ˈö Matiö ˗ya ˗bɛnzë 14:1-36
14 -A ˈˈtʋ̈ŋ ˈö bhë ˗a ˈka, Edhɔdö* ˈö kun Galile ˗sɛ ꞊kɔɔnmɛn ˈka ˗yö ˈwɔn ˗nu ˈö Yesu kun ˗an kë ˗ni ˈgü, ˗an ˗tɔɔ ˗man.
2 ˈYö˗ pö ö ˗bha yökëmɛn ˗nu ˗dhɛ: «Mɛn ˈö bhë, Zan mɛnbɔyibhaamɛn ˗mü. ˈGo ˈnën ˈö˗ wo ga ˈgü ˈyö ˗mɔn ˗dhidha ˗nu ˈwo bhë ˗an kë ˗sü ˗bha.»
3 ˈÖ kun ˈˈdhʋ̈ kö Edhɔdö ˗ya Zan ˈkun ꞊yaa˗ ˗lö, ꞊yaa˗ ˗da ˗kaso ˈgü ö ꞊dhegblü Fidhipö ˗bha dhebɔ Edhodiadö ˗wɔn ˈgü.
4 ˗A ˗gɛn ˗mü ꞊dhɛ Zan ˗yö ˗kun ˗a pö ˗ni ˈgü ˗a ˗dhɛ: «Ü dua ˈyaa ˗mü kö ˈü˗ ˈsü dhe ˈka.»
5 ˗Yö ˗kun Edhɔdö ˈˈpiʋ̈ ꞊dhɛ ˈö Zan zë, ˈˈkɛɛ ˗yö ˗kun ˈˈsuʋ̈ ˗ni ˈgü ˈˈsɛgümɛn ˗nu ˗gɔ, ˈyö ˗tɔ ꞊dhɛ ˗wo Zan ˗dɔ ˗Zlan ˗wodhiʋ̈lomɛn ˈka.
6 ˈˈKɛɛ ˗dhɛkpaɔyi do ˈka, Edhɔdö bhɔ ˗yi ˈwlaan˗ ˗ta, Edhodiadö ˈdhu ˗yö ˈˈtan ˗kë ˈyö˗ ˈˈyi ˗yö ˗kan Edhɔdö ˈˈdhi ꞊dedewo.
7 ˗A ˗wɔn ˈgü ˗yö ö ˗wo ˗bhö ˈö˗ pö ˗a ˗dhɛ ꞊dhɛ pë ˈˈpɛpɛ ˈö dho ˗a ˗dhɛ ö ˗gɔ, ö ˗dho ˗a nu ˗a ˗dhɛ.
8 ˈDhɛ ˈö ˗kë ˈˈdhʋ̈ ˈyö˗ dhe ˗yö ˈˈslö ˗zɔn ˗a ˗dhɛ, ˈyö dɔ ö dhe ˗wo ˗ta ˈö˗ pö: «˗Bhö Zan mɛnbɔyibhaamɛn ˗gɔ ˗ya ˈˈsɛti ˈˈgbɛɛ do ˈgü kö ˈü nu ˗a ˈka n ꞊dhiaa ˗dhɛ ˈö yö ˗a ˈgü.»
9 ˗Yö ˗kë ˗gblüdë ˗dhɛ ˈya˗, ˈˈkɛɛ ˈdhɛ ˈö ˗kë ꞊dhɛ ˗ya ö ˗wo ˗bhö mɛn ˗nu ˈwo kun pë ˗bhö ˗ni ˈgü ˗an ˈˈɲan ˈˈdhiʋ̈ bhë, ˗yö ˗we ˗a ˗bha kö ˗wo nu Zan ˗gɔ ˈka ˗a ꞊dhiaa.
10 ˈYö mɛn do bɔ kö ˗yö ˈdho ˗yö Zan ˗gɔ ˈˈdhiʋ̈ bho ˗kaso ˈgü.
