Nɔɔn˗ ˗së ˈsëëdhɛ ˈö Makö ˗ya ˗bɛnzë 10:1-52
-
Dhe ˈsü ˗sü waa dhe ˗bho ˈˈblü ˗sü (1-12)
-
Yesu ˗yö ˈdhuëë˗ ˗kpɔ ˈnën ˈsɛɛn˗ ˗nu ˗bha (13-16)
-
꞊Bhɔɔmɛn do ˗bha dhɛɛˈˈ ˈö˗ kpɔ Yesu ˗gɔ (17-25)
-
Pë ˈbhaa ˗nu ˈto ˗sü ˈö ˗Zlan ˗bha ˗Gblüdëdhɛ ˗wɔn ˈgü (26-31)
-
Yesu ˗yö ö ˗bha ga ˗sü ˗to ˈˈdhiʋ̈ ˈö˗ ˗wɔn ꞊blɛɛ ˈzü (32-34)
-
Zakö waa Zan ˗wo pë ˈbhaa ˗gbadhɛ Yesu ˗gɔ (35-45)
-
Yesu ˗yö ö ˗de ˗nu mɛn ꞊va ꞊dede ˗gɔtadhɔpë ˈka (45)
-
-
Yesu ˗yö Batime ˈˈɲan ˗pʋ (46-52)
10 ˈDhɛ ˈö Yesu ˗yö go ˗dhɛ ˈö bhë ˗a ˈgü, ˈyö Zuudɛn ga ˗kan ˈö dho Zude ˗sɛ ˈˈpian ˈö˗ ꞊taabha bhë ˗a ˈgü. ˈYö mɛn ꞊va ꞊dede ˗wo nu wo ˈkwëëdhö ˗a ˈˈpiʋ̈ mü ˈzü, ˈyö ˗ya ˗an ꞊klaŋ kë ˗sü ˗bha ꞊dhɛ ˗kɔ ˈö˗ ˗kë ˗a ˈka ˗kplawo bhë ˗a ˈdhö.
2 ˈYö Fadhiziɛn ˗nu ˗wo ꞊ɲɔɔn ˗a ˗bha kö ˈwo˗ ˈgü dan. ˈYö ˈwo˗ dhɛɛˈˈ kpɔ ˈö ˈwo˗ pö: «˗A ˗dhɛ ˗a ˗bha kö mɛn ˗yö ö ˗bha dhebɔ bho ˈˈblü ˗ee?»
3 ˈYö Yesu ˗ya pö ˗an ˗dhɛ: «ˈMën ˈö Moizö ˗ya pö ˈka˗ kë?»
4 ˈYö ˈwo˗ ˗yɔ bɔ ˗a ˗gɔ ˈwo˗ pö: «Moizö ˗ya ˗pö ˗wo ꞊mɔɔn˗ ˗bha ˈwo dhe ˗bho ˈˈblü ˈsëëdhɛ ˗kë ˈwo˗ kpa ˗a ˗bha, ˈö ˈwo˗ bho ˗a ˈka ˈˈblü.»
5 ˈˈKɛɛ ˈyö Yesu ˗ya pö ˗an ˗dhɛ: «Ka ˈˈtʋ ˈö ˗kë ˈˈgbɩɩ˗ bhë yö ˈnën ˈö˗ ˗wɔn ˈgü ˈö Moizö ˗yö ˈtɔŋ˗ ˈö bhë ˗a ˗bɛnzë ka ˗bha ˈka.
6 ˈYaa˗ ˈka, ˗a züdɔdhɛ ˈgü, ‹˗Zlan ˗yö ˗an ˗da, ˈö ˗an ˗kë gɔɔn˗ waa dhebɔ ˗an ˈka.
