Nɔɔn˗ ˗së ˈsëëdhɛ ˈö Makö ˗ya ˗bɛnzë 11:1-33
-
Yesu ˗bha ˗da ˈplöö ˗sü ˈö ˈwo wo ˗kɔ ˗ya ˗a ˗gɔ ˈˈtan ˈka (1-11)
-
Yesu ˗yö ˈˈdhaŋ ˗ya figö ˗dhü do ˗bha (12-14)
-
Yesu ˗bha ˗dhiiwɔn ˗nu ˗bho ˗Zlan ˗dhɔkë ˗a ˈgü ˗kɔ ˈgü ˗sü (15-18)
-
˗Gleŋ ˈö ˗gban figö ˗dhü ˈö ˈˈkpɛɛ kun ˗a ˗bha (19-26)
-
«Pë ˗nu ˈü ˗an kë ˗ni ˈgü yö, ˈde ˈö ö ˗wo bho ü ˗ta kö ˈü ˗an kë?» (27-33)
11 ˈDhɛ ˈwo ꞊ɲɔɔn ˗ni ˈgü Zedhizadhɛmö ˗dhɛ ˗bha, ˈö ˈwo yö Bɛtüfaʒe waa Betani ˗dhɛ ˗an ˈˈsuee Olivie ˗tɔn ˗ta, ˈyö Yesu ˗yö ö ˗bha gwëëˈˈ ˗nu ꞊plɛ bɔ,
2 ˈö˗ pö ˗an ˗dhɛ: «˗Ka ˈdho ˈpödhɛ ˈö ˈka˗ ˗ga ˗ni ˗de ˗a ˈgü. ˈKa ˗da ˈplöö, ka ˗dho ˗kpan ꞊soofëŋ ˈnën do ˈö mɛn ˈbhaa yö ˈti ˗ya ˗a ꞊taa do ˗a ˗bha kö ˗yö ˗klu ˗sü ˈka. ˗Kaa ˈˈpʋ ˈka nu ˗a ˈka yö.
3 Mɛn ˈbhaa ˗ya ka dhɛɛˈˈ ˈkpɔ ꞊yaa˗ pö: ‹ˈMën ˗kë ˈö ˈka˗ ˗pʋ?› ˗Kaa pö ˗a ˗dhɛ: ‹Yi Dëmɛn ˗bhawɔn ˗ya yö ˗a ˗bha. ˗Ya ö bo ꞊klee ˗yö ˗dho nu ˗a ˈka.›»
4 ˈDhɛ ˈö ˗kë ˈˈdhʋ̈, ˈyö ˈwo dho ˈwo ˗kpan ꞊soofëŋ ˈnën do ˗bha kö ˗yö ˗klu ˗sü ˈka ˈkɔ do ˈbhaa ˈˈkpan ˈˈdhiʋ̈ ˗kpinŋ ˈˈsuee, ˈyö ˈwo˗ ˗pʋ.
5 ˈYö mɛn ˗nu ˈwo kun mü bhë ˈwo˗ pö ˗an ˗dhɛ: «Ka ꞊soofëŋ ˈnën ˈö bhë ˗a ˗pʋ ˗mën ˗wɔn ˈgü?»
6 ˈDhɛ ˈwo˗ ˗yɔ bɔ ˗an ˗gɔ ꞊dhɛ ˗kɔ ˈö Yesu ˗ya pö ˗a ˈka ˗an ˗dhɛ bhë ˗a ˈdhö, ˈyö ˈwo wo ꞊kwaa ˗an ˗zü ˈö ˈwo dho.
7 ˈYö ˈwo nu ꞊soofëŋ ˈnën ˈö bhë ˗a ˈka Yesu ꞊dhiaa, ˈö ˈwo wo ˗bha sɔ ˗nu ˗lo ˗a ꞊taa, ˈyö ˗ya ˗a ꞊taa.
8 ˈYö mɛn ꞊vadhɛ ˈwo kun mü bhë ˈwo wo ˗bha sɔ ˗nu kpɔ ˈˈshia˗ ʒiaan ˗ta. ˈYö˗ mɛn ˈbhaa ˗nu ˗wo ˈˈdhɛ ˗saa ˗kan ʒiaan ˈˈsuee mü ˈö ˈwo˗ ˗lo ʒiaan ˗ta.
