Nɔɔn˗ ˗së ˈsëëdhɛ ˈö Makö ˗ya ˗bɛnzë 7:1-37
7 Fadhiziɛn ˗nu waa ˈtɔŋ˗ ˗gɔmɛn ˈbhaa ˗nu ˈwo go Zedhizadhɛmö ˗wo ˗nu wo ˈkwëëdhö Yesu ˈˈpiʋ̈.
2 ˈYö ˈwo ˗kpan Yesu ˗bha gwëëˈˈ ˈbhaa ˗nu ˗bha kö ˗wo pë ˗bhö ˗ni ˈgü, ˈˈkɛɛ kö wo ˈti wo ˗kɔ ˈˈzu* ꞊dhɛ ˗kɔ ˈwo˗ ˗kë ˗a ˈka ˗an ˗bha wɔkɔ ˈgü ˗a ˈdhö.
3 (˗A ˗gɛn ˗mü ꞊dhɛ Fadhiziɛn ˗nu waa Zuifö ˗nu ˈˈpɛpɛ ˗wo wo ˗kɔ ˗zu ˈö dho ˈö yö ˗a ˈka ˗an ˗gbeku ˗bha, ˈyö ˈwo ꞊kun pë ˗bhö ˗ni. ˗Wa ˗kë ˈˈdhʋ̈ kö ˈwo ˈto wo ˈˈbhɛman ˗nu ˗bha wɔkɔ ˈˈpiʋ̈.
4 ˗Wa ˈgo ˈˈdhookwëë˗ ˈpö, ˗wo ˗dho ˈwo wo ˗zu ˈpapadhö ˈyö ˈwo ꞊kun pë ˗bhö. ˗An ˈˈbhɛman ˗nu ˗bha wɔkɔ ˈˈwɛɛ ˈbhaa ˗nu ˈö ˈwo pë ˈˈpɛpɛ ˗kë kö ˈwo ˈto ˗an ˈˈpiʋ̈ ˗wo ˗gban ˗kɔɔ ˗nu, ˈˈföŋ gbɔnën ˗nu waa ˈˈföŋ ˈtia˗ ˗nu, ˗an ˗da ˈˈyi ꞊bhaa ˗sü ˗bha.)
5 ˈYö Fadhiziɛn ˗nu waa ˈtɔŋ˗ ˗gɔmɛn ˗nu ˈwo˗ dhɛɛˈˈ kpɔ ˈwo˗ pö: «ˈMën ˈö ˗kë ˈö ü ˗bha gwëëˈˈ ˗nu ˈwaa kwa ˈˈbhɛman ˗nu ˗bha wɔkɔ ˗nu ꞊bhlëë ˗ya? ˈMën ˈö ˗kë ˈö ˈwo wo ˗kɔ to ˗dhiisü ˈka ˈˈdhʋ̈ ˈwo pë ˗bhö ˗a ˈka?»
6 ˈYö Yesu ˗ya pö ˗an ˗dhɛ: «ˈˈKpënŋ˗ ˗kë mɛn ˗gɔ ˗mɛn ˗nu, pë ꞊dede ˈö ˗Zlan ˗wodhiʋ̈lomɛn Izai ˗ya to ˈˈdhiʋ̈ ˈö˗ pö ˈyaa ˈnën ˈö bhë ˗ee? ˗Ya ˗pö: ‹ˈˈSɛ ˈö yö ˗a ˈgümɛn ˗nu ˗wo n ꞊bhlëë ˗ya wo ˈnɛɛn˗ ˈˈdhiʋ̈, ˈˈkɛɛ ˗an zuʋ̈ga ˗zë ˗yö n ˈka ꞊gblɛɛn.
7 ˗Wo n ˗dhɔkë ˗kplawo, ˈˈkɛɛ wo ˈti ˗dho pë ˈbhaa ꞊slɔɔ ˗a ˈgü. ˈYö ˗tɔ ꞊dhɛ ˗wo ˗gban mɛnbhɩɩdhe ˗nu ˗bha ˈtɔŋ˗ ˗nu ˗ta ˈö ˈwo mɛn ˗nu ꞊klaŋ ˗kë.›
8 Ka ka ˗kwaa ˗Zlan ˗bha ˈtɔŋ˗ ˗nu ˗zü ˈö ˈka to mɛnbhɩɩdhe ˗nu ˗bha wɔkɔ ˈˈpiʋ̈.»
9 ˈYö Yesu ˗ya pö ˗an ˗dhɛ ˈzü: «Ö ˗ta ˗yö ˗Zlan ˗bha ˈtɔŋ˗ ˗nu ˗bha ˗sü kë ˈˈdhʋ̈ kö ˈka ˈto ka ˗bha wɔkɔ ˗nu ˈˈpiʋ̈ bhë, ka˗ kë ˗dhɛ ˗dɔ ˗së ˈka.
