë ˗ni ˈgü bhë ˗an ˗tɔɔ ˗man. ˗A ˗wɔn ˈgü ˗a zuʋ̈ˈˈ ˗yö ˗kaan ˈˈkwöö ꞊dedewo, ˈyö ˗tɔ mɛn ˈbhaa ˗nu ˗wo ˗kun ˗a pö ˗ni ˈgü ꞊dhɛ Zan ˈnën ˈö go ga ˈgü bhë,
8 ˈyö mɛn ˈbhaa ˗nu ˗wa pö ˈzü Edhi ˗mü, ˈyö˗ mɛn ˈˈwɛɛ ˈbhaa ˗nu ˗wa pö ˗Zlan ˗wodhiʋ̈lomɛn ˗nu ˈwo kun ˈˈdhiʋ̈ ˗be bhë ˈyö˗ mɛn do ˗yö go ga ˈgü bhë.
9 ˈYö Edhɔdö ˗ya pö: «ˈMan Zan ˗gɔ ˈˈdhiʋ̈ bho. ˈDhɛ ˈö ˈˈdhʋ̈ ˈsa ˈde ˈö ˈwɔn ˗nu kë ˗ni ˈgü ˈa˗ ˗tɔɔ man ˗ni ˈgü yö?» ˈYö˗ ˈˈslö ꞊mɛɛn kö ˈö ˗kpan ˗a ˗bha.
10 ˈDhɛ ˈö bɔmɛn ˗nu bhë ˈwo wo ꞊yɛɛ ˗kë ˈwo nu, ˈyö ˈwɔn ˈˈpɛpɛ ˈwo˗ ˗kë mü ˈwo˗ ˗gɛn dɔ Yesu ˗dhɛ. ˈDhɛ ˈö ˗kë ˈˈdhʋ̈, ˈyö ˗an sü ˈö dho ˗an ˈka ˈpödhɛ do ˈwo˗ ˗dhɛ Bɛtüsaidö ˗a ˈgü kö waa˗ ˗nu ˈwo ˈto mü wo do ˈka.
11 ˈˈKɛɛ ˈdhɛ ˈö mɛn ꞊va ꞊dede ˗wa ˈwɔn dɔ ˈˈdhʋ̈, ˈyö ˈwo dho ˗an ꞊kee˗. ˗Yö ö ˗kɔ ˗ya ˗an ˗gɔ ˗së ˈka, ˈö ˗ya ˗Zlan ˗bha ˗Gblüdëdhɛ ˗wɔn ˗blɛɛ ˗an ˗dhɛ ˗sü ˗bha. ˈYö mɛn ˗nu ˈö ˈwaa kun wo ˈflëëgü ˈö ˗an ˗dhɛ bo ˈpö.
12 ˈDhɛ ˈö ˈˈdoo ˗yö ˗da, ˈyö Yesu ˗bha bɔmɛn ˗nu ˗kɔŋ do ö ga ꞊plɛ bhë ˈwo nu ˈwo˗ pö ˗a ˗dhɛ: «˗Bhö ü ˗wo bho mɛn ˗nu ˈö ˈwo yö ˗an ˗ta kö ˗wo ˈdho ˈpödhɛ ˗nu waa ꞊gbɛɛgüdhɛ ˗nu ˈwo ˗dhɛ ˈö yö ˗a ˗züzü bhë ˗an ˈgü kö ˗wo wo wɔdhɛ waa wo ˗bhöpë ˗nu mɛɛnˈˈ. ˗A ˗gɛn ˗mü ꞊dhɛ ˈdhɛ ˈö ˈkwa˗ ˗bha yö ˈˈblü ˈˈtʋŋ ˗ta ˗dhɛ ˗mü.»
13 ˈYö Yesu ˗ya pö ˗an ˗dhɛ: «Ka ꞊dede ˗ka ˗bhöpë nu ˗an ˗dhɛ.» ˈYö ˈwo˗ pö ˗a ˗dhɛ: «Kö ˈdho ˈnën ˈyi ˗dho ˗a wo ˗bhöpë ˈdhɔ ˈsa kö ˈkwa˗ nu mɛn ˈˈpɛpɛ ˈwo yö ˗an ˗dhɛ, ˈyaa ˈˈdhʋ̈ ˈbluu˗ bhɛ ˈˈsoodhu waa ˈyuöga ꞊plɛ ˈˈkpaan ˈnën ˗wa ˈto kwa ˗gɔ.»
