Nɔɔn˗ ˗së ˈsëëdhɛ ˈö Makö ˗ya ˗bɛnzë 8:1-38
-
Yesu ˗yö mɛn ˈˈgblü ˗yiishiö (4.000) ˈˈdhi ˗gba (1-9)
-
Fadhiziɛn ˗nu waa Sadusiɛn ˗nu ˗wa ˈˈpiʋ̈ kö Yesu ˗yö ˗dhidha do kë kö ˈwo˗ yö (10-13)
-
Fadhiziɛn ˗nu waa Edhɔdö ˗bha mɛn ˗nu ˗bha ˈˈsɛkɛ (14-21)
-
Yesu ˗yö ˈˈɲɛɛntiimɛn do ˈˈɲan ˗pʋ Bɛtüsaidö (22-26)
-
Piɛɛ ˗ya ˗pö ꞊dhɛ Yesu ˈnën ˈö ˗tɔ Klito (27-30)
-
Yesu ˗yö ö ˗bha ga ˗sü ˗to ˈˈdhiʋ̈ ˈö˗ ˗wɔn ꞊blɛɛ (31-33)
-
˗Kë Yesu ˗bha gwëëˈˈ ꞊dede ˈka ˗sü (34-38)
8 ˗A ˈˈtʋ̈ŋ ˈö bhë ˗a ˈgü, mɛn ꞊va ꞊dede ˗wo ˗dho wo ˈkwëëdhö ˈzü ˗dhɛ ˈö Yesu kun ˗a ˗bha bhë ˗a ˈgü. Pë ˈbhaa ˈyaa kun ˗an ˗gɔ kö ˗wa ˗bhö, ˗a ˗wɔn ˈgü Yesu ˗yö ö ˗bha gwëëˈˈ ˗nu ˗dhɛ ˈö˗ pö ˗an ˗dhɛ:
2 «Mɛn ˗nu ˈwo yö ˗wa kë n ˗dhɛ ˗wëësü, ˗a ˗gɛn ˗mü ꞊dhɛ ˗wa ˗dhɛkpaɔyi ˗yaaga kë kwa ˈˈpiʋ̈ yö, ˈˈkɛɛ pë ˈbhaa ˈyaa ˗an ˗gɔ kö ˗wa ˗bhö.
3 Kö ˈa n ꞊kwaa ˗an ˗zü kö ˗wo ˈdho wo ꞊plöö din˗ ˈka, ˗wo ꞊mɔɔn˗ ˗bha ˈwo ꞊fëë ʒiaan ˗ta. ˗Ya ˈgo mü ˈzü, ˗a mɛn ˈbhaa ˗nu ˗wo ˗go mü ꞊gblɛɛn.»
4 ˈYö˗ ˗bha gwëëˈˈ ˗nu ˗wa pö ˗a ˗dhɛ: «ˈPödhɛ ˈbhaa ˈyaa ˗dhɛ ˈö yö ˗a ˈˈsuee. ˈBluu˗ ˈö mɛn ꞊va ꞊suu ˈwo yö ˈwo ˗dho ˗a ˗bhö kö ˗wo ˈkën, kwa ˗dho ˈgo ˗an ˈka ˈˈmɛn?»
5 ˈYö ˗an dhɛɛˈˈ kpɔ ˈö˗ pö: «ˈBluu˗ bhɛ ꞊dhɛ ˈö ka ˗gɔ?» ˈYö ˈwo˗ pö: «ˈBluu˗ bhɛ ˈˈsɔɔplɛ.»
6 ˈYö Yesu ˗ya pö mɛn ˗nu ˈwo bhë ˗an ˗dhɛ ˗wo ˈɲaannu ˈˈshia˗. ˈYö ˈbluu˗ bhɛ ˈˈsɔɔplɛ ˈwo bhë ˗an sü ˈyö ꞊bhɛɛ ˗an ˗ta, ˈö ˗Zlan ˈˈnuɛ bho ˗an ˗wɔn ˈgü. ˈDhɛ ˈö go mü, ˈyö ˗an ˈˈkluklu bho ˈö˗ nu ö ˗bha gwëëˈˈ ˗nu ˗dhɛ kö ˗wa ˗gblü. ˈYö˗ ˗bha gwëëˈˈ ˗nu ˗wa ˗gblü mɛn ˗gbaa ꞊va ˈwo kun ˈmü bhë ˗an ˗ta.
