Nɔɔn˗ ˗së ˈsëëdhɛ ˈö Makö ˗ya ˗bɛnzë 9:1-50
-
Yesu ˗bha ˈˈgla kë ˗sü (1-13)
-
ˈNën ˈö ˗zuu yaa ˗yö kun ˗a ˈgü Yesu ˗ya ˗dhɛ ˗bo (14-29)
-
«Mɛn ˈö ˗zoyödhe ˈdhö˗ ˗gɔ ˗a ˗kɔ ˗mɔn ˈwɔn ꞊gban kë ˗sü ˗bha» (23)
-
-
Yesu ˗yö ö ˗bha ga ˗sü ˗to ˈˈdhiʋ̈ ˈö˗ ˗wɔn ꞊blɛɛ ˈzü (30-32)
-
Yesu ˗bha gwëëˈˈ ˗nu ˗wo zɔɔdhe ˗man wo ˈˈkwöö kö mɛn ˈö ˗dho kë mɛn ˈkpii˗ ˈka ˈwo˗ dɔ (33-37)
-
«Mɛn ˈö yö ˈti nu kwa ˗gɔ, kö ˗yö ˗bɔ kwa ˈka» (38-41)
-
Mɛn ˗nu ˗puö ˈwɔn yaa ˈgü ˗pë (42-48)
-
«˗Ka kë ꞊dhɛ ꞊wee ˈö din ˈdhö˗ ˗bha ˗a ˈdhö» (49, 50)
9 ˈYö go mü ˈzü ˈö˗ pö ˗an ˗dhɛ: «A˗ ˗pö ka ˗dhɛ gagade ˈka ꞊dhɛ, mɛn ˗nu ˈö ˈka ˗lo yö, ˗a mɛn ˈbhaa ˗nu wo ˈti ˗dho ga kö wo ˈti ˗kpan ꞊köŋ ˗Zlan ˗bha ˗Gblüdëdhɛ ˗bha kö ˗ya nu ˈsaadhö ö ˗bha ˈˈpiigbɩɩdhɛ ˈgü.»
2 ˈDhɛ ˈö ˗dhɛkpaɔyi ˈˈsɔɔdo ˗yö ˗ʒiö, ˈyö Yesu ˗yö Piɛɛ, Zakö waa Zan ˗an sü ˈö waa˗ ˗nu ˈwo dho wo do ˈka ˗tɔn ꞊gblɛɛn do ˗ta. ˈYö Yesu ˗yö ˈˈgla ˗kë ˗an ˈˈɲaan mü,
3 ˈyö˗ ˗bha sɔ ˗nu ˈbhü ˗yö ˗ya bhɔ ˗sü ˗bha, ˈö ˈwo ˗flʋ̈ ˈpapadhö. Sɔzumɛn ˈbhaa ˈkö ˗dho sɔ ˈˈzu ˈˈkpɔnŋ ꞊taa yö kö ˗yö kë ˈˈpuu ꞊dhɛ ˗kɔ ˈö bhë ˗a ˈdhö, ˈyaa ˈdhö.
4 ˈDhɛ ˈwo ˗dhɛ ˗ga kö Edhi waa Moizö ˗wa ˗wo, kö waa Yesu ˗nu ˗wo ˈwɔn blɛɛˈˈ ˗ni ˈgü wo ˈko ˗dhɛ.
5 ˈYö Piɛɛ ˗ya pö Yesu ˗dhɛ: «˗Gɔmɛn,* kwa ˗bha ˗kë ˈyö ˗sü ˗yö ˈˈdhiaasü ꞊dedewo. ˈDhɛ ˈö ˈˈdhʋ̈ ˗kwa sɔ ˈkɔ ˗yaaga dɔ ˈyö. Ü ˗bha do, Moizö ˗bha do, Edhi ˗bha do.»
6 ˈPë ˈö Piɛɛ dho ˗a kë ˈyaa kun ˗a dɔ ni ˈgü, ˗a ˗gɛn ˗mü ꞊dhɛ ˈˈsuʋ̈ ˗ziisü ˗kun ˗an kë ˗ni ˈgü.
