ˈö Matiö ˗ya ˗bɛnzë 18:1-35
18 ˈˈTʋ̈ŋ ˈö bhë ˗a ˈgü, ˈyö Yesu ˗bha gwëëˈˈ ˗nu ˗wo ꞊ɲɔɔn ˗a ˈˈsuee ˈyö ˈwo˗ dhɛɛˈˈ kpɔ ˈö ˈwo˗ pö: «De ˈö ˗dho kë mɛn ˈkpii˗ ˈka ˗Gblüdëdhɛ ˈö dhaŋ˗ ˈgü ˗a ˈgü?»
2 ˈYö Yesu ˗yö ˈnën ˈˈtɩtɩ do ˗dhɛ ˈyö˗ dɔ ˗an ꞊zinŋgü,
3 ˈyö˗ pö ˗an ˗dhɛ: «A˗ ˗pö ka ˗dhɛ gagade ˈka ꞊dhɛ ka ˈti ka kë ˗kɔ ˗nu bho ˈˈgblʋʋ kö ˈka kë ꞊dhɛ ˈnën ˈsɛɛn˗ ˗nu ˈdhö, ka ˈti ˗dho ˗da ˗Gblüdëdhɛ ˈö dhaŋ˗ ˈgü ˗a ˈgü toŋtoŋdhö.
4 ˈˈKɛɛ mɛn ˈö ö ˗de ˗kë ˈˈtɩtɩ ꞊dhɛ ˈnën ˈˈtɩtɩ ˈö dɔ yö ˗a ˈdhö, yö ˈnën ˈö ˗dho kë mɛn ˈkpii˗ ˈka ˗Gblüdëdhɛ ˈö dhaŋ˗ ˈgü ˗a ˈgü.
5 ˈYö mɛn ˈö ˗dho ö ˗kɔ ˗ya ˈnën ˈˈtɩtɩ ˈö ˗kë ꞊dhɛ ˈnën ˈö yö ˗a ˈdhö ˗a ˗gɔ n ˈtɔ ˗wɔn ˈgü, kö ˗ya ö ˗kɔ ˗ya n ˗gɔ ˈpö.
6 ˈˈKɛɛ mɛn ˈö ˗dho ˈnën ˈsɛɛn˗ ˗nu ˈö ˈwo wo ˗zo yö n ˗dhɛ bhë ˗a mɛn dosɛnŋ bho ʒiaan ˗ta, pë ꞊bioo ˗a ˈka ˗gwö kpö ˈkpikpi ˈö ꞊soofëŋ ˈnën˗ ˗glü ö ˗zü bhë, ˗a ˗dɔ ˗a bhɔ ˗bha ˗sü ˈö ˈwo˗ ˗zuö ꞊weeyi ꞊bhaa ˗a ꞊fiëë ˗yö ˗dhö.
7 «ˈˈKpɔnŋtaadhɛ ˗bha ˗yö ˗wëësü, ˈyö ˗tɔ ꞊dhɛ mɛn ˗nu ˗puö ˈwɔn yaa ˈgü ˗pë ꞊va ˗wo mü. ˗Yö ˈˈdhʋ̈ ꞊dhɛ mɛn ˗nu ˗puö ˈwɔn yaa ˈgü ˗pë ˗nu ˗dho kë ˗dhö ˗kplawo, ˈˈkɛɛ mɛn ˈö ˗dho bɔ ˗a ˗ta kö ˗yö kë bhë, yö ˈnën ˈö˗ ˗bha ˈdhö ˗wëësü.
