Nɔɔn˗ ˗së ˈsëëdhɛ ˈö Makö ˗ya ˗bɛnzë 5:1-43
5 ˈDhɛ ˈö ˗kë ˈˈdhʋ̈, ˈyö ˈwo ꞊weeyi ˗kan ˈö ˈwo dho Zedhasa ˗sɛ ˈgü.
2 ˈDhɛ ˈö Yesu ˗yö go ˈˈyitagɔ ˈgü ˈö yö ˈˈshia˗, ˈyö to mü ˈö gɔndënën do ˈö ˗zuu yaa ˗yö kun ˗a ˈgü ˈö go blɔɔndhɛ ˗nu ꞊zinŋgü mü ˈö nu ˗a ˗gɔ ʒiaan˗.
3 Gɔndë ˈö bhë ˗yö ˗kun wɔ ˗ni ˈgü blɔɔndhɛ ˗nu ꞊zinŋgü mü. Mɛn ˈbhaa ˈyaa kun ˗mɔn ˗ni ˈgü ˗a ˗bha kö ˗ya ˗lö ꞊yɔɔga ˈka ˗ʒiaanwo, ˈö dho ˈö yö ˗a ˈka ˈˈtʋ̈ŋ ˈö bhë ˗a ˗bha.
4 ˈˈTʋ̈ŋ ˈbhaa ˗nu ˈka ˗wa ˗kɔ ˗nu ˗klu ꞊yɔɔga ˈka, ˈö ˈwo˗ ˗gɛn ˗nu yö ˈˈdhü ˈgü. ˈˈKɛɛ ˗yö ˗a ꞊yɔɔga ˗kaan, ˈö˗ ˈˈdhü ˗nu wü. Mɛn ˈö ˗dho kë ˈˈgbɩɩ˗ kö ˗a ˗kɔ ˗yö ˗mɔn ˗a ˗bha ˈyaa kun ˗dhö.
5 ˈƝënŋgü waa gbeŋ ˗nu ˈka, ˗yö ˗dɔ mɛn ˗wɛɛbhodhɛ waa ˗tɔn ˗ta ˗dhɛ ˗nu ˈgü ˈö ˗gbla ˗kplawo, ˈö ö ˗de ˗gi ˗gwö ˗nu ˈka.
6 ˈDhɛ ˈö dɔ ꞊gblɛɛn ˈö ˗kpan Yesu ˗bha, ˈyö ˗bialö ˈö dho ˈö ˈˈgblëënnu ˗a ˈˈdhiʋ̈.
7 ˈYö ˗gbla ˈˈgbɩɩ˗ ˈka ˈö˗ pö: «Yesu, ˗Zlan ˈö pë ꞊gban ˈˈpɛpɛ ˗gɔ ˗ta ˗a Gbö, ˗mën ˈö ko ꞊zinŋgü? ˗Bhö ü ˗wo ˗bhö n ˗dhɛ ˗Zlan ˈtɔ ˈgü ꞊dhɛ ü ˈti nu kö ˈü n ˈˈklʋʋbhɔ.»
8 ˈPë ˈö ˗kë ˈö˗ pö ˈˈdhʋ̈ ˈyö ˗tɔ Yesu ˗ya ˗pö ˗a ˗dhɛ: «˗Zuu yaa, ˗bhö ˈgo gɔndënën ˈö bhë ˗a ˈgü.»
9 ˈYö Yesu ˗ya dhɛɛˈˈ kpɔ ˈö˗ pö: «˗Wo ü ˗dhɛ de?» ˈYö˗ pö: «˗Wo n ˗dhɛ ˈˈGblü ꞊va, ˗a ˗gɛn ˗mü ꞊dhɛ yi ꞊va.»
10 ˈYö ꞊bhɛɛ Yesu ˗dhɛ ˗gɛnɲaan ˈka ꞊va kö ˈya ˗dho ˗zuu ˗nu ˈwo ˈˈdhʋ̈ ˗an kë kö ˗wo ˈgo ˈˈsɛ ˈö bhë ˗a ˈgü.