9 Mɛn ˗nu ˈwo kun Yesu ˈˈdhiʋ̈ waa mɛn ˗nu ˈwo kun ˗a ꞊taabha ˗wo ˗kun ˈˈgbla ˗ni ˈgü ˈö ˈwo˗ pö: «˗Zlan yi ˗bhɛɛ ü ˗dhɛ, dɔ ˈˈgbɩɩ˗ ˈü ˗a dha! ˈDhuëë˗ ˗yö ˈkpɔ mɛn ˈö nu Zoova ˈtɔ ˈgü ˗a ˗bha.
10 ˈDhuëë˗ ˗yö ˈkpɔ yi dë Davi ˗bha ˗Gblüdëdhɛ ˈö nu ˗ni ˈgü bhë ˗a ˗bha! ˗Zlan ˈü ˗ya ˗sü ˈka dhaŋ˗ ˈgü yi ˗bhɛɛ ü ˗dhɛ, ˗bhö ˗a dha!»
11 ˈDhɛ ˈö Yesu ˗yö ˗da Zedhizadhɛmö, ˈyö dho ˗Zlan ˗dhɔkë ˗a ˈgü ˗kɔ ˈgü. ˈDhɛ ˈö ˗lo mü ˈyö ˗dhɛ ˗ga ö ˗züzü, ˈˈkɛɛ ˈdhɛ ˈö ˗kë ꞊dhɛ ˗a ˈˈtʋ̈ŋ ˈö bhë ˗a ˈgü kö ˈɲaan˗ ˗ya ˗puö ˈsaadhö bhë, ˈyö waa ö ˗bha bɔmɛn ˗nu ˗kɔŋ do ö ga ꞊plɛ ˈwo bhë ˈwo dho Betani.
12 ˈDhɛ ˈö˗ ˗ta ˗dhɛ ˗yö ꞊kpɔɔ, kö ˗wo ˈgo ˗ni ˈgü Betani, ˈyö din˗ ˗yö Yesu kun.
13 ˈDhɛ ˈö Yesu ˗yö dɔ ꞊gblɛɛn ˈö ˗kpan figö ˗dhü do ˗bha kö ˗a ˈˈdhɛ ˗ya ꞊troo, ˈyö dho ˗wo ˗a ˗bha kö ˗ya kë ꞊dhɛ ˗a bhɛ ˗yö mü ˈö˗ ˈwɔn dɔ. ˈKɛɛ ˈdhɛ ˈö ˗lo ˗a ˈˈsuee, yö ˈti ˗kpan ˗a bhɛ ˈbhaa ˗bha, ˗a ˈˈdhɛ ˈˈkpaan ˈnën ˈö˗ yö. ˗A ˗gɛn ˗mü ꞊dhɛ figö bha ˈˈtʋ̈ŋ ˈyaa ˗mü.
14 ˈDhɛ ˈö ˗kë ˈˈdhʋ̈, ˈyö Yesu ˗ya pö ˗a figö ˗dhü ˗dhɛ: «Ü ˈti ˗dho ü bhɛ ˗ya ˈzü toŋtoŋdhö kö mɛn ˗nu ˗wa ˗bhö.» ˗A ˗bha gwëëˈˈ ˗nu ˈˈtʋ ˗yö ˗kun ˗a ˗wo ˗bha.
15 ˈDhɛ ˈwo ˗lo Zedhizadhɛmö, ˈö Yesu ˗yö dho ˗Zlan ˗dhɔkë ˗a ˈgü ˗kɔ ˈgü, ˈyö ˗ya mɛn ˈˈpɛpɛ ˈwo kun ˈˈdhoodɔ ˗ni ˈgü waa mɛn ˗nu ˈwo kun pë ˈdhɔ ˗ni ˈgü ˗an kë ˗sü ˗bha ˈö ˈwo yö ˈˈkpɛnŋ. ˈYö ˈwëëga ˗tabɔmɛn ˗nu ˗bha ˈtaablö waa ˗toŋ ˈˈdhoodɔmɛn ˗nu ˗bha ˗gbloo ˗nu ˗zuö ˈˈshia˗, ˈö pë ꞊gban ꞊wɛnŋ.