7 Yö ˈnën ˈö˗ ˗wɔn ˈgü ˈö gɔɔn˗ dho ˈgo ö dë waa ö dhe ˗an ˗bha,
8 ˈö waa ö ˗bha dhebɔ* ˈwo ˗kë mɛn ˗dhü do ˈka.› ˗Ya kë ˈˈdhʋ̈ kö ˈwaa mɛn ꞊plɛ ˈka ˈzü, kö ˗wa kë mɛn ˗dhü do ˈka.
9 ˈDhɛ ˈö ˈˈdhʋ̈, pë ˈö ˗Zlan ꞊yaa˗ ꞊nënŋ ˈkwëë˗ mɛn ˈbhaa ˈya ˗dho ˗a ˈˈkan ˈkwëë˗.»
10 ˈDhɛ ˈwo dho ˈkɔɔ ˈzü, ˈyö˗ ˗bha gwëëˈˈ ˗nu ˗wo ˗ya dhɛɛˈˈ ˈkpɔ ˗sü ˗bha ˗a ˗gɔ pë ˈö˗ pö bhë ˗a ˗gɛn ˈka.
11 ˈYö˗ pö ˗an ˗dhɛ: «Mɛn ˈö ö ˗bha dhebɔ bho ˈˈblü, ˈö dho ˈö dhe ˈˈwɛɛ sü, kö ˗ya ö ˗bha dhebɔ ˈto ˗ya niënŋˈˈ ˈnën bhë.
12 Dhebɔ ˈö go ö ꞊gɔn ˗gɔ ˈpö, ˗ya ˈdho ˗ya gwaan˗ ˗dɛɛ ˈkpɔ, kö ˗ya ö ꞊gɔn ˈto ˗ya niënŋˈˈ ˈnën bhë.»
13 Mɛn ˗nu ˗wo ˗ya nu ˗sü ˗bha wo ˗bha ˈnën ˈsɛɛn˗ ˗nu ˈka ˗a ˈˈpiʋ̈ kö ˗yö ö ˗kɔ ˈpa ˗an ˈka. ˈˈKɛɛ ˈyö˗ ˗bha gwëëˈˈ ˗nu ˗wo ˗an ˈˈdhiʋ̈ ˗blü.
14 ˈDhɛ ˈö Yesu ˗ya yö ˈˈdhʋ̈, ˈyö ˗shiö ˗a ˗dhɛ ˈö˗ pö ö ˗bha gwëëˈˈ ˗nu ˗dhɛ: «˗Ka ka ꞊kwaa ˈnën ˈsɛɛn˗ ˗nu ˗zü kö ˗wo nu n ˈˈpiʋ̈, ˈka ˗dho ˗an kë. ˗A ˗gɛn ˗mü ꞊dhɛ ˗Zlan ˗bha ˗Gblüdëdhɛ ˗yö mɛn ˗nu ˈwo ꞊dhɛ ˗an ˈdhö ˗an ˗bha ˈka.
15 A˗ ˗pö ka ˗dhɛ gagade ˈka ꞊dhɛ, mɛn ˈö yö ˈti ö ˗kɔ ˗ya ˗Zlan ˗bha ˗Gblüdëdhɛ ˗gɔ ꞊dhɛ ˈnën ˈˈtɩtɩ ˈdhö, yö ˈti ˗dho ˗da ˗a ˈgü toŋtoŋdhö.»
16 ˈYö Yesu ˗yö ö ˗kɔ ˗da ˈnën ˗nu ˈwo bhë ˗an ˈgü, ˈyö ö ˗kɔ ˗ya ˗an ˗ta ˈö ˈdhuëë˗ kpɔ ˗an ˗bha.
17 ˈDhɛ ˈö Yesu ˈdhö ˈgo ˗ni ˈgü ˗dhɛ ˈö bhë ˗a ˈgü ˈö ʒiö ˗ni ˈgü, ˈyö gɔndënën do ˗yö nu ˗bia ˈka ˈö yö ö kpɔn ˈgü ˗a ˈwëëdhö, ˈyö˗ pö ˗a ˗dhɛ: «˗Gɔmɛn këwɔn ˗së ˗sü, ˈmën ˈö n dua ˈdhö ˗mü kö ˈa˗ kë kö ˗tosɛta ˈö ˈyaa ɲën ˈa˗ ꞊slɔɔ?»
