ˈö Matiö ˗ya ˗bɛnzë 27:1-66
-
Yesu ˗dɔ Pidhatö ꞊kwɛɛ˗ ˗sü (1, 2)
-
Zuda ˗yö bhʋ̈ʋ̈ˈˈ ˗dɔ ö bhɔ ˗bha ˈö ö ˗de zë (3-10)
-
Yesu ˗bha ˗kë Pidhatö ˗kuu ˈˈdhiʋ̈ ˗sü (11-26)
-
ˈˈSɔdha ˗nu ˗bha ꞊wɛɛ˗ ˗dɔ Yesu ˗bha ˗sü (27-31)
-
Yesu ˗dɔ ˈˈdhü ˗bha ˗sü ˈö Gɔlügota (32-44)
-
Yesu ˗bha ga ˗sü (45-56)
-
Yesu ˗wɛɛbhosü (57-61)
-
˗Wo ˗gwö ˗yö Yesu blɔɔndhɛ ˈˈdhiʋ̈ gbögbödhö ˈö ˈwo˗ ˗maan ˗kë (62-66)
27 ˈDhɛ ˈö ˗dhɛ ˗yö ꞊kpɔɔ, ˈyö ˈˈsaabhomɛn ˗nu ˗gɔmɛn ˗nu ˈˈpɛpɛ waa mɛn zii ˗nu ˈwo dho wo ˈkwëëdhö, ˈö ˈwo Yesu zë ˗wɔn ˗yakwëë ˗kë.
2 ˈDhɛ ˈö ˈwo wo bo ˗a ˗lö ˗sü ˈka, ˈyö ˈwo dho ˗a ˈka ˈö ˈwo˗ nu Pidhatö ˈö kun ˈˈsɛkɔɔnmɛn ˈka bhë ˗a ˗dhɛ.
3 ˈDhɛ ˈö Zuda ˈö Yesu ˈˈdhoodɔ bhë ˈö˗ yö ꞊dhɛ ˗wa za dɔ ˗a ˗bha kö ˗wa zë, ˈyö˗ zuʋ̈ˈˈ ˗yö ˗ya za ˗dɔ ˗a ˗bha ˗sü ˗bha. ˈYö ˈwëë˗ ˈˈtamanga ˗kɔŋ ˗yaaga (30) ˈö ˈwo˗ nu ˗a ˗dhɛ bhë ˗a sü, ˈö dho ˈö˗ nu ˈˈsaabhomɛn ˗nu ˗gɔmɛn ˗nu waa mɛn zii ˗nu ˗an ˗dhɛ,
4 ˈyö˗ pö ˗an ˗dhɛ: «ˈMan ˈwɔn yaa kë. Mɛn ˈa˗ ˈˈdhoodɔ ka ˗gɔ bhë pë yaa ˈö ˗dho ˗a kë ˈyaa ˈdhö.» ˈYö ˈwo˗ pö ˗a ˗dhɛ: «˗A ˈdhɛ ˈö bhë yi ˗bha ˈwɔn ˈˈwɛɛ ˈbhaa ˈyaa˗ ˈgü, ü ˗tawɔn ˈnën bhë.»
5 ˈDhɛ ˈwo˗ pö ˈˈdhʋ̈, ˈyö Zuda ˗yö ˈwëë˗ ˈˈtamanga ˗nu bhë ˗an ˗lo ˈˈshia˗ ˗Zlan ˗dhɔkë ˗a ˈgü ˗kɔ ˈgü, ˈyö dho ˈö bhʋ̈ʋ̈ˈˈ dɔ ö bhɔ ˗bha ˈö ö ˗de zë.
