ˈö Matiö ˗ya ˗bɛnzë 23:1-39
23 ˈDhɛ ˈö ˗kë ˈˈdhʋ̈, ˈyö Yesu ˗ya pö mɛn ˗gbaa ˈwo ˗kë mü bhë waa ö ˗bha gwëëˈˈ ˗nu ˗an ˗dhɛ:
2 «ˈTɔŋ˗ ˗gɔmɛn ˗nu waa Fadhiziɛn ˗nu ˗wa wo ˗de ˗ya Moizö ˗duɛɛ ˈgü.
3 ˈDhɛ ˈö ˈˈdhʋ̈, pë ˈˈpɛpɛ ˈö ˈwo˗ pö ka ˗dhɛ ˗kaa kë, ˈˈkɛɛ ˈka ˗dho ˈwɔn ˗nu kë ꞊dhɛ ˗an ˈdhö. ˗A ˗gɛn ˗mü ꞊dhɛ pë ˗nu ˈwo mɛn ˗nu ꞊klaŋ ˗kë ˗a ˈka, wo ꞊dede ˈwaa ˗an ˗ya ꞊bhlëë ˈgü.
4 ˗Wo ꞊kwɛɛ˗ ˈgbinŋ˗ ˗nu ˗dhu ˈö ˈwo ˗an ˗ya mɛn ˈˈwɛɛ ˗nu gban ˗ta, ˈˈkɛɛ wo ꞊dede ˈwaa ˈˈwɩ ˗a ˗bha kö wo ˗kɔnënga dosɛnŋ ˗dee ˈwo˗ yö ˗a ˗bha.
5 ˈWɔn ˗nu ˈˈpɛpɛ ˈö ˈwo ˗an ˗kë, ˗wo ˗an ˗kë ˈˈdhʋ̈ kö mɛn ˗nu ˈˈɲan ˗yö bɔ wo ˗ta. ˗A ˈwɔnzuan ˈnën ˗tɔ pë kpö ˗nu ˈö ˈwo ˗Zlan ˗Wo ˈsëëdhɛ ˈˈklu ˗nu ˗da ˗a ˈgü ˈwo˗ ˗ya wo ˗kpoŋ ˈˈdhiʋ̈ ɛɛnˈˈ ˈwo˗ ˗klu wo ˗gbe ˗bha bhë, ˗wo wo ˗bha ˗kë ˈˈgblʋ̈gblʋ̈ kö ˗yö wo ˗takpa, ˈö go mü ˈzü ˈö ˈwo wo ˗bha sɔ ˈˈsaa ˗nu ˗kë ꞊gblɛnŋgblɛnŋ.
6 ˗Yɛɛ ꞊bhlëësü ˗nu ˈwo ˈwlaan˗ ˗nu ˗ta waa ˗yɛɛ ˗blɛɛsü ˗nu ˈwo ˈˈdhiʋ̈ ˗yakwëë ˗kë ˗a ˈgü ˗kɔ ˗nu ˈgü ˈyö˗ ˗dhɔ ˗yö ˗an ˗kë.
7 ˗Wa ˈˈpiʋ̈ ꞊dhɛ mɛn ˗nu ˗wo wo ꞊tuaabho ˈˈdhookwëëdhɛ ˗nu ˈgü, kö ˗wo wo ˗dhɛ dëmɛn.*
8 ˈˈKɛɛ ka ˗zë, ˈka ˗dho ˈˈwɩ ˗a ˗bha kö ˗wo ka ˗dhɛ dëmɛn, ˗a ˗gɛn ˗mü ꞊dhɛ mɛn dosɛnŋ ˈnën ka Dëmɛn ˈka. ꞊Dhegblüzë ˗nu ˗mü mɛn ˈˈpɛpɛ ka ˈka.
9 ˈKa ˗dho mɛn ˈbhaa ˗dhɛ ˈpö ka dë ˈˈkpɔnŋ ꞊taa, ˗a ˗gɛn ˗mü ꞊dhɛ ka Dë ˗yö dosɛnŋ, yö ˈnën ˈö dhaŋ˗ ˈgü.
10 ˈKa ˗dho ˈˈwɩ ˗a ˗bha ˈzü kö mɛn ˗nu ˗wo ka ˗dhɛ ˗gɔmɛn, ˈyö ˗tɔ ꞊dhɛ ka ˗Gɔmɛn ˗yö dosɛnŋ, yö ˈnën ˈö ˗tɔ Klito.
