ˈö Matiö ˗ya ˗bɛnzë 1:1-25
1 -Kwɛzlan ˈö ˗gban Yesu Klito* ˈö go Davi ˈö Ablaamö ꞊suugünën ˈka ˗a ˗gɔ ˈkɔɔ bhë ˗a ˗bha, ˗a ˈsëëdhɛ* ꞊nɛn:
2 Ablaamö ˗yö ˗kun Izaakö dë ˈka,ˈyö Izaakö ˗de ˈpö ˈö Zakɔbö kpɔ,ˈyö Zakɔbö ˗yö Zuda waa ö ꞊dhegblü ˗nu ˗an kpɔ.
3 Zuda waa ö ˗bha dhebɔ Tamaa ˈnën ˈwo Perɛzö waa Zedha ˗an kpɔ,ˈyö Perɛzö ˗yö Ɛzrɔn kpɔ,ˈyö Ɛzrɔn ˗de ˈpö ˈö Ramö kpɔ.
4 Ramö ˈnën ˈö Aminadabö kpɔ,ˈyö Aminadabö ˗de ˈpö ˈö Nashɔnö kpɔ,ˈyö Nashɔnö ˗yö Samɔnö kpɔ.
5 Samɔnö waa ö ˗bha dhebɔ Dhaabö ˈnën ˈwo Boazö kpɔ,ˈyö Boazö ˗de ˈpö waa ö ˗bha dhebɔ Dhutö ˈö ˈwo Obɛdö kpɔ,ˈyö Obɛdö ˗yö Ʒese kpɔ.
6 Ʒese ˈö ˈˈdhʋ̈ bhë, yö ˈnën ˈö ˗gblüdë Davi kpɔ.
ˈYö Davi waa Udhi ˗bha dhebɔ ˗wo Sadhomɔn kpɔ.
7 Sadhomɔn ˈnën ˈö Dhoboamö kpɔ,ˈyö Dhoboamö ˗yö Abia kpɔ,ˈyö Abia ˗de ˈpö ˈö Aza kpɔ.
8 Aza ˈnën ˈö Ʒozafa kpɔ,ˈyö Ʒozafa ˗yö Ʒodhamö kpɔ,ˈyö Ʒodhamö ˗de ˈpö ˈö Oziasö kpɔ.
9 Oziasö ˈnën ˈö Ʒotamö kpɔ,ˈyö Ʒotamö ˗yö Akazö kpɔ,ˈyö Akazö ˗de ˈpö ˈö Ezekiasö kpɔ.
10 Ezekiasö ˈnën ˈö Manase kpɔ,ˈyö Manase ˗yö Amɔn kpɔ,ˈyö Amɔn ˗de ˈpö ˈö Ʒoziasö kpɔ.
11 ˈˈTʋ̈ŋ ˈwo Zuifö ˗nu kun ˈwo dho ˗an ˈka ˈˈgan ˈgü Babidhɔnö bhë ˗a ˈgü, ˈyö Ʒoziasö ˗yö Ʒekoniasö waa ö ꞊dhegblü ˗nu ˗an kpɔ.
12 Ʒekoniasö ˗de ˈpö ˗yö Sheatiɛlö ˗kpɔ kö ˗wo ˈˈgan ˈgü Babidhɔnö mü.ˈYö Sheatiɛlö ˗yö Zodhobabɛdhö kpɔ.
13 Zodhobabɛdhö ˈnën ˈö Abiudö kpɔ,ˈyö Abiudö ˗yö Eliakimö kpɔ,ˈyö Eliakimö ˗de ˈpö ˈö Azɔɔ kpɔ.
14 Azɔɔ ˈnën ˈö Zadɔkö kpɔ,ˈyö Zadɔkö ˗yö Akimö kpɔ,ˈyö Akimö ˗de ˈpö ˈö Eliudö kpɔ.
15 Eliudö ˈnën ˈö Eleazaa kpɔ,ˈyö Eleazaa ˗yö Matan kpɔ,ˈyö Matan ˗de ˈpö ˈö Zakɔbö kpɔ.
16 Zakɔbö ˈnën ˈö Zozɛfö kpɔ. ˗A Zozɛfö ˈö ˈˈdhʋ̈ yö ˈnën ˈö kun Madhi ꞊gɔn ˈka. ˈYö Madhi ˗yö Yesu ˈwo˗ ˗dhɛ Klito bhë ˗a kpɔ.
17 ˈÖ go Ablaamö ˗bha ˈö yö ˗a ˈka Davi ˗bha, Yesu ˈˈbhɛman ˈˈgblʋ̈gblʋ̈ ˗nu ˈwo dɔ wo ˈko ˈˈpiʋ̈, ˗wo ˗kun ˗kɔŋ do ö ga ˗yiishiö (14). ˈÖ go Davi ˗bha ˈˈtʋ̈ŋ ˗bha ˈö yö ˗a ˈka Zuifö ˗nu ˗bha ˗dho ˈˈgan ˈgü ˗sü ˈö Babidhɔnö ˗a ˗bha, ˗a ˈmɛn ˈwo dɔ wo ˈko ˈˈpiʋ̈ ˗wo ˗kun ˗kɔŋ do ö ga ˗yiishiö (14). ˈÖ go ˈpö ˗an ˗bha ˗go ˈˈgan ˈgü ˗sü ˈö Babidhɔnö ˗a ˗bha ˈö yö ˗a ˈka Klito ˗bha ˈˈtʋ̈ŋ ˗bha, ˗a ˈmɛn ˈwo dɔ wo ˈko ˈˈpiʋ̈ ˗wo ˗kun ˗kɔŋ do ö ga ˗yiishiö (14).
