Nɔɔn˗ ˗së ˈsëëdhɛ ˈö Makö ˗ya ˗bɛnzë 12:1-44
-
ˈWɔnzuan ˈö ˗gban buzankëmɛn ˗nu ˈö ˈwo ˈbhladëmɛn ˗bha mɛn ˗nu zë ˗an ˗bha (1-12)
-
˗Zlan waa Sezaa (13-17)
-
Dhɛɛˈˈ ˈö ˗gban ˗go ga ˈgü ˗sü ˗bha (18-27)
-
ˈTɔŋ˗ ˈˈgblʋ̈gblʋ̈ ꞊plɛ (28-34)
-
Klito ˗yö Davi gbö ˈka ˗ee? (35-37a)
-
‹˗Ka ka ˗de ˈkun ˈtɔŋ˗ ˗gɔmɛn ˗nu ˗bha› (37b-40)
-
꞊Gɛandhe ˈˈfleesü ˗bha ˈwëë˗ ˈˈtamanga ꞊plɛ (41-44)
12 Yesu ˗yö ˗ya ˈwɔn blɛɛˈˈ ˗sü ˗bha ˗an ˗dhɛ ˈzü ˈwɔnzuan ˗nu ˈka ˈö˗ pö: «Gɔndënën do ˈbhaa ˗yö ö ˗bha ˗drɔɔn ˗bhla ˗kpɔ ˈö ˗glɛŋ ꞊klënŋ ˗a ˗zü, ˈyö ˗drɔɔn ˈˈyibhodhɛ do pɔn, ˈö ˈbhladhɛ ˗maan ˗kë ˗a ˈgü ˗kɔ do dɔ mü. ˈDhɛ ˈö ö bo, ˈyö˗ ˗da buzan ˈgü ˈö dho ˈˈta ˈgü.
2 ˈDhɛ ˈö ˗drɔɔn bho ˈˈtʋ̈ŋ ˗yö ˗lo, ˈyö ö ˗bha yökëmɛn do bɔ mɛn ˗nu ˈwo buzan ˈgü bhë ˗an ˈˈpiʋ̈ kö ˗drɔɔn ga ˈö go ˈbhlaa ˗wo ö ˗bha bɔ.
3 ˈˈKɛɛ ˈyö buzankëmɛn ˗nu ˗wo mɛn ˈö˗ bɔ bhë ˗a kun ˈö ˈwo˗ ˗man, ˈö ˈwo˗ ˗kë ˈö ˗ʒiö ö ˗kɔ ˈˈfuöö ˈka.
4 ˈYö ö ˗bha yökëmɛn do ˈˈwɛɛ ˈbhaa bɔ ˗an ˈˈpiʋ̈ ˈzü, ˈˈkɛɛ ˈyö ˈwo˗ ˗man ˗a ˗gɔ ˗bha, ˈö ˈwo ˈsi ˗nu bho ˗a ˗gɔ.
5 ˈYö˗ mɛn do bɔ ˈzü, ˈˈkɛɛ ˈyö ˈwo˗ zë. ˗Yö mɛn ꞊va ˈˈwɛɛ ˈbhaa ˗nu ˗bɔ, ˈˈkɛɛ ˈyö ˈwo˗ mɛn ˈbhaa ˗nu ˗man, ˈö ˈwo˗ mɛn ˈbhaa ˗nu zë.
6 ˈBhladëmɛn ˈö bhë ˗a gbö do ˈbhaa ˗yö ˗kun ˗dhö, ˈö˗ ˗dhɔ ˗ya ˗kë ꞊dedewo. ˈYö ö gbö ˈö bhë ˗a bɔ buzankëmɛn ˗nu ˈˈpiʋ̈ ˈö˗ pö ö ˗de ˗dhɛ: ‹˗Ya kë n gbö ˈka ˗wo ˗dho ˗a ꞊bhlëë ˗ya.›
7 ˈˈKɛɛ ˈyö buzankëmɛn ˗nu bhë ˈwo˗ pö wo ˈko ˗nu ˗dhɛ: ‹Mɛn ˈö ˈkɛnŋ˗ dho ˈto ˗a ˗gɔ ˈyö nu ˗ni ˈgü bhë. ˗Kwaa zë kö ˗a ˗bha ˈkɛnŋ˗ ˗yö ˈto kwa ˗gɔ.›
8 ˈDhɛ ˈö ˗kë ˈˈdhʋ̈, ˈyö ˈwo˗ kun ˈö ˈwo˗ zë, ˈyö ˈwo˗ ꞊glöö ˗zuö, ˈwo˗ bho ˗drɔɔn ˗bhla ˈgü mü.
