ˈö Matiö ˗ya ˗bɛnzë 11:1-30
11 ˈDhɛ ˈö Yesu ˗yö ö bo ˗dhioo ˗nu ˈwo bhë ˗an dɔ ˗sü ˈka ö ˗bha gwëëˈˈ ˗nu ˗kɔŋ do ö ga ꞊plɛ (12) ˈwo bhë ˗an ˗ta, ˈyö go ˗dhɛ ˈö bhë ˗a ˈgü ˈö dho mɛn ˗nu ꞊klaŋ kë, ˈö ˗zlanwopö ˈpödhɛ ˈˈgblʋ̈gblʋ̈ ˗nu ˈwo ˈˈsɛ ˈˈpian ˈö bhë ˗a ˗ta ˗an ˈgü.
2 ˈDhɛ ˈö Zan ˗yö ˗ya ˗kaso ˈgü ˈö pë ˗nu ˈö Klito ˗yö kun ˗an kë ˗ni ˈgü bhë ˗an ˗tɔɔ man, ˈyö ö ˗bha gwëëˈˈ ˗nu bɔ ˗a ˈˈpiʋ̈,
3 kö ˗wa dhɛɛˈˈ ˈkpɔ ˗wa pö: «Mɛn ˈö˗ dua ˈdhö ˗mü kö ˗yö nu bhë, yö ˗mü ü ˈka ˗ee? Ɛɛnˈˈ yi dua ˗mü kö ˈyi yi ˈˈɲan ˈto mɛn ˈˈwɛɛ ˈbhaa ˗gɔ ˗ee?»
4 ˈYö Yesu ˗ya ˗yɔ bɔ ˗an ˗gɔ ˈö˗ pö: «˗Ka ˈdho kö pë ˗nu ˈö ˈka ˗an man, ˈö ka ˈˈɲan ˗yö ˗kpan ˗an ˗bha, ˈka ˗an blɛɛˈˈ Zan ˗dhɛ.
5 ˗Kaa pö ˗a ˗dhɛ ˈˈɲɛɛntiimɛn ˗nu ˈˈɲan ˗ya ˗dhɛ yö, ˗gɛnlomɛn ˗nu ˗wo ˈˈta ˈsü ˗ni ˈgü, ꞊weeyuamɛn ˗nu ˗wa kë ˈˈklʋ̈ʋ̈klʋ̈, ˈö ˈˈtʋgbumɛn ˗nu ˈˈtʋ ˗ya ˈwɔn man, mɛn ˗nu ˈö ˗wa ga ˗wo ˈgo ˗ni ˈgü ga ˈgü, ˈö nɔɔn˗ ˗së ˈdhö pö ˗ni ˈgü ˗wëëmɛn ˗nu ˗dhɛ.
6 Mɛn ˈö yö ˈti ˗dho pë ˈö ˗dho kë ˗a ˗puö ˗pë ˈka ˗a yö n ˗bha, kö ˗a ˗bha ˗yö ˗së.»
7 ˈDhɛ ˈö Zan ˗bha gwëëˈˈ ˗nu ˗wo kun ˈdho ˗ni ˈgü, ˈyö Yesu ˗yö ˗ya ˈwɔn ˈö ˗gban Zan ˗bha ˗a blɛɛˈˈ ˗sü ˗bha mɛn ꞊va ˈwo kun mü bhë ˗an ˗dhɛ, ˈö˗ pö: «ˈMën ˈö ˈka dho ˗a ˗ga ˈˈyɛta? ˗Kadhüga ˈö ˈˈtee ˈdhö ˗a ˈpa ˗ni ˈgü ö ꞊diëë yö ˗mü ˗ee? ˗Abin, a˗ ˈwɔn ˗dɔ ꞊dhɛ ˈyaa ˗mü.
8 ˈDhɛ ˈö ˈˈdhʋ̈, ˗mën ˈö ˈka dho ˗a ˗ga? Gɔɔn˗ ˈö sɔ ˗së* ˈdhö ˗a ˗bha yö ˗mü ˗ee? ˗Abin, ˈyö sü ꞊dhɛ mɛn ˗nu ˈwo sɔ ˗së ˗da ˗wo ˗ya ˗sü ˈka ˗gblüdë ˗nu ˗gɔ ˈkɔɔ.