8 ˈDhɛ ˈö ˈˈdhʋ̈, ˗ya kë ꞊dhɛ ü ˗kɔ ɛɛnˈˈ ü ˗gɛn ˗ya kë ü ˗puö ˈwɔn yaa ˈgü ˗pë ˈka, ˗a ˈˈdhiʋ̈ bho ˈü˗ ˗zuö ü ˈka ꞊gblɛɛn. Ü ˗kɔ ɛɛnˈˈ ü ˗gɛn ˗bha ˗to do ˗sü ˈö ˈü dha ˗a ꞊fiëë ˗yö ˗dhö ˈö ˗ʒiö ˗a ˈka ü ˗kɔ ꞊plɛ ɛɛnˈˈ ü ˗gɛn ꞊plɛ ˗bha ˗to ü ˗bha ˗sü ˈö ˈwo ü ˗zuö ˗a ˈka ˈˈshiʋ̈ ˈö ˈyaa dhuuˈˈ toŋtoŋdhö* ˗a ˈgü bhë ˗a ˗ta.
9 ˗Ya kë ˈzü ꞊dhɛ ü ˈˈɲanga ˈnën ˗ya kë ü ˗puö ˈwɔn yaa ˈgü ˗pë ˈka, ˗a bho mü ˈü˗ ˗zuö ü ˈka ꞊gblɛɛn. Ü ˈˈɲanga ˗bha ˗to do ˗sü ˈö ˈü dha, ˗a ꞊fiëë ˗yö ˗dhö ˈö ˗ʒiö ˗a ˈka ü ˈˈɲanga ꞊plɛ ˗bha ˗to ü ˗gɔ ˗bha ˗sü ˈö ˈwo ü ˗zuö ˗a ˈka Ʒeɛnö ˈgü ˗a ˗ta.
10 ˗Kaa kë ˗së kö ˈka ˗dho ˈnën ˈsɛɛn˗ ˗nu ˈö ˈwo bhë ˗a mɛn dosɛnŋ ˗ʒiaan ˈsü ˈya˗, ˈyö ˗tɔ a˗ ˗pö ka ˗dhɛ ꞊dhɛ ˗an ˗bha ˈˈkiö ˗nu ˈwo dhaŋ˗ ˈgü, ˗wo ˗dho ˗kplawo* n Dë ˈö dhaŋ˗ ˈgü bhë ˗a ˗kuu ˈˈdhiʋ̈.
11 ——
12 «Ka ˗bha ˈgü mɛn ˈö ˈˈbhlaa këŋ do (100) ˈdhö˗ ˗gɔ, ˗a do ˗ya ꞊dhiɔŋ, yö ˈti ˗dho ˗a ˗kɔŋ ˈˈseishiö ö ga ˈˈseishiö (99) ˈö ˈwo to ˗an ˈto ˗tɔn ˗ta ˈö dho ˗a ˈdhɛ ˈö ꞊dhiɔŋ bhë ˗a mɛɛnˈˈ ˗ee?
13 A˗ ˗pö ka ˗dhɛ ꞊dhɛ ꞊yaa˗ ꞊slɔɔ, ˗a zuʋ̈ˈˈ ꞊nii ˗yö ˗da ˗a ˗wɔn ˈgü ˈö ˗ʒiö ˗a ˈka ˗a ˗kɔŋ ˈˈseishiö ö ga ˈˈseishiö (99) ˈö wo ˈti ꞊dhiɔŋ bhë ˗an ˗ta.
14 ˗Kɔ do ˈö bhë ˗a ˈka, n Dë* ˈö dhaŋ˗ ˈgü ˈyaa˗ ˈˈpiʋ̈ kö mɛn ˗nu ˈwo ꞊dhɛ ˈnën ˈsɛɛn˗ ˗nu ˈdhö bhë ˗a mɛn dosɛnŋ ˗ʒiaan ˈgü ˗yö shiʋ̈ˈˈ.
15 «Ü ꞊dhegblü ˗ya ˈwɔn yaa kë ü ˈka, ˗bhö ˈdho kö ˈwɔn yaa ˈö˗ ˗kë bhë ˈü˗ blɛɛˈˈ ˗a ˗dhɛ, ˈˈkɛɛ ˗yö kë mɛn ꞊plɛ ka ꞊zinŋgü. ˗Ya kë ꞊dhɛ ˗ya ö ˈˈtʋ ˈto ü ˗wo ˗bha, kö ˈbha ü ꞊dhegblü bho ʒiaan yaa ˗ta.
