ˈö Matiö ˗ya ˗bɛnzë 21:1-46
-
Yesu ˗bha ˗da ˈplöö ˗sü ˈö ˈwo wo ˗kɔ ˗ya ˗a ˗gɔ ˈˈtan ˈka (1-11)
-
Yesu ˗bha ˗dhiiwɔn ˗nu ˗bho ˗Zlan ˗dhɔkë ˗a ˈgü ˗kɔ ˈgü ˗sü (12-17)
-
Yesu ˗yö ˈˈdhaŋ ˗ya figö ˗dhü do ˗bha (18-22)
-
«Pë ˗nu ˈü ˗an kë ˗ni ˈgü yö, ˈde ˈö ö ˗wo bho ü ˗ta kö ˈü ˗an kë?» (23-27)
-
ˈWɔnzuan ˈö ˗gban gɔndënën do ˗bha ˈnëngɔɔn˗ ˗nu ꞊plɛ ˗bha (28-32)
-
ˈWɔnzuan ˈö ˗gban buzankëmɛn ˗nu ˈö ˈwo ˈbhladëmɛn ˗bha mɛn ˗nu zë ˗an ˗bha (33-46)
-
˗Gwö ˈö ˈkɔdɔmɛn ˗nu ˗wa sü ˗gwö yaa ˈka ˈö ˈwo˗ ˗zuö (42)
-
21 ˈDhɛ ˈwo ꞊ɲɔɔn ˗ni ˈgü Zedhizadhɛmö ˗dhɛ ˗bha, ˈö ˈwo ˗lo Bɛtüfaʒe, Olivie ˗tɔn ꞊troo, ˈyö Yesu ˗yö ö ˗bha gwëëˈˈ ˗nu ꞊plɛ bɔ,
2 ˈö˗ pö ˗an ˗dhɛ: «˗Ka ˈdho ˈpödhɛ ˈö ˈka˗ ˗ga ˗ni ˗de ˗a ˈgü. ˈKa ˗da ˈplöö, ka ˗dho ˗kpan ꞊soofëŋ do ˗bha kö ˗yö ˗klu ˗sü ˈka, kö ˗a ˈnën ˗yö dɔ ˗sü ˈka ˗a ˈˈsuee. ˗Ka ˗an ˈˈpʋ ˈka nu ˗an ˈka n ꞊dhiaa.
3 Mɛn ˈbhaa ˗ya ka dhɛɛˈˈ ˈkpɔ, ˗kaa pö ˗a ˗dhɛ: ‹Yi Dëmɛn ˗bhawɔn ˗ya yö ˗an ˗bha.› ˈKa˗ pö ˈˈdhʋ̈, ˗yö ˗dho ˈto mü ˈö ö ꞊kwaa ˗an ˗zü ˈö ˈka nu ˗an ˈka.»
4 ˗Yö ˗kë ˈpö ꞊dhɛ ˗kɔ ˈö bhë ˗a ˈdhö ˈkpakpadhö, kë ˈˈdhʋ̈ kö ˈpë ˈö ˗Zlan ˗wodhiʋ̈lomɛn ˗ya to ˈˈdhiʋ̈ ˈö˗ pö, ˗yö yökodhiʋ̈. ˗Ya ˗pö:
5 «˗Kaa pö Siɔn ˈdhu ˗dhɛ: ‹˗Dhɛ ˗ga, ü ˗bha ˗gblüdë ˗yö nu ˗ni ˈgü ü ˈˈpiʋ̈, ˗yö dhɔŋsü, ˈö ˈɲaannu ˗sü ˈka ꞊soofëŋ ꞊taa, ꞊ii ˗yö ˗ya ˗sü ˈka ꞊soofëŋ ˈnën ꞊taa ˗ʒiaanwo.›»
6 Gwëëˈˈ ˗nu ꞊plɛ ˈwo bhë ˗wo ˗dho, ˈö ˈwo˗ ˗kë ꞊dhɛ ˗kɔ ˈö Yesu ˗ya pö ˗a ˈka ˗an ˗dhɛ bhë ˗a ˈdhö.
7 ˗Wo ˗nu ꞊soofëŋ waa ö ˈnën ˈö bhë ˗an ˈka, ˈö ˈwo wo ˗bha sɔ ˗nu ˗lo ˗an ꞊taa, ˈyö Yesu ˗yö ˗ya ꞊soofëŋ ˈnën ˈö bhë ˗a ꞊taa.