9 ˈMën˗ ˗wɔn ˈgü ꞊dedewo ˈö ˈka yö ˈˈkpɛnŋ ˈsa? Ka ˗dho kö ˈka ˗kpan ˗Zlan ˗wodhiʋ̈lomɛn ˗bha ˗ee? ꞊Ii, a˗ ˗pö ka ˗dhɛ ˗ʒiaanwo ꞊dhɛ ˈmɛn ˈka dho ˗a ga bhë, ˗yö ˗ʒiö ˗Zlan ˗wodhiʋ̈lomɛn ˗ta.
10 Mɛn ˈö bhë, ˈwɔn ˈö ˗gban ˗a ˗bha ˗Zlan ˗Wo ˗ya ˗blɛɛ ˈö˗ pö: ‹˗Dhɛ -ga, ˈman n ˗man bɔmɛn bɔ ü ˗dhɛ ˈˈdhiʋ̈ kö ˗yö ü ˗bha ʒiaan ˗ta ˗dhɛ baaˈˈ.›
11 A˗ ˗pö ka ˗dhɛ gagade ˈka ꞊dhɛ, mɛn ˗nu ˈö dhebɔ ˗nu ˗wo ˗an kpɔ, ˗a mɛn ˈbhaa ˈö ˗a ˗bha ˈkpiidhɛ ˗yö ˗ʒiö Zan mɛnbɔyibhaamɛn ˗bha ˗ta ˈyaa ˈdhö. ˈˈKɛɛ mɛn ˈö ˈˈtɩtɩ ˗Gblüdëdhɛ ˈö dhaŋ˗ ˈgü ˗a ˈgü, ˗a ˗mɛn ˗yö ˈkpii˗ ˈö ˗ʒiö ˗a ˈka Zan ˗ta.
12 ˈÖ go Zan mɛnbɔyibhaamɛn ˗bha yö zübhoyi ˗bha ˈö yö ˗a ˈka ꞊dɛɛ ˗bha, ˗Gblüdëdhɛ ˈö dhaŋ˗ ˈgü yö ˈnën ˈö mɛnbhɩɩdhe ˗nu ˈdhö ˗a mɛɛnˈˈ ˗ni ˈgü ˗bia ˈka. ˈYö mɛn ˗nu ˈwo˗ mɛɛnˈˈ ˗ni ˈgü bhë wo ˈnën ˈwo˗ ꞊slɔɔ ˗ni ˈgü.
13 ˗A ˗gɛn ˗mü ꞊dhɛ ˗Zlan ˗wodhiʋ̈lomɛn ˗nu waa ˈˈTɔŋ˗ ˗nu ˗an ꞊gban ˈˈpɛpɛ ˗wo ˈwɔn ˈö bhë ˗a ˗to ˈˈdhiʋ̈ ˈö ˈwo˗ ꞊blɛɛ ˈö dho ˈö yö ˗a ˈka Zan ˗bha ˈˈtʋ̈ŋ ˗bha.
14 ˈKö ˗kë ꞊dhɛ ˗yö ka ˗zokun ɛɛnˈˈ ˈö yö ˈti ka ˗zokun, yö ˈnën ˈö ˗tɔ ‹Edhi ˈö˗ dua ˈdhö ˗mü kö ˗yö nu.›
15 Mɛn ˈö ˈwɔn ˈgüman ˗tʋ ˈdhö˗ ˗gɔ ˗yö ö ˈˈtʋ ˈto ˗së ˈka.
16 «De ˗nu ˈa dho ˈˈtʋ̈ŋ ˈö yö ˗a ˈgümɛn ˗nu ˗zɔn ˗an ˈka? ˗Wo ˗bhɔ ˈnën ˈsɛɛn˗ ˗nu ˈö ˈwo ˗ya ˗sü ˈka ˈˈdhookwëë˗ ˈö ˈwo ˈwɔn blɛɛˈˈ ˗ni ˈgü wo ˈˈtɛɛbɔ ˗nu ˗dhɛ, ˗an ˗bha.