7 ˈYuö˗ ga ˈnën ˈsɛɛn˗ ˈbhaa ˗kun ˗an ˗gɔ mü ˈpö. ˈDhɛ ˈö ö bo bhɛɛˈˈ ˗sü ˈka ˗a ˗ta, ˈyö˗ pö ˗an ˗dhɛ ˗wa ˗gblü ˈpö.
8 ˈYö mɛn ꞊gban pë ˗bhö ˈö ˗an ˈgwü ˗yö dɔ. ˈYö ˗a ˗bhöpë ˈˈklu ˈö to ˈwo ˗an ˗lo ˈkwëëdhö, ˈyö ˈwo ꞊töö ˈˈgblʋ̈gblʋ̈ ˈˈsɔɔplɛ pa.
9 Gɔɔn˗ ˗nu ˈwo kun mü ˗wo ˗mɔn ˈˈgblü ˗yiishiö (4.000) ˗bha. ˈDhɛ ˈö ö bo ˗kë ˈˈdhʋ̈ ˗sü ˈka, ˈyö ö ꞊kwaa ˗an ˗zü ˈö ˈwo dho.
10 Yesu waa ö ˗bha gwëëˈˈ ˗nu ˗wo ˗to ˗dhɛ do ˈö bhë ˗a ˈgü ˈö ˈwo ˗ya ˈˈyitagɔ ˈgü ˈö ˈwo dho Dalimanuta ˗sɛ ˈgü.
11 ˈDhɛ ˈö bhë ˗a ˈgü, ˈyö Fadhiziɛn ˗nu ˗wo nu ˈyö waa Yesu ˗nu ˈwo ˗ya ˈwɔn blɛɛˈˈ ˗sü ˗bha wo ˈko ˗dhɛ. ˈYö ˈwo˗ ˈgü dan, ˈö ˈwo˗ pö ˗a ˗dhɛ ˗yö ˗dhidha do ˈö go ˗Zlan ˈˈpiʋ̈ ˗a kë kö ˈwo˗ yö.
12 ˈYö Yesu ˗yö ö ˗zo ˗lo pinŋdhö ˈö˗ pö: «ˈMën ˗kë ˈö ˈˈtʋ̈ŋ ˈö yö ˗a ˈgümɛn ˗nu ˈdhö˗ ˈˈpiʋ̈ kö ˗dhidha do ˗yö kë kö ˈwo˗ yö? A˗ ˗pö ka ˗dhɛ gagade ˈka ꞊dhɛ ˗dhidha ˈbhaa yö ˈti ˗dho kë ˈˈtʋ̈ŋ ˈö yö ˗a ˈgümɛn ˗nu ˗dhɛ kö ˗wa yö.»
13 ˈDhɛ ˈö˗ pö ˈˈdhʋ̈, ˈyö ˗an to ˗dhɛ ˈö bhë ˗a ˈgü ˈö ˗da ˈˈyitagɔ ˈgü ˈzü ˈö dho ˈˈyi ꞊zlöö ꞊ʒiaan.
14 ˈˈKɛɛ ˗a ˗bha gwëëˈˈ ˗nu ˗zo ˗yö ˗bhɔ ˈbluu˗ ˈsü ˗sü ˈka. ˈBluu˗ bhɛ dosɛnŋ ˈˈkpaan ˈnën ˗kë ˗an ˗gɔ ˈˈyitagɔ ˈgü.
15 ˈYö Yesu ˗yö ˗an ˗zo ꞊kpɔɔ ˈˈpuu ˈka ˈö˗ pö: «˗Ka ka ˗de ˈkun Fadhiziɛn ˗nu waa Edhɔdö ˗an ˗bha ˈˈsɛkɛ ˗gɔ.»