14 Gɔɔn˗ ˗nu ˈwo kun ˗dhɛ ˈö bhë ˗a ˈgü ˗wo ˗mɔn ˈˈgblü ˈˈsoodhu (5.000) ˗bha. ˈYö Yesu ˗ya pö ö ˗bha gwëëˈˈ ˗nu ˗dhɛ: «˗Ka ˗an dan ˗kɔŋ ˈˈsoodhu (50), ˗kɔŋ ˈˈsoodhu (50), ˈka ˗an ˗ya kpö kpö ˈka.»
15 ˈYö ˈwo˗ ˗kë ꞊dhɛ ˗kɔ ˈö˗ pö ˗a ˈka bhë ˗a ˈdhö, ˈyö mɛn ꞊gban ˈˈpɛpɛ ˗wo ˈɲaannu.
16 ˈDhɛ ˈö ˗kë ˈˈdhʋ̈, ˈyö ˈbluu˗ bhɛ ˈˈsoodhu waa ˈyuöga ꞊plɛ ˈwo bhë ˗an sü, ˈyö ö ˈˈɲan ˈˈdhiʋ̈ ꞊luu dhaŋ˗ ˈgü ˈö ꞊bhɛɛ.* ˈDhɛ ˈö go mü ˈyö ˗an ˈˈkluklu bho ˈö˗ nu ö ˗bha gwëëˈˈ ˗nu ˗dhɛ, kö ˗wo ˗an ˗gblü mɛn ˗nu ˈwo bhë ˗an ˗ta.
17 ˈYö mɛn ꞊gban ˈˈpɛpɛ ˗wo pë ˗bhö ˈö ˗an ˈgwü ˗yö dɔ. ˈYö ˗a ˗dhɛ ˈö to ˈwo˗ ˗lo ˈko ˗ta ˈö ˗kë ꞊töö ˗ɲaan ˗kɔŋ do ö ga ꞊plɛ (12).
18 ꞊Taabha kö Yesu ˗yö bhɛɛˈˈ ˗ni ˈgü ö do ˈka, ˗a ˗bha gwëëˈˈ ˗nu ˗wo ˗nu ˗a ˈˈpiʋ̈ ˈyö dhɛɛˈˈ kpɔ ˗an ˗gɔ ˈö˗ pö: «Mɛn ˗nu ˗bha ˈgü, de ˗mü n ˈka?»
19 ˈYö ˈwo˗ ˗yɔ bɔ ˗a ˗gɔ ˈwo˗ pö: «˗Wa ˗pö Zan mɛnbɔyibhaamɛn ˗mü ü ˈka, ˈˈkɛɛ mɛn ˈbhaa ˗nu ˗wa ˗pö Edhi ˗mü ü ˈka, ˈyö mɛn ˈbhaa ˗nu ˗wa pö ˈzü ˗Zlan ˗wodhiʋ̈lomɛn ˗nu ˈwo kun ˈkpa ˗a mɛn do ˈö go ga ˈgü yö ˗mü ü ˈka.»
20 ˈYö˗ pö ˗an ˗dhɛ: «ˈYö ka ˗zë ꞊wɛ? Ka ˗bha ˈgü de ˗mü n ˈka?» ˈYö Piɛɛ ˗ya ˗yɔ bɔ ˗a ˗gɔ ˈö˗ pö: «Bhi ˈnën ˈü ˗tɔ Klito ˈö ˗Zlan ˗ya bɔ.»
21 ˈDhɛ ˈö ˗kë ˈˈdhʋ̈, ˈyö˗ pö ˗an ˗dhɛ ꞊glɔɔglɔɔdhö ꞊dhɛ ˈwa ˗dho wo ˈˈdhi bho ˗a ˗ta mɛn ˈbhaa ˗dhɛ.