17 ˗Wa ˗pö wo ˈˈtɛɛbɔ ˗nu ˗dhɛ: ‹Yi ˈˈtruunën ˗piö, ˈˈkɛɛ ka ˈti ˈˈtan kë, ˈö ˈyi ˗wëë ˗gbʋ bɔ, ˈˈkɛɛ ˗wëë yö ˈti ˈkpɔ ka ˗ta.›*
18 ˗Kɔ do ˈö bhë ˗a ˈka ˈdhɛ Zan ˗yö nu, ˗ya kë ꞊shiöŋ ˈyaa pë ˗bhö ɛɛnˈˈ ˈyaa we mü. ˗A ˗wɔn ˈgü mɛn ˗nu ˗wa ˗pö: ‹˗Zuu yaa ˗ya ˈgü.›
19 ˈDhɛ ˈö mɛn Gbö ˗yö nu ˈö pë ˗bhö, ˈö we mü, ˈyö mɛn ˗nu ˗wa pö: ‹˗Ka ˗dhɛ ˗ga! Gɔndë ˈö yö pë ˈˈgblʋ̈gblʋ̈ ˗bhömɛn waa we ˈˈdudu mü ˗mɛn ˗mü ˗a ˈka. ˗Yö ˈniinsɔnŋkunmɛn ˗nu waa ˈwɔnyaakëmɛn ˗nu ˈˈtɔŋdë ˈka.› ˈˈKɛɛ mɛn ˈö ꞊kpɔɔsü ˗wa ˗dhɛ ˗yö ˗a këwɔn ˗nu ˗bha.»
20 ˈDhɛ ˈö ˗kë ˈˈdhʋ̈, ˈyö ˈˈkwipö ˈˈgblʋ̈gblʋ̈ ˗nu ˈö Yesu ˗yö ˗dhidha ꞊vadhɛ ˗kë ˗an ˈgü, ˈö ˗an ˈgümɛn ˗nu ˈwii wo zuʋ̈ˈˈ slëëˈˈ bhë, ˈö ˗ya ˈwɔn ˗blɛɛ ˗an ˈka ˗sü ˗bha ˈö˗ pö:
21 «Kodhazinö ˗mɛn ˗nu, ka ˗bha ˗yö ˗wëësü! ˈMɛn ˈka Bɛtüsaidö ˈpö, ka ˗bha ˗yö ˗wëësü! ˗A ˗gɛn ˗mü ꞊dhɛ ˗dhidha ˗nu ˈa ˗an ˗kë ka ˗gɔ ˈplöö bhë a ˗an ˗kë ˈTii˗ waa Sidɔn ˗pö ˗nu ˈgü ˗be, kö ˗a ˈgümɛn ˗nu ˗wa wo zuʋ̈ˈˈ slëëˈˈ ˗a yi ˗ya ꞊gwëë, kö ˗wa ꞊bhlɔɔ sɔ ˗nu ˗da wo ˗bha ˗wa ˗ya ˗a ˈka ˈˈyʋʋ ˈgü.
22 A˗ ˗pö ka ˗dhɛ ꞊dhɛ za ˈˈkan ˗yi ˈka, ˈwɔn ˈö ˗dho wɔ ka ˗ta ˗yö ˗dho kë ˈˈgbɩɩ˗ ˈö ˗ʒiö ˗a ˈka ˈTii˗ waa Sidɔn ˗mɛn ˗nu ˗bha ˗ta.
23 ˈYö bhi ˗de ˈpö ꞊wɛ Kapɛɛnaɔmö, ü ˗bha ˈgü ü ˗gɔ ˗ta ˗dho ˈˈgla ˈö yö dhaŋ˗ ˗bha ˗ee? ˗Abin. Ü ˗dho yɔɔˈˈ ˈü dho Ga ˗gblü* ˈgü. ˗A ˗gɛn ˗mü ꞊dhɛ ˗dhidha ˗nu ˈa ˗an ˗kë ü ˈgü bhë, a ˗an ˗kë Sodɔmö ˗pö ˈgü ˗be, kö dɔ ˈö ˈkwa˗ wo ꞊dɛɛ Sodɔmö ˗pö ˗yö ꞊kun ˗dhö.