16 ˈˈKɛɛ ˗ya kë ꞊dhɛ yö ˈti ö ˈˈtʋ ˈto ü ˗wo ˗bha, ˗bhö mɛn do ɛɛnˈˈ mɛn ꞊plɛ kpa ü ˗bha kö ˈka ˈdho ˗a ˈˈpiʋ̈, kö pë ꞊gban ˈˈpɛpɛ ˈö ˈka ˗dho ˗a pö mü ˗yö kë mɛn ꞊plɛ ɛɛnˈˈ mɛn ˗yaaga ˈˈɲaan kö ˗wa ꞊gbɛkiödhɛ* kë, kö ˈwɔn ꞊gban ˗yö kë ˈˈpuu.
17 ˗Ya kë ꞊dhɛ yö ˈti ö ˈˈtʋ ˈto ˗an ˗bha, ˗a blɛɛˈˈ ˗zlanwokɔdhi ˗dhɛ. ˗Ya kë ˈzü ꞊dhɛ yö ˈti ö ˈˈtʋ ˈto ˗zlanwokɔdhi ˗bha, ˗bhö ˗a ˈsü ꞊taabha ꞊dhɛ ˈˈsɛ ˈˈwɛɛ ˈgümɛn ɛɛnˈˈ ˈniinsɔnŋkunmɛn ˈdhö.
18 «A˗ ˗pö ka ˗dhɛ gagade ˈka ꞊dhɛ, pë ˈˈpɛpɛ ˈö ˈka ˗dho ˈˈkwee ta* ˗an ˗gɔ ˈˈkpɔnŋ ꞊taa yö, kö ˈˈkwee ˗yö ta ˗sü ˈka ˗an ˗gɔ ˈsaadhö dhaŋ˗ ˈgü. ˈYö pë ˈˈpɛpɛ ˈö ˈka ˗dho ˈˈkwee ˈˈpʋ* ˗an ˗gɔ ˈˈkpɔnŋ ꞊taa yö, kö ˈˈkwee ˗yö ˈˈpʋ ˗sü ˈka ˗an ˗gɔ ˈsaadhö dhaŋ˗ ˈgü.
19 A˗ ˗pö ka ˗dhɛ ˈzü gagade ˈka ꞊dhɛ, ka kpö ˈgü kö mɛn ꞊plɛ ˗wo ˗yö ˗mɔn pë ˗wɔn ˈˈgbɩɩ˗ ˗sü ˈbhaa ˈgü ˈˈkpɔnŋ ꞊taa yö, kö ˗wo bhɛɛˈˈ ˗a ˗wɔn ˈgü, n Dë ˈö dhaŋ˗ ˈgü ˗yö ˗dho ˗a kë ˗an ˗dhɛ.
20 ˗A ˗gɛn ˗mü ꞊dhɛ ˗dhɛ ˈö mɛn ꞊plɛ ɛɛnˈˈ mɛn ˗yaaga ˈdhö ˗ya ˗sü ˈka ˗a ˗bha wo ˈkwëëdhö n ˈtɔ ˈgü, kö a ˗an ˈˈpiʋ̈ mü.»
21 ˈYö Piɛɛ ˗yö ꞊ɲɔɔn Yesu ˗bha ˈö˗ dhɛɛˈˈ kpɔ ˈö˗ pö: «N Dëmɛn, n ꞊dhegblü ˗ya ˈwɔn yaa kë n ˈka ˗kplawo, n dua ˗mü kö ˈa˗ ˗bhawɔn ˈto ˗gɛnɲaan ˈka ꞊dhɛ? N dua ˗mü ˈa ˗bhawɔn ˈto ˗gɛnɲaan ˈka ˈˈsɔɔplɛ ˗ee?»
22 ˈYö Yesu ˗ya pö ˗a ˗dhɛ: «A˗ ˗pö ü ˗dhɛ, ˗bhö ˗a ˗bhawɔn ˈto ˗gɛnɲaan ˈka ˗kɔŋ ˈˈsɔɔplɛ ö ga ˈˈsɔɔplɛ (77), ü ˈˈdhiʋ̈ ˈya ˗dho ˈto ˈˈsɔɔplɛ ˗bha.