7 ˈDhɛ ˈö ˗kë ˈˈdhʋ̈, ˈyö ˈˈdhuu kpö do ˗yö nu ˈö sɔ ˗an ˗ta, ˈyö ˗wo ˈbhaa ˗yö bɔ ˈˈdhuu kpö ˈö bhë ˗a ˈgü ˈö˗ pö: «N Gbö dhɔɔbhaasü ˈnën ˈö dɔ bhë, ˗ka ka ˈˈtʋ ˈto ˗a ˗wo ˗bha.»
8 ˈDhɛ ˈwo ˗dhɛ ˗ga wo ˗züzü, wo ˈti ˗kpan mɛn ˈˈwɛɛ ˈbhaa ˗bha kö yö ˈti kë Yesu dosɛnŋ ˈka.
9 ˈDhɛ ˈwo kun yɔɔˈˈ ˗ni ˈgü ˗tɔn ˗bha, ˈyö Yesu ˗yö ˗dhioo dɔ ˗an ˗ta ꞊glɔɔglɔɔdhö ˈö˗ pö pë ˈwo˗ yö bhë, ˈwa ˗dho wo ˈˈdhi bho ˗a ˗ta mɛn ˈbhaa ˗dhɛ toŋtoŋdhö, ˗yö ˈto ˗a ˈka ˈˈdhʋ̈ ˗yö yö ˗a ˈka mɛn Gbö ˗go ga ˈgü ˗yi ˗bha.
10 ˗Wo ˈwɔn ˈö bhë ˗a ˗to wo ˗de ˗gɔ* ꞊dhɛ ˗kɔ ˈö˗ pö ˗a ˈka bhë ˗a ˈdhö. ˈˈKɛɛ ˗a ˗bha ˗go ga ˈgü ˗sü ˈö˗ ˗wɔn ꞊blɛɛ bhë, ˗wo ˗kun wo ˈko ˗nu dhɛɛˈˈ ˈkpɔ ˗ni ˈgü ˗a ˗gɛn ˈka.
11 ˈYö ˈwo Yesu dhɛɛˈˈ kpɔ ˈwo˗ pö: «ˈMën ˗kë ˈö ˈtɔŋ˗ ˗gɔmɛn ˗nu ˗wa pö ꞊dhɛ Edhi dua ˗mü kö ˗yö nu ꞊köŋ ˗blɛɛsü?»
12 ˈYö Yesu ˗ya pö ˗an ˗dhɛ: «˗Yö ˈˈdhʋ̈, Edhi dua ˗mü kö ˗yö nu ꞊köŋ ˗blɛɛsü kö ˗yö pë ꞊gban ˈˈpɛpɛ ˗mɔn ˈˈkwëë. ˈˈKɛɛ ˗yö ˗kë ꞊dhɛ ˈsa ˈö ˗Zlan ˗Wo ˗ya pö ꞊dhɛ mɛn Gbö ˗dho saanˈˈ ˈsü ꞊dedewo, ˈö˗ ˗san ˗yö mɛn ˗nu ˗kë?
13 A˗ ˗pö ka ˗dhɛ ꞊dhɛ Edhi ˗ya nu ˈsaadhö, ˈö pë ˈö ˗dhi mɛn ˗nu ˗dhɛ ꞊waa˗ kë ˗a ˈka ꞊dhɛ ˗kɔ ˈö ˗Zlan ˗Wo ˗ya pö ˗a ˈka ˗a ˗blü ˈgü bhë ˗a ˈdhö.»
14 ˈDhɛ ˈwo dho ˈwo ˗lo ˗a ˗bha gwëëˈˈ ˗nu ˈwo to ˗an ˈˈpiʋ̈, ˗wo ˗kpan mɛn ˗gbaa ꞊va ꞊dede ˗bha kö ˗wo ꞊klëën ˗sü ˈka ˗an ˗zü, kö waa ˈtɔŋ˗ ˗gɔmɛn ˗nu ˗wo ˈwɔn blɛɛˈˈ ˗ni ˈgü.
15 ˈˈKɛɛ ˈdhɛ ˈö mɛn ˗nu ˗wo ˗kpan Yesu ˗bha, ˗a ˈwɔn ˗yö ˗an ˗kun ꞊dedewo, ˈyö ˈwo ˗bialö ˈwo ꞊ɲɔɔn ˗a ˗bha kö ˈwo˗ ꞊tuaabho.
