ˈö Matiö ˗ya ˗bɛnzë 10:1-42
-
Yesu ˗bha bɔmɛn ˗nu ˗kɔŋ do ö ga ꞊plɛ (1-4)
-
˗Dhioo ˗nu ˈwo ˗gban ˗zlanwopösü ˗bha (5-15)
-
˗Wo ˗dho Yesu ˗bha gwëëˈˈ ˗nu ˈˈklʋʋbhɔ (16-25)
-
˗Ka ˈˈsuʋ̈ ˗Zlan ˗gɔ, ˈka ˗dho ˈˈsuʋ̈ mɛnbhɩɩdhe ˗nu ˗gɔ (26-31)
-
‹˗Dhikodhɛsü ˈyaa ˈnën ˈa nu ˗a ˈka, ˗shiödhe ˈnën ˈa nu ˗a ˈka› (32-39)
-
˗Kɔ ˗ya Yesu ˗bha gwëëˈˈ ˗nu ˗gɔ ˗sü (40-42)
10 ˈYö Yesu ˗yö ö ˗bha gwëëˈˈ ˗nu ˗kɔŋ do ö ga ꞊plɛ (12) ˗dhɛ wo ˈkwëëdhö, ˈyö ˗kɔmɔnwɔnbhasü nu ˗an ˗dhɛ kö ˗wo ˗mɔn ˗zuu yaa ˗kë mɛn ˗nu ˈgü ˗sü ˗bha, kö ˗wo ˈˈyua ꞊suu ꞊gban ˈˈpɛpɛ waa ꞊niɔɔn ˗kɔ ꞊suu ꞊gban ˈˈpɛpɛ bho mɛn ˗nu ˗bha.
2 ˗A ˗bha bɔmɛn ˗nu ˗kɔŋ do ö ga ꞊plɛ (12) ˈwo ˈˈdhʋ̈ ˗an ˈtɔ ꞊nɛn: ˗A mɛn ˗blɛɛsü ˈnën ˈö ˗tɔ Simɔn, ˈö ˈwo˗ ˗dhɛ ˈpö Piɛɛ waa˗ ꞊dhegblü Andre, Zakö Zebede gbö waa ö ꞊dhegblü Zan.
3 Fidhipö, Batedhemi, Toma waa Matiö ˈö ˗kë ˈniinsɔnŋkunmɛn ˈka, Zakö ˈö ˗kë Alüfe gbö ˈka waa Tade.
4 Simɔn ˈö ˈwɔn ˗nu ˗kë ö ꞊faan ˈka waa Zuda Isikadhiɔtö ˈö Yesu ˈˈdhoodɔ ˗a ˈyɔɔ˗ ˗nu ˗gɔ bhë.
5 Yesu ˗yö mɛn ˗kɔŋ do ö ga ꞊plɛ (12) ˈwo bhë ˗an ˗bɔ kö ˗wo ˈdho ˗zlanwopö, ˈö˗ pö ˗an ˗dhɛ: «Ka dua ˈyaa ˗mü ˈka ˈdho ˈˈsɛ ˈˈwɛɛ ˈgümɛn ˗nu ˈˈpiʋ̈ ɛɛnˈˈ ˈka ˗dho ˗da Samadhi ˗pö ˈˈwɛɛ ˈbhaa ˈgü.
6 ˈˈKɛɛ ˗ka ˈdho ˗kplawo Izraɛdhö ˈˈsɛgümɛn ˗nu ˈö ˈwo ꞊dhɛ ˈˈbhlaa ˗nu ˈö ˗wa ꞊dhiɔŋ ˗a ˈdhö bhë ˗an ˈˈpiʋ̈.
