ˈö Matiö ˗ya ˗bɛnzë 25:1-46
25 «˗Gblüdëdhɛ ˈö dhaŋ˗ ˈgü ˗yö ꞊dhɛ ˈnëndhiëŋnën ˗kɔŋ do ˈö ˈwaa gɔɔn˗ ˗wɔn dɔ, ˈö ˈwo wo ˗bha ꞊laŋba sü ˈwo dho dɔ dhesügɔn ˗gɔ ʒiaan˗ ˗an ˈdhö.
2 ˗A mɛn ˈˈsoodhu ˈwaa kun ꞊kpɔɔsü, ˈyö˗ mɛn ˈˈsoodhu ˈwo to ˈwo kun ˗gleŋsü.*
3 ˗A mɛn ˗nu ˈö ˈwaa ꞊kpɔɔsü bhë ˗wo wo ˗bha ꞊laŋba ˗nu ˗sü, ˈˈkɛɛ wo ˈti ˈˈɲɔn* ˈbhaa ˈsü wo ˗kɔ ˈˈpiʋ̈.
4 ˈˈKɛɛ ˗a mɛn ˗nu ˈwo ˗gleŋsü bhë ˈdhɛ ˈwo wo ˗bha ꞊laŋba ˗nu sü, ˗wo ˈˈɲɔn ˈbhaa ˗yö ˗sandhe ˈgü ˈwo˗ kun wo ˗kɔ ˈˈpiʋ̈.
5 ˈDhɛ ˈö dhesügɔn ˈyaa nu ˗ni ˈgü ˈˈvaandhö, ˈyö yi ˗yö ˗an ꞊gban ˈˈpɛpɛ kun, ˈö ˈwo ˗ya yi zë ˗sü ˗bha.
6 ˈDhɛ ˈö ˈkwa dɔ gbeŋ ꞊zinŋgü, ˈyö ˈwo mɛn ˈbhaa ˈˈgbla ˗wo man kö ˗ya pö ˗ni ˈgü: ‹Dhesügɔn ˗ya nu bhoo! ˗Ka ˈdho ˗a ˗gɔ ʒiaan˗.›
7 ˈDhɛ ˈö ˗kë ˈˈdhʋ̈ ˈyö ˈnëndhiëŋnën ˗nu ˈwo bhë ˗an ꞊gban ˈˈpɛpɛ ˗wo ꞊luu ˈö ˈwo ꞊baa wo ˗bha ꞊laŋba ˗nu ˗bha.
8 ˈYö ˗a mɛn ˗nu ˈö ˈwaa ꞊kpɔɔsü bhë ˈwo˗ pö ˗a ˈmɛn ˈwo ˗gleŋsü bhë ˗an ˗dhɛ: ‹˗Ka yi gba ˈˈɲɔn pë ˈˈtɩɩ ˈka, ˗a ˗gɛn ˗mü ꞊dhɛ yi ˗bha ꞊laŋba ˗nu ˗wo dhuuˈˈ ˗ni ˈgü.›
9 ˈYö˗ mɛn ˗gleŋsü ˗nu ˗wa pö ˗an ˗dhɛ: ‹˗Yö ˗kë ꞊dhɛ ˈˈɲɔn ˈö ˗ya ˈto yi ˗gɔ ˈyö bhë yö ˈti ˗dho ˗mɔn kwa ˗bha. -Ka ˈdho ꞊ʒiaan ˗a ˈˈdhoodɔmɛn ˗nu ˈˈpiʋ̈ kö ˈka ka ˗bha ˈdhɔ.›
10 ˈDhɛ ˈwo dho ˈˈɲɔn ˈdhɔ, ˗wo ˗to mü ˈö dhesügɔn ˗yö nu ˗an ꞊zlöö. ˈYö ˗a mɛn ˗nu ˈwo kun baaˈˈ ˗sü ˈka bhë waa dhesügɔn ˗nu ˈwo ˗da ˈwlaan˗ ˗kë ˗a ˈgü ˗kɔ ˈgü, ˈö ˈwo ˈˈkwee ta.