18 ˈYö Yesu ˗ya pö ˗a ˗dhɛ: «ˈMën ˈö ˗kë ˈö ˈü n ˗dhɛ këwɔnsëmɛn? Këwɔnsëmɛn ˈˈwɛɛ ˈbhaa ˈyaa ˈdhö kö yö ˈti kë ˗Zlan dosɛnŋ ˈka.
19 ˈTɔŋ˗ ˗nu ˈö ˈwo˗ pö: ‹Ü dua ˈyaa ˗mü kö ˈü mɛn zë, ü dua ˈyaa ˗mü kö ˈü ü ˗bha dhebɔ ɛɛnˈˈ ü ꞊gɔn ˈto ˈü niënŋˈˈ, ü dua ˈyaa ˗mü kö ˈü ꞊kwaan, ü dua ˈyaa ˗mü kö ˈü ꞊sua ˗wɔn ˗ya mɛn ˗bha, ü dua ˈyaa ˗mü kö ˈü mɛn ˗nu ˗bha pë ˈsü ˗an ˗gɔ ꞊flüü ˈka, ˗bhö ü dë waa ü dhe ˗an ꞊bhlëë ˗ya› bhë, ü ˗an ˗dɔ.»
20 ˈYö˗ gɔndënën ˗ya pö Yesu ˗dhɛ: «˗Gɔmɛn, ˈö go n ˈnëndhɛ ˗bha ˈö yö ˗a ˈka ꞊dɛɛ ˗bha, a ˈtɔŋ˗ ˗nu ˈwo bhë ˗an ꞊gban ˗ya ꞊bhlëë ˈgü.»
21 ˈDhɛ ˈö˗ gɔndënën ˗ya pö ˈˈdhʋ̈, ˈyö Yesu ˗yö ˗a ˗ga, ˈyö˗ ˗dhɔ ˗yö ˗da ˗a ˈgü ˈö˗ pö ˗a ˗dhɛ: «Pë dosɛnŋ ˈö˗ ˗wɔn ˗ya ˈto ü ˗bha ˈyö ꞊nɛn: ˗Bhö ˈdho kö pë ꞊gban ˈˈpɛpɛ ˈwo ü ˗gɔ ˈü ˗an ˈˈdhoodɔ kö ˈü˗ ˈwëë˗ nu ˈˈfleemɛn ˗nu ˗dhɛ. ˗Ya kë ˈˈdhʋ̈, ˈyö ˈü ˗dho ꞊nɔɔn ˈö˗ ꞊bhlëë ˈdhö ꞊va ˗a ꞊slɔɔ dhaŋ˗ ˈgü. ˈBha ü bo kö ˈü nu ˈü ʒiö n ꞊kee˗.»
22 ˈˈKɛɛ ˈdhɛ ˈö˗ gɔndënën ˗yö Yesu ˗wo ˈö bhë ˗a man, ˈyö to mü ˈö˗ ˗ta ˗yö ˗kë ˗saa ˈö ˗ʒiö. ˗A ˗gɛn ˗mü ꞊dhɛ ꞊nɔɔn ˗yö ˗kun ˗a ˗gɔ ꞊va ꞊dedewo.
23 ˈDhɛ ˈö ˗kë ˈˈdhʋ̈, ˈyö Yesu ˗yö ˗dhɛ ˗ga ö ˗züzü ˈö˗ pö ö ˗bha gwëëˈˈ ˗nu ˗dhɛ: «˗Da ˗Zlan ˗bha ˗Gblüdëdhɛ ˈgü ˗sü ˗dho kë ˈˈgbɩɩ˗ ꞊nɔɔnmɛn ˗nu ˗gɔ.»
