Nɔɔn˗ ˗së ˈsëëdhɛ ˈö Makö ˗ya ˗bɛnzë 4:1-41
4 Yesu ˗yö ˗ya mɛn ˗nu ꞊klaŋ kë ˗sü ˗bha ˈzü ꞊weeyi ˈˈkpɔnŋ ˈˈdhiʋ̈, ˈyö mɛn ꞊va ꞊dede ˗wo dho wo ˈkwëëdhö ˗a ˈˈpiʋ̈ mü. ˈDhɛ ˈö ˗kë ˈˈdhʋ̈, ˈyö mɛn ˗nu ˈwo bhë ˗an to ˈˈyi ˈˈkpɔnŋ ˈˈdhiʋ̈ mü ˈö ˗da ˈˈyitagɔ ˈgü ˈö ˈɲaannu, ˈyö bhɔ ˈˈyi ˈˈkpɔnŋ ˗dhɛ ꞊taa ˈdɛdɛ ˈka.
2 ˈYö bɔ ˈwɔnzuan ˗nu ˗ta ˈö ˗ya ˗an ꞊klaŋ kë ˗sü ˗bha ˈwɔn ꞊va ˈka, ˈyö˗ pö ˗an ˗dhɛ:
3 «˗Ka ka ˈˈtʋ ˈto. Gɔndënën do ˗yö ˗yö ˈˈkpɛnŋ ˈö dho pë ta˗.
4 ˈDhɛ ˈö kun ˈö ˗bha pë ga ˗pɛn ˗ni ˈgü, ˗a ˈbhaa ˗nu ˗wo ˗puö ˗kpinŋ ˈˈpiʋ̈, ˈyö ˗mannën ˗nu ˗wo nu ˈwo ˗an ˗bhö.
5 ˗A ˈbhaa ˗nu ˗wo ˗puö ꞊gwaadhɛ ˈö ˈˈsɛ ˈyaa mü ꞊va ˗a ˈgü, ˈyö ˈwo to mü ˈwo bhɔ, ˗a ˗gɛn ˗mü ꞊dhɛ ˈˈsɛ ˈdɛdɛ ˈnën mü.
6 ˈˈKɛɛ ˗dhɛ ˈö ˈɲaan˗ ˗yö bhü, ˗yö ˗an ˗gʋ̈ ˈö ˈwo ga, ˈyö sü ꞊dhɛ ˗an ɲun ˈyaa kun ˈˈsɛɛdhö ꞊gblɛɛn.
7 ˗A ga ˈbhaa ˗nu ˗wo ˗puö ˈˈglɛɛn ˗kpɔɔ ˈgü. ˈDhɛ ˈwo bhɔ, ˈyö ˈˈglɛɛn ˗kpɔɔ ˗yö sɔ ˗an ˗ta ˈö ˗an zë. ˗A ˗wɔn ˈgü wo ˈti wo ga ˗ya.
8 ˈYö˗ ga ˈˈwɛɛ ˈbhaa ˗nu ˗wo ˗puö ˈˈsɛ ˗së ˈgü, ˈyö ˈwo bhɔ ˈö ˈwo ˗gla, ˈyö ˈwo ˗ya wo ga ˗ya ˗sü ˗bha. ˈYö˗ ˈbhaa ˗nu ga ˗kë ˗kɔŋ ˗yaaga (30), ˈyö˗ ˈbhaa ˗nu ˗bha ˗kë ˗kɔŋ ˈˈsɔɔdo (60), ˈyö˗ ˈˈwɛɛ ˈbhaa ˗nu ˗bha ˗kë ˈpö këŋ do (100).»
9 ˈYö go mü ˈzü ˈö˗ pö ˗an ˗dhɛ: «Mɛn ˈö ˈwɔn ˈgüman ˗tʋ ˈdhö˗ ˗gɔ, ˗yö ö ˈˈtʋ ˈto ˗së ˈka.»
