ˈö Matiö ˗ya ˗bɛnzë 16:1-28
-
Fadhiziɛn ˗nu waa Sadusiɛn ˗nu ˗wa ˈˈpiʋ̈ kö Yesu ˗yö ˗dhidha do kë kö ˈwo˗ yö (1-4)
-
Fadhiziɛn ˗nu waa Sadusiɛn ˗nu ˗bha ˈˈsɛkɛ (5-12)
-
˗Gblüdëdhɛ ˈö dhaŋ˗ ˈgü bhë ˗a ꞊laklɩɩ ˗nu (13-20)
-
˗Zlanwokɔdhi ˗gɛn ˗dho ˗gban ˗gwö ˗ta (18)
-
-
Yesu ˗yö ö ˗bha ga ˗sü ˗to ˈˈdhiʋ̈ ˈö˗ ˗wɔn ꞊blɛɛ (21-23)
-
˗Kë Yesu ˗bha gwëëˈˈ ꞊dede ˈka ˗sü (24-28)
16 ˈDhɛ ˈö bhë ˗a ˈgü, ˈyö Fadhiziɛn ˗nu waa Sadusiɛn ˗nu ˈwo nu Yesu ˈˈpiʋ̈ kö ˈwo˗ ˈgü dan, ˈyö ˈwo˗ pö ˗a ˗dhɛ ˗yö ˗dhidha do ˈö go ˗Zlan ˈˈpiʋ̈ ˗a kë kö ˈwo˗ yö.
2 ˈYö˗ pö ˗an ˗dhɛ: «ˈƝaan˗ ˗ya ˗puö, ˈyö ˈka˗ pö: ‹˗Dhɛ ˗dho ˈˈpʋ ˗së ˈka, ˈyö sü ꞊dhɛ dhaŋgüdhɛ ˈˈɲan ˗ya kë ˗zɔɔndhö.›
3 ˗Dhɛ ˗ya ꞊kpɔɔ ˈyö ˈka˗ pö: ‹ˈˈNɛnnɛn ˗dho kë ˗dhö ꞊dɛɛ ˈö dha ˗yö ban, ˈyö sü ꞊dhɛ dhaŋgüdhɛ ˈˈɲan ˗yö ˗zɔɔndhö ˈˈkɛɛ ˈˈdhuu ˗ya ˗bha.› ˈKa dhaŋgüdhɛ ˈˈɲan ˗ga, ˗kɔ ˈö ˈˈtʋ̈ŋ dho kë ˗a ˈka ka˗ ˗bhokoo ˗dɔ ˗a ˗bha. ˈˈKɛɛ ˈwɔn ˗nu ˈwo kë ˗ni ˈgü ꞊dɛɛ, wo ˗zë ˈkaa ˗an ˗bhokoo dɔ.
4 ˈˈTʋ̈ŋ ˈö yö ˗a ˈgümɛn ˗nu ˈö ˗an ꞊suu ˈdhö ˈya˗, ˈö ˈwaa ˗klu ˗Zlan ˗bha bhë, ˗wa ˈˈpiʋ̈ ˗kplawo ꞊dhɛ ˗dhidha do ˗yö kë kö ˈwo ˗kpan ˗a ˗bha. ˈˈKɛɛ ˗dhidha ˈˈwɛɛ ˈbhaa yö ˈti ˗dho kë ˗an ˗dhɛ, kö yö ˈti kë ˗a ˈdhɛ ˈö ˗kë Ʒonasö ˈka bhë ˗a ˈka.» ˈDhɛ ˈö˗ pö ˈˈdhʋ̈, ˈyö ˗an to ˈˈshia˗ mü ˈö ˗ʒiö.
5 ˗A ˗bha gwëëˈˈ ˗nu ˗wo ˈˈyi ˗kan ˈö ˈwo dho ꞊weeyi ꞊taabha, ˈˈkɛɛ ˗an ˗zo ˗yö ˗bhɔ ˈbluu˗ ˈsü sü ˈka.