24 ˈDhɛ ˈö˗ pö ˈˈdhʋ̈, ˈyö˗ ˈwɔn ˗yö ˗a ˗bha gwëëˈˈ ˗nu kun ꞊dedewo. ˈˈKɛɛ ˈyö Yesu ˗ya pö ˗an ˗dhɛ ˈzü: «N ˗man ˈnën ˗nu, ˗da ˗Zlan ˗bha ˗Gblüdëdhɛ ˈgü ˗sü ˗yö ˈˈgbɩɩ˗.
25 ꞊Nɔɔnmɛn ˗bha ˗da ˗Zlan ˗bha ˗Gblüdëdhɛ ˈgü ˗sü ˗yö ˈˈgbɩɩ˗ ˈö ˗ʒiö ˗a ˈka ꞊ɲɔɔnmian ˗bha ˗bɔ mɛnŋga ˈˈdhi ˈgü ˗sü ˗ta.»
26 ˈYö˗ ˈwɔn ˗yö ˗a ˗bha gwëëˈˈ ˗nu kun ˈzü ꞊dedewo, ˈö ˈwo˗ pö ˗a ˗dhɛ:* «De ˈö ꞊mɔɔn˗ ˗bha ˗yö dha ˈsa?»
27 ˈYö Yesu ˗yö ˗an ˗ga ˗an ˈwëëdhö ˗pinŋdhö ˈö˗ pö ˗an ˗dhɛ: «Mɛnbhɩɩdhe ˗bha ˈgü ˈyaa ꞊mɔɔn˗ ˗bha kö ˗yö kë, ˈˈkɛɛ ˗Zlan ˗zë ˈyaa˗ yö ˈˈdhʋ̈, ˗a ˗gɛn ˗mü ꞊dhɛ ˗a ˗kɔ ˗yö ˗mɔn ˈwɔn ꞊gban ˈˈpɛpɛ kë ˗sü ˗bha.»
28 ˈYö Piɛɛ ˗ya pö Yesu ˗dhɛ: «ˈYö mɛn ˈkö yi ˗zë ˈya yi ˗bha pë ˈˈpɛpɛ ˈto ˈya ʒiö ü ꞊kee˗ yö ꞊wɛ?»
29 ˈYö Yesu ˗ya pö: «A˗ ˗pö ka ˗dhɛ gagade ˈka ꞊dhɛ mɛn ˈö zë n ˗wɔn waa nɔɔn˗ ˗së ˗wɔn ˗dhɛ ˈö ö ˗bha ˈkɔ, ö ꞊dhegblü gɔɔn˗ ˗nu, ö ꞊dhegblü dhoo ˗nu, ö dhe, ö dë, ö ˗bha ˈnën ˗nu ɛɛnˈˈ ö ˗bha ˈbhladhɛ ˗nu to,
30 ˗a ˗mɛn ˗dho ˈkɔ ˗nu, ö ꞊dhegblü gɔɔn˗ ˗nu, ö ꞊dhegblü dhoo ˗nu, ö dhe ˗nu, ˈnën ˗nu waa ˈbhladhɛ ˗nu ˈö ˗an to bhë, ˗an ˗gwaa këŋ do (100) ꞊slɔɔ ˈˈklʋʋbhɔdhe ˈgü ꞊dɛɛ, ˈö go mü ˈzü ˈö ˗tosɛta ˈö ˈyaa ɲën ˗a ꞊slɔɔ ˗dhɛkpaɔ ˈˈdhiʋ̈* ˈgü.
31 ˈˈKɛɛ mɛn ˗nu ˈö ˈwo mɛn ˗blɛɛsü ˗nu ˈka ˈˈtʋ̈ŋ ˈö yö ˗a ˈgü, ˗an ꞊vadhɛ ˗dho ˈto ꞊taabha, ˈö mɛn ˗nu ˈwo ꞊taabha ˈwo ˗kë mɛn ˗blɛɛsü ˗nu ˈka.»