8 ˈYö mɛn ˗nu ˈwo kun mü bhë ˗an ꞊vadhɛ ˗wo wo ˗bha sɔ ˗nu kpɔ ˈˈshia˗ ʒiaan ˗ta. ˈYö˗ mɛn ˈbhaa ˗nu ˗wo ꞊glaa˗ ˈˈdhɛ ˗kan ˈwo˗ ˗lo ʒiaan ˗ta,
9 kö mɛn ˗nu ˈwo ˈˈdhiʋ̈ waa mɛn ˗nu ˈwo ꞊taabha ˗wo ˈˈgbla ˗ni ˈgü ˈö ˈwo˗ pö: «˗Zlan yi ˗bhɛɛ ü ˗dhɛ, dɔ ˈˈgbɩɩ˗ ˈü Davi Gbö dha! ˈDhuëë˗ ˗yö ˈkpɔ mɛn ˈö nu Zoova ˈtɔ ˈgü ˗a ˗bha. ˗Zlan ˈü ˗ya ˗sü ˈka dhaŋ˗ ˈgü yi ˗bhɛɛ ü ˗dhɛ, ˗bhö ˗a dha.»
10 ˈDhɛ ˈö ˗da Zedhizadhɛmö, ˈyö ˈpödhɛ ˗yö ˗ya vin ˗sü ˗bha, kö mɛn ˗nu ˗wa pö ˗ni ˈgü: «De ˗mü?»
11 ˈYö mɛn ˗nu ˈwo ˗kë ˗a ˈˈpiʋ̈ bhë ˈwo˗ pö: «˗Zlan ˗wodhiʋ̈lomɛn ˈö go Nazadhɛtö Galile ˗sɛ ˈgü ˈwo˗ ˗dhɛ Yesu bhë yö ˗mü.»
12 ˈYö Yesu ˗yö dho ˈö ˗da ˗Zlan ˗dhɔkë ˗a ˈgü ˗kɔ ˈgü, ˈö mɛn ˈˈpɛpɛ ˈwo kun ˈˈdhoodɔ ˗ni ˈgü waa mɛn ˗nu ˈwo kun pë ˗nu ˈdhɔ ˗ni ˈgü mü ˗an ˗kë, ˈö ˈwo yö ˈˈkpɛnŋ. ˈYö ˈwëëga ˗tabɔmɛn ˗nu ˗bha ˈtaablö waa ˗toŋ ˈˈdhoodɔmɛn ˗nu ˗bha ˗gbloo ˗nu ˗zuö ˈˈshia˗, ˈö pë ꞊gban ꞊wɛnŋ.
13 ˈYö˗ pö ˗an ˗dhɛ: «˗Yö ˗bɛnzë ˗sü ˈka ˗Zlan ˗Wo ˈsëëdhɛ ˈgü ꞊dhɛ: ‹˗Wo ˗dho n ˗man ˈkɔ ˗dhɛ ˗bhɛɛ ˗a ˈgü ˗kɔ.› ˈˈKɛɛ ka ˗zë ˈka˗ kë ꞊kwanmɛn ˗nu ˗ya ˗a ˈgü ˗kɔ* ˈka.»
14 ˗Yö ˗to ˗Zlan ˗dhɔkë ˗a ˈgü ˗kɔ ˈö bhë ˗a ˈgü, ˈyö ˈˈɲɛɛntiimɛn ˗nu waa ꞊niɔɔnmɛn ˗nu ˗wo nu ˗a ˈˈpiʋ̈, ˈö ˗an ˗dhɛ bo.
15 ˈDhɛ ˈˈsaabhomɛn ˗nu ˗gɔmɛn ˗nu waa ˈtɔŋ˗ ˗gɔmɛn ˗nu ˈwo ˗dhidha ˗nu ˈö Yesu kun ˗an kë ˗ni ˈgü bhë ˗an yö, ˈö ˈwo ˈnën ˗nu ˈwo kun ˈˈgbla ˗ni ˈgü ˗Zlan ˗dhɔkë ˗a ˈgü ˗kɔ ˈgü ˈö ˈwo˗ pö: «˗Zlan yi ˗bhɛɛ ü ˗dhɛ, dɔ ˈˈgbɩɩ˗ ü Davi gbö dha» bhë ˗an ˗wo man, ˈyö ˗shiö ˗an ˗dhɛ.