6 ˈYö Yesu ˗ya pö ˗an ˗dhɛ: «˗Ka ka ˗de ˈkun Fadhiziɛn ˗nu waa Sadusiɛn ˗nu ˗bha ˈˈsɛkɛ ˗gɔ.»
7 ˈDhɛ ˈö˗ pö ˈˈdhʋ̈, ˈyö˗ ˗bha gwëëˈˈ ˗nu ˗wo ˗ya ˈwɔn blɛɛˈˈ ˗sü ˗bha wo ˈko ꞊zinŋgü ˈwo˗ pö: «Kwa ˗zo ˗ya bhɔ ˈbluu˗ ˈsü ˗sü ˈka.»
8 ˈDhɛ ˈö Yesu ˗ya ˈwɔn dɔ ˈˈdhʋ̈ ˈyö˗ pö ˗an ˗dhɛ: «ˈMën ˗kë ˈö ˈka˗ pö ka ˈko ꞊zinŋgü ꞊dhɛ ˈbluu˗ ˈö ka ˈti˗ ˈsü bhë yö ˈnën ˈa˗ ˗wɔn ꞊blɛɛ? Ka ˗bha ˗zoyödhe ˈö ˗kë ˈˈtɩtɩ ˈyaa ˗mü ˗ee?
9 Pë ˈa˗ pö bhë ka ˈti ˈgüman ꞊köŋ ˗ee? Ka ˗zo ˗ya bhɔ ˈbluu˗ bhɛ ˈˈsoodhu ˈö mɛn ˈˈgblü ˈˈsoodhu (5.000) ˈˈdhi gba bhë ˗a ˈka ˗ee? ˈDhɛ ˈwo˗ ˗bhö ˗a ˈdhɛ ˈö to ˈö ˈka˗ ˗lo ˈko ˗ta ˗yö ˗kë ꞊töö ꞊dhɛ?
10 ˈˈƐɛn ˈzü ka ˗zo ˗ya bhɔ ˈbluu˗ bhɛ ˈˈsɔɔplɛ ˈö mɛn ˈˈgblü ˗yiishiö (4.000) ˈˈdhi gba bhë ˗a ˈka ˗ee? ˈDhɛ ˈwo˗ ˗bhö ˗a ˈdhɛ ˈö to ˈö ˈka˗ ˗lo ˈko ˗ta ˗yö ˗kë ꞊töö ˈˈgblʋ̈gblʋ̈ ˗ɲaan ꞊dhɛ?
11 ˈMën ˗kë ˈö ka ˈti˗ ˈgüman ꞊dhɛ ˈmii ˈˈwɩ ˈbluu˗ ˈka? A˗ ˗pö ˈka ka ˗de ˈkun Fadhiziɛn ˗nu waa Sadusiɛn ˗nu ˗bha ˈˈsɛkɛ ˗gɔ.»
12 ˈDhɛ ˈö ˗kë ˈˈdhʋ̈, ˈyö ˈwo˗ ˈgüman ꞊dhɛ ˈˈsɛkɛ ˈö˗ pö ˗an ˗dhɛ ˗wo wo ˗de ˈkun ˗a ˗gɔ bhë, Fadhiziɛn ˗nu waa Sadusiɛn ˗nu ˗bha ꞊klaŋwo ˗nu ˗mü, ˈbluu˗ ˗bha ˈˈsɛkɛ ˈyaa ˗mü.
13 ˈDhɛ ˈwo dho ˈwo ˗lo Sezadhe Fidhipö ˗sɛ ˈgü, ˈyö Yesu ˗yö ö ˗bha gwëëˈˈ ˗nu dhɛɛˈˈ kpɔ ˈö˗ pö: «Mɛn ˗nu ˗bha ˈgü, de ˗mü maan mɛn Gbö ˗mɛn n ˈka?»