6 ˈYö ˈˈsaabhomɛn ˗nu ˗gɔmɛn ˗nu ˗wo ˈwëëga ˈö bhë ˗a ˗lö, ˈö ˈwo˗ pö: «˗A ˗dhɛ ˈyaa˗ ˗bha kö ˈwëëga ꞊suu ˈö yö ˈkwa˗ ˗lo ˈwëë˗ ˗lo ˗dhɛ ˈö ˗Zlan ˗dhɔkë ˗a ˈgü ˗kɔ ˈgü yö ˗a ˈgü, ˗a ˗gɛn ˗mü ꞊dhɛ mɛn ꞊ɲɔɔn ˈwëë˗ ˗mü.»
7 ˈDhɛ ˈö ˗an ˗wo ˗yö to do, ˈyö ˈwo dho ˈwo gbɔdɔmɛn ˗bha ˗dhɛ dhɔ ˈwëë˗ ˈö bhë ˗a ˈka, kö ˗yö kë ˗dhɛŋ ˗nu ˗wɛɛbhodhɛ ˈka.
8 Yö ˈnën ˈö˗ ˗wɔn ˈgü ˈö ˗dhɛ ˈö bhë ˈwo˗ ˗dhɛ ˈbhladhɛ ˈwo˗ dhɔ mɛn ꞊ɲɔɔn ꞊sɔnŋ ˈka ˈö dho ˈö yö ˗a ˈka ꞊dɛɛ ˗bha.
9 Pë ˈö ˗Zlan ˗wodhiʋ̈lomɛn Zedhemi* ˗ya to ˈˈdhiʋ̈ ˈö˗ pö, ˗kɔ ˈö yö ˗a ˈka ˈkodhiʋ̈ ˈyö bhë. ˗Ya ˗pö: «ˈWëë˗ ˈˈtamanga ˗kɔŋ ˗yaaga (30) ˈö ˈwo˗ ˗ya mɛn ˈö bhë ˗a ꞊sɔnŋ ˈka, ˈö Izraɛdhö ˈnën ˈbhaa ˗nu zuʋ̈ˈˈ ˗yö ˗wɩ ˗a ˗bha kö ˈwo˗ ˈdhɔ ˗a ˈka bhë, ˗wa ˗sü
10 ˈö ˈwo˗ nu kö ˗wo gbɔdɔmɛn ˗bha ˗dhɛ ˈdhɔ ˗a ˈka, ꞊dhɛ ˗kɔ ˈö Zoova ˗ya pö ˗a ˈka n ˗dhɛ bhë ˗a ˈdhö.»
11 Yesu ˗kun dɔ ˗sü ˈka ˈˈsɛkɔɔnmɛn ˗kuu ˈˈdhiʋ̈, ˈyö ˈˈsɛkɔɔnmɛn ˗ya dhɛɛˈˈ kpɔ ˈö˗ pö: «Bhi ˈnën ˈü ˗tɔ Zuifö ˗nu ˗bha ˗Gblüdë ˗ee?» ˈYö Yesu ˗ya pö ˗a ˗dhɛ: «Yö ˈnën ˈö bhi ꞊dede ˈü˗ pö bhë.»
12 ˈˈKɛɛ ˈdhɛ ˈö ˈˈsaabhomɛn ˗nu ˗gɔmɛn ˗nu waa mɛn zii ˗nu ˈwo kun ꞊suawɔn ˗nu ˈˈpɛpɛ blɛɛˈˈ ˗ni ˈgü ˗a ˗bha, yö ˈti˗ ˗daa kë ˗an ˗gɔ.
13 ˈYö Pidhatö ˗ya pö ˗a ˗dhɛ: «Pë ˈˈpɛpɛ ˈwo˗ blɛɛˈˈ ˗ni ˈgü ü ˗bha bhë, ˈbhaa˗ man ˗ee?»
14 ˈˈKɛɛ Yesu ˈyii ˈˈwɩ, yö ˈti ö ˈˈdhi bho ˈkwëë˗ kö ˗ya ˗daa kë ˗a ˗gɔ. ˈYö˗ ˈwɔn ˗yö ˈˈsɛkɔɔnmɛn ˈö bhë ˗a kun ꞊dedewo.