7 Ka ˈdho ˗ni ˈgü, ˗ka ˗zlanwopö mɛn ˗nu ˗dhɛ ˈka˗ pö: ‹˗Gblüdëdhɛ ˈö ˗dho kë dhaŋ˗ ˈgü ˗ya yö ꞊klöö˗.›
8 ˗Ka ˈˈyua bho mɛn ˗nu ˈgü, ˈka mɛn ˗nu ˈö ˗wa ga ˗an ˗buö, ˈka ꞊weemɛn ˗nu ˗dhɛ bo, ˈka ˗zuu yaa ˗nu kë mɛn ˗nu ˈgü. ˗Zlan ˗yö ˈwɔn ˗nu ˈwo bhë ˗an kë ˗sü ꞊faan ˗nu ka ˗dhɛ ˈˈwɛɛwɛ. Ka ˗de ˈpö, ˗kaa kë mɛn ˗nu ˗dhɛ ˈˈwɛɛwɛ.
9 Ka ˈdho ˗ni ˈgü, ka dua ˈyaa ˗mü kö ˈka ˈˈsënŋ, ˈwëëga ɛɛnˈˈ zën ˗da ka ˗ta.*
10 Ka dua ˈyaa ˗mü ˈzü kö ˈka ˗bhöpë ˈkun ka ˗kɔ ˈˈpiʋ̈ ˈka ˈdho ˗a ˈka. ˈKa ˗dho ˗a pö ˈka ˈˈbhee ꞊plɛ ˗naan ɛɛnˈˈ ˗sabha ꞊plɛ ˗naan ˈsü ɛɛnˈˈ ˈka ˗dho ˈˈdhünën ˈkun ka ˗kɔ ˈˈpiʋ̈. ˗A ˗gɛn ˗mü ꞊dhɛ mɛn ˈö yökë ˗ni ˈgü, ˗a ˗dhɛ ˗ya ˗bha kö ˗wo ˗bhöpë nu ˗a ˗dhɛ.
11 «ˈKa ˗da ˈˈkwipö ɛɛnˈˈ ˈpö˗ ˈsɛɛn˗ ˗nu ˈgü, mɛn ˈö ˗dho ö ˗kɔ ˗ya ˗së ˈka ka ˗gɔ, ˈö ˗dho ö ˈˈtʋ ˈto ka ˗bha nɔɔn˗ ˗wo ˗bha, ˗kaa mɛɛnˈˈ. ˈKa ˗kpan ˗a ˗bha, ka ˈto ˗a ˗gɔ ˈkɔɔ ˗yö ˈdho ˗yö yö ˗a ˈka ka ʒiö ˗yi ˗bha.
12 ˈKa ˗da ˈkɔ ˈbhaa ˈgü, ˗kaa ˈgümɛn ˗nu ꞊tuaabho.
13 ˗Wa wo ˗kɔ ˗ya ka ˗gɔ ˗së ˈka, ka ˗bha zuʋ̈waannusü ˈdhuëë˗ ˈö ˈka ˗dho ˗a kë ˗an ˗bha bhë, ˗yö ˗dho ˗an ˈkun. ˈˈKɛɛ wo ˈti wo ˗kɔ ˗ya ka ˗gɔ ˗së ˈka, ˗a ˈdhuëë˗ ˈö bhë, ˗yö ˗dho ö ꞊yɛɛ kë ka ˈˈpiʋ̈.
14 ˈKa ˗da ˈkɔ ˈbhaa ˈgü ɛɛnˈˈ ˈpö˗ ˈbhaa ˈgü, ˗a ˈgümɛn ˗nu wo ˈti wo ˗kɔ ˗ya ka ˗gɔ ˗së ˈka ɛɛnˈˈ wo ˈti wo ˈˈtʋ ˈto ka ˗wo ˗bha, ˗ka ka ˗gɛn ˗man kö ˈˈsɛ ˈö go ˗dhɛ ˈö bhë ˗a ˈgü, ˗yö ˈgo ka ˗gɛn ˗bha.