11 ˗Bhɔ ꞊kpluu do ˈbhaa ˗kun pë ˗bhö ˗ni ˈgü ˗tɔn ˈˈkwlëë˗ mü.
12 ˈYö˗ ˗zuu yaa ˗nu ˗wo ꞊bhɛɛ Yesu ˗dhɛ ˈö ˈwo˗ pö: «ˈBha yi kë, dɔ ˈˈgbɩɩ˗ ˈü ˈˈwɩ ˗a ˗bha kö ˈyi ˗da bhɔ ˗nu ˈwo yö ˗an ˈgü.»
13 ˈYö Yesu ˗yö ˗we ˗a ˗bha. ˈYö ˗zuu yaa ˗nu ˗wo go gɔndënën ˈö bhë ˗a ˈgü, ˈyö ˈwo ˗da ˗bhɔ ˗nu ˈgü. ˈYö ˗bhɔ ˗nu ˈö ˈwo ˗mɔn ˈˈgblü ꞊plɛ (2.000) ˗bha bhë, ˈö ˈwo ꞊yɔɔ goo ˗bha ˈwo ꞊wɛnŋ ꞊weeyi ꞊bhaa, ˈö ˈwo ga.
14 ˈDhɛ ˈö ˗kë ˈˈdhʋ̈, ˈyö mɛn ˗nu ˈwo kun ˗bhɔ ˗nu bhë ˗an ˗maankë ˗ni ˈgü ˈwo ꞊duëë ˈö ˈwo dho ˈwo˗ ꞊blɛɛ ˈpömɛn ˗nu waa ꞊gbɛɛgümɛn ˗nu ꞊gban ˈˈpɛpɛ ˗dhɛ. ˈYö mɛn ˗nu ˗wo nu kö ˈwɔn ˈö ˗kë mü ˈwo˗ yö.
15 ˈYö ˈwo nu Yesu ˈˈpiʋ̈ ˈö ˈwo ˗kpan gɔndënën ˈö ˗zuu yaa ˈˈGblü ꞊va ˗wo go ˗a ˈgü bhë ˗a ˗bha kö ˗yö ˈɲaannu ˗sü ˈka, kö sɔ ˗yö ˗a ˗bha, kö ˗ya ö ˗de ꞊slɔɔ. ˈYö ˈˈsuʋ̈ ˗yö ˗da ˗an ˈgü ꞊dedewo.
16 ˗Ya ˈgo mü ˈzü, mɛn ˗nu ˈö ˈwɔn ˈö bhë ˈö ˗kë ˗an ˈˈɲaan ˈka, ˗wo ˗kɔ ˈö gɔndënën ˈö ˗zuu yaa kun ˗a ˈgü bhë ˈö ö ˗de ꞊slɔɔ ˗a ˈka waa ˈwɔn ˈö ˗kë ˗bhɔ ˗nu ˈka bhë, ˗an ꞊gban ˈˈpɛpɛ ˗gɛn ˗dɔ ˗an ˗dhɛ.
17 ˈDhɛ ˈö ˗kë ˈˈdhʋ̈, ˈyö ˈwo ˗ya bhɛɛˈˈ ˗sü ˗bha Yesu ˗dhɛ kö ˗yö ˈgo wo ˗bha ˈˈsɛ ˈgü.
18 ˈDhɛ ˈö Yesu kun ˗da ˗ni ˈgü ˈˈyitagɔ ˈgü kö ˈö ʒiö, ˈyö gɔndënën ˈö ˗zuu yaa ˗yö kun ˗a ˈgü bhë ˈö ꞊bhɛɛ ˗a ˗dhɛ kö ˈö ʒiö ˗a ꞊kee˗.
19 ˈˈKɛɛ Yesu yö ˈti ˈˈwɩ ˗a ˗bha. ˈYö˗ pö ˗a ˗dhɛ ꞊ʒiaan: «˗Bhö ü ꞊yɛɛ kë ˈü ˈdho ü ˗bha ˈkɔɔmɛn ˗nu ˈˈpiʋ̈, kö ˈwɔn ˈˈpɛpɛ ˈö Zoova ˗ya ˗kë ü ˗dhɛ waa ü ˗wëë ˈö˗ ˗kë bhë ˈü˗ blɛɛˈˈ ˗an ˗dhɛ.»