22 ˈYö go mü ˈzü ˈö˗ pö: «Mɛn Gbö ˗dho saanˈˈ ˈsü ꞊dedewo ˈö mɛn zii ˗nu, ˈˈsaabhomɛn ˗nu ˗gɔmɛn ˗nu waa ˈtɔŋ˗ ˗gɔmɛn ˗nu wo ˈti ˗dho ˈˈwɩ ˗a ˗wɔn ˗bha, ˈö ˈwo˗ zë. ˈˈKɛɛ ˗a ˗dhɛkpaɔyi ˗yaaga ˗naan ˈka, ˗yö ˗dho ˈgo ga ˈgü.»
23 ˈDhɛ ˈö ö bo, ˈyö˗ pö mɛn ꞊gban ˈˈpɛpɛ ˈwo kun mü bhë ˗an ˗dhɛ: «Mɛn ˈö˗ ˈˈpiʋ̈ ˈö ʒiö n ꞊kee˗, ˗a dua ˈyaa ˗mü kö ˗yö ˗tosɛta kë ö ˗de ˗bha ˈka ˈzüdho. ˗A dua ˗mü ꞊ʒiaan kö ˗yö ö ˗bha ˗ga ˗a ˗ta ˗dhü ˈsü ˗dhɛkpaɔyi ˈˈpɛpɛ ˈka kö ˗yö ʒiö ˗a ˈka n ˈˈpiʋ̈ ˗kplawo.
24 ˗A ˗gɛn ˗mü ꞊dhɛ mɛn ˈö˗ ˈˈpiʋ̈ ˈö ö ˗de dha ˗a ˗mɛn ˗gɔ ˗dho ˈto ˗a ˈgü. ˈˈKɛɛ mɛn ˈö ga n ˗wɔn ˈgü, yö ˈnën ˈö ˗dho ˗tosɛta kë.
25 Mɛn ˈö ˈˈkpɔnŋtaapë ꞊gban ˈˈpɛpɛ ꞊slɔɔ, ˈˈkɛɛ ˈö ö ˗de ˗da saanˈˈ ˈgü ɛɛnˈˈ ˈö˗ ˗gɔ ˗yö to ˗a ˈgü, kö ˗a ꞊trɔɔn ˗yö ˈˈmɛn?
26 ˗A ˗gɛn ˗mü ꞊dhɛ, mɛn ˈö n ˗wɔn waa n ˈˈdhiwo ˈlëë˗ ˗ya ˗kë, maan mɛn Gbö ˗mɛn, ˗a ˗mɛn ˗dhɛ ˗sü ˈö n ˗man gwëëˈˈ bhë ˗a ˈlëë˗ ˗dho n kë ˈpö ˈˈtʋ̈ŋ ˈa ˗dho nu ˗a ˈka n ˗man ˈtɔbhɔdhe, n Dë ˗bha ˈtɔbhɔdhe waa˗ ˗bha ˈˈkiö ˈˈslʋ̈ʋ̈slʋ̈ ˗nu ˗bha ˈtɔbhɔdhe ˈgü bhë ˗a ˈka.
27 A˗ ˗pö ka ˗dhɛ gagade ˈka ꞊dhɛ, mɛn ˗nu ˈö ˈka yö ꞊dɛɛ, ˗a mɛn ˈbhaa ˗nu wo ˈti ˗dho ga kö wo ˈti ˗kpan ꞊köŋ ˗Zlan ˗bha ˗Gblüdëdhɛ ˗bha.»
28 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈö ˗dhɛkpaɔyi ˈö ˗mɔn ˈˈsaaga ˗bha ˈwo ˗ʒiö, ˈyö Piɛɛ, Zan waa Zakö ˗an sü ˈö dho ˗an ˈka ˗tɔn ˗ta kö ˈö bhɛɛˈˈ.
29 ˈDhɛ ˈö Yesu kun bhɛɛˈˈ ˗ni ˈgü, ˈyö˗ ˈwëëdhɛ ˈbhü ˗yö ˗ya bhɔ ˗sü ˗bha, ˈö˗ ˗bha sɔ ˈbhü ˗yö ˗flʋ̈ ˈpapadhö.
30 ˈWo ˗dho ˈˈkan wo ˗ta kö waa gɔndënën ꞊plɛ ˗wo ˈwɔn blɛɛˈˈ ˗ni ˈgü wo ˈko ˗dhɛ. ˗A mɛn ˗nu ˈwo ˈˈdhʋ̈ ˈyö ˈwo ˗tɔ Moizö waa Edhi.