11 ˈDhɛ ˈö ˈˈtʋ̈ŋ ˈnën ˈbhaa ˗yö ˗ʒiö, ˈyö ˈnëndhiëŋnën ˗nu ˈwo dho ˈˈɲɔn mɛɛnˈˈ bhë ˈwo nu, ˈö ˈwo˗ pö: ‹Yi Dëmɛn, yi Dëmɛn, ˗bhö ˈˈkwee ˈˈpʋ yi ˗gɔ!›
12 ˈYö˗ ˗yɔ bɔ ˗an ˗gɔ ˈö˗ pö: ‹A˗ ˗pö ka ˗dhɛ gagade ˈka ꞊dhɛ, ˈmaan ka dɔ.›
13 «ˈDhɛ ˈö ˈˈdhʋ̈ ˗ka ˗ya ka ˈˈɲaan ˗kplawo, ˗a ˗gɛn ˗mü ꞊dhɛ ˗dhɛkpaɔyi ˈö bhë ɛɛnˈˈ ˗a ˈˈlɛlɛ ˈö bhë ˈkaa˗ dɔ.
14 «˗Zlan ˗bha ˗Gblüdëdhɛ ˗yö ꞊dhɛ gɔndënën do ˈö dho ˈˈta ꞊gblɛɛn ˈgü ˗a ˈdhö. ˈDhɛ ˈö ˗dho ʒiö, ˈyö ö ˗bha yökëmɛn ˗nu ˗dhɛ ˈö ö ˗bha ꞊nɔɔn ˗nu ˈˈklɔɔnbho ˗an ˗bha.
15 ˗Yö pë ˈdhɛ mɛn ˈö ˈdhö ˗a ˗kɔ ˗mɔn ˗a kë ˗sü ˗bha ˗a ˗ga, ˈyö ˈwëë˗ talan* ˈˈsoodhu nu ˗a mɛn do ˗dhɛ, ˈyö˗ ꞊plɛ nu ˗a mɛn ˈˈwɛɛ ˈbhaa ˗dhɛ, ˈyö˗ do nu ˗a mɛn ˗yaaga ˗naan ˗dhɛ. ˈDhɛ ˈö ö bo ˗a nu ˗sü ˈka ˗an ˗dhɛ, ˈyö ˗ʒiö.
16 ˗A mɛn ˈdhɛ ˈö ˈwëë˗ talan ˈˈsoodhu ꞊slɔɔ bhë, ˗yö ˗to ˈˈshia˗ mü ˈö ˗ya ˗a ˗ʒiö ˗a ˈgü kë ˗sü ˗bha, ˈö dho ˈö˗ ˈˈsoodhu ˈˈwɛɛ ˈbhaa ꞊slɔɔ ˈö˗ ˗da ˗a ˗ta.
17 ˗A mɛn ˈdhɛ ˈö˗ ꞊plɛ nu ˗a ˗dhɛ bhë, ˗yö ˗dho ˈpö ˈö˗ ˗ʒiö ˗a ˈgü ˗kë, ˈö˗ ꞊plɛ ˈˈwɛɛ ˈbhaa ꞊slɔɔ ˈö˗ ˗da ˗a ˗ta.
18 ˈˈKɛɛ yökëmɛn ˈdhɛ ˈö talan do nu ˗a ˗dhɛ bhë, ˗yö ˗dho ˈö ˈˈsɛ pɔn ˈö ö dëmɛn ˗bha ˈwëëga ˈö bhë ˗a ˗bin mü.
19 «ˈDhɛ ˈö˗ ˗dhɛ ˗yö ꞊gwëë ˈö ˗an dëmɛn ˗yö go ˈˈta ˈgü ˈö nu, ˈyö ˗an ˗dhɛ kö ˗wo ˈˈklɔɔnbho ö ˗dhɛ.