16 ˈYö ˈwo˗ pö Yesu ˗dhɛ: «Pë ˈwo˗ pö ˗ni ˈgü bhë ü˗ ˗man ˗ee?» ˈYö Yesu ˗ya ˗yɔ bɔ ˗an ˗gɔ ˈö˗ pö: «꞊Ii, a˗ ˗man. ˗A pö ˈö ˗Zlan ˗Wo ˗ya wo ꞊dhɛ: ‹Ü ˗dho ˗a kë ˈö ˈnën ˈsɛɛn˗ ˗nu waa ˈnën ˈˈblë ˈˈpuu ˗nu ˈwo ü ˈtɔ bhɔ› bhë, ka ˈti˗ ˗wo pö do ˗ee?»
17 ˈDhɛ ˈö ˗kë ˈˈdhʋ̈, ˈyö ˗an to ˈˈshia˗ ˈpö˗ ˈö bhë ˗a ˈgü ˈö dho Betani ˈö ˗wɔ mü.
18 ˈDhɛ ˈö˗ ˗ta ˗dhɛ ˗yö ꞊kpɔɔ, ˈö ˗soo ˈö ö ꞊yɛɛ kë ˗ni ˈgü Zedhizadhɛmö, ˈyö din˗ ˗ya kun.
19 ˈDhɛ ˈö ˗kpan figö ˗dhü do ˗bha ʒiaan ˈˈsuee ˈö ꞊ɲɔɔn ˗a ˗bha, yö ˈti ˗kpan ˗a bhɛ ˗bha ˗a ꞊troo, ˗a ˈˈdhɛ ˈˈkpaan ˈnën ˈö˗ yö. ˈDhɛ ˈö ˗kë ˈˈdhʋ̈ ˈyö Yesu ˗ya pö ˗a figö ˗dhü ˗dhɛ: «Ü ˈti ˗dho ü bhɛ ˗ya ˈzü toŋtoŋdhö.» ˗A figö ˗dhü ˗yö ˗to ˈˈshia˗ mü ˈö ga.
20 ˈDhɛ ˈö˗ ˗bha gwëëˈˈ ˗nu ˗wa yö ˈˈdhʋ̈, ˈyö˗ ˈwɔn ˗yö ˗an kun ꞊dedewo ˈö ˈwo˗ pö: «˗Yö ˗kë ꞊dhɛ ˈö figö ˗dhü ˈö yö ˈö ˈˈkpɛɛ kun ˈˈvaandhö ˈˈdhʋ̈?»
21 ˈYö Yesu ˗ya pö ˗an ˗dhɛ: «A˗ ˗pö ka ˗dhɛ gagade ˈka ꞊dhɛ, ˗zoyödhe ˗ya kë ka ˗gɔ ka ˈti dɔ ˈdudhö, ˈpë ˈa˗ ˗kë figö ˗dhü ˈka bhë, ka ˗dho ˗a ˈdhɛ ˈö ˗ʒiö ˗a ˗ta ˗a kë. Ka ˗dho ˗a pö ˗ʒiaanwo ˗tɔn ˈö yö ˗a ˗dhɛ: ‹˗Bhö ˈgo ü pinŋ˗ ˗bha ˈü ˈdho ˈü ˗puö ꞊weeyi ꞊bhaa,› ˈö˗ ˗kë ˈˈdhʋ̈ ka ˗wo ˈˈdhiʋ̈ ˗bha.
22 ˈYö pë ˈˈpɛpɛ ˈö ˈka ˗dho bhɛɛˈˈ ˗a ˗wɔn ˈgü ˗zoyödhe ˈka, ka ˗dho ˗a ꞊slɔɔ.»
23 ˈDhɛ ˈö Yesu ˗yö dho ˈö ˗da ˗Zlan ˗dhɔkë ˗a ˈgü ˗kɔ ˈgü ˈö kun mɛn ˗nu ꞊klaŋ kë ˗ni ˈgü, ˈyö ˈˈsaabhomɛn ˗nu ˗gɔmɛn ˗nu waa mɛn zii ˗nu ˗wo ꞊ɲɔɔn ˗a ˗bha ˈö ˈwo˗ pö ˗a ˗dhɛ: «Pë ˗nu ˈü ˗an kë ˗ni ˈgü yö, ˈde ˈö ö ˗wo bho ü ˗ta kö ˈü ˗an kë? ˈDe ˈö˗ pö ü ˗an kë?»