16 ˈDhɛ ˈö˗ pö ˈˈdhʋ̈, ˈyö˗ ˗bha gwëëˈˈ ˗nu ˗wo ˗ya ˈwɔn blɛɛˈˈ ˗sü ˗bha wo ˈko ꞊zinŋgü ˈbluu˗ ˈö wo ˈti˗ ˈsü bhë ˗a ˗wɔn ˈgü.
17 ˈDhɛ ˈö Yesu ˗ya ˈwɔn dɔ ˈˈdhʋ̈, ˈyö˗ pö ˗an ˗dhɛ: «ˈMën ˗kë ˈö ˈka ˈwɔn ꞊blɛɛ ka ˈko ˗nu ˈka ˈbluu˗ ˗wɔn ˈgü? ˈPë ˈa˗ ˈˈpiʋ̈ ˈa˗ pö bhë ka ˈti˗ man ö ˗gɛn ˈka ꞊köŋ ˗ee? ˗A ˈgüman ˗dhɛ ꞊kun ka ˗gɔ ˈˈgbɩɩ˗ ˗ee?
18 ‹Ka ˈˈɲan ˗nu ˗wo ˗dhö, ˗yö ˗kë ꞊dhɛ ˈsa ˈö ˈkaa ˗dhɛ yö? Ka ˈˈtʋ ˗nu ˗wo ˗dhö, ˗yö ˗kë ꞊dhɛ ˈsa ˈö ˈkaa ˈwɔn man?› Ka ˗zo ˗ya bhɔ ˗ee?
19 ˈDhɛ ˈa ˈbluu˗ bhɛ ˈˈsoodhu sü ˈö ˈa gɔɔn˗ ˗nu ˈˈgblü ˈˈsoodhu (5.000) ˈˈdhi gba ˗a ˈka bhë, ˗a ˈˈklu ˈö to ˈö ˈka˗ ˗lö ˗yö ˗kë ꞊töö ˗ɲaan ꞊dhɛ?» ˈYö ˈwo˗ ˗yɔ bɔ ˗a ˗gɔ ˈwo˗ pö: «˗Yö ˗kë ꞊töö ˗ɲaan ˗kɔŋ do ö ga ꞊plɛ.»
20 «ˈYö ˈdhɛ ˈa ˈbluu˗ bhɛ ˈˈsɔɔplɛ sü, ˈa gɔɔn˗ ˗nu ˈˈgblü ˗yiishiö (4.000) ˈˈdhi gba ˗a ˈka, ˗a ˈˈklu ˈö to ˈö ˈka˗ ˗lö ˗yö ˗kë ꞊töö ˈˈgblʋ̈gblʋ̈ ˗ɲaan ꞊dhɛ?» ˈYö ˈwo˗ pö ˗a ˗dhɛ: «˗Yö ˗kë ˈˈsɔɔplɛ.»
21 ˈDhɛ ˈwo wo bo ˗a ˗pö ˈˈdhʋ̈ ˗sü ˈka, ˈyö˗ pö ˗an ˗dhɛ: «Ka ˈti˗ ˈgüman ꞊köŋ ˗ee?»
22 ˗Wo ˗dho ˈwo ˗lo Bɛtüsaidö. ˈDhɛ ˈö bhë ˗a ˈgü, ˗wo ˗nu ˈˈɲɛɛntiimɛn do ˈka Yesu ꞊dhiaa, ˈyö ˈwo ꞊bhɛɛ ˗a ˗dhɛ kö ˗yö ö ˗kɔ ˈpa ˗a ˈka kö ˗a ˗dhɛ ˗yö bo.
23 ˈYö Yesu ˗yö ˈˈɲɛɛntiimɛn ˈö bhë ˗a ˗kɔ kun ˈö go ˗a ˈka ˈplöö. ˈDhɛ ˈö ö ˈˈdhidhi ˗kë* ˗a ˈˈɲan ˗bha, ˈyö ö ˗kɔ pa ˗a ˈka ˈö˗ dhɛɛˈˈ kpɔ ˈö˗ pö: «Ü ˗kpan pë ˈbhaa ˗bha ˗ee?»