10 ˈDhɛ ˈö Yesu ˗yö to ö do ˈka, ˈyö˗ ˗bha gwëëˈˈ ˈbhaa ˗nu waa˗ mɛn ˗kɔŋ do ö ga ꞊plɛ bhë ˈwo˗ dhɛɛˈˈ kpɔ ˈwɔnzuan ˗nu ˈö˗ sü bhë ˗an ˗gɛn ˈka.
11 ˈYö˗ ˗yɔ bɔ ˗an ˗gɔ ˈö˗ pö: «ˈWɔn ˈö ˗gban ˗Zlan ˗bha ˗Gblüdëdhɛ ˗bha ˗ya ˈˈdhɛ bho ˗a ˗ta ka ˗zë ka ˗dhɛ kö ˈka˗ ˈgüman. ˈˈKɛɛ mɛn ˈˈwɛɛ ˗nu ˈwo to ˗an ˗bha ˗dho ˈto ˈwɔnzuan ˈgü.
12 ˗A ˗wɔn ˈgü, ˈkö ˗kë ꞊dhɛ ˗wo ˗dhɛ ˗ga, ˈwaa pë ˈbhaa yö. ˈKö ˗kë ꞊dhɛ ˗wo wo ˈˈtʋ ˗to, ˈpë ˈwo˗ man ˈwaa˗ ˈgüman ö ˈklɔɔ˗ ˈka. ˈPë ˈö ˗kë ˈö wo ˈti ˗dho wo ꞊yɛɛ kë ˗Zlan ˈˈpiʋ̈ kö ˗yö ˗an ˗bhawɔn ˈto, ˈyö bhë.»
13 ˈYö go mü ˈzü ˈö˗ pö ˗an ˗dhɛ: «ˈWɔnzuan ˈö bhë ka ˈti˗ ˈgüman, ˗a ˈˈwɛɛ ˗nu ˈwo to ka ˗dho ˗an ˈgüman ˗kɔ ˗kë ꞊dhɛ?
14 «Pë ga ˈö pëtamɛn ˗ya ta ˈyö ˗tɔ ˗Zlan ˗wo.
15 Ʒiaan ˗gbloo ˈˈpiʋ̈ ˗dhɛ ˈö pëga ˗yö ˗puö mü bhë, ˈyö ˈnën ˈö ˗tɔ mɛn ˗nu ˈö ˈwo ˗Zlan ˗wo man ˈö Sɔtraan ˗yö to mü ˈö ˗Zlan ˗wo ˈwo˗ man bhë ˈö˗ bho ˗an zuʋ̈ˈˈ ˈgü.
16 ˗A pëga ˈbhaa ˗nu ˗wo ˗puö ꞊gwaadhö. ˗Kɔ do ˈö bhë ˗a ˈka, mɛn ˈbhaa ˗nu ˗wo ˗Zlan ˗wo ˗man ˈö ˈwo to mü ˈwo ˗we ˗a ˗bha zuʋ̈gblüdhi ˈka.
17 ˈˈKɛɛ ˗a ɲun ˈyaa ʒiö ˗an ˈgü. ˗A ˗wɔn ˈgü ˗wo ˗we ˗Zlan ˗wo ˗bha ˈˈtʋ̈ŋ ˈnën ˈbhaa ˈˈpiʋ̈, ˈˈkɛɛ ˈwɔn ˈˈgbɩɩ˗ ɛɛnˈˈ ˈˈklʋʋbhɔdhe ˗ya nu ˗an ˗ta ˗Zlan ˗wo ˈwo˗ man bhë ˗a ˗wɔn ˈgü, ˈyö ˗an ˗bha ˗zoyödhe ˗gɔ ˗yö ga.