9 Ka ˗bha ˈgü ˗mën ˈö ˗drɔɔn ˗bhla dëmɛn ˈö bhë ˈö ˗dho ˗a kë? ˗Yö ˗dho nu ˈö buzankëmɛn ˗nu ˈwo bhë ˗an zë, ˈö ö ˗bha ˗drɔɔn ˗bhla nu mɛn ˈˈwɛɛ ˗nu ˗dhɛ.
10 Pë ˈö ˗bɛnzë ˗sü ˈka ˗Zlan ˗Wo ˈgü bhë ka ˈti˗ ˗wo pö do ˗ee? ˗Ya ˗pö: ‹˗Gwö ˈö ˈkɔdɔmɛn ˗nu ˗wa sü ˗gwö yaa ˈka ˈö ˈwo˗ ˗zuö bhë, yö ˈnën ˈö ˗ya kë ˗gwö ˗wɔn ˈˈgbɩɩ˗ ˗sü* ˈka.
11 ˗Yö ˗go Zoova ˈˈpiʋ̈, ˈyö ˗ya kë pë ꞊bhlëësü ˈka kwa ˈˈɲan ˈˈdhiʋ̈ bhë.›»
12 ˗Yö ˗kun ˈˈsaabhomɛn ˗nu ˗gɔmɛn ˗nu, ˈtɔŋ˗ ˗gɔmɛn ˗nu waa mɛn zii ˗nu ˗an ˈˈpiʋ̈ ꞊dhɛ ˈwo Yesu ˈkun, ˈyö ˗tɔ ˗wa ˈgüman ꞊dhɛ ˈwɔnzuan ˈö˗ sü bhë ˗yö ˗we wo ˈka. ˈˈKɛɛ ˈdhɛ ˈö ˗kë ꞊dhɛ ˗wo ˗kun ˈˈsuʋ̈ ˗ni ˈgü mɛn ꞊va ˈwo kun mü bhë ˗an ˗gɔ, ˈyö ˈwo wo ꞊kwaa˗ ˗zü ˈwo ˗ʒiö.
13 ˈDhɛ ˈö go mü, ˈyö ˈwo Fadhiziɛn ˈbhaa ˗nu waa Edhɔdö ˗bha mɛn ˈbhaa ˗nu bɔ kö ˗wo ˈˈkpënŋ˗ kë Yesu ˗gɔ, kö ˈwo dɔ ˗a ˗wo ˗nu ˗ta ˈwo˗ ˈkun ˗dhɛ yö.
14 ˈDhɛ ˈwo nu ˈyö ˈwo˗ pö ˗a ˗dhɛ: «˗Gɔmɛn, yi˗ ˈwɔn ˗dɔ ꞊dhɛ ü gagade ˗pö. ˗Ya ˈgo mü ˈzü, ˈbhaa ˗kpla mɛn ˈˈoo ˗mɛn ˗gɔ kö ˈü˗ ˈˈɲan ˗ta ˗pë kë, ˈyö sü ꞊dhɛ ˗duɛɛ ˈö mɛn ˗gɔ ˈyaa ˈnën ˈü˗ ˗ga ˈü ü ˗bha ˈwɔn ˗nu ˗kë ˗a ˗bha. ˈWɔn ˗nu ˈü ˗an blɛɛˈˈ ˗ni ˈgü ˈö ˈwo ˗gban ˗Zlan ˗bha bhë, gagade ˗mü. ˈDhɛ ˈö ˈˈdhʋ̈, ü ˗bha ˈgü ˗a ˗dhɛ ˗ya ˗bha kö ˈkwa ˈniin˗ ꞊sɔnŋ bho Sezaa ˗dhɛ ˗ee?