16 ˈYö Yesu ˗yö ˗an dhɛɛˈˈ kpɔ ˈö˗ pö: «˗Mën ˈö kaa˗ ˗nu ˈka˗ ˗wɔn blɛɛˈˈ ˗ni ˈgü bhë?»
17 ˈYö˗ mɛn do ˗yö bɔ mɛn ˗nu ꞊zinŋgü mü ˈö˗ pö: «˗Gɔmɛn, n gbö ˈö ˗zuu yaa ˈdhö˗ ˈgü, ˈö ˗ya yö ˗a ˈˈdhi ˗ta, ˈyö ˈa nu ˗a ˈka ü ˈˈpiʋ̈.
18 ˗A ˗zuu yaa ˈö ˈˈdhʋ̈ ꞊yaa˗ ˈsü ˗kplawo ˗ya ˗zuö ˈˈshia˗, ˈyö˗ ˈˈdhidhi ˗yö bhɔ, ˈö ö ˈˈsɔn ˗bhö, ˈö ꞊faan ˗yö go ˗a ˗bha. A ˗bhɛɛ ü ˗bha gwëëˈˈ ˗nu ˗dhɛ kö ˗wo ˗zuu yaa ˈö bhë ˗a bho ˗a ˈgü, ˈˈkɛɛ ˗an ˗kɔ yö ˈti ˗mɔn ˗a ˗bha.»
19 ˈYö Yesu ˗ya pö ˗an ˗dhɛ: «ˈˈTʋ̈ŋ ˈö yö ˗a ˈgümɛn ˗nu ˈö ˗zoyödhe ˈyaa ka ˗gɔ bhë, ˈˈtʋ̈ŋ ꞊dhɛ ˈö ˗ya ˈto kö ˈa˗ kë ka ˈˈpiʋ̈ ˈzü? A ꞊kun ka ꞊kwɛɛ˗ ˈgbinŋ˗ bun ˈˈtʋ̈ŋ ꞊dhɛ ˈˈpiʋ̈ ˈzü? ˗Ka nu ˈnën ˈö bhë ˗a ˈka n ꞊dhiaa.»
20 ˈYö ˈwo nu ˗a ˈnën ˈka Yesu ꞊dhiaa. ˈDhɛ ˈö˗ ˗zuu yaa ˗yö Yesu yö, ˈyö ˈnën ˈö bhë ˗a ˗zuuzuu ˈˈgbɩɩ˗ ˈka Yesu ˈˈɲaan mü, ˈyö˗ ˈnën ˗yö ˗puö ˈˈshia˗ ˈö ˗ya ˗glünŋglünŋˈˈ ˗sü ˗bha kö ˗a ˈˈdhidhi ˗yö bhɔ ˗ni ˈgü.
21 ˈYö Yesu ˗ya dë dhɛɛˈˈ kpɔ ˈö˗ pö: «ˈDhɛ ˈö ˗ya kë ˗sü ˗bha ˗a ˈka ˈˈdhʋ̈ ˗a yi ˗ya ꞊gwëë ˗ee?» ˈYö˗ dë ˗ya pö ˗a ˗dhɛ: «˗A zü ˗yö ˗dɔ ˗a ˈka ˗a ˈnëndhɛ ˈgü.
22 ꞊Yaa˗ ˈsü ˗nu wo ˗ya ˗zuö ˈˈshiʋ̈ ˈgü ɛɛnˈˈ ˗ya ˗zuö ˈˈyi ꞊bhaa kö ˈö˗ zë. ˈDhɛ ˈö ˈˈdhʋ̈, ꞊ya kë ꞊dhɛ ü ꞊mɔɔn˗ ˗bha ˈü˗ dha yi ˗dhɛ, ˗bhö dɔ ˈˈgbɩɩ˗ ˈü yi ˗wëëdhɛ yö kö ˈü yi ˗takun.»
23 ˈYö Yesu ˗ya pö ˗a ˗dhɛ: «ˈMën ˗kë ˈü˗ pö ‹꞊ya kë ꞊dhɛ ü ꞊mɔɔn˗ ˗bha›? Mɛn ˈö ˗zoyödhe ˈdhö˗ ˗gɔ ˗a ˗kɔ ˗mɔn ˈwɔn ꞊gban kë ˗sü ˗bha.»
