ˈö Matiö ˗ya ˗bɛnzë 19:1-30
19 ˈDhɛ ˈö Yesu ˗yö ˈö bo ˗wo ˗nu ˈwo bhë ˗an pö ˗sü ˈka, ˈyö go Galile ˗sɛ ˈgü ˈö Zuudɛn ga ˗kan ˈö dho Zude ˗sɛ ˈˈpian ˈö˗ ꞊taabha bhë ˗a ˈgü.*
2 ˗Dhɛ ˈö bhë ˗a ˈgü ˈzü, mɛn ꞊va ꞊dede ˗wo ˗ʒiö ˗a ꞊kee˗, ˈyö ˗an ˗dhɛ bo.
3 ˈYö Fadhiziɛn ˗nu ˗wo nu ˗a ꞊kee˗ kö ˈwo˗ ˈgü dan, ˈyö ˈwo˗ dhɛɛˈˈ kpɔ ˈö ˈwo˗ pö: «˗A ˗dhɛ ˗a ˗bha kö mɛn ˈbhaa ˗yö ö ˗bha dhebɔ ˗bho ˈˈblü ˈwɔn ꞊suu ꞊gban ˈˈpɛpɛ ˗wɔn ˈgü ˗ee?»
4 ˈYö Yesu ˗ya ˗yɔ bɔ ˗an ˗gɔ ˈö˗ pö: «˗A pö ˈö ˗Zlan ˗Wo ˗ya wo ꞊dhɛ ˗a züdɔdhɛ ˈgü ˗Zlan ˗yö ˗an ˗da, ˈö ˗an ˗kë gɔɔn˗ waa dhebɔ ˗an ˈka bhë, ka ˈti˗ ˗wo pö do ˗ee?
5 ˗Yö ˗go mü ˈzü ˈö˗ pö: ‹Yö ˈnën ˈö˗ ˗wɔn ˈgü ˈö gɔɔn˗ dho ˈgo ö dë waa ö dhe ˗an ˗bha ˈö ˗klu ö ˗bha dhebɔ ˗bha, kö ˗kɔ ˈö ˈwo˗ ˗bha ꞊plɛ ˗wo kë mɛn ˗dhü do ˈka.›
6 ˗Ya kë ˈˈdhʋ̈ kö ˈwaa mɛn ꞊plɛ ˈka ˈzü, kö ˗wa kë mɛn ˗dhü do ˈka. ˈDhɛ ˈö ˈˈdhʋ̈, pë ˈö ˗Zlan ꞊yaa˗ ꞊nënŋ ˈkwëë˗ mɛn ˈbhaa ˈya ˗dho ˗a ˈˈkan ˈkwëë˗.»
7 ˈYö ˈwo˗ pö Yesu ˗dhɛ: «ˈDhɛ ˈö ˗kë ˈˈdhʋ̈ ˈsa, ˈmën ˗kë ˈö Moizö ˗ya pö ꞊dhɛ mɛn ˈö˗ ˈˈpiʋ̈ ˈö dhe bho ˈˈblü, ˗ya ˗bho ˈˈblü ˈsëëdhɛ ˈˈkan kö ˗ya kpa ˗a ˗bha ˗ya bho ˗a ˈka ˈˈblü?»
8 ˈYö Yesu ˗ya ˗yɔ bɔ ˗an ˗gɔ ˈö˗ pö: «Ka ˈˈtʋ ˈö ˗kë ˈˈgbɩɩ˗ bhë, yö ˈnën ˈö˗ ˗wɔn ˈgü ˈö Moizö ˗yö ˗we ˗a ˗bha kö ˈka ka ˗bha dhebɔ ˗nu bho ˈˈblü. ˈˈKɛɛ ˗a züdɔdhɛ ˈgü ˗be ˈyaa kun ˈˈdhʋ̈.
9 A˗ ˗pö ka ˗dhɛ ꞊dhɛ, mɛn ˈö ö ˗bha dhebɔ bho ˈˈblü, ˈö˗ ˗gɛn yö ˈti kë ˈˈɲangüyaa ˈö˗ ˗bha dhebɔ ˗ya ˗kë ˗a ˈka, ˗ya ˈdho ˗ya dhe ˈˈwɛɛ ˈsü, kö ˗ya ö ˗bha dhebɔ ˈto ˗ya niënŋˈˈ ˈnën bhë.»