15 Kwa dua ˗mü ˈkwa˗ bho ˗ee? Ɛɛnˈˈ kwa dua ˈyaa ˗mü kö ˈkwa˗ bho?» ˈˈKɛɛ ˈdhɛ ˈö ˗kë ꞊dhɛ Yesu ˗yö ˗an ˗bha ˈˈkpënŋ˗ ˈö bhë ˗a ˗dhɛ ˗yö, ˗ya ˗pö ˗an ˗dhɛ: «ˈMën ˗kë ˈö ˈka n ˈgüdan? ˗Ka nu denie ˈˈtamanga do ˈka n ꞊dhiaa.»
16 ˈDhɛ ˈwo nu ˗a ˈka ˗a ꞊dhiaa, ˈyö˗ pö ˗an ˗dhɛ: «ˈDe ˈö˗ ˗gɔ ˈˈbin waa˗ ˈtɔ ˈdhö ˗a ˗ta yö?» ˈYö ˈwo˗ pö ˗a ˗dhɛ: «Sezaa ˗mü.»
17 ˈDhɛ ˈwo˗ pö ˈˈdhʋ̈, ˈyö˗ pö ˗an ˗dhɛ: «ˈDhɛ ˈö ˈˈdhʋ̈, pë ˗nu ˈwo Sezaa ˗bha ˈka ˗ka ˗an nu Sezaa ˗dhɛ, kö pë ˗nu ˈwo ˗Zlan ˗bha ˈka ˈka ˗an nu ˗Zlan ˗dhɛ.» ˗A ˗yɔ ˈö˗ bɔ bhë ˗a ˈwɔn ˗yö ˗an ˗kun.
18 ˈDhɛ ˈö ˗ya kë ˈˈdhʋ̈, ˈyö Sadusiɛn ˗nu ˈö ˈwo˗ pö ꞊dhɛ ˗go ga ˈgü ˗sü ˈyaa ˈdhö bhë, ˈwo nu ˈwo˗ dhɛɛˈˈ kpɔ ˈö ˈwo˗ pö:
19 «˗Gɔmɛn, pë ˈö Moizö ˗ya ˗bɛnzë ˈö˗ to kwa ˗gɔ ˗ya ˗pö ˗a ˈgü ꞊dhɛ gɔɔn˗ ˈö waa ö ˗bha dhebɔ wo ˈti ˈnën ˈkpɔ ˗ya ga, ˗a ꞊dhegblü gɔɔn˗ dua ˗mü kö ˗yö ˗a ˗bha ꞊gɛandhe ˈö to bhë ˗a ˈsü dhe ˈka kö ˗wo ˈnën ˈkpɔ, kö ˗yö kë mɛn ˈö ga bhë ˗a ꞊suugünën ˈka.
20 ˈˈKɛɛ ˈnën gɔɔn˗ ˗nu ˈˈsɔɔplɛ ˗wo ˗kun ꞊dhegblüzë ˗nu ˈka. ˈDhɛ ˈö˗ mɛn ˗blɛɛsü ˗yö dhe sü, waa ö ˗bha dhebɔ wo ˈti ˈnën ˈkpɔ ˈö ga.
21 ˈYö˗ mɛn ꞊plɛ ˗naan ˗yö ꞊gɛandhe ˈö to bhë ˗a sü dhe ˈka, ˈˈkɛɛ waa dhebɔ ˈö bhë wo ˈti ˈnën ˈkpɔ ˈpö ˈö ga. ˈWɔn do ˈö bhë ˈyö ˗kë ˗a mɛn ˗yaaga ˗naan ˈka.
22 Gɔɔn˗ ˗nu ˈˈsɔɔplɛ ˈwo bhë, ˗a mɛn ˈbhaa yö ˈti ˈnën ˈkpɔ. ˈYö˗ dhebɔ ˗de ˈpö ˈö ga ꞊taabha.
23 ˗Go ga ˈgü ˗yi ˈka, de ˈö dhebɔ bhë ˈö ˗dho ˈto ˗a ˗gɔ? ˗A ˗gɛn ˗mü ꞊dhɛ ˗kɔ ˈwo˗ ˗bha ˈˈsɔɔplɛ ˗yö ˗kë ˗an ꞊gban ˗bha dhebɔ ˈka.»