15 Pakö ˈwlaan˗ yi ˗ya ˗lo ˗kplawo, ˗kasogümɛn ˈö ˈˈsɛgümɛn ˗nu ˗wo wo ˗kɔ ˗yɛ ˗a ˗bha, ˈˈsɛkɔɔnmɛn ˗ya ˗bho ˗kaso ˈgü.
16 ˗A ˈˈtʋ̈ŋ ˈö bhë ˗a ˈgü kö ˈwɔnyaakëmɛn do ˈö mɛn ꞊gban ˗wa dɔ, ˈö ˈwo˗ ˗dhɛ Badhabasö ˗yö ˗kaso ˈgü.
17 ˈDhɛ ˈö mɛn ˗nu ˗wo bhɔ wo ˈkwëëdhö, ˈyö Pidhatö ˗yö ˗an dhɛɛˈˈ kpɔ ˈö˗ pö: «ˈDe ˈö ˈka˗ ˈˈpiʋ̈ kö ˈa n ꞊kwaa ˗a ˗zü, Badhabasö ˗ee ɛɛnˈˈ Yesu ˈwo˗ ˗dhɛ Klito bhë ˗ee?»
18 ˗A ˗gɛn ˗mü ꞊dhɛ Pidhatö ˗ya ˈwɔn ˗dɔ ꞊dhɛ ꞊druɛɛ ˈnën ˈö ˗an ˗blü ˈyö ˈwo Yesu kun ˈwo nu ˗a ˈka ö ˈˈpiʋ̈ bhë.
19 ˗Ya ˈgo mü ˈzü, ˈdhɛ Pidhatö kun ˗ya ˗sü ˈka zakandhɛ ˈgü, ˗a ˗bha dhebɔ ˗yö mɛn ˗bɔ ˗a ˈˈpiʋ̈ ˈö˗ pö: «˗Bhö ü ꞊kwaa gɔndënën ˈö bhë ˗a ˗zü, pö ˈyaa˗ ˗bha. ˗A ˗gɛn ˗mü ꞊dhɛ a saanˈˈ ˗sü ˈˈɲɛɛn ˈˈsuʋ̈sü do ˈbhaa ˈgü gbeŋ ꞊dɛɛ ˗a ˗wɔn ˈgü.»
20 ˈˈKɛɛ ˈˈsaabhomɛn ˗nu ˗gɔmɛn ˗nu waa mɛn zii ˗nu ˗wo mɛn kpö ˈwo kun mü bhë ˗an ˗blü kö ˗wa pö Pidhatö ˗dhɛ ˗yö Badhabasö bho ˗kaso ˈgü, kö ˗yö Yesu zë.
21 ˈYö ˈˈsɛkɔɔnmɛn ˗yö ˗an dhɛɛˈˈ kpɔ ˈzü ˗dɛɛwo ˈö˗ pö: «Mɛn ꞊plɛ ˈwo yö ˗a de ˈö ˈka˗ ˈˈpiʋ̈ kö ˈa n ꞊kwaa˗ ˗zü?» ˈYö ˈwo˗ pö: «Badhabasö.»
22 ˈYö Pidhatö ˗ya pö ˗an ˗dhɛ: «ˈDhɛ ˈö ˈˈdhʋ̈ Yesu ˈö ˈwo˗ ˗dhɛ Klito bhë ˈa˗ kë ꞊dhɛ?» ˈYö ˗an ꞊gban ˈˈpɛpɛ ˗wa ˗yɔ bɔ ˈwo˗ pö: «˗Bhö ˗a dɔ ˈˈdhü ˗bha!»
23 ˈYö Pidhatö ˗ya pö: «ˈMën ˗kë? ˗Mën ˗wɔn yaa ˈö˗ ˗kë ka ˈka?» ˈˈKɛɛ ˗an ꞊gban ˈˈpɛpɛ ˗kun ˈˈgbla ˗ni ˈgü ˗kplawo ˈö ˈwo˗ pö: «˗Bhö ˗a dɔ ˈˈdhü ˗bha!»
