Nɔɔn˗ ˗së ˈsëëdhɛ ˈö Makö ˗ya ˗bɛnzë 2:1-28
2 ˈDhɛ ˈö ˗dhɛkpaɔyi ˈnën ˈbhaa ˗yö ˗ʒiö, ˈyö Yesu ˗yö dho ˈzü Kapɛɛnaɔmö, ˈyö˗ ˗tɔɔ ˗yö ˗pɛn ꞊dhɛ ˗yö ˈˈkwɛnŋdhö.
2 ˈDhɛ ˈö ˗kë ˈˈdhʋ̈, ˈyö mɛn ꞊va ꞊dede ˗wo dho ˈˈkwɛnŋdhö mü, ˈö˗ ˗dhɛ ˗yö pa. ˈDhɛ ˈö ꞊ɲɔɔn mü kö ˗gɛn yödhɛ ˈyaa ˈˈkpan ˈˈdhiʋ̈ ˗ʒiaanwo. ˈYö Yesu ˗yö ˗ya ˗zlanwopö ˗an ˗dhɛ ˗sü ˗bha.
3 ˈYö mɛn ˗yiishiö ˗wo gɔndë do ˈö˗ ˗dhɛ ꞊gban ˗ya ga ˗a ˗bha ˗a sü ˈö ˈwo nu ˗a ˈka ˗a ꞊dhiaa.
4 ˈˈKɛɛ mɛnbhɩɩdhe ˗bha ˗kë ꞊va ˗sü ˗wɔn ˈgü, wo ˈti ˗mɔn ˗a ˗bha kö ˗wo ˈdho ˗wo ˗lo ˗a ˈka Yesu ˈˈsuee. ˈDhɛ ˈö ˗kë ˈˈdhʋ̈, ˈyö ˈwo˗ ˈkɔ ꞊gba ˈˈdhi bho Yesu ˗ta ˈˈdhuŋ. ˈDhɛ ˈwo wo bo ˗a ˈˈdhi bho ˗sü ˈka, ˈyö ˈwo mɛn ˈö˗ ˗dhɛ ꞊gban ˗ya ga ˗a ˗bha bhë ˗a to ˗a ˗wɔ ˗a ˗ta ˗pë ˗ta, ˈö ˈwo˗ ꞊yɔɔ Yesu ˈˈpiʋ̈ ˈkɔɔ mü.
5 ˈDhɛ ˈö Yesu ˗ya yö ꞊dhɛ ˗zoyödhe ˗yö ˗an ˗gɔ, ˈyö˗ pö gɔndënën ˈö bhë ˗a ˗dhɛ: «N ˗man ˈnën, ˈman ü ˗bha ˈwɔn yaa ˗nu ˗bhawɔn ˈto.»
6 ˈDhɛ ˈö˗ pö ˈˈdhʋ̈, ˈyö ˈtɔŋ˗ ˗gɔmɛn ˈbhaa ˗nu ˈö ˈwo kun ˈɲaannu ˗sü ˈka mü, ˈwo ˗ya ˗a pö ˗sü ˗bha wo zuʋ̈ˈˈ ˈˈpiʋ̈:
7 «ˈMën ˗kë ˈö mɛn ˈö yö ˈö dhiaŋ zë ˈˈdhʋ̈? ˗Zlan ꞊bhlëë ˗shiö ˈnën ˈö˗ wo bhë. ˈDe ˈö ꞊mɔɔn˗ ˗bha kö ˗yö mɛn ˗nu ˗bha ˈwɔn yaa ˗bhawɔn ˈto kö yö ˈti kë ˗Zlan dosɛnŋ ˈka?»
8 Yesu ˗yö ˗to ˈˈshia˗ mü ˈö ˈpë ˈwo kun wo ˗zota ˗ni ˈgü ˗a ˈgü wo ˈko ꞊zinŋ ˈgü bhë ˈö˗ dɔ, ˈyö˗ pö ˗an ˗dhɛ: «ˈMën ˗kë ˈö ˗zotadhe ꞊suu ˗nu ˈwo ˈˈdhʋ̈ ˗wo ˗kë ka ˗gɔ?