20 ˈYö˗ mɛn ˈdhɛ ˈö talan ˈˈsoodhu nu ˗a ˗dhɛ bhë, ˈö nu talan ˈˈsoodhu ˈˈwɛɛ ˈbhaa ˈka ˈö˗ ˗da ˗a ˗ta, ˈyö˗ pö: ‹N dëmɛn, talan ˈˈsoodhu ˈnën ˈü˗ nu n ˗dhɛ, ˈˈkɛɛ ˗dhɛ ˗ga, ˈman talan ˈˈsoodhu ˈˈwɛɛ ˈbhaa ꞊slɔɔ ˈzü ˈman˗ ˗da ˗a ˗ta.›
21 ˈYö˗ dëmɛn ˗ya pö ˗a ˗dhɛ: ‹Ü˗ ˗kë ˗së, yökëmɛn ˗tiaandhö! ˗Zo ˗tën ˗a ˗dhɛ ˗mɛn ˗mü ü ˈka. Pë ˈdɛdɛ ˈö ˈa˗ ˈˈklɔɔnbho ü ˗bha bhë, ü ü ˗zokë ˗a ˈˈpiʋ̈ ˗së ˈka. ˗A ˗wɔn ˈgü, a ˗dho ü ˗ya pë ꞊va ˗gɔ ˈˈdhiʋ̈. ˗Bhö nu ˈü zuʋ̈gblüdhi kë ü dëmɛn ˈˈpiʋ̈.›
22 ˈDhɛ ˈö go mü, ˈyö ˗a mɛn ˈdhɛ ˈö ˈwëë˗ talan ꞊plɛ nu ˗a ˗dhɛ bhë, ˈö nu ˈö˗ pö: ‹N dëmɛn, ˈwëë˗ talan ꞊plɛ ˈnën ˈü˗ nu n ˗dhɛ, ˈˈkɛɛ ˗dhɛ ˗ga, ˈman ˗a ꞊plɛ ˈˈwɛɛ ˈbhaa ꞊slɔɔ ˈman˗ ˗da ˗a ˗ta.›
23 ˈYö˗ dëmɛn ˗ya pö ˗a ˗dhɛ: ‹Ü˗ ˗kë ˗së, yökëmɛn ˗tiaandhö! ˗Zo ˗tën ˗a ˗dhɛ ˗mɛn ˗mü ü ˈka. Pë ˈdɛdɛ ˈa˗ ˈˈklɔɔnbho ü ˗bha bhë, ü ü ˗zokë ˗a ˈˈpiʋ̈ ˗së ˈka. ˗A ˗wɔn ˈgü, a ˗dho ü ˗ya pë ꞊va ˗gɔ ˈˈdhiʋ̈. ˗Bhö nu ˈü zuʋ̈gblüdhi kë ü dëmɛn ˈˈpiʋ̈.›
24 «ˈYö ˗a yökëmɛn ˗totaabhasü ˈö talan do nu ˗a ˗dhɛ bhë, ˈö nu ˈö˗ pö: ‹N dëmɛn, a˗ ˈwɔn ˗dɔ ꞊dhɛ ü ˗bha ˈwɔn ˗yö ˈya˗. ˈDhɛ ˈö ü ˈti pë ta ˗a ˗bha ü pë ˗kan mü, ˈö ˈdhɛ ˈö ü ˈti pë ˗piö ˗a ˗bha, ˈü pë ga ˗nu ˗lö mü.