24 ˈYö ˈnën ˈö bhë, ˗a dë ˗yö to mü ˈö ˗gbla ˈö˗ pö: «˗Zoyödhe ˗yö n ˗gɔ, ˈˈkɛɛ ˗bhö n ˗takun kö n ˗man ˗zoyödhe ˈö bhë ˗yö kë ˈˈgbɩɩ˗.»
25 ˈDhɛ ˈö Yesu ˗ya yö ꞊dhɛ mɛn kpö ˈwo bhë ˗wo ˗bialö ˗ni ˈgü ˗wo nu ˗ni ˈgü wo ˈˈpiʋ̈, ˈyö ˗gbla ˗zuu yaa ˈö bhë ˗a ˗ta ˈö˗ pö: «˗Zuu ˈü yö mɛn ˈˈdhi ˗ta, ˈö ˈü mɛn ˈˈtʋ ta bhë, a˗ ˗pö ˈü ˈgo ˈnën ˈö yö ˗a ˈgü, ˈbha ˗dho ü ꞊yɛɛ kë ˈü nu ˗a ˈgü ˈzü.»
26 ˗Dhɛ ˈö ˗zuu yaa ˗yö ˗gbla, ˈö ˈnën ˈö bhë ˗a ˗zuuzuu ˈˈgbɩɩ˗ ˈka, ˈyö go ˗a ˈgü. ˈYö ˈnën ˈö bhë ˈö ˗wɔ ꞊dhɛ mɛn ˈö ˗ya ga ˗a ˈdhö. ˈDhɛ ˈö ˗kë ˈˈdhʋ̈, ˈyö mɛn ꞊vadhɛ ˗wa pö: «˗Ya ga!»
27 ˈˈKɛɛ ˈyö Yesu ˗yö ˗ya ˗a ˗kɔ ˗bha ˈö˗ ˈˈdhiʋ̈ ꞊luu, ˈyö dɔ ö ˗gɛn ˗ta.
28 ˈDhɛ ˈö ˗ya ö bo kë ˗sü ˈka ˈˈdhʋ̈, ˈyö Yesu dho ˈö ˗da ˈkɔ do ˈbhaa ˈgü. ˈYö˗ ˗bha gwëëˈˈ ˗nu ˗wa dhɛɛˈˈ kpɔ ꞊plɛdhe ˈgü ˈö ˈwo˗ pö: «ˈMën ˗kë ˈö yi ˗kɔ yö ˈti ˗mɔn ˗zuu yaa ˈö bhë ˗a ˗bho ˗a ˈgü ˗sü ˗bha?»
29 ˈYö Yesu ˗ya ˗yɔ bɔ ˗an ˗gɔ ˈö˗ pö: «˗Zuu yaa ꞊suu ˈdhɛ ˈö bhë, bhɛɛsü dosɛnŋ ˈnën ˈwo ˗mɔn ˗a ˗bha kö ˗wa bho ˗a ˈka mɛn ˗nu ˈgü.»
30 ˗Wo ˗go ˗dhɛ ˈö bhë ˗a ˈgü ˈö ˈwo bɔ Galile ˗sɛ ˈgü. ˈˈKɛɛ ˈyaa kun Yesu ˈˈpiʋ̈ ꞊dhɛ mɛn ˗nu ˗wa ˈwɔn dɔ ˈˈdhʋ̈,
31 ˈyö ˗tɔ ꞊dhɛ ˗yö ˗kun ö ˗bha gwëëˈˈ ˗nu ꞊klaŋ kë ˗ni ˈgü. ˗Yö ˗kun ˗a pö ˗ni ˈgü ˗an ˗dhɛ: «˗Wo ˗dho mɛn Gbö ˈˈdhoodɔ mɛnbhɩɩdhe ˗nu ˗gɔ, ˈö ˈwo˗ zë. ˈˈKɛɛ ˗a ˗dhɛkpaɔyi ˗yaaga ˗bha ˗naan ˈka, ˗yö ˗dho ˈgo ga ˈgü.»
32 Pë ˈö kun ˗a pö ˗ni ˈgü ˗an ˗dhɛ bhë, ˈwaa kun ˗a ˈgüman ˗ni ˈgü. ˈˈKɛɛ ˗a dhɛɛˈˈ ˈkpɔ ˗sü ˈˈsuʋ̈ ˗yö ˗kun ˗an ˈgü.
33 ˗Wo ˗dho ˈö ˈwo ˗lo Kapɛɛnaɔmö. ˈDhɛ ˈö ˈwo ˗da ˈkɔɔ, ˈyö Yesu ˗yö ˗an dhɛɛˈˈ kpɔ ˈö˗ pö: «˗Mën ˈö ˈka kun ˗a ˗wɔn blɛɛˈˈ ˗ni ˈgü ʒiaan ˗ta bhë?»