32 ˈDhɛ ˈö ˗kë ˈˈdhʋ̈, ˈyö ˈwo ˗ya ˈdho ˗sü ˗bha Zedhizadhɛmö, ˈyö Yesu ˗yö yö ˗an ˗dhɛ ˈˈdhiʋ̈, ˈyö˗ ˈwɔn ˗yö ˗a ˗bha gwëëˈˈ ˗nu kun ꞊dedewo. ˈˈKɛɛ ˈyö ˈˈsuʋ̈ ˗yö ˗da mɛn ˗nu ˈö ˈwo kun ʒiö ˗ni ˈgü ˗an ꞊kee˗ bhë ˗an ˈgü. ˈYö Yesu ˗yö ö ˗bha bɔmɛn ˗nu ˗kɔŋ do ö ga ꞊plɛ ˈwo bhë ˗an ˈsü ˈzü ꞊plɛdhe ˈgü, ˈyö ˈwɔn ˗nu ˈwo ˗dho kë ˗a ˈka bhë, ˈö ˗ya ˗a blɛɛˈˈ ˗sü ˗bha ˗an ˗dhɛ ˈö˗ pö:
33 «˗Ka ka ˈˈtʋ ˈto! ˈDho ˈö ˈkwa˗ wo ˗ni ˈgü Zedhizadhɛmö bhë, ˗wo ˗dho mɛn Gbö ˈˈdhoodɔ ˈˈsaabhomɛn ˗nu ˗gɔmɛn ˗nu waa ˈtɔŋ˗ ˗gɔmɛn ˗nu ˗gɔ. ˗Wo ˗dho za yaa dɔ ˗a ˗bha kö ˗wa zë, ˈö ˈwo˗ ˗da ˈˈsɛ ˈˈwɛɛ ˈgümɛn ˗nu ꞊kwɛɛ˗
34 ˈö ˈwo ꞊wɛɛ˗ dɔ ˗a ˗bha, ˈö ˈwo wo ˈˈdhidhi bho ˗a ˗bha, ˈö ˈwo˗ ˗man ˗klaaga ˈka ˈö ˈwo˗ zë. ˈˈKɛɛ ˗a ˗dhɛkpaɔyi ˗yaaga ˗naan ˈka, ˗yö ˗dho ˈgo ga ˈgü.»
35 ˈDhɛ ˈö ˗ya ö bo ˗kë ˈˈdhʋ̈ ˗sü ˈka, ˈyö Zakö waa Zan ˈwo ˗kë Zebede gbö ˗nu ˈka bhë, ˈwo ꞊ɲɔɔn Yesu ˈˈsuee ˈö ˈwo˗ pö ˗a ˗dhɛ: «˗Gɔmɛn, yi ˈˈpiʋ̈ kö pë ˈyi ˗dho ˗a ˗gbadhɛ ü ˗gɔ bhë, ˈü dɔ ˈˈgbɩɩ˗ ˈü˗ kë yi ˗dhɛ.»
36 ˈYö Yesu ˗ya pö ˗an ˗dhɛ: «ˈMën ˈka˗ ˈˈpiʋ̈ kö ˈa˗ kë ka ˗dhɛ?»
37 ˈYö ˈwo˗ pö ˗a ˗dhɛ: «˗Bhö ˈˈwɩ ˗a ˗bha kö ü ˗bha ˗gblüdëdhɛ ˈˈtʋ̈ŋ ˈka, mɛn ꞊plɛ ˈyi yö, mɛn do ˗yö ˗ya ü ˗kɔ ˗së ˈgü, kö mɛn do ˗yö ˗ya ü ꞊kwaa˗ ˈgü.»