24 ˈYö Yesu ˗ya ˗yɔ bɔ ˗an ˗gɔ ˈö˗ pö: «Man ˗de ˈpö a ˗dho dhɛɛˈˈ do ˈbhaa ˈkpɔ ka ˗gɔ. ˈKa˗ ˗yɔ bɔ n ˗gɔ, kö mɛn ˈö˗ pö n ˗dhɛ ˈa pë ˗nu ˈwo bhë ˗an kë, ˈa˗ ˗mɛn ˈtɔ pö ka ˗dhɛ ˈpö.
25 ˈDe ˈö Zan bɔ kö ˗yö mɛn ˗nu bɔ ˈˈyi ꞊bhaa? ˗Zlan ˈö dhaŋ˗ ˈgü yö ˗mü ˗ee, ɛɛnˈˈ mɛnbhɩɩdhe ˗nu ˗mü?» ˈYö ˈwo ˗ya ˗a pö ˗sü ˗bha wo ˈko ˗nu ˗dhɛ: «Kö ˈkwa˗ pö ‹˗Zlan ˈö dhaŋ˗ ˈgü yö ˗mü,› ˗yö ˗dho ˗a pö: ‹ˈMën kë ˈsa ˈö ka ˈti ˈdhaŋ˗ bho ˗a ˈˈdhiʋ̈?›
26 ˈˈKɛɛ kö ˈkwa˗ pö ˈpö: ‹Mɛnbhɩɩdhe ˗nu ˗mü,› ˈwɔn ꞊mɔɔn˗ ˗bha ˈö ˗shiö mɛn ˗gbaa ꞊va ˈwo ˗lo yö ˗an ˗dhɛ, ˈyö ˗tɔ ꞊dhɛ ˗an ꞊gban ˈˈpɛpɛ ˗wo Zan ˗dɔ ˗Zlan ˗wodhiʋ̈lomɛn ˈka.»
27 ˈDhɛ ˈö ˗kë ˈˈdhʋ̈ ˈyö ˈwo˗ pö Yesu ˗dhɛ: «Mɛn ˈö˗ bɔ ˈyaa˗ dɔ.» ˈYö Yesu ˗ya pö ˗an ˗dhɛ ˈpö: «Man ˗de ˈpö mɛn ˈö˗ pö n ˗dhɛ ˈa ˈwɔn ˗nu bhë ˗an kë, n ˈti ˗dho ˗a pö ka ˗dhɛ.
28 «ˈWɔn ˈa ˗dho ˗a blɛɛˈˈ yö, ka ka ˗bha ˗yö ˗a ˈgü mü ꞊dhɛ? Gɔndënën do ˈbhaa ˈö bhë, ˈnën ꞊plɛ ˗wo ˗kun ˗a ˗gɔ. ˈYö dho ˈö yö ˗a mɛn ˗blɛɛsü ˗bha ˈö˗ pö ˗a ˗dhɛ: ‹N gbö, ˗bhö ˈdho ˈü yö kë ˗drɔɔn ˗bhla ˈgü ꞊dɛɛ.›
29 ˈYö˗ gbö ˈö ˈˈdhʋ̈ ˈö˗ pö ˗a ˗dhɛ: ‹N ˈti ˈdho ˈdho.› ˈˈKɛɛ ˈdhɛ ˈö ˈɲaannu ˈö ö ˗zota, ˈyö ꞊luu ˈö dho ˈbhlaa.
30 ˈYö˗ gɔndë ˗yö dho ö ˗bha ˈnën ꞊plɛ ˗naan ˈˈpiʋ̈, ˈyö pë do ˈö bhë ˈö˗ pö ˗a ˗dhɛ. ˈYö˗ gbö ˗ya pö ˗a ˗dhɛ: ‹꞊Ao baaˈˈ, ˗a ˗dho ˈdho.› ˈˈKɛɛ yö ˈti ˈdho.