14 ˈYö ˈwo˗ ˗yɔ bɔ ˈwo˗ pö: «Mɛn ˈbhaa ˗nu ˗wa ˗pö Zan mɛnbɔyibhaamɛn ˗mü ü ˈka, ˈyö mɛn ˈbhaa ˗nu ˗wa pö Edhi ˗mü ü ˈka, ˈyö mɛn ˈbhaa ˗nu ˗de ˈpö ˈwo˗ pö Zedhemi ɛɛnˈˈ ˗Zlan ˗wodhiʋ̈lomɛn ˈˈwɛɛ ˈbhaa ˗mü ü ˈka.»
15 ˈYö˗ pö ˗an ˗dhɛ: «ˈYö ka ˗zë ꞊wɛ? Ka ˗bha ˈgü de ˗mü n ˈka?»
16 ˈYö Simɔn Piɛɛ ˗ya ˗yɔ bɔ ˈö˗ pö: «Bhi ˈnën ü ˗tɔ Klito, ˗Zlan ˈö ˈˈbhɩɩ˗ ˗a Gbö.»
17 ˈYö Yesu ˗ya pö ˗a ˗dhɛ: «Simɔn, Ʒonasö gbö, ü ˗bha ˗yö ˗së. ˗A ˗gɛn ˗mü ꞊dhɛ mɛnbhɩɩdhe* ˈyaa ˈnën ˈö ˈˈdhɛ bho ˗a ˗ta ü ˗dhɛ, n Dë ˈö dhaŋ˗ ˈgü yö ˗mü.
18 ˗Ya ˈgo mü ˈzü a˗ pö ü ˗dhɛ: ˗Wo ü ˗dhɛ Piɛɛ.* ˗Gwö ˈnën ˈa ˗dho n ˗man ˗zlanwokɔdhi ˈö Ga ˗gblü* ˗kɔ yö ˈti ˗dho ꞊mɔɔn˗ ˗bha bhë ˗a ˗gɛn ˗gban ˗a ˗ta.
19 A ˗dho ü gba ˗Gblüdëdhɛ ˈö dhaŋ˗ ˈgü bhë ˗a ꞊laklɩɩ ˈka. Pë ˈü ˗dho ˈˈkwee ta ˗a ˗gɔ* ˈˈkpɔnŋ ꞊taa yö, kö ˗yö ta ˗sü ˈka ˗a ˗gɔ ˈsaadhö dhaŋ˗ ˈgü. ˈYö pë ˈü ˗dho ˈˈkwee ˈˈpʋ ˗a ˗gɔ* ˈˈkpɔnŋ ꞊taa yö, kö ˈˈkwee ˗yö ˈˈpʋ ˗sü ˈka ˗a ˗gɔ ˈsaadhö dhaŋ˗ ˈgü.»
20 ˈDhɛ ˈö ˗kë ˈˈdhʋ̈ ˈyö ˗dhioo dɔ ˗an ˗ta ꞊glɔɔglɔɔdhö ˈö˗ pö ˈwa ˗dho ˗a pö mɛn ˈbhaa ˗dhɛ ꞊dhɛ yö ˈnën ˈö ˗tɔ Klito.
21 ˈÖ sü ˈˈtʋ̈ŋ ˈö bhë ˗a ˗bha, ˈyö Yesu ˗yö ˗ya ˗a ˈgü ˈˈpʋ ˗sü ˗bha ö ˗bha gwëëˈˈ ˗nu ˗dhɛ ꞊dhɛ ö dua ˗mü kö ˈö ˈdho Zedhizadhɛmö kö mɛn zii ˗nu, ˈˈsaabhomɛn ˗nu ˗gɔmɛn ˗nu waa ˈtɔŋ˗ ˗gɔmɛn ˗nu ˈö ˈwo ˈmü ˗wo ö saanˈˈ ˗kë wo ꞊dedewo kö ˗wo ö zë, ˈˈkɛɛ kö ˗a ˗dhɛkpaɔyi ˗yaaga ˗naan ˈka ˈö ˈgo ga ˈgü.
22 ˈYö Piɛɛ ˗ya ˗dhɛ ꞊plɛdhe ˈgü ˈö ˗ya ˗dɔn ˗bho ˗a ˈka ˗sü ˗bha ˈö˗ pö: «ˈBha ˗dho dhiaŋ zë ü ˗de ˗bha ˈˈdhʋ̈ n Dëmɛn, ˈwɔn ꞊suu ˈö bhë yö ˈti ˗dho kë ü ˈka toŋtoŋdhö.»