38 ˈˈKɛɛ ˈyö Yesu ˗ya pö ˗an ˗dhɛ: «ˈPë ˈka˗ ˗gbadhɛ ˗ni ˈgü bhë ˈkaa˗ dɔ. ˈPë ˈa˗ ˈˈyi mü ˗ni ˈgü bhë, ka ꞊mɔɔn˗ ˗bha ˈka˗ mü ˗ee? Ɛɛnˈˈ ˗bɔ ˈˈyi ꞊bhaa ˗kɔ ꞊suu ˈa˗ wo ˗ni ˈgü bhë, ka ꞊mɔɔn˗ ˗bha ˈka˗ wo ˗ee?»
39 ˈYö ˈwo˗ ˗yɔ bɔ ˗a ˗gɔ ˈwo˗ pö: «꞊Ii, yi ˗mɔn ˗a ˗bha.» ˈYö Yesu ˗ya pö ˗an ˗dhɛ: «˗Yö ˈˈdhʋ̈, ˈpë ˈa˗ ˈˈyi mü ˗ni ˈgü bhë ka ˗dho ˗a mü ˈpö, ˈö ˗bɔ ˈˈyi ꞊bhaa ˗kɔ ꞊suu ˈa˗ wo ˗ni ˈgü bhë, ˈka˗ wo ˈpö.
40 ˈˈKɛɛ ˗a ˈdhɛ ˈö ˗gban mɛn ˗bha ˗ya n ˗kɔ ˗së ɛɛnˈˈ n ꞊kwaa˗ ˈgü ˗sü ˗bha, ˈmaan ˈnën ˈö sü n ˗bha. Mɛn ˗nu ˈö ˗yadhɛ bhë ˈö ˗pë kë ˗sü ˈka ˗an ˗bha ˈka, ˈyö ˈwo ˗dho ˗ya mü.»
41 ˈDhɛ ˈö gwëëˈˈ ˗nu ˗kɔŋ do ˈwo to ˈwo˗ man, ˈyö ˈwɔn ˗yö ˗shiö ˗an ˗dhɛ Zakö waa Zan ˗an ˗bha.
42 ˈˈKɛɛ ˈyö Yesu ˗yö ˗an ˗dhɛ ˈö˗ pö ˗an ˗dhɛ: «Ka˗ ˈwɔn ˗dɔ ꞊dhɛ mɛn ˗nu ˈwo ˗an yö ꞊dhɛ ˈˈsɛkɔɔnmɛn ˗nu ˈdhö bhë, ˗wo ˗ya ˈˈsɛgümɛn ˗nu ˗gɔ ˗ta, ˈö mɛn ˗nu ˈö ˗duɛɛ ˈkpii˗ ˈdhö ˗an ˗gɔ ˈwo mɛn ˗nu ꞊kɔɔn.
43 ˈˈKɛɛ ka ˗zë ka dua ˈyaa ˗mü kö ˈka˗ kë ˈˈdhʋ̈. Mɛn ˈö˗ ˈˈpiʋ̈ ꞊ʒiaan ˈö kë mɛn ˈkpii˗ ˈka ka kpö ˈgü, ˗a dua ˗mü kö ˗yö yö kë ka ˈˈdhiʋ̈.
44 Mɛn ˈö˗ ˈˈpiʋ̈ ˈpö ˈö kë mɛn ˗blɛɛsü ˈka, ˗a dua ˗mü kö ˗yö kë mɛn ꞊gban ˗bha ꞊dhuëŋ ˈka.
45 Mɛn Gbö yö ˈti nu ˗ʒiaanwo kö ˗wo yö kë ˗a ˈˈdhiʋ̈, ˈˈkɛɛ ˗yö ˗nu kö ˗yö yö kë mɛn ˗nu ˈˈdhiʋ̈, kö ˗yö ö ˗bha ˗tosɛta* nu mɛn ꞊va ꞊dede ˗gɔtadhɔpë ˈka.»