9 ˗A pö ˗sü ˈö mɛn ˈö˗ ˗dhɛ ꞊gban ˗ya ga ˗a ˗bha ˗a ˗dhɛ ꞊dhɛ: ‹ˈMan ü ˗bha ˈwɔn yaa ˗nu ˗bhawɔn ˈto› ɛɛnˈˈ ˗a pö ˗sü ˈö ꞊dhɛ: ‹˗Bhö luuˈˈ ˈü ü ˗wɔ ˗a ˗ta ˗pë ˈsü ü ˈˈta ˈsü› bhë, ˗a ˗mɛɛn ˈö ˈˈgbɩɩ˗?
10 ˗Ka dɔ kö ˈa˗ ˗zɔn ka ˗dhɛ ꞊dhɛ maan mɛn Gbö ˗mɛn ˗a ˈˈse ˗yö n ˗dhɛ kö ˈa mɛn ˗nu ˗bha ˈwɔn yaa ˗nu ˗bhawɔn ˈto ˈˈkpɔnŋ ꞊taa yö.» ˈDhɛ ˈö ˗kë ˈˈdhʋ̈, ˈyö˗ pö mɛn ˈö˗ ˗dhɛ ꞊gban ˗ya ga ˗a ˗bha bhë ˗a ˗dhɛ:
11 «Man ˈnën ˈa˗ pö, ˗bhö luuˈˈ ˈü ü ˗wɔ ˗a ˗ta ˗pë ˈsü kö ˈü ˈdho ü ˗gɔ ˈˈkwɛnŋdhö.»
12 ˈDhɛ ˈö ˗kë ˈˈdhʋ̈, ˈyö˗ gɔndënën ˗yö ꞊luu, ˈyö to mü ˈö ö ˗wɔ ˗a ˗ta ˗pë sü, ˈö ˈˈta sü ˈö yö ˈˈkpɛnŋ mɛn ꞊gban ˈˈpɛpɛ ˈˈɲan ˈˈdhiʋ̈ mü. ˈYö˗ ˈwɔn ˗yö mɛn ꞊gban kun, ˈyö ˈwo ˗ya ˗Zlan ˈtɔ bhɔ ˗sü ˗bha, ˈö ˈwo˗ pö: «Kwa ˈti ˈwɔn ꞊suu ˈö yö ˗a yö do toŋtoŋdhö.»
13 ˈDhɛ ˈö ö bo kë ˗sü ˈka ˈˈdhʋ̈, ˈyö Yesu ˗yö dho ˈzü ꞊weeyi ˈˈkpɔnŋ ˈˈdhiʋ̈, ˈyö mɛn ꞊va ꞊dede ˗wo nu ˗a ˈˈpiʋ̈, ˈyö ˗an ꞊klaŋ ˗kë.
14 ˈDhɛ ˈö Yesu ˈdhö ʒiö ˗ni ˈgü, ˈyö ˗kpan Levi ˈö ˗kë Alüfe gbö ˈka ˗a ˗bha kö ˗yö ˗ya ˗sü ˈka ˈniin˗ ꞊sɔnŋ ˗bho ˗a ˈgü ˗kɔ ˈgü. ˈYö˗ pö ˗a ˗dhɛ: «˗Bhö ʒiö n ꞊kee˗.» ˈYö Levi ˗yö ꞊luu ˈö ˗ʒiö ˗a ꞊kee˗.
15 ꞊Taabha, Yesu waa ö ˗bha gwëëˈˈ ˗nu waa ˈniinsɔnŋkunmɛn ˗nu ꞊va waa mɛn ˗nu ˈö ˗an ˈtɔ ˗yö bhɔ ˈwɔn yaa kë ˗sü ˗bha, ˗wo pë ˗bhö wo ˈkwëë˗ Levi ˗gɔ ˈkɔɔ. ˗A ˗gɛn ˗mü ꞊dhɛ mɛn ꞊suu ˗nu ˈwo ˈˈdhʋ̈ ˗an ꞊va ꞊dede ˗kun ʒiö ˗ni gü Yesu ꞊kee˗.