18 ˗A ga ˈbhaa ˗nu ˗de ˈpö ˗wo ˗puö ˈˈglɛɛn ˗kpɔɔ ˈgü. Wo ˈnën ˈwo ˗tɔ mɛn ˗nu ˈö ˈwo ˗Zlan ˗wo man,
19 ˈˈkɛɛ ˈö zuʋ̈dhiʋ̈tɛ ˗nu ˈwo ˈˈkpɔnŋ ꞊taa yö waa ꞊nɔɔn ˗dhɔ ˗bha mɛn zuʋ̈ˈˈ ˈsü ˗sü ˈö ˈˈkpënŋ˗ ˗kë mɛn ˗gɔ waa zuʋ̈ˈˈ ˗bhɔ pë ˗bha ˗sü ꞊suu ˈˈoo ˗suu ˗wo sɔ ˗Zlan ˗wo ˈö ˈˈdhʋ̈ ˗a ˗ta, ˈö˗ ꞊trɔɔn ˈyaa kë ˗dhö.
20 ˗A ˗dhɛ ˗nu ˈwo ˗puö ˈˈsɛ ˗së ˈgü wo ˈnën ˈwo ˗tɔ mɛn ˗nu ˈwo wo ˈˈtʋ ˈto ˗Zlan ˗wo ˗bha, ˈö ˈwo wo ˗kɔ ˗ya ˗a ˗gɔ ˗së ˈka ˈö ˈwo ˗gla ˈö ˈwo wo ˗kpaa ˗nu ˗ya, ˈö˗ ˈbhaa ˗nu ga ˗kë ˗kɔŋ ˗yaaga (30), ˈö˗ ˈbhaa ˗nu ˗bha ˗kë ˗kɔŋ ˈˈsɔɔdo (60) ɛɛnˈˈ këŋ do (100).»
21 ˈYö go mü ˈzü ˈö˗ pö ˗an ˗dhɛ: «˗Wo ꞊laŋba ˗dɔ ꞊töö ꞊löö ɛɛnˈˈ ˈliŋ˗ ꞊löö ˗ee? ˈWaa˗ dɔ ꞊ʒiaan ꞊laŋba ˗dɔ ˗a ˗ta ˗pë ˗ta ˗ee?
22 ˈDhɛ ˈö ˈˈdhʋ̈, pë ˈbhaa ˈkö ˈˈdhɛ dho kë ˗a ˗ta ˈö ˈˈdhɛ yö ˈti ˈdho ˈgo ˗a ˗ta ˈyaa ˈdhö. Ɛɛnˈˈ pë ˈbhaa ˈkö ˗dho kë ˗bin ˗sü ˈka ꞊klɔɔklɔɔdhö ˈö yö ˈti ˗dho yö zaŋ ˗ta ˈyaa ˈdhö.
23 Mɛn ˈö ˈwɔn ˈgüman ˗tʋ ˈdhö˗ ˗gɔ, ˗yö ö ˈˈtʋ ˈto ˗së ˈka.»
24 ˈYö go mü ˈzü ˈö˗ pö ˗an ˗dhɛ: «Pë ˗nu ˈa ˗an pö ˗ni ˈgü ka ˗dhɛ yö, ˗ka ka ˈˈtʋ ˈto ˗an ˗bha ˗së ˈka. Pë ˈö ˈka pë dan ˗a ˈka mɛn ˗nu ˗dhɛ, ˈyö ˈwo ˗dho ka ˗bha dan ˗a ˈka ˈpö, ˈö ˈwo˗ ꞊tɔɔ ˗da ˗a ˗ta ˗ʒiaanwo.
25 ˗A ˗gɛn ˗mü ꞊dhɛ mɛn ˈö pë ˈdhö˗ ˗gɔ, ˗wo ˗dho ˗a ˈbhaa nu ˗a ˗dhɛ. ˈˈKɛɛ mɛn ˈö pë ˈbhaa ˈyaa˗ ˗gɔ, ˗a ˈdhɛ ˈö˗ ˗gɔ ˗ʒiaanwo ˗wo ˗dho ˗a ˈsü ˗a ˗gɔ.»
