Nɔɔn˗ ˗së ˈsëëdhɛ ˈö Makö ˗ya ˗bɛnzë 3:1-35
3 Yesu ˗yö ˗dho ˈzü ˈö ˗da ˗yakwëë ˗kë ˗a ˈgü ˗kɔ ˈgü. ˈDhɛ ˈö dho, kö gɔndënën do ˈö˗ ˗gbe ˗ya ga ˗a ˗bha* ˗yö mü.
2 Fadhiziɛn ˗nu ˗wo ˗kun Yesu ˈsuaan˗ bho ˗ni ˈgü ˗së ˈka, kö ꞊ya kë ꞊dhɛ ˗yö ˗dho mɛn ˈö bhë ˗a ˗dhɛ bo ꞊Glooyi ˈka ˈwo˗ yö, kö ˈwo za ˗ya ˗a ˗bha.
3 ˈYö mɛn ˈö˗ ˗gbe ˗yö ga ˗a ˗bha* bhë, Yesu ˗ya pö ˗a ˗dhɛ: «˗Bhö luuˈˈ ˈü nu mɛn ˗nu ꞊zinŋgü yö.»
4 ˈYö ˗an dhɛɛˈˈ kpɔ ˈö˗ pö: «ˈMën kwa dua ˈdhö ˗mü kö ˈkwa˗ kë ꞊Glooyi ˈka? ˈWɔn ˗së ˗ee ɛɛnˈˈ ˈwɔn yaa? Kwa dua ˗mü kö ˈkwa mɛn dha ˗ee ɛɛnˈˈ kö ˈkwa mɛn zë?» ˈˈKɛɛ wo ˈti ˈˈwɩ kö ˗wa ˗yɔ bɔ ˗a ˗gɔ.
5 ˈDhɛ ˈö ˗kë ˈˈdhʋ̈ ˈyö ˗an ˗ta ˗ga ˈdɔɔndhö, kö bhlɔ ˗ya ˈmën ˗a ˈgü ꞊dedewo ˗an ˗bha zuʋ̈ˈˈ yaa ˗dhɛ ˗wɔn ˈgü. ˈYö˗ pö gɔndënën ˈö bhë ˗a ˗dhɛ: «˗Bhö ü ˗gbe ˈgü ˈˈpʋ.» ˈYö˗ ˗pʋ, ˈyö˗ ˗gbe ˗yö bo.
6 ˈDhɛ ˈö ˗kë ˈˈdhʋ̈, ˈyö Fadhiziɛn ˗nu ˗wo yö ˈˈkpɛnŋ, ˈyö waa Edhɔdö ˗bha mɛn ˗nu ˈwo to mü ˈwo Yesu zë ˗wɔn ˗yakwëë ˗kë.
7 ˈˈKɛɛ ˈyö Yesu waa ö ˗bha gwëëˈˈ ˗nu ˗wo dho ꞊weeyi ˈˈkpɔnŋ ˈˈdhiʋ̈. ˈYö mɛn ꞊va ꞊dede ˈwo go Galile waa Zude ˗pö ˗nu ˈgü, ˈwo ˗ʒiö ˗a ꞊kee˗.
8 ˈYö mɛn ꞊va ˈbhaa ˗nu ˗wo go ˗ʒiaanwo Zedhizadhɛmö ˗dhɛ ˗nu, Idume ˗dhɛ ˗nu, Zuudɛn ga ꞊zlöö ˗dhɛ ˗nu waa ˗dhɛ ˗nu ˈwo ˈTii˗ waa Sidɔn ˗dhɛ ˗nu ˗an ˗züzü ˗an ꞊gban ˈgü, ˈö ˈwo nu ˗a ˈˈpiʋ̈. ˗A ˗gɛn ˗mü ꞊dhɛ pë ˈˈpɛpɛ ˈö kun ˗an kë ˗ni ˈgü bhë, ˗wa ˗tɔɔ ˗man.
9 ˈYö Yesu ˗ya pö ö ˗bha gwëëˈˈ ˗nu ˗dhɛ ˗wo nu ˈˈyitagɔ ˈnën ˈdɛdɛ do ˈka ö ꞊dhiaa kö mɛn ˗gbaa ˈwo bhë ˈwa ˗dho taaˈˈ ö ˗ta.
10 ˗A ˗gɛn ˗mü ꞊dhɛ ˈˈyua bho ˈö˗ wo mɛn ꞊vadhɛ ˗bha bhë ˗a ˗wɔn ˈgü, mɛn ˈˈpɛpɛ ˈö ˈˈyua ˈˈgbɩɩ˗ ˗yö kun ˗an ˗bha, ˗wo ˗nu ˈö ˈwo ˗lo ˗a ˗züzü ˗dhɛ ꞊gban ˈgü kö ˈwo ˈpa ˗a ˈka.