18 ˈWɔn ˈö ˗kë Yesu Klito ˗bha bhɔ ˗sü ˈgü, ˈyö ꞊nɛn: ˈˈTʋ̈ŋ ˈö bhë ˗a ˈgü kö Madhi waa Zozɛfö ˗an ˗wo ˗ya ˗mɔn kö ˈwo wo ˈko ˈsü, kö Zozɛfö ꞊yaa˗ ˗za dɔ. ˈˈKɛɛ ˗an ˗bha ˈkosü ˗yi ˗yö ˗to ˈˈdhiʋ̈ ˈö ˗zuu ˈˈslʋ̈ʋ̈slʋ̈* ˗ya ˗kë ˈö Madhi ˗yö ˈgwü sü.
19 ˈDhɛ ˗kë ꞊dhɛ Zozɛfö ˗yö ˗kun zuʋ̈sëmɛn ˈka, ˈyaa kun ˗a ˈˈpiʋ̈ ꞊dhɛ ˈö ˈlëë˗ dɔ Madhi ˗bha mɛn ꞊gban ˈˈɲan ˈˈdhiʋ̈. ˗A ˗wɔn ˈgü, ˗yö ˗kun ˗a ˈˈpiʋ̈ ꞊dhɛ ˈwo ˈˈkan ˈkwëë˗ ˗bindhe ˈgü.
20 ˈˈKɛɛ ˈdhɛ ˈö ö ˗zota ˈˈdhʋ̈, ˈyö to ˈö Zoova* ˗bha ˈˈkiö do ˗yö ö ˗de ˗zɔn ˗a ˗dhɛ ˈˈɲɛɛn ˈgü ˈö˗ pö ˗a ˗dhɛ: «Zozɛfö, Davi gbö, Madhi ˗sü dhe ˈka ˗sü ˈˈsuʋ̈ ˈya ˗dho ü kë, ˈyö ˗tɔ ꞊dhɛ ˈgwü ˈö˗ ˗gɔ bhë, ˗zuu ˈˈslʋ̈ʋ̈slʋ̈ ˗kɔ ˈgü ˗wɔn ˗mü.
21 ˈNën ˈö ˗dho ˗a ˈkpɔ bhë, ˈnëngɔɔn˗ ˗mü. ꞊Ya bhɔ ˈtɔ ˈü ˗dho ˗a ˗ya ˗a ˗bha ˈyö ˗tɔ Yesu.* ˗A ˗gɛn ˗mü ꞊dhɛ ˗yö ˗dho ö ˗bha ˈˈsɛgümɛn ˗nu ˗gɔ ˗ta ˈdhɔ˗ ˗an ˗bha ˈwɔn yaa ˗nu ˗gɔ.»
22 ˈWɔn ˗nu ˈwo bhë ˗an ꞊gban ˗kë ˈˈdhʋ̈ kö pë ˈö Zoova ˗yö bɔ ö ˗wodhiʋ̈lomɛn ˗ta ˈö˗ pö, ˗yö yökodhiʋ̈. ˗Ya ˗pö:
23 «˗Ka ˗dhɛ ˗ga, ˈnëndhiëŋnën do ˈö ˈyaa gɔɔn˗ ˗wɔn dɔ, ˗yö ˗dho ˈgwü ˈsü ˈö ˈnëngɔɔn˗ do kpɔ. ˗A ˈnën ˈö ˈˈdhʋ̈ ˗wo ˗dho ˗a ˗dhɛ Emanuɛdhö.» ꞊Waa˗ pö ˈˈdhʋ̈ ˗a ˗gɛn ˈnën ˈö ˗tɔ «˗Zlan ˗yö kwa ˈˈpiʋ̈.»
24 ˈDhɛ ˈö Zozɛfö ˗yö go yi ˈgü, ˗yö pë ˈö Zoova ˗bha ˈˈkiö ˗ya pö ˗a ˗dhɛ bhë ˗a ˗kë, ˈö Madhi sü dhe ˈka, ˈö nu ˗a ˈka ö ˗gɔ ˈkɔɔ.
25 ˈˈKɛɛ waa Madhi ˗an ˗bha sɛɛˈˈ yö ˈti kë do ˈö to ˗a ˈka ˈˈdhʋ̈ ˈö yö ˗a ˈka ˈnën ˈö bhë ˗a bhɔ ˗yi ˗bha. ˈDhɛ ˈö bhɔ, ˈtɔ ˈö˗ ˗ya ˗a ˗bha ˈyö ˗tɔ Yesu.
-Zoto -a ˈˈpiʋ̈ -wɔn -nu
^ Ɛɛnˈˈ «Mesi; ˗Zlan ˗bha ˗Yamɛn.»
^ Ɛɛnˈˈ «˗a ˈˈbhɛman ˗nu ˈtɔ ˗bhuöö.»
^ Ɛɛnˈˈ «˗Zlan ꞊faan.»
^ ˗Dhɛ këŋ ꞊plɛ ö ˗kɔ ˗yaaga waa˗ ˈˈsɔɔplɛ (237) ˈö ˗Zlan ˈtɔ Zoova ˈdhö˗ ˗bha Biblö ˈˈpian ˈö Glɛkö ˗wo ˈgü ˗a ˈgü bhë, ˗a ˗blɛɛsü ˈö Biblö ꞊dhiëëta ˗kɔ ˈö yö ˗a ˈgü ˈyö ꞊nɛn.
^ ˗Yö ˗bɛ ˈtɔ ˈö Eblö ˗wo ˈgü ˈwo˗ Ʒeshua ɛɛnˈˈ Ʒozue ˗kë bhë ˗a ˗bha. ˗A ˗gɛn ˈnën ˈö ˗tɔ «Zoova ˗yö mɛn ˗dha.»