24 ˈDhɛ ˈö Pidhatö ˗ya yö ꞊dhɛ ö ˗wo ˈyaa ˈwɔn ˈkun ˗ni ˈgü, ɛɛnˈˈ ˈzü ö ˈti˗ kë ˗së ˗bhluubhluudhe ˗dho ˗da, ˈyö ˈˈyi sü ˈö ö ˗kɔ ˗zu mɛn ꞊gban ˈˈpɛpɛ ˈˈɲan ˈˈdhiʋ̈ ˈö˗ pö ˗an ˗dhɛ: «N ˗kɔ ˈyaa gɔndënën ˈö yö ˗a zë ˗wɔn ˈgü,* ka ˗bha ˈwɔn ˈnën bhë.»
25 ˈYö ˗an ꞊gban ˈˈpɛpɛ ˗wa pö: «꞊Ii ˗yö ˗kë ˈˈdhʋ̈, ˗a ˗bha ga ˗wɔn* ˗yö kë yaa yi ˗bha ˈnën ˗nu yi ˗bha ˈwɔn ˈka.»
26 ˈDhɛ ˈwo˗ pö ˈˈdhʋ̈, ˈyö ö ꞊kwaa Badhabasö ˗zü, ˈyö˗ pö ˗wo Yesu ˗man ˗klaaga ˈka kö ˗wa zë ˈˈdhü ˗bha.
27 ˈYö Pidhatö ˗bha ˈˈsɔdha ˗nu ˗wo Yesu kun ˈö ˈwo ˗da ˗a ˈka ˗a ˗gɔ ˈkɔɔ, ˈyö ˈˈsɔdha ˗nu ˈˈpɛpɛ ˈwo ꞊klëën ˗a ˗zü.
28 ˈYö ˈwo˗ ˗bha sɔ ˗nu bho ˗a ˗bha, ˈö ˈwo sɔ ˗kɔn ˗zɔɔndhö do ˈö man ˗gbangbandhö ˗a ˗da ˗a ˗bha.
29 ˈYö ˈwo ˈˈglɛɛn ˈfaan˗ ˗yökë ˈwo˗ ˗ya ˗a ˗gɔa, ˈö ˈwo ˗kadhüga do ˗da ˗a ˗kɔ ˗së ˈgü, ˈyö ˈwo yö wo kpɔn ˈgü ˗a ˈˈdhiʋ̈ ˈö ˈwo ꞊wɛɛ˗ dɔ ˗a ˗bha ˈwo˗ pö: «Zuifö ˗nu ˗bha ˗Gblüdë, ˈbha ꞊bo!»
30 ˈYö ˈwo wo ˈˈdhidhi ˗nu bho ˗a ˗bha, ˈö ˈwo ˗kadhü sü ˈwo ˗ya ˗a ˗man ˗sü ˗bha ˗a ˈka ˗a ˗gɔ ˗bha.
31 ˈDhɛ ˈwo wo bo ꞊wɛɛ˗ ˗dɔ ˗a ˗bha ˗sü ˈka, ˈyö ˈwo sɔ ˗kɔn ˈö bhë ˗a bho ˗a ˗bha ˈö ˈwo˗ ˗bha sɔ ˗nu ˗da ˗a ˗bha. ˈDhɛ ˈwo wo bo, ˈyö ˈwo dho ˗a ˈka kö ˈwo˗ dɔ ˈˈdhü ˗bha.
32 ˈDhɛ ˈwo kun ˈgo ˗ni ˈgü ˗a ˈka ˈplöö, ˗wo ˗kpan gɔndënën do ˈwo˗ ˗dhɛ Simɔn ˈö go Silɛnö ˗a ˗bha, ˈyö ˈwo˗ kun kö ˗yö Yesu ˗bha ˗ga ˗a ˗ta ˗dhü ˈö bhë ˗a bun.