16 ˈKɛɛ ˈdhɛ ˈö ˈtɔŋ˗ ˗gɔmɛn ˗nu ˈwo Fadhiziɛn ˗nu ˈka, ˈwo˗ yö ꞊dhɛ ˗yö pë ˗bhö ˗ni ˈgü ˈniinsɔnŋkunmɛn ˗nu waa ˈwɔnyaakëmɛn ˗nu ˈˈpiʋ̈, ˈyö ˈwo˗ pö ˗a ˗bha gwëëˈˈ ˗nu ˗dhɛ: «ˈMën ˗kë ˈö pë ˗bhö ˈwɔnyaakëmɛn ˗nu waa ˈniinsɔnŋkunmɛn ˗nu ˈˈpiʋ̈?»
17 ˈDhɛ ˈö Yesu ˗ya man ˈˈdhʋ̈, ˈyö˗ pö ˗an ˗dhɛ: «Mɛn ˗nu ˈö ˈwaa wo ˈflëëgü wo ˈnën ˗an ˗bhawɔn ˈdhö ꞊dhɔtrɔɔ˗ ˗bha, ˈmɛn ˈwo wo ˈflëëgü ˈwaa ˗mü. A ˗nu kö mɛn ˗nu ˈwo ˈwɔnyaakëmɛn ˗nu ˈka ˈa ˗an ˗dhɛ, ˈmii nu kö ˈmɛn ˈwo ˈwɔnsëkëmɛn ˗nu ˈka ˈa ˗an ˗dhɛ.»
18 ˗Ya kë ˗nu wo Zan ˗bha gwëëˈˈ ˗nu waa Fadhiziɛn ˗nu ˗wo ˈsunŋ˗ ˗mën. ˗A ˗wɔn ˈgü ˗wo ˗dho ˈö ˈwo Yesu dhɛɛˈˈ kpɔ ˈö ˈwo˗ pö: «ˈMën ˗kë ˈö Zan ˗bha gwëëˈˈ ˗nu waa Fadhiziɛn ˗nu ˗bha gwëëˈˈ ˗nu ˗wo ˈsunŋ˗ mën, ˈˈkɛɛ ˈö ü ˗bha gwëëˈˈ ˗nu ˗zë ˈwaa ˈsunŋ˗ ˈmën?»
19 ˈYö Yesu ˗ya pö ˗an ˗dhɛ: «Dhe ˈsü ˈwlaan˗ ˗ta, ˈˈtʋ̈ŋ ˈö dhesügɔn ˈdhö ꞊kun ˗a ˈka ˈö ˈˈtɔŋdë ˗nu ˈˈpiʋ̈ bhë, ˗a ˗dhɛ ˈyaa˗ ˗bha kö ˗wo ˈsunŋ˗ ˈmën. ˈYaa ˈˈdhʋ̈ ˗ee? Dhesügɔn ˗zë ˈö ꞊kun ˗an ˈˈpiʋ̈ ꞊köŋ, ˗an dua ˈyaa ˗mü kö ˗wo ˈsunŋ˗ ˈmën.
20 ˈˈKɛɛ ˗a yi ˗dho ˗wo ˈö ˈwo dhegɔndë sü ˗an ˈˈpiʋ̈. ˈˈTʋ̈ŋ ˈö ˈˈdhʋ̈ bhë ˈyö ˈwo ˗dho ˈsunŋ˗ ˈmën ˗a ˈka.