11 ˈYö ˈwo Zan ˗gɔ ˗ya ˈˈsetɩ ˈˈgbɛɛ do ˈgü ˈwo nu ˗a ˈka ˈnëndhiëŋnën ˈö bhë ˗a ꞊dhiaa, ˈyö dho ˈpö ˈö˗ nu ö dhe ˗dhɛ.
12 ꞊Taabha, ˈyö Zan ˗bha gwëëˈˈ ˗nu ˗wo nu ˈwo˗ ꞊glöö sü ˈwo˗ ˗wɛɛ bho, ˈyö ˈwo nu ˈwo˗ ꞊blɛɛ Yesu ˗dhɛ.
13 ˈDhɛ ˈö Yesu ˗ya man ˈˈdhʋ̈, ˈyö ˗ya ˈˈyitagɔ ˈgü ˈö go ˗dhɛ ˈö bhë ˗a ˈgü ˈö dho ˗dhɛ ˈbhaa ˈö mɛn ˗nu ˈwaa˗ ˗bha ˗a ˈgü kö ˈö ˈto mü ö do ˈka. ˈˈKɛɛ ˈdhɛ ˈö mɛn ˗nu ˈwo ˈpödhɛ ˗nu ˈgü ˈwo˗ man, ˈyö mɛn ꞊va ꞊dede ˗wo ˈˈta sü ˈˈshia˗ ˈwo ˗ʒiö ˗a ꞊kee˗.
14 ˈDhɛ ˈö kun ˈgo ˗ni ˈgü ˈˈyitagɔ ˈgü ˈö ˗kpan mɛn ꞊va ꞊dede ˗bha, ˈyö ˗an ˗wëë ˗ya ˗kë, ˈyö mɛn ˗nu ˈö ˈˈyua kun ˗an ˗bha ˈö ˗an ˗dhɛ bo.
15 ˈDhɛ ˈö ˈˈdoo ˗yö ˗da, ˈyö Yesu ˗bha gwëëˈˈ ˗nu ˗wo ꞊ɲɔɔn ˗a ˈˈsuee ˈyö ˈwo˗ pö ˗a ˗dhɛ: «ˈPödhɛ ˈbhaa ˈyaa ˗dhɛ ˈö yö ˗a ˈˈsuee, ˈgo mü ˈzü ˈˈbin ˗ya ˈmën ˈsaadhö. ˗Bhö ü ˗wo bho mɛn ˗nu ˈö ˈwo yö ˗an ˗ta kö ˗wo ˈdho ˈpödhɛ ˗nu ˈgü ˗wo wo ˗bha ˗bhöpë ˈdhɔ.»
16 ˈˈKɛɛ ˈyö Yesu ˗ya pö ˗an ˗dhɛ: «˗A ˗dhɛ ˈyaa˗ ˗bha kö ˗wo ˈdho, ka ꞊dede ˗ka ˗bhöpë nu ˗an ˗dhɛ.»
17 ˈYö ˈwo˗ pö ˗a ˗dhɛ: «ˈBluu˗ bhɛ ˈˈsoodhu waa ˈyuö˗ ga ꞊plɛ ˈˈkpaan ˈnën ˈwo yi ˗gɔ ˈyö.»
18 ˈYö Yesu ˗ya pö: «˗Ka nu ˗an ˈka n ꞊dhiaa.»
19 ˈYö˗ pö ˈmɛn ˈwo kun ˈmü bhë ˗an ˗dhɛ ˗wo ˈɲaannu ˈkpaa˗ ˗ta. ˈDhɛ ˈö ˗kë ˈˈdhʋ̈ ˈyö ˈbluu˗ bhɛ ˈˈsoodhu waa ˈyuö˗ ga ꞊plɛ ˈwo bhë ˗an sü, ˈyö ö ˈˈɲan ˈˈdhiʋ̈ ꞊luu dhaŋ˗ ˈgü ˈö ꞊bhɛɛ. ˈDhɛ ˈö go mü ˈyö ˈbluu˗ ˗nu bhë ˗an ˈˈkluklu bho ˈyö˗ nu ö ˗bha gwëëˈˈ ˗nu ˗dhɛ, ˈyö ˈwo˗ ˗gblü mɛn ˗nu ˈwo kun ˈmü bhë ˗an ˗ta.