33 ˈDhɛ ˈwo dho ˈwo ˗lo ˗dhɛ ˈwo˗ ˗dhɛ Gɔlügota bhë ˗a ˗bha, (꞊waa˗ pö ˈˈdhʋ̈ ˗a ˗gɛn ˈnën ˈö ˗tɔ «mɛn ˗gɔ ˈˈklaŋ ˗lo ˗dhɛ»)
34 ˈyö ˈwo we ˈö ˈwo pë ˈˈyi ˈˈgüüsü ꞊kaan ˗a ˈka ˈwo˗ nu Yesu ˗dhɛ. ˈˈKɛɛ ˈdhɛ ˈö ö ˗bɛn ˗yɛ ˗a ˗bha, yö ˈti ˈˈwɩ ˗a ˗bha kö ˈö˗ mü.
35 ˈDhɛ ˈö ˗kë ˈˈdhʋ̈ ˈyö ˈwo˗ dɔ ˈˈdhü ˗bha. ˈDhɛ ˈwo wo bo ˈyö ˈwo˗ ˗bha sɔ ˗nu ˗gblü wo ˈko ˗nu ˗ta ˗zë ˈˈkpʋ̈ü kë ˗sü ˈka.
36 ˈYö ˈwo dho ˈˈshia˗ ˈwo ˈɲaannu mü kö ˈwo˗ ˗maan kë.
37 ˗Wo ˗go mü ˈzü ˈö pë ˈö˗ zë ˗gɛn ˈka ˈwo˗ ˗ya ˗a ˗gɔ ˗ta ˈˈdhuŋ ˈö ˈwo˗ pö: «Yesu, Zuifö ˗nu ˗bha ˗Gblüdë ˈnën ˈö ꞊nɛn.»
38 ˗Wo pëyaakëmɛn ˗nu ꞊plɛ ˗dɔ ˈˈdhü ˗bha ˈpö Yesu ˈˈsuee. ˗A mɛn do ˗kun ˗a ˗kɔ ˗së ˈgü, ˈö˗ mɛn do kun ˗a ꞊kwaa˗ ˈgü.
39 Mɛn ˗nu ˈwo kun ʒiö ˗ni ˈgü ˗dhɛ ˈö bhë ˗a ˈgü ˗wa ˗kpan Yesu ˗bha, ˗wo ˈsi ˗bho ˗a ˗gɔ ˈö ˈwo wo ˗gɔ ˈgü zë ˗a ˗dhɛ,
40 ˈö ˈwo˗ pö: «Bhi ˈü˗ pö ü ˗dho ˗Zlan ˗dhɔkë ˗a ˈgü ˗kɔ ˈwü kö ˈü˗ dɔ ˗dhɛkpaɔyi ˗yaaga ˈˈkpaan ˈka bhë, ˗bhö ü ˗de dha ˗kɛɛ! ˗Ya kë ꞊dhɛ ˗Zlan Gbö ˗mü ü ˈka ꞊dedewo, ˗bhö ˈgo ˈˈdhü ˗bha ˈü yɔɔˈˈ!»
41 ˈˈSaabhomɛn ˗nu ˗gɔmɛn ˗nu, ˈtɔŋ˗ ˗gɔmɛn ˗nu waa mɛn zii ˗nu ˗wo ˗kun ꞊wɛɛ˗ dɔ ˗ni ˈgü ˗a ˗bha ˈpö ˈö ˈwo˗ pö:
42 «˗Ya mɛn ˈˈwɛɛ ˗nu dha, ˈˈkɛɛ ˈyaa ꞊mɔɔn˗ ˗bha kö ˗yö ö ˗de dha ˗wa! ˗Ya kë ꞊dhɛ Izraɛdhömɛn ˗nu ˗bha ˗Gblüdë ˗mü ˗a ˈka, ˗yö ˈgo ˈˈdhü ˗bha ˗yö yɔɔˈˈ kö ˈkwa˗ yö. ꞊Yaa˗ kë ˈˈdhʋ̈, kwa ˗dho ˈdhaŋ˗ bho ˗a ˈˈdhiʋ̈.