34 ˈDhɛ ˈö ˗an dhɛɛˈˈ kpɔ ˈˈdhʋ̈, ˈyö ˗dhɛ ˗ta ˗yö ga ˗an ˗ta. ˗A ˗gɛn ˗mü ꞊dhɛ ˗wo ˗kun zɔɔdhe ˗man ˗ni ˈgü wo ˈˈkwöö, kö mɛn ˈö ˗dho kë mɛn ˈkpii˗ ˈka ˈwo˗ dɔ.
35 ˈDhɛ ˈö ˗kë ˈˈdhʋ̈, ˈyö Yesu ˗yö ˈɲaannu, ˈö mɛn ˗kɔŋ do ö ga ꞊plɛ ˈwo bhë ˗an ˗dhɛ ˈö˗ pö ˗an ˗dhɛ: «Mɛn ˈö˗ ˈˈpiʋ̈ ˈö kë ka ˗bha mɛn ˈkpii˗ ˈka, ˗a dua ˗mü kö ˗yö ö ˗de kë ˈˈtɩtɩ ka ꞊zinŋgü, kö ˗yö yökë mɛn ꞊gban ka ˈˈdhiʋ̈.»
36 ˈDhɛ ˈö˗ pö ˈˈdhʋ̈, ˈyö ˈnën ˈˈtɩtɩ do dɔ ˗an ꞊zinŋgü, ˈö ö ˗gbe ꞊plʋʋ ˗a ˈka ˈö˗ pö ˗an ˗dhɛ:
37 «Mɛn ˈö ˗dho ö ˗kɔ ˗ya ˈnën ˈsɛɛn˗ ˗nu ˈö ˈwo ˗kë ꞊dhɛ ˈnën ˈö yö ˗a ˈdhö ˗an ˗gɔ n ˈtɔ ˗wɔn ˈgü, kö ˗ya ö ˗kɔ ˗ya n ˗gɔ ˈpö. ˈYö mɛn ˈö ö ˗kɔ ˗ya n ˗gɔ, kö ˗ya ö ˗kɔ ˗ya ˈpö mɛn ˈö n bɔ bhë ˗a ˗gɔ.»
38 ˈYö Zan ˗ya pö Yesu ˗dhɛ: «˗Gɔmɛn, yi ˗kpan mɛn do ˈbhaa ˗bha kö ˗yö ˗zuu yaa bho ˗ni ˈgü mɛn ˗nu ˈgü ü ˈtɔ ˈgü, ˈyö ˈyi˗ pö ˗a ˗dhɛ ˈya ˗dho ˗a kë ˈˈdhʋ̈, ˗a ˗gɛn ˗mü ꞊dhɛ ˈyaa kwa ꞊kee˗.»
39 ˈˈKɛɛ ˈyö Yesu ˗ya pö: «˗Ka ka ꞊kwaa˗ ˗zü, ˗a ˗gɛn ˗mü ꞊dhɛ mɛn ˈbhaa ˈyaa ꞊mɔɔn˗ ˗bha kö ˗yö ˗dhidha kë n ˈtɔ ˈgü kö ˗yö ˈto mü ˈzü ˗yö n ˗wɔn yaa blɛɛˈˈ.
40 Mɛn ˈö yö ˈti nu kwa ˗gɔ, kö ˗yö ˗bɔ kwa ˈka.
41 ˗Ya ˈgo mü ˈzü, mɛn ˈö dho ˈˈyi ˗kɔɔ ˗ɲaan dosɛnŋ ˗ʒiaan nu ka ˗dhɛ ka ˗bha ˗kë Klito ˗bha mɛn ˈka ˗sü ˗wɔn ˈgü, a˗ ˗pö ka ˗dhɛ gagade ˈka ꞊dhɛ, ˗a ˗mɛn ˗dho ˗a ˈgü ˗wɔn ˗së ꞊slɔɔ, yö ˈti ˗dho ˈto ˈˈdhʋ̈ toŋtoŋdhö.