20 ˈYö mɛn ꞊gban ˈˈpɛpɛ ˗wo pë ˗bhö ˈö ˗an ˈgwü ˗yö dɔ. ˈYö ˗a ˗dhɛ ˈö to ˈwo˗ ˗lo ˈko ˗ta ˈö ˗kë ꞊töö ˗ɲaan ˗kɔŋ do ö ga ꞊plɛ (12).
21 Mɛn ˗nu ˈwo pë ˈö bhë ˗a bhö ˈˈkɛɛ kö wo ˈti dhebɔ ˗nu waa ˈnën ˈsɛɛn˗ ˗nu ˗an dhʋŋˈˈ, ˗wo ˗mɔn mɛn ˈˈgblü ˈˈsoodhu (5.000) ˗bha.
22 ˈDhɛ ˈö ö bo ˗kë ˈˈdhʋ̈ ˗sü ˈka, ˈyö Yesu ˗yö to mü ˈö˗ pö ö ˗bha gwëëˈˈ ˗nu ˗dhɛ ˗wo ˗ya ˈˈyitagɔ ˈgü ˗wo ˈˈyi ˈˈkan, kö yö ˗zë ˈö ö ˗wo bho mɛn ˗nu ˈwo bhë ˗an ˗ta kö ˗wo ˈdho.
23 ˈDhɛ ˈö ö ˗wo bho ˗an ˗ta ˈö ˈwo ˗ʒiö, ˈyö yö dosɛnŋ ˈö ˗da ˗tɔn ˗ta kö ˈö bhɛɛˈˈ. Yö dosɛnŋ ˗yö ˗to mü ˈö ˈˈbin ˗yö mën.
24 ˗A ˈˈtʋ̈ŋ ˈö ˈˈdhʋ̈ ˗a ˈgü kö ˈˈyitagɔ ˈö˗ ˗bha gwëëˈˈ ˗nu kun ˗a ˈgü bhë ˗ya yö ˈmɛntrö këŋ ꞊va ˗naan ꞊taa ˈˈyi ꞊zinŋgü, kö ˈˈtee ˈˈgbɩɩ˗ ˈö go ˗an ˈdho ˗ʒian ˈka ˗yö ˈˈyi kpö ˗nu ˗man ˗ni ˈgü ˗an ˗bha ˈˈyitagɔ ˗bha, kö ˗ya ˗bhaŋbhaŋˈˈ ˗ni ˈgü.
25 ˈˈKɛɛ ˈdhɛ ˈkwa dɔ ˗dhɛkpaɔ ˗ta,* ˈyö Yesu ˗yö ˈˈta sü ꞊weeyi ˗ta ˈö ˗ya ˈdho ˗sü ˗bha ˗an ꞊kee˗.
26 ˈDhɛ ˈö˗ ˗bha gwëëˈˈ ˗nu ˗wo ˗kpan ˗a ˗bha kö ˗yö ˈˈta ˈsü ˗ni ˈgü ꞊weeyi ˗ta, ˈˈsuʋ̈ ˗yö ˗kan ˗an ˈˈgblü, ˈyö ˈwo˗ pö: «˗Mën ˗wɔn ꞊suu ˈö ꞊nɛn? Kwa ˈˈɲan ˈgü ˈnën ˗da ˗ee, ɛɛnˈˈ ˗mën ˗mü?» ˈYö ˈwo ˗ya ˈˈgbla ˗sü ˗bha ˈyö sü ꞊dhɛ ˈˈsuʋ̈ ˗kun ˗an kë ˗ni ˈgü.
27 ˈˈKɛɛ Yesu ˗yö ˗to mü ˈö dhiaŋ zë ˗an ˗dhɛ ˈö˗ pö: «ˈˈSuʋ̈ ˈya ˗dho ka kë, man ˗mü, ˗ka ka ˗zo ˗gban.»