24 ˈYö Yesu ˗ya pö ˗an ˗dhɛ: «Pë ˈö ˗Zlan ˗Wo ˗ya pö ˈkaa˗ dɔ ɛɛnˈˈ ˈkaa ˗Zlan ˗bha ˈˈpiigbɩɩdhɛ dɔ. Yö ˈnën ˈö˗ ˈwɔn ˈgü ˈö ˈka ʒiaan ˈto bhë.
25 ˗A ˗gɛn ˗mü ꞊dhɛ mɛn ˗nu ˗wa ˈgo ga ˈgü, gɔɔn˗ ˗nu ˈti ˗dho dhe ˈsü ɛɛnˈˈ wo ˈti ˗dho dhebɔ ˗nu dɔ gwaan˗ ˗bha. ˗An ꞊gban ˗dho kë ꞊dhɛ ˗Zlan ˗bha ˈˈkiö ˗nu ˈdhö dhaŋ˗ ˈgü.
26 ˗Kwɛzlan ˈö ˗gban ˈˈglɛɛn ˗kpɔɔ ˗bha ˈö Moizö ˗ya ˗bɛnzë ö ˗bha ˈsëëdhɛ ˈgü bhë ka ˈti˗ ˗wo pö do ˗ee? Mɛn ˗nu ˈö ˗wa ga ˈö ˈwo ˗dho ˈgo ga ˈgü, ˗Zlan ˗yö ˗an ˗wɔn ˗blɛɛ Moizö ˗dhɛ mü ˈö˗ pö: ‹Man ˈnën ˈa ˗tɔ Ablaamö ˗bha ˗Zlan, Izaakö ˗bha ˗Zlan waa Zakɔbö ˗bha ˗Zlan.›
27 ˗Yö mɛn ˗nu ˈö ˈwo ˈˈbhɩɩ˗ ˗an ˗bha ˗Zlan ˈka, ˈyaa mɛn ˗nu ˈö ˗wa ga ˗an ˗bha ˗Zlan ˈka. ˗Dhɛ ˈö ˈˈdhʋ̈ ˈka ʒiaan ˈto ꞊dedewo.»
28 ˈTɔŋ˗ ˗gɔmɛn do ˈbhaa ˈö nu ˗an ˈˈsuee mü, ˗a ˈˈtʋ ˗yö ˗kun ˗an ˗wo ˗bha. ˈDhɛ ˈö˗ yö ꞊dhɛ Yesu ˗yö ˗an ˗bha dhɛɛˈˈ ˗nu ˗yɔ ˗bɔ ˗së ˈka, ˈyö dhɛɛˈˈ kpɔ Yesu ˗gɔ ˈö˗ pö: «˗Zlan ˗bha ˈtɔŋ˗ ˗nu ˈˈpɛpɛ ˈwo bhë ˗a ˗mɛɛn ˈö ˗tɔ ˗a ˈkpiisü?»
29 ˈYö Yesu ˗ya ˗yɔ bɔ ˗a ˗gɔ ˈö˗ pö: «˗A ˈkpiisü ˈnën ˈö ꞊nɛn: ‹Izraɛdhömɛn ˗nu, ˗ka ka ˈˈtʋ ˈto. Zoova ˈnën ˈö ˗tɔ kwa ˗bha ˗Zlan. Zoova ˗yö dosɛnŋ.
30 Ü dua ˗mü kö Zoova ü ˗bha ˗Zlan ˗dhɔ ˗yö ü kë ü zuʋ̈ˈˈ ꞊gban ˈka, ü ˈniin˗ ꞊gban ˈka, ü ˗zota ˗kɔ ꞊gban ˈgü waa ü faan ꞊gban ˈka.›
31 ˗A ꞊plɛ ˗naan ˈö dɔ ˗a ˈˈpiʋ̈, ˈyö ˗tɔ: ‹Ü dua ˗mü kö ü ˗yayoo ˗dhɔ ˗yö ü kë ꞊dhɛ ü ˗de ˈdhö.› ˈTɔŋ˗ ˈˈwɛɛ ˈbhaa ˈö ˗dho kë ˈkpii˗ kö ˗yö ʒiö ˗a ˈka ˗a ꞊plɛ ˈwo bhë ˗an ˗ta ˈyaa ˈdhö.»