31 Ka ˗bha ˈgü, ˈnën ˗nu ꞊plɛ ˈwo bhë ˗a de ˈö ö dë dhɔɔbhaawɔn ˗kë?» ˈYö ˈwo˗ pö ˗a ˗dhɛ: «˗A mɛn ˗blɛɛsü ˗mü.» ˈYö Yesu ˗ya pö: «A˗ ˗pö ka ˗dhɛ gagade ˈka ꞊dhɛ ˈniinsɔnŋkunmɛn ˗nu waa niënŋdhe ˗nu ˗wo ˗dho ˗da ˗Zlan ˗bha ˗Gblüdëdhɛ ˈgü ka ˈˈdhiʋ̈.
32 ˗A ˗gɛn ˗mü ꞊dhɛ Zan ˗yö ˗nu, ˈö ʒiaan ˈö kpɛnŋdhö ˗a ˗zɔn ka ˗dhɛ ˈö ka ˈti ˈdhaŋ˗ bho ˗a ˈˈdhiʋ̈. ˈˈKɛɛ ˈniinsɔnŋkunmɛn ˗nu waa niënŋdhe ˗nu ˗wo ˈdhaŋ˗ ˗bho ˗a ˈˈdhiʋ̈. ˈKö ˗kë ˗ʒiaanwo ꞊dhɛ ka˗ ˗yö ˈˈdhʋ̈, ka ˈti ka zuʋ̈ˈˈ slëëˈˈ kö ˈka ˈdhaŋ˗ bho ˗a ˈˈdhiʋ̈.
33 «˗Ka ka ˈˈtʋ ˈto ˈzü ˈwɔnzuan do ˈö yö ˗a ˗bha: Gɔndënën do ˈbhaa ˈö bhë ˈˈblü ˗yö ˗kun ˗a ˗gɔ, ˈyö dho ˈö ö ˗bha ˗drɔɔn ˗bhla kpɔ mü, ˈyö ˗glɛŋ ꞊klënŋ ˗a ˗zü, ˈö ˗drɔɔn ˈˈyibhodhɛ waa ˈbhlaadhɛ ˗maan ˗kë ˗a ˈgü ˗kɔ do dɔ mü. ˈDhɛ ˈö ö bo, ˈyö˗ ˗da buzan ˈgü ˈö dho ˈˈta ˈgü.
34 ˈDhɛ ˈö ˗drɔɔn bho ˈˈtʋ̈ŋ ˗yö ˗lo, ˈyö ö ˗bha yökëmɛn ˗nu bɔ ˈmɛn ˈwo buzan ˈgü bhë ˗an ˈˈpiʋ̈ kö pë ˈö go ˈbhlaa ˗wo ö ˗bha bɔ.
35 ˈˈKɛɛ ˈyö buzan ˈgümɛn ˗nu ˗wo mɛn ˗nu ˈö ˗an bɔ bhë ˗an kun ˈö ˈwo˗ mɛn do ˗man, ˈö ˈwo˗ mɛn do zë, ˈyö ˈwo˗ mɛn do ˗zuö ˗gwö ˈka.
36 ˈYö ˈbhladëmɛn ˗yö ö ˗bha yökëmɛn ˈbhaa ˗nu ˈö ˈwo ꞊va ˈwo ˗ʒiö ˗a ˈka ˗a mɛn ˗blɛɛsü ˗nu ˗ta ˗an bɔ, ˈˈkɛɛ ˈyö buzan ˈgümɛn ˗nu ˗wo ˈwɔn do ˈö bhë ˗a ˗kë ˗an ˈka.
37 ˈDhɛ ˈö ˗kë ˈˈdhʋ̈, ˈyö ö ˗de gbö bɔ, ˈyö ˗tɔ ˗ya ˗pö ö ˗de ˗dhɛ: ‹˗Ya kë n gbö ˈka ˗wo ˗dho ˗a ꞊bhlëë ˗ya.›
38 ˈDhɛ ˈö buzan ˈgümɛn ˗nu bhë ˈwo ˗kpan ˗a gbö ˗bha, ˈyö ˈwo˗ pö wo ˈko ˗nu ˗dhɛ: ‹Mɛn ˈö ˈkɛnŋ˗ dho ˈto ˗a ˗gɔ ˈyö nu ˗ni ˈgü bhë. ˗Kwaa zë kö ˗a ˗bha ˈkɛnŋ˗ pë ˗yö ˈto kwa ˗gɔ.›
39 ˈDhɛ ˈö ˗kë ˈˈdhʋ̈, ˈyö ˈwo˗ kun ˈö ˈwo˗ ˗gan ˈwo go ˗a ˈka ˗drɔɔn ˗bhla ˈgü, ˈö ˈwo˗ zë.