43 ˗Yö ö ˗zo yö ˗Zlan ˗dhɛ ˈö˗ pö: ‹˗Zlan Gbö ˗mü n ˈka.› ˈDhɛ ˈö ˈˈdhʋ̈ ˗ya kë ꞊dhɛ ˗a ˗wɔn ˗yö ˗Zlan ˗gɔ ˈˈgbɩɩ˗, ˗yö ˗a dha kö ˈkwa˗ yö ˗kɛɛ.»
44 Pëyaakëmɛn ˗nu ˈwo ˗an dɔ ˈˈdhü ˗bha Yesu ˈˈsuee bhë, wo ˗de ˈpö ˗wo ˗kun ˈˈwɩ ˗ni ˈgü ˗a ˗dhɛ.
45 ˈÖ sü ˈɲaan˗ ˗bha ˗ya mɛn ˗gɔ ꞊zinŋ ˈgü ˈˈtʋ̈ŋ ˗bha* ˈö dho ˈö yö ˗a ˈka ˈˈlɛlɛ ˗kɔŋ do ˈö ga ˈˈsoodhu* ˗bha ˈˈdooka, ˗dhɛ ˗yö ˗tröö ˈsënsëndhö ˈˈsɛ ˗ta.
46 ˈDhɛ ˈö ˈkwa dɔ ˈˈdooka ˈˈlɛlɛ ˗kɔŋ do ˈö ga ˈˈsoodhu ꞊tɛɛ˗ ˗bha, ˈyö Yesu ˗yö ˗gbla ˈˈgbɩɩ˗ ˈö˗ pö: «Eli, Eli, lama sabatani?» ˗A ˗gɛn ˈnën ˗tɔ: «N ˗man ˗Zlan, n ˗man ˗Zlan, ˈmën ˗kë ˈü ˗kan n ˗bha?»
47 ˈDhɛ mɛn ˗nu ˈö ˈwo kun dɔ ˗sü ˈka mü bhë ˈwo˗ man ˈˈdhʋ̈, ˈyö ˈwo ˗ya ˗a pö ˗sü ˗bha: «˗Yö Edhi ˗dhɛ ˗ni ˈgü ˗wa.»
48 ˈYö˗ mɛn do ˗yö ˗bia ˗lö ˈö dho ˈö ˗fuu sü ˈö˗ ˗da we giisü ˈˈyi ꞊bhaa, ˈyö˗ ˗ya ˗kadhü ˈˈdhiʋ̈ ˈö˗ nu ˗a ˗dhɛ kö ˗ya mü.
49 ˈˈKɛɛ ˈyö˗ mɛn ˗nu ˈwo to ˈwo˗ pö: «˗Bhö ü ꞊kwaa˗ ˗zü kö ꞊ya kë ꞊dhɛ Edhi ˗dho nu ˈö˗ dha ˈkwa˗ yö.»
50 ˈYö Yesu ˗yö ˗gbla ˈzü ˈˈgbɩɩ˗ ˈka, ˈö to mü ˈö ga.*
51 ˈDhɛ ˈö ˗kë ˈˈdhʋ̈, ˈyö ˗ʒiö ˈˈkpan ˈˈdhiʋ̈ ˗sɔ ˈö ˗Zlan ˗dhɔkëdhɛ ˈgü ˈö ˗pɛ ö ˈgü ꞊plɛ, ˈö go ˗a ˈka ˈˈdhuŋ ˈö dho ˈö yö ˗a ˈka ˈˈshia˗, ˈyö ˈˈsɛ ˗yö ꞊zii ˈö ˗gwö gbɔŋ ˗nu ˗wo ꞊pɛɛ.