15 A˗ ˗pö ka ˗dhɛ gagade ˈka ꞊dhɛ, za ˈˈkan ˗yi ˈka, ˈwɔn ˈö ˗dho wɔ ˈpö˗ ˈö bhë ˗a ˈgümɛn ˗nu ˗ta, ˗yö ˗dho kë ˈˈgbɩɩ˗ ˈö ˗ʒiö ˗a ˈka Sodɔmö waa˗ Gomɔɔ ˗pö ˗an ˗bha ˗ta.
16 «˗Ka ka ˈˈtʋ ˈto ˗së ˈka. Ka bɔ ˈa˗ wo bhë, a ka ˗bɔ ꞊dhɛ mɛn ˈˈbhlaa ˗nu bɔ ˈˈblü ˗gbɛn ˗nu ꞊zinŋgü. ˗Dhɛ ˈö ˈˈdhʋ̈, ˗ka ˈwɔn ˗nu kë ka ˈsuaan˗ ˈka ꞊dhɛ ꞊mlɛɛn ˗nu ˈdhö, kö ˈka kë zuʋ̈puumɛn ˗nu ˈka ꞊dhɛ ˗toŋ ˗nu ˈdhö.
17 ˗Ka ka ˗zokë ka ˗de ˈˈpiʋ̈ mɛnbhɩɩdhe ˗nu ˗gɔ, ˗a ˗gɛn ˗mü ꞊dhɛ ˗wo ˗dho ˈdho ka ˈka zakandhɛ ˗nu ˈgü, ˈö ˈwo ka ˗man ˗klaaga ˈka ˗yakwëë ˗kë ˗a ˈgü ˗kɔ ˗nu ˈgü.
18 ˗Wo ˗dho ˈdho ka ˈka ˈˈsɛkɔɔnmɛn ˗nu waa˗ ˗gblüdë ˗nu ˗kuu ˈˈdhiʋ̈ n ˗wɔn ˈgü. ˗Yö ˗dho kë ˈˈdhʋ̈ kö ˈka ka ˗bha ˗zoyödhe ˗wɔn blɛɛˈˈ waa ˈˈsɛ ˈˈwɛɛ ˈgümɛn ˗nu ˗an ˗dhɛ.
19 ˈDhɛ ˈö ˈˈdhʋ̈, ˗wa ˈdho ka ˈka zakanmɛn ˗nu ˗kuu ˈˈdhiʋ̈, ka zuʋ̈ˈˈ ˈˈdhiʋ̈ ˈya ˗dho ˈˈtɛ pë ˈö ˈka ˗dho ˗a pö waa ˗kɔ ˈö ˈka ˗dho ˗a pö ˗a ˈka ˗an ˗wɔn ˈgü, ˗a ˗gɛn ˗mü ꞊dhɛ pë ˈö ˈka ˗dho ˗a pö ˈˈtʋ̈ŋ ꞊dede ˈö bhë ˗a ˈgü, ˗Zlan ˗dho ˗a ˗zɔn ka ˗dhɛ.
20 ˗Wo ˈö ˈka ˗dho ˗a pö, yö ˈti ˗dho ˈgo ka ꞊dede ka ˈgü, ˈˈkɛɛ ka Dë ˗bha ˗zuu ˈˈslʋ̈ʋ̈slʋ̈ ˈnën ˗dho bɔ ka ˗ta ˈö ˈwɔn ꞊blɛɛ.
21 ˗Ya ˈgo mü ˈzü, mɛn ˗dho ö ꞊dhegblü nu mɛn ˗nu ˗dhɛ kö ˗wa zë, ˈö ˈnëndë ˗ya ˗kë ˈˈdhʋ̈ ˈpö ö ˗bha ˈnën ˈka. ˈNën ˗nu ˗dho ˗gban wo ˗mɛn ˗nu ˗gɔ, ˈö ˈwo wo mɛn ˗nu zë.