40 Ka ˗bha ˈgü ˗drɔɔn ˗bhla dëmɛn ˈö bhë ˗ya nu, ˈmën ˈö ˗dho ˗a kë buzan ˈgümɛn ˗nu ˈwo bhë ˗an ˈka?»
41 ˈYö ˈˈsaabhomɛn ˗nu ˗gɔmɛn ˗nu waa mɛn zii ˗nu bhë ˈwo˗ pö ˗a ˗dhɛ: «ˈDhɛ ˈö ˗kë ꞊dhɛ ˗an zuʋ̈ˈˈ ˗yö ˈya bhë, ˗yö ˗dho ˗an ꞊gban ˈgü shiʋ̈ˈˈ ˈpapadhö, ˈö ö ˗bha ˗drɔɔn ˗bhla sü ˈö˗ nu buzankëmɛn ˈˈwɛɛ ˗nu ˈö pë ˗ya ˈgo ˈbhlaa ˈwo dho nu ˗a ˗bha ˈka ˗an ˗dhɛ.»
42 ˈYö Yesu ˗ya pö ˗an ˗dhɛ: «Pë ˈö ˗bɛnzë ˗sü ˈka ˗Zlan ˗Wo ˈgü bhë ka ˈti˗ ˗wo pö do ˗ee? ˗Ya ˗pö: ‹˗Gwö ˈö ˈkɔdɔmɛn ˗nu ˗wa sü ˗gwö yaa ˈka ˈö ˈwo˗ ˗zuö bhë, yö ˈnën ˈö ˗ya kë ˗gwö ˗wɔn ˈˈgbɩɩ˗ ˗sü* ˈka. ˗Yö ˗go Zoova ˈˈpiʋ̈, ˈyö ˗ya kë pë ꞊bhlëësü ˈka kwa ˈˈɲan ˈˈdhiʋ̈ bhë.›
43 ˗Yö ˈnën ˈö˗ ˗wɔn ˈgü ˈa˗ pö ka ˗dhɛ ꞊dhɛ, ˗Zlan ˗dho ö ˗bha ˗Gblüdëdhɛ ˈkun ka ˗gɔ ˈö˗ nu ˈˈsɛ ˈˈwɛɛ ˈgümɛn ˗nu ˈö ˈwo˗ ˗zokunwɔn ˗kë ˗an ˗dhɛ.
44 ˗Ya ˈgo mü ˈzü, mɛn ˈö ˗puö ˗gwö ˈö bhë ˗a ˗ta ˗yö ˗dho yɛɛˈˈ. Mɛn ˈö ˗gwö ˈö bhë ˈö dho ˗puö ˗a ˗ta ˈpö, ˗yö ˗dho ˗a ˗böö bho.»
45 ˈDhɛ ˈö ˈˈsaabhomɛn ˗nu ˗gɔmɛn ˗nu waa Fadhiziɛn ˗nu ˈwo ˈwɔnzuan ˗nu ˈwo bhë ˗an man, ˈyö ˈwo˗ ˈgüman ꞊dhɛ ˗yö ˗we wo ˈka.
46 ˗Yö ˗kun ˗an ˈˈpiʋ̈ ꞊dhɛ ˈwo Yesu ˈkun, ˈˈkɛɛ ˗wo ˗kun ˈˈsuʋ̈ ˗ni ˈgü mɛn ꞊va ˈwo kun ˈmü bhë ˗an ˗gɔ, ˈyö ˗tɔ ꞊dhɛ wo ˗zë ˗wo Yesu ˗yö ꞊dhɛ ˗Zlan ˗wodhiʋ̈lomɛn ˈdhö.
-Zoto -a ˈˈpiʋ̈ -wɔn -nu
^ Ɛɛnˈˈ «˗gwö ꞊duudhɛ.»
^ ˗Gwö ꞊suu ˈö ˈˈdhʋ̈ bhë, yö ˈnën ˈö ˗ya kë ˈwo˗ ˗ya ˈkɔ ˈˈbhaŋ ꞊plɛ ˗yökwëëdhɛ ˈgü ˈˈdhuŋ.