26 ˈYö go mü ˈzü ˈö˗ pö: «˗Zlan ˗bha ˗Gblüdëdhɛ ˗yö ꞊dhɛ gɔndënën do ˈö dho pëga ˗pɛn ˈbhlaa˗ ˗a ˈdhö.
27 ˈˈBin ˗ya ˈmën ˈyö yi zë, ˈö ˗dhɛ ˗ya ꞊kpɔɔ ˈö ꞊luu. ˈYö pëga ˗nu ˈö ˗an ta ˈö ˈwo wo ˗bhoŋ ˗ya ˈö ˈwo ˗gla, ˈˈkɛɛ ˈö ˗kɔ ˈö ˗kë ˗a ˈka ˈyaa˗ dɔ.
28 ˈˈSɛ ˈö pë ta ˗a ˈgü bhë, yö ˈnën ˈwɔn ˗nu bhë ˗an ꞊gban ˗kë ö ꞊diëë ˈˈdhiʋ̈dhiʋ̈. ˗A zü ˗yö ˗dɔ ˗a ˈˈdhü ˗bha bhɔ ˗sü ˗ta, ˈyö dho ˈö ö ˗kpaa ˗ya, ˈyö˗ ga ˗nu ˗wo ˗kian ˗a ˗kpaa ˈgü.
29 ˗A ga ˗nu ˗wa wo bo ˗kian ˗sü ˈka ˈˈdhʋ̈, ˈyö ˗dhaa ˗da ˗a ˈgü, ˗a ˗gɛn ˗mü ꞊dhɛ kö ˗a ˈˈkan ˈˈtʋ̈ŋ ˗ya ˗wo.»
30 ˈYö go mü ˈzü ˈö˗ pö ˗an ˗dhɛ: «ˈMën ˈö ˈkwa ꞊mɔɔn˗ ˗bha ˈkwa ˗Zlan ˗bha ˗Gblüdëdhɛ ˗zɔn ˗a ˈka? Ɛɛnˈˈ ˈwɔnzuan ˗mɛɛn ˈö ˈkwa ꞊mɔɔn˗ ˗bha ˈkwa˗ ˈgü ˗pʋ ˗a ˈka?
31 ˗Zlan ˗bha ˗Gblüdëdhɛ ˗yö ꞊dhɛ mutaadö ga ˈdhö. ˈˈTʋ̈ŋ ˈö ˈwo˗ ta ˗ni ˈgü ˗a ˈka kö ˗yö tapë ga ˗nu ˈˈpɛpɛ ˈwo ˈˈkpɔnŋ ꞊taa ˗a ˈˈtɩtɩ ˗sü ˈka.
32 ˈˈKɛɛ ꞊waa˗ ta ˗ya bhɔ, ˗yö ˗gla ˈö ˗kë ˈˈdhü ˈˈpɛpɛ ˈwo˗ ta ˈˈtʋʋdhɛɛdhö ˗an ˈkpii˗ ˗sü ˈka. ˗A kwɛɛˈˈ ˗nu ˗wo ˗kë ˈkpii˗, ˈö ˗mannën ˗nu ˗mɔn wo ˈkɔ ˗dɔ ˗a ꞊dhɔŋ ꞊löö ˗sü ˗bha.»
33 Yesu ˗yö ˗bɔ ˈwɔnzuan ꞊suu ˈö bhë ˗a ꞊va ꞊dede ˗ta ˈö ˗zlanwopö ˗an ˗dhɛ. ˈˈKɛɛ ˗yö ö ˈˈtʋ̈ŋ ˗kë ˈpë ˈwo ˗dho ˗mɔn ˗a ˈgüman ˗sü ˗bha ˗a ˈgü.
34 ˈYaa kun dhiaŋ zë ˗ni ˈgü ˗an ˗dhɛ ˈˈwɛɛwɛ kö yö ˈti ˈwɔnzuan ˈsü. ˈˈKɛɛ waa ö ˗bha gwëëˈˈ ˗nu ˗wa ˈto wo do ˈka, ˈyö˗ ꞊gban ˈˈpɛpɛ ˈgü ˗pʋ ˗an ˗dhɛ.