52 ˈYö blɔɔndhɛ ˗nu ˈˈdhi ˗yö ˗pʋ, ˈö mɛn ˈˈslʋ̈ʋ̈slʋ̈ ˗nu ˈö ˗wa ga* ˗an ꞊vadhɛ bun ˗yö yö ˈˈkpɛnŋ
53 (ˈyö mɛn ˗nu ˈwo go blɔɔndhɛ ˗nu ˈwo bhë ˗an ˈgü kö Yesu ˗ya ˈgo ga ˈgü, ˈwo ˗da ˈˈkwipö ˈˈslʋ̈ʋ̈slʋ̈ ˈö bhë ˗a ˈgü), ˈö mɛn ꞊vadhɛ ˗wo ˗kpan ˗an ˗bha.
54 ˈDhɛ ˈö ˈˈsɔdha ˗gɔmɛn waa mɛn ˈö waa˗ ˗nu ˈwo kun Yesu ˗maan kë ˗ni ˈgü bhë ˈwo ˈˈsɛ ˗bha ꞊zii ˗sü waa ˈwɔn ˗nu ˈwo kë ˗ni ˈgü ˗an yö, ˈyö ˈˈsuʋ̈ ˗yö ˗an ˗kë ꞊dedewo ˈö ˈwo˗ pö: «˗A zɔɔdhɛ ˈyaa ˈdhö, mɛn ˈö yö ˗Zlan Gbö ˗mü.»
55 Dhebɔ ˗nu ꞊va ˈbhaa ˗wo ˗kun dɔ ˗sü ˈka mü ꞊gblɛɛn ˈpö ˈwo ˗dhɛ ˗ga. Wo ˈnën ˈwo kun ʒiö ˗ni ˈgü Yesu ꞊kee˗ ˈö ˈwo go ˗a ˈka Galile ˗sɛ ˈgü kö ˈwo˗ ˗takun.
56 Dhebɔ ˗nu ˈwo ˈˈdhʋ̈, ˗a mɛn ˈbhaa ˗nu ˈnën ˈwo ˗tɔ Madhi ˈö go Madala waa Madhi ˈdhɛ ˈö ˗kë Zakö waa Zoze ˗an dhe ˈka waa Zebede gbö ˗nu dhe.
57 ˈDhɛ ˈö ˈkwa dɔ ˈˈdooka, ˈyö ꞊nɔɔnmɛn do ˈö ˈwo˗ dhɛ Zozɛfö ˈö go Adhimate ˗yö nu. Yö ˗de ˈpö ˗yö ˗kun Yesu ˗bha gwëëˈˈ do ˈka.
58 ˈYö dho Pidhatö ˈˈpiʋ̈, ˈö˗ pö ˗a ˗dhɛ ˗yö Yesu ꞊glöö nu ö ˗dhɛ. ˈYö Pidhatö ˗ya pö ˗wa nu ˗a ˗dhɛ.
59 ˈYö Zozɛfö ˗yö Yesu ꞊glöö sü, ˈyö yɩɩga sɔ ꞊bhlëësü ˈö ˗dhii ga do ˈyaa˗ ˗bha ˗a sü ˈö˗ ꞊plʋʋ ˗a ˈka.
60 ˈYö dho ˈö˗ ˗wɔ ö ˗de ˗bha mɛn ˗wɛɛbhodhɛ ˈö˗ pɔn ˗gwö ˈgü, ˈö ꞊kun ˗dɛɛ bhë ˗a ˈgü. ˈYö ˗gwö kpö ˈkpikikpiki do ꞊gblʋʋ ˈö˗ yö ˗a ˈˈdhiʋ̈, ˈyö ˗ʒiö.
61 ˈˈKɛɛ Madhi ˈö go Madala waa Madhi do ˗sü bhë, ˗wo ˗to ˗ya ˗sü ˈka ˗dhɛ ˈö bhë ˗a ˈgü Yesu bun ˈˈdhiʋ̈ mü.