24 ˈYö˗ gɔndënën ˗yö ˗dhɛ ˗ga, ˈö˗ pö: «A ˗kpan mɛn ˗nu ˗bha, ˈˈkɛɛ ˗wo ꞊dhɛ ˈˈdhü ˗nu ˈwo ˈˈta ˈsü ˗ni ˈgü ˗an ˈdhö.»
25 ˈYö Yesu ˗yö ö ˗kɔ pa gɔndënën ˈö bhë ˗a ˈˈɲan ˗nu ˈka ˈzü, ˈyö˗ gɔndënën ˗yö ˗dhɛ yö ˈkpakpadhö. ˗A ˈˈɲan ˗yö ˗pʋ ˈö ˗kpan pë ˗nu ˗bha ˗së ˈka.
26 ˈYö Yesu ˗yö ö ꞊kwaa ˗a ˗zü kö ˗yö ˈdho ö ˗gɔ ˈkɔɔ, ˈˈkɛɛ ˈyö ˗dhioo dɔ ˗a ˗ta ˈö˗ pö: «ˈBha ˗dho ˗da ˈplöö.»
27 Yesu waa ö ˗bha gwëëˈˈ ˗nu ˗wo ˗ʒiö ˈö ˈwo dho Sezadhe Filipö ˗pö ˗nu ˈgü. ˈDhɛ ˈwo kun ˈdho ˗ni ˈgü, ˈyö Yesu ˗yö ˗an dhɛɛˈˈ kpɔ ˈö˗ pö: «Mɛn ˗nu ˗bha ˈgü, de ˗mü n ˈka?»
28 ˈYö ˈwo˗ ˗yɔ bɔ ˗a ˗gɔ ˈö ˈwo˗ pö: «˗Wa ˗pö Zan mɛnbɔyibhaamɛn ˗mü ü ˈka, ˈˈkɛɛ mɛn ˈbhaa ˗nu ˗wa ˗pö Edhi ˗mü ü ˈka, ˈyö mɛn ˈbhaa ˗nu ˗wa pö ˈzü ˗Zlan ˗wodhiʋ̈lomɛn ˈˈwɛɛ ˈbhaa ˗mü ü ˈka.»
29 ˈYö ˗an dhɛɛˈˈ kpɔ ˈö˗ pö: «ˈYö ka ˗zë ꞊wɛ? Ka ˗bha ˈgü de ˗mü n ˈka?» ˈYö Piɛɛ ˗ya ˗yɔ bɔ ˗a ˗gɔ ˈö˗ pö: «Bhi ˈnën ˈü ˗tɔ Klito.»
30 ˈDhɛ ˈö ˗kë ˈˈdhʋ̈, ˈyö ˗dhioo dɔ ˗an ˗ta ꞊glɔɔglɔɔdhö ˈö˗ pö mɛn ˈö˗ ˈka ˈwa ˗dho ˗a blɛɛˈˈ mɛn ˈˈwɛɛ ˈbhaa ˗dhɛ.
31 ˈDhɛ ˗ya ö bo ˗a ˗pö ˗an ˗dhɛ ˈˈdhʋ̈ ˗sü ˈka, ˈyö ˗ya ˗an ꞊klaŋ kë ˗sü ˗bha ˈzü, ˈyö˗ pö mɛn Gbö ˗dho saanˈˈ ˈsü ꞊dedewo ˈö mɛn zii ˗nu, ˈˈsaabhomɛn ˗nu ˗gɔmɛn ˗nu waa ˈtɔŋ˗ ˗gɔmɛn ˗nu wo ˈti ˗dho ˈˈwɩ ˗a ˗wɔn ˗bha, ˈö ˈwo˗ zë. ˈˈKɛɛ ˗a ˗dhɛkpaɔyi ˗yaaga ˗bha ˗naan ˈka, ˗yö ˗dho ˈgo ga ˈgü.