25 Yö ˈnën ˈö˗ ˗wɔn ˈgü ˈö ˈˈsuʋ̈ ˗yö n ˗kë, ˈyö ü ˗bha ˈwëë˗ talan ˈü˗ nu n ˗dhɛ bhë, ˈa˗ ˗bin ˈˈsɛɛdhö. ˈYö ꞊nɛn, ü ˗kɔ yö ü ˗bha pë ˗bha.›
26 ˈYö˗ dëmɛn ˗ya pö ˗a ˗dhɛ: ‹Yökëmɛn ꞊suu yaa ˗sü, ˈˈfiasü, ü˗ ˈwɔn ˗dɔ ꞊dhɛ ˈdhɛ ˈö n ˈti pë ta ˗a ˗bha a pë ˗kan mü, ˈö ˈdhɛ ˈö n ˈti pë ˗piö ˗a ˗bha ˈa pë ga ˗nu ˗lö mü. Bhi ꞊dede ü ˈti˗ pö ˈˈdhʋ̈ ˗ee?
27 ˈDhɛ ˈö ˈˈdhʋ̈ ˈsa ˈmën ˗kë ˈö ü ˈti ˈdho kö ˈü n ˗man ˈwëëga ˈö bhë ˗a nu ˈwëë˗ ˗kɔ ˈˈdhiʋ̈ ˗mɛn ˗nu ˗dhɛ, kö n ꞊yɛɛ kë ˗sü ˈka ˗a ꞊trɔɔn ˗yö kë ˗a ˗ta kö ˈa˗ ˈsü?
28 «‹ˈWëë˗ talan ˈö˗ ˗gɔ bhë, ˗kaa ˈsü ˗a ˗gɔ ˈka˗ nu mɛn ˈö talan ˗kɔŋ do ˈdhö˗ ˗gɔ bhë ˗a ˗dhɛ.
29 ˗A ˗gɛn ˗mü ꞊dhɛ mɛn ˈö pë ˈdhö˗ ˗gɔ, ˗wo ˗dho ˗a ˈbhaa nu ˗a ˗dhɛ ˈö pë ˗yö ˗kë ˗a ˗gɔ ꞊va ꞊dedewo. ˈˈKɛɛ mɛn ˈö pë ˈbhaa ˈyaa˗ ˗gɔ, ˗a pë ˈˈtɩtɩ ˗ʒiaan ˈö˗ ˗gɔ bhë ˗wo ˗dho ˗a ˈsü ˗a ˗gɔ.
30 Yökëmɛn ˈö˗ ꞊trɔɔn ˈyaa ˈdhö ˈö dɔ bhë, ˗kaa ˗zuö ˈˈkpɛnŋ ˗dhɛtiidhɛ ˈgü. ˗Dhɛ ˈö bhë ˈyö ˗dho ˈˈgbʋ bɔ ˗a ˗bha ˈö ö ˈˈsɔn ˗bhö mü.›
31 «ˈˈTʋ̈ŋ ˈö mɛn Gbö dho nu ˗a ˈka ö ˗bha ˈtɔbhɔdhe ˈgü, kö ˗Zlan ˗bha ˈˈkiö ˗nu ˈˈpɛpɛ ˗wa ꞊kee˗ bhë, ˗yö ˗dho ˗ya ö ˗bha ˗gblüdëdhɛ ˗gbloo ꞊bhlëësü ˈö bhë ˗a ˈgü.
32 ˈˈSɛ ꞊gban ˈˈpɛpɛ ˈgümɛn ˗nu ˗dho ˈdho wo ˈkwëëdhö ˗a ˗kuu ˈˈdhiʋ̈, ˈö ˗an bho ˈkoo ꞊dhɛ ˗kɔ do ˈö ˗tuë ˗maankëmɛn ˗yö ˈˈbhlaa waa ˗bho ˗nu ˗an bho ˗a ˈka wo ˈko ˈˈpiʋ̈ ˗a ˈdhö.
33 ˗Yö ˗dho ˈˈbhlaa ˗nu bɔ ö ˗kɔ ˗së ˈgü, ˈö ˗bho ˗nu bɔ ö ꞊kwaa˗ ˈgü.