16 Yö ˈti ˈˈwɩ ˗a ˗bha kö mɛn ˈbhaa ˗yö pë ˈbhaa ˈsü ˗yö bɔ ˗a ˈka ˗Zlan ˗dhɔkë ˗a ˈgü ˗kɔ ˈgü.
17 ˗Yö ˗an ꞊klaŋ ˗kë ˈö˗ pö ˗an ˗dhɛ: «ˈYaa ˗bɛnzë ˗sü ˈka ˗Zlan ˗Wo ˈsëëdhɛ ˈgü ꞊dhɛ: ‹˗Wo ˗dho n ˗man ˈkɔ ˗dhɛ mɛn ꞊gban ˈˈpɛpɛ ˗bha ˗bhɛɛ ˗a ˈgü ˗kɔ› ˗ee? ˈˈKɛɛ ka ˗zë ˈka˗ kë ꞊kwaanmɛn ˗nu ˗ya ˗a ˈgü ˗kɔ* ˈka.»
18 ˈDhɛ ˈö Yesu ˗ya pö ˈˈdhʋ̈, ˈö ˈˈsaabhomɛn ˗nu ˗gɔmɛn ˗nu waa ˈtɔŋ˗ ˗gɔmɛn ˗nu ˗wa man, ˈyö ˈwo ˗ya ˗a ˈˈslö mɛɛnˈˈ ˗sü ˗bha kö ˈwo˗ zë. ˗Wo ˗kun ˈˈsuʋ̈ ˗ni ˈgü ˗a ˗gɔ ˈyö ˗tɔ ꞊dhɛ ˗a ˗bha mɛn ꞊klaŋ kë ˗kɔ ˈwɔn ˗yö mɛn ˈˈpɛpɛ ˈwo ˗kë mü ˗an ˗kun ꞊dedewo.
19 ˈDhɛ ˈö ˈˈbin ˈdhö ˈmën ˗ni ˈgü, ˈyö Yesu waa ö ˗bha gwëëˈˈ ˗nu ˈwo go ˈpö˗ ˈö bhë ˗a ˈgü ˈwo dho.
20 ˈDhɛ ˈö˗ ˗ta ˗dhɛ ˗yö ꞊kpɔɔ, ˈö Yesu waa ö ˗bha gwëëˈˈ ˗nu ˈwo ʒiö ˗ni ˈgü dhiapiʋ̈ ˗kpo tii ˈgü, ˈyö ˈwo ˗kpan figö ˗dhü ˈö bhë ˗a ˗bha kö ˗ya ga, ˗ya ˈdho ˗ya ˗da ˗a ˈka ˗a ɲun ˈgü ˈˈsɛɛdhö.
21 ˈDhɛ ˈö Piɛɛ ˗zo ˗yö ˗da ˈˈdhü ˈö bhë ˗a ˈˈpiʋ̈, ˈyö˗ pö Yesu ꞊dhɛ: «˗Gɔmɛn,* ˗dhɛ ˗ga! Figö ˗dhü ˈü ˈˈdhaŋ ˗ya ˗a ˗bha bhë ˗ya ˈˈkpɛɛ ˈkun.»
22 ˈYö Yesu ˗ya pö ˗an ˗dhɛ: «˗Zo ˗yö ˗Zlan ˗dhɛ ˗sü ˗yö kë ka ˗gɔ.
23 A˗ ˗pö ka ˗dhɛ gagade ˈka ꞊dhɛ, mɛn ˈö˗ pö ˗tɔn ˈö yö ˗a ˗dhɛ: ‹˗Bhö ˈgo ü pinŋ˗ ˗bha ˈü ˈdho ˈü ˗puö ꞊weeyi ꞊bhaa,› ˗a ˗mɛn zuʋ̈ˈˈ yö ˈti dɔ ˈdudhö, ˗zoyödhe ˗ya kë ˗a ˗gɔ ꞊dhɛ pë ˈö˗ pö bhë ˗yö ˗dho kë, ˗yö ˗dho kë ˈˈdhʋ̈ ˗a ˗wo ˈˈdhiʋ̈ ˗bha.