22 Ka ˗san ˗dho mɛn ꞊gban ˈˈpɛpɛ kë n ˈtɔ ˗wɔn ˈgü.* ˈˈKɛɛ ˈmɛn ˈö ö ˈgü dɔ ˈˈgbɩɩ˗ ˈö dho ˈö yö ˗a ˈka ˗a ˈˈdhiʋ̈todhɛ ˗bha, ˗yö ˗dho dha.
23 ˗Wa ka ˈˈklʋʋbhɔ ˈˈkwipö ˈbhaa ˈgü, ˗ka ꞊duëë ˈka ˈdho ˗a ˈˈwɛɛ ˈbhaa ˈgü. A˗ ˗pö ka ˗dhɛ gagade ˈka ꞊dhɛ, ˈˈtʋ̈ŋ ˈö mɛn Gbö dho nu ˗a ˈka, kö ka ˈti bɔ Izraɛdhö ˗pö ꞊gban ˈˈpɛpɛ ˈgü ꞊köŋ.
24 «꞊Klaŋdhiʋ̈nën* ꞊bhlëë ˈyaa ˈkpii˗ kö ˗yö ʒiö ˗a ˈka ˗a ꞊klaŋkëmɛn ˗ta. Ɛɛnˈˈ ˈzü ꞊dhuëŋ ˈbhaa ꞊bhlëë ˈyaa ˈkpii˗ kö ˗yö ʒiö ˗a ˈka ˗a dëmɛn ˗ta.
25 Pë ˈö ꞊klaŋdhiʋ̈nën ˗dhɛ ˗së, ˈyö ˗tɔ ˈö kë ꞊dhɛ ö ꞊klaŋkëmɛn ˈdhö. ˈYö pë ˈö ꞊dhuëŋ ˗dhɛ ˗së ˈpö, ˈyö ˗tɔ ˈö kë ꞊dhɛ ö dëmɛn ˈdhö. Mɛn ˈö ˈkɔdë ˈka, ꞊waa˗ ˗dhɛ Bɛɛzebubö, mɛn ˗nu ˈwo˗ ˗gɔ ˈkɔɔ wo ˈti ˗dho ˗an ˗dhɛ ˈˈdhʋ̈ ˈpö ˗ee?
26 ˈDhɛ ˈö ˈˈdhʋ̈, ˈka ˗dho ˈˈsuʋ̈ ˗an ˗gɔ. ˗A ˗gɛn ˗mü ꞊dhɛ pë ˈbhaa ˈö ˈˈdhɛ dho kë ˗a ˗ta, ˈö ˈˈdhɛ yö ˈti ˗dho ˈgo ˗a ˗ta ˈyaa ˈdhö. Ɛɛnˈˈ ˈzü pë ˈbhaa ˈö ˗dho kë ˗bin ˗sü ˈka ˈö wo ˈti ˗dho ˈˈdhɛ bho ˗a ˗ta ˈyaa ˈdhö.
27 Pë ˗nu ˈa˗ blɛɛˈˈ ˗ni ˈgü ka ˗dhɛ ꞊plɛdhe ˈgü bhë, ˗ka dɔ ˈˈdhɛɛdhö ˈka˗ blɛɛˈˈ mɛn ꞊gban ˈˈpɛpɛ ˗dhɛ. Ɛɛnˈˈ ˈwɔn ˗nu ˈa˗ blɛɛˈˈ ˗ni ka ˗dhɛ n ˗wo ꞊löö bhë, ˗ka dɔ ˈkɔ ˗ta ˈˈdhuŋ ˈka˗ blɛɛˈˈ.
28 ˈˈSuʋ̈ ˈya ˗dho ka kë mɛn ˗nu ˈwo ˗mɔn ˗a ˗bha ˗wo ka zë, ˈˈkɛɛ ˈö ˈwaa ˗mɔn ˗a ˗bha kö ˗wo ka ˈniin˗* zë bhë ˗an ˗gɔ. ˗Ka ˈˈsuʋ̈ ꞊ʒiaan ˗Zlan ˈö -mɔn -a ˗bha ˈö ka bun waa ka ˈniin˗ ˗an ꞊gban zë, ˈö ˗an ˗zuö Ʒeɛnö ˈgü bhë ˗a ˗gɔ.