31 Mɛn ꞊plɛ ˈwo bhë ˗an bunbhadhɛ ˈˈɲan ˗kun bhɔ ˗ni ˈgü. ˈYö Yesu ˗bha ʒiö ˗sü ˈö ˗dho kë Zedhizadhɛmö bhë ˈö ˈwo ˗ya ˗a ˗wɔn blɛɛˈˈ ˗sü ˗bha.
32 ˗A ˈˈtʋ̈ŋ ˈö bhë ˗a ˈgü kö yi ˗ya Piɛɛ waa Yesu ˗bha gwëëˈˈ ˈˈwɛɛ ꞊plɛ ˈwo to bhë ˗an ˈkun ꞊dedewo. ˈˈKɛɛ ˈdhɛ ˈö yi ˗yö go ˗an ˈˈɲan ˈgü ˗së ˈka, ˈyö ˈwo ˗kpan Yesu ˗bha kö ˗a kwi ˈˈɲan ˗yö bhɔ ˗ni ˈgü, kö gɔndë ꞊plɛ ˈwo bhë ˗wo dɔ ˗sü ˈka ˗a ˈˈpiʋ̈ mü.
33 ˈDhɛ ˈö gɔndë ꞊plɛ ˈwo bhë ˈwo Yesu to ˈwo ʒiö ˗ni ˈgü, ˈyö Piɛɛ ˗ya pö Yesu ˗dhɛ: «˗Gɔmɛn, kwa ˗bha ˗kë ˈyö ˗sü ˗yö ˈˈdhiaasü ꞊dedewo. ˈDhɛ ˈö ˈˈdhʋ̈ ˗kwa sɔ ˈkɔ ˗yaaga dɔ ˈyö. Ü ˗bha do, Moizö ˗bha do, Edhi ˗bha do.» ˈˈKɛɛ pë ˈö kun ˗a pö ˗ni ˈgü bhë ˈyaa kun ˗a dɔ ˗ni ˈgü ö ˗de ˗gɔ.
34 Dhiaŋ ˗yö ˗to ˗a ˈˈdhi ˈyö ˈˈdhuu kpö do ˗yö ˗ya nu ˗sü ˗bha ˗an ˗ta. ˈDhɛ ˈö sɔ ˗an ˗ta, ˈyö ˈˈsuʋ̈ ˗yö ˗da ˗an ˈgü ꞊dedewo.
35 ˈYö ˗wo ˈbhaa ˗yö bɔ ˈˈdhuu kpö ˈö bhë ˗a ˈgü ˈö˗ pö: «N Gbö ˈnën ˈö dɔ bhë, yö ˈnën ˈa n ˗kɔ ˗yɛ ˗a ˗bha. ˗Ka ka ˈˈtʋ ˈto ˗a ˗wo ˗bha.»
36 ˈDhɛ ˈö ˗wo ˈö bhë ˈö kun ˈˈwɩ ˗ni ˈgü, ˈyö ˈwo˗ yö ꞊dhɛ Yesu ˗ya ˈto ö do ˈka. ˈWɔn ˈö Yesu ˗bha gwëëˈˈ ˗nu bhë ˈwo˗ yö bhë, wo ˈti wo ˈˈdhi bho ˗a ˗ta mɛn ˈbhaa ˗dhɛ ˈˈtʋ̈ŋ ˈö bhë ˗a ˈgü.
37 ˈDhɛ ˈö˗ ˗ta ˗dhɛ ˗yö ꞊kpɔɔ ˈö ˈwo kun yɔɔˈˈ ˗ni ˈgü ˗tɔn ˗bha, ˈyö mɛn ꞊va ꞊dede ˗wo nu Yesu ˗gɔ ʒiaan˗.
38 ˈYö gɔndë do ˗yö bɔ mɛn ˗nu ꞊zinŋgü mü ˈö ˗gbla ˈˈgbɩɩ˗ ˈö˗ pö: «˗Gɔmɛn, bhɛɛˈˈ ˈnën ˈa˗ wo ü ˗dhɛ, dɔ ˈˈgbɩɩ˗ ü n gbö ˗takun.* ˈNën ga dosɛnŋ ˈö n ˗gɔ yö ˗mü.