10 ˗A ˈwɔnzuan ˈnën ˈö ˗tɔ Moizö ˗ya ˗pö: ‹˗Bhö ü dë waa ü dhe ˗an ꞊bhlëë ˗ya.› ˈÖ go mü ˈzü ˈö˗ pö: ‹Mɛn ˈˈoo ˗mɛn ˈö ˈsi bho ö dë ɛɛnˈˈ ö dhe ˗gɔ, ˗an dua ˗mü kö ˗wa zë.›
11 ˈˈKɛɛ ka ˗zë ka˗ ˗pö: ‹Mɛn ꞊mɔɔn˗ ˗bha ˈö˗ pö ö dë ɛɛnˈˈ ö dhe ˗dhɛ: «Pë ˈˈpɛpɛ ˈö n ˗gɔ ˈö ˈa ꞊mɔɔn˗ ˗bha ˗be kö ˈa ü ˗takun ˗a ˈka, ˈman˗ ˗ya ˗de ˗ta kö ˈa˗ gbɔɔdhe* kë ˗Zlan ˗dhɛ.»›
12 ˈKaa ka ꞊kwaa ˗a ˗zü kö ˗yö pë ˈbhaa nu ö dë ɛɛnˈˈ ö dhe ˗dhɛ.
13 ˈKa ꞊bhlëë bho ˗Zlan ˗Wo ˗bha, ka ˗bha wɔkɔ ˗nu ˈö ˈka˗ ˗zɔn mɛn ˗nu ˗dhɛ bhë ˗a ˈka. ˈYö ˈwɔn ꞊suu ˗nu ˈwo ˈˈdhʋ̈, ka ˗an ꞊va ˗kë.»
14 ˈYö mɛn kpö ˈwo kun mü bhë ˈö ˗an ˗dhɛ, ˈyö˗ pö ˗an ˗dhɛ: «Ka ˈˈpɛpɛ ˗ka ka ˈˈtʋ ˈto n ˗man ˗së ˈka, kö pë ˈa ˗dho ˗a pö yö ˈka˗ man ö ˗gɛn ˈka.
15 Pë ˈˈoo ˗pë ˈö go ˈˈkpɛnŋ ˈö ˗da mɛn ˈˈdhii, ˗a ˈbhaa ˈyaa ˗dhii ˗ya mɛn ˗bha. ˈˈKɛɛ pë ˈö go mɛn zuʋ̈ˈˈ ˈgü ˈö yö ˈˈkpɛnŋ, yö ˈnën ˈö mɛn ˗kë ˗dhiisü.»
16 ——
17 ˈDhɛ ˈö mɛn ˗gbaa ꞊va ˈwo bhë ˗an to ˈö ˗da ˈkɔ do ˈbhaa ˈgü, ˈyö˗ ˗bha gwëëˈˈ ˗nu ˗wo ˗ya ˗a dhɛɛˈˈ ˈkpɔ ˗sü ˗bha ˈwɔnzuan ˈö bhë ˗a ˗wɔn ˈgü.
18 ˈYö Yesu ˗ya pö ˗an ˗dhɛ: «Ka ˗de ˈpö ka ꞊dhɛ ˗an ˈdhö, ˈkaa ˈwɔn ˈgüman ˗ee? ˈKaa˗ ˈwɔn dɔ ꞊dhɛ pë ˈˈpɛpɛ ˈö go ˈˈkpɛnŋ ˈö ˗da mɛn ˈˈdhii, ˈyaa ˗dhii ˗ya mɛn ˗bha ˗ee?
19 ˗A ˗gɛn ˗mü ꞊dhɛ, ˗ya ˗da mɛn ˈˈdhii ˈyaa ˈdho mɛn zuʋ̈ˈˈ ˈgü, ˗yö ˗dho ꞊ʒiaan mɛn ˈˈgblüü,* ˈö ˗ʒiö mü ˈö ꞊gɛan ˈö yö ˈˈkpɛnŋ.» ˗A pö ˈö˗ wo ˈˈdhʋ̈ bhë ˗ya ˗zɔn ꞊dhɛ ˗dhii ˈyaa ˗bhöpë ˈbhaa ˗bha.