10 ˈYö˗ ˗bha gwëëˈˈ ˗nu ˗wa pö ˗a ˗dhɛ: «˗Ya kë ꞊dhɛ dhe ˈsü ˗sü ˗yö ꞊dhɛ ˗kɔ ˈö bhë ˗a ˈdhö, kö ˗to ˈˈkwia ˈka ˗sü ꞊fiëë ˗yö ˗dhö.»
11 ˈYö Yesu ˗ya pö ˗an ˗dhɛ: «Mɛn ꞊gban ˈwaa ˈˈwɩ ˗a ˗kë ˈˈdhʋ̈ ˗sü ˗bha, kö yö ˈti kë mɛn ˗nu ˈö ˗Zlan ˗ya kë ˗sü gbɔɔdhe ˗kë ˗an ˗gɔ ˗an ˈka.
12 Dhe ˈsü ˈö mɛn ˈbhaa ˗nu ˈwaa˗ wo bhë, ˗a ˗gɛn ˗yö ꞊va. Mɛn ˈbhaa ˗nu ˗wo ˗bhɔ wo ˗bha ˈka, ˈö mɛn ˈbhaa ˗nu ˗de ˈpö mɛnbhɩɩdhe ˗nu ˈnën ˈwo ˗an ˗kë ˈˈdhʋ̈. Mɛn ˈbhaa ˗nu ˗de ˈpö ˗wo ˗to ˈˈkwia ˈka wo ˗de ˈˈɲaan ˗Gblüdëdhɛ ˈö dhaŋ˗ ˈgü ˗a ˗wɔn ˈgü. Mɛn ˈö ˗we ˗a ˗kë ˈˈdhʋ̈ ˗sü ˗bha, ˗yö ö ˗bha ˈto wo ˈˈdhʋ̈.»
13 ˈDhɛ ˈö ˗kë ˈˈdhʋ̈, ˈyö mɛn ˗nu ˗wo nu wo ˗bha ˈnën ˈsɛɛn˗ ˗nu ˈka Yesu ˈˈpiʋ̈ kö ˗yö ö ˗kɔ ˗ya ˗an ˗ta, ˗yö bhɛɛˈˈ ˗an ˗bha ˈka. ˈˈKɛɛ ˈyö˗ ˗bha gwëëˈˈ ˗nu ˗wo ˗an ˈˈdhiʋ̈ ˗blü.
14 ˈDhɛ ˈö ˈwo˗ ˗kë ˈˈdhʋ̈ ˈyö Yesu ˗ya pö ˗an ˗dhɛ: «˗Ka ka ꞊kwaa ˈnën ˈsɛɛn˗ ˗nu ˗zü kö ˗wo nu n ˈˈpiʋ̈, ˈka ˗dho ˗an ꞊kɛɛ ˈˈkan. ˗A ˗gɛn ˗mü ꞊dhɛ ˗Gblüdëdhɛ ˈö dhaŋ˗ ˈgü ˗yö mɛn ˗nu ˈwo ꞊dhɛ ˗an ˈdhö ˗an ˗bha ˈka.»
15 ˈYö Yesu ˗yö ˈdhuëë˗ kpɔ ˈnën ˗nu ˈwo bhë ˗an ˗bha.* ˈDhɛ ˈö ö bo, ˈyö go ˗dhɛ ˈö bhë ˗a ˈgü ˈö ˗ʒiö.
16 ˈDhɛ ˈö ˈdho ˗ni ˈgü, ˈyö ˈnëngɔnnën do ˈbhaa ˗yö ꞊ɲɔɔn ˗a ˗bha ˈö˗ pö ˗a ˗dhɛ: «˗Gɔmɛn, ˗mën ˗wɔn ˗së ˈö n dua ˈdhö ˗mü kö ˈa˗ kë kö ˗tosɛta ˈö ˈyaa ɲën ˈa˗ ꞊slɔɔ?»