11 ˗Zuu yaa ˗nu ˗dee ˗ʒiaan ˗wa ˗kpan ˗a ˗bha, ˗wo ˈˈgblëënnu ˈˈshia˗ ˗a ˈˈdhiʋ̈ ˈö ˈwo ˗gbla ˈö ˈwo˗ pö: «˗Zlan Gbö ˗mü ü ˈka.»
12 ˈˈKɛɛ ˈyö yö ˗an ˗gɔ ˈˈsee ˈö˗ pö ˗an ˗dhɛ ˗gɛnɲaan ˈka ꞊va ꞊dhɛ, mɛn ˈö˗ ˈka ˈwa ˗dho wo ˈˈdhi bho ˗a ˗ta toŋtoŋdhö.
13 ˗Yö ˗dho ˈö ˗da ˗tɔn do ˈbhaa ˗ta, ˈyö ö ˗bha gwëëˈˈ ˈbhaa ˗nu ˗dhɛ, ˈyö ˈwo dho ˗a ˈˈpiʋ̈ mü.
14 ˈYö ö ˗kɔ ˗yɛ ˗a mɛn ˗kɔŋ do ö ga ꞊plɛ (12) ˗bha, ˈyö ˗an ˗dhɛ bɔmɛn ˗nu. Mɛn ˗nu ˈwo bhë, wo ˈnën ˈwo ˗kë ˗a ꞊kee˗ ˗mɛn ˗nu ˈka, ˈö ˗an bɔ ˗zlanwopö ꞊taabha,
15 ˈö ˗kɔmɔnwɔnbhasü nu ˗an ˗dhɛ kö ˗wo ˗zuu yaa ˗nu bho mɛn ˗nu ˈgü.
16 Mɛn ˗kɔŋ do ö ga ꞊plɛ (12) ˈö Yesu ˗yö ö ˗kɔ ˗yɛ ˗an ˗bha ˈˈdhʋ̈, ˈyö ˈwo ˗tɔ: Simɔn ˈö˗ ˈtɔ kpɔ ˈö˗ ˗dhɛ ˈzü Piɛɛ,
17 Zakö Zebede gbö, waa ö ꞊dhegblü Zan, (Wo ˈnën ˈö Yesu ˗yö ˗an ˗dhɛ Boanɛʒɛsö. ꞊Waa˗ pö ˈˈdhʋ̈, ˗a ˗gɛn ˈnën ˗tɔ «ˈNën ˗nu ˈwo ꞊dhɛ dha ˗bha ˈˈwɩ ˗sü ˈdhö.»)
18 Andre, Filipö, Batedhemi, Matiö, Toma, Zakö ˈö ˗kë Alüfe gbö ˈka, Tade, Simɔn ˈö ˈwɔn ˗nu ˗kë ö ꞊faan ˈka,
19 waa Zuda Isikadhiɔtö ˈö Yesu ˈˈdhoodɔ ˗a ˈyɔɔ˗ ˗nu ˗gɔ ꞊taabha bhë.
ˈDhɛ ˈˈtʋ̈ŋ ˈnën ˈbhaa ˗yö ˗ʒiö, Yesu ˗yö ˗dho ˈö ˗da ˈkɔ do ˈbhaa ˈgü.
20 ˈYö mɛn ˗nu ˗wo nu mü ˈzü ꞊va ꞊dedewo, ˈö˗ ˗wɔn ˈgü Yesu waa ö ˗bha gwëëˈˈ ˗nu ˈwaa kun ˗mɔn ˗ni ˈgü ˗a ˗bha ˗ʒiaanwo kö ˗wo pë ˗bhö.
21 ˈˈKɛɛ ˈdhɛ ˈö˗ ˗bha ˈkɔdhigümɛn ˗nu ˗wa man ˈˈdhʋ̈, ˈyö ˈwo nu ˗a ˈkun. ˗A ˗gɛn ˗mü ꞊dhɛ ˗wo ˗kun ˗a pö ˗ni ˈgü: «Slaaˈˈ ˗ya ˗da ˗a ˈgü.»
22 ˈTɔŋ˗ ˗gɔmɛn ˗nu ˈö ˈwo go Zedhizadhɛmö ˈö ˈwo nu, ˗wo ˗kun ˗a pö ˗ni ˈgü ˈpö: «Bɛɛzebubö* ˗ya ˈgü. ˗Zuu yaa ˗nu ˗gɔmɛn ˈnën ꞊faan nu ˗a ˗dhɛ ˈyö ˗mɔn ˗zuu yaa ˗nu ˗bho mɛn ˗nu ˈgü ˗sü ˗bha.»
23 ˈDhɛ ˈö ˗kë ˈˈdhʋ̈, ˈyö Yesu ˗yö ˗an ˗dhɛ, ˈyö ˈwɔnzuan ˈbhaa ˗nu sü ˈö˗ ˗yɔ bɔ ˗a ˈka ˗an ˗gɔ, ˈö˗ pö: «Sɔtraan ˗yö ˗dho Sɔtraan bho mɛn ˗nu ˈgü ˗kɔ ˗kë ꞊dhɛ?