20 ˈYö gɔndënën ˈö bhë ˈö dho ˈö pë ˈˈpɛpɛ ˈö Yesu ˗ya ˗kë ˗a ˗dhɛ bhë, ˈö ˗ya ˗a blɛɛˈˈ ˗sü ˗bha Dekapɔdhö* ˗dhɛ ꞊gban ˈˈpɛpɛ ˈgü. ˈYö˗ ˈwɔn ˗yö mɛn ꞊gban ˈˈpɛpɛ kun.
21 ˈDhɛ ˈö Yesu ˗yö ˗ya ˈˈyitagɔ ˈgü ˈö ˈˈyi ˗kan ˈzü ˈö dho ˈˈyi ꞊zlöö, ˈyö mɛn ꞊va ꞊dede ˗wo nu ˗a ˈˈpiʋ̈ ꞊weeyi ˈˈdhiʋ̈ mü.
22 ˈYö ˗yakwëë ˗kë ˗a ˈgü ˗kɔ ˈwɔnyëë˗ do ˈwo˗ ˗dhɛ Zailusö ˗yö nu mü. ˈDhɛ ˈö ˗kpan Yesu ˗bha, ˈyö yö ö kpɔn ˈgü ˗a ˈˈdhiʋ̈.
23 ˈYö ꞊bhɛɛ ˗a ˗dhɛ ˗gɛnɲaan ˈka ꞊va ˈö˗ pö: «N ˈdhunën ˗ya wɔ ˈya˗,* ˗bhö dɔ ˈˈgbɩɩ˗ ˈü nu ˈü ü ˗kɔ ˈpa ˗a ˈka kö ˗a ˗dhɛ ˗yö bo, kö ˗yö dha.»
24 ˈDhɛ ˈö˗ pö ˈˈdhʋ̈, ˈyö Yesu ˗yö ˗ʒiö ˗a ꞊kee˗. ˈYö mɛn ꞊va ꞊dede ˗wo to ˗a ˈˈpiʋ̈, kö ˗wo ˗maan maanˈˈ ˗ni ˈgü ˗a ˗bha ʒiaan ꞊gban ˈka.
25 Dhebɔnën do ˈö ꞊ɲɔɔn ˗bhɔ dhebɔ ˗nu ˗bha ˈˈyua ˗ya ˗kwɛ ˗kɔŋ do ö ga ꞊plɛ (12) kë ˗a ˗bha, ˗yö ˗kun ˗an ˈˈpiʋ̈ mü.
26 ˗A ˈˈtʋ̈ŋ ˈö bhë ˗a ˈgü kö ˗ya bɔ ꞊dhɔtrɔɔ˗ ꞊va ꞊dede ˈˈpiʋ̈, kö ˗a ˈˈdhɛkësü ꞊yaa˗ ꞊sëëbho ꞊dedewo,* kö ˗a ˗bha ˈwëëga ꞊gban ˗ya ɲën. ˈˈKɛɛ ˈyaa kun ö ˗de ꞊slɔɔ ˗ni ˈgü, ˗da ˈnën ˈö˗ ˗bha ˈˈyua ꞊yaa˗ wo ˈˈdhiʋ̈ ꞊ʒiaan.
27 ˈDhɛ pë ˗nu ˈö Yesu ˗yö kun ˗an kë ˗ni ˈgü ˈö ˗an ˗tɔɔ man, ˈyö bɔ mɛn ˗nu ꞊zinŋgü ˗a ꞊taabha ˈö ꞊ɲɔɔn ˗a ˗bha, ˈö pa ˗a ˗bha sɔ ˈka,
28 ˈyö ˗tɔ ꞊dhɛ ˗yö ˗kun ˗a pö ˗ni ˈgü ö ˗de ˗dhɛ: «ˈKö ˗kë ꞊dhɛ ˗a ˗bha sɔ ˈˈkpaan ˈnën ˈa pa ˗a ˈka, a ˗dho dha.»