62 ˈWɔn ˗nu ˈwo bhë ˗wo ˗kë ˈˈdhʋ̈ ꞊glooyi ˗wayi ˈka. ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö ˈˈsaabhomɛn ˗nu ˗gɔmɛn ˗nu waa Fadhiziɛn ˗nu ˗wo dho Pidhatö ˈˈpiʋ̈,
63 ˈyö ˈwo˗ pö ˗a ˗dhɛ: «Yi dëmɛn, ꞊suamɛn ˈö bhë ˈwɔn do ˈbhaa ˈö˗ pö kö ˗yö ꞊kun ö ˈˈɲaan yi ˗zo ˗ya ˗buö ˗a ˈka. ˗Ya ˗pö: ‹A ˗dho ˈgo ga ˈgü ˗dhɛkpaɔyi ˗yaaga ˗naan ˈka.›
64 ˈDhɛ ˈö ˈˈdhʋ̈ ˗bhö mɛn bɔ kö ˗wa blɔɔndhɛ ˗maan kë ˗yö ˈdho ˗yö yö ˗a ˈka ˗dhɛkpaɔyi ˗yaaga ˗naan ˗bha, kö ˗a ˗bha gwëëˈˈ ˗nu ˈwa ˗dho nu ˈwo˗ ꞊glöö ꞊kwaan ˈö ˈwo˗ pö mɛn ˗nu ˗dhɛ: ‹˗Ya go ga ˈgü!› ˈYaa ˈˈdhʋ̈, kö ꞊sua ˈdhɛ ˈö bhë ˗wa kë, ˗yö ˗dho ʒiö ˗a ˗blɛɛsü ˗ta.»
65 ˈYö Pidhatö ˗ya pö ˗an ˗dhɛ: «˗Ka ˈˈsɔdha ˗nu ˈsü ˈka ˈdho kö ˗wa blɔɔndhɛ ˗maan kë ꞊dhɛ ˗kɔ ˈö ˈka˗ ˈˈpiʋ̈ ˗yö kë ˗a ˈka ˗a ˈdhö.»
66 ˈDhɛ ˈö ˗kë ˈˈdhʋ̈, ˈyö ˈwo dho ˈö ˈwo ˗gwö ˈö kun blɔɔndhɛ ˈö bhë ˗a ˈˈdhiʋ̈ ˗a yö mü gbögbödhö ˈö ˈwo˗ ꞊duaa ˗kë, ˈö ˈwo ˈˈsɔdha ˗nu dɔ ˗a ˈˈdhiʋ̈ kö ˗wa ˗maan kë.
-Zoto -a ˈˈpiʋ̈ -wɔn -nu
^ Matiö ˗bha ˈˈtʋ̈ŋ ˈgü, ꞊waa˗ pö Zedhemi, ˗yö ꞊mɔɔn˗ ˗bha ˈö ˗kë ˗Zlan ˗wodhiʋ̈lomɛn ˗nu ˈˈpɛpɛ ˗bha ˈsëëdhɛ ˗be ˗nu ˈka.
^ Glɛkö ˗wo ˈgü ˈyö ˗tɔ «˗a ꞊ɲɔɔn ˈyaa n ˗kɔ ˗bha.»
^ Glɛkö ˗wo ˈgü ˈyö ˗tɔ «˗a ꞊ɲɔɔn.»
^ ˗Glɛkö ˗wo ˈgü ˈyö ˗tɔ «ˈˈlɛlɛ ˈˈsɔɔdo ˗naan.»
^ ˗Glɛkö ˗wo ˈgü ˈyö ˗tɔ «ˈˈlɛlɛ ˈˈseishiö ˗naan.»
^ Glɛkö ˗wo ˈgü ˈyö ˗tɔ «ˈö˗ ˈniin˗ ˗yö ˗puö.»
^ Glɛkö ˗wo ˈgü ˈyö ˗tɔ «ˈö ˈwo kun yi zë ˗ni ˈgü.»