39 ˗Ya kë ˗nu wo ˗zuu yaa ˗yö ˗da ˈnën ˈö bhë ˗a ˈgü ˈö ˗ya ˈˈgbla ˗sü ˗bha, ˈö˗ ˗zuuzuu ˈˈgbɩɩ˗, ˈö˗ ˈˈdhidhi ˗yö ˗ya bhɔ ˗sü ˗bha. ˗A ˗go ˗a ˈgü ˗sü ˗yö ˈˈgbɩɩ˗, ˈˈsanni ˗yö ˈgo ˗a ˈgü kö ꞊yaa˗ ˗gi.
40 A ˗bhɛɛ ü ˗bha gwëëˈˈ ˗nu ˗dhɛ kö ˗wo ˗zuu yaa ˈö bhë ˗a bho ˗a ˈgü, ˈˈkɛɛ ˗an ˗kɔ yö ˈti ˗mɔn ˗a ˗bha.»
41 ˈYö Yesu ˗ya pö: «ˈˈTʋ̈ŋ ˈö yö ˗a ˈgümɛn ˗nu ˈö ˗zoyödhe ˈyaa ka ˗gɔ, ˈö ka ꞊suu ˈdhö ˈya˗ bhë, ˈˈtʋ̈ŋ ꞊dhɛ ˈö ˗ya ˈto kö ˈa˗ kë ka ˈˈpiʋ̈ ˈzü? A ꞊kun ka ꞊kwɛɛ˗ ˈgbinŋ˗ bun ˈˈtʋ̈ŋ ꞊dhɛ ˈˈpiʋ̈ ˈzü? ˗Bhö nu ü ˗bha ˈnën ˈö bhë ˗a ˈka yö.»
42 ˈDhɛ ˈö ˈnën ˈö bhë ˈö ꞊ɲɔɔn ˗ni ˈgü Yesu ˗bha, ˈyö ˗zuu yaa ˗ya ˗zuö ˈˈshia˗ ˈö˗ ˗zuuzuu ˈˈgbɩɩ˗. ˈDhɛ ˈö ˗kë ˈˈdhʋ̈, ˈyö Yesu ˗yö ˗gbla ˗zuu yaa ˈö bhë ˗a ˗ta, ˈyö ˈnën ˈö bhë ˗a ˗dhɛ bo ˈö˗ nu ˗a dë ˗dhɛ.
43 ˈYö ˗Zlan ˗bha ˈˈpiigbɩɩdhɛ ˗zizisü ˈö bhë ˗a ˈwɔn ˗yö mɛn ꞊gban ˈˈpɛpɛ kun.
ˈDhɛ ˈö ˗kë ꞊dhɛ ˈwɔn ˗nu ˈö Yesu ˗yö kun ˗an kë ˗ni ˈgü bhë ˗a ˈwɔn ˗yö ˗kun mɛn ꞊gban ˈˈpɛpɛ ˈkun ˗ni ˈgü, ˈyö˗ pö ö ˗bha gwëëˈˈ ˗nu ˗dhɛ:
44 «ˈWɔn ˈa dho ˗a pö yö ˗ka ka ˈˈtʋ ˈto ˗a ˗bha ˗së ˈka kö ˗yö ˈto ka ˈˈɲaan. ˗Wo ˗dho mɛn Gbö ˈˈdhoodɔ mɛnbhɩɩdhe ˗nu ˗gɔ.»
45 ˈˈKɛɛ pë ˈö kun ˗a pö ˗ni ˈgü ˗an ˗dhɛ bhë, ˈwaa kun ˗a ˈgüman ˗ni ˈgü. ˗A ˗gɛn ˗mü ꞊dhɛ ˗wo ˈö bhë ˗a ˈklɔɔ˗ ˗yö ˗kun ˗bin ˗sü ˈka ˗an ˗gɔ kö ˈwa ˗dho ˗a ˈgüman. ˈˈKɛɛ Yesu dhɛɛˈˈ ˈkpɔ ˗sü ˈˈsuʋ̈ ˗yö ˗kun ˗an kë ˗ni ˈgü.
46 ꞊Taabha, Yesu ˗bha gwëëˈˈ ˗nu ˗wo zɔɔdhe ˗man wo ˈˈkwöö kö mɛn ˈö mɛn ˈkpii˗ ˈka wo ꞊zinŋgü ˈwo˗ dɔ.