20 ˈYö go mü ˈzü ˈö˗ pö: «Pë ˈö go mɛn zuʋ̈ˈˈ ˈgü ˈö yö ˈˈkpɛnŋ, yö ˈnën ˈö ˗dhii ˗ya mɛn ˗bha.
21 ˗A ˗gɛn ˗mü ꞊dhɛ, ˈdhɛ ˈö mɛn zuʋ̈ˈˈ ˈgü, ˈyö ˗zotadhe yaa ˗nu ˗wo go ˗a ˗bha ˈö ˈwo mɛn ˗blü ˈˈɲangüyaa kë ˗sü, ꞊kwaan ˗sü, mɛn zë ˗sü,
22 ö ꞊gɔn ɛɛnˈˈ ö ˗bha dhebɔ ˈto ˗sü ˈö ˈwo ꞊niënŋ, pë ˗bha ˈyaa mɛn ˗zokun ˗sü, ˈwɔn yaa kë ˗sü, ˈˈkpënŋ˗ ˗kë mɛn ˗gɔ ˗sü, ˈwɔn yaa kë ˗sü ˈö˗ ˈlëë˗ ˈyaa mɛn kë, zuʋ̈ˈˈ ˗bhɔ mɛn ˗nu ˗bha pë ˗bha ˗sü, ˈsi ˗nu bho ˗sü, ˗de ˗sü ˈkpii˗ ˗sü waa slaadhɛwɔn kë ˗sü, ˗an ˗bha.
23 ˈWɔn yaa ˈˈpɛpɛ ˈwo bhë, ˗wo ˗go mɛn zuʋ̈ˈˈ ˈgü ˈö ˈwo ˗dhii ˗ya mɛn ˗bha.»
24 ˈYö Yesu ˗yö go ˗dhɛ ˈö bhë ˗a ˈgü ˈö dho ˈTii˗ waa Sidɔn ˗sɛ ˈgü. ˈDhɛ ˈö ˗lo mü, ˈyö dho ˈö ˗da ˈkɔ do ˈbhaa ˈgü. ˈYaa kun ˗a ˈˈpiʋ̈ ꞊dhɛ mɛn ˗nu ˗wa ˈwɔn dɔ ꞊dhɛ ö ˈbhë, ˈˈkɛɛ mɛn ˗nu ˗to mü ˈwo˗ ˈwɔn dɔ.
25 ˈDhɛ ˈö ˗lo mü dosɛnŋ, ˈyö dhebɔnën do ˈö ˗zuu yaa kun ˗a ˈdhunën ꞊sëëbho ˗ni ˈgü ˈö˗ man ꞊dhɛ Yesu ˗yö ˈbhë, ˈyö nu ˈö ˈˈgblëënnu ˗a ꞊gɛnŋdhö.
26 ˗A dhebɔnën ˗kun Glɛkö dhebɔ ˈö go* Sidhofenisi ˗sɛ ˈgü ˗a ˈka. ˈYö ꞊bhɛɛ Yesu ˗dhɛ ˗gɛnɲaan ˈka ꞊va kö ˗zuu yaa ˈö ö ˈdhunën ˈgü bhë, ˗ya bho ˗a ˈgü.
27 ˈˈKɛɛ ˈyö Yesu ˗ya pö ˗a ˗dhɛ: «˗Bhö ü ꞊kwaa ˈnën ˗nu ˗zü kö ˗wo pë ˗bhö ˗wo ˈkën ꞊köŋ. ˗A ˗gɛn ˗mü ꞊dhɛ, ˗a ˗dhɛ ˈyaa˗ ˗bha kö ˗wo ˈnën ˗nu ˗bha ˗bhöpë ˈsü kö ˗wa ˗zuö ˈgbɛnnën ˗nu ˗dhɛ.»
28 ˈYö˗ dhebɔnën ˗ya pö ˗a ˗dhɛ: «꞊Ii, ˗yö ˈˈdhʋ̈ n Dëmɛn, ˈˈkɛɛ ˈgbɛnnën ˗nu ˗de ˈpö ˈwo ˈtaablö ꞊löö, ˗bhöpë ˗nu ˈdhɛ ˈwo dha ˈnën ˗nu ˗bɛn ˗gɔ ˈwo ˗lo ˈˈshia˗ bhë, ˗wa ˗bhö.»
29 ˈDhɛ ˈö˗ pö ˈˈdhʋ̈, ˈyö Yesu ˗ya pö ˗a ˗dhɛ: «Ü ꞊mɔɔn˗ ˗bha ˈü dho ü ˗gɔ ˈkɔɔ. ˗A ˗daa ˈü˗ ˗kë bhë ˗a ˗wɔn ˈgü, ˗zuu yaa ˈö bhë ˗ya ˈgo ü ˈdhunën ˈgü ˈsaadhö.»