24 A˗ ˗pö ü ˗dhɛ ꞊dhɛ za ˈˈkan ˗yi ˈka, ˈwɔn ˈö ˗dho wɔ ü ˗ta ˗yö ˗dho kë ˈˈgbɩɩ˗ ˈö ˗ʒiö ˗a ˈka Sodɔmö ˗pö ˗bha ˗ta.»
25 ˗A ˈˈtʋ̈ŋ ˈö bhë ˗a ˈgü ˈyö Yesu ˗ya pö: «N Dë, bhi ˈü ˗kë ˈˈsɛ waa dhaŋ˗ ˗an Dëmɛn ˈka bhë, ü ˈtɔ ˗yö bhɔ.* ˗A ˗gɛn ˗mü ꞊dhɛ ˈwɔn ˗nu ˈwo bhë ü ˗an ˗bin mɛn ꞊kpɔɔsü ˗nu waa mɛn ˗nu ˈwo ˈwɔn dɔ ˗an ˗gɔ, ˈyö ˈü ˈˈdhɛ bho ˗an ˗ta mɛn ˗nu ˈwo ˈnën ˈsɛɛn˗ ˗nu ˈka ˗an ˗dhɛ.
26 ꞊Ii, n Dë ü ˈtɔ ˗yö bhɔ, ˈyö ˗tɔ ꞊dhɛ ˗a ˗kë ˈˈdhʋ̈ ˗sü ˗yö ü ˗dhɛ ˗së.
27 N Dë ˗ya pë ꞊gban ˈˈklɔɔnbho n ˗bha. Mɛn ˈbhaa ˈyaa ˗Zlan Gbö dɔ ˗së ˈka kö yö ˈti kë ˗a Dë ˈka. Mɛn ˈbhaa ˈyaa ˗Zlan dɔ ˈpö ˗së ˈka kö yö ˈti kë ˗Zlan ˗de Gbö waa mɛn ˈö ˗Zlan Gbö ˈdhö˗ ˈˈpiʋ̈ ˈö ö Dë ˗zɔn ˗a ˗dhɛ ˗an ˈka.
28 Mɛn ˈˈpɛpɛ ˈö ka ˈgü ˗ya ga, ˈö ꞊kwɛɛ˗ ˈgbinŋ˗ ˈdhö ka ˗ta, ˗ka nu n ˈˈpiʋ̈ kö ˈa ꞊faan ˗dɛɛ nu ka ˗dhɛ.
29 ˗Ka nu ˈka yö kë n ˈˈpiʋ̈,* kö ˈka ˈˈwɩ ˗a ˗bha ˈa ka ꞊klaŋ kë. ˗A ˗gɛn ˗mü ꞊dhɛ a dhɔŋsü, ˈö ˈmaan n ˗de ˈsü ꞊va.
30 Yö ˗kë n ˈˈpiʋ̈ ˗sü ˈyaa ˈˈgbɩɩ˗, ꞊kwɛɛ˗ ˈa ˗dho ˗a nu ka ˗dhɛ ˈpö kö ˈka˗ ˈsü bhë ˈyaa ˈgbinŋ˗.»
-Zoto -a ˈˈpiʋ̈ -wɔn -nu
^ Ɛɛnˈˈ «sɔ ga; sɔ gɔn.»
^ Ɛɛnˈˈ «ka ˈti ka ˗kënŋ ˗ta ˗man ˈˈgbʋ ˈka.»
^ Ɛɛnˈˈ «Adɛsö.» ˗Wo ˗we «mɛn ˈˈpɛpɛ ˈö ˗wa ga ˗an bun ˗dhokwëësü» ˈka.
^ Ɛɛnˈˈ «a ü ˈtɔ ˗bhɔ mɛn ꞊gban ˈˈɲan ˈˈdhiʋ̈.»
^ Glɛkö ˗wo ˈgü ˈyö ˗tɔ «n ˗man ˈˈdhü ˈö n gban ˗ta bhë ˈˈwɩ ˗a ˗bha ˈü˗ ˈsü.» ˈˈDhü ꞊suu ˈö ˈˈdhʋ̈ ˈyö ˈwo˗ ˗wɔ mɛnbhɩɩdhe ɛɛnˈˈ wü ˗nu gban ˗ta kö ˗yö ˗an ˗takun ꞊kwɛɛ˗ bun ˗sü ˗bha.