32 ˈYö ˈtɔŋ˗ ˗gɔmɛn ˈö bhë ˈö˗ pö Yesu ˗dhɛ: «˗Yö ˈˈdhʋ̈ ˗Gɔmɛn, pë ˈö ˈü˗ pö bhë gagade ˗mü. ‹˗Yö dosɛnŋ. ˗Zlan ˈˈwɛɛ ˈbhaa ˈö ˗dho kë ꞊dhɛ ˗a ˈdhö ˈyaa ˈdhö.›
33 ˈYö ˗Zlan ˗dhɔ ˗bha mɛn kë ˗sü ˈö mɛn zuʋ̈ˈˈ ꞊gban ˈka, mɛn ˗bha ˈwɔndɔdhe ꞊gban ˈka, mɛn ꞊faan ꞊gban ˈka, ˈgo mü ˈzü kö mɛn ˗yayoo ˗dhɔ ˗yö mɛn kë ꞊dhɛ mɛn ˗de ˈdhö bhë, ˗an ꞊bhlëë ˗yö ˈkpii˗ ˈö ˗ʒiö ˗a ˈka ˈˈsaa˗* ꞊suu ˈˈpɛpɛ ˗ta.»
34 ˈDhɛ ˈö Yesu ˗ya yö ꞊dhɛ gɔndënën ˈö bhë ˗yö ˈwɔn ˗blɛɛ ꞊kpɔɔdhɛ ˈka, ˈyö˗ pö ˗a ˗dhɛ: «ˈBha yö ˗Zlan ˗bha ˗Gblüdëdhɛ ˈka ꞊klöö˗.» ˈDhɛ ˈö ö bo ˗kë ˈˈdhʋ̈ ˗sü ˈka, mɛn ˈbhaa yö ˈti ˗mɔn ˗a ˗bha ˈzü toŋtoŋdhö kö ˗yö dhɛɛˈˈ ˈkpɔ Yesu ˗gɔ.
35 ˈˈKɛɛ Yesu ˗yö ˗to mɛn ˗nu ꞊klaŋ kë ˗sü ˗bha ˗Zlan ˗dhɔkë ˗a ˈgü ˗kɔ ˈgü mü, ˈyö dhɛɛˈˈ kpɔ ˈö˗ pö: «ˈMën ˗kë ˈö ˈtɔŋ˗ ˗gɔmɛn ˗nu ˗wa pö ꞊dhɛ Davi gbö ˗mü Klito ˈka?
36 ˈDhɛ ˈö ˗zuu ˈˈslʋ̈ʋ̈slʋ̈ ˗yö nu Davi ˗ta, yöö ꞊dede ˗ya ˗pö: ‹Zoova ˗ya ˗pö n Dëmɛn ˗dhɛ: «˗Bhö ˗ya n ˗kɔ ˗së ˈgü, kö ˗yö ˈto ˗a ˈka ˈˈdhʋ̈ ˗yö yö ˗a ˈka ˈˈtʋ̈ŋ ˈa ˗dho ü ˈyɔɔ˗ ˗nu ˗da ˗a ˈka ü ˗gɛn ꞊löö bhë ˗a ˗bha.»›
37 ˈDhɛ ˈö ˈˈdhʋ̈, Davi yöö ꞊dede ꞊yaa˗ ˗dhɛ ö Dëmɛn, kö ˗ya gbö ˈka ˗kɔ ˗kë ꞊dhɛ ˈsa?»
Mɛn ꞊va ꞊dede ˈwo kun mü, ˗wo ˗kun wo ˈˈtʋ ˈto ˗ni ˈgü ˗a ˗bha zuʋ̈niidadhe ˈka.
38 ˗Yö ˗an ꞊klaŋ ˗kë ˈzü ˈö˗ pö ˗an ˗dhɛ: «˗Ka ka ˗de ˈkun ˈtɔŋ˗ ˗gɔmɛn ˗nu ˈö ˈwo gblɔŋ ꞊gblɛnŋgblɛnŋ ˗da ˈö ˈwo ˗glü ˗a ˈka, ˈö ˈwo˗ ˈˈpiʋ̈ kö mɛn ˗nu ˗wo ˗an ꞊tuaabho ˈˈdhookwëëdhɛ ˗nu ˈgü bhë ˗an ˗bha.