47 ˈDhɛ ˈö ˗kë ꞊dhɛ Yesu ˗yö ˗an zuʋ̈piʋ̈wɔn ˗dɔ bhë, ˈyö ˈnën ˈˈtɩtɩ do sü ˈö˗ dɔ ö ˈˈsuee,
48 ˈyö˗ pö ˗an ˗dhɛ: «Mɛn ˈö ˗dho ö ˗kɔ ˗ya ˈnën ˈˈtɩtɩ ˈö ˗kë ꞊dhɛ ˈnën ˈö yö ˗a ˈdhö* ˗a ˗gɔ n ˈtɔ ˗wɔn ˈgü, kö ˗ya ö ˗kɔ ˗ya n ˗gɔ ˈpö. ˈYö mɛn ˈö ö ˗kɔ ˗ya n ˗gɔ, kö ˗ya ö ˗kɔ ˗ya ˈpö mɛn ˈö n bɔ bhë ˗a ˗gɔ. ˗A ˗gɛn ˗mü ꞊dhɛ mɛn ˈö ö ˗de ˗kë ˈˈtɩtɩ* ka ꞊zinŋgü, yö ˈnën ˈö ˗tɔ mɛn ˈkpii˗.»
49 ˈYö Zan ˗ya pö Yesu ˗dhɛ: «˗Gɔmɛn, yi ˗kpan mɛn do ˈbhaa ˗bha kö ˗yö ˗zuu yaa ˗nu bho ˗ni ˈgü mɛn ˗nu ˈgü ü ˈtɔ ˈgü, ˈyö ˈyi˗ pö ˗a ˗dhɛ ˈya ˗dho ˗a kë ˈˈdhʋ̈, ˗a ˗gɛn ˗mü ꞊dhɛ ˈyaa kwa ꞊kee˗.»
50 ˈˈKɛɛ ˈyö Yesu ˗ya pö ˗a ˗dhɛ: «˗Ka ka ꞊kwaa˗ ˗zü, ˗a ˗gɛn ˗mü ꞊dhɛ mɛn ˈö yö ˈti nu ka ˗gɔ, kö ˗yö ˗bɔ ka ˈka.»
51 ˈDhɛ ˈö ˗kë ꞊dhɛ Yesu ˗bha ˗dho dhaŋ˗ ˈgü ˗sü ˈˈtʋ̈ŋ ˗yö ˗kun ˗wo* ˗ni ˈgü bhë, ˗yö ˗kun ˗a ˈˈpiʋ̈ ꞊dedewo ꞊dhɛ ˈö ˈdho Zedhizadhɛmö.
52 ˈDhɛ ˈö ˗kë ˈˈdhʋ̈, ˈyö ö ˗bha gwëëˈˈ ˈbhaa ˗nu bɔ kö ˗wo dɔ ö ˗dhɛ ˈˈdhiʋ̈. ˈYö ˈwo dho ˈwo ˗da Samadhi ˗pö do ˈbhaa ˈgü kö ˈwo ˈwɔn ꞊gban ˈˈpɛpɛ ˗mɔn ˈˈkwöö kö ˗yö ꞊kun nu.
53 ˈˈKɛɛ ˈdhɛ ˈö ˈpömɛn ˗nu ˗wa man ꞊dhɛ Yesu ˗kun ˈdho* ˗ni ˈgü Zedhizadhɛmö, wo ˈti wo ˗kɔ ˗ya ˗a ˗gɔ.
54 ˈDhɛ ˈö Zakö waa Zan ˈwo ˗kë ˗a ˗bha gwëëˈˈ ˗nu ˈka bhë ˈwo˗ yö ˈˈdhʋ̈, ˈyö ˈwo˗ pö: «Dëmɛn, ˈü˗ ˈˈpiʋ̈ ˈyi ˈˈshiʋ̈ ˗dhɛ kö ˗yö ˈgo dhaŋ˗ ˈgü ˗yö ˗an ˈgü shiʋ̈ˈˈ ˗ee?»
55 ˈˈKɛɛ ˈyö Yesu ˗yö ꞊slëë ö ˗zü ˈö ˗an ˗ga, ˈö ˈwɔn ˗da ˗an ˈka.