17 ˈYö Yesu ˗ya pö ˗a ˗dhɛ: «ˈMën ˈö ˗kë ˈö ˈü n dhɛɛˈˈ kpɔ ˈwɔn ˈö ˗së ˗a ˈka? ˗Zlan dosɛnŋ ˈnën ˈö˗ këwɔn ˈdhö ˗së.* ˈDhɛ ˈö ˈˈdhʋ̈, ˈbha˗ pö ˈü ˗tosɛta ˈö ˈyaa ɲën ˗a ꞊slɔɔ, ˗bhö ˗a ˗bha ˈtɔŋ˗ ˗nu ˗ya ꞊bhlëë ˈgü ˗kplawo.»
18 ˈYö˗ ˈnëngɔnnën ˗ya pö: «ˈTɔŋ˗ ˗nu ˗mɛɛn?» ˈYö Yesu ˗ya pö ˗a ˗dhɛ: «˗A ˈtɔŋ˗ ˗nu ˈwo ˈˈdhʋ̈ ˗wa ˗pö: Ü dua ˈyaa ˗mü kö ˈü mɛn zë, ü dua ˈyaa ˗mü kö ˈü ü ˗bha dhebɔ ɛɛnˈˈ ü ꞊gɔn ˈto kö ˈü niënŋˈˈ, ü dua ˈyaa ˗mü kö ˈü ꞊kwaan, ü dua ˈyaa ˗mü kö ˈü ꞊sua ˗wɔn ˗ya mɛn ˗bha.
19 ˗Bhö ü dë waa ü dhe ˗an ꞊bhlëë ˗ya. ˗Ya ˈgo mü ˈzü ü dua ˗mü kö ü ˗yayoo ˗dhɔ ˗yö ü kë ꞊dhɛ ü ˗de ˈdhö.»
20 ˈYö˗ ˈnëngɔnnën ˗ya pö ˗a ˗dhɛ: «A ˈtɔŋ˗ ˗nu ˈwo bhë ˗an ꞊gban ˗ya ꞊bhlëë ˈgü, ˗mën ˈbhaa ˈö˗ ˗wɔn ˗ya ˈto ˈzü kö ˈa˗ kë?»
21 ˈYö Yesu ˗ya pö ˗a ˗dhɛ: «˗Ya kë ꞊dhɛ ˈbhaa˗ ˈˈpiʋ̈ kö pö ˗yö kë ü ˗bha, ˗bhö ˈdho kö pë ꞊gban ˈˈpɛpɛ ˈwo ü ˗gɔ ˈü ˗an ˈˈdhoodɔ kö ˈü˗ ˈwëë˗ nu ˈˈfleemɛn ˗nu ˗dhɛ. ˗Ya kë ˈˈdhʋ̈, ˈyö ˈü ˗dho ꞊nɔɔn ˈö˗ ꞊bhlëë ˈdhö ꞊va ˗a ꞊slɔɔ dhaŋ˗ ˈgü. ˈBha ü bo kö ˈü nu ˈü ʒiö n ꞊kee˗.»
22 ˈDhɛ ˈö ˈnëngɔnnën ˈö bhë ˈö˗ man ˈˈdhʋ̈, ˈyö to mü ˈö˗ ˗ta ˗yö ˗kë ˗saa ˈö ˗ʒiö. ˗A ˗gɛn ˗mü ꞊dhɛ ꞊nɔɔn ˗yö ˗kun ˗a ˗gɔ ꞊va ꞊dedewo.
23 ˈDhɛ ˈö ˗kë ˈˈdhʋ̈, ˈyö Yesu ˗ya pö ö ˗bha gwëëˈˈ ˗nu ˗dhɛ: «A˗ ˗pö ka ˗dhɛ gagade ˈka ꞊dhɛ ˗Gblüdëdhɛ ˈö dhaŋ˗ ˈgü bhë, ˗da ˗a ˈgü ˗sü ˗dho kë ˈˈgbɩɩ˗ ꞊nɔɔnmɛn ˗gɔ.
24 A˗ ˗pö ka ˗dhɛ ˈzü ꞊dhɛ ꞊nɔɔnmɛn ˗bha ˗da ˗Zlan ˗bha ˗Gblüdëdhɛ ˈgü ˗sü ˗yö ˈˈgbɩɩ˗ ˈö ˗ʒiö ˗a ˈka ꞊ɲɔɔnmian ˗bha ˗bɔ mɛnŋga ˈˈdhi ˈgü ˗sü ˗ta.»