46 ˗Wo ˗dho ˈö ˈwo ˗lo Zedhiko. ˈDhɛ ˈö Yesu waa ö ˗bha gwëëˈˈ ˗nu waa mɛn ˗gbaa ꞊va ˈwo kun ˗a ꞊kee˗ bhë ˈwo kun ˈgo ˗ni ˈgü ˈpö˗ ˈö bhë ˗a ˈgü, kö ˈˈɲɛɛntiimɛn do ˈö gbadhɛmɛn ˈka, ˈö ˈwo˗ ˗dhɛ Batime (Time gbö) ˗yö ˈɲaannu ˗sü ˈka ʒiaan ˈˈdhiʋ̈ mü.
47 ˈDhɛ ˈö˗ man ꞊dhɛ Yesu ˈö go Nazadhɛtö yö ˈnën ˈö ʒiö ˗ni ˈgü bhë, ˈyö ˗ya ˈˈgbla ˗sü ˗bha ˈö˗ pö: «Davi Gbö, Yesu, ˗bhö n ˗wëëdhɛ yö!»
48 ˈYö mɛn ˗nu ˗ya ˈˈgbla ˗sü ˗bha ˗a ˗ta ˈö ˈwo˗ pö ˗a ˗dhɛ ˗yö ö ˈˈdhi ta. ˈˈKɛɛ ˈyö ˗ya ˈˈgbla ˗sü ˗bha ˈˈgbɩɩ˗ ˈzü ˈö˗ pö: «Davi Gbö, ˗bhö n ˗wëëdhɛ yö!»
49 ˈDhɛ ˈö ˗kë ˈˈdhʋ̈ ˈyö Yesu ˗yö ˈduannu, ˈyö˗ pö: «˗Kaa pö ˗a ˗dhɛ ˗yö nu.» ˈYö ˈwo ˈˈɲɛɛntiimɛn ˈö bhë ˗a ˗dhɛ ˈö ˈwo˗ pö ˗a ˗dhɛ: «˗Bhö ü ˈgü dɔ ˈˈgbɩɩ˗ ˈü luuˈˈ. Yesu ˗ya ˗pö ˈü nu.»
50 ˈDhɛ ˈö˗ man ˈˈdhʋ̈, ˈyö ö ˗bha gblɔŋ ˗zuö ˈˈshia˗, ˈö ꞊luu ˈˈshia˗ ˗wladhö, ˈyö dho Yesu ˈˈpiʋ̈.
51 ˈYö Yesu ˗ya dhɛɛˈˈ kpɔ ˈö˗ pö: «ˈMën ˈö ˈü˗ ˈˈpiʋ̈ ˈa˗ kë ü ˗dhɛ?» ˈYö ˈˈɲɛɛntiimɛn ˈö bhë ˈö˗ pö ˗a ˗dhɛ: «˗Gɔmɛn,* dɔ ˈˈgbɩɩ˗ ˈü n ˈˈɲan ˈˈpʋ.»
52 ˈYö Yesu ˗ya pö ˗a ˗dhɛ: «˗Bhö ˈdho. Ü ˗bha ˗zoyödhe ˗ya ü dha.» ˗Yö ˗to ˈˈshia˗ mü ˈö ˗dhɛ yö, ˈö ˗ya ʒiö ˗sü ˗bha Yesu ꞊kee˗.
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «ˈö ˗an ꞊plɛ ꞊gban.»
^ ˗Yö ꞊mɔɔn˗ ˗bha ˈö ˗kë, «ˈö ˈwo˗ pö wo ˈko ˗nu ˗dhɛ» ˈka.
^ Ɛɛnˈˈ «ˈˈtʋ̈ŋ ˈö nu ˗ni ˈgü bhë ˗a ˈka.»
^ Ɛɛnˈˈ «ˈniin˗.»
^ Glɛkö ˗wo ˈgü ˈyö ˗tɔ «Rabuni».