24 Yö ˈnën ˈö˗ ˗wɔn ˈgü ˈa˗ pö ka ˗dhɛ ꞊dhɛ, pë ˈˈpɛpɛ ˈö ˈka ꞊bhɛɛ ˗a ˗wɔn ˈgü ɛɛnˈˈ ˈö ˈka˗ ˗gbadhɛ, ˗zoyödhe ˗yö kë ka ˗gɔ ꞊dhɛ ka ˗dho ˗a ꞊slɔɔ. ˗Ya kë ˈˈdhʋ̈ ka ˗dho ˗a ꞊slɔɔ.
25 Ka bhɛɛˈˈ ˗ni ˈgü, ˈwɔn ˗ya kë ka zuʋ̈ˈˈ ˈˈpiʋ̈ mɛn ˈbhaa ˗bha ˗kaa ˗bhawɔn ˈto, kö ka Dë ˈö ˗ya ˗sü ˈka dhaŋ˗ ˈgü ˗yö ka ˗bha ˈwɔn yaa ˗nu ˗bhawɔn ˈto ˈpö.»
26 ——
27 ˈDhɛ ˈwo nu ˈwo ˗lo ˈzü Zedhizadhɛmö, ˈö Yesu ˗yö kun ˈˈta ˈsü ˗ni ˈgü ˗Zlan ˗dhɔkë ˗a ˈgü ˗kɔ ˈgü, ˈyö ˈˈsaabhomɛn ˗nu ˗gɔmɛn ˗nu, ˈtɔŋ˗ ˗gɔmɛn ˗nu waa mɛn zii ˗nu ˗wo ꞊ɲɔɔn ˗a ˗bha,
28 ˈyö ˈwo˗ pö ˗a ˗dhɛ: «Pë ˗nu ˈü ˗an kë ˗ni ˈgü yö, ˈde ˈö ö ˗wo bho ü ˗ta kö ˈü ˗an kë? ˈDe ˈö˗ pö ü ˗dhɛ ˈü ˈwɔn ˗nu ˈwo bhë ˗an kë?»
29 ˈYö Yesu ˗ya pö ˗an ˗dhɛ: «Man ˗de ˈpö a ˗dho dhɛɛˈˈ do ˈbhaa ˈkpɔ ka ˗gɔ. ˈKa˗ ˗yɔ bɔ n ˗gɔ, kö mɛn ˈö˗ pö n ˗dhɛ ˈa pë ˗nu ˈwo bhë ˗an kë, ˈa˗ ˗mɛn ˈtɔ pö ka ˗dhɛ.
30 ˈDe ˈö Zan bɔ kö ˗yö mɛn ˗nu bɔ ˈˈyi ꞊bhaa? ˗Zlan ˈö dhaŋ˗ ˈgü yö ˗mü ˗ee, ɛɛnˈˈ mɛnbhɩɩdhe ˗nu ˗mü? ˗Kaa ˗yɔ bɔ.»
31 ˈYö ˈwo ˗ya ˗a pö ˗sü ˗bha wo ˈko ˗nu ˗dhɛ: «Kö ˈkwa˗ pö ‹˗Zlan ˈö dhaŋ˗ ˈgü yö ˗mü,› ˗yö ˗dho ˗a pö: ‹ˈMën ˗kë ˈsa ˈö ka ˈti ˈdhaŋ˗ bho ˗a ˈˈdhiʋ̈?›
32 ˈˈKɛɛ kö ˈkwa˗ pö ˈpö: ‹Mɛnbhɩɩdhe ˗nu ˗mü, kö kwa ˈti ˈwɔn ˈsü ˗ee›?» ˈˈSuʋ̈ ˗kun ˗an kë ˗ni ˈgü mɛn ˗nu ˈwo kun mü bhë ˗an ˗gɔ, ˈyö ˗tɔ ꞊dhɛ ˗an ꞊gban ˈˈpɛpɛ ˗wo Zan ˗dɔ ˗Zlan ˗wodhiʋ̈lomɛn ꞊dede ˈka.
33 ˈDhɛ ˈö ˗kë ˈˈdhʋ̈ ˈyö ˈwo˗ pö Yesu ˗dhɛ: «Mɛn ˈö˗ bɔ ˈyaa˗ dɔ.» ˈYö Yesu ˗ya pö ˗an ˗dhɛ: «Man ˗de ˈpö mɛn ˈö˗ pö n ˗dhɛ ˈa ˈwɔn ˗nu bhë ˗an kë, n ˈti ˗dho ˗a pö ka ˗dhɛ.»