11 ˈˈKɛɛ mɛn ˈö ˈkpii˗ ka kpö ˈgü, ˗a dua ˗mü kö ˗yö kë yö ˗kë ka ˈˈdhiʋ̈ ˗mɛn ˈka.
12 Mɛn ˈö ö ˗de sü ˈkpii˗, ˗Zlan ˗dho ˈlëë˗ dɔ ˗a ˗bha, ˈö mɛn ˈö ö ˗de ˗kë ˈˈtɩtɩ ˈö ˗Zlan ˗ya ˗gɔ ˈˈdhiʋ̈ ꞊luu.
13 «ˈTɔŋ˗ ˗gɔmɛn ˗nu kaa Fadhiziɛn ˗nu ka ˗bha ˗yö ˗wëësü, ˈˈkpënŋ˗ ˗kë mɛn ˗gɔ ˗mɛn ˗nu ˗mü ka ˈka! ˗A ˗gɛn ˗mü ꞊dhɛ ka ˗Gblüdëdhɛ ˈö dhaŋ˗ ˈgü ˗a ʒiaan ˗ta mɛn ˗nu ˗gɔ. ˈKaa ˈˈwɩ ˗a ˗bha kö ˈka ˗da ʒiaan ˈö ˈˈdhʋ̈ ˗a ˗ta, ɛɛnˈˈ mɛn ˗nu ˈwo˗ ˈˈpiʋ̈ ˈwo ˗da ˗a ˗ta, ˈkaa ˈˈwɩ ˗a ˗bha ˗an ˗gɔ.
14 ——
15 «ˈTɔŋ˗ ˗gɔmɛn ˗nu kaa Fadhiziɛn ˗nu ka ˗bha ˗yö ˗wëësü, ˈˈkpënŋ˗ ˗kë mɛn ˗gɔ ˗mɛn ˗nu ˗mü ka ˈka! ˗A ˗gɛn ˗mü ꞊dhɛ ka ˗bɔ ꞊weeyi ˗ta ˗dhɛ ˗nu waa ˈˈsɛ ˗ta ˗dhɛ ꞊gban ˈgü, kö ˈka mɛn ˗nu ˗da ka ˗bha ˗zlanwo ˈgü. ˈYö mɛn ˈö ˗ya ˈˈwɩ ˗a ˗bha ˈö ˈka˗ ˈˈslö ꞊mɛɛn kö za ˗ya ˈkun ˈko ˗ta ꞊plɛ ˗yö ʒiö ˗a ˈka ka ˗ta, ˗yö kë ˈˈdhʋ̈ kö ˗yö ˈdho Ʒeɛnö ˈgü.
16 «Ʒiaan ˗bho mɛn ˈka ˗mɛn ˈˈɲɛɛntiisü ˗nu, ka ˗bha ˗yö ˗wëësü! ˗A ˗gɛn ˗mü ꞊dhɛ ka˗ ˗pö: ‹Ö ˗wo ˗bhö ˗Zlan ˗dhɔkë ˗a ˈgü ˗kɔ ˈtɔ ˈgü ˗sü ˈyaa ˈwɔn ˈbhaa ˈka, ˈˈkɛɛ mɛn ˈö ö ˗wo ˗bhö ˈˈsënŋ ˗nu ˈwo ˗Zlan ˗dhɔkë ˗a ˈgü ˗kɔ ˈgü ˗an ˈtɔ ˈgü, ˈˈgbɩɩdhɛ ˗mü kö pë ˈö˗ pö ˗ya kë.›
17 ˈˈWlaamɛn ˈˈɲɛɛntiisü ˗nu! ˗A ˗ga ˈö ˈka˗ wo bhë ˈmën ˈö ꞊bhlëë ˈdhö ˈkpii˗? ˈˈSënŋ ˗mü ˗ee, ɛɛnˈˈ ˗Zlan ˗dhɔkë ˗a ˈgü ˗kɔ ˈö ˈˈsënŋ ˈö bhë ˗a ˗kë ˈˈslʋ̈ʋ̈slʋ̈ yö ˗mü ˗ee?