42 ˈˈKɛɛ mɛn ˈö ˗dho ˈnën ˈsɛɛn˗ ˗nu ˈö ˈwo wo ˗zo yö n ˗dhɛ bhë ˗a mɛn dosɛnŋ bho ʒiaan ˗ta, pë ꞊bioo ˗a ˈka ˗gwö kpö ˈkpikpi ˈö ꞊soofëŋ ˈnën˗ ˗glü ö ˗zü bhë, ˗a ˗dɔ ˗a bhɔ ˗bha ˗sü ˈö ˈwo˗ ˗zuö ꞊weeyi ꞊bhaa ˗a ꞊fiëë ˗yö ˗dhö.
43 «˗Ya kë ꞊dhɛ ü ˗kɔ ˗ya kë ü ˗puö ˈwɔn yaa ˈgü ˗pë ˈka, ˗a ˈˈdhiʋ̈ bho. Ü ˗kɔ ˗bha ˗to do ˗sü ˈö ˈü dha ˗a ꞊fiëë ˗yö ˗dhö ˈö ˗ʒiö ˗a ˈka ü ˗kɔ ꞊plɛ ˗bha ˗to ü ˗bha ˗sü ˈö ˈwo ü ˗zuö ˗a ˈka Ʒeɛnö, ˈˈshiʋ̈ ˈö ˈyaa dhuuˈˈ toŋtoŋdhö ˗a ˈgü bhë ˗a ˗ta.
44 ——
45 Ü ˗gɛn ˗ya kë ü ˗puö ˈwɔn yaa ˈgü ˗pë ˈka, ˗a ˈˈdhiʋ̈ bho. Ü ˗gɛn ˗bha ˗to do ˗sü ˈö ˈü dha ˗a ꞊fiëë ˗yö ˗dhö ˈö ˗ʒiö ˗a ˈka ü ˗gɛn ꞊plɛ ˗bha ˗to ü ˗bha ˗sü ˈö ˈwo ü ˗zuö ˗a ˈka Ʒeɛnö ˈgü ˗a ˗ta.
46 ——
47 ˗Ya kë ˈzü ꞊dhɛ ü ˈˈɲanga ˈnën ˗ya kë ü ˗puö ˈwɔn yaa ˈgü ˗pë ˈka, ˗a bho mü ˈü˗ ˗zuö ü ˈka ꞊gblɛɛn. Ü ˈˈɲanga ˗bha ˗to do ˗sü ˈö ˈü ˗da ˗a ˈka ˗Zlan ˗bha ˗Gblüdëdhɛ ˈgü ˗a ꞊fiëë ˗yö ˗dhö ˈö ˗ʒiö ˗a ˈka ü ˈˈɲanga ꞊plɛ ˗bha ˗to ü ˗gɔ ˗bha ˗sü ˈö ˈwo ü ˗zuö ˗a ˈka Ʒeɛnö ˈgü bhë ˗a ˗ta.
48 ˈYö ˗tɔ ꞊dhɛ Ʒeɛnö ˈgü, pë ꞊ɲuun ˗nu ˈwo mü ˈwaa ga ɛɛnˈˈ ˈˈshiʋ̈ ˈö mü ˈyaa dhuuˈˈ toŋtoŋdhö.
49 «ˈˈShiʋ̈ ˗dho ꞊kpënŋ˗ mɛn ꞊gban ˗ta ꞊dhɛ ˗kɔ ˈwo ꞊wee ꞊kpënŋ ˗a ˈka ˗bhöpë ˗ta ˗a ˈdhö.
50 ꞊Wee ˗yö ˗së, ˈˈkɛɛ kö ˗a din ˗yö ˈgo ˗a ˗bha, ka ꞊mɔɔn˗ ˗bha ˈka˗ kë kö ˗a din ˗yö ˗ya ˗a ˗bha ˈzü ˗ee? ˗Ka kë ꞊dhɛ ꞊wee ˈö˗ din ˈdhö˗ ˗bha ˗a ˈdhö, kö ˗dhikodhɛ ˗yö kë ka ꞊zinŋgü.»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «Rabi.»
^ ˗Yö ꞊mɔɔn˗ ˗bha ˈö ˗kë, «wo ˈti wo ˈˈdhi bho ˗a ˗ta mɛn gbɛ˗ ˗dhɛ» ˈka.