28 ˈYö Piɛɛ ˗ya pö ˗a ˗dhɛ: «N Dëmɛn ˗ya kë ꞊dhɛ bhi ˗mü, ˗a pö n ˗dhɛ ˈa ˈˈta ˈsü ˈˈyi ˗ta kö ˈa nu ü ˈˈpiʋ̈.»
29 ˈYö Yesu ˗ya pö ˗a ˗dhɛ: «˗Bhö nu!» ˈDhɛ ˈö ˗kë ˈˈdhʋ̈ ˈyö Piɛɛ ˗yö go ˈˈyitagɔ ˈgü ˈö ˈˈta sü ˈˈyi ˗ta ˈö dho ˗a ˈka Yesu ˈˈpiʋ̈ ꞊ʒiaan.
30 ˈˈKɛɛ ˈdhɛ ˈö ꞊ɲɔɔn mü ˈö˗ yö ꞊dhɛ ˈˈtee ˈˈgbɩɩ˗ ˗yö ʒiö ˗ni ˈgü, ˈyö ˈˈsuʋ̈ ˗yö ˗da ˗a ˈgü ˈö ˗ya ˈdho ˗sü ˗bha ˈˈyi ꞊löö. ˈDhɛ ˈö ˗kë ˈˈdhʋ̈ ˈyö ˗gbla ˈö˗ pö: «N Dëmɛn, ˗bhö nu n ˗dhɛ!»
31 Yesu ˗yö ˗to mü ˈö˗ ˗kɔ kun, ˈyö˗ pö ˗a ˗dhɛ: «Ü ˗bha ˗zoyödhe ˗yö ˈˈtɩtɩ ꞊dhɛɛ! ˈMën ˗kë ˈö ˈü ˈzëzë kun?»
32 ˈDhɛ ˈwo dho ˈwo ˗da ˈˈyitagɔ ˈgü, ˈyö ˈˈtee ˗yö ö bo ʒiö ˗sü ˈka.
33 ˈYö mɛn ˗nu ˈwo kun ˈˈyitagɔ ˈgü mü ˈwo ˈˈgblëënnu ˗a ˈˈdhiʋ̈ ˈö ˈwo˗ pö: «˗Zlan Gbö ˗mü ü ˈka ꞊dedewo.»
34 ˈDhɛ ˈwo wo bo ˈˈyi ˈˈkan ˗sü ˈka, ˈyö ˈwo ˗lo Zenezadhɛtö ˗sɛ ˈgü.
35 ˈDhɛ ˈö mɛn ˗nu ˈwo kun ˗dhɛ ˈö bhë ˗a ˈgü ˈwo˗ ˈwɔn dɔ ꞊dhɛ yö ˗mü, ˈyö ˈwo nɔɔn˗ bɔ ˈpödhɛ ˈˈpɛpɛ ˈwo ˗an ˗züzü ˗an ˈgü. ˈYö mɛn ˗nu ˗wo nu mɛn ˈˈpɛpɛ ˈö ˈˈyua ˈdhö ˗an kë ˗ni ˈgü ˗an ˈka Yesu ꞊dhiaa.
36 ˈYö ˈwo ꞊bhɛɛ Yesu ˗dhɛ kö ˗yö ˈˈwɩ ˗a ˗bha kö ˈwo ˈpa ˗a ˗bha sɔ ˈˈtʋ ˈka. ˈYö mɛn ˈˈpɛpɛ ˈwo wo ˗kɔ pa ˗a ˈka, ˈö ˗an ˗dhɛ ˗yö bo ˈpapadhö.
-Zoto -a ˈˈpiʋ̈ -wɔn -nu
^ ˗Wo ˗we «Edhɔdö Antipasö» ˈka.
^ ˗Wo ˗we «ˈˈlɛlɛ ˈö go ˗yaaga ˗bha gbeŋ ˈö yö ˗a ˈka ˈˈlɛlɛ ˈˈsɔɔdo ˗bha dhiapiʋ̈» ˗a ˈka.