29 ꞊Ɲɔɔn ˈö kun bhɔ ˗ni ˈgü ˗a ˗bha bhë ˗yö ˗to ˈˈshia˗ mü ˈö ˈduaannu, ˈö yöö ꞊dede ˈö˗ yö ö kwi ˈgü ꞊dhɛ ˈˈyua yaa ˈö bhë ˗ya ˈgo ö ˗bha.
30 Yesu ˗yö ˗to mü ˈpö ˈö˗ yö ꞊dhɛ ꞊faan ˈbhaa ˗ya ˈgo ö ˈgü. ˗Dhɛ ˈö ˗kë ˈˈdhʋ̈ ˈyö ꞊slëë ö ˗zü, ˈyö mɛn ˗nu ˈwo kun ˗a ˗züzü bhë ˗an dhɛɛˈˈ kpɔ ˈö˗ pö: «ˈDe ˈö pa n ˗man sɔ ˈka bhë?»
31 ˈYö˗ ˗bha gwëëˈˈ ˗nu ˗wa pö ˗a ˗dhɛ: «Yi Dëmɛn, mɛnbhɩɩdhe ˗nu ˈwo ˗lo ü ˗züzü ˈö ˈwo ˗maan maanˈˈ ˗ni ˈgü ü ˗bha yö ˈbhaa˗ yö, ˈyö ˈü˗ pö ˈzü ‹de ˈö pa ü ˈka ˗ee?›»
32 ˈˈKɛɛ ˈyö Yesu ˗yö ˗dhɛ ˗ga ö ˗züzü, kö mɛn ˈö pa ö ˈka bhë ˈö˗ dɔ.
33 Dhebɔnën ˈö pa ˗a ˗bha sɔ ˈka bhë ˗ya ˗yö ꞊dhɛ ö ˗dhɛ ˗ya bo, ˈyö ˈˈsuʋ̈ ˗yö ˗kan ˗a ˈˈgblü ˈö ˗ya ꞊zii ˗sü ˗bha. ˈYö nu ˈö yö ö kpɔn ˈgü Yesu ꞊gɛnŋdhö, ˈyö ˈwɔn ˈˈpɛpɛ ˈö kun ö ˗bha ˗a ꞊blɛɛ ˗a ˗dhɛ.
34 ˈYö Yesu ˗ya pö ˗a ˗dhɛ: «N ˈdhu, ü ˗bha ˗zoyödhe ˗ya ü dha. Ü ˗bha ˈdho wo ü ˈflëë˗ ˈgü. ˈˈYua yaa ˈö bhë ˗ya ˈgo ü ˗bha.»
35 Dhiaŋ ˗yö ˗to Yesu ˈˈdhi, ˈyö mɛn ˗nu ˗wo go ˗yakwëë ˗kë ˗a ˈgü ˗kɔ ˈwɔnyëë˗ ˈö bhë ˗a ˗gɔ ˈˈkwɛnŋdhö ˈö ˈwo nu, ˈyö ˈwo˗ pö: «ˈBha ˗dho kwa Dëmɛn ꞊sëëbho ˈˈwɛɛwɛ, ü ˈdhunën ˗wɔn ˗ya kë.»
36 ˈˈKɛɛ ˈwɔn ˈö ˈwo kun ˗a blɛɛˈˈ ˗ni ˈgü bhë Yesu ˗ya ˗man. ˈDhɛ ˈö ˗kë ˈˈdhʋ̈, ˈyö˗ pö ˗yakwëë ˗kë ˗a ˈgü ˗kɔ ˈwɔnyëë˗ ˈö bhë ˗a ˗dhɛ: «ˈˈSuʋ̈ ˈya ˗dho ü kë. ˗Zoyödhe ˗yö kë ü ˗gɔ dosɛnŋ.»
37 ˈDhɛ ˈö ˈwo kun ˈdho ˗ni ˈgü, Yesu yö ˈti ˈˈwɩ ˗a ˗bha kö mɛn ˈˈwɛɛ ˈbhaa ˗yö ʒiö ö ꞊kee˗, kö yö ˈti kë Piɛɛ, Zakö waa ö ꞊dhegblü Zan ˗an ˈka.