23 ˈDhɛ ˈö ˗kë ˈˈdhʋ̈ ˈyö Yesu ˗yö ö ˗ta yö Piɛɛ ˗bha ˈö˗ pö: «˗Bhö bɔ n ꞊taabha Sɔtraan! ˈBha kë n ˗gɛn ˈˈdhiʋ̈ ˗zuö ˗a ˗bha ˗pë ˈka ˈbha wɔ n ˗gɔ ʒiaan˗, ˗a ˗gɛn ˗mü ꞊dhɛ ü ˗zota ˗kɔ ˈyaa ꞊dhɛ ˗Zlan ˗bha ˈdhö, ü ü ˗zota ꞊dhɛ mɛnbhɩɩdhe ˈdhö.»
24 ˈDhɛ ˈö ˗ya kë ˈˈdhʋ̈, ˈyö Yesu ˗ya pö ö ˗bha gwëëˈˈ ˗nu ˗dhɛ: «Mɛn ˈö˗ ˈˈpiʋ̈ ˈö ʒiö n ꞊kee˗, ˗a dua ˈyaa ˗mü kö ˗yö ˗tosɛta kë ö ˗de ˗bha ˈka ˈzüdho. ˗A dua ˗mü ꞊ʒiaan kö ˗yö ö ˗bha ˗ga ˗a ˗ta ˗dhü ˈsü kö ˗yö ʒiö ˗a ˈka n ˈˈpiʋ̈ ˗kplawo.
25 ˗A ˗gɛn ˗mü ꞊dhɛ mɛn ˈö ˈˈpiʋ̈ ˈö ö ˗de* dha, ˗a ˗mɛn ˗gɔ ˗dho ˈto ˗a ˈgü. ˈˈKɛɛ mɛn ˈö ga n ˗wɔn ˈgü, ˗yö ˗dho ˗tosɛta kë.
26 Mɛn ˈö ˈˈkpɔnŋtaapë ꞊gban ˈˈpɛpɛ ꞊slɔɔ, ˈˈkɛɛ ˈö˗ ˗gɔ ˗yö to ˗a ˈgü, kö ˗a ꞊trɔɔn ˗yö ˈˈmɛn? Ɛɛnˈˈ ˈmën ˈö mɛnbhɩɩdhe ꞊mɔɔn˗ ˗bha ˗ya nu kö ˗yö ö ˗de ˗gɔ ˗ta ˈdhɔ ˗a ˈka?
27 ˗A ˗gɛn ˗mü ꞊dhɛ mɛn Gbö dua ˗mü kö ˗yö nu ö Dë ˗bha ˈtɔbhɔdhe ˈgü kö ˗a ˗bha ˈˈkiö ˗nu ˗wa ꞊kee˗, kö ˗yö mɛn ˈö ˗dhö, pë ˈö ˗bɛ ˗a ˈˈtakɔ ˗bha ˗ya nu ˗a ˗dhɛ.
28 A˗ ˗pö ka ˗dhɛ gagade ˈka ꞊dhɛ, maan mɛn Gbö ˗mɛn n nu ˗sü ˈka n ˗man ˗Gblüdëdhɛ ˈgü, kö mɛn ˗nu ˈwo ˗lo yö ˗a mɛn ˈbhaa ˗nu ˗wo ꞊kun wo ˈˈɲaan, kö wo ˈti ga ꞊köŋ.»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «꞊nënŋ waa ꞊ɲɔɔn.»
^ Glɛkö ˗wo ˈgü ˈyö ˗tɔ «˗gwö.»
^ Ɛɛnˈˈ «ga ꞊faan.»
^ Glɛkö ˗wo ˈgü ˈyö ˗tɔ «˗klu.»
^ Glɛkö ˗wo ˈgü ˈyö ˗tɔ «ˈˈpʋ.»
^ Ɛɛnˈˈ «ˈniin˗.»