39 ˗Yɛɛ ˗blɛɛsü ˗nu ˈwo ˈˈdhiʋ̈ ˗yakwëë ˗kë ˗a ˈgü ˗kɔ ˗nu ˈgü waa ˗yɛɛ ꞊bhlëësü ˗nu ˈwo ˈwlaan˗ ˗nu ˗ta ˈyö˗ ˗dhɔ ˗yö ˗an ˗kë.
40 ˗Wo ꞊gɛandhe ˗nu ˗bha pë ˈˈpɛpɛ* ˈö ˗an ˗gɔ ˗a ˗sü ˗an ˗gɔ, ˈö ˈwo wo ˗bha bhɛɛwo ˗nu ˗kë ꞊gblɛnŋ kö mɛn ˗nu ˈˈɲan ˗yö bɔ wo ˗ta. Za ˈö ˗dho dɔ ˗an ˗bha, ˗yö ˗dho kë ꞊gbɔɔnsü ˈö ˗ʒiö ˗a ˈka mü.»
41 ˈDhɛ ˈö ö bo, ˈyö dho ˈö ˗ya gbɔɔdhe ˗da ˗a ˈgü ˗pë ˈö ˗Zlan ˗dhɔkë ˗a ˈgü ˗kɔ ˈgü bhë ˗a ˈˈtrünŋ ˈka ˗dhɛ ꞊dede ˈgü. ˈYö ˗kɔ ˈö mɛn ˗nu ˗wo kun ˈwëëga ˗da ˗ni ˈgü ˗a ˈka ˗a ˈgü bhë, ˈö˗ ˗ga. ꞊Nɔɔnmɛn ˗nu ꞊va ˗wo ˗kun ˈwëëga ꞊va ꞊dede ˗da ˗ni ˈgü ˗a ˈgü.
42 ˈYö ꞊gɛandhe ˈˈfleesü do ˗yö nu ˈö ˈwëë˗ ˗piö ˈˈkpaan ga ˈˈsɛnsɛn ꞊plɛ ˈö ˗an ꞊bhlëë ˈyaa ꞊va* bhë ˗an ˗da mü.
43 ˗Dhɛ ˈö ˗kë ˈˈdhʋ̈, ˈyö Yesu ˗yö ö ˗bha gwëëˈˈ ˗nu ˗dhɛ ˈö˗ pö ˗an ˗dhɛ: «A˗ ˗pö ka ˗dhɛ gagade ˈka ꞊dhɛ, ˈwëëga ˈö ꞊gɛandhe ˈˈfleesü ˈö dɔ bhë ˈö˗ ˗da pë ˈgü bhë, ˗a ꞊bhlëë ˗yö ꞊va ˈö ˗ʒiö ˗a ˈka ˈwëëga ˈö mɛn ˈˈpɛpɛ ˈwo to ˈwo˗ ˗da mü bhë ˗a ˗ta.
44 ˗A ˗gɛn ˗mü ꞊dhɛ wo ˗zë ˈwëë˗ ˈdhɛ ˈö˗ ˗kë ˗a ˈka ˗pë ˈyaa ˗an ˗gɔ bhë ˈyö ˈwo˗ ˗da mü. ˈˈKɛɛ yö ˈö ˈˈfleesü bhë, pë ˈˈpɛpɛ ˈö ˗ya ˈto ˗a ˗gɔ kö ˗yö ˗tosɛta kë ˗a ˗ta bhë, ˈyö˗ ꞊gban ˗da mü.»
-Zoto -a ˈˈpiʋ̈ -wɔn -nu
^ «˗Gwö ꞊suu ˈö ˈˈdhʋ̈ bhë, yö ˈnën ˈö ˗ya kë ˈwo˗ ˗ya ˈkɔ ˈˈbhaŋ ꞊plɛ ˗yökwëëdhɛ ˈgü ˈˈdhuŋ.»
^ Ɛɛnˈˈ «ˈˈsaa˗ ˈwo˗ ꞊gban ˗gʋ̈ waa wü ˈˈsaa˗ ˗nu.»
^ Ɛɛnˈˈ «ˈkɔ ˗nu.»
^ Glɛkö ˗wo ˈgü ˈyö ˗tɔ «lɛpta ꞊plɛ.» Yö ˈö mɛn ˗ya ˗kë minitö ˗kɔŋ do (10) ˈˈpiʋ̈ ˗a ꞊saa ˗mü.