18 ˗Ya ˈgo mü ˈzü ka˗ ˗pö: ‹Ö ˗wo ˗bhö ˈˈsaabhotapë ˈtɔ ˈgü ˗sü ˈyaa ˈwɔn ˈbhaa ˈka, ˈˈkɛɛ mɛn ˈö ö ˗wo ˗bhö gbɔɔdhe ˈö ˈˈsaabhotapë ˗ta ˗a ˈtɔ ˈgü, ˈˈgbɩɩdhɛ ˗mü kö pë ˈö˗ pö ˗ya kë.›
19 ˈˈƝɛɛntiimɛn ˗nu! ˗A ˗ga ˈö ˈka˗ wo bhë, ˈmën ˈö ˗wɔn ˈdhö ˈˈgbɩɩ˗? Gbɔɔdhe ˗mü ˗ee, ɛɛnˈˈ ˈˈsaabhotapë ˈö gbɔɔdhe ˗kë ˈˈslʋ̈ʋ̈slʋ̈ bhë yö ˗mü ˗ee?
20 ˗Yö kë ka ˈˈɲaan ꞊dhɛ mɛn ˈö ö ˗wo ˗bhö ˈˈsaabhotapë ˈtɔ ˈgü, kö ˗ya ö ˗wo ˗bhö ˈpö pë ˈˈpɛpɛ ˈö ˈwo˗ ˗ta ˗an ˈtɔ ˈgü.
21 Mɛn ˈö ö ˗wo ˗bhö ˈzü ˗Zlan ˗dhɔkë ˗a ˈgü ˗kɔ ˈtɔ ˈgü, kö ˗ya ö ˗wo ˗bhö ˗Zlan ˈö˗ ˗bha ˈkɔ ˈdhö ˗mü bhë ˗a ˈtɔ ˈgü ˈpö.
22 Mɛn ˈö ö ˗wo ˗bhö ˈzü dhaŋ˗ ˈtɔ ˈgü, kö ˗ya ö ˗wo ˗bhö ˗Zlan ˗bha ˈˈgo ˗gbloo waa ˗Zlan yö ꞊dede ˈö ˗ya ˗ni ˗a ˈgü bhë ˗an ˈtɔ ˈgü.
23 «ˈTɔŋ˗ ˗gɔmɛn ˗nu kaa Fadhiziɛn ˗nu ka ˗bha ˗yö ˗wëësü, ˈˈkpënŋ˗ ˗kë mɛn ˗gɔ ˗mɛn ˗nu ˗mü ka ˈka! ˗A ˗gɛn ˗mü ꞊dhɛ tapë ˗nu ˈö ˈwo ˗kë mantö ˗nu, anɛtö ˗nu waa kimɛn ˗nu* ˗an ˈka bhë, ka ˗an ˈˈpian ˗kɔŋ do ˗naan ˗nu gbɔɔdhe ˈka. ˈˈKɛɛ ˈtɔŋ˗ ˗nu ˈdhɛ ˈö ˗an ˗wɔn ˈdhö ˈˈgbɩɩ˗ ˈö ˈwo ˗kë, ˗kë kpɛnŋdhö ˗sü, mɛn ˗wëë zë ˗sü waa ˗klu ˗Zlan ˗bha ˗sü ˈka bhë, ˈka ˗an ˈto. ˗A ˗dhɛ ˗a ˗bha kö ˈka pë ˗nu ˈwo ˈˈdhʋ̈ ˗an nu gbɔɔdhe ˈka ꞊dhɛ ˗kɔ ˈö bhë ˗a ˈdhö, ˈˈkɛɛ kö ˈka ˗dho ˈˈkan ˈtɔŋ˗ ˗wɔn ˈˈgbɩɩ˗ ˗sü ˈˈwɛɛ ˗nu ˈwo to ˗an ˈkun ˗sü ˗bha.
24 Ʒiaan ˗bho mɛn ˈka ˗mɛn ˈˈɲɛɛntiisü ˗nu, ka ka mü ˗pë ˗nu ˗bɔ ˗ploo ˈgü kö pëbhɩɩdhe ˈya ˗dho ˈto ˗an ꞊bhaa, ˈˈkɛɛ ˈyö ˈka ꞊ɲɔɔnmian ˗zë ˗a ꞊mënŋ!