34 «˗Ya ö bo ˗kë ˈˈdhʋ̈ ˗sü ˈka, ˗Gblüdë ˗dho ˗a pö mɛn ˗nu ˈö ˈwo˗ ˗kɔ ˗së ˈgü ˗an ˗dhɛ: ‹Mɛn ˈö n Dë ˗ya ˈdhuëë˗ ˈkpɔ ka ˗bha bhë, ˗ka nu kö ˗Gblüdëdhɛ ˈö˗ ˗ya ka ˗bha ˈka ˈö ˗bhɔ ˈˈdhʋ̈ ˈˈsɛ züdɔyi ˈka bhë, ˗ya nu ka ˗dhɛ ˈkɛnŋpë ˈka.
35 ˗A ˗gɛn ˗mü ꞊dhɛ din˗ ˗yö n ˗kë, ˈö ˈka ˗bhöpë nu n ˗dhɛ ˈa˗ ˗bhö. ˈˈYi mü ˗dhɔ ˗yö n ˗kun, ˈö ˈka ˈˈyi nu n ˗dhɛ ˈa˗ mü. A ˗kun ˗dhɛŋ ˈka, ˈö ˈka ka ˗kɔ ˗ya n ˗gɔ ˗së ˈka.
36 Sɔ ˈyaa kun n ˗bha,* ˈˈkɛɛ ka sɔ ˗da n ˗bha. ˈˈYua ˗yö n ˗kë, ˈö ˈka ka ˗zokë n ˈˈpiʋ̈. A ˗kun ˗kaso ˈgü, ˈö ˈka nu ˈka ˗wo n ˗dhɛ.›
37 ꞊Yaa˗ pö ˈˈdhʋ̈, mɛn kpɛnŋdhö ˗nu ˗dho ˗a pö ˗a ˗dhɛ: ‹Yi Dëmɛn, din˗ ˗yö ü ˗kë ˈö ˈyi ˗kpan ü ˗bha ˈyi ˗bhöpë nu ü ˗dhɛ yi ˗mɛɛn ˈka? Ɛɛnˈˈ yi ˗mɛɛn ˈyi ˗kpan ü ˗bha ˗a ˈka kö ˈˈyi mü ˗dhɔ ˗ya ü ˈkun, ˈö ˈyi ü gba ˈˈyi ˈka?
38 Ü ˗dhɛŋ ˗bhɔ yi ˗ta ˈˈtʋ̈ŋ ˗mɛɛn ˈka, ˈö ˈyi yi ˗kɔ ˗ya ü ˗gɔ ˗së ˈka? Ɛɛnˈˈ yi ˗mɛɛn ˈö sɔ ˈyaa kun ˗a ˈka ü ˗bha, ˈö ˈyi sɔ ˗da ü ˗bha?
39 ˈˈYua ˗yö ü ˗kë ɛɛnˈˈ ü ˗kë ˗kaso ˈgü ˈˈtʋ̈ŋ ˗mɛɛn ˈka ˈö ˈyi ˗wo ü ˗dhɛ?›
40 ˗Gblüdë ˗dho ˗a pö ˗an ˗dhɛ: ‹A˗ ˗pö ka ˗dhɛ gagade ˈka ꞊dhɛ, ˈwɔn ˗nu ˈwo bhë ˈka ˗an kë mɛn ˗nu ˈwo n ꞊dhegblü ˗nu ˈka ˗a mɛn ˈˈtɩtɩ do ˗ʒiaan ˗dhɛ, kö man ˈnën ˈö ˈka˗ ˗kë n ˗dhɛ.›
41 «˗Ya ˈgo mü ˗yö ˗dho ˗a pö ˈmɛn ˈwo˗ ꞊kwaa˗ ˈgü ˗an ˗dhɛ: ‹˗Ka bhɔ n ˗dhɛ ꞊taa, ˈˈdhaŋmɛn ˗nu, ka ˗dho ˈdho ˈˈshiʋ̈ ˈö ˈyaa dhuuˈˈ ˈö ˈwo˗ ˗yökë Dügɔmɛn waa˗ ˗bha ˈˈkiö ˗nu ˗an ˗bha ˈka bhë ˗a ˈgü.