32 ˗Yö ˈwɔn ˈö bhë ˗a ˗blɛɛ ˗an ˗dhɛ ˈˈpuu ˈka. ˈDhɛ ˈö ˗kë ˈˈdhʋ̈, ˈyö Piɛɛ ˗ya ˗dhɛ ꞊plɛdhe ˈgü ˈö ˗ya ˗dɔn ˗bho ˗a ˈka ˗sü ˗bha.
33 ˈYö Yesu ˗yö ö ˗ta yö Piɛɛ ˗bha ˈö ö wɔ ꞊slëë ö ˗bha gwëëˈˈ ˗nu ˈwo to ˗an ˈˈpiʋ̈, ˈyö ˈwɔn ꞊blɛɛ Piɛɛ ˈka ˈö˗ pö: «˗Bhö bɔ n ꞊taabha Sɔtraan! ˗A ˗gɛn ˗mü ꞊dhɛ ü ˗zota ˗kɔ ˈyaa ꞊dhɛ ˗Zlan ˗bha ˈdhö, ü ü ˗zota ꞊dhɛ mɛnbhɩɩdhe ˈdhö.»
34 ˈYö Yesu ˗yö mɛn ˗nu ˈwo kun mü waa ö ˗bha gwëëˈˈ ˗nu ˗an ˗dhɛ, ˈö˗ pö ˗an ˗dhɛ: «Mɛn ˈö˗ ˈˈpiʋ̈ ˈö ʒiö n ꞊kee˗, ˗a dua ˈyaa ˗mü kö ˗yö ˗tosɛta kë ö ˗de ˗bha ˈka ˈzüdho. ˗A dua ˗mü ꞊ʒiaan kö ˗yö ö ˗bha ˗ga ˗a ˗ta ˗dhü ˈsü kö ˗yö ʒiö ˗a ˈka n ˈˈpiʋ̈ ˗kplawo.
35 ˗A ˗gɛn ˗mü ꞊dhɛ mɛn ˈö˗ ˈˈpiʋ̈ ˈö ö ˗de* dha, ˗a ˗mɛn ˗gɔ ˗dho ˈto ˗a ˈgü. ˈˈKɛɛ mɛn ˈö ga n ˗wɔn waa nɔɔn˗ ˗së ˗wɔn ˈgü, ˗yö ˗dho ˗tosɛta kë.
36 Mɛn ˈö ˈˈkpɔnŋtaapë ꞊gban ˈˈpɛpɛ ꞊slɔɔ, ˈˈkɛɛ ˈö˗ ˗gɔ ˗yö to ˗a ˈgü, kö ˗a ꞊trɔɔn ˗yö ˈˈmɛn?
37 Ɛɛnˈˈ ˈmën ˈö mɛnbhɩɩdhe ꞊mɔɔn˗ ˗bha ˗ya nu kö ˗yö ö ˗de ˗gɔ ˗ta ˈdhɔ ˗a ˈka?
38 ˗A ˗gɛn ˗mü ꞊dhɛ, mɛn ˈö n ˗wɔn waa n ˈˈdhiwo ˈlëë˗ ˗ya ˗kë ˈˈtʋ̈ŋ ˈö yö ˗a ˈgümɛn ˗nu ˈö ˈwaa ˗klu ˗Zlan ˗bha, ˈö ˈwo ˈwɔnyaakëmɛn ˗nu ˈka bhë ˗an kpö ˈgü, maan mɛn Gbö ˗mɛn, ˗a ˗mɛn ˗dhɛ ˗sü ˈö n ˗man gwëëˈˈ bhë ˗a ˈlëë˗ ˗dho n kë ˈpö ˈˈtʋ̈ŋ ˈa ˗dho nu ˗a ˈka n Dë ˗bha ˈtɔbhɔdhe ˈgü kö ˗Zlan ˗bha ˈˈkiö ˈˈslʋ̈ʋ̈slʋ̈ ˗nu ˗wo n ꞊kee˗ bhë ˗a ˈka.»