21 Mɛn ˈbhaa ˈyaa sɔ ˗dɛɛ ˈˈklu ꞊nënŋ sɔ zii ˗bha kö ˗ya ˗wɔ. ꞊Yaa˗ kë ˈˈdhʋ̈, sɔ ˈˈpɛn ˗dɛɛ ˗dhö sɔ zii bhë ˗a ˈˈgan ˈö˗ ˈˈpɛdhɛ ˗yö ˗da ˈˈdhiʋ̈.
22 Mɛn ˈbhaa ˈyaa we ˗dɛɛ ˗da ˈpö puuˈˈ zii ˈgü. ꞊Yaa˗ kë ˈˈdhʋ̈, ˗a puuˈˈ ˗dhö pʋ̈ʋ̈ˈˈ ˈö˗ we ˗yö ꞊wɛnŋ, ˈö˗ puuˈˈ ˗yö ꞊shiʋ̈ ˈpö. ˈˈKɛɛ ˗wo we ˗dɛɛ ˗da ꞊ʒiaan puuˈˈ ˗dɛɛ ˈgü.»
23 ˈDhɛ ˈö Yesu ˗yö kun bɔ ˗ni ˈgü ˈble˗ ˗bhla ˗nu ˈgü ꞊Glooyi do ˈka, ˈyö˗ ˗bha gwëëˈˈ ˗nu ˗wo ˗ya ˗a ˈble˗ ˗kpaa ga ˈbhaa ˗nu ˗bho ˗a ˈgü ˗sü ˗bha kö ˗wo ˈˈta ˈsü ˗ni ˈgü ˈwo dho ˗a ˈka.
24 ˈDhɛ ˈö Fadhiziɛn ˗nu ˗wa yö ˈˈdhʋ̈, ˈyö ˈwo˗ pö Yesu ˗dhɛ: «˗Dhɛ ˗ga! ˈPë ˈö ˈtɔŋ˗ ˗ya pö ˈwaa˗ kë ꞊Glooyi ˈka bhë, ˈmën ˗kë ˈö ü ˗bha gwëëˈˈ ˗nu ˗wa ˗kë?»
25 ˈYö Yesu ˗ya ˗yɔ bɔ ˗an ˗gɔ ˈö˗ pö: «Pë ˈö Davi ˗ya ˗kë kö ˗yö ˗kpla ˈgü, kö din˗ ˗yö waa ö ˗bha mɛn ˗nu ˗an kë ˗ni ˈgü bhë, ka ˈti˗ ˗wo pö ˗Zlan ˗bha ˈsëëdhɛ ˈgü do ˗ee?
26 ꞊Dhɛ ˗kɔ ˈö ˗kwɛzlan ˈö ˗gban ˈˈsaabhomɛn ˈkpii˗ Abiataa ˗bha ˗ya pö ˗a ˈka bhë ˗a ˈdhö, Davi ˗yö ˗da ˗Zlan ˗gɔ ˈkɔɔ ˈö ˈbluu˗ ˗nu ˈwo ˈˈsaabho ˗an ˈka ˗Zlan ˗dhɛ bhë ˗an ˗bhö, ˈˈkɛɛ kö ˈˈsaabhomɛn ˗nu dosɛnŋ ˈnën ˗an dua ˈdhö ˗mü kö ˗wa ˗bhö. ˗Yö ˗a ˈbhaa ˗nu ˈpö mɛn ˗nu ˈö ˈwo kun ˗a ꞊kee˗ bhë ˗an ˗dhɛ ˈö ˈwo˗ ˗bhö.»
27 ˈYö go mü ˈzü ˈö˗ pö ˗an ˗dhɛ: «˗Zlan ˗yö ꞊Glooyi ˗ya mɛnbhɩɩdhe ˗nu ˗bha ˈka, yö ˈti mɛnbhɩɩdhe ˗nu ˗zë ˗an ˗da ꞊Glooyi ˗bha ˈka.
28 Yö ˈnën ˈö˗ ˗wɔn ˈgü, ˈö maan mɛn Gbö ˗mɛn ˈa ꞊Glooyi Dëmɛn ˈka.»