24 ˗Gblüdëdhɛ ˈö˗ ˈgümɛn ˗nu ˗wo ˗gban wo ˈko ˗nu ˗gɔ ˈö ˈwo ˗gblü gɔn, ˈwü ˈnën ˈö˗ wo.
25 Ɛɛnˈˈ ˈkɔdhi ˈö˗ ˈgümɛn ˗nu ˗wo ˗gban wo ˈko ˗nu ˗gɔ, ˗a ˗gɛn ˈyaa ꞊mɔɔn˗ ˗bha kö ˗yö ˗gban.
26 ˈDhɛ ˈö ˈˈdhʋ̈, Sɔtraan ˗ya ˈko zë ö ˗de ˈka, ɛɛnˈˈ ˗a ˗bha mɛn ˗nu ˗wa ˈˈpɛ ˈgü, ˗a ˗gɛn ˈti ˗dho ˗gban, kö ˗a ˗bha ˗ya ɲën ˈnën bhë.
27 Mɛn ˈö ˗da gɔɔn˗ ˈgügbɩɩsü ˈbhaa ˗gɔ ˈkɔɔ kö ˈö˗ ˗bha ꞊kwɛɛ˗ ˗nu ꞊kwaan, ˗a dua ˗mü kö ˗yö ˈgügbɩɩmɛn ˈö bhë ˗a ˗klu ꞊köŋ ˗blɛɛsü. ˗Ya ö bo ˗a ˗klu ˗sü ˈka, ˈyö ˗dho ˗mɔn ˗a ˗bha ꞊kwɛɛ˗ ˗nu ˈsü ˗sü ˗bha.
28 A˗ ˗pö ka ˗dhɛ gagade ˈka ꞊dhɛ, ˈwɔn yaa ˈˈpɛpɛ ˈö mɛnbhɩɩdhe ˗nu ˗wa ˗kë ɛɛnˈˈ ˈsi ˈˈpɛpɛ ˈö ˈwo˗ bho, ˗Zlan ˗dho ˗an ˗bhawɔn ˈto ˗a ˗bha.
29 ˈˈKɛɛ mɛn ˈö ˗we ˗zuu ˈˈslʋ̈ʋ̈slʋ̈ ˗dhɛ, yö ˈti ˗dho ˗a ˗bhawɔn ˈto toŋtoŋdhö. ˗A ˈwɔn yaa ˈˈdhaŋga ˗dho ˈto ˗a ˗bha ˗toëpö ˈka.»
30 ˈPë ˗kë ˈö Yesu ˗yö ˗wo ˗nu ˈwo bhë ˗an pö, ˈyö ˗tɔ ˗wo ˗kun ˗a pö ˗ni ˈgü ꞊dhɛ: «˗Zuu yaa ˗ya ˈgü.»
31 ˈDhɛ ˈö ˗kë ˈˈdhʋ̈, ˈyö˗ dhe waa˗ ꞊dhegblü ˗nu ˗wo nu, ˈyö ˈwo to ˈˈkpɛnŋdhö ˈö ˈwo mɛn do ˈbhaa bɔ kö ˗ya ˗dhɛ.
32 ˈDhɛ ˈö ˗kë ꞊dhɛ mɛn ꞊va ˗wo ˗kun ˈɲaannu ˗sü ˈka ˗a ˗züzü bhë, ˈyö ˈwo˗ pö ˗a ˗dhɛ: «˗Dhɛ ˗ga! Ü dhe waa ü ꞊dhegblü ˗nu ˗wo dɔ ˗sü ˈka ˈˈkpɛnŋ, ˗wa ˈˈpiʋ̈ ˈü nu.»
33 ˈˈKɛɛ ˈyö Yesu ˗ya ˗yɔ bɔ ˗an ˗gɔ ˈö˗ pö: «De ˗nu ˈwo ˗tɔ n dhe waa n ꞊dhegblü ˗nu?»
34 ˈDhɛ ˈö˗ pö ˈˈdhʋ̈, ˈyö mɛn ˗nu ˈö ˈwo kun ˗ya ˗sü ˈka ˗a ˗züzü bhë ˗an ˗ga ˈö˗ pö: «N dhe waa n ꞊dhegblü ˗nu ˈnën ˈwo ꞊nɛn.
35 Mɛn ˈˈoo ˗mɛn ˈö ˗Zlan ˗zokunwɔn ˗kë, ˗a mɛn ˈö bhë yö ˈnën ˈö ˗tɔ n ꞊dhegblü gɔɔn˗, n ꞊dhegblü dhebɔ ɛɛnˈˈ n dhe.»
-Zoto -a ˈˈpiʋ̈ -wɔn -nu
^ Ɛɛnˈˈ «ˈö˗ dɔɔ˗ ˗ya ga ˗a ˗bha.»
^ Ɛɛnˈˈ «ˈö˗ dɔɔ˗ ˗ya ga ˗a ˗bha.»
^ «Sɔtraan ˈnën ˈwo˗ ˗dhɛ ˈˈdhʋ̈.»