42 ˗A ˗gɛn ˗mü ꞊dhɛ din˗ ˗yö n ˗kun, ˈö ka ˈti n gba ˗bhöpë ˈka kö ˈa˗ ˗bhö. ˈˈYi mü ˗dhɔ ˗yö n ˗kun, ˈö ka ˈti n gba ˈˈyi ˈka kö ˈa˗ mü.
43 A ˗kun ˗dhɛŋ ˈka, ˈˈkɛɛ ka ˈti ka ˗kɔ ˗ya n ˗dhɛŋ ˗bha. Sɔ ˈyaa kun n ˗bha, ˈˈkɛɛ ka ˈti sɔ ˗da n ˗bha. ˈˈYua ˗yö n ˗kë, ˈö ˈa kun ˗kaso ˈgü, ˈˈkɛɛ ka ˈti ka ˗zökë n ˈˈpiʋ̈.›
44 ꞊Yaa˗ pö ˈˈdhʋ̈, ˗wo ˗dho ˗a pö ˗a ˗dhɛ: ‹Yi Dëmɛn, yi ˗kpan ü ˗bha ˈˈtʋ̈ŋ ˗mɛɛn ˈka kö din˗ ˗ya ü ˈkun, kö ˈˈyi mü ˗dhɔ ˗yö ü ˗bha, kö ü ˗dhɛŋ ˈka, kö sɔ ˈyaa ü ˗bha, kö ˈˈyua ˗yö ü ˗bha ɛɛnˈˈ kö ü ˗kaso ˈgü, ˈö yi ˈti ü ˗takun?›
45 ˗Yö ˗dho ˗a ˗yɔ bɔ ˗an ˗gɔ ˈö˗ pö: ‹A˗ ˗pö ka ˗dhɛ gagade ˈka ꞊dhɛ ˈwɔn ˗nu ˈwo bhë, ka ˈti ˗an kë mɛn ˗nu ˈö ˈwo n ꞊dhegblü ˗nu ˈka ˗a mɛn ˈˈtɩtɩ do ˗ʒiaan ˗dhɛ, kö man ˈnën ˈö ka ˈti˗ kë n ˗dhɛ.›
46 ˗A mɛn ˗nu ˈwo bhë, ˗an ˈgü ˗dho shiʋ̈ˈˈ ˗toëpö ˈka, ˈö mɛn kpɛnŋdhö ˗nu ˗wo ˗tosɛta ˈö˗ ˈˈdhiʋ̈todhɛ ˈyaa ˈdhö ˗a ꞊slɔɔ.»
-Zoto -a ˈˈpiʋ̈ -wɔn -nu
^ Ɛɛnˈˈ «꞊kpɔɔsü.»
^ ˗An ˗bha ˈˈtʋ̈ŋ ˈgü ꞊kwɛŋzü, Olivö ˈˈɲɔn ˈnën ˈwo˗ yö ꞊laŋba ˗nu ˈgü.
^ Glɛkö ˗nu ˗bha ˈwëë˗ talan do ˈnën ˗tɔ ˈwëë˗ ˈˈkɩdhʋŋ ˗kɔŋ ꞊plɛ waa ˈˈglamu ˗yiishiö.
^ Glɛkö ˗wo kpö ˈö ˗kë «sɔ ˈyaa kun n ˗bha» ˈka bhë, ˗a ˗gɛn dosɛnŋ ˈˈkpaan ˈyaa ˈnën ˈö ˗tɔ ˗to ö ˈkpee˗ ˈka ˗sü. ˗Yö ꞊mɔɔn˗ ˗bha ˈpö ˈö ˗kë mɛn ˈö sɔ ˗tiaandhö ˈyaa˗ ˗bha, ˗a ˈka.