29 ˗Wo ꞊zöŋ ꞊plɛ ˈˈdhoodɔ ˈwëë˗ ˗piö ˈˈkpaan ga do ˈö- ꞊bhlëë ˈyaa ˈdhö ˗a ˗bha, ˈyaa ˈˈdhʋ̈ ˗ee? ˈˈKɛɛ ˈkö ˗kë ˈˈdhʋ̈, ˗a dosɛnŋ ˈö ˗dho ˗puö ˈˈshia˗ kö ka Dë ˈyaa˗ ˈwɔn dɔ, ˈyaa ˈdhö.
30 Ka ˗zë, ka ˗bha wundhɛ ˗nu ˈö ˈwo ka ꞊troo ˗an ꞊gban ˗wo dhʋŋsü ˈka.
31 ˈDhɛ ˈö ˈˈdhʋ̈, ˈˈsuʋ̈ ˈya ˗dho ka kë. Ka ꞊bhlëë ˗yö ˈkpii˗ ˈö ˗ʒiö ˗a ˈka ꞊zöŋ ˗nu ˗ta.
32 «Mɛn ˈö˗ pö mɛnbhɩɩdhe ˗nu ˈˈɲan ˈˈdhiʋ̈ ꞊dhɛ ö n ˗man gwëëˈˈ ˈka, a ˗dho ˗a pö n Dë ˈö dhaŋ˗ ˈgü bhë ˗a ˈˈɲan ˈˈdhiʋ̈ ˈpö ꞊dhɛ ˗a ˗mɛn ˗yö n ˗man gwëëˈˈ ˈka.
33 ˈˈKɛɛ mɛn ˈö˗ pö mɛnbhɩɩdhe ˗nu ˈˈɲan ˈˈdhiʋ̈ ꞊dhɛ ˈyaa n ˗man gwëëˈˈ ˈka, a ˗dho ˗a pö n Dë ˈö dhaŋ˗ ˈgü bhë ˗a ˈˈɲan ˈˈdhiʋ̈ ˈpö ꞊dhɛ ˗a ˗mɛn ˈyaa n ˗man gwëëˈˈ ˈka.
34 ˈYa ˗dho kë ka ˈgü ꞊dhɛ a ˗nu kö ˈa ˗dhikodhɛ ˗da ˈˈkpɔnŋ ꞊taa. ˗Dhikodhɛ ˈyaa ˈnën ˈa nu ˗a ˈka, ˈˈkɛɛ pë ˈa nu ˗a ˈka ˈyö ˗tɔ ˗shiödhe.*
35 ˗A ˗gɛn ˗mü ꞊dhɛ a ˗nu kö ˈa ˗shiödhe ˗da ˈnën waa ö dë ˗an ꞊zinŋgü, kö ˈa ˗shiödhe ˗da ˈnëndhebɔ waa ö dhe ˗an ꞊zinŋgü, ɛɛnˈˈ ˈnën ˗bha dhe waa ö ꞊gɔn dhe ˗an ꞊zinŋgü.
36 Mɛn ˗de ˗bha ˈkɔɔmɛn ˗nu ˈnën ˈwo ˗dho kë ˗a ˈyɔɔ˗ ˗nu ˈka.
37 Mɛn ˈö˗ dë waa˗ dhe ˗an ˗dhɔ ˗ya ˗kë ˈö ˗ʒiö ˗a ˈka n ˗ta, ˗a ˗dhɛ ˈyaa˗ ˗bha kö ˗yö kë n ˗man gwëëˈˈ ˈka. Ɛɛnˈˈ mɛn ˈö˗ gbö ɛɛnˈˈ ˗a ˈdhu ˗dhɔ ˗ya ˗kë ˈö ˗ʒiö ˗a ˈka n ˗ta, ˗a ˗dhɛ ˈyaa˗ ˗bha ˈpö kö ˗yö kë n ˗man gwëëˈˈ ˈka.