25 «ˈTɔŋ˗ ˗gɔmɛn ˗nu kaa Fadhiziɛn ˗nu ka ˗bha ˗yö ˗wëësü, ˈˈkpënŋ˗ ˗kë mɛn ˗gɔ ˗mɛn ˗nu ˗mü ka ˈka! ˗A ˗gɛn ˗mü ꞊dhɛ ka ˗kɔɔ ˗nu waa ˈtia˗ ˗nu bunbhadhɛ ˗zu, ˈˈkɛɛ kö ˗an ˈgüdhɛ ˗yö pa ˗sü ˈka ˗dhii ˈka. ˈYö ˗tɔ ꞊dhɛ pë ˈyaa ka ˗zokun,* ˗ya ˈgo mü ˈzü ka ˗de dhɔɔbhaapë yaa yaa ˗nu ˈnën ˈka ˗an kë ˗ʒian ꞊mɛɛn.
26 Fadhiziɛn ˈˈɲɛɛntiisü, ˗bhö ˗kɔɔ ˗nu waa ˈtia˗ ˗nu ˈgüdhɛ ˈˈzu ꞊köŋ ˗blɛɛsü, kö ˗an bunbhadhɛ ˗nu ˗de ˈpö ˗wo kë ˈˈpuu.
27 «ˈTɔŋ˗ ˗gɔmɛn ˗nu kaa Fadhiziɛn ˗nu ka ˗bha ˗yö ˗wëësü, ˈˈkpënŋ˗ ˗kë mɛn ˗gɔ ˗mɛn ˗nu ˗mü ka ˈka! ˗A ˗gɛn ˗mü ꞊dhɛ ka ˗kë ꞊dhɛ buntadhɛ ˗nu ˈö ˈwo ˈˈyoo ˈˈpuu yɔ ˗an ˗bha ˗an ˈdhö. ˗An ˈˈkpɛnŋdhɛ ˗nu ˗wo ˗së ˈˈdhʋ̈, ˈˈkɛɛ ˗wo pa ˗sü ˈka mɛn ga ˗nu waa pë ˗ɲënŋsü ꞊suu ˈˈpɛpɛ ˈka.
28 ˗Kɔ do ˈö bhë ˗a ˈka ˗wa ka ˗ga ka kwi ˗bha, ka ˗bhɔ mɛn kpɛnŋdhö ˗nu ˗bha. ˈˈKɛɛ ka zuʋ̈güdhɛ ˗yö pa ˗sü ˈka ˈˈkpënŋ˗ ˗kë mɛn ˗gɔ ˗sü waa ˈtɔŋ˗ ˗san ˗nu ˗an ˈka.
29 «ˈTɔŋ˗ ˗gɔmɛn ˗nu kaa Fadhiziɛn ˗nu ka ˗bha ˗yö ˗wëësü, ˈˈkpënŋ˗ ˗kë mɛn ˗gɔ ˗mɛn ˗nu ˗mü ka ˈka! ˗A ˗gɛn ˗mü ꞊dhɛ ka ˗Zlan ˗wodhiʋ̈lomɛn ˗nu buntadhɛ ˗nu ˗baa, ˈö ka mɛn kpɛnŋdhö ˗nu buntadhɛ ˗yö ˗kë ˈzü ˈö ˗kë ˗së,
30 ˈö ˈka˗ pö: ‹Yi ˗kë yi ˈˈbhɛman ˗nu ˗bha ˈˈtʋ̈ŋ ˈgü ˗be, yi ˈti ˗dho kpa ˗an ˗bha kö ˈyi ˗Zlan ˗wodhiʋ̈lomɛn ˗nu zë.›
31 Ka ˈnën ˈka ka ˗de zë za ˈka ˈö ˈka˗ pö ꞊dhɛ mɛn ˗nu ˈwo ˗Zlan ˗wodhiʋ̈lomɛn ˗nu zë ˈkpa bhë, ˗an ˗bha ˈnën ˗nu ˗mü ka ˈka.
32 ˈDhɛ ˈö ˈˈdhʋ̈, yö ˈö ka ˈˈbhɛman ˗nu ˗wa züdɔ bhë, ˗kaa ˈˈdhiʋ̈ ta.
33 «꞊Mlɛɛn ˗nu, ꞊bhöö ꞊suugünën ˗nu, za ˈö ˗dho dɔ ka ˗bha kö ˗wo ka ˗zuö Ʒeɛnö ˈgü bhë, ka ˗dho dha ˗a ˗gɔ ˗kɔ ˗kë ꞊dhɛ?