23 «˗A ˗wɔn ˈgü, a˗ ˗pö ka ˗dhɛ ꞊dhɛ ˗Gblüdëdhɛ ˈö dhaŋ˗ ˈgü ˗yö ꞊dhɛ ˗gblüdë do ˈö kun ˗a ˈˈpiʋ̈ kö ö ˗bha yökëmɛn ˗nu ˗wo ö ˗bha ˈˈpɔ bho ˗a ˈdhö.
24 ˈDhɛ ˈö˗ ˗gblüdë ˗yö ˗ya ö ˗bha ˈˈpɔ kë ˗sü ˗bha, ˈyö ˈwo nu gɔndënën do ˈö˗ ˗bha ˈwëë˗ talan* ˈˈgblü ˗kɔŋ do (10.000) ˈˈpɔ ˗kë ˗a ˗bha, ˗a ˈka ˗a ꞊dhiaa.
25 ˈˈKɛɛ ˈdhɛ ˈö ˗kë ꞊dhɛ ˗a ˈˈpɔ bho ˗kɔ ˈyaa kun ˗a ˗gɔ, ˗a ˗gɔmɛn ˗ya ˗pö ˗wo yö ˗nu, ˗a ˗bha dhebɔ ˗nu, ˗a ˗bha ˈnën ˗nu waa pë ˈˈpɛpɛ ˈö˗ ˗gɔ ˗an ˈˈdhoodɔ kö ö ˗bha ˈwëëga ˗yö ˈgo ˈˈblü.
26 ˈDhɛ ˈö ˗kë ˈˈdhʋ̈, ˈyö˗ ˗bha yökëmɛn ˗yö yö ö kpɔn ˈgü, ˈyö ˈˈgblëënnu ˗a ˈˈdhiʋ̈ ˈö˗ pö ˗a ˗dhɛ: ‹N Dëmɛn, ˗bhö ü zuʋ̈ˈˈ kë ˗saa n ˈˈpiʋ̈, a ˗dho ü ˗bha ˈˈpɔ ꞊gban ˈˈpɛpɛ bho.›
27 ˈDhɛ ˈö˗ pö ˈˈdhʋ̈, ˈyö˗ ˗wëë ˗yö ˗a ˗gɔmɛn ˗kë ˈö ö ꞊kwaa˗ ˗zü, ˈö ö ꞊kwaa ˈpö ˈˈpɔ ˈdhɛ ˈö bhë ˗a ˗wɔn ˗zü.
28 ˈˈKɛɛ ˈdhɛ ˈö yökëmɛn ˈö bhë ˈö yö ˈˈkpɛnŋ, ˈyö ˗kpan ö yökëyoo do ˗bha. ˗A ˗bha ˈwëë˗ denie* këŋ do (100) ˈˈpɔ ˗yö ˗kë ˗a ˈˈtɛɛdo ˈö bhë ˗a ˗bha. ˈYö ˗puö ˗a ˗ta ˈö˗ kun ˈö bhuɛɛˈˈ ˈö˗ pö ˗a ˗dhɛ: ‹˗Bhö n ˗man ˈˈpɔ bho.›
29 ˈDhɛ ˈö ˗kë ˈˈdhʋ̈ ˈyö ˗a yökëyoo ˗yö yö ö kpɔn gü, ˈö ˗ya bhɛɛˈˈ ˗sü ˗bha ˗a ˗dhɛ ˈö˗ pö: ‹˗Bhö ü zuʋ̈ˈˈ kë ˗saa n ˈˈpiʋ̈, ˗a ˗dho ü ˗bha ˈˈpɔ bho.›
30 ˈˈKɛɛ ˈyaa kun ˈˈwɩ ˗ni ˈgü ˗a ˗bha, ˈyö˗ kun ˈö dho ˗a ˈka ˈö˗ ˗da ˗kaso ˈgü, kö ˗ya ö ˗bha ˈˈpɔ bho kö ˗yö ꞊kun yö ˈˈkpɛnŋ.