38 ˈMɛn ˈö yö ˈti ˈˈwɩ ˗a ˗bha kö ˈö ö ˗bha ˗ga ˗a ˗ta ˗dhü ˈsü kö ˈö ʒiö ˗a ˈka n ꞊kee˗, ˗a ˗dhɛ ˈyaa˗ ˗bha kö ˗yö kë n ˗man gwëëˈˈ ˈka.
39 ˈMɛn ˈö˗ ˈˈslö ꞊mɛɛn kö ˈö ö ˗de* dha, ˗a ˗mɛn ˗gɔ ˗dho ˈto ˗a ˈgü. ˈˈKɛɛ mɛn ˈö ga n ˗wɔn ˈgü, ˗yö ˗dho ˗tosɛta kë.
40 «ˈMɛn ˈö ö ˗kɔ ˗ya ka ˗gɔ, kö ˗ya ö ˗kɔ ˗ya n ˗gɔ ˈpö. ˈYö mɛn ˈö ö ˗kɔ ˗ya n ˗gɔ, kö ˗ya ö ˗kɔ ˗ya ˈpö Mɛn ˈö n bɔ bhë ˗a ˗gɔ.
41 Mɛn ˈö ö ˗kɔ ˗ya ˗Zlan ˗wodhiʋ̈lomɛn ˗dhɛŋ ˗gɔ ˗a ˗bha ˗kë ˗Zlan ˗wodhiʋ̈lomɛn ˈka ˗sü ˗wɔn ˈgü, ˈwɔn ˗së ˈö ˗dho kë ˗Zlan ˗wodhiʋ̈lomɛn ˗dhɛ bhë, ˗a ˗mɛn ˗dho ö ˗bha ꞊slɔɔ˗ ˈpö. ˈYö mɛn ˈö ö ˗kɔ ˗ya mɛn kpɛnŋdhö ˗gɔ ˗a ˗bha ˗kë kpɛnŋdhösü ˗wɔn ˈgü, ˈwɔn ˗së ˈö ˗dho kë mɛn kpɛnŋdhö ˗dhɛ bhë, ˗yö ˗dho kë ˗a ˗dhɛ ˈpö.
42 A˗ ˗pö ˈka ˗dhɛ gagade ˈka ꞊dhɛ, mɛn ˈö ˗dho ˈˈyi ˗saa ˗kɔɔ dosɛnŋ nu mɛn ˗bhaasü ˗nu ˈwo bhë ˗a mɛn dosɛnŋ ˗dhɛ ˗a ˗bha ˗kë n ˗man gwëëˈˈ ˈka ˗sü ˗wɔn ˈgü, ˗yö ˗dho ˗a ꞊trɔɔn ꞊slɔɔ˗, yö ˈti ˗dho ˈto ˈˈdhʋ̈ toŋtoŋdhö.»
-Zoto -a ˈˈpiʋ̈ -wɔn -nu
^ Ɛɛnˈˈ «˗da ka ˗gɔ ˈˈkpɔɔ ˈgü.»
^ Ɛɛnˈˈ «n ˈtɔ ˗wɔn ˈgü.»
^ Ɛɛnˈˈ «gwëëˈˈ.»
^ Ɛɛnˈˈ «˗këdhösü.» ˗Wo ˗we «˗tosɛta ˈö ˈkwa ˗dho ˗a ꞊slɔɔ ˗dhɛkpaɔ dhiʋ̈ˈˈ ˈgü» ˗a ˈka.
^ Ɛɛnˈˈ «˗blaan ˗dhaa.»
^ Ɛɛnˈˈ «ˈniin˗.»