56 ˈDhɛ ˈö ˗kë ˈˈdhʋ̈ ˈyö ˈwo go ˗dhɛ ˈö bhë ˗a ˈgü, ˈö ˈwo dho ˈpödhɛ do ˈˈwɛɛ ˈbhaa ˈgü.
57 ˈDhɛ ˈwo kun ˈdho ˗ni ˈgü, ˈyö mɛn do ˈbhaa ˗ya pö ˗a ˗dhɛ: «˗Dhɛ ˈˈoo ˗dhɛ ˈü dho ˗a ˗bha, a ˗dho ʒiö ü ꞊kee˗.»
58 ˈˈKɛɛ ˈyö Yesu ˗ya pö ˗a ˗dhɛ: «Diɔŋ ˗nu* ˗du ˗yö ˗dhö. ˗Mannën ˗nu ˈwo dhaŋ˗ ˈgü ˗an ˈkɔ ˗yö ˗dhö ˈpö. ˈˈKɛɛ maan mɛn Gbö ˗mɛn ˗zë, n ˗de ˗bha ˈkɔ ˈa dho wɔ ˗a ˈgü* ˈyaa ˈdhö.»
59 ˈYö go mü ˈö˗ pö mɛn do ˈˈwɛɛ ˈbhaa ˗dhɛ: «˗Bhö ʒiö n ꞊kee˗.» ˈYö˗ mɛn ˈö bhë ˈö˗ pö ˗a ˗dhɛ: «N Dëmɛn, ˗bhö ˈˈwɩ ˗a ˗bha kö ˈa ˈdho ꞊köŋ ˈa n dë ˗wɛɛ bho.»
60 ˈˈKɛɛ ˈyö Yesu ˗ya pö ˗a ˗dhɛ: «Ü ꞊kwaa gamɛn ˗nu ˗zü kö ˗wo wo ˈko ˗nu ˗wɛɛ bho. Bhi ˗zë ˗bhö ˈdho ˈü ˗Zlan ˗bha ˗Gblüdëdhɛ ˗nɔɔn pö ˗dhɛ ꞊gban ˈgü.»
61 ˈYö˗ mɛn do ˈˈwɛɛ ˈbhaa ˗ya pö Yesu ˗dhɛ: «N Dëmɛn, a ˗dho ʒiö ü ꞊kee˗. ˈˈKɛɛ ˗bhö ˈˈwɩ ˗a ˗bha ˈa ˈdho ꞊köŋ ˈa n ˗wo ˗da n ˗man ˈkɔdhigümɛn ˗nu ˗dhɛ.»
62 ˈYö Yesu ˗ya pö ˗a ˗dhɛ: «ˈˈKöö ˈwo˗ ˗klu ˗du ˗bha ˈwo ˗dhɛ bɔ ˗a ˈka bhë, mɛn ˈö ö ˗kɔ ˗da ˗a ˈgü ˈˈkɛɛ ˈö ˗dhɛ ˗ga ö ꞊taabha, kö ˗da ˗Zlan ˗bha ˗Gblüdëdhɛ ˈgü ˗mɛn ˈyaa ˗mü.»
-Zoto -a ˈˈpiʋ̈ -wɔn -nu
^ ˗Wo ˗we «Edhɔdö Antipasö ˈka.»
^ Glɛkö ˗wo ˈgü ˈyö ˗tɔ «ˈö ˈdhuëë˗ kpɔ ˗an ˗bha.»
^ Glɛkö ˗wo ˈgü ˈyö ˗tɔ «-ga.»
^ Glɛkö ˗wo ˈgü ˈyö ˗tɔ «ˈnën ˈˈtɩtɩ ˈö yö.»
^ Glɛkö ˗wo ˈgü ˈyö ˗tɔ «˗bhaasü.»
^ Glɛkö ˗wo ˈgü ˈyö ˗tɔ «yö ˗ni ˈgü ˈkodhiʋ̈.»
^ Glɛkö ˗wo ˈgü ˈyö ˗tɔ «˗yö ˗kun ö wë dɔ ˗ni ˈgü.»
^ Ɛɛnˈˈ «ˈˈSakpadë ˗nu.»
^ Ɛɛnˈˈ «n ˗gɔ wɔdhɛ.»
