ˈö Matiö ˗ya ˗bɛnzë 2:1-23
2 ˈDhɛ ˈö Yesu ˗yö bhɔ Betedhɛmö ˗pö ˈö Zude ˈˈsɛ ˈgü bhë ˗a ˈgü, Edhɔdö ˗bha ˗gblüdëdhɛ ˈˈtʋ̈ŋ ˈgü, ˈyö ˈˈsusënŋga ˗bhokookëmɛn* ˗nu ˈö ˈwo go ˈɲaan˗ ˗wo ˗ʒian ˈka ˈwo nu Zedhizadhɛmö.
2 ˈYö ˈwo dhɛɛˈˈ kpɔ ˈwo˗ pö: «ˈNën ˈö dho kë Zuifö ˗nu ˗bha ˗gblüdë ˈka ˈö bhɔ ˈˈsɛ ˈö yö ˗a ˈgü bhë, ˗yö ˈˈmɛn? Yi ˗kpan ˗a ˗bha ˈˈsusënŋga ˗bha yi ˗gɔ ˈˈsɛ ˈgü ˈɲaan˗ ˗wo ˗ʒian ˈka, ˈyö ˈyi nu kö ˈyi ꞊dhɔŋ ˗da ˗a ˗dhɛ.»*
3 ˈDhɛ ˈö Edhɔdö ˗ya man ˈˈdhʋ̈, ˈyö ˈˈsuʋ̈ ˗yö ˗da waa Zedhizadhɛmö ˗mɛn ˗nu ꞊gban ˈˈpɛpɛ ˗an ˈgü.
4 ˈDhɛ ˈö ˗kë ˈˈdhʋ̈, ˈyö Edhɔdö ˗yö ˈˈsaabhomɛn ˗nu ˗gɔmɛn* ˗nu waa ˈtɔŋ˗ ˗gɔmɛn* ˗nu ˗dhɛ wo ˈkwëëdhö, ˈyö ˗an dhɛɛˈˈ kpɔ ˈö˗ pö: ‹˗Dhɛ ˗mɛɛn ˈwo˗ pö Klito* ˗dho bhɔ ˗a ˗bha?›
5 ˈYö ˈwo˗ ˗yɔ bɔ ˗a ˗gɔ ˈwo˗ pö: «Betedhɛmö ˗pö ˈö Zude ˗sɛ ˈgü bhë, ˈyö ˈwo˗ pö ˗yö ˗dho bhɔ ˗a ˗bha. Pë ˈö ˗Zlan ˗wodhiʋ̈lomɛn ˗ya pö ˈö ˗bɛnzë ˗sü ˈka ˈyö ꞊nɛn:
6 ‹Betedhɛmö ˗pö ˈü Zuda, ˗yö kë ü ˈˈɲaan ꞊dhɛ ˈbhaa ˈpö˗ ˈˈgblʋ̈gblʋ̈ ˗nu ˈwo Zuda ˗an ˗bhaasü ˈka ˗gblüdë ˗nu ˈwo Zuda ˗an ˈˈɲan ˈˈdhiʋ̈. ˗A ˗gɛn ˗mü ꞊dhɛ ˗gblüdë do ˈö ˗dho ˈˈdhiʋ̈sü n ˗man ˈˈsɛgɔ Izraɛdhö ˈgümɛn ˗nu ˈka ˗yö ˗dho ˈgo ü ˈgü.›»
7 ˈDhɛ ˈö ˗kë ˈˈdhʋ̈ ˈyö Edhɔdö ˗yö ˈˈsusënŋga ˗bhokookëmɛn ˗nu bhë ˗an ˗dhɛ ˗bindhe ˈgü, ˈyö ˗an dhɛɛˈˈ kpɔ kö ˈˈtʋ̈ŋ ꞊dede ˈö ˈwo ˗kpan ˈˈsusënŋga ˈö bhë ˗a ˗bha ˗a ˈka, ˗wa pö ö ˗dhɛ.
8 ˈYö go mü ˈö ˗an bɔ Betedhɛmö, ˈö˗ pö ˗an ˗dhɛ: «˗Ka ˈdho ˈka ˈnën ˈö bhë ˗a mɛɛnˈˈ ˗së ˈka. ˈKa ˗kpan ˗a ˗bha, ˗ka nu kö ˈka˗ pö n ˗dhɛ kö man ˗de ˈpö ˈa ˈdho ˈa ꞊dhɔŋ ˗da ˗a ˗dhɛ.»
9 ˈDhɛ ˈö ˗gblüdë ˗ya pö ˗an ˗dhɛ ˈˈdhʋ̈, ˈyö ˈwo ˗da ʒiaan˗. ˈYö ˈˈsusënŋga ˈö ˈwo ˗kpan ˗a ˗bha wo ˗gɔ ˈˈsɛ ˈgü ˈɲaan˗ ˗wo ˗ʒian ˈka bhë, ˈö yö ˗an ˗dhɛ ˈˈdhiʋ̈. ˈDhɛ ˈö ˗lo ˗dhɛ ˈö ˈnën ˈö bhë ˈö kun ˗a ˗bha bhë ˗a ˗ta ˈˈdhuŋ, ˈyö ˈduannu.