25 ˈDhɛ ˈö Yesu ˗bha gwëëˈˈ ˗nu ˗wa man ˈˈdhʋ̈, ˈyö˗ ˈwɔn ˗yö ˗an kun ꞊dedewo ˈö ˈwo˗ pö: «De ˈö ꞊mɔɔn˗ ˗bha ˗yö dha ˈsa?»
26 ˈYö Yesu ˗yö ˗an ˗ga ˗an ˈwëëdhö ˗pinŋdhö ˈö pö ˗an ˗dhɛ: «Mɛnbhɩɩdhe ˗bha ˈgü ˈyaa ꞊mɔɔn˗ ˗bha kö ˗yö kë, ˈˈkɛɛ ˗Zlan ˗zë ˗a ˗kɔ ˗yö ˗mɔn ˈwɔn ꞊gban ˈˈpɛpɛ kë ˗sü ˗bha.»
27 ˈDhɛ ˈö˗ pö ˈˈdhʋ̈, ˈyö Piɛɛ ˗ya pö ˗a ˗dhɛ: «ˈYö mɛn ˈkö yi ˗zë ˈya yi ˗bha pë ˈˈpɛpɛ ˈto ˈya ʒiö ü ꞊kee˗ yö ꞊wɛ? ˈMën ˈö ˈyi ˗dho ˗a ꞊slɔɔ ˗a ˈgü?»
28 ˈYö Yesu ˗ya pö ˗an ˗dhɛ: «A˗ ˗pö ka ˗dhɛ gagade ˈka ꞊dhɛ ˗Zlan ˗dho pë ꞊gban ˈˈpɛpɛ kë ˈzü ˗dɛɛ ˈˈtʋ̈ŋ ˈö maan mɛn Gbö ˗mɛn ˈa ˗dho ˗ya ˗a ˈka n ˗man ˗Gblüdëdhɛ ˗gbloo ꞊bhlëësü ˈgü bhë ˗a ˈka. ˗A ˈˈtʋ̈ŋ ˈö bhë ˗a ˈka, mɛn ˈö ˈka ˗ʒiö n ꞊kee˗ bhë ka ˗dho ˗ya ˗gbloo ˗kɔŋ do ö ga ꞊plɛ (12) ˈgü ˈö ˈka za dɔ Izraɛdhö ˈˈkwɛnŋgɔ ˗kɔŋ do ö ga ꞊plɛ (12) ˈwo bhë ˗an ˗bha.
29 ꞊Ya ˈgo mü ˈzü, mɛn ˈö zë n ˗wɔn ˗dhɛ ˈö ö ˗bha ˈkɔ ˗nu, ö ꞊dhegblü gɔɔn˗ ˗nu, ö ꞊dhegblü dhebɔ ˗nu, ö dë, ö dhe, ö ˗bha ˈnën ˗nu ɛɛnˈˈ ö ˗bha ˈbhladhɛ ˗nu to, ˗yö ˗dho ˗a ˗gwaa këŋ do ꞊slɔɔ, ˈö ˗tosɛta ˈö ˈyaa ɲën ˗a ꞊slɔɔ.
30 «ˈˈKɛɛ mɛn ˗nu ˈö ˈwo mɛn ˗blɛɛsü ˈka ˈˈtʋ̈ŋ ˈö yö ˗a ˈgü, ˗an ꞊vadhɛ ˗dho ˈto ꞊taabha,ˈö mɛn ˗nu ˈwo ꞊taabha ˈwo ˗kë mɛn ˗blɛɛsü ˗nu ˈka.
-Zoto -a ˈˈpiʋ̈ -wɔn -nu
^ Ɛɛnˈˈ «Zude ˗sɛ ˈˈdhiʋ̈todhɛ ˈgü.»
^ Ɛɛnˈˈ «ö ˗kɔ ˗ya ˗an ˗ta.»
^ Ɛɛnˈˈ «˗Zlan dosɛnŋ ˈnën ˈö ˈwɔn ˈö ˗së ˗a dɔ.»