35 ˗Dhɛkpaɔyi ˈö bhë ˗a ˈka, ˈdhɛ ˈˈbin ˈdhö ˈmën ˗ni ˈgü, ˈyö˗ pö ö ˗bha gwëëˈˈ ˗nu ˗dhɛ: «˗Kwa ˈˈyi ˈˈkan ˈkwa ˈdho ˈˈyi ꞊taabha.»
36 ˈDhɛ ˈö˗ ˗bha gwëëˈˈ ˗nu ˗wa pö mɛn ˗gbaa ˈwo bhë ˗an ˗dhɛ ˗wo ˈdho, ˈyö ˈwo Yesu sü ˈˈyitagɔ* ˈgü ˈö ˈwo dho ˗a ˈka. ˗Ya ˈˈkan ˈˈyitagɔ ˈö kun ˗a ˈgü bhë ˗a ˗bha, ˈˈyitagɔ ˈˈwɛɛ ˈbhaa ˗nu ˗kun mü ˈpö.
37 ˈDhɛ ˈwo ˈdho ˗ni ˈgü, ˈyö ˈˈtee ˈˈgbɩɩ˗ ˗yö ˗ya ʒiö ˗sü ˗bha, ˈyö ˈˈyi kpö kpö ˗nu ˗wo ˗ya ꞊wɛnŋ ˗sü ˗bha ˈˈyitagɔ ˈgü, ˈö ꞊ɲɔɔn mü kö ˈˈyi ˈdho˗ ˗a pa.
38 ˈˈKɛɛ ˗a ˈˈtʋ̈ŋ ˈö ˈˈdhʋ̈ ˗a ˈgü, kö Yesu ˗ya pë dɔ ö ˗gɔ ˗gɔ, ˗yö yi zë ˗ni ˈgü ˈˈyitagɔ ꞊zlöö ꞊ʒiaan. ˈYö ˈwo pa ˗a ˗bha ˈwo˗ pö: «˗Gɔmɛn, ga ˈö ˗ya yö kwa ˗bha yö ˈbhaa˗ yö ˗ee?»
39 ˈDhɛ ˈö ˗kë ˈˈdhʋ̈, ˈyö ꞊luu ˈö ˗gbla ˈˈtee ˈö bhë ˗a ˗ta ˈö˗ pö ꞊weeyi ˗dhɛ: «˗Bhö ˈduannu! ˗Dhɛ ˗ta ˗yö ga ü ˗ta!» ˈYö ˈˈtee ˗yö ˈduannu, ˈö ˗dhɛ ˗ta ˗yö dɔ dinŋdhö.
40 ˈDhɛ ˈö ö bo ˈyö˗ pö ˗an ˗dhɛ: «ˈMën ˗kë ˈö ˈˈsuʋ̈ ˗yö ka ˗kë ˈˈdhʋ̈? ˗Zoyödhe ˈyaa ka ˗gɔ ꞊köŋ ˗ee?»
41 ˈˈKɛɛ ˈyö ˈˈsuʋ̈ ˗zizisü ˗yö ˗da ˗an ˈgü ꞊dedewo, ˈyö ˈwo˗ pö wo ˈko ˗nu ˗dhɛ: «Mɛn ꞊suu ˗mɛɛn ˈö ˗kë ꞊ni? ˈˈTee waa ꞊weeyi ˗nu ˗dee ˗ʒiaan ˗wo ˈwɔn ˗man ˗a ˗ta.»
-Zoto -a ˈˈpiʋ̈ -wɔn -nu
^ Ɛɛn «ˈyö ˈwo˗ to ꞊dhɛ ˗kɔ ˈö kun ˗a ˈka bhë ˗a ˈdhö ˈˈyitagɔ ˈgü.»