31 ˈDhɛ ˗a yökëyoo ˈˈwɛɛ ˈbhaa ˗nu ˈˈɲan ˗yö ˗da ˈwɔn ˈö bhë ˗a ˈgü, ˈyö ˗wëë ˗yö kpɔ ˗an ˗ta ꞊dedewo. ˈYö ˈwo nu ˈö ˗kɔ ˈö ˈwɔn ˗nu ˗wo ˗kë ˗a ˈka ˈwo ˗ʒiö ˗a ꞊gban ˈˈpɛpɛ ˈgü wo ˗gɔmɛn ˗dhɛ.
32 ˈYö ˗a ˗gɔmɛn ˗yö ˗a ˗dhɛ ˈö˗ pö ˗a ˗dhɛ: ‹꞊Suuyaamɛn, ˈdhɛ ˈü ꞊bhɛɛ n ˗dhɛ, n ˗man ˈˈpɔ ˈˈpɛpɛ ˈö ˗kë ü ˗bha a n ˗kwaa ˗a ˗wɔn ˗zü.
33 ˈBhaa ꞊mɔɔn˗ ˗bha kö ü yökëyoo ˗wëë ˗yö ü kë ꞊dhɛ ˗kɔ ˈö man ˗de ˈpö ü ˗wëë ˗yö n ˗kë ˗a ˈka bhë ˗a ˈdhö ˗ee?›
34 ˈYö ˈwɔn ˗yö ˗shiö ˗a ˗gɔmɛn ˗dhɛ ˈö˗ pö ˈˈsɔdha ˗nu ˗dhɛ ˗wa ˗da ˗kasö ˈgü kö ˗yö ˈto mü ˗yö ˈˈpɔ ˈö˗ ˗bha bhë ˗a ꞊gban ˈˈpɛpɛ bho, kö ˗yö ꞊kun yö ˈˈkpɛnŋ.
35 Mɛn ˈˈoo ˗mɛn ˈö yö ˈti ö ꞊dhegblü ˗bhawɔn ˈto ö zuʋ̈ˈˈ ꞊gban ˈka, n Dë ˈö dhaŋ˗ ˈgü ˗yö ˗dho ˗a kë ˗a ˈka ˈˈdhʋ̈ ˈpö.»
-Zoto -a ˈˈpiʋ̈ -wɔn -nu
^ Ɛɛnˈˈ «Ʒeɛnö.» Yö ˈnën ˈö ˗tɔ ˈgüshiʋ̈dhe ˈö ˗toëpö ˈka.
^ Glɛkö ˗wo ˈgü ˈyö ˗tɔ «˗wo ˗kpan n Dë ˈö dhaŋ˗ ˈgü ˗a ˈwëëdhɛ ˗bha ˗kplawo.»
^ ˗Yö ꞊mɔɔn˗ ˗bha ˈö ˗kë, «ka Dë» ˈka.
^ Glɛkö ˗wo ˈgü ˈyö ˗tɔ «ˈgo ˗an ˈˈdhi.»
^ Glɛkö ˗wo ˈgü ˈyö ˗tɔ «˗klu.»
^ Glɛkö ˗wo ˈgü ˈyö ˗tɔ «˗a ˈˈpʋ.»
^ Talan ˈˈgblü ˗kɔŋ do ˈnën ˗tɔ ˗an ˗bha ˈwëë˗ ˈwo˗ denie ˗kë bhë ˗a ˈˈmliɲɔn ˗kɔŋ ˈˈsɔɔdo. Talan do ˈnën ˗tɔ yö ˈö mɛn ˗ya ˗kë ˗kwɛ ˗kɔŋ ꞊plɛ ˈka ˗a ꞊saa.
^ Denie do ˈnën ˗tɔ ˗dhɛkpaɔyi do ˗yö ꞊saa.