10 ˈDhɛ ˈö ˈˈsusënŋga ˗yö ˈduannu ˈö ˈwo˗ yö, ˗an zuʋ̈ˈˈ ˈˈgblü ˗yö ˗dhi ꞊dedewo.
11 ˈDhɛ ˈwo ˗da ˈkɔɔ ˈö ˈwo ˈnën ˈö bhë waa ö dhe Madhi ˗an yö, ˈyö ˈwo ˈˈgblëënnu ˗a ˗dhɛ ˈˈshia˗, ˈwo ꞊dhɔŋ ˗da ˗a ˗dhɛ. ˈˈDhɛ ˈwo wo bo, ˈyö ˈwo wo ˗bha ꞊kwɛɛ˗ ˗nu ˈˈdhi ˗pʋ ˈö ˈwo ˈˈsënŋ ˗nu, pë ˗bi ˈö ꞊waa˗ ˈˈgʋ̈ ˈö˗ ꞊fii ˗yö ˗kë ˗së* waa ˈˈɲɔn ꞊fii ˗së ˗sü ˈö ˈwo˗ ˈmiidhö ˗kë bhë ˗an gbɔɔ ˗a ˗gɔ.
12 ˈˈKɛɛ ˈdhɛ ˈö ˗kë ꞊dhɛ ˗Zlan ˗yö ˗an ˗kpɔɔ ˈˈɲɛɛn ˈgü ˈö˗ pö ˗an ˗dhɛ ˈwa ˗dho wo ꞊yɛɛ kë ˈwo bɔ Edhɔdö ˈˈpiʋ̈ bhë, ˗wo ˗bɔ ʒiaan ˈˈwɛɛ ˈka ˈö ˈwo dho wo ˗gɔ ˈˈsɛ ˈgü.
13 ˈDhɛ ˈwo ˗ʒiö, ˈyö Zoova ˗bha ˈˈkiö do ˗yö ö ˗de ˗zɔn Zozɛfö ˗dhɛ ˈˈɲɛɛn ˈgü ˈyö˗ pö ˗a ˗dhɛ: «˗Bhö luuˈˈ ˈü ˈnën ˈö bhë waa ö dhe ˗an ˈsü kö ˈka ꞊duëë ˈka ˈdho Ezitö. ˗Bhö ˈto ˗an ˈka ˈmü ˗yö ˈdho ˗yö yö ˗a ˈka ˈˈtʋ̈ŋ ˈa ˗dho ˗a pö ˈü ü ꞊yɛɛ kë ˗a ˈka bhë ˗a ˗bha, ˈyö ˗tɔ ꞊dhɛ Edhɔdö ˗yö ˗dho ˈnën ˈö bhë ˗a mɛɛnˈˈ kö ˈö˗ zë.»
14 ˈDhɛ ˈö ˗kë ˈˈdhʋ̈, ˈyö Zozɛfö ˗yö ˈnën ˈö bhë waa ö dhe ˗an sü gbeŋ, ˈyö ꞊duëë ˈö dho ˗an ˈka Ezitö.
15 ˗Yö ˗to ˈmü ˈö dho ˈö yö ˗a ˈka Edhɔdö ga ˗yi ˗bha. ˗A ˗kë ˈˈdhʋ̈ ˗sü ˈgü, ˈpë ˈö Zoova ˗yö bɔ ö ˗wodhiʋ̈lomɛn ˗ta ˈö˗ pö, ˗yö ˗yökodhiʋ̈. ˗Ya ˗pö: «A n gbö ˗dhɛ kö ˗yö ˈgo Ezitö ˗sɛ ˈgü ˗yö nu.»
16 ˈDhɛ ˈö Edhɔdö ˗ya yö ꞊dhɛ ˈˈsusënŋga ˗bhokookëmɛn ˗nu ˗wa ˈˈkpënŋ˗ kë ö ˗gɔ, ˈyö ˈwɔn ˗yö ˗shiö ˗a ˗dhɛ ꞊dedewo. ˈYö mɛn bɔ Betedhɛmö waa ˈpodhɛ ˈˈpɛpɛ ˈwo ˗a ˗züzü ˗an ˈgü kö ˈnëngɔɔn˗ ˗nu ˈö ˗an ˗kwɛ ˗yö sü ꞊plɛ ˗bha ˈö ꞊yɔɔ ˗a ˈka ˗wo ˗an ꞊gban zë. ˗Yö ˗gban ˈˈtʋ̈ŋ ˈö ˈˈsusënŋga ˗bhokookëmɛn ˗nu ˗wa pö ˗a ˗dhɛ bhë ˗a ˗ta ˈö˗ ˈnën ˈsɛɛn˗ ˗nu ˗kwɛ ˈö ˈˈdhʋ̈ ˗a ꞊dhʋŋ.