34 Yö ˈnën ˈö˗ ˗wɔn ˈgü ˈö ˈa ˗Zlan ˗wodhiʋ̈lomɛn ˗nu, mɛn ꞊kpɔɔsü ˗nu waa mɛn ꞊klaŋkëmɛn ˗nu bɔ ˗ni ˈgü ka ˈˈpiʋ̈. Ka ˗dho ˗a mɛn ˈbhaa ˗nu zë ˈö ˈka ˗an dɔ ˈˈdhü ˗bha, ˈö ˈka˗ mɛn ˈbhaa ˗nu ˗man ˗klaaga ˈka ka ˗bha ˗yakwëë ˗kë ˗a ˈgü ˗kɔ ˗nu ˈgü, ˈö ˈka ˗an ˈˈklʋʋbhɔ ˈka bɔ ˗a ˈka ˈˈkwipö ˗nu ˈgü.
35 ˗Yö ˗dho kë ˈˈdhʋ̈ kö mɛn kpɛnŋdhö ˗nu ˈˈpɛpɛ ˈö ka ˗an ꞊ɲɔɔn wɛnŋ ˈˈsɛ ˗ta, ˗a ˈˈdhaŋga ˗yö nu ka ˗ta. Ka ˗an zë ˗sü züdɔ Abɛdhö ˈö pö ˈyaa kun ˗a ˗bha bhë ˗a ˗bha, ˈö ˈka yö ˗a ˈka Zakadhi Badhakia gbö ˈö ˈka˗ zë ˗Zlan ˗dhɔkëdhɛ waa ˈˈsaabhotapë ˗an ꞊zinŋgü bhë ˗a ˗bha.
36 A˗ ˗pö ka ˗dhɛ gagade ˈka ꞊dhɛ ˈwɔn yaa ˈˈpɛpɛ ˈwo bhë, ˗a ˈgüwɔn ˗dho nu ˈˈtʋ̈ŋ ˈö yö ˗a ˈgümɛn ˗nu ˗ta.
37 «Zedhizadhɛmö ˗mɛn ˗nu, Zedhizadhɛmö ˗mɛn ˗nu, ˗Zlan ˗wodhiʋ̈lomɛn ˗nu zë ˗mɛn ˗nu waa mɛn ˗nu ˈö ˗Zlan ˗yö ˗an bɔ ˗an ˗zuö ˗gwö ˈka ˗mɛn ˗nu! A˗ ˈˈslö ˗mɛɛn ˈko ˗ta ꞊va kö ˈa ka ˗lo ˈkwëëdhö ꞊dhɛ ˗kɔ ˈö ˗tɔ ꞊dhee ˈˈblëë˗ ˗yö ö ˗bha ˈnën ˗nu ˗lo ˗a ˈka ö gban ꞊löö bhë ˗a ˈdhö. ˈˈKɛɛ ka ˈti ˈˈwɩ ˗a ˗bha.
38 ˈDhɛ ˈö ˈˈdhʋ̈, ˗Zlan ˗dho ka ˗bha ˈkɔ ˈto ka ˗gɔ.*
39 ˗A ˗wɔn ˈgü a˗ ˗pö ka ˗dhɛ ꞊dhɛ ˈö sü ꞊dɛɛ ˗bha, ka ˈti ˗dho ˗kpan n ˗man ˈzü, ˈö to ˗a ˈka ˈˈdhʋ̈ ˈö yö ˗a ˈka ˈˈtʋ̈ŋ ˈö ˈka dho ˗a pö ˗a ˈka: ‹ˈDhuëë˗ ˗yö ˈkpɔ mɛn ˈö nu Zoova ˈtɔ ˈgü ˗a ˗bha› bhë ˗a ˗bha.»
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «Rabi.» Zuifö ˗nu ˈwo kun mɛn ꞊klaŋ kë ˗mɛn ˗nu ˈka ˗an ꞊bhlëë ˗ya ˗wo ˗mü.
^ Pë ˈˈdhɛ waa pë ga ˈˈtöö ˗së ˗sü ˗nu ˈö ˈwo ˗an ˗da ˗bhöpë ˈˈpiʋ̈ ˈö ˈwo˗ din ˗kë ˗së wo ˗mü.
^ Ɛɛnˈˈ «ka ꞊kwaanpë ˗nu ˗bhö.»
^ ˗Yö ꞊mɔɔn˗ ˗bha ˈö ˗kë, «˗yö ˗dho ˈto ka ˗gɔ ˈö ˗kë ˈˈkpaandhɛ ˈka» ˈka.