30 ˈYö˗ dhebɔnën ˗yö dho ö ˗gɔ ˈkɔɔ, ˈyö ˗kpan ö ˈdhunën ˗bha kö ˗yö ˈwaannu ˗sü ˈka, kö ˗zuu yaa ˗ya ˈgo ˗a ˈgü.
31 ˈDhɛ ˈö ˗kë ˈˈdhʋ̈, ˈyö Yesu ˗yö go ˈTii˗ ˗sɛ ˈgü ˈö bɔ Sidɔn, ˈö bɔ Dekapɔdhö, ˈyö ö ꞊yɛɛ ˗kë ˈö dho ꞊weeyi ˈö Galile ˗sɛ ˈgü bhë ˗a ˈˈpiʋ̈ ˗ʒian ˈka.
32 ˈDhɛ ˈö bhë ˗a ˈgü, ˈyö ˈwo nu gɔndënën do ˈö˗ ˈˈtʋ ˈdhö ˈgbu, ˈö ˈyaa ˈwɔn blɛɛˈˈ ˗së ˈka ˗a ˈka ˗a ꞊dhiaa. ˈYö ˈwo ꞊bhɛɛ Yesu ˗dhɛ kö ˗yö ö ˗kɔ ˈpa ˗a ˈka kö ˗a ˗dhɛ ˗yö bo.
33 ˈYö Yesu ˗yö gɔndënën ˈö bhë ˗a sü ˈö dho ˗a ˈka ꞊plɛdhe ˈgü. ˈYö ö ˗kɔnënga ˗nu ˗da ˗a ˈˈtʋ ꞊plɛ ꞊gban ˈgü, ˈyö ö ˈˈdhidhi ˗suö, ˈö go mü ˈzü ˈö pa ˗a ˈnɛɛnga ˈka.
34 ˈDhɛ ˈö ö bo ˗a ˗kë ˈˈdhʋ̈ ˗sü ˈka, ˈyö ö ˈˈɲan ˈˈdhiʋ̈ ꞊luu ˈö ˗dhɛ ˗ga dhaŋ˗ ˈgü, ˈyö go mü ˈö ö ˗zo ˗lo, ˈö˗ pö ˗a ˗dhɛ: «Efata.» ꞊Waa˗ pö ˈˈdhʋ̈, ˗a ˗gɛn ˈnën ˈö ˗tɔ «˗Bhö ˈˈpʋ.»
35 ˈDhɛ ˈö ˗kë ˈˈdhʋ̈, ˈyö gɔndënën ˈö bhë ˈö˗ ˈˈtʋ ˗nu ˗wo ˗pʋ, ˈyö˗ ˈnɛɛn˗ gën ˗yö ˗kan, ˈö ˗ya ˈwɔn blɛɛˈˈ ˗sü ˗bha ˈkpakpadhö.
36 Yesu ˗yö ˗dhioo ˗dɔ mɛn ˗nu ˈwo kun mü ˗an ˗ta ˈö˗ pö ˈwa ˗dho ˈwɔn ˈö bhë ˗a blɛɛˈˈ mɛn ˈˈwɛɛ ˈbhaa ˗dhɛ. ˈˈKɛɛ ˗ya pö ˗ni ˈgü ˗an ˗dhɛ ˈˈdhʋ̈, kö ˗a ˈwɔn ˈö bhë ˗a ˗tɔɔ ˈnën ˈwo˗ ˗pɛn ˗ni ˈgü ꞊ʒiaan ˈwo dho ˗a ˈka.
37 ˗A ˈwɔn ˗yö ˗an ˗kun ꞊dedewo ˈö ˈwo˗ pö: «Pë ˈˈpɛpɛ ˈö ˗an ˗kë, ˗wo ˈˈdhiaasü. ˗Ya ˗kë ˗ʒiaanwo ˈö ˈˈtʋgbumɛn ˗nu ˗wo ˈwɔn man, ˈö ˈˈbhʋbhʋ ˗nu ˗wo ˈwɔn ꞊blɛɛ.»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «kö ˗an ˗kɔdhɛ ˗yö ˗dhiisü.»
^ Glɛkö ˗wo ˈgü ˈyö ˗tɔ «kɔɔban.»
^ Glɛkö ˗wo ˈgü ˈyö ˗tɔ «˗boŋ.»
^ Ɛɛnˈˈ «ˈö bhɔ.»