17 ˗Kɔ ˈö bhë ˈyö ˈpë ˗Zlan ˗yö bɔ ö ˗wodhiʋ̈lomɛn Zedhemi ˗ta ˈö˗ pö, ˈö yö ˗a ˈka ˈko ˈˈdhiʋ̈. ˗Ya ˗pö:
18 «ˈˈGbʋ waa ö ˗de ˗maanmaanˈˈ ˗wo ˗nu ˗wo ˗kun ˈˈwɩ ˗ni ˈgü Lama ˗pö ˈgü. Dhashɛdhö ˈnën ˈö kun ö ˗bha ˈnën ˗nu ˗gbʋ bɔ ˗ni ˈgü, ˈö ˈyaa kun ˗a ˈˈpiʋ̈ ꞊dhɛ ˗wo ö dhuaˈˈ, ˗a ˗gɛn ˗mü ꞊dhɛ ˗a ˗bha ˈnën ˗nu ˈwaa ˈdhö ˈzü.»
19 ˈDhɛ ˈö Edhɔdö ˗yö ga, Zoova ˗bha ˈˈkiö ˗yö ö ˗de ˗zɔn Zozɛfö ˗dhɛ ˈˈɲɛɛn ˈgü Ezitö.
20 ˈYö˗ pö ˗a ˗dhɛ: «˗Bhö luuˈˈ ˈü ˈnën ˈö bhë waa ö dhe ˗an ˈsü ˈka ka ꞊yɛɛ kë Izraɛdhö ˈˈsɛ ˈgü, ˗a ˗gɛn ˗mü ꞊dhɛ mɛn ˗nu ˈwo kun ˗a ˈˈpiʋ̈ ꞊dhɛ ˈwo˗ zë bhë, ˗wa ga.»
21 ˈDhɛ ˈö ˗kë ˈˈdhʋ̈, ˈyö ꞊luu ˈö ˈnën ˈö bhë waa ö dhe ˗an sü, ˈyö ˈwo wo ꞊yɛɛ ˗kë Izraɛdhö ˈˈsɛ ˈgü.
22 ˈˈKɛɛ ˈdhɛ ˈö Zozɛfö ˗ya man ꞊dhɛ Akedhaisö ˗yö ˗gblüdëdhɛ kë ˗ni ˈgü ö dë Edhɔdö ˈˈgblʋʋ ˈgü Zude ˈˈsɛ ˈgü, ˈyö ˗dho mü ˗sü ˈˈsuʋ̈ ˗yö ˗da ˗a ˈgü. ˗Ya ˈgo ˗mü ˈzü, ˗Zlan yöö ꞊dede ˗ya ˗kpɔɔ ˈˈɲɛɛn ˈgü. ˗A ˗wɔn ˈgü, ˗yö ˗dho ˗an ˈka Galile ˗sɛ ˈgü.
23 ˗Wo ˗dho ˈwo ˗ya ˈˈkwipö ˈwo˗ ˗dhɛ Nazadhɛtö bhë ˗a ˈgü. ˗Yö ˗kë ˈˈdhʋ̈ kö ˈpë ˈö ˗Zlan ˗yö bɔ ö ˗wodhiʋ̈lomɛn ˗nu ˗ta ˈö˗ pö bhë ˗yö yökodhiʋ̈. ˗Ya ˗pö: «˗Wo ˗dho ˗a ˗dhɛ Nazadhɛtömi.»*
-Zoto -a ˈˈpiʋ̈ -wɔn -nu
^ Ɛɛnˈˈ «mɛn ˗nu ˈö ˈwo ˈˈsusënŋga ˗nu ˗ga ˈö ˈwo ˗dɛbɔ ˗a ˗bha.»
^ Ɛɛnˈˈ «kö ˈyi yi ˗gɔ ˈˈgblëënnu ˗a ˗dhɛ, ˈyi˗ ꞊bhlëë ˈkpɔ.»
^ Ɛɛnˈˈ «Zuifö ˗nu ˗bha ˈˈsaabhomɛn ˗nu ˗gɔmɛn ˗nu.»
^ ˈTɔŋ˗ ˗gɔmɛn ˗nu ˈnën ˈwo ˗tɔ «mɛn ˗nu ˈwo ˈtɔŋ˗ ˗nu ˗gɛn pö, ˈö ˈwo mɛn ˗nu ꞊klaŋ ˗kë ˗an ˈka.»
^ Ɛɛnˈˈ «Mesi; ˗Zlan ˗bha ˗Yamɛn.»
^ Ɛɛnˈˈ «Ansansö.»
^ ˗Yö ˗kë ꞊dhɛ ˗a ˗gɛn ˗yö ˗gban Eblö ˗wo kpö ˈö ˗kë «˗bhoŋ» ˈka bhë ˗a ˗ta.