38 ˈDhɛ ˈö Yesu ˗yö dho ˈö ˗lo ˗yakwëë ˗kë ˗a ˈgü ˗kɔ ˈwɔnyëë˗ ˈö bhë ˗a ˗gɔ ˈˈkwɛnŋdhö, kö mɛn ˗nu ˈˈgbʋ ˗zuö ˗ya ˗dhɛ ꞊gban ˈsü, kö ˗wo wo ˗de ˗maan maanˈˈ ˗ni ˈgü ˗wo ˈˈgbla ˗ni ˈgü ˗a ˈka.
39 ˈDhɛ ˈö ˗da ˈkɔɔ ˈyö˗ pö ˗an ˗dhɛ: «˗Mën ˈö ˈka˗ ˗gbʋ bɔ ˈö ka ˗zuö ˗ya yö ˗a ˈka ˗dhɛ ꞊gban ˈgü yö? ˈNën ˈö bhë yö ˈti ga, yi ˈnën ˈö˗ zë ˗ni ˈgü.»
40 ˈDhɛ Yesu ˗ya pö ˈˈdhʋ̈, ˈyö mɛn ˗nu ˈwo bhë ˈwo ˗ya ꞊wɛɛ˗ ˗dɔ ˗a ˗bha ˗sü ˗bha. ˈˈKɛɛ ˈdhɛ ˈö˗ pö mɛn ˈˈpɛpɛ ˈwo ˗kë mü ˗an ˗dhɛ ˗wo yö ˈˈkpɛnŋ, ˈyö ˈnën ˈö bhë ˗a dë waa˗ dhe waa mɛn ˗nu ˈö waa˗ ˗nu ˈwo nu bhë ˗an sü, ˈyö ˈwo dho ˗dhɛ ˈö˗ ˈnën ˗yö kun wɔ ˗sü ˈka ˗a ˗bha bhë ˗a ˈgü.
41 ˈYö ˗ya ˈnën ˈö bhë ˗a ˗kɔ ˗bha, ˈö˗ pö ˗a ˗dhɛ: «Talita kumi.» ꞊Waa˗ pö ˈˈdhʋ̈ ˗a ˗gɛn ˈnën ˗tɔ: «ˈNëndhiëŋnën, man ꞊nën ˈa˗ pö, ˗bhö luuˈˈ!»
42 ˈYö˗ ˈnëndhiëŋnën ˗yö to ˈˈshia˗ mü ˈö ꞊luu, ˈö ˗ya ˈˈta ˈsü ˗sü ˗bha. (˗A ˗kwɛ ˗kun ˗kɔŋ do ö ga ꞊plɛ (12).) ˈYö ˗a ˗mɛn ˗nu zuʋ̈ˈˈ ˈˈgblü ˗yö dhi ꞊dedewo, ˈö ˗an ˈˈdhi ˗yö pa.
43 ˈˈKɛɛ ˈyö Yesu ˗ya pö ˗an ˗dhɛ ˈko ˗ta ꞊va* ꞊dhɛ ˈwa ˗dho ˗a blɛɛˈˈ mɛn ˈbhaa ˗dhɛ. ˈYö˗ pö ˗an ˗dhɛ ˗wo ˗bhöpë nu ˈnën ˈö bhë ˗a ˗dhɛ kö ˗ya ˗bhö.
-Zoto -a ˈˈpiʋ̈ -wɔn -nu
^ Ɛɛnˈˈ «ˈpö˗ ˈˈgblʋ̈gblʋ̈ ˗kɔŋ do (10) ˈˈpian ˗ta.»
^ Ɛɛnˈˈ «ˈˈyua ˗ya kë ˗ni ˈgü ꞊dedewo.»
^ Ɛɛnˈˈ «˗ya pë ˈˈdhiʋ̈˗ kë ˗a ˈka ꞊va.»
^ Ɛɛnˈˈ «꞊glɔɔglɔɔdhö.»
